2 Be Ɲoliɛ

34 Kɛ Zoziasi+ káci famiɛn’n, nn ɔ le afuɛ mɔcuɛ. Ɔ dili famiɛn afuɛ ablasan-nin-kun (31) Zerizalɛmun lɛ.+ 2 Ɔ yoli sa ng’ɔ ti kpa Zoova ɲrun’n, ɔ niɛnnin i nannan Davidi i ajalɛ’n su* nantili, w’a ɔman fama su annzɛ bɛ su.

3 Kɛ ɔ yoli famiɛn’n, i afuɛ mɔcuɛ su’n, ɔ boli i nannan Davidi i Ɲanmiɛn’n i kunndɛlɛ bo.+ Kɛ ɔ́ yó sɔ’n, nn ɔ te yo gbanflɛn kan. I afuɛ blu-nin-nɲɔn (12) su’n, ɔ boli Zida nin Zerizalɛmun be sanwun yolɛ bo.+ Ɔ nunnunnin lika nglonglo+ nga be o lɔ’n, nin waka nga sran’m be sɔ be’n,* nin amuin nga be sɛli be’n,+ ɔ nin amuin nga be kloli blalɛ fa yoli’n. 4 Asa ekun’n, be bubuli Baali’m be tɛ yiwlɛ mun i ɲin bo lɛ. Ɔ kpɛli ansan yrawlɛ nga be o tɛ yiwlɛ’m be ti su nglo’n be bo. Ɔ bubuli waka nga sran’m be sɔ be’n,* nin amuin nga be sɛli be’n, nin amuin nga be kloli blalɛ fa yoli’n. Kpɛkun ɔ fufuli be nun lele be kacili sanmlɛn. I sin’n, ɔ fali sanmlɛn sɔ’n sanndili i be nga be yili tɛ mannin amuin sɔ mun’n, be asieliɛ’n su.+ 5 Kpɛkun ɔ yrali amuin sɔ’m be ɲrun jranfuɛ’m be owie mun be tɛ yiwlɛ’m be su.+ Kɛ ɔ yoli Zida nin Zerizalɛmun be sanwun kɛ ngalɛ’n sa.

6 Yɛ ɔ ɔli Manase nin Efraimun,+ nin Simeɔn be klɔ’m be su lele fa juli Nɛftali akpasua’n su lɔ, ɔ nin klɔ nvuɛn nga be mantan be lɛ’n be su. 7 Kpɛkun ɔ bubuli tɛ yiwlɛ mun. Ɔ fufuli waka nga sran’m be sɔ be’n,* nin amuin nga be sɛli be’n be nun.+ Be kacili sanmlɛn. Asa ekun’n, ɔ kpɛli ansan yrawlɛ nga be o Izraɛli nvle wunmuan’n nun’n be bo.+ I sin’n, ɔ sɛli i sin Zerizalɛmun.

8 Kɛ ɔ yoli famiɛn’n, i afuɛ blu-nin-mɔcuɛ (18) su’n, m’ɔ wieli nvle’n nin Ɲanmiɛn sua’n be sanwun yo’n, ɔ sunmannin Azalia i wa Safan,+ nin Maazeya m’ɔ ti klɔ’n su kpɛn’n, nin Zoazi i wa Zoa m’ɔ klɛ ndɛ mun sie’n kɛ be ko siesie Zoova m’ɔ ti i Ɲanmiɛn’n i sua’n i ye.+ 9 Be ko toli Ilkia m’ɔ ti Ɲanmiɛn ɲrun jranfuɛ dan’n. Kpɛkun be fali sika nga sran’m be fa ɔli Ɲanmiɛn sua’n nun lɔ’n be mɛnnin i. Levifuɛ nga be ti anuan sunianfuɛ’n be yɛ be ko fali sika sɔ’n Manasefuɛ mun, nin Efraimunfuɛ mun, nin Izraɛli akpasua onga’m be nunfuɛ mun,+ nin Zidafuɛ mun, nin Bɛnzamɛnfuɛ mun, nin Zerizalɛmunfuɛ’m be sa nun bali-ɔ. 10 I sin’n, be fa ko mannin be nga be sieli be kɛ be nian Zoova i sua’n nun junman’n su’n. Junman difuɛ’m be kusu be fali sika sɔ’n be fa siesieli Zoova i sua’n i ye. 11 Be fali sika’n mannin ajuin difuɛ mun, nin sua kplanfuɛ mun naan be fa to yɔbuɛ nga be sɛli’n, nin waka wie mun ekun naan be fa siesie sua’m be ti su’n, naan be kaci sua’m be ja nga Zida famiɛn’m b’a nianman be lika mɔ b’a saci’n.+

