1 Be Ɲoliɛ

18 Kɛ i osu cɛli kan’n, Davidi nin Filistifuɛ’m be kunnin, kpɛkun ɔ kwlali be. Yɛ ɔ deli Gati+ nin klɔ nga be o i asa’n su’n* Filistifuɛ’m+ be sa nun. 2 I sin’n, ɔ kwlali Moabufuɛ mun,+ kpɛkun be kacili i sufuɛ, yɛ be tuali lapo be mɛnnin i.+

3 Davidi kwlali Adadezɛɛ+ m’ɔ ti Zoba+ lɔ famiɛn’n Amati+ i wun lɛ. Kɛ ɔ́ yó sɔ’n, nn Adadezɛɛ su kɔ naan ɔ́ kó fá lika ng’ɔ o kan Efrati Nzue’n+ wo lɔ’n. 4 Davidi fali Adadezɛɛ i kakaklolo akpi kun (1.000), yɛ ɔ trali nnɛn kpanngɔ su fufuɛ akpi nso (7.000), nin sonja nga be nanti be ja nun’n akpiakpi ablaɔn (20.000).+ I sin’n, ɔ kpɛkpɛli nnɛn kpanngɔ nga be cuɛn kakaklolo mun’n be kwlaa be jasin ndin’n nun. Saan nnɛn kpanngɔ ya kun (100) yɛ ɔ yacili be lɛ-ɔ.+ 5 Sirifuɛ’m be sonja nga be fin Damasi’n, be bali Adadezɛɛ m’ɔ ti Zoba lɔ famiɛn’n i ukalɛ. Sanngɛ Davidi kunnin be nun sran akpiakpi ablaɔn-nin-nɲɔn (22.000).+ 6 I sin’n, Davidi sieli i sonja wie mun Damasi m’ɔ ti Sirifuɛ’m be klɔ’n su lɔ. Yɛ Sirifuɛ’m be kacili Davidi i sufuɛ. Be tuali lapo be mɛnnin i. Lika kwlaa nga Davidi kɔ alɛ kunlɛ lɛ’n, Zoova yo maan ɔ kwlɛ i kpɔfuɛ mun.+ 7 Asa ekun’n, Davidi fali Adadezɛɛ i sonja’m be ɲrɛn kukluuklu nga be fali sika ɔkwlɛ be yoli’n, kpɛkun ɔ fa be bali Zerizalɛmun. 8 Davidi fali aaba kpanngban kpa Tibati nin Kɛn lɔ bali. Klɔ sɔ’m be ti Adadezɛɛ liɛ. Aaba sɔ’n yɛ Salomɔn fa yoli aaba Jenvie’n,+ nin sua’n i ja mlomlo mun, nin ninnge uflɛ+ wie mun ekun-ɔn.

9 Tou m’ɔ ti Amati lɔ famiɛn’n tili i kɛ Davidi kwlali Adadezɛɛ+ m’ɔ ti Zoba+ lɔ famiɛn’n i sonja’m be ngba. 10 I sɔ’n ti’n, Tou sunmɛnnin i wa Adoramun ndɛndɛ kɛ ɔ ko nian Famiɛn Davidi i osu, naan ɔ yo i mo. Afin ɔ nin Adadezɛɛ be kunnin, kpɛkun ɔ kwlɛli i. (Afin Adadezɛɛ fali alɛ wlali Tou i sin kpɛ sunman.) Asa ekun’n, ɔ ko mɛnnin i ninnge wie mun. Sika nin sika ɔkwlɛ ɔ nin aaba yɛ be fa yoli ninnge wafawafa kwlaa sɔ mun-ɔn. 11 Famiɛn Davidi yoli ninnge sɔ’m be sanwun fa mannin Zoova.+ Kɛ ɔ yoli sika nin sika ɔkwlɛ ng’ɔ fali be nvle kwlaa ng’ɔ kwlali be’n be nun’n, be sɔ wie-ɔ. Nvle sɔ mun yɛ: Edɔmunfuɛ’m be nvle’n, nin Moabufuɛ’m be nvle’n, nin Amɔnfuɛ’m+ be nvle’n, nin Filistifuɛ’m+ be nvle’n, nin Amalɛkifuɛ’m+ be nvle’n.

12 Zeruya+ i wa Abisai+ kunnin Edɔmunfuɛ akpiakpi blu-nin-mɔcuɛ (18.000) Njin Kongo’n+ nun lɔ. 13 Ɔ sieli i sonja wie mun Edɔmun lɛ. Ɔ maan Edɔmunfuɛ’m be kwlaa be kacili Davidi i sufuɛ.+ Lika kwlaa nga Davidi kɔ alɛ kunlɛ lɛ’n, Zoova yo maan ɔ kwlɛ i kpɔfuɛ mun.+ 14 Davidi sieli Izraɛli nvle wunmuan’n.+ Ɔ dili i nvle’n nunfuɛ’m be kwlaa be jɔlɛ mun klanman mannin be, yɛ ɔ yoli maan b’a buman sran fi lufle.+ 15 Zeruya i wa Zoabu yɛ ɔ ti sonja’m be su kpɛn-ɔn.+ Ailidi i wa Zozafati+ yɛ ɔ klɛ nvle’n nun ndɛ mun sie-ɔ. 16 Aitubu i wa Zadɔku nin Abiataa i wa Aimelɛki be ti Ɲanmiɛn ɲrun jranfuɛ. Kpɛkun Savusa ti fluwa klɛfuɛ. 17 Zoyada i wa Benaya yɛ ɔ ti Kerɛtifuɛ mun+ nin Pelɛtifuɛ’m+ be su kpɛn-ɔn. Davidi kusu i mma mun yɛ be mantan famiɛn’n i koko kpa-ɔ.