1 Be Ɲoliɛ

15 Davidi kplɛnnin i sua wie mun ekun Davidi Klɔ’n su lɛ. Ɔ siesieli lika nga be ko sie Ɲanmiɛn Kpli i Alaka’n, kpɛkun ɔ kplannin tannin sua kun naan be fa sie nun.+ 2 I sin’n ɔ seli kɛ: “Sɛ w’a yoman kɛ Levifuɛ mun sa’n, sran fi leman atin suaman Ɲanmiɛn Kpli i Alaka’n. Afin be yɛ Zoova fali be naan be sua Zoova i Alaka’n naan be di junman be mɛn i tititi-ɔ.”+ 3 Davidi yiali Izraɛlifuɛ’m be kwlaa Zerizalɛmun lɛ naan be ko fa Zoova i Alaka’n be bla lika ng’ɔ siesieli’n nun.+

4 Davidi yiali Aarɔn i osu’n nunfuɛ mun+ nin Levifuɛ mun.+ 5 Keati osu’n nun’n: Uriɛli m’ɔ ti be su kpɛn’n nin i niaan bian ya kun ablaɔn (120). 6 Merari osu’n nun’n: Asaya+ m’ɔ ti be su kpɛn’n nin i niaan bian ya nɲɔn ablaɔn (220). 7 Gɛɛsɔmun osu’n nun’n: Zoɛli+ m’ɔ ti be su kpɛn’n nin i niaan bian ya kun ablasan (130). 8 Ɛlizafan+ osu’n nun’n: Semaia m’ɔ ti be su kpɛn’n nin i niaan bian ya nɲɔn (200). 9 Ebrɔn osu’n nun’n: Eliɛli m’ɔ ti be su kpɛn’n nin i niaan bian ablaɔcuɛ (80). 10 Uziɛli+ osu’n nun’n: Aminadabu m’ɔ ti be su kpɛn’n nin i niaan bian ya kun blu-nin-nɲɔn (112). 11 Asa ekun’n, Davidi flɛli Zadɔku+ nin Abiataa+ mɔ be ti Ɲanmiɛn ɲrun jranfuɛ’n, nin Uriɛli, nin Asaya, nin Zoɛli, nin Semaia, nin Eliɛli yɛ Aminadabu mɔ be ti Levifuɛ’n. 12 Kpɛkun ɔ seli be kɛ: “Amun ti Levifuɛ’m be awlobo’m be su kpɛn. Amun nin amun niaan mun, amun yo amun wun sanwun. I sin’n, amun ko fa Zoova m’ɔ ti Izraɛli Ɲanmiɛn’n i Alaka’n be bla lika nga n siesieli’n nun. 13 I kpɛ klikli su’n, nán amun yɛ amun suali Alaka’n niɔn.+ Y’a kunndɛman ajalɛ ng’ɔ fata kɛ e nanti su’n.+ I sɔ’n ti’n, Zoova m’ɔ ti e Ɲanmiɛn’n fali e wun ya dan kpa, yɛ ɔ kleli e nun.”+ 14 Ɲanmiɛn ɲrun jranfuɛ mun nin Levifuɛ’m be yoli be wun sanwun naan bé kó fá Zoova m’ɔ ti Izraɛli Ɲanmiɛn’n i Alaka’n bé bá.

15 I sin’n, Levifuɛ’m be ko suali Ɲanmiɛn Kpli i Alaka’n. Be fɛli i waka nga be fa sua’n+ be sieli be wati su, kɛ nga Zoova seli Moizi kɛ be yo’n sa sɛsɛsɛ. 16 Yɛ Davidi seli Levifuɛ’m be su kpɛn mun kɛ be kpa be niaan nga be ti jue tofuɛ’n. I waan be to jue aklunjɔɛ su, naan be bo miziki bolɛ ninnge nga mun: Miziki bolɛ ninnge nga be le ɲanman’n, nin jru,+ yɛ sɛnbali.+

