Jɔlɛ Difuɛ Mun

9 Kɛ ɔ́ kɔ́ i ɲrun’n, Zeribaali i wa Abimelɛki+ ɔli i nin i niaan yasua’m be sin Sisɛmun lɔ. Ɔ seli be nin i nannan yasua’n i awlo’n nunfuɛ’m* be kwlaa kɛ: 2 “Amun yaci, amun usa Sisɛmun kpɛn’m* be kwlaa be kɛ: ‘?Oninfuɛ’n yɛ amún fá-ɔ? ?Amun klo kɛ Zeribaali i mma yasua ableso (70) mun be ngba+ be sie amun, annzɛ amun klo kɛ sran kunngba yɛ ɔ sie amun-ɔn? Sanngɛ nán amun wla fi su kɛ e nin amun e mmoja’n ti kun.’”*

3 I nin i niaan yasua’m be ko kannin ndɛ’n kleli Sisɛmun kpɛn mun. Be awlɛn’n ɔli Abimelɛki su. Afin be seli kɛ : “Ɔ ti e bɔbɔ e niaan.” 4 Ɔ maan be fali Baali-Beriti i sua’n+ nun sika mma ableso (70) be mɛnnin i. Abimelɛki fali sika sɔ’n fa mannin finfinfuɛ nin ɲin keklefuɛ wie mun naan be su i su. 5 I sin’n, ɔ ɔli i si i awlo lɔ, Ofra lɔ.+ Kpɛkun ɔ kunnin i niaan+ ableso (70) mɔ be ti Zeribaali i mma yasua mun’n, yɔbuɛ kun su. Be nun ng’ɔ kali lɛ’n yɛle Zotamun m’ɔ ti Zeribaali i mma’m be nun kaan’n, afin ɔ fiali.

6 I sin’n, Sisɛmun kpɛn’m be kwlaa be nin Bɛti-Milo lɔfuɛ’m be kwlaa be ti yiali, kpɛkun be sieli Abimelɛki famiɛn,+ waka dan’n i wun koko lɛ, yɔbuɛ nga be tɛkɛli i Sisɛmun lɔ’n i wun lɛ.

7 Kɛ be kannin ndɛ sɔ’n kleli Zotamun’n, ɔ ka lɛ ɔli ko jrannin Garizimun Oka’n+ i ti su lɔ. Kpɛkun ɔ kpannin kekle kpa seli be kɛ: “Sisɛmun kpɛn mun, amun tie min nuan ndɛ’n, yɛ Ɲanmiɛn kusu ɔ́ tíe amun nuan ndɛ’n.

8 “Cɛn kun’n, waka’m be ɔli kɛ bé fá be nun kun* naan ɔ yo be su famiɛn. Ɔ maan be seli olivie waka’n kɛ: ‘Sie e.’+ 9 Sanngɛ olivie waka’n seli be kɛ: ‘?Naan n yaci min ngo’n* m’ɔ manman Ɲanmiɛn nin sran mun’n i lɛ naan n ko toto waka onga’m be su?’ 10 I sin’n, be seli figie waka’n kɛ: ‘Bla wa sie e.’ 11 Sanngɛ figie waka’n seli be kɛ: ‘?Naan n yaci min mma fɛfɛ nin min mma kpakpa’m be lɛ naan n ko toto waka onga’m be su?’ 12 I sin’n, waka’m be seli viɲin waka’n kɛ: ‘Bla wa sie e.’ 13 Viɲin waka’n seli be kɛ: ‘?Naan n yaci min duvɛn lɔflɛ m’ɔ man Ɲanmiɛn nin sran’m be aklunjɔɛ’n i lɛ naan n ko toto waka onga’m be su?’ 14 I agualiɛ su’n, waka onga’m be kwlaa be seli waka m’ɔ ti owieowie’n kɛ: ‘Bla wa sie e.’+ 15 Yɛ waka m’ɔ ti owieowie’n seli be kɛ: ‘Sɛ amun waan amún síe min famiɛn sakpa’n, amun bla be wa kunndɛ fiawlɛ min fɔnvɔ’n i bo. Sanngɛ sɛ w’a yoman sɔ’n, maan sin fin waka m’ɔ ti owieowie’n nun naan ɔ yra Liban lɔ sɛdri waka mun.’

