Jɔlɛ Difuɛ Mun

20 Ɔ maan Izraɛlifuɛ’m be kwlaa be fɛli i Dan+ lɛ nin Beɛ-Seba ɔ nin Galaadi mɛn’n+ nun be bali. Be kwlaa be nuan yoli kun,* be ti yiali Zoova ɲrun Mizpa lɔ.+ 2 Nvlefuɛ’m be su kpɛn mun, nin Izraɛli akpasua’m be kwlaa be ɔli Ɲanmiɛn i nvlefuɛ’m be aɲia sɔ’n i bo: Sonja nga be nanti be ja’n be ti akpiakpi ya nnan (400.000), ɔ nin be sa nun tokofi.+

3 Bɛnzamɛnfuɛ’m be tili i kɛ Izraɛli yasua’m b’a wɔ Mizpa.

Ɔ maan Izraɛli yasua’m be seli kɛ: “An kan sa ti mɔ sa tɛ kɛ nga sa juli’n i ndɛ be kle e.”+ 4 Kɛ ɔ yoli sɔ’n, Levi bian+ m’ɔ ti bla nga be kunnin i’n i wun’n, ɔ tɛli su kɛ: “N juli Gibea+ m’ɔ o Bɛnzamɛn akpasua’n su lɔ’n i su lɛ naan e nin min yi’n* é lá lɛ kɔnguɛ. 5 Sanngɛ Gibeafuɛ’m* be jasoli min wun, be wa bo sin yiali sua’n kɔnguɛ. Be waan bé kún min. I agualiɛ su’n, be nin min yi’n* be lali kekle nun kpɛkun ɔ wuli.+ 6 Ɔ maan n fali min yi’n* i fuɛn’n, n kpɛkpɛli nun n fa ɔli Izraɛli akpasua’m be lika’n i kwlaa nun.+ Afin be yoli ɲannzuɛn sa yɛ be yoli tete sa Izraɛli mɛn’n nun. 7 I sɔ’n ti’n Izraɛlifuɛ mun, maan amun kwlaa amun ti amun wun aniɛn naan wa bɔbɔ’n, amun kle like nga e ko yo’n.”+

8 Ɔ maan Izraɛlifuɛ’m be kwlaa be jasoli likawlɛ,* kpɛkun be seli kɛ: “E nun wie fi su kɔmɛn i tannin sua’n nun annzɛ ɔ su sɛmɛn i sin i awlo. 9 Like nga é fá yó Gibeafuɛ mun’n yɛ: É wá tú fɔtɔ kpɛkun e nin be é kó kún.+ 10 Izraɛli akpasua’m be kwlaa be nun’n, é fá sran ya (100) be nun yasua blu. Yɛ é fá sran akpi (1.000) be nun yasua ya (100) nin sran akpiakpi blu (10.000) be nun yasua akpi (1.000) naan be kunndɛ sonja’m be aliɛ, kɛ ɔ ko yo naan be nin Gibea m’ɔ o Bɛnzamɛn akpasua’n su lɔ’n i sufuɛ’m b’a kwla kun alɛ’n ti. Afin be yoli tete sa Izraɛli mɛn’n nun.” 11 Ɔ maan Izraɛli yasua’m be kwlaa be ti yiali, be nuan yoli kun* kɛ be nin klɔ’n i sufuɛ’m bé kó kún.

12 Izraɛli akpasua’m be sunmannin sran wie mun Bɛnzamɛn akpasua’n su yasua’m be kwlaa be sin naan be ko se be kɛ: “?Ngue sa tɛ yɛle nga w’a ju amun afiɛn yɛ’n? 13 An yi Gibea yasua finfinfuɛ+ sɔ’m be man naan e kun be naan e nunnun sa tɛ’n Izraɛli mɛn’n nun.”+ Sanngɛ Bɛnzamɛnfuɛ’m b’a kplinman su kɛ bé tíe ndɛ nga be niaan Izraɛlifuɛ’m be kannin’n.

14 Ɔ maan Bɛnzamɛnfuɛ’m be fin be klɔ’m be su fiteli, kpɛkun be ti yiali Gibea lɔ naan be nin Izraɛlifuɛ’m bé kó kún. 15 Cɛn sɔ’n nun’n, Bɛnzamɛnfuɛ’m be yiali be sonja akpiakpi ablaɔn-nin-nsiɛn (26.000), tokofi o be sa nun. Be wa fa be ukali Gibea lɔ yasua ya nso (700) mɔ be si alɛ kun kpa’n be su. 16 Sonja sɔ’m be nun sran ya nso (700) mɔ be si alɛ kun kpa’n be di bɛ. Sɛ be nun kun fa kpafloko fa to sran kun i ti ndrɛ kun i wun yɔbuɛ bɔbɔ’n, ɔ su to fuanman.

