2 Samiɛli

24 Zoova wa fali Izraɛli nvle’n i wun ya dan kpa ekun.+ Afin sran kun wlawlali Davidi* kɛ: “Kɔ ko ka+ Izraɛlifuɛ mun nin Zidafuɛ mun.”+ 2 Ɔ maan famiɛn’n seli Zoabu+ m’ɔ ti sonja’m be su kpɛn’n m’ɔ o i wun lɛ’n kɛ: “Yaci, sinsin Izraɛli akpasua’m be kwlaa be su, naan klɛ sran’m be dunman. Fɛ i Dan lele fa ju Beɛ-Seba+ naan n si sran’m be nuan.” 3 Sanngɛ Zoabu seli famiɛn’n kɛ: “Famiɛn, min min, maan Zoova yo naan sran’m be sɔn lele be tra nga su kpɛ ya (100). Yɛ maan i sɔ liɛ’n yo ɔ ɲrun. ?Sanngɛ min min, ngue ti yɛ ɔ waan á yó i sɔ like’n niɔn?”

4 Kɛ Zoabu nin sonja’m be su kpɛn’m be nin famiɛn’n be kɛnnin i lele’n, famiɛn’n i liɛ’n su yɛ ɔ kali-ɔ. Ɔ maan Zoabu nin sonja’m be su kpɛn’m be fin famiɛn’n i wun lɔ be fiteli. Kpɛkun be ɔli naan bé kó klɛ́ Izraɛli nvle’n nun sran mun be dunman.+ 5 Be kpɛli Zurdɛn’n, kpɛkun be ko boli nanmue kun Aroɛɛ+ lɔ, klɔ ng’ɔ o kongo’n nun’n i fama su lɔ.* I sin’n, be toli be ti Gadifuɛʼm be asaʼn su lɔ, kpɛkun be ɔli Zazɛɛ+ bue liɛ’n su lɔ. 6 I sin’n, be ɔli Galaadi+ nin Tatimun-Odisi asa’n su lɔ. Kpɛkun be toli be ti Dan-Zaan naan b’a sin b’a ɔ Sidɔn.+ 7 Be ɔli Tir+ klɔ mɔ talɛ dan kun sisi i wun’n, nin Ivifuɛ mun+ nin Kanaanfuɛ’m be klɔ’m be kwlaa be su. Kpɛkun i agualiɛ su’n, be ɔli Beɛ-Seba.+ Klɔ sɔ’n wo Zidafuɛ’m be Negɛbu’n+ nun lɔ. 8 Be fali anglo ngwlan nin cɛn ba ablaɔn (20) be wlannin nvle wunmuan’n nun. I sin’n be sali be sin Zerizalɛmun. 9 Zoabu boli sran ng’ɔ klɛli be dunman’n be nuan kleli famiɛn’n. Izraɛli nvle’n nun’n, sonja nga be tra tokofi nun’n be ti akpiakpi ya mɔcuɛ (800.000). Yɛ Zidafuɛ’m be ti sran akpiakpi ya nnun (500.000).+

10 Sanngɛ kɛ Davidi wieli sran’m be ka cɛ’n, i akunndan’n buli i fɔ.*+ Ɔ maan ɔ seli Zoova kɛ: “Sa nga n yoli i lɛ’n, ɔ ti tɛ dan.+ Zoova, yaci min sa tɛ’n cɛ min.+ Afin n dili sinnzin dan.”+ 11 Kɛ Davidi jáso nglɛmun’n, Zoova kan ndɛ kleli Gadi+ m’ɔ ti i nuan ijɔfuɛ’n. Bian sɔ’n ti Davidi i sran ngʼɔ wun aolia nun sa munʼn. Ɔ seli i kɛ: 12 “Kɔ ko se Davidi kɛ yoo: ‘Ndɛ nga Zoova kan’n yɛ: “Ń má klé wɔ like nsan. Nian nun fa kun naan n fa yo wɔ.”’”+ 13 Gadi ko toli Davidi naan w’a se i kɛ: “?A klo kɛ awe kpɛn ɔ nvle’n nun afuɛ nso?+ ?Annzɛ ɔ kpɔfuɛ’m be fuan wɔ naan a wanndi lele anglo nsan?+ ?Annzɛ kusu tukpacɛ kun m’ɔ sa ndɛndɛ’n kle ɔ nvle’n nunfuɛ’m be ɲrɛnnɛn cɛn ba nsan?+ Bu i sin kpa, nian nun fa kun naan n ko kan kle Sran ng’ɔ sunmannin min’n.” 14 Yɛ Davidi seli Gadi kɛ: “Nanwlɛ, i sɔ’n sanngan min akunndan’n dan. Yaci, maan e tɔ Zoova sa nun.+ Afin ɔ si aunnvɔɛ dan.+ Nán maan n tɔ klɔ sran sa nun.”+

