Ezekiɛli

48 “Kɛ ɔ fɛ i nglo lɔ lika’n i nuan su lɔ’n, akpasua mun be dunman mun yɛ: Dan i lika’n+ ɔ sin Ɛtlɔn atin’n su ɔ kɔ Lebo-Amati,*+ yɛ ɔ ju Azaa-Enan, ɔ sin Damasi i awɛ’n i nglo lɔ lika’n nun, Amati i wun lɛ.+ Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 2 Azɛɛ i lika’n+ ɔ mantan Dan i lika liɛ’n. Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 3 Nɛftali i lika’n+ ɔ mantan Azɛɛ i lika liɛ’n. Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 4 Manase i lika’n+ ɔ mantan Nɛftali i lika liɛ’n. Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 5 Efraimun i lika’n ɔ mantan Manase i lika liɛ’n.+ Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 6 Ribɛnin i lika’n ɔ mantan Efraimun i lika liɛ’n.+ Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 7 Zida i lika’n ɔ mantan Ribɛnin i lika liɛ’n.+ Ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 8 Zida i awɛ’n su’n, kɛ ɔ fɛ i wia afiliɛ lɔ awɛ’n su m’ɔ́ fá jú wia atɔliɛ lɔ awɛ’n su’n, lika ng’ɔ fata kɛ amun fa man’n, maan i tɛtrɛ nun’n yo kude* akpiakpi ablaɔn-nin-nnun (25.000).+ Kɛ ɔ fɛ i wia afiliɛ lɔ awɛ’n su m’ɔ́ fá jú wia atɔliɛ lɔ awɛ’n su’n, maan i tɛnndɛn nun’n nin akpasua onga’m be lika mun be tɛnndɛn nun’n be sɛ. Ɲanmiɛn i sua’n ɔ́ trán lika sɔ’n i afiɛn.

9 “Lika ng’ɔ fata kɛ amun sie i ngunmin fa man Zoova’n, i tɛnndɛn nun’n yó kude akpiakpi ablaɔn-nin-nnun (25.000), yɛ i tɛtrɛ nun’n yó kude akpiakpi blu (10.000). 10 Lika sɔ’n m’ɔ ti Ɲanmiɛn liɛ klonglo’n, ɔ́ yó Ɲanmiɛn ɲrun jranfuɛ’m be liɛ.+ I nglo lɔ lika’n yó kude akpiakpi ablaɔn-nin-nnun (25.000), i wia atɔliɛ lɔ lika’n yó kude akpiakpi blu (10.000), i wia afiliɛ lɔ lika’n yó kude akpi blu (10.000), yɛ i ngua lɔ lika’n yó kude akpiakpi ablaɔn-nin-nnun (25.000). Zoova i sua’n ɔ́ trán lika sɔ’n i afiɛn. 11 Ɔ́ yó Zadɔku i mma+ mɔ be ti Ɲanmiɛn ɲrun jranfuɛ’n, mɔ be yoli be sanwun’n be liɛ. Ɲanmiɛn ɲrun jranfuɛ sɔ mun be dili junman ng’ɔ fata kɛ be di man min’n. Yɛ kɛ Izraɛlifuɛ nin Levifuɛ’m be kacili be sin sili min’n,+ be liɛ’n, b’a kaciman be sin b’a siman min. 12 Nvle’n i lika nga be fa mannin m’ɔ ti i liɛ ngunmin’n, m’ɔ ti Ɲanmiɛn liɛ klonglo’n, bé ɲɛ́n i bue. Lika sɔ’n nin Levifuɛ’m be liɛ’n mántan su.