17 Izraɛlifuɛ’m be yiali yasua akpiakpi ya nnan (400.000) ɔ nin be sa nun tokofi,+ Bɛnzamɛnfuɛ’m be nunman be nun wie. Be kwlaa be si alɛ kun kpa. 18 Be jasoli, be ɔli Betɛli naan bé kó úsa Ɲanmiɛn i sa.+ Izraɛlifuɛ’m be usali kɛ: “?E nun onin yɛ ɔ́ dún mmua kɔ́ naan ɔ nin Bɛnzamɛnfuɛ’m be ko kun-ɔn?” Zoova tɛli su kɛ: “Maan Zida dun mmua wɔ.”

19 I sin’n, Izraɛlifuɛ’m be jasoli nglɛmun kpɛkun be ko boli nanmue Gibea i wun lɔ.

20 Izraɛlifuɛ’m be ɔli kɛ be nin Bɛnzamɛnfuɛ’m bé kó kún. Be ko jranjrannin Gibea i wun lɔ naan be nin bé kún alɛ. 21 Ɔ maan Bɛnzamɛnfuɛ’m be fin Gibea lɔ fiteli, kpɛkun be kunnin Izraɛlifuɛ akpiakpi ablaɔn-nin-nɲɔn (22.000) cɛn sɔ’n nun. 22 Sanngɛ Izraɛli sonja’m be yoli yakpafuɛ, be ko jranjrannin be osu’n nun ekun kɛ cɛn klikli’n nun’n sa. 23 Izraɛlifuɛ’m be ɔli be ko sunnin Zoova ɲrun lele nnɔsua, kpɛkun be usali Zoova kɛ: “?E nin e niaan Bɛnzamɛnfuɛ mun e ko kun alɛ ekun?”+ Zoova tɛli be su kɛ: “Amun wɔ naan amun nin be ko kun.”

24 I cɛn nɲɔn’n su’n, Izraɛlifuɛ’m be mantannin Bɛnzamɛnfuɛ’m be lɔ. 25 I cɛn nɲɔn su sɔ’n nun’n, Bɛnzamɛnfuɛ’m be kusu be fin Gibea lɔ fiteli naan be nin be yía nun. Be kunnin Izraɛlifuɛ akpiakpi blu-nin-mɔcuɛ (18.000),+ tokofi o be kwlaa be sa nun. 26 Kɛ ɔ yoli sɔ’n, Izraɛlifuɛ’m be kwlaa be ɔli Betɛli. Be sunnin yɛ be trannin Zoova i ɲrun lɛ.+ Cɛn sɔ’n nun’n, be cili nglɛmun+ lele nnɔsua. Yɛ be yili tɛ nga kɛ bé yí’n be yra nnɛn’n i kɔlikɔli’n+ nin bo kun yolɛ tɛ+ Zoova ɲrun. 27 I sin’n, Izraɛlifuɛ’m be usali Zoova i sa.+ Afin blɛ sɔ’n nun’n, lɔ yɛ Ɲanmiɛn Kpli i aenguɛ’n i alaka’n wo-ɔ. 28 Blɛ sɔ’n nun’n, Fineasi+ m’ɔ ti Eleazaa i wa’n, mɔ i kusu ti Aarɔn i wa’n yɛ ɔ di junman alaka’n i ɲrun-ɔn. Be usali kɛ: “?E nin e niaan Bɛnzamɛnfuɛ mun e ko kun alɛ ekun annzɛ e yaci kɔlɛ?”+ Zoova tɛli su kɛ: “An wɔ, afin ainman’n, ń má fá be ń wlá amun sa nun.” 29 Ɔ maan Izraɛlifuɛ’m be fali yasua mun siesieli Gibea klɔ’n i wun+ sin yiali nun.

30 I cɛn nsan’n su’n, Izraɛlifuɛ’m be ɔli kɛ be nin Bɛnzamɛnfuɛ’m bé kó kún. Be ko jranjrannin Gibea klɔ’n i wun lɔ kɛ cɛn kun ngalɛ’m be nun’n sa.+ 31 Kɛ Bɛnzamɛnfuɛ’m be ɔli mɔ be nin sonja’m be ko yiali nun’n, sonja’m be cuɛnnin be ɔli klɔ’n i wun mmua.+ Ɔ maan kɛ titi’n sa’n, be tɔli be su kpɛkun be kunnin be nun wie mun atin dandan’m be su. Atin sɔ’m be nun kun kɔ Betɛli yɛ kun kɔ Gibea. Be kunnin Izraɛlifuɛ ablasan (30) blo lɔ.+ 32 Bɛnzamɛnfuɛ’m be seli kɛ: “É wá kwlá be kɛ titi liɛ’n sa.”+ Sanngɛ Izraɛlifuɛ’m be seli kɛ: “É wá wánndi kpɛkun é cúɛn be é kɔ́ klɔ’n i wun mmua atin dandan’m be su.” 33 Ɔ maan Izraɛlifuɛ’m be jasoli kan be o lɛ’n, kpɛkun be ko jranjrannin Baali-Tamaa. Kɛ ɔ yoli sɔ’n, be nga be bu sali Gibea i wun lɔ’n be fin be fiawlɛ’n nun fiteli. 34 Sran akpiakpi blu (10.000) nga be fali be Izraɛlifuɛ’m be nun mɔ be si alɛ kun kpa’n, be wa jranjrannin Gibea i ɲrun ndɛnman su lɛ, alɛ’n kpili kpa. Sanngɛ Bɛnzamɛnfuɛ’m be siman kɛ lika’n wá jrán be su.

