1 Famiɛn Mun

11 Kɛ Famiɛn Salomɔn fali Faraɔn i wa bla’n,+ i sin’n ɔ kloli nvle uflɛ nun bla kpanngban ekun.+ Ɔ wa kloli Moabu+ nin Amɔn+ nin Edɔmun nin Sidɔn,+ ɔ nin Ɛti+ bla mun. 2 Be fin nvle nga Zoova kannin be ndɛ kleli Izraɛlifuɛ mun’n be nun. Ɔ seli be kɛ: “Nán amun wɔ be wun lɔ,* yɛ nán be bla amun wun wa. Afin bé wá yó maan amun awlɛn’n kúnman kɔ́ be ɲanmiɛn liɛ’m be su.”+ Sanngɛ Salomɔn fɛli i wun mantannin be yɛ ɔ kloli be. 3 I yi’m be ti ya nso (700), be ti famiɛn bla, yɛ i soman’m be ti ya nsan (300). I yi’m be yoli maan i awlɛn’n kacili blɛblɛblɛ.* 4 Kɛ Salomɔn yoli kpɛnngbɛn’n,+ i yi’m be yoli maan i awlɛn’n kunman ɔli be ɲanmiɛn liɛ’m be su.+ Ɔ maan w’a fɛmɛn i awlɛn’n kwlaa w’a sumɛn i Ɲanmiɛn Zoova kɛ i si Davidi sa. 5 Salomɔn suli Astaate+ m’ɔ ti Sidɔnfuɛ’m be ɲanmiɛn’n. Yɛ ɔ suli Amɔnfuɛ’m be ɲanmiɛn m’ɔ ti like kain’n mɔ be flɛ i Milkɔmun’n.+ 6 Salomɔn yoli like ng’ɔ ti tɛ Zoova ɲrun’n, w’a fɛmɛn i wun w’a manman Zoova mlɔnmlɔn kɛ nga i si Davidi fa yoli’n sa.+

7 Salomɔn kplannin lika nglonglo kun+ mannin Moabufuɛ’m be ɲanmiɛn m’ɔ ti like kain’n mɔ be flɛ i Kemɔsu’n oka ng’ɔ o Zerizalɛmun i ɲrun lɛ’n su lɔ. Yɛ ɔ kplannin kun mannin Amɔnfuɛ’m+ be ɲanmiɛn m’ɔ ti like kain’n mɔ be flɛ i Molɛki’n.+ 8 Ɔ yoli i sɔ mɛnnin i yi nga be fin nvle uflɛ nun mɔ be yi tɛ man be ɲanmiɛn mun naan i wunsrɛn’n fite’n, be kwlaa.

9 Zoova fali Salomɔn i wun ya dan kpa, afin i awlɛn’n tuli Zoova m’ɔ ti Izraɛli Ɲanmiɛn’n,+ m’ɔ yili i wun nglo kleli i kpɛ nɲɔn’n+ i su. 10 Kusu nn ɔ kannin sa sɔ’n i ndɛ kleli i. Ɔ seli i kɛ nán ɔ wɔ ɲanmiɛn uflɛ sin.+ Sanngɛ w’a faman ndɛ nga Zoova kannin’n su. 11 Zoova seli Salomɔn kɛ: “Kɛ mɔ a yoli sɔ’n ti’n, mɔ w’a diman min aenguɛ’n su’n, mɔ w’a faman min mmla nga n fa mannin wɔ’n su’n ti’n, ń má dé famiɛn diwlɛ’n ɔ sa nun, kpɛkun ń fá mán ɔ sufuɛ’m be nun kun.+ 12 Sanngɛ ɔ si Davidi ti’n, n su yoman sɔ ɔ blɛ su. Ɔ wa’n i sa nun yɛ ń dé-ɔ.+ 13 N su deman famiɛn diwlɛ wunmuan’n.+ Ń fá Izraɛli akpasua kun ń mán ɔ wa’n,+ ɔ si Davidi m’ɔ ti min sufuɛ’n nin Zerizalɛmun mɔ n fali’n,+ be ti.”