12 Sran sɔ’m be niannin be junman’n nun be dili i kpa.+ Levifuɛ nga be fali be kɛ be yo be su kpɛn’n be yɛ: Zaati nin Abdiasi mɔ be fin Merari osu’n nun’n,+ nin Zakari nin Mesulamun mɔ be fin Keati osu’n nun’n.+ Levifuɛ’m be kwlaa nga be si miziki bolɛ ninnge’m be bo kpa’n,+ 13 be nian junman difuɛ’m* be lika. Yɛ be ti junman difuɛ wafawafa kwlaa be su kpɛn. Asa ekun’n, Levifuɛ wie’m be ti fluwa klɛfuɛ, wie’m be ti kpɛnngbɛn’m be ukafuɛ, yɛ wie’m be ti anuan sunianfuɛ.+

14 Sanngɛ kɛ bé kó fá sika nga be fa bali Zoova i sua’n nun lɔ’n,+ Ilkia m’ɔ ti Ɲanmiɛn ɲrun jranfuɛ’n wunnin Zoova i Mmla fluwa+ m’ɔ seli Moizi kɛ ɔ klɛ’n.*+ 15 Yɛ Ilkia seli Safan m’ɔ ti fluwa klɛfuɛ’n kɛ: “N wunnin Mmla fluwa’n Zoova i sua’n nun lɔ.” Kpɛkun Ilkia fali fluwa’n mannin Safan. 16 Safan kusu fali fluwa’n ko mannin famiɛn’n. Ɔ seli i kɛ: “Ɔ sufuɛ’m be su di junman kwlaa nga be fa mannin be’n. 17 Be fali sika ng’ɔ o Zoova i sua’n nun lɔ’n be mannin be nga be sieli be kɛ be nian junman’n su’n, ɔ nin be nga be su di junman’n.” 18 Safan m’ɔ ti fluwa klɛfuɛ’n seli famiɛn’n i ekun kɛ: “Ɲanmiɛn ɲrun jranfuɛ Ilkia fali fluwa nga mannin min.”+ Kpɛkun Safan boli fluwa’n i nun kannganlɛ bo famiɛn’n i ɲrun lɛ.+

19 Kɛ famiɛn’n tili Mmla’n i nun ndɛ’n cɛ’n, ɔ titili i wun tralɛ’m be nun.+ 20 I sin’n, famiɛn’n kannin ndɛ kleli Ilkia, nin Safan i wa Aikamun,+ nin Mise i wa Abdɔn, nin Safan m’ɔ ti fluwa klɛfuɛ’n, ɔ nin Asaya m’ɔ ti famiɛn’n i sufuɛ’n. Ɔ seli be kɛ: 21 “Amun wɔ ko usa Zoova i sa min bɔbɔ nin be nga be ka Izraɛli nin Zida wa’n be dunman nun, naan ɔ kan fluwa nga be wunnin i’n i su ndɛ kle e. Afin e wun ya nga Zoova w’a fa’n, ɔ ti dan. Afin e nannan’m b’a faman Zoova i ndɛ’n su, b’a nantiman ndɛ kwlaa nga be klɛli i fluwa nga nun’n su.”+