35 Zoova fali Bɛnzamɛnfuɛ+ mun wlali Izraɛlifuɛ’m be sa nun. Ɔ maan cɛn sɔ’n nun’n, Izraɛlifuɛ’m be kunnin Bɛnzamɛnfuɛ’m be nun sran akpiakpi ablaɔn-nin-nnun ya kun (25.100), tokofi o be kwlaa be sa nun.+

36 Kɛ Izraɛlifuɛ’m be wanndili Bɛnzamɛnfuɛ’m be ɲrun’n,+ Bɛnzamɛnfuɛ’m be buli i kɛ bé wá kwlá be kɛ titi liɛ’n sa. Sanngɛ kɛ mɔ be lafi be nga be bu sali Gibea i wun lɔ’n be su’n i ti yɛ be wanndili-ɔ.+ 37 Be nga be fiali’n, be ɔli ndɛndɛ naan bé kó tɔ́ Gibea klɔ’n su. Be nga be fiali’n be bo sanndili, kpɛkun be fali tokofi kunnin klɔ wunmuan’n nun sran mun.

38 Izraɛlifuɛ’m be nuan sɛli su kɛ be nga be fiali klɔ’n i wun lɔ’n, bé wá yó maan sin wunsrɛn fín klɔ’n nun fíte kɔ́ nglo naan ɔ yo nzɔliɛ like.

39 Kɛ bé kún alɛ mɔ Izraɛlifuɛ’m bé wánndi’n, Bɛnzamɛnfuɛ’m be tɔli be su, yɛ be kunnin Izraɛlifuɛ kɔe ablasan (30).+ Be seli kɛ: “Nga liɛ’n, é wá kwlá be ekun kɛ nga e fa kwlali be alɛ kun ngalɛ’m be nun’n sa.”+ 40 Sanngɛ nzɔliɛ like mɔ yɛle sin wunsrɛn’n ɔ boli fitelɛ bo, ɔ fu kɔ nglo. Kɛ Bɛnzamɛnfuɛ’m be kpɛli be ɲin’n, be wunnin kɛ klɔ wunmuan’n su yra, sin’n jue kɔ nglo. 41 Ɔ maan Izraɛlifuɛ’m be bli sali be sin. Srɛ kunnin Bɛnzamɛnfuɛ mun dan. Afin be wunnin kɛ sa w’a ɲan be. 42 Be wanndili Izraɛlifuɛ’m be ɲrun ɔli aawlɛ flɛnnɛn’n i bue liɛ’n su lɔ. Sanngɛ Izraɛlifuɛ’m be fali alɛ’n suli be su. Yasua wie’m be fin klɔ’m be nun fiteli be wa kunnin be wie. 43 Be bo sin yiali Bɛnzamɛnfuɛ mun, be suli be su lele be ko kwlali be Gibea klɔ’n i ɲrun ndɛnman su lɛ, wia afiliɛ lɔ lika’n nun. 44 Ɔ maan Bɛnzamɛnfuɛ akpiakpi blu-nin-mɔcuɛ (18.000) be wuli. Be kwlaa be ti alɛ kunfuɛ kpakpa mun.+

45 Bɛnzamɛnfuɛ’m be sali be sin, be wanndi ɔli aawlɛ flɛnnɛn’n nun lɔ Rimɔn yɔbuɛ’n+ i wun lɔ. Izraɛlifuɛ’m be kunnin be nun sran akpi nnun (5.000) atin dandan’m be su. Be fuannin be lele juli Gidɔmun, yɛ be kunnin sran akpi nɲɔn (2.000) ekun. 46 Bɛnzamɛnfuɛ nga be kunnin be cɛn sɔ’n nun’n be kwlaa be ti sran akpiakpi ablaɔn-nin-nnun (25.000), tokofi o be sa nun.+ Yɛ be kwlaa be ti alɛ kunfuɛ kpakpa mun. 47 Sanngɛ be nun sran ya nsiɛn (600) be wanndi ɔli aawlɛ flɛnnɛn’n nun lɔ Rimɔn yɔbuɛ’n i wun lɔ. Be kali Rimɔn yɔbuɛ’n su lɔ lele anglo nnan.

48 Izraɛlifuɛ’m be sali be sin be nin Bɛnzamɛnfuɛ’m be wa kunnin. Be fali tokofi kunnin be nga be o klɔ’n nun’n. Be kunnin sran mun nin nnɛn mun. Be kunnin like kwlaa ng’ɔ kali lɛ’n. Kpɛkun be fali sin be wɔli klɔ kwlaa nga be sinnin su’n be nun.