1 Famiɛn Mun

15 Kɛ Nebati i wa Zeroboamun+ yoli famiɛn’n, i afuɛ blu-nin-mɔcuɛ (18) su’n, Abiamun kacili Zida famiɛn.+ 2 Ɔ dili famiɛn Zerizalɛmun lɔ afuɛ nsan. Be flɛ i nin’n kɛ Maaka,+ ɔ ti Abisalɔmun i anunman. 3 Ɔ yoli sa tɛ kwlaa nga i si yoli’n wie, yɛ w’a fɛmɛn i awlɛn’n kwlaa w’a sumɛn* i Ɲanmiɛn Zoova kɛ i nannan Davidi m’ɔ fɛli i awlɛn’n kwlaa fa suli i’n sa. 4 Sanngɛ Davidi ti’n,+ i Ɲanmiɛn Zoova mɛnnin i kannin kun Zerizalɛmun lɔ,+ yɛle kɛ ɔ yoli maan i wa’n sinnin i osu, yɛ ɔ yoli maan Zerizalɛmun kali lɛ. 5 Afin Davidi yoli like ng’ɔ ti kpa Zoova ɲrun’n. Blɛ mɔ i ɲin o su’n, w’a yiman ndɛ nga Ɲanmiɛn kan kleli i’n i wie fi ase, saan sa ng’ɔ fa yoli Iri m’ɔ ti Ɛtifuɛ’n.+ 6 Roboamun i blɛ su’n ɔ nin Zeroboamun b’a yaciman alɛ kunlɛ le.+

7 Abiamun i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.+ Alɛ tɔli Abiamun nin Zeroboamun be afiɛn wie.+ 8 I sin’n, Abiamun wuli,* kpɛkun be sieli i Davidi Klɔ’n su lɔ. Yɛ i wa Aza+ sinnin i osu kacili famiɛn-ɔn.+

9 Kɛ Famiɛn Zeroboamun yoli famiɛn Izraɛli lɔ’n, i afuɛ ablaɔn (20) su’n yɛ Aza boli famiɛn dilɛ bo Zida lɔ-ɔ. 10 Ɔ dili famiɛn Zerizalɛmun lɔ afuɛ ablanan-nin-kun (41). Be flɛ i nannan bla’n kɛ Maaka,+ ɔ ti Abisalɔmun i anunman. 11 Aza yoli sa ng’ɔ ti su Zoova ɲrun’n,+ kɛ i nannan Davidi sa. 12 Ɔ fuannin yasua nga be bo tekle amuin sua’m be nun’n mɛn’n nun,+ yɛ ɔ bubuli amuin mɔ be ti like kain’n,* mɔ i nannan’m be takali be’n be kwlaa.+ 13 I kpa bɔbɔ’n, ɔ yoli maan i nannan bla Maaka+ w’a ɲanman ɲrun kun.* Afin ɔ yoli amuin ba m’ɔ ti tete like’n naan be sɔ waka nga be takali’n.* Aza buli tete like sɔ’n,+ kpɛkun ɔ wɔli nun Sedrɔn Kongo’n nun lɔ.+ 14 Ɔ nin i sɔ ngbaʼn, lika nglonglo’m be kali lɛ.+ Sanngɛ lele mɔ Aza fá wú’n, ɔ fɛli i awlɛn’n kwlaa fa suli* Zoova. 15 Ninnge nga ɔ nin i si be yoli be sanwun’n, ɔ fa be bali Zoova i sua’n nun. Be yɛle sika nin sika ɔkwlɛ, ɔ nin ninnge fanunfanun wie mun.+

16 Alɛ trannin Aza nin Baasa+ m’ɔ ti Izraɛli famiɛn’n be afiɛn titi. 17 Famiɛn Baasa m’ɔ ti Izraɛli famiɛn’n fali alɛ wlali Zida sin. Kpɛkun ɔ boli Rama+ i wun sisilɛ bo.* Ɔ yoli sɔ naan sran fi w’a finman Famiɛn Aza m’ɔ ti Zida famiɛn’n i nvle’n nun w’a fiteman, annzɛ sran fi w’a wluman lɔ.+ 18 Kɛ ɔ yoli sɔ’n, Aza fali sika nin sika ɔkwlɛ nga be kali ninnge siewlɛ mɔ be o Zoova i sua’n nin famiɛn’n i sua’n be nun’n, ɔ fa mɛnnin i sufuɛ mun. Kpɛkun Famiɛn Aza fa ko mannin Bɛnin-Adadi m’ɔ ti Siri famiɛn’n,+ m’ɔ tran Damasi lɔ’n. Ɔ ti Tabrimɔn i wa, i kusu ti Eziɔn i wa. Ɔ seli i kɛ: 19 “Aenguɛ o e nin wɔ e afiɛn. Min si nin ɔ si kusu be trali aenguɛ. N su blɛ ɔ sika nin sika ɔkwlɛ. Yaci, aenguɛ nga a nin Famiɛn Baasa m’ɔ ti Izraɛli famiɛn’n be trali’n, nán di su kun. I liɛ’n, ɔ́ jáso min lika’n nun wa.” 20 Bɛnin-Adadi fali Famiɛn Aza i ndɛ’n su. Kpɛkun ɔ sunmɛnnin i sonja’m be su kpɛn mun naan be ko utu Izraɛli klɔ mun. Ɔ maan be ko fali Izɔn+ nin Dan,+ nin Abɛli-Bɛti-Maaka, nin Kinerɛti lika wunmuan’n ɔ nin Nɛftali akpasua wunmuan’n. 21 Kɛ Baasa tili ndɛ sɔ’n, ɔ ka lɛ yacili Rama i kplanlɛ.* Yɛ ɔ trannin Tiiza+ lɔ titi. 22 Famiɛn Aza flɛli Zidafuɛ’m be kwlaa, sran fi w’a kaman lɛ. Be ko isali yɔbuɛ nin waka nga Baasa su fa kplan Rama’n. Kpɛkun Famiɛn Aza fa be kplannin Geba*+ m’ɔ o Bɛnzamɛn akpasua’n su lɔ’n, ɔ nin Mizpa.+

