2 Be Ɲoliɛ
10 Roboamun ɔli Sisɛmun,+ afin Izraɛlifuɛ’m be kwlaa be bali Sisɛmun lɛ naan bé síe i famiɛn.+ 2 Nebati i wa Zeroboamun+ tili ndɛ sɔ’n. (Blɛ sɔ’n nun’n, nn ɔ te o Ezipti lɔ. Afin Famiɛn Salomɔn ti’n, ɔ wanndili.)+ Yɛ ndɛndɛ, Zeroboamun fin Ezipti lɔ bali-ɔ. 3 Be sunmannin sran i sin. Yɛ Zeroboamun nin Izraɛlifuɛ’m be kwlaa be wa toli Roboamun naan b’a se i kɛ: 4 “Ɔ si yoli maan e kɔmin su waka’n i sualɛ yoli kekle kpa.+ Sanngɛ sɛ a yo naan junman kekle nga e di mannin ɔ si’n i su kpɛ’n, sɛ a yo naan kɔmin su waka nɔnnin* m’ɔ fa sieli e su’n yo fokofoko’n, é sú wɔ.”
5 Kɛ ɔ yoli sɔ’n, ɔ seli be kɛ: “Wa nin cɛn ba nsan amun sa amun sin min wun wa.” Yɛ nvle nunfuɛ’m be ɔli-ɔ.+ 6 Famiɛn Roboamun ko wunnin kpɛnngbɛn nga be suli i si Salomɔn blɛ mɔ i ɲin o su’n be wun. Ɔ usali be kɛ: “?Afɔtuɛ benin yɛ amún mán min naan m’an tɛ nvlefuɛ’m be su-ɔ?” 7 Be tɛli i su kɛ: “Sɛ a yo nvlefuɛ nga’m be kpa’n, sɛ ɔ wun yo be fɛ’n, yɛ sɛ a tɛ be su klanman’n, bé yó ɔ sufuɛ tititi.”
8 Sanngɛ ɔ kpaloli afɔtuɛ nga kpɛnngbɛn’m be mɛnnin i’n, kpɛkun ɔ ko wunnin gbanflɛn ng’ɔ nin be ɲinnin likawlɛ mɔ be ti i sufuɛ siɛn’n, be wun.+ 9 Ɔ usali be kɛ: “Nvlefuɛ nga’m be wa seli min kɛ: ‘Yo maan kɔmin su waka nga ɔ si fa sieli e su’n ɔ yo fokofoko.’ ?Afɔtuɛ benin yɛ amún mán naan y’a tɛ be su-ɔ?” 10 Gbanflɛn ng’ɔ nin be ɲinnin likawlɛ’n be seli i kɛ: “Ndɛ ng’ɔ fata kɛ a kan kle nvlefuɛ mɔ be seli wɔ kɛ ɔ si yoli maan be kɔmin su waka’n yoli nɔnnin, naan a yo naan ɔ yo fokofoko’n yɛ. Se be kɛ: ‘Min sa mma kaan’n ɔ́ wá yó dan trá min si i afiɛn’n. 11 Min si sieli amun kɔmin su waka nɔnninnɔnnin, sanngɛ ń má úka su naan ɔ yo nɔnnin kpa. Min si fali ngble ngbɛn fa tuli amun fɔ, sanngɛ min liɛ’n, ngble nga kpɛngbɛ o i wun’n yɛ ń má fá tú amun fɔ-ɔ.’”
12 I cɛn ba nsan su’n, Zeroboamun nin nvlefuɛ’m be kwlaa be wa toli Roboamun. Afin ɔ seli be kɛ: “Wa nin cɛn ba nsan, amun sa amun sin min wun wa.”+ 13 Sanngɛ famiɛn’n kannin ndɛ yaya kleli be. Famiɛn Roboamun kpaloli kpɛnngbɛn’m be afɔtuɛ’n. 14 Gbanflɛn’m be afɔtuɛ liɛ’n su yɛ ɔ jrannin naan w’a kan ndɛ’n w’a kle be-ɔ. Ɔ seli be kɛ: “Ń má yó naan amun kɔmin su waka’n yo nɔnnin kpa. Ń má úka laa liɛ’n su naan ɔ yo nɔnnin kpa. Min si fali ngble ngbɛn tuli amun fɔ. Sanngɛ min liɛ’n, ngble nga kpɛngbɛ o i wun’n yɛ ń má fá tú amun fɔ-ɔ.” 15 Famiɛn’n w’a faman nvle nunfuɛ’m be ndɛ’n su. Afin Ɲanmiɛn Kpli bɔbɔ yɛ maan sa sɔ’n juli-ɔ,+ kɛ ɔ ko yo naan ndɛ nga Zoova maan Aia+ m’ɔ ti Silofuɛ’n kan kleli Nebati i wa Zeroboamun’n w’a kpɛn su’n ti.
16 Kɛ mɔ famiɛn’n waan ɔ faman nvle nunfuɛ’m be ndɛ liɛ’n su’n ti’n, Izraɛlifuɛ’m be kwlaa be tɛli i su kɛ: “E ndɛ nunman Davidi ndɛ nun. E aja like nunman Zese i wa’n i sa nun. Izraɛlifuɛ mun, maan amun tinuntinun amun wɔ amun ɲanmiɛn’m be sin. Davidi, siɛn’n ɔ bɔbɔ nian ɔ awlo’n i lika!”+ Kɛ ɔ yoli sɔ’n, Izraɛlifuɛ’m be kwlaa be sali be sin be awlo’m* be nun.+
17 Sanngɛ Roboamun yoli Izraɛlifuɛ nga be tran Zida klɔ’m+ be su’n be famiɛn titi.
18 I sin’n, Famiɛn Roboamun sunmannin Adoramun+ m’ɔ nian be nga be mian be kɛ be di junman’n be su’n Izraɛlifuɛ’m be sin. Sanngɛ Izraɛlifuɛ’m be finfinnin i yɔbuɛ lele be kunnin i. Famiɛn Roboamun liɛ’n, ɔ yoli blɛblɛblɛ fuli i kakaklolo’n nun naan w’a wanndi w’a wɔ Zerizalɛmun.+ 19 Kɛ ɔ fin lɛ’n, Izraɛlifuɛ’m be jasoli Davidi i awlofuɛ’m be wun.