1 Be Ɲoliɛ

21 Cɛn kun’n, Satan* fali ajalɛ kɛ ɔ́ yó Izraɛlifuɛ’m be tɛ. Ɔ maan ɔ suli Davidi bo naan ɔ ka Izraɛlifuɛ mun.+ 2 Yɛ Davidi seli Zoabu+ nin nvle’n su kpɛnngbɛn’m be kɛ: “Amun ko ka Izraɛlifuɛ mun, amun fɛ i Beɛ-Seba lɛ lele fa ju Dan.+ I sin’n, amun bla be wa kan nun ndɛ kle min naan n si sran’m be nuan.” 3 Sanngɛ Zoabu seli kɛ: “Maan Zoova yo naan i sran’m be sɔn lele be tra nga su kpɛ ya (100). ?Famiɛn, min min, nán ɔ liɛ yɛle sran kwlaa sɔ mun? ?Sanngɛ min min, ngue ti yɛ ɔ waan á yó i sɔ like’n niɔn? ?Ngue ti yɛ á fá Izraɛlifuɛ mun yí i sa tɛ’n nun-ɔn?”

4 Kɛ Zoabu nin famiɛn’n be kɛnnin i lele’n, famiɛn’n i liɛ’n su yɛ ɔ kali-ɔ. Ɔ maan Zoabu fin lɔ fiteli, kpɛkun ɔ wlan sinnin Izraɛli nvle wunmuan’n nun. I sin’n, ɔ ɔli Zerizalɛmun.+ 5 Zoabu boli sran ng’ɔ klɛli be dunman’n be nuan kleli Davidi. Izraɛli nvle wunmuan’n nun’n, be nga be tra tokofi nun’n, be ti sran miliɔn kun nin akpiakpi ya kun (1.100.000). Yɛ Zidafuɛ nga be tra tokofi nun’n, be ti sran akpiakpi ya nnan akpiakpi ableso (470.000).+ 6 Sanngɛ b’a klɛman Levi akpasua’n nunfuɛ mun nin Bɛnzamɛn akpasua’n nunfuɛ’m be dunman wie.+ Afin ndɛ nga famiɛn’n kannin’n, ɔ timan Zoabu i klun su kaan sa.+

7 Sa sɔ’n w’a yoman Ɲanmiɛn Kpli i fɛ kaan sa. I sɔ’n ti’n, ɔ fali ɲrɛnnɛn’n yili i Izraɛli nvle’n su. 8 I sin’n, Davidi seli Ɲanmiɛn Kpli kɛ: “Sa nga n yoli i lɛ’n, ɔ ti tɛ dan.+ Ɔ maan yaci min sa tɛ’n cɛ min.+ Afin n dili sinnzin dan.”+ 9 I sin’n, Zoova kannin ndɛ kun kleli Gadi+ m’ɔ ti Davidi i sran ngʼɔ wun aolia nun sa munʼn. Ɔ seli kɛ: 10 “Kɔ ko se Davidi kɛ yoo: ‘Ndɛ nga Zoova kan’n yɛ: “Ń má klé wɔ like nsan. Nian nun fa kun naan n fa yo wɔ.”’” 11 Gadi ko toli Davidi naan w’a se i kɛ: “Ndɛ nga Zoova kan’n yɛ: ‘Fa sa nga’m be nun kun. 12 ?A klo kɛ awe kpɛn afuɛ nsan?+ ?Annzɛ a klo kɛ ɔ kpɔfuɛ’m be kwla wɔ anglo nsan naan be tokofi’n ɲan wɔ?+ ?Annzɛ kusu a klo kɛ Zoova fɛ i tokofi’n kle sran’m be ɲrɛnnɛn cɛn ba nsan, naan tukpacɛ m’ɔ sa ndɛndɛ’n ɔ tɔ nvle’n su,+ naan Zoova i anzi’n nunnun+ Izraɛli nvle wunmuan’n?’ Bu i sin kpa, nian nun fa kun naan n ko kan kle Sran ng’ɔ sunmannin min’n.” 13 Yɛ Davidi seli Gadi kɛ: “Nanwlɛ, i sɔ’n sanngan min akunndan’n dan. Yaci, maan n tɔ Zoova sa nun. Afin i aunnvɔɛ silɛ’n leman wunsu.+ Nán maan n tɔ klɔ sran sa nun.”+

14 Zoova fali tukpacɛ kun m’ɔ sa ndɛndɛ’n+ fa yili i Izraɛli nvle’n nun. Ɔ maan Izraɛli nvle’n nun’n, sran akpiakpi ableso (70.000) be wuli.+ 15 Asa ekun’n, Ɲanmiɛn Kpli sunmɛnnin i anzi kun Zerizalɛmun lɔ naan ɔ ko saci i. Kɛ i waan ɔ́ sáci klɔ’n, mɔ Zoova wunnin ɲrɛnnɛn ng’ɔ o sran’m be su’n, ɔ yoli i ya.+ Yɛ ɔ seli anzi ng’ɔ su kun sran mun’n kɛ: “Ɔ ti kpa sɔ!+ Kan ɔ sa’n i ase siɛn’n.” Kɛ ɔ́ yó sɔ’n, nn Zoova i anzi’n w’a mantan Ɔɔnan m’ɔ ti Zebisifuɛ’n+ i ble nin ɔɔzu bowlɛ’n,+ i koko kpa.

