Zɔbu

2 “Andɛ bɔbɔ’n, ń plán lele n su yaciman nun.*+

Fɛfɛlɛ’n ti’n, n leman wunmiɛn kun.

 3 Sɛ ɔ ti kɛ n si lika nga n kwla wun Ɲanmiɛn’n,+

nn ń kɔ́ kan ɔ tran lɔ’n.+

 4 Ń fá min ndɛ liɛ’n ń kɔ́ i ja su,

ń kán ndɛ kpanngban kpa ń fá kplí min ti.

 5 Ń wún wafa ng’ɔ́ tɛ́ min su’n,

yɛ ń fá min ɲin ń síe i ndɛ ng’ɔ́ kán klé min’n su kpa.

 6 ?Ɔ́ fɛ́ i wunmiɛn dan’n yɛ ɔ nin min kún-ɔn?

Cɛcɛ, saan ɔ́ síe i su min nuan bo.+

 7 Lɔ’n, sran ng’ɔ ti kpa’n nin i be kwla siesie be afiɛn ndɛ,

yɛ kɛ min Jɔlɛ Difuɛ’n ko se kɛ min ndɛ yo fɛ’n, be su manman min ndɛ kun.

 8 Sanngɛ sɛ n kɔ wia afiliɛ lɔ’n, ɔ nunman lɔ.

Kɛ n sa min sin kusu’n, n wunmɛn i.

 9 Kɛ ɔ́ yó like wie bɛ su lɔ’n, n kwlá wunmɛn i.

I sin’n, ɔ kpɛ i wun fama su, sanngɛ n wunmɛn i.

10 Sanngɛ ɔ si atin nga n fali’n.+

Kɛ ɔ ko sa min ko nian’n, ń yó kɛ sika ɔkwlɛ

jrɛiin’n sa.+

11 N nantili i ja osu’n nun sɛsɛsɛ.

M’an yacimɛn i atin’n lɛ, n fali su titi.+

12 Mmla ng’ɔ fin i nuan fiteli’n, m’an yacimɛn i lɛ.

Ndɛ ng’ɔ kannin’n, n fa sieli min klun kpa+ trali nga be waan n yo’n* su.

13 ?Kɛ ɔ ko fua kɛ ɔ́ yó like kun’n, wan yɛ ɔ kwla jrɛn i ɲrun-ɔn?+

Kɛ i waan ɔ́ yó like kun’n, ɔ yo.+

14 Afin like ng’ɔ sunnzunnin* i min lika’n, ɔ́ yó i kwlaa.

Yɛ ɔ fɛli i wunsu ninnge kpanngban sieli.

15 I sɔ’n ti yɛ i dunman nun ti’n n koko-ɔ.

Kɛ n bu i akunndan sa’n, srɛ kun min dan.

16 Ɲanmiɛn yoli maan min klun titili min,

yɛ Sran m’ɔ Kwla Like Kwlaa Yo’n ti’n, srɛ kunnin min.

17 Sanngɛ aosin dan’n nin-a kwlá muanman min nuan’n su,

yɛ aosin m’ɔ kata min ɲrun’n nin-a kwlá yoman sɔ kusu.