Zeremin
13 Zoova seli min kɛ yoo: “Kɔ ko to cisu kun mɔ lɛn yɛ be fa yoli’n, naan fa ci ɔ bo. Sanngɛ nán maan nzue kɛn i.” 2 N ko toli cisu’n, kɛ nga Zoova seli min kɛ n yo’n sa. Yɛ n fa cili min bo-ɔ. 3 Zoova kannin ndɛ kleli min ekun. Ɔ seli min kɛ: 4 “Fa cisu nga a toli’n, mɔ a fa cili ɔ bo’n naan kɔ Efrati’n i nuan lɔ. Kpɛkun ko fiɛ i yɔbuɛ buɛ kun nun.” 5 Yɛ n ɔli-ɔ. N ko fiɛli i Efrati’n i nuan lɔ, kɛ nga Zoova seli min kɛ n yo’n sa.
6 Sanngɛ kɛ i osu cɛli kpa’n, Zoova seli min kɛ: “Jaso naan kɔ Efrati’n i nuan lɔ. Ko fa cisu nga n seli ɔ kɛ a ko fiɛ i lɔ’n.” 7 Yɛ n ɔli Efrati’n i nuan lɔ-ɔ. N fuli buɛ nga i nun yɛ n fa fiali’n naan m’an fa. Kpɛkun n wunnin kɛ cisu’n w’a saci naan be kwlá fa yoman like fi kun.
8 Yɛ Zoova kannin ndɛ kleli min ekun-ɔn. Ɔ seli min kɛ: 9 “Zoova waan yoo: ‘Kɛ ń má núnnún Zidafuɛ’m be tutre’n nin Zerizalɛmunfuɛ’m be tutre dan’n kɛ ngalɛ’n sa.+ 10 Klunwifuɛ nga’m be waan be nantiman min nuan ndɛ’n su.+ Like nga be bɔbɔ be awlɛn’n su be bo kɛ be yo’n yɛ be yo-ɔ.+ Be su amuin’m be su, be sɔ be, kpɛkun be koto be bo. Ɔ maan be agualiɛ’n yó kɛ cisu ng’ɔ o yɛ’n mɔ be kwlá fa yoman like fi kun’n sa.’ 11 Zoova waan yoo: ‘N fali Izraɛli nvle wunmuan’n nin Zida nvle wunmuan’n n cili min bo, kɛ nga sran kun fa cisu ci i bo’n sa. N yoli sɔ naan be kaci min nvle,+ naan be yo ɲɛnmɛn, yɛ be yo naan min dunman’n fu+ naan be manman min. Sanngɛ be ɲin w’a yiman min.’+
12 “Yɛ kan ndɛ yɛ’n kle be. Se be kɛ: ‘Zoova m’ɔ ti Izraɛli i Ɲanmiɛn’n waan yoo: “Ɔ fata kɛ be fa duvɛn gua sɛ dandan’m be kwlaa be nun naan be yi.”’ Yɛ bé wá tɛ́ ɔ su kɛ: ‘E bɔbɔ e si kɛ ɔ fata kɛ be fa duvɛn gua sɛ dandan’m be kwlaa be nun naan be yi.’ 13 I sin’n, se be kɛ: ‘Zoova waan yoo: “Ń wá mán nvle nga’n i nunfuɛ’m be kwlaa, nin famiɛn nga be tran Davidi i bia’n su’n, nin Ɲanmiɛn ɲrun jranfuɛ mun, nin Ɲanmiɛn nuan ijɔfuɛ mun, ɔ nin Zerizalɛmunfuɛ’m be kwlaa be nzan. Bé nɔ́n i lele bé bó.”+ 14 Zoova waan yoo: “Yɛ i siɛ-o, i ba-o, ń fá bé ń fín be wiengu.+ N su siman be aunnvɔɛ, n su kokoman be, yɛ be su yoman min annvɔ. Like fi su tanndanman min ɲrun naan m’an nunnunman be.”’+
15 Amun sie amun su kpa
be tie.