13 “Levifuɛ’m be lika’n ɔ́ trán Ɲanmiɛn ɲrun jranfuɛ’m be lika’n i wun lɛ. I tɛnndɛn nun’n yó kude akpiakpi ablaɔn-nin-nnun (25.000), yɛ i tɛtrɛ nun’n yó kude akpiakpi blu (10.000). (I tɛnndɛn nun wunmuan’n yó kude akpiakpi ablaɔn-nin-nnun (25.000), yɛ i tɛtrɛ nun’n yó kude akpiakpi blu (10.000)). 14 Nvle’n i bue sɔ m’ɔ ti kpa tra lika onga mun’n, ɔ fataman kɛ be yo i atɛ, ɔ fataman kɛ be kaci i, yɛ ɔ fataman kɛ be fa man sran. Afin ɔ ti Zoova liɛ klonglo.

15 “Lika’n i awɛ’n m’ɔ ti kude akpiakpi ablaɔn-nin-nnun’n (25.000) i wun lɛ’n, lika ng’ɔ́ ká lɛ mɔ i tɛtrɛ nun’n ti kude akpi nnun’n (5.000), ɔ́ yó klɔ’n i liɛ,+ ɔ́ yó sua kplanwlɛ ɔ nin nnɛn didiwlɛ. Klɔ’n trán lika sɔ’n i afiɛn.+ 16 Klɔ’n i awɛ mun be tɛnndɛn nun’n yɛ: Awɛ ng’ɔ o nglo lɔ lika’n nun’n ti kude akpi nnan ya nnun (4.500), awɛ ng’ɔ o ngua lɔ lika’n nun’n ti kude akpi nnan ya nnun (4.500), awɛ ng’ɔ o wia afiliɛ lɔ lika’n nun’n ti kude akpi nnan ya nnun (4.500), yɛ awɛ ng’ɔ o wia atɔliɛ lɔ lika’n nun’n ti kude akpi nnan ya nnun (4.500). 17 Klɔ’n i nnɛn didiwlɛ lika’n i nglo lɔ lika’n ɔ́ yó kude ya nɲɔn ablenun (250), i ngua lɔ lika’n yó kude ya nɲɔn ablenun (250), i wia afiliɛ lɔ lika’n ɔ́ yó kude ya nɲɔn ablenun (250), yɛ i wia atɔliɛ lɔ lika’n yó kude ya nɲɔn ablenun (250).

18 “Lika ng’ɔ ka lɛ’n, ɔ nin lika m’ɔ ti Ɲanmiɛn liɛ klonglo’n i tɛnndɛn nun’n bé sɛ́.+ I wia afiliɛ lɔ lika’n yó kude akpiakpi blu (10.000), yɛ i wia atɔliɛ lɔ lika’n yó kude akpiakpi blu (10.000). Ɔ nin lika m’ɔ ti Ɲanmiɛn liɛ klonglo’n bé sɛ́. Aliɛ nga bé ɲɛ́n i lika sɔ’n nun’n yɛ be nga be di junman klɔ’n nun’n bé dí-ɔ. 19 Izraɛli akpasua kwlaa nga be di junman klɔ’n nun’n, bé dí fie lika sɔ’n nun.+

20 “Lika nga bé fá mán’n i wunmuan’n i bue nnan’m bé sɛ́, be tinuntinun bé yó kude akpiakpi ablaɔn-nin-nnun (25.000). Ɔ fata kɛ amun sie lika sɔ’n ɔ nin lika m’ɔ ti klɔ’n i liɛ’n be ngunmin naan be yo Ɲanmiɛn liɛ klonglo.

21 “Lika m’ɔ ti Ɲanmiɛn liɛ klonglo’n, i bue nɲɔn’m be su lika ng’ɔ ka’n, ɔ nin lika m’ɔ ti klɔ’n i liɛ’n, bé yó siefuɛ’n i liɛ.+ Ɔ́ trán lika nga bé fá mán’n i wia afiliɛ nin i wia atɔliɛ lɔ awɛ mun, mɔ be ti kude akpiakpi ablaɔn-nin-nnun’n (25.000) be wun lɛ. Ɔ nin lika nga be mɛntɛn i’n bé sɛ́, yɛ ɔ́ yó siefuɛ’n i liɛ. Lika m’ɔ ti Ɲanmiɛn liɛ klonglo’n, ɔ nin Ɲanmiɛn sua’n bé trán lika sɔ’n i afiɛn.