16 “?Kɛ amun sieli Abimelɛki famiɛn’n,+ i sɔ’n ti su? ?Amun sili Zeribaali nin i awlofuɛ’m be ye yɛ ɔ o lɛ-ɔ? ?Ng’ɔ yo mannin amun’n yɛ amun niannin su yoli i lɛ-ɔ? 17 Kɛ min si kún amun ti alɛ’n,+ ɔ fɛli i nguan’n sieli i wie nuan naan ɔ́ dé amun Madianfuɛ’m be sa nun.+ 18 Sanngɛ andɛ’n, amun a jaso min si i awlofuɛ’m be wun. Amun kunnin i mma yasua ableso (70) mun yɔbuɛ kun su.+ Kpɛkun amun sieli Abimelɛki m’ɔ ti i kanga bla’n i wa’n+ i famiɛn Sisɛmun kpɛn’m be su, kɛ m’ɔ ti amun niaan’n ti. 19 Nanwlɛ, sɛ like nga amun fa yoli Zeribaali nin i awlofuɛ mun’n ɔ ti su’n, maan amun di aklunjɔɛ Abimelɛki ti, yɛ maan i kusu di aklunjɔɛ amun dunman nun ti. 20 Sanngɛ sɛ w’a yoman sɔ’n, maan sin fin Abimelɛki nun naan ɔ yra Sisɛmun nin Bɛti-Milo lɔ kpɛn mun.+ Yɛ maan sin fin Sisɛmun kpɛn mun nin Bɛti-Milo lɔfuɛ’m be nun naan ɔ yra Abimelɛki.”+

21 I sin’n, Zotamun+ wanndi ɔli Beɛɛ klɔ’n su lɔ. Ɔ ko trannin lɔ, i niaan bian Abimelɛki ti.

22 Abimelɛki sieli Izraɛlifuɛ mun* afuɛ nsan. 23 I sin’n, Ɲanmiɛn mannin atin kɛ kpɔlɛ tran* Abimelɛki nin Sisɛmun kpɛn’m be afiɛn. Yɛ be nin Abimelɛki b’a nantiman klanman kun. 24 Sa sɔ’n juli naan be nga be kunnin Zeribaali i mma ableso (70) mun abɔlɛ kunlɛ’n, be wun i su afɛ. Be niaan bian Abimelɛki m’ɔ kunnin be’n ɔ́ ɲɛ́n i liɛ,+ yɛ Sisɛmun kpɛn mɔ be ukɛli i maan ɔ kunnin i niaan mun’n, be kusu bé ɲán be liɛ. 25 Ɔ maan Sisɛmun kpɛn’m be fali sran wie mun sieli i oka’m be ti su naan be bu sa Abimelɛki i ɲrun. Sran sɔ’m be de be nga be sin be wun lɛ atin’n su’n be sa nun ninnge mun. Kɛ ɔ́ kɔ́ i ɲrun’n, be wa kan kleli Abimelɛki.

26 I sin’n, Ebɛdi i wa Gaali nin i niaan bian’m be ɔli Sisɛmun lɔ.+ Sisɛmun kpɛn’m be fali be wla guali be su. 27 Sisɛmunfuɛ’m be ɔli be fie’m be su, be ko titili be viɲin’m be su mma mun. Be cuɛnnin i nzue, kpɛkun be dili cɛn. I sin’n, be ɔli be amuin’n i sua’n nun lɔ,+ be dili aliɛ, be nɔnnin nzan, yɛ be boli Abimelɛki i sannzan. 28 Kpɛkun Ebɛdi i wa Gaali seli kɛ: “?Wan yɛle Abimelɛki? ?Yɛ wan yɛle Sisɛmun mɔ é kó sú i-ɔ? ?Nán Zeribaali+ i wa-ɔ? ?Yɛ nán Zebili yɛ ɔ ti i janunfuɛ’n niɔn? Amun su Amɔɔ m’ɔ ti Sisɛmun i si’n i sran mun! ?Ngue ti yɛ é kó sú Abimelɛki yɛ? 29 Sɛ ɔ ti kɛ min yɛ n sie nvle nga’n, nn m’an fuan Abimelɛki lalaa.” I sin’n, ɔ seli Abimelɛki kɛ: “Uka ɔ sonja’m be nuan’n su naan amun fite naan e wa kun.”