Nán amun tu amun wun, afin Zoova w’a kan ndɛ’n.
16 An manman Zoova m’ɔ ti amun Ɲanmiɛn’n.
Sɛ ɔ timɛn i ti’n, ɔ́ yó maan lika’n lú tritritri.
Yɛ kɛ sɛnzɛ’n ko tɔ’n, amun ja’m bé séli oka’m be su.
Amún kúnndɛ kɛ lika’n kpaja,
sanngɛ ɔ́ yó maan lika’n lú tritritri.
Ɔ́ yó maan lika m’ɔ kpaja’n ɔ́ káci aosin tuun.+
17 Yɛ sɛ amun waan amun sieman amun su’n,
amun tutre’n ti’n, ń fía ń sún.
Ń sún lelele min ɲinmuɛn nzue’n bú sa puu.+
Afin be trali Zoova i sran mun+ ɔli.
18 Se famiɛn’n nin famiɛn’n i nin’n*+ be kɛ: ‘Amun tran asiɛ wun,
afin amun famiɛn kle klanman’n w’a flo amun ti w’a tɔ.’
19 Be ɲinnin* klɔ nga be o ngua lɔ lika’n nun’n be anuan mun. Sran fi nunman lɛ naan w’a
tike be.
Be trali Zidafuɛ’m be kwlaa ɔli. Sran ba kun sa w’a kaman lɛ.+
20 Man ɔ ɲin su naan nian be nga be fin nglo lɔ lika’n nun be su ba’n.+
?Bua nga be fa be wlali ɔ sa nun’n be o nin? ?Ɔ bua nglanmannglanman’m be o nin?+
21 ?Kɛ ɔ janvuɛ kpa nga a fali ɔ wun mantannin be lele’n+
bé wá klé ɔ ɲrɛnnɛn’n á sé sɛ?
?Ɔ ku nun su yoman ɔ ya kɛ bla ng’ɔ su wu ba’n i liɛ’n sa?+
22 Á wá úsa ɔ wun kɛ: ‘?Ngue ti yɛ sa sɔ’m be tɔli min su-ɔ?’+
Sa tɛ dan nga a yoli’n ti-ɔ. I sɔ’n ti yɛ be titili ɔ tralɛ’n i ja ngua lika’n nun+
kpɛkun be yoli ɔ ja sin nanndi’n i like yaya’n niɔn.
23 ?Kisifuɛ kun* kwla kaci i wunnɛn kplo’n? ?Kangale kun kwla kaci i wunnɛn ng’ɔ tata nun’n?+
Sɛ be kwla yo sɔ’n, nn amun mɔ sa tɛ yolɛ’n yɛ be kleli amun’n
amun kwla kaci be yo
sa kpa.
24 Ń trú amun nun kɛ aunmuan ng’ɔ fin aawlɛ flɛnnɛn’n nun lɔ’n ɔ fa tru ijre kee’n nun’n sa.+
25 Zoova waan yoo: “Ɔ like liɛ nga a ko ɲɛn i’n yɛ ɔ o lɛ-ɔ. Like nga n sunnzun sieli wɔ’n yɛ ɔ o lɛ-ɔ.
Afin ɔ wla fili min,+ yɛ a lafili ato ndɛ’m be su.+
26 I sɔ’n ti’n, ń mán ɔ wun tralɛ’n su lele ɔ́ jú ɔ ɲrun lika’n su,
kpɛkun bé wún ɔ bo,+
27 nin ɔ bian mɔ a kunndɛli i min bo’n,+ ɔ nin kpankpanlɛ mɔ kɛ ɔ like’n ko fu wɔ’n a kpankpan’n,
ɔ nin ɔ tekle bolɛ kainkain’n.*
N wunnin sa kainkain nga a yo be
oka’m be su nin blo lɔ’n.+
Ee Zerizalɛmun, yako!
?Naan á ká fiɛn’n nun sa trilili?”+