2 Famiɛn Mun

18 Kɛ Ela i wa Oze+ kacili Izraɛli famiɛn’n, i afuɛ nsan su’n, Akazi+ m’ɔ ti Zida famiɛn’n i wa Ezekiasi+ kacili famiɛn. 2 Kɛ ɔ́ káci famiɛn’n, nn ɔ le afuɛ ablaɔn-nin-nnun (25). Ɔ dili famiɛn afuɛ ablaɔn-nin-ngwlan (29) Zerizalɛmun lɔ. Be flɛ i nin’n kɛ Abi,* Zakari i wa-ɔ.+ 3 Ɔ yoli sa ng’ɔ ti kpa Zoova ɲrun’n titi+ kɛ i nannan Davidi fa yoli’n sa.+ 4 I yɛ ɔ nunnunnin lika nglonglo mun-ɔn,+ i yɛ ɔ bubuli yɔbuɛ nga be sɔ be’n mun-ɔn, i yɛ ɔ kpɛli waka nga be sɔ i’n niɔn.*+ Asa ekun’n, ɔ bubuli aaba wuo nga Moizi yoli’n,+ afin lele m’ɔ́ fá jú blɛ sɔ’n nun’n, Izraɛlifuɛ’m be yi tɛ be man aaba wuo sɔ’n yɛ be yo maan wunsrɛn’n fite, be tɔnnin i dunman kɛ aaba wuo-amuin.* 5 Ezekiasi fɛli i wla guali Zoova+ m’ɔ ti Izraɛli Ɲanmiɛn’n i su. Zida famiɛn nga be dunnin mmua i ɲrun’n, ɔ nin be nga be bɛli i sin’n, be wie fi w’a yoman kɛ i sa. 6 Ɔ fɛli i wun mantannin Zoova.+ W’a kpɔcimɛn i le. Ɔ fali mmla nga Zoova fa mannin Moizi’n su titi. 7 Zoova jrɛnnin i sin. Lika kwlaa ng’ɔ kɔ’n, ɔ fa ajalɛ ngwlɛlɛ su. Ɔ yoli ɲin kekle Asiri famiɛn’n su, w’a kplinman su kɛ ɔ́ sú i.+ 8 Kɛ ɔ fɛ i sasafuɛ tranwlɛ’m be su lele m’ɔ́ fá jú klɔ nga be sili be wun’n be su’n,* ɔ kwlali Filistifuɛ mun.+ Ɔ kwlali be lele fa juli Gaza ɔ nin i asa’n su lɔ klɔ’m be su.

9 Kɛ Ezekiasi kacili famiɛn’n i afuɛ nnan su’n, Salimanazaa m’ɔ ti Asiri famiɛn’n fali alɛ wlali Samarifuɛ’m be sin, ɔ boli nanmue Samari klɔ’n i sin lɛ.+ Kɛ ɔ́ yó sɔ’n, nn Ela i wa Oze+ kacili Izraɛli famiɛn w’a di afuɛ nso. 10 Kɛ be boli nanmue’n i afuɛ nsan su’n, be fali klɔ’n.+ Kɛ bé fá Samari klɔ’n, nn Ezekiasi kacili famiɛn w’a di afuɛ nsiɛn, yɛ Oze kusu kacili Izraɛli famiɛn w’a di afuɛ ngwlan. 11 Asiri famiɛn’n trali Izraɛlifuɛ mun ɔli+ Asiri. Ɔ yoli maan be trannin Ala nin Abɔɔ klɔ’n be su, Gozan nzue ba’n i wun lɛ, ɔ nin Medifuɛ’m be klɔ’m be su.+ 12 Sa sɔ’n juli be su afin b’a tieman be Ɲanmiɛn Zoova i nuan ndɛ’n, b’a diman aenguɛ ng’ɔ nin be trali’n su. B’a faman ndɛ nga Zoova i sufuɛ Moizi kan kleli be’n i wie fi su,+ b’a tieman yɛ b’a nianman su b’a nantiman.