30 Kɛ Zebili m’ɔ ti klɔ’n i siefuɛ’n ɔ tili ndɛ nga Ebɛdi i wa Gaali kannin’n, ɔ fali ya dan kpa. 31 Ɔ maan ɔ sunmannin sran nvialiɛ* nun Abimelɛki sin naan be ko se i kɛ: “Nian! Ebɛdi i wa Gaali nin i niaan’m be o Sisɛmun wa. Yɛ be su wlawla nvlefuɛ mun naan be jaso ɔ wun. 32 Kɔnguɛ’n, maan a nin ɔ sran’m be bla naan amun ko bu sa bo’n nun lɔ. 33 Nglɛmun’n kɛ wia’n fite cɛ’n, amun jaso ndɛ kpa naan amun tɔ klɔ’n su. Kpɛkun kɛ ɔ nin i sran’m bé bá kɛ be nin amun kún’n, yo like kwlaa nga a kwla yo’n naan kwlɛ i.”*

34 Ɔ maan Abimelɛki nin i sran’m be kwlaa be jasoli kɔnguɛ, be buli be wun nun akpasua nnan, kpɛkun be ko bu sali Sisɛmun klɔ’n i wun lɛ. 35 Kɛ Ebɛdi i wa Gaali fiteli ko jrannin klɔ’n i anuan’n nun lɛ’n, Abimelɛki nin i sran’m be fin be fiawlɛ’n nun fiteli. 36 Kɛ Gaali wunnin sran sɔ mun’n, ɔ seli Zebili kɛ: “Nian! Sran wie’m be fin oka’m be su lɔ be su jra.” Sanngɛ Zebili seli i kɛ: “Oka’m be fɔnvɔ mun yɛ a wun be lɛ, nán sran mun-ɔn.”

37 Kɛ ɔ cɛli kan’n, Gaali seli kɛ: “Nian! Sran’m be fin mɛn’n i afiɛn lɔ be su ba. Be akpasua kun fin Meonenimun waka dan’n i atin’n su lɔ su ba.” 38 Zebili tɛli i su kɛ: “?A diman ɔ nuan kun? ?Nán wɔ yɛ a seli kɛ ‘wan yɛle Abimelɛki mɔ é kó sú i’n niɔn?’+ ?Nán sran nga a buman be wie’n yɛ be o lɛ-ɔ? Siɛn’n, fite naan amun ko kun.”

39 Ɔ maan Gaali dunnin mmua Sisɛmun kpɛn’m be ɲrun, be nin Abimelɛki ko kunnin. 40 Abimelɛki suli Gaali su, yɛ Gaali wanndili i ɲrun. Be kunnin sran mun lele fa juli klɔ’n i anuan’n nun lɛ.

41 Abimelɛki trannin Aruma lɛ titi. Yɛ Zebili+ kusu fuannin Gaali nin i niaan mun Sisɛmun lɔ. 42 Kɛ i aliɛ cɛnnin’n, sran’m be tɔli blo, yɛ be kan kleli Abimelɛki. 43 Ɔ fɛli i sran mun kpɛkun ɔ buli be nun akpasua nsan, yɛ be bu sali bo’n nun. Kɛ ɔ wunnin kɛ sran’m be su fin klɔ’n nun fite’n, ɔ tɔli be su yɛ ɔ kunnin be. 44 Abimelɛki nin sran akpasua nga be su i su’n be ɔli ndɛndɛ be ko jrannin klɔ’n i anuan’n nun lɛ. Kɛ ɔ́ yó sɔ’n, nn sran akpasua nɲɔn’n bé tɔ́ be kwlaa nga be o bo’n nun lɔ’n be su bé kún be. 45 Abimelɛki nin klɔ’n nunfuɛ’m be kunnin alɛ cɛn wunmuan kun sɔ’n nun, yɛ ɔ fali klɔ’n. Ɔ kunnin klɔ’n nun sran mun, ɔ bubuli klɔ’n,+ kpɛkun ɔ fali njin sanndili nun.