14 Zoova yoli maan sran kun wa jasoli Salomɔn wun.+ Sran sɔ’n yɛle Adadi m’ɔ ti Edɔmunfuɛ’n, ɔ ti Edɔmun lɔ famiɛn’n i osu’n nunfuɛ.+ 15 Kɛ Davidi kwlali Edɔmunfuɛ mun’n,+ Zoabu m’ɔ ti sonja’m be su kpɛn’n ɔ ɔli kɛ ɔ́ kó síe be nga be kunnin be’n, yɛ ɔ fali ajalɛ kɛ ɔ́ kún Edɔmun lɔ yasua’m be kwlaa. 16 (Afin Zoabu nin Izraɛlifuɛ’m be kwlaa be kali lɛ anglo nsiɛn. Be kali lɛ lele ɔ wieli Edɔmun yasua’m be kwlaa be kun.) 17 Adadi nin i si i sufuɛ wie mun mɔ be ti Edɔmunfuɛ’n be wanndili. Kpɛkun be ɔli Ezipti. Kɛ ɔ́ yó sɔ’n, nn Adadi ti gbanflɛn kan. 18 Be fɛli i Madian lɛ be ɔli Paran. Be fali yasua wie mun Paran+ lɛ, kpɛkun be ɔli Ezipti. Be ɔli Faraɔn m’ɔ ti Ezipti famiɛn’n i sin. Ɔ mannin Adadi i sua nin aliɛ, ɔ nin asiɛ. 19 Faraɔn i klun jɔli Adadi i wun dan. I sɔ’n ti’n, ɔ fɛli i yi Tapenɛsi m’ɔ ti famiɛn bla’n* i niaan bla’n ɔ mɛnnin i kɛ ɔ jɛ i. 20 Kɛ ɔ́ kɔ́ i ɲrun’n, Tapenɛsi i niaan bla’n wuli ba yasua kun mannin Adadi, be flɛli i kɛ Genubati. Tapenɛsi tali ba’n* Faraɔn i awlo lɔ. Ɔ maan Genubati kali Faraɔn i awlo lɔ, ɔ nin Faraɔn i mma mun yɛ be wo-ɔ.

21 Adadi tili i Ezipti lɔ kɛ Davidi w’a wu,*+ naan Zoabu m’ɔ ti sonja’m be su kpɛn’n w’a wu.+ Ɔ maan ɔ seli Faraɔn kɛ: “Man min atin naan n wɔ min mɛn’n nun lɔ.” 22 Sanngɛ Faraɔn seli i kɛ: “?Ngue yɛ ɔ mian ɔ sa min wun wa mɔ i ti yɛ ɔ waan á kɔ́ ɔ mɛn’n nun lɔ-ɔ?” Ɔ tɛli i su kɛ: “Like fi, sanngɛ yaci, man min atin maan n wɔ.”

23 Ɲanmiɛn yoli maan sran uflɛ jasoli Salomɔn i wun ekun.+ Sran sɔ’n yɛle Eliada i wa Rezɔn. Ɔ wanndili i min Adadezɛɛ+ m’ɔ ti Zoba famiɛn’n i sa nun. 24 Kɛ Davidi kwlali Zobafuɛ mun’n,*+ Rezɔn fali sran wie mun suli i su, yɛ ɔ kacili be su kpɛn, be fɛn sran’m be bo ninnge mun. Be ɔli Damasi,+ be ko trannin lɔ yɛ be sieli Damasi. 25 Rezɔn jasoli Izraɛlifuɛ’m be wun, ɔ yoli sɔ blɛ kwlaa nga Salomɔn dili famiɛn’n i nun. I sɔ m’ɔ yoli’n, ɔ ukali sa tɛtɛ nga Adadi yoli’n su. Blɛ m’ɔ sie Siri’n, i ɲin cili Izraɛlifuɛ mun.

26 Asa ekun’n, Nebati i wa Zeroboamun+ kusu ɔ yoli ɲin kekle* famiɛn’n su wie.+ Ɔ ti Efraimunfuɛ, ɔ fin Zereda, yɛ ɔ ti Salomɔn i sufuɛ.+ Be flɛ i nin’n kɛ Zeria, ɔ ti angbeti bla. 27 Like nga ti yɛ ɔ yoli ɲin kekle famiɛn’n i su’n yɛ: Salomɔn kplannin Milo Cenjeʼn,*+ kpɛkun ɔ katali i si Davidi i Klɔ’n i wun talɛ’n i toklo’n.+ 28 Zeroboamun ti yasua sran. Kɛ Salomɔn wunnin kɛ gbanflɛn’n di junman kekle’n, ɔ fɛli i sieli junman difuɛ nga be fali be Zozɛfu i akpasua’n su’n be kwlaa be su kpɛn.+ 29 Cɛn kun’n, Zeroboamun fin Zerizalɛmun lɔ fiteli. Kɛ ɔ́ kɔ́’n, ɔ nin Ɲanmiɛn nuan ijɔfuɛ Aia+ m’ɔ ti Silofuɛ’n be yiali atin nun, tralɛ uflɛuflɛ kun wla Aia i wun. Be sran nɲɔn cɛ yɛ be o blo lɔ-ɔ. 30 Aia trali tralɛ uflɛuflɛ ng’ɔ wlɛ i wun’n, kpɛkun ɔ titili nun buebue blu-nin-nɲɔn (12). 31 Yɛ ɔ seli Zeroboamun kɛ:

“Fɛ i bue blu, afin ndɛ nga Zoova m’ɔ ti Izraɛli Ɲanmiɛn’n kan’n yɛ: ‘N su de famiɛn diwlɛ’n Salomɔn sa nun, naan ń fá akpasua blu ń mán wɔ.+ 32 Sanngɛ min sufuɛ Davidi+ nin Zerizalɛmun klɔ mɔ n fɛli i Izraɛli akpasua’m be kwlaa be nun’n+ ti’n, akpasua kun wá kɛ́ i sa nun.+ 33 Sa ti mɔ ń yó sɔ’n, yɛle kɛ be yacili min lɛ,+ kpɛkun be ko kotoli Astaate m’ɔ ti Sidɔnfuɛ’m be ɲanmiɛn’n, nin Kemɔsu m’ɔ ti Moabufuɛ’m be ɲanmiɛn’n, ɔ nin Milkɔmun m’ɔ ti Amɔnfuɛ’m be ɲanmiɛn’n be bo. B’a nantiman min atin’m be su, yɛle kɛ b’a yoman sa ng’ɔ ti kpa min ɲrun’n, yɛ b’a faman min mmla nin min afɔtuɛ’m be su kɛ Salomɔn i si Davidi liɛ’n sa. 34 Sanngɛ n su deman famiɛn diwlɛ’n i wunmuan’n i sa nun. Min sufuɛ Davidi mɔ n fɛli i’n ti’n,+ ń yó maan blɛ mɔ i ɲin o su’n, ɔ́ yó be su kpɛn titi. Afin ɔ fali min ndɛ nin min mmla’m be su. 35 Sanngɛ ń má dé famiɛn dilɛ’n i wa’n i sa nun yɛ ń fá akpasua blu ń mán wɔ.+ 36 Ń má fá akpasua kun ń mɛ́n i wa’n. I liɛ’n, min sufuɛ Davidi i kannin’n ɔ́ kpája min ɲrun titi Zerizalɛmun klɔ mɔ n fali naan min dunman’n tran su’n, i nun.+ 37 Ń má fá wɔ, yɛ á síe lika kwlaa nga a klo’n, kpɛkun á yó Izraɛli famiɛn. 38 Sɛ a nanti ndɛ nga n kan kle wɔ’n i kwlaa su’n, sɛ a nanti min atin’m be su naan a yo like ng’ɔ ti kpa min ɲrun’n, yɛle kɛ sɛ a fa min mmla mun nin min ndɛ’m be su’n, kɛ nga min sufuɛ Davidi fa yoli’n sa’n,+ n kusu ń jrán ɔ sin. Ń má yó maan ɔ awlo’n táka kpa titi kɛ nga n yoli maan Davidi liɛ’n takali kpa’n sa.+ Yɛ ń fá Izraɛli ń mán wɔ. 39 Yɛ ń má yó maan Davidi i mma’m be ɲin gúa ase, sa sɔ’n ti.+ Sanngɛ ɔ su yoman sɔ tititi.’”+

40 I sɔ’n ti’n, Salomɔn kunndɛli kɛ ɔ́ kún Zeroboamun. Sanngɛ Zeroboamun wanndi ɔli Ezipti, ɔ ɔli Sisaki+ m’ɔ ti Ezipti famiɛn’n+ i sin. Ɔ kali lɔ lele Salomɔn fa wuli.

41 Salomɔn i su ndɛ’n i onga’n, like kwlaa ng’ɔ yoli be’n nin i ngwlɛlɛ’n i su ndɛ’n, be klɛli be fluwa ng’ɔ kan Salomɔn i ndɛ’n i nun.+ 42 Salomɔn yoli Izraɛlifuɛ’m be kwlaa be su famiɛn Zerizalɛmun lɔ afuɛ ablanan (40). 43 I sin’n, Salomɔn wuli.* Kpɛkun be sieli i i si Davidi i Klɔ’n su lɔ. Yɛ i wa Roboamun+ sinnin i osu yoli famiɛn-ɔn.