1 Be Ɲoliɛ

4 Zida i mma mun yɛle Perɛzi,+ nin Ɛzrɔn,+ nin Kaamin, nin Ur,+ nin Sobali.+ 2 Sobali i wa Reaya wuli Zaati. Zaati wuli Aimai nin Laadi. Zoratifuɛ’m+ be awlobo mun yɛ be o lɛ-ɔ. 3 Etamun+ i si’n i mma mun yɛ: Zizreɛli, Isima, Idibasi (be flɛ be niaan bla’n kɛ Azelɛliponin), 4 Peniɛli m’ɔ ti Gedɔɔ i si’n, yɛ Ezɛɛ m’ɔ ti Isa i si’n. Ur+ i mma mun yɛ be o lɛ-ɔ. Ur sɔ’n ti Efrata i wa kpɛn yɛ ɔ ti Bɛtleɛmun+ i si. 5 Tekoa+ i si Asuu+ i yi’m be ti nɲɔn. Be yɛle Ela nin Naara. 6 Ɔ nin Naara be wuli Aizamun, nin Efɛɛ, nin Temenin, nin Aastari. Naara i mma mun yɛ be o lɛ-ɔ. 7 Ela i mma liɛ mun yɛle Zerɛti, nin Izeari, nin Etinan. 8 Kozu wuli Anubu, nin Zobeba, nin Arimun i wa Aarɛli i osu’n nunfuɛ mun.

9 Zabɛzi ɲannin ɲrun trali i niaan’m be kwlaa. I nin’n flɛli i Zabɛzi,* afin i waan: “Afɛ’n nun yɛ n wuli i-ɔ.” 10 Zabɛzi srɛli Izraɛli Ɲanmiɛn’n. Ɔ seli kɛ: “Ń srɛ́ wɔ, yra min su, yo maan min lika’n trɛ, fa ɔ sa’n sie min su, uka min yɛ sasa min naan ɲrɛnnɛn wʼa tɔman min su.” Kɛ ɔ yoli sɔ’n, Ɲanmiɛn fali like ng’ɔ srɛli’n mɛnnin i.

11 Sua i niaan bian Kelibu wuli Meii. Meii kusu wuli Ɛstɔn. 12 Ɛstɔn wuli Bɛti-Rafa, nin Pasea, nin Teina m’ɔ ti Iri-Nasasi i si’n. Reka lɔfuɛ mun yɛ be o lɛ-ɔ. 13 Kenazi i mma mun yɛle Ɔtiniɛli+ nin Seraya. Ɔtiniɛli i wa* yɛle Atati. 14 Meonotai wuli Ofra. Seraya wuli Zoabu m’ɔ ti be nga be tran Ge-Arasimun’n* be si’n. Be tɔnnin kongo sɔ’n i dunman sɔ afin lɔfuɛ’m be ti ajuin difuɛ.

15 Zefine i wa Kalɛbu+ i mma mun yɛle Iru, nin Ela, nin Naamun. Ela i wa* yɛle Kenazi. 16 Zealelɛli i mma mun+ yɛle Zifi, nin Zifa, nin Tiria, nin Asarɛli. 17 Ezra i mma mun yɛle Zetɛɛ, nin Merɛdi, nin Efɛɛ, nin Zalɔn. Ɔ* wunnzɛli yɛ ɔ wuli Miriamun, nin Samai, nin Isiba m’ɔ ti Ɛstemoa i si’n. 18 (Zifu bla ng’ɔ jɛli i’n wuli Zerɛdi m’ɔ ti Gedɔɔ i si’n, nin Ebɛɛ m’ɔ ti Soko i si’n, nin Zekutiɛli m’ɔ ti Zanoa i si’n.) Faraɔn i wa bla nga Merɛdi jɛli i’n, mɔ be flɛ i Bitia’n, i mma mun yɛ be o lɛ-ɔ.

19 Keila m’ɔ ti Gaamunfuɛ’n nin Ɛstemoa m’ɔ ti Maakatifuɛ’n, be si mun yɛle Ɔdia i yi’n i mma mun. Naamun i niaan bla yɛle bla sɔ’n. 20 Simɔn i mma mun yɛle Amnɔn, nin Rina, nin Bɛnin-Anan, nin Tilɔn. Isei i mma mun yɛle Zoɛti nin Bɛnin-Zoɛti.