15 Zoova fali tukpacɛ kun m’ɔ sa ndɛndɛ’n+ fa yili i Izraɛli nvle’n nun. Kɛ ɔ fɛ i nglɛmun lele mɔ blɛ ng’ɔ kleli’n i nuan fá yía’n, nn sran nga be o Dan lele fa ju Beɛ-Seba’n+ be nun sran akpiakpi ableso (70.000) b’a wu.+ 16 Kɛ anzi’n tinngɛli i sa’n Zerizalɛmun klɔ’n i wun naan ɔ́ sáci i’n, mɔ Zoova wunnin ɲrɛnnɛn ng’ɔ o sran’m be su’n, ɔ yoli i ya.+ Yɛ ɔ seli anzi ng’ɔ su kun sran mun’n kɛ: “Ɔ ti kpa sɔ! Kan ɔ sa’n i ase siɛn’n.” Kɛ ɔ́ yó sɔ’n, nn Zoova i anzi’n w’a mantan Arona+ m’ɔ ti Zebisifuɛ’n+ i lika ng’ɔ bo i ɔɔzu nin i ble’n lɛ’n, i koko kpa.

17 Kɛ Davidi wunnin anzi ng’ɔ su kun sran mun’n, ɔ seli Zoova kɛ: “Min yɛ n yoli sa tɛ’n niɔn. Min yɛ n fɔnnin-ɔn. ?Sanngɛ ngue yɛ sran*+ nga’m be yoli-ɔ? Yaci, kle e nin min si i awlo’n nunfuɛ mun e ɲrɛnnɛn.”+

18 Cɛn sɔ’n nun’n, Gadi wa toli Davidi naan w’a se i kɛ: “Kɔ Arona m’ɔ ti Zebisifuɛ’n+ i lika ng’ɔ bo i ɔɔzu nin i ble mun lɛ’n nun, naan kplan tɛ yiwlɛ kun man Zoova.” 19 Davidi fali ndɛ nga Zoova fa wlali Gadi nuan kɛ ɔ kan kle i’n su, ɔ ɔli. 20 Kɛ Arona wunnin kɛ famiɛn’n nin i sufuɛ’m be su ba’n, ɔ ko kpali be atin ndɛndɛ. Ɔ utuli i ɲin ase famiɛn’n i bo lɛ. 21 Yɛ ɔ usali kɛ: “?Famiɛn, ngue ti yɛ a ba-ɔ?” Davidi tɛli i su kɛ: “Min waan ń tó lika nga a bo ɔ ɔɔzu nin ɔ ble’n lɛ’n, naan ń kplán tɛ yiwlɛ kun lɛ ń mán Zoova. I liɛ’n, ɲrɛnnɛn nga w’a tɔ nvle’n su’n, ɔ́ wíe.”+ 22 Sanngɛ Arona seli Davidi kɛ: “Nannan, min min, ɔ li fa naan yi tɛ kwlaa nga a klo’n. Nian, nannin mun yɛ, a kwla fa yi tɛ nga kɛ bé yí’n be yra nnɛn’n i kɔlikɔli’n. Waka paplapa nga be fa bo ble’n nin waka nga be fa sie i nannin’m be kɔmin su’n be yɛ, a kwla fa trɔ sin. 23 Nannan, n* fɛli i kwlaa ngalɛ’n n mannin wɔ.” Kpɛkun Arona seli famiɛn’n ekun kɛ: “Maan Zoova m’ɔ ti ɔ Ɲanmiɛn’n yra ɔ su.”

24 Sanngɛ famiɛn’n seli Arona kɛ: “Cɛcɛ, maan n to. N su faman like nga m’an yiman nun like fi’n n fa yiman tɛ* n manman min Ɲanmiɛn Zoova.” I sɔ’n ti’n, Davidi toli Arona i nannin mun nin lika ng’ɔ bo i ɔɔzu nin i ble’n lɛ’n. Ɔ yili sika sikli ablenun (50).*+ 25 Davidi kplannin tɛ yiwlɛ kun+ lɛ mannin Zoova. Kpɛkun ɔ yili tɛ nga kɛ bé yí’n be yra nnɛn’n i kɔlikɔli’n, nin bo kun yolɛ tɛ mun. Ɔ maan Zoova tili kpatalɛ nga be kpɛtɛli i kɛ ɔ si sran’m be aunnvɔɛ’n.+ Yɛ ɲrɛnnɛn ng’ɔ tɔli Izraɛli nvle’n su’n, ɔ wieli-ɔ.