16 Kɛ Davidi mɛnnin i ti’n su’n, ɔ́ nían-o, Zoova i anzi’n wo ɲanmiɛn’n nin asiɛ’n be afiɛn. W’a yi i tokofi’n i bua’n nun,+ yɛ ɔ o i sa nun. Ɔ fa tinndinnin i Zerizalɛmun wun lɔ. Yɛ Davidi nin klɔ kpɛnngbɛn mɔ be wlali bajɛ tralɛ’n,+ be tɔli asiɛ wun-ɔn. Be utuli be ɲin ase.+ 17 Davidi seli Ɲanmiɛn Kpli kɛ: “?Nán min yɛ n seli kɛ be ka sran mun-ɔn? Min yɛ n yoli sa tɛ’n niɔn. Min yɛ n fɔnnin-ɔn.+ ?Sanngɛ ngue yɛ sran* nga’m be yoli-ɔ? Zoova, min Ɲanmiɛn, yaci, kle e nin min si i awlo’n nunfuɛ mun e ɲrɛnnɛn. Sanngɛ nán kle ɔ sran’m be ɲrɛnnɛn.”+

18 Zoova i anzi’n seli Gadi+ kɛ ɔ kan kle Davidi kɛ ɔ wɔ lika nga Ɔɔnan m’ɔ ti Zebisifuɛ’n, ɔ bo i ɔɔzu nin i ble’n lɛ’n, naan ɔ kplan tɛ yiwlɛ kun man Zoova.+ 19 Davidi fali ndɛ nga Zoova fa wlali Gadi nuan kɛ ɔ kan kle i’n su, ɔ ɔli. 20 Kɛ ɔ́ yó sɔ’n, nn Ɔɔnan su bo i ble’n. Kɛ ɔ niɛnnin i sin’n, ɔ wunnin anzi’n. I wa yasua nnan nga ɔ nin be o lɛ’n, be ko fiali. 21 Davidi fali atin naan ɔ́ kó tó Ɔɔnan lɔ. Kɛ Ɔɔnan wunnin i’n, ɔ fɛli i ble bowlɛ’n nun lɛ ɔ ko kpɛli i atin ndɛndɛ. Kpɛkun ɔ utuli i ɲin ase i bo lɛ. 22 Davidi seli Ɔɔnan kɛ: “Fa lika nga a bo ɔ ɔɔzu nin ɔ ble’n lɛ’n man min naan n to. Min waan ń kplán tɛ yiwlɛ kun lɛ ń mán Zoova. Bo i gua kpakpa’n kle min naan n to. I liɛ’n, ɲrɛnnɛn nga w’a tɔ nvle’n su’n, ɔ́ wíe.”+ 23 Sanngɛ Ɔɔnan seli Davidi kɛ: “Nannan, min min, ɔ li fa yo like kwlaa nga a klo’n. Nian, nannin mun yɛ, a kwla fa yi tɛ nga kɛ bé yí’n be yra nnɛn’n i kɔlikɔli’n. Waka paplapa nga be fa bo ble’n+ nin waka nga be fa sie i nannin’m be kɔmin su’n be yɛ, a kwla fa trɔ sin. Ble’n yɛ, a kwla fa man Ɲanmiɛn. M’an fɛ i kwlaa m’an man wɔ.”

24 Sanngɛ Famiɛn Davidi seli Ɔɔnan kɛ: “Cɛcɛ, maan n to i gua’n su. Afin n su faman like ng’ɔ ti ɔ bɔbɔ liɛ’n n manman Zoova. N su faman like nga m’an yiman nun like fi’n n fa yiman tɛ.”*+ 25 I sɔ’n ti’n, Davidi toli lika’n, ɔ sunnzunnin sika ɔkwlɛ sikli ya nsiɛn (600)* fa mannin Ɔɔnan. 26 Davidi kplannin tɛ yiwlɛ kun+ lɛ mannin Zoova. Kpɛkun ɔ yili tɛ nga kɛ bé yí’n be yra nnɛn’n i kɔlikɔli’n, nin bo kun yolɛ tɛ mun. I sin’n, ɔ srɛli Zoova. Wafa ng’ɔ tɛli i su’n, yɛle kɛ sin+ fin ɲanmiɛn su lɔ guali tɛ yiwlɛ’n su. 27 I sin’n, Zoova seli anzi’n+ kɛ ɔ fɛ i tokofi’n wlɛ i bua’n nun. 28 Kɛ Davidi wunnin i kɛ Zoova w’a tɛ i su Ɔɔnan m’ɔ ti Zebisifuɛ’n i ble nin i ɔɔzu bowlɛ lɛ’n, ɔ yili tɛ lɛ titi. 29 Sanngɛ blɛ sɔ’n nun’n, nn Zoova i tannin sua nga Moizi yoli i aawlɛ flɛnnɛn nun lɔ’n nin tɛ yiwlɛ nga i su yɛ be yra nnɛn mun kɔlikɔli’n, be o lika nglonglo ng’ɔ o Gabaɔn lɔ’n+ nun. 30 Sanngɛ Davidi w’a kwlá ɔman lɔ naan w’a ko usa Ɲanmiɛn i ngwlɛlɛ afɛ. Afin Zoova i anzi’n i tokofi’n ti’n, srɛ kunnin i.