46 Kɛ Sisɛmun sua fleiin’n i su kpɛn’m be tili ndɛ sɔ’n, be ka lɛ ɔli Eli-Beriti i sua’n+ nun lɔ fiawlɛ lika’n nun lɔ. 47 Kɛ be seli Abimelɛki kɛ Sisɛmun sua fleiin’n i su kpɛn’m be ti w’a yia lika kun cɛ’n, 48 Abimelɛki nin i sran’m be kwlaa be ɔli Zalmɔn Oka’n su lɔ. Abimelɛki fali kpɛliɛ kun kpɛli waka sama kun, ɔ fa sieli i wati su, kpɛkun ɔ seli sran nga be su i su’n be kɛ: “Like nga n yoli mɔ amun wunnin i’n, amun kan amun wun yo wie.” 49 Ɔ maan Abimelɛki i sran’m be kwlaa be kpɛli waka sama mun wie kpɛkun be suli i su. I sin’n, be fali waka sama mun be siesieli i fiawlɛ lika’n i wun kpɛkun be wɔli nun. Ɔ maan Sisɛmun lɔ sua fleiin’n i nun sran’m be kwlaa be wuli. Sran kɔe akpi (1.000), yasua nin bla mun.

50 I sin’n, Abimelɛki ɔli Tebɛzi. Ɔ ko boli nanmue i wun lɛ, ɔ nin Tebɛzifuɛ’m be kunnin alɛ, yɛ ɔ fali klɔ’n. 51 Sua fleiin kun o klɔ’n i afiɛn, ɔ maan yasua nin bla’m be kwlaa, ɔ nin klɔ kpɛn’m be kwlaa be wanndi ɔli lɔ. Be toli be sin anuan, kpɛkun be fuli sua fleiin’n i ti su lɔ. 52 Abimelɛki ɔli lele juli sua fleiin’n i wun lɔ naan ɔ́ sáci i. Ɔ ɔli sua fleiin’n i anuan’n i wun lɔ naan ɔ́ kó wɔ́ nun. 53 Kpɛkun bla kun fali yɔbuɛ nga be fa tin likeʼn i su yɔbuɛʼn ɔ fa yili i Abimelɛki i ti’n su, ɔ boli i ti sɛ’n.+ 54 Ndɛndɛ kpa, ɔ flɛli i sufuɛ ng’ɔ trɛ i alɛ ninnge’m be nun’n, kpɛkun ɔ seli i kɛ: “Yi ɔ tokofi’n naan kun min, i liɛ’n be su kanman min ndɛ be seman kɛ: ‘Bla kun yɛ ɔ kunnin i-ɔ.’” Ɔ maan i sufuɛ’n fɛli i tokofi’n wɔli i, yɛ ɔ wuli-ɔ.

55 Kɛ Izraɛlifuɛ’m be wunnin kɛ Abimelɛki w’a wu’n, be kwlaa be sali be sin be ɔli be awlo. 56 Abɔlɛ nga Abimelɛki yoli i si i niaan bian ableso (70) m’ɔ kunnin be’n ti’n, Ɲanmiɛn yili i nuan like mɛnnin i.+ 57 Yɛ Sisɛmun yasua’m be kusu be sa tɛ liɛ nga be yoli’n, Ɲanmiɛn yi mannin be wie. Ɔ maan sannzan nga Zeribaali+ i wa Zotamun boli be’n,+ i su sa’n juli.