13 Kɛ Ezekiasi kacili famiɛn’n i afuɛ blu-nin-nnan (14) su’n, Sankeribu m’ɔ ti Asiri famiɛn’n+ wa tɔli Zida klɔ kwlaa nga be wun ti sisiwa’n be su, kpɛkun ɔ fali klɔ sɔ mun.+ 14 Ɔ maan Famiɛn Ezekiasi m’ɔ ti Zida famiɛn’n sunmannin sran Asiri famiɛn’n i sin Lakisi lɔ naan be ko se i kɛ: “Fɔnlɛ yɛ n fɔnnin-ɔn. Sɛ a jaso min nvle’n nun’n, like kwlaa nga a se min kɛ n fa man wɔ’n, ń fá mán wɔ.” Asiri famiɛn’n seli Ezekiasi m’ɔ ti Zida famiɛn’n kɛ ɔ mɛn i sika talan* ya nsan (300), ɔ nin sika ɔkwlɛ talan ablasan (30). 15 Ezekiasi fali sika ng’ɔ o Zoova i sua’n nun lɔ’n i kwlaa, ɔ nin ng’ɔ o famiɛn’n i sua’n nun lɔ ninnge kpakpa’m be siewlɛ’m be nun’n mɛnnin i.+ 16 Blɛ sɔ’n nun’n, Ezekiasi yili* Zoova i sua’n i anuan mun+ nin kadri mun mɔ Ezekiasi m’ɔ ti Zida famiɛn’n i bɔbɔ fali sika ɔkwlɛ katali be wun’n,+ kpɛkun ɔ fa be mannin Asiri famiɛn’n.

17 Ɔ maan Asiri famiɛn’n sunmannin Taatan’n* nin Rabusarisi’n* nin Rabusake’n,* ɔ nin sonja kpanngban kpa mɔ be o Lakisi+ lɛ’n kɛ be ko wun Famiɛn Ezekiasi wun Zerizalɛmun+ lɔ. Kɛ be juli Zerizalɛmun lɔ’n, be ko jranjrannin nzue guawlɛ ng’ɔ o nglo lɔ’n i mmuɛ nga be yili’n i wun lɛ. Ɔ o atin dan ng’ɔ kɔ ninnge kpufuɛ’n i fie’n su lɔ’n i wun lɛ.+ 18 Kɛ be seli kɛ famiɛn’n fite’n, Ilkia i wa Eliakimun+ m’ɔ nian famiɛn’n i awlo’n su’n, nin Sɛbna+ m’ɔ ti fluwa klɛfuɛ’n, ɔ nin Azafu i wa Zoa m’ɔ klɛ nvle’n nun ndɛ mun sie’n, be fite ɔli be wun lɔ.

19 Ɔ maan Rabusake’n seli be kɛ: “Amun yaci, amun se Ezekiasi kɛ: ‘Ndɛ nga famiɛn dan’n kan’n yɛ, Asiri famiɛn’n waan yoo: “?Ngue su li yɛ a fa ɔ wla’n gua-ɔ?+ 20 A ko se kɛ: ‘M’an buabua min wun m’an sie, yɛ n le wunmiɛn n kun alɛ.’ Sanngɛ be nuan nun ndɛ kanlɛ ngbɛn yɛle ngalɛ’n. ?Wan li su yɛ a fa ɔ wla’n gua mɔ i ti yɛ a yo ɲin kekle min su’n niɔn?+ 21 A fa ɔ wla gua Ezipti m’ɔ ti kɛ ndɛma mɔ w’a bu’n sa’n i su.+ Nian! Sran ng’ɔ kisɛ i su’n ɔ wɔ i sa klun, ɔ fiti i bo nun lɔ. Be kwlaa nga be fa be wla gua Faraɔn m’ɔ ti Ezipti famiɛn’n i su’n, kɛ i bo’n gua sɔ man be-ɔ. 22 Wienun-ɔn, á sé min kɛ: ‘E Ɲanmiɛn Zoova su yɛ e fa e wla’n gua-ɔ.’+ ?Nán Ɲanmiɛn sɔ’n yɛ ɔ bɔbɔ Ezekiasi a bubuli i lika nglonglo mun nin i tɛ yiwlɛ mun’n niɔn?+ ?Yɛ w’a seman Zidafuɛ mun nin Zerizalɛmunfuɛ mun kɛ: ‘Ɔ fata kɛ amun koto tɛ yiwlɛ nga i ɲrun Zerizalɛmun wa’?”’+ 23 Ɔ maan siɛn’n, maan a nin Asiri famiɛn’n m’ɔ ti min min’n be kpɛkpɛ: Ń má mán wɔ nnɛn kpanngɔ akpi nɲɔn (2.000), sɛ a kwla ɲan sran fu be kwlaa be su-o.+ 24 ?Sɛ Ezipti su yɛ a fa ɔ wla’n gua naan w’a kwla ɲan alɛ kunlɛ kakaklolo nin nnɛn kpanngɔ’n, á yó sɛ naan w’a kwla jran siefuɛ kunngba cɛ m’ɔ ti min min’n i sufuɛ’m be nun kaanfuɛ’n bɔbɔ’n i ɲrun? 25 ?Sɛ Zoova bɔbɔ w’a manman min atin’n, ń bá lika nga i nunnunlɛ? Zoova bɔbɔ seli min kɛ: ‘Kɔ ko tɔ mɛn nga su, naan nunnun i.’”