22 Ɔ maan Ilkia nin be nga famiɛn’n sunmannin be’n, be ɔli Ilda m’ɔ ti Ɲanmiɛn nuan ijɔfuɛ bla’n+ i sin. Arasi i wa Tikva i wa liɛ Salɔmun m’ɔ nian tralɛ’m be su’n, i yi yɛle bla sɔ’n. Ilda tran Zerizalɛmun klɔ’n i lika nga b’a kplɛn i uflɛuflɛ’n su lɔ, lɔ yɛ be kannin ndɛ’n be kleli i-ɔ.+ 23 Bla’n seli be kɛ: “Ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Amun se sran ng’ɔ sunmannin amun min sin’n kɛ: 24 “Ndɛ nga Zoova kan’n yɛ: ‘Ń má fá ɲrɛnnɛn ń yí i lika nga nin i nun sran’m be su.+ Sannzan kwlaa nga be kannin be ndɛ fluwa’n nun+ mɔ be kɛnngɛnnin i Zida famiɛn’n i ɲrun lɛ’n, ń fá yí be su. 25 Afin be yacili min lɛ,+ kpɛkun be yili tɛ mannin ɲanmiɛn uflɛ mun yɛ i wunsrɛn’n fite lukuu. Be yoli ninnge kwlaa sɔ mun naan bé fá fɔ́kɔ min awlɛn.+ I sɔ’n ti’n, lika nga i wun ya nga m’an fa’n, ɔ ti kɛ sin sa. Ɔ́ tɔ́ lika nga nun, yɛ ɔ su nuanman.’”+ 26 Sanngɛ Zida famiɛn m’ɔ sunmannin amun kɛ amun wa usa Zoova i ngwlɛlɛ afɛ’n, amun ko se i kɛ yoo: “Ndɛ nga a tili i lɛ’n, i su ndɛ nga Zoova m’ɔ ti Izraɛli Ɲanmiɛn’n kan’n yɛ:+ 27 ‘Kɛ a tili lika nga nin i nunfuɛ’m be wun ndɛ’n, a sɔli nun klanman, a kannin ɔ wun ase Ɲanmiɛn ɲrun. A kannin ɔ wun ase min ɲrun, a titili ɔ wun tralɛ’m be nun, yɛ a sunnin min ɲrun. I sɔ’n ti’n, n kusu n sieli min su ɔ nuan bo,+ ndɛ nga Zoova kan’n yɛ ɔ o lɛ-ɔ. 28 I sɔ’n ti’n, ń má yó maan a nin ɔ nannan’m bé yía likawlɛ.* Yɛ bé lá wɔ ɔ ndia’n nun lɔ diin, ɔ ɲinma su wunman ɲrɛnnɛn kwlaa nga ń má fá yí i lika nga nin i nunfuɛ’m be su’n.’”’”+

I sin’n, be ko kannin ndɛ sɔ’n kleli famiɛn’n. 29 Ɔ maan famiɛn’n sunmannin sran, kpɛkun ɔ yiali Zida nin Zerizalɛmun kpɛnngbɛn’m be kwlaa.+ 30 I sin’n, famiɛn’n ɔli Zoova i sua’n nun lɔ, ɔ nin Zidafuɛ’m be kwlaa, nin Zerizalɛmunfuɛ mun, nin Ɲanmiɛn ɲrun jranfuɛ mun nin Levifuɛ mun. Nvlefuɛ’m be kwlaa be ɔli, i bakan-o, i kpɛnngbɛn-o.* Ɔ kanngannin aenguɛ’n i fluwa nga be wunnin i Zoova i sua’n nun lɔ’n i nun ndɛ’n kwlaa kleli be.+ 31 Famiɛn’n jrɛnnin i osu’n nun lɛ, kpɛkun ɔ trali aenguɛ kun*+ Zoova i ɲrun lɛ naan ɔ́ fɛ́ i awlɛn’n kwlaa nin i nguan’n kwlaa sú Zoova,+ yɛ ɔ́ nánti i mmla mun nin i afɔtuɛ mun nin i ndɛ fanunfanun’m be su. I sɔ’n kle kɛ ɔ́ nánti aenguɛ’n i su ndɛ nga be klɛli i fluwa’n nun’n su.+ 32 Asa ekun’n, ɔ wlali Zerizalɛmunfuɛ mun nin Bɛnzamɛnfuɛ’m be kwlaa be fanngan kɛ be di aenguɛ sɔ’n su. Yɛ Zerizalɛmunfuɛ’m be niannin aenguɛ ng’ɔ o be nin Ɲanmiɛn m’ɔ ti be nannan’m be Ɲanmiɛn’n be afiɛn’n su nantili-ɔ.+ 33 Zoziasi nunnunnin ninnge tɛtɛ* nga be o Izraɛlifuɛ’m be asiɛ’n su’n be kwlakwla.+ Kpɛkun ɔ yoli maan Izraɛli lɔ sran’m be kwlaa be suli Zoova m’ɔ ti be Ɲanmiɛn’n. Lele m’ɔ́ fá wú’n, b’a kpɔciman Zoova m’ɔ ti be nannan’m be Ɲanmiɛn’n.