22 “Levifuɛ’m be lika’n, ɔ nin lika m’ɔ ti klɔ’n i liɛ’n bé trán siefuɛ’n i lika’n i afiɛn. Yɛ siefuɛ’n i lika’n ɔ́ trán Zida i awɛ’n+ nin Bɛnzamɛn i awɛ’n be afiɛn.

23 “Akpasua onga’m be liɛ’n, Bɛnzamɛn i lika’n fɛ i wia afiliɛ lɔ awɛ’n su fa ju wia atɔliɛ lɔ awɛ’n su.+ 24 Simeɔn i lika’n ɔ mantan Bɛnzamɛn i lika’n liɛ’n,+ ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 25 Isakaa i lika’n+ ɔ mantan Simeɔn i lika’n liɛ’n, ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 26 Zabilɔn i lika’n ɔ mantan Isakaa i lika’n liɛ’n,+ ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su.+ 27 Gadi i lika’n ɔ mantan Zabilɔn i lika’n liɛ’n,+ ɔ fɛ i wia afiliɛ lɔ awɛ’n su ɔ fa ju wia atɔliɛ lɔ awɛ’n su. 28 Ngua lɔ awɛ’n, m’ɔ o Gadi i awɛ’n i wun lɛ’n, ɔ́ fɛ́ i Tamaa+ ɔ́ fá jú Meribati-Kadɛsi nzue’n su lɔ,+ ɔ́ jú Kongo’n* su lɔ,+ ɔ nin Jenvie Dan’n* su lɔ.

29 “Lika ng’ɔ fata kɛ a fa cɛcɛ Izraɛli akpasua mun naan ɔ yo be aja like’n yɛ ɔ o lɛ-ɔ.+ Lika sɔ’m bé yó be liɛ.”+ Ndɛ nga e Min Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.

30 “Klɔ’n i lika nga bé sín lɛ bé fíte’n be yɛ: I nglo lɔ lika’n yó kude akpi nnan ya nnun (4.500).+

31 “Bé fá Izraɛli akpasua’m be dunman’m bé síe i klɔ’n i anuan’m be su. Anuan nsan nga be o nglo lɔ lika’n nun’n, anuan kun ti Ribɛnin liɛ, anuan kun ti Zida liɛ, yɛ anuan kun ti Levi liɛ.

32 “Wia afiliɛ lɔ liɛ’n i tɛnndɛn nun’n ti kude akpi nnan ya nnun (4.500), yɛ lɔ anuan’m be ti nsan: Anuan kun ti Zozɛfu liɛ, anuan kun ti Bɛnzamɛn liɛ, yɛ anuan kun ti Dan liɛ.

33 “Ngua lɔ liɛ’n ti kude akpi nnan ya nnun (4.500), ɔ le anuan nsan: Anuan kun ti Simeɔn liɛ, anuan kun ti Isakaa liɛ, yɛ anuan kun ti Zabilɔn liɛ.

34 “Wia atɔliɛ lɔ liɛ’n i tɛnndɛn nun’n ti kude akpi nnan ya nnun (4.500), ɔ le anuan nsan: Anuan kun ti Gadi liɛ, anuan kun ti Azɛɛ liɛ, yɛ anuan kun ti Nɛftali liɛ.

35 “Kɛ be jran klɔ’n i tiwa mɔ bé bó sín yía nun’n ɔ ti kude akpiakpi blu-nin-mɔcuɛ (18.000). Yɛ kɛ ɔ fɛ i cɛn sɔ’n nun’n, bé flɛ́ klɔ’n kɛ Zoova O Lɛ.”+