Ezekiɛli

47 Kpɛkun ɔ fali min sɛli i sin Ɲanmiɛn sua’n i anuan’n nun lɔ.+ Lɛ’n n wunnin nzue kun, ɔ sonji Ɲanmiɛn sua’n i ɲrun lika’n i bo lɛ.+ Ɔ sonji kɔ wia afiliɛ lɔ lika’n nun, afin Ɲanmiɛn sua’n i ɲrun’n ɔ kpɛ wia afiliɛ bue liɛ’n su lɔ. Nzue’n sonji Ɲanmiɛn sua’n i bo lɛ, fama su. Ɔ sonji sin tɛ yiwlɛ’n i ngua lɔ lika’n nun.

2 I sin’n, ɔ fali min sinnin nglo lɔ anuan’n+ nun fiteli. Ɔ fali min fiteli gua su lɔ, yɛ ɔ fali min ɔli awlo klun dan’n i anuan nga i ɲin kaci wia afiliɛ bue liɛ’n su lɔ’n i wun lɔ.+ Kpɛkun n wunnin kɛ nzue’n sonji anuan’n i fama su.

3 Kɛ sran’n fiteli m’ɔ́ kɔ́ wia afiliɛ lɔ lika’n nun’n, like sunnzunlɛ ɲanman kun o i sa nun.+ Ɔ sunnzunnin kude akpi kun (1.000).* Kpɛkun ɔ yoli maan n kpɛli nzue’n. Nzue’n ju min ja kɔmin nun.

4 I sin’n, ɔ sunnzunnin kude akpi kun (1.000) ekun. Kpɛkun ɔ yoli maan n kpɛli nzue’n. Nzue’n ju min ja nannglunman nun.

Ɔ sunnzunnin kude akpi kun (1.000) ekun. Kpɛkun ɔ yoli maan n kpɛli nzue’n. Nzue’n ju min bo lenge nun.

5 Kɛ ɔ sunnzunnin kude akpi kun (1.000) ekun’n, m’an kwlá kpɛman nzue’n. Afin ɔ wa yoli nzue dan kun m’ɔ sonji kpuu-ɔ. Nzue’n i bo’n ti kploun dan ti’n sɛ sran kun waan ɔ́ kpɛ́’n ɔ fata kɛ ɔ wɛ. Ɔ ti nzue dan kun mɔ be kwlá kpɛmɛn i be ja nun-ɔn.

6 Ɔ usali min kɛ: “?Sran wa, a wun i?”

Kpɛkun ɔ yoli maan n nantili n sali min sin, n ɔli nzue’n i nuan lɔ. 7 Kɛ n sali min sin’n, n wunnin kɛ waka kpanngban kpa be o nzue’n i nuan, be o i bue nɲɔn’m be su.+ 8 Kpɛkun ɔ seli min kɛ: “Nzue sɔ’n sonji kɔ wia afiliɛ lɔ lika’n nun, kpɛkun ɔ sin Araba*+ lɛ, yɛ ɔ gua jenvie’n nun. Kɛ ɔ́ wá gúa jenvie’n nun’n,+ i nun nzue’n yó kpa. 9 Lika kwlaa nga nzue’n sonji kɔ lɛ’n,* nnɛn kpanngban kpa bé kwlá trán lɛ. Jue kpanngban kpa bé wá trán lɛ afin nzue’n wá sónji lɛ. Jenvie’n nun nzue’n ɔ́ yó kpa, kpɛkun lika kwlaa nga nzue’n sónji kɔ́ lɛ’n, ninnge’m be kwlaa bé trán nguan nun.

10 “Kɛ ɔ fɛ i An-Gedi+ m’ɔ́ fá jú An-Eglaimun’n, jue trafuɛ’m bé jrɛ́njrɛ́n i nuan. Lɛ’n, bé ɲán lika bé wlɛ́ be lala mun. Jue wafawafa kpanngban kpa bé trán lika sɔ’n nun lɛ, kɛ Jenvie Dan’n*+ nun jue mun sa.

