2 Famiɛn Mun
24 Zozakimun blɛ su’n, Nebikadnezaa+ m’ɔ ti Babilɔnin famiɛn’n fali alɛ wlali Zozakimun sin. Ɔ maan Zozakimun suli i afuɛ nsan. Sanngɛ ɔ wa jasoli i wun, ɔ yoli ɲin kekle i su. 2 Yɛ Zoova yoli maan Kaldefuɛ mun,+ nin Sirifuɛ mun, nin Moabufuɛ mun, nin Amɔnfuɛ nga be wua sran’m be bo ninnge mun’n be kleli Zozakimun i yalɛ. Ɔ yoli maan be ɔli Zida lɔ titi naan be nunnun i, kɛ nga Zoova sinnin i nuan ijɔfuɛ mɔ be ti i sufuɛ’n be lika kannin’n sa.+ 3 Zoova bɔbɔ yɛ maan sa sɔ’n juli Zida su-ɔ. Ɔ yoli sɔ naan ɔ́ yí Zidafuɛ mun i ɲin bo lɛ,+ sa tɛtɛ kwlaa nga Manase yoli be’n ti.+ 4 Asa ekun’n, ɔ guali sran mɔ b’a yoman sa’n be mmoja’n i ase.+ Ɔ yoli maan sran mɔ b’a yoman sa’n be mmoja’n yili Zerizalɛmun klɔ’n. I sɔ’n ti’n, Zoova w’a kplinman su kɛ ɔ́ yáci cɛ.+
5 Zozakimun i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Zida famiɛn’m be ndɛ’n i nun.+ 6 I sin’n, Zozakimun wuli,*+ kpɛkun i wa Zozakinin sinnin i osu kacili famiɛn.
7 Ezipti famiɛn’n+ w’a finmɛn i mɛn’n nun w’a fiteman kun, afin kɛ ɔ fɛ i Ezipti Kongo’n+ nun lele m’ɔ́ fá jú Efrati Nzue’n+ su lɔ’n, ninnge kwlaa ng’ɔ ti i liɛ’n, Babilɔnin famiɛn’n fɛli i ngba.
8 Kɛ Zozakinin+ káci famiɛn’n, nn ɔ le afuɛ blu-nin-mɔcuɛ (18). Ɔ dili famiɛn anglo nsan Zerizalɛmun lɔ.+ Be flɛ i nin’n kɛ Neista. Ɛlnatan m’ɔ fin Zerizalɛmun’n i wa bla-ɔ. 9 Ɔ yoli sa ng’ɔ ti tɛ Zoova ɲrun’n titi, kɛ nga i si fa yoli’n sa. 10 Blɛ sɔ’n nun’n, Nebikadnezaa m’ɔ ti Babilɔnin famiɛn’n i sufuɛ’m be fali alɛ wlali Zerizalɛmunfuɛ’m be sin. Kpɛkun be boli nanmue klɔ’n i sin lɛ.+ 11 Kɛ Nebikadnezaa m’ɔ ti Babilɔnin famiɛn’n i sufuɛ’m be boli nanmue klɔ’n i sin lɛ’n, i bɔbɔ bali lɛ wie.
12 Zozakinin m’ɔ ti Zida famiɛn’n fɛli i wun mannin Babilɔnin famiɛn’n,+ ɔ nin i nin, nin i sufuɛ mun, nin i sran dandan mun, nin i awlo lɔ junman difuɛ mun.+ Kpɛkun Babilɔnin famiɛn’n trɛli i ɔli. Kɛ ɔ́ yó sɔ’n, nn Babilɔnin famiɛn’n kacili famiɛn w’a di afuɛ mɔcuɛ.+ 13 Ɔ fali Zoova i sua’n nun ninnge kpakpa mun, ɔ nin famiɛn’n i sua’n nun ninnge kpakpa’m be kwlaa.+ Ɔ sacili sika ɔkwlɛ ninnge nga Salomɔn m’ɔ ti Izraɛli famiɛn’n yoli be fa sieli Zoova i sua’n+ nun lɔ’n be kwlaa. Sa sɔ’n yoli kɛ nga Zoova fa kannin’n sa. 14 Ɔ trali Zerizalɛmunfuɛ’m be kwlaa nin famiɛn’n i awlo lɔ sran dandan mun,+ nin alɛ kunfuɛ kpakpa’m be kwlaa, ɔ nin ajuin difuɛ nin blalɛ bofuɛ’m*+ be kwlaa ɔli. Ɔ trali sran akpiakpi blu (10.000) ɔli. Sran fi w’a kaman lɛ, saan nvlefuɛ’m be nun yalɛfuɛ kpa mun yɛ be kali lɛ-ɔ.+ 15 Kɛ ɔ trali Zozakinin+ ɔli Babilɔnin+ kɛ ngalɛ’n sa. Ɔ trali famiɛn’n i nin’n, ɔ nin i yi mun, nin i awlo lɔ junman difuɛ mun, nin be nga be le ɲrun nvle’n nun’n ɔli wie. Ɔ trali be Zerizalɛmun lɛ ɔli Babilɔnin. 16 Asa ekun’n, Babilɔnin famiɛn’n trali alɛ kunfuɛ akpi nso (7.000), ɔ nin ajuin difuɛ nin blalɛ bofuɛ* akpi kun (1.000) ɔli Babilɔnin, be kwlaa be ti sonja kpakpa yɛ be si alɛ kun. 17 Babilɔnin famiɛn’n fali Matania m’ɔ ti Zozakinin i si’n i niaan bian’n+ sieli i famiɛn Zozakinin i osu. Kpɛkun ɔ kacili i dunman’n kɛ Sedesiasi.+
18 Kɛ Sedesiasi káci famiɛn’n, nn ɔ le afuɛ ablaɔn-nin-kun (21). Ɔ dili famiɛn afuɛ blu-nin-kun (11) Zerizalɛmun lɔ. Be flɛ i nin’n kɛ Amitali,+ Zeremin m’ɔ fin Libina’n i wa bla-ɔ. 19 Ɔ yoli sa ng’ɔ ti tɛ Zoova ɲrun’n titi, kɛ nga Zozakimun fa yoli’n sa.+ 20 Ya mɔ Zoova fali’n ti yɛ sa sɔ’m be kwlaa be tɔli Zerizalɛmun nin Zida be su-ɔ. Ɔ yoli sɔ lele fa nunnunnin be i ɲin bo lɛ.+ Sedesiasi yoli ɲin kekle Babilɔnin famiɛn’n su.+