21 Zida i wa Sela+ i mma mun yɛle Ɛri m’ɔ ti Leka i si’n, nin Laada m’ɔ ti Maresa i si’n, ɔ nin Asibea i awlobo’n nunfuɛ nga be wu tannin kpakpa mun’n, 22 nin Zokimun, nin be nga be fin Kozeba’n, nin Zoasi, nin Sarafu mɔ be jali Moabu bla mun’n, nin Zasubi-Leɛmun. Lalafuɛ fluwa’m be nun yɛ dunman sɔ’m be wo-ɔ.* 23 Be ti sɛ wufuɛ yɛ be tran Netaimun nin Gedera. Lɔ yɛ be tran be di junman be man famiɛn’n niɔn.

24 Simeɔn+ i mma mun yɛle Nemiɛli, nin Zamɛn, nin Zaribu, nin Zera, nin Saulu.+ 25 Saulu wuli Salɔmun. Salɔmun wuli Mibsamun. Mibsamun wuli Misma. 26 Misma i mma mun yɛ: Amiɛli ti i wa, Zakiri ti i wa, Simei ti i wa. 27 Simei i wa yasua mun be ti blu-nin-nsiɛn (16) yɛ i wa bla’m be ti nsiɛn. I niaan bian’m b’a wuman ba kaka. Be awlobo’n nun ba nga be wuli be’n, b’a sɔnman kɛ Zida liɛ mun sa.+ 28 Be trannin Beɛ-Seba,+ nin Molada,+ nin Azaa-Siali,+ 29 nin Bila, nin Ezɛmun,+ nin Toladi, 30 nin Betuɛli,+ nin Ɔɔma,+ nin Ziklagi,+ 31 nin Bɛti-Maakabɔtu, nin Azaa-Susimun,+ nin Bɛti-Biri, nin Saaraimun. Kɛ Davidi bó famiɛn dilɛ bo’n, nn klɔ sɔ’m be su yɛ be tran-ɔn.

32 Be trannin Etamun, nin Ainin, nin Rimɔn, nin Tokɛnin, nin Asan.+ Be klɔ’m be ti nnun. 33 Klɔ nga be mantan klɔ sɔ mun lele fa ju Baali’n, be ti be liɛ wie. Be awlobo’m be nun sran nga be klɛli be dunman’n, ɔ nin be tranwlɛ mun yɛ be o lɛ-ɔ. 34 Simeɔn i osu’n nunfuɛ wie mun ekun yɛ: Mesobabu, Zamelɛki, Amazia i wa Zoasi, 35 Zoɛli, Asiɛli i wa Seraya i wa liɛ Zosibia i wa Zei, 36 Elionai, Zaakoba, Zesoaya, Asaya, Adiɛli, Zesimiɛli, Benaya, 37 yɛ Ziza. Ɔ ti Semaia i wa Simiri i wa Zedaia i wa Alɔnin i wa Sifi i wa. 38 Be nga be boli be dunman lɛ’n, be ti be awlobo’m be su kpɛn. Be si’m be awlobo’n nunfuɛ’m be wa sɔnnin kpanngban kpa. 39 Be ɔli lele be juli Gedɔɔ i nuan lɛ, kongo’n i wia afiliɛ lɔ. Be ɔli naan bé kó kúnndɛ be nnɛn’m be didiwlɛ. 40 Be ko wunnin nnɛn’m be didiwlɛ klanman kpa kun. Mɛn sɔ’n nannan lɛ paii, kpɛkun lɛ’n ti diin. Asa ekun’n, lika’n nun ti fɔuun. Kamun+ i osu’n nunfuɛ mun yɛ be tran lɔ laa-ɔ. 41 Be nga be klɛli be dunman’n, be wa bubuli Kamun i osu’n nunfuɛ mun nin Meinimun mɔ be tran lɛ’n, be tannin sua mun. Zida famiɛn Ezekiasi+ i blɛ su yɛ be yoli sɔ-ɔ. Andɛ nin andɛ’n, be wunman be osu kun. Kpɛkun be bɔbɔ be wa trannin lɛ, afin be nnɛn’m be le didiwlɛ kpa lɛ.

42 Simeɔn i osu’n nunfuɛ wie mun be ɔli Seii+ oka’n su lɔ. Be ti sran ya nnun (500). Pelatia, nin Nearia, nin Refaya, nin Uziɛli mɔ be ti Isei i mma mun’n yɛ be ti be su kpɛn-ɔn. 43 Be nunnunnin Amalɛkifuɛ+ onga nga be wanndi ko fiali lɔ’n. Kpɛkun be trannin be osu’n nun lɛ. Andɛ nin andɛ’n, be te o lɛ.