11 “I wun lɛ’n yó nzue lika ɔ nin fɔkɔ, sanngɛ be su yoman kpa wie. Njin ká lika sɔ’m be nun titi.+

12 “Waka nga be di be su mma mun’n i wafawafa kwlaa bé fífí nzue’n i bue nɲɔn’m be su. Be nɲa’m be su glɔman. Kpɛkun bé sú mma titi. Anglo kwlaa’n bé sú mma uflɛ, afin be bo nzue’n ɔ fin Ɲanmiɛn sua’n nun lɔ.+ Be mma’m bé káci aliɛ, yɛ be nɲa’m bé káci ayre.”+

13 Ndɛ nga e Min Zoova m’ɔ Sie Like Kwlakwla’n kan’n yɛ: “Lika nga á fá mán Izraɛli akpasua blu-nin-nɲɔn (12) mun naan ɔ yo be aja like’n yɛ ɔ o yɛ. Yɛ Zozɛfu liɛ’n ɔ́ ɲán lika nɲɔn.+ 14 Ɔ́ wá yó amun aja like. Yɛ amun kwlaa amun liɛ’n ɔ́ sɛ́. N tali nda kɛ ń fá lika nga ń mán amun nannan mun.+ Siɛn’n, b’a fa man amun naan ɔ yo amun aja like.

15 “Nvle’n i nglo lɔ lika’n i awɛ liɛ’n yɛ: Ɔ fɛ i Jenvie Dan’n su lɛ, ɔ sin Ɛtlɔn atin’n+ su ɔ kɔ Zedadi.+ 16 Ɔ sin Amati+ nin Berota+ ɔ nin Sibraimun m’ɔ o Damasi i lika’n ɔ nin Amati i lika’n be afiɛn’n nun’n, ɔ ju Azɛɛ-Atikɔn m’ɔ o Oran i awɛ’n i wun lɔ’n.+ 17 Ɔ maan awɛ’n ɔ́ fɛ́ i jenvie’n su lɛ ɔ́ kɔ́ Azaa-Enɔn,+ ɔ́ sín Damasi i awɛ’n su nglo lɔ lika’n nun, ɔ nin Amati i awɛ’n su.+ Nglo lɔ lika’n nun awɛ’n yɛ ɔ o lɛ-ɔ.

18 “Wia afiliɛ lɔ awɛ’n sin Oran nin Damasi be afiɛn’n nun yɛ ɔ sin Zurdɛn’n i wun lɛ Galaadi+ nin Izraɛli nvle’n be afiɛn’n nun. Amun sunnzun i awɛ’n su lɛ lele be fa ju jenvie ng’ɔ o wia afiliɛ lɔ lika’n nun’n su.* Wia afiliɛ lɔ awɛ’n yɛ ɔ o lɛ-ɔ.

19 “Ngua lɔ awɛ’n ɔ́ fɛ́ i Tamaa lele ɔ́ fá jú Meribati-Kadɛsi nzue’n+ su lɔ. Ɔ́ fɛ́ i kongo’n* su lɛ ɔ́ fá jú Jenvie Dan’n su lɔ.+ Ngua lɔ awɛ’n yɛ ɔ o lɛ-ɔ.

20 “Wia atɔliɛ lɔ awɛ’n yɛle Jenvie Dan’n. Ɔ fɛ i ngua lɔ awɛ’n su kan lika’n wie jenvie’n su lɔ’n, ɔ kɔ Lebo-Amati.*+ Wia atɔliɛ lɔ awɛ’n yɛ ɔ o lɛ-ɔ.”

21 “Amun cɛcɛ nvle nga nun be fa. Amun cɛcɛ nun man Izraɛli akpasua blu-nin-nɲɔn (12) mun. 22 Ɔ fata kɛ amun cɛcɛ nun be fa naan ɔ yo amun aja like. Yɛ amun man aofuɛ nga kɛ be o amun afiɛn’n be wuli ba’n be wie. Yɛ amun bu be Izraɛlifuɛ. Be nin amun bé ɲán aja like Izraɛli akpasua’m be nun. 23 Akpasua nga i nun yɛ aofuɛ kun tran’n, lɛ yɛ ɔ fata kɛ amun mɛn i i aja like liɛ’n niɔn.” Ndɛ nga e Min Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.