2 Samiɛli

21 Davidi blɛ su’n, awe’n wa kpɛnnin+ afuɛ klonglo nsan. I sɔ’n ti’n, Davidi ɔli Zoova i nun usalɛ. Zoova seli kɛ: “Saili nin i awlofuɛ’m be guali sran mmoja ase. Be kunnin Gabaɔnfuɛ mun.”+ 2 Famiɛn’n flɛli Gabaɔnfuɛ mun+ naan w’a kan ndɛ w’a kle be. (Gabaɔnfuɛ’m be timan Izraɛlifuɛ. Be yɛ be ti Amɔɔfuɛ mun+ be nun sran nga be kali’n niɔn. Izraɛlifuɛ’m be tali be nda kɛ be su yoman be like fi.+ Sanngɛ klolɛ mɔ Saili kloli Izraɛlifuɛ mun nin Zidafuɛ mun sinnzin su’n ti’n, ɔ kunndɛli kɛ ɔ́ núnnún be.) 3 Davidi usali Gabaɔnfuɛ’m be kɛ: “?Ngue yɛ n kwla yo man amun-ɔn? ?Ngue yɛ n kwla yo naan sa tɛ sɔ’n w’a jaso e su naan amun a bo muae b’a man Zoova i sran* mun-ɔn?” 4 Yɛ Gabaɔnfuɛ’m be tɛli i su kɛ: “E nin Saili nin i awlofuɛ mun e afiɛn ndɛ liɛ’n, nán sika annzɛ sika ɔkwlɛ yɛ ɔ kwla kpɛ nun-ɔn.+ Asa kusu’n, e kwlá kunman sran Izraɛli wa.” Yɛ Davidi seli kɛ: “Like kwlaa nga amun se min kɛ n yo man amun’n, ń yó.” 5 Be seli famiɛn’n kɛ: “Bian ng’ɔ kunndɛli kɛ ɔ́ núnnún e ngba mɔ i waan ɔ́ yó naan y’a tranman Izraɛli nvle’n nun kun’n,+ 6 maan be fɛ i mma’m be nun nso be man e. É kún be yɛ é fá be saka’n é sénde i waka su+ Zoova ɲrun lɛ Gibea lɔ,+ yɛle kɛ Saili m’ɔ Zoova sieli i famiɛn laa’n,+ i klɔ’n su lɔ.” Yɛ famiɛn’n seli kɛ: “Ń fá be ń wlá amun sa nun.”

7 Sanngɛ famiɛn’n sili Mefibosɛti+ m’ɔ ti Zonatan i wa’n mɔ i kusu ti Saili i wa’n i aunnvɔɛ. Afin Davidi nin Saili i wa Zonatan be tali nda+ Zoova ɲrun. 8 Famiɛn’n fali Aamonin nin Mefibosɛti mannin be. Saili nin Aya i wa bla Rizpa’n+ yɛ be wuli ba yasua nɲɔn sɔ mun-ɔn. Asa ekun’n, ɔ fali ba yasua nnun nga Saili i wa bla Mikali*+ nin Adriɛli+ be wuli be’n, ɔ mannin be wie. Adriɛli sɔ’n ti Baazilai m’ɔ fin Abɛli-Meola’n i wa. 9 Davidi fali be mannin Gabaɔnfuɛ mun naan b’a kun be. Kpɛkun be fali be saka’n sendeli i waka su Zoova i ɲrun lɛ+ oka’n su lɔ. Be nso’n be wuli likawlɛ. Kɛ fie su ninnge’m be kpɛlɛ blɛ’n boli i bo’n, yɛle kɛ ɔɔzu kpɛlɛ’n i cɛn ba klikli’n su’n, yɛ be kunnin be-ɔ. 10 I sin’n, Aya i wa bla Rizpa+ fali bajɛ tralɛ sɛli i yɔbuɛ’n su. Kɛ fie su ninnge’m be kpɛlɛ’n boli i bo’n, yɛ ɔ fa sɛli su-ɔ. Yɛ bajɛ tralɛ’n kali lɛ lele naan nzue’n w’a tɔ w’a bo saka mun. Wia nun’n, ɔ yaciman anunman’m be lɛ naan be tran saka’m be su. Kɔnguɛ kusu’n, ɔ yaciman blo nnɛn’m be lɛ naan be wunnge be wun lɔ.