23 Aza i su ndɛ’n i onga’n i kwlaa, i kwlalɛ’n nin like kwlaa ng’ɔ yoli be’n, ɔ nin klɔ ng’ɔ kplannin be’n,* be klɛli be fluwa ng’ɔ kan Zida famiɛn’m be ndɛ’n i nun. Sanngɛ kɛ ɔ yoli kpɛnngbɛn’n tukpacɛ kun yoli i ja mun.+ 24 I sin’n, Aza wuli,* be sieli i kan be sieli i nannan’m be lɛ’n, Davidi Klɔ’n su lɔ. I wa Zozafati+ sinnin i osu kacili famiɛn.

25 Kɛ Famiɛn Aza kacili Zida famiɛn’n, i afuɛ nɲɔn’n su’n, Zeroboamun i wa Nadabu+ yoli famiɛn Izraɛli nvle’n su. Ɔ dili famiɛn Izraɛli nvle’n su afuɛ nɲɔn. 26 Like ng’ɔ ti tɛ Zoova ɲrun’n yɛ ɔ yoli-ɔ. Ɔ fali atin tɛ nga i si fali’n wie,+ yɛ sa tɛ nga i si yoli mɔ i ti’n Izraɛlifuɛ’m be yoli sa tɛ’n, ɔ yoli wie.+ 27 Aia i wa Baasa m’ɔ fin Isakaa akpasua’n nun’n, ɔ jasoli i wun. Baasa kunnin i Gibetɔn+ m’ɔ ti Filistifuɛ’m be liɛ’n i su lɔ. Kɛ ɔ́ yó sɔ’n nn Nadabu nin Izraɛlifuɛ’m be kwlaa b’a bo nanmue Gibetɔn klɔ’n i wun. 28 Ɔ maan kɛ Famiɛn Aza kacili Zida famiɛn’n, i afuɛ nsan su’n, Baasa kunnin Nadabu. Kpɛkun ɔ sinnin i osu kacili famiɛn. 29 Kɛ ɔ kacili famiɛn cɛ’n, ɔ kunnin Zeroboamun i awlo’n nunfuɛ’m be kwlaa. W’a yaciman Zeroboamun i awlo’n nunfuɛ* wie fi lɛ. Ɔ nunnunnin be kwlaa kɛ nga Zoova sinnin i sufuɛ Aia m’ɔ ti Silofuɛ’n i lika kannin’n sa.+ 30 Sa sɔ’n juli afin Zeroboamun yoli sa tɛ, yɛ ɔ yoli maan Izraɛlifuɛ’m be yoli sa tɛ, ɔ fɔkɔli Zoova m’ɔ ti Izraɛli Ɲanmiɛn’n i awlɛn dan. 31 Nadabu i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n nun. 32 Alɛ trannin Aza nin Famiɛn Baasa m’ɔ ti Izraɛli famiɛn’n be afiɛn titi.+

33 Kɛ Famiɛn Aza kacili Zida famiɛn’n, i afuɛ nsan’n su’n, Aia i wa Baasa kacili famiɛn Izraɛli nvle wunmuan’n su Tiiza lɔ. Yɛ ɔ dili famiɛn afuɛ ablaɔn-nin-nnan (24).+ 34 Sanngɛ like ng’ɔ ti tɛ Zoova ɲrun’n yɛ ɔ yoli-ɔ.+ Ɔ fali atin nga Zeroboamun fali’n wie. Kpɛkun sa tɛ nga Zeroboamun yoli mɔ i ti’n, Izraɛlifuɛ’m be yoli sa tɛ’n, ɔ yoli wie.+