Ezekiɛli

43 I sin’n, ɔ fali min ɔli anuan nga i ɲin kaci wia afiliɛ lɔ’n i wun lɔ.+ 2 N wunnin Izraɛli Ɲanmiɛn’n i aɲrunɲan’n lɔ. Ɔ tɛ kɛ nzue m’ɔ sonji kpuu’n sa.+ Yɛ i nɛn’n ɔ fin wia afiliɛ+ lɔ yɛ ɔ ba-ɔ. I aɲrunɲan’n kpajali asiɛ’n su wauun.+ 3 Like nga n wunnin i’n, ɔ ti kɛ aolia nun like nga n wunnin i blɛ mɔ n* bali klɔ’n i sacilɛ’n sa. Yɛ ɔ ti kɛ like nga n wunnin i i nun mɔ n wo Kebaa nzue ba’n+ i wun koko lɔ’n sa. N kotoli yɛ n utuli min ɲin ase.

4 I sin’n, Zoova i aɲrunɲan’n sinnin anuan nga i ɲin kpɛ wia afiliɛ lɔ’n nun lɔ ɔ wluli Ɲanmiɛn sua’n* nun.+ 5 Wawɛ* kun mannin min su, yɛ ɔ fa min ɔli awlo klun kaan’n nun lɔ, kpɛkun n wunnin kɛ Zoova i aɲrunɲan’n w’a yi Ɲanmiɛn i sua’n.+ 6 I sin’n, n tili sran kun nɛn Ɲanmiɛn sua’n nun lɔ, sran sɔ’n wa jrannin min wun lɛ.+ 7 Ɔ seli min kɛ:

“Sran wa, min famiɛn bia’n+ i lika’n yɛ, yɛ lika nga n takataka min ja mun’n+ yɛ. Lɛ yɛ ń trán Izraɛli nvle’n nunfuɛ’m be afiɛn tititi-ɔ.+ Izraɛli nvle’n nunfuɛ’m be nin be famiɛn mun, be su sɔman amuin kun,* yɛ be su faman be famiɛn’m be fuɛn’m be yoman min dunman m’ɔ ti sanwun’n i finfin kun.+ 8 Be fali be anuan’n i ɲrun’n be sieli min anuan’n i ɲrun’n i wun koko, yɛ be fali be anuan’n i kadri’n be sieli min anuan’n i kadri’n i wun koko. Talɛ ngunmin yɛ ɔ o e nin be e afiɛn-ɔn.+ I sɔ’n ti’n n fali ya n nunnunnin be.+ 9 Siɛn’n, maan be yaci amuin sɔlɛ,* yɛ be fa be famiɛn’m be fuɛn’m be wɔ min wun mmua. I liɛ’n ń trán be afiɛn tititi.+

10 “Sran wa, ɔ liɛ’n wafa nga Ɲanmiɛn sua’n fa ti’n, yiyi nun kle Ɲanmiɛn nvle’n nunfuɛ mun+ naan ɲannzuɛn kun be, be fɔnlɛ’m be ti.+ Yɛ ɔ fata kɛ be suan wafa nga be fa kplannin’n i su like.* 11 Sɛ ninnge kwlaa nga be yoli’n ti’n ɲannzuɛn kun be’n, kle be Ɲanmiɛn sua’n i jajalɛ’n, ɔ nin wafa nga be yoli’n, ɔ nin i fitewlɛ, nin i wluwlɛ mun.+ Kle be i jajalɛ’m be kwlaa ɔ nin i su ndɛ mun, i jajalɛ’m be kwlaa ɔ nin i su mmla mun. Klɛ be be ɲin bo lɛ. I liɛ’n bé fá be ɲin síe i i jajalɛ’n kwlaa su, yɛ bé níɛn i su ndɛ’m be su bé nánti.+ 12 Ɲanmiɛn sua’n i su mmla’n yɛ: Oka’n i ti su lɔ’n i wun lɛ lika’n kwlaa ti Ɲanmiɛn liɛ klonglo.+ Nian! Ɲanmiɛn i sua’n i su mmla’n yɛ ɔ o lɛ-ɔ.