17 Levifuɛ’m be kpali be akpasua’n nun sran wie mun. Sran sɔ mun yɛ: Zoɛli i wa Eman,+ Berekia i wa Azafu,+ yɛ Kusaia i wa Etan+ m’ɔ fin Merari i awlobo’n nun’n. 18 Be niaan nga be uka be mɔ be o akpasua nɲɔn su’n+ nun’n be yɛ: Zakari, Bɛnin, Zaaziɛli, Semiramɔtu, Zeyiɛli, Unin, Eliabu, Benaya, Maazeya, Matitia, Elifeleu, Mikneya, yɛ Obɛdi-Edɔmun nin Zeiɛli mɔ be ti anuan sunianfuɛ’n. 19 Eman+ nin Azafu+ nin Etan be ti jue tofuɛ. Be yɛ ɔ fata kɛ be bo sɛnbali+ nga aaba yɛ be fa yoli’n niɔn. 20 Zakari, nin Aziɛli, nin Semiramɔtu, nin Zeyiɛli, nin Unin, nin Eliabu, nin Maazeya yɛ Benaya be bo miziki bolɛ ninnge nga be le ɲanman’n, mɔ be nian Alamɔtu*+ su yɛ be bo’n. 21 Matitia,+ nin Elifeleu, nin Mikneya, nin Obɛdi-Edɔmun, nin Zeiɛli yɛ Azazia be bo jru mɔ be nian Seminiti*+ su yɛ be bo’n, yɛ be dun mmua jue tofuɛ’m be ɲrun. 22 Kɛ bé súa Alaka’n bé kɔ́’n, Kenania+ m’ɔ ti Levifuɛ’m be su kpɛn’n yɛ ɔ nian su-ɔ. Afin ɔ si i nun ndɛ’n kpa. 23 Berekia nin Ɛlkana be ti anuan sunianfuɛ, yɛ be o Alaka’n i wun lɛ. 24 Sebania, nin Zosafati, nin Netanɛli, nin Amasai, nin Zakari, nin Benaya, nin Eliezɛɛ be fita awɛ’n nun kekle kpa Ɲanmiɛn Kpli i Alaka’n+ i ɲrun lɛ. Obɛdi-Edɔmun nin Zeia mɔ be ti anuan sunianfuɛ wie’n, be o Alaka’n i wun lɛ.

25 Davidi nin Izraɛli kpɛnngbɛn mun, nin sran akpi su kpɛn’m be ɔli Zoova i aenguɛ’n i alaka’n i falɛ aklunjɔɛ’n nun+ Obɛdi-Edɔmun+ i sua’n nun lɔ. 26 Kɛ Ɲanmiɛn Kpli ukali Levifuɛ nga be sua Zoova i aenguɛ’n i alaka’n, be kunnin nannin ba nso nin bua ɲin nso be fa yili tɛ.+ 27 Tralɛ kunngba nga Levifuɛ nga be sua Alaka’n, nin jue tofuɛ mun, nin Kenania m’ɔ nian Alaka’n i sualɛ’n su m’ɔ ti jue tofuɛ’m be su kpɛn’n be wlali’n, i wie yɛ Davidi wlali-ɔ. Ɔ wlali tralɛ tɛnndɛn m’ɔ leman sa’n. Jese ɲanman plilili yɛ be fa yoli tralɛ sɔ’n niɔn. Asa ekun’n, efɔdu nga lɛn yɛ be fa yoli’n kun wla Davidi wun.+ 28 Kɛ Izraɛlifuɛ’m be kwlaa bé fá Zoova i aenguɛ’n i alaka’n bé bá’n, nn bé bó sró, aklunjɔɛ’n ti.+ Kɛ ɔ́ yó sɔ’n, nn bé bó awɛ+ wafawafa mun nin sɛnbali mun. Yɛ miziki bolɛ ninnge nga be le ɲanman’n nin jru+ nga be bo’n, be tɛ kekle kpa.

29 Be fali Zoova i aenguɛ’n i alaka’n wluli Davidi Klɔ’n+ nun. Kɛ ɔ́ yó sɔ’n, nn Famiɛn Davidi tú kpɛ́n, nn ɔ́ sí able. Ɔ dili alaka’n i fa balɛ’n i ti cɛn. Sanngɛ kɛ Saili i wa Mikali+ niannin fenɛtri’n nun m’ɔ wunnin Famiɛn Davidi’n, i wun yoli i tɛ i awlɛn’n nun lɔ.+