11 Be kannin like kwlaa nga Aya i wa Rizpa m’ɔ ti Saili i yi’n yoli’n, i ndɛ kleli Davidi. 12 I sɔ’n ti’n, Davidi ɔli ko fali Saili nin i wa Zonatan be owie mun Zabɛsi-Galaadi+ lɔ kpɛnngbɛn’m* be sa nun. Kɛ Filistifuɛ’m be kunnin Saili Gilboa+ lɔ mɔ be sendeli Saili nin Zonatan be fuɛn’n lika gbawun ng’ɔ o Bɛti-Sanin lɔ’n nun’n, Zabɛsi-Galaadi lɔ kpɛnngbɛn’m be ko wuali be saka’n. 13 Ɔ fali Saili nin i wa Zonatan be owie mun bali. Asa ekun’n, be tiannin be nga be kunnin be’n be owie’m be nuan.+ 14 I sin’n, be fali Saili nin i wa Zonatan be owie mun sieli i Kisi+ m’ɔ ti Saili i si’n i asieliɛ’n nun. Asieliɛ sɔ’n wo Bɛnzamɛn akpasua’n nun lɔ klɔ nga be flɛ i Zela’n+ su. Like kwlaa nga famiɛn’n seli be kɛ be yo’n, be niannin nun yoli. Kpɛkun Ɲanmiɛn sieli i su tieli kpatalɛ nga be kpɛtɛli i naan ɔ yra nvle’n su’n.+

15 Alɛ tɔli Filistifuɛ mun nin Izraɛlifuɛ’m be afiɛn ekun.+ Kɛ Davidi nin i sran’m be nin Filistifuɛ’m bé kún’n, afɛ’n tili i dan. 16 Refafuɛ’m+ be osu’n nunfuɛ kun mɔ be flɛ i kɛ Isibi-Benɔbu’n, ɔ kunndɛli kɛ ɔ́ kún Davidi. I cua’n, aaba yɛ be fa yoli-ɔ, yɛ i nɔnnin’n ju sikli ya nsan (300).*+ Asa ekun’n, tokofi uflɛuflɛ kun o i sa nun. 17 Kɛ ɔ yoli sɔ’n, Zeruya i wa Abisai+ wa ukɛli i.+ Ɔ kunnin Filistifuɛ’n. Yɛ Davidi i sran’m be seli i kpongbongbo* kɛ: “Kɛ ɔ fin andɛ’n, sɛ é kɔ́ alɛ kunlɛ’n, a su kɔman wie.+ Nán yo naan Izraɛli i kannin’n nuan.”+

18 I sin’n, be nin Filistifuɛ’m be kunnin alɛ ekun+ Gɔbu lɔ. Alɛ sɔ’n nun’n, Sibekai+ m’ɔ ti Isafuɛ’n ɔ kunnin Safu. Bian sɔ’n ti Refafuɛ’m+ be osu’n nunfuɛ.

19 Izraɛlifuɛ mun nin Filistifuɛ’m+ be wa kunnin alɛ ekun Gɔbu lɔ. Blɛ sɔ’n nun’n, Zaare-Oregimun m’ɔ ti Bɛtleɛmunfuɛ’n i wa Ɛlanan kunnin Goliati m’ɔ ti Gatifuɛ’n. Goliati sɔ’n i cua’n i waka’n ti dan kɛ tannin wufuɛ’m be kondo’n sa.+

20 Be wa kunnin alɛ ekun Gati lɔ. Kɛ ɔ́ yó sɔ’n, nn bian kun o lɛ’n, ɔ ti kpandangblanwun kpa. I sa mma mun nin i ja mma’m be ti nsiɛnnsiɛn, ɔ maan i kwlaa ti ablaɔn-nin-nnan (24). Ɔ ti Refafuɛ’m be osu’n nunfuɛ wie.+ 21 Bian sɔ’n klɔklɔli Izraɛlifuɛ mun lelele.+ I sɔ’n ti’n, Davidi i niaan bian Simei+ i wa Zonatan wa kunnin i.

22 Sran nnan sɔ’m be ti Refafuɛ’m be osu’n nunfuɛ, yɛ be fin Gati. Davidi nin i sran’m be kunnin be.+