26 Kɛ ɔ yoli sɔ’n, Ilkia i wa Eliakimun nin Sɛbna+ nin Zoa be seli Rabusake’n+ kɛ: “Yaci, kan ndɛ’n kle ɔ sufuɛ mun Aramun* aniɛn’n+ nun, afin e ti. Nán kan ndɛ’n kle e Zifu’m be aniɛn’n nun, afin nvlefuɛ nga be o talɛ’n su’n be ti.”+ 27 Sanngɛ Rabusake’n seli be kɛ: “?Amun bu i kɛ amun nin amun min’n amun ngunmin ti yɛ min min’n sunmannin min kɛ n wa kan ndɛ nga n kle amun-ɔn? Sran nga be o talɛ’n su’n, be liɛ wie ti yɛ n bali-ɔ. Amun nin sran sɔ mun’n, amun sewie’n yɛ amún wá dí-ɔ, yɛ amun mmie’n yɛ amún wá nɔ́n-ɔn!”

28 I sin’n, Rabusake’n kpannin kekle kpa kannin ndɛ’n Zifu’m be aniɛn’n nun. Ɔ seli kɛ: “Amun tie ndɛ nga Asiri famiɛn’n m’ɔ ti famiɛn dan’n kan’n.+ 29 Ndɛ nga famiɛn’n kan’n yɛ: ‘Nán amun yaci Ezekiasi lɛ naan ɔ laka amun, afin ɔ su kwlá deman amun min sa nun.+ 30 Nán maan Ezekiasi laka amun naan amun fa amun wla gua Zoova su. Ɔ se amun kɛ: “Saan Zoova dé e, klɔ nga su yoman Asiri famiɛn’n i liɛ.”+ 31 Nán amun tie ndɛ nga Ezekiasi kan’n, afin ndɛ nga Asiri famiɛn’n kan’n yɛ: “Maan e siesie e afiɛn, yɛ amun fa amun wun man min. I liɛ’n, amun tinuntinun amún dí amun bɔbɔ amun viɲin nin amun figie’m be su mma mun, yɛ amún nɔ́n amun bɔbɔ amun gbo’n* i nun nzue’n. 32 I sin’n, ń má bá kpɛkun ń fá amun kɔ́ mɛn kun m’ɔ ti kɛ amun bɔbɔ amun mɛn’n sa’n i nun.+ Ɔ ti mɛn kun mɔ ble nin ɔɔzu be yo ye lɔ kpa-ɔ, duvɛn mɔ b’a yi i uflɛuflɛ’n sɔnnin lɔ kpa, be diman kpanwun yalɛ lɔ, ɔ ti viɲin nin olivie fie diwlɛ, yɛ awɛma nzue’n sɔnnin lɔ kpa. Amún ká nguan nun, amun su wuman. Nán amun tie ndɛ nga Ezekiasi kan’n, afin ɔ laka amun se kɛ: ‘Zoova wá dé e.’ 33 ?Nvlenvle’m be ɲanmiɛn’m be nun onin cɛ yɛ ɔ deli i mɛn’n Asiri famiɛn’n i sa nun-ɔn? 34 ?Amati+ nin Aapadi lɔ ɲanmiɛn’m be o nin? ?Sefavaimun+ nin Ena, ɔ nin Iva lɔ ɲanmiɛn’m be o nin? ?Be kwla deli Samari klɔ’n min sa nun?+ 35 ?Nvlenvle’m be ɲanmiɛn’m be kwlaa’n, be nun onin yɛ ɔ kwla deli i nvle’n min sa nun-ɔn? ?Yɛ Zoova yó sɛ yɛ ɔ́ kwlá dé Zerizalɛmun klɔ’n min sa nun-ɔn?”’”+

36 Sanngɛ nvlefuɛ’m be guali bliin, b’a tɛmɛn i su, afin famiɛn’n seli be kɛ nán be kan ndɛ fi.+ 37 Ɔ maan Ilkia i wa Eliakimun m’ɔ nian famiɛn’n i awlo’n su’n, nin Sɛbna m’ɔ ti fluwa klɛfuɛ’n, ɔ nin Azafu i wa Zoa m’ɔ klɛ nvle’n nun ndɛ mun sie’n, be titili be wun tralɛ’m be nun, kpɛkun be ɔli Ezekiasi i wun lɔ, be ko kannin ndɛ nga Rabusake’n kannin’n kleli i.