13 “Kɛ be sunnzunnin tɛ yiwlɛ’n,*+ nga be wunnin i’n yɛ (be uka kude kun su palmun kun).* I bo’n ti kude kun, yɛ i tɛtrɛ nun’n ti kude kun. Be yoli i nuan su nglonglo sin yiali nun. I tɛtrɛ nun’n ti anpan kun.* Kɛ tɛ yiwlɛ’n i bo’n ti kɛ ngalɛ’n sa. 14 Kɛ ɔ fɛ i i bo asiɛ wun, m’ɔ́ fá jú i nuan su kaan’n su’n ɔ ti kude nɲɔn. I tɛtrɛ nun’n ti kude kun. Kɛ ɔ fɛ i i nuan su kaan’n su m’ɔ́ fá jú i nuan su dan’n su’n, ɔ ti kude nnan. Yɛ i tɛtrɛ nun’n ti kude kun. 15 Tɛ yiwlɛ’n i sin trɔwlɛ’n i nglonglo su’n ti kude nnan. Yɛ nnɛn wɛ nnan o su.+ 16 Tɛ yiwlɛ’n i sin trɔwlɛ’n i bue nnan’m be sɛ. I tɛnndɛn nun’n ti kude blu-nin-nɲɔn (12), yɛ i tɛtrɛ nun’n ti kude blu-nin-nɲɔn (12).+ 17 I nuan su’n i bue nnan’n be tɛnndɛn nun’n ti kude blu-nin-nnan (14), yɛ be tɛtrɛ nun’n ti kude blu-nin-nnan (14). I nuan buwlɛ’n ti kude sin kun, yɛ i bo’n i bue kwlaa su ti kude kun.

“I asikalie’n i ɲin kpɛ wia afiliɛ lɔ.”

18 I sin’n ɔ seli min kɛ: “Sran wa, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Kɛ bé wá kplán tɛ yiwlɛ’n, mmla ng’ɔ fata kɛ be nian su naan b’a kwla yi su tɛ nga kɛ bé yí’n be yra nnɛn’n i kɔlikɔli’n naan b’a kwla fa mmoja b’a kpɛntɛnkpɛntɛn su’n yɛ ɔ o lɛ-ɔ.’+

19 “‘Levifuɛ nga be ti Ɲanmiɛn ɲrun jranfuɛ mɔ be fin Zadɔku i osu’n nun’n,+ mɔ be ba min ɲrun be wa di min junman’n, ɔ fata kɛ a fa nannin gbanflɛn kun nnɛn’m be nun man be. Ɔ ti sa tɛ’n i ti tɛ yilɛ.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ. 20 ‘Ɔ fata kɛ a fɛ i mmoja’n wie gua tɛ yiwlɛ’n i su nnɛn wɛ nnan’m be su, ɔ nin i nuan buwlɛ’n i cɔnjɔ nnan’m be su, yɛ fa wie guɛ i i nuan su nglonglo m’ɔ sin yiɛ i’n su. I liɛ’n á yó tɛ yiwlɛ’n i sanwun sa tɛ’n ti, yɛ á yí tɛ fa kata sa tɛ’n su naan tɛ yiwlɛ’n yo sanwun.+ 21 I sin’n, fa nannin gbanflɛn nga be fa yi sa tɛ’n i ti tɛ’n naan yrɛ i Ɲanmiɛn sua’n i lika nga be kleli’n nun, lika m’ɔ ti Ɲanmiɛn liɛ’n i sin lɔ.+ 22 I cɛn nɲɔn su’n, fa boli yasua kun mɔ lɛ nunmɛn i wun’n fa yi sa tɛ’n i ti tɛ. Yɛ bé yó tɛ yiwlɛ’n i sanwun sa tɛ’n ti, kɛ nga be fali boli gbanflɛn’n be fa yoli i sanwun sa tɛ’n ti’n sa.’

23 “‘Kɛ sa tɛ’n ti’n a ko yo i sanwun ko wie’n, fa nnɛn’m be nun nannin gbanflɛn nga lɛ nunmɛn i wun’n, ɔ nin nnɛn’m be nun bua ɲin nga lɛ nunmɛn i wun’n man. 24 Fa be man Zoova. Ɔ fata kɛ Ɲanmiɛn ɲrun jranfuɛ’m be fa njin be guagua be su,+ yɛ be fa be yi tɛ nga kɛ bé yí’n be yra nnɛn’n i kɔlikɔli’n be man Zoova. 25 Cɛn kwlakwla’n, fa boli yasua kun, ɔ nin nnɛn’m be nun nannin gbanflɛn kun, nin nnɛn’m be nun bua ɲin kun fa yi sa tɛ’n i ti tɛ.+ Yo i sɔ lele cɛn ba nso. Ɔ fata kɛ a fa nnɛn mɔ lɛ fi nunmɛn i wun’n. 26 Ɔ fata kɛ be fa cɛn nso be fa yi tɛ fa kata sa tɛ’n su naan tɛ yiwlɛ’n yo sanwun. Ɔ fata kɛ be yo i sanwun naan b’a kwla di su junman. 27 Kɛ cɛn sɔ’m be ko sin’n, i cɛn mɔcuɛ su’n+ ɔ nin cɛn ng’ɔ́ bɛ́ i sin’n Ɲanmiɛn ɲrun jranfuɛ’m bé wá yí amun* ti tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ mun tɛ yiwlɛ’n su, yɛ min klun jɔ́ amun wun.’+ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”