Fluwa nɲɔn su nga Pɔlu klɛli Korɛntifuɛ mun’n

2 I sɔ’n ti’n, n seli min wun kɛ, kɛ ń má kɔ́ amun wun lɔ ekun’n, blɛ nga e nin amun é dí i likawlɛ’n, ɔ su yoman awlabɔɛ blɛ. 2 ?Afin sɛ n yo naan amun kwlaa amun wla bo’n, wan yɛ maan min klun jɔ́-ɔ? 3 I sɔ’n ti yɛ n klɛli amun fluwa-ɔ. I liɛ’n sɛ n ju lɔ’n, be nga ti yɛ min klun jɔ’n, be su yoman naan min wla bo min wun. Afin n lafi su kɛ like ng’ɔ jɔ min klun’n, ɔ jɔ amun klun wie. 4 Kɛ ń klɛ́ amun fluwa’n, nn min awlɛn w’a kpɛ min klun, yɛ min wla w’a bo min wun dan. Kɛ ɔ́ yó sɔ’n, nn ń sún. Nán kɛ n kunndɛ kɛ amun wla bo ti-ɔ.+ Sanngɛ kɛ ɔ ko yo naan amun a si kɛ n klo amun kpa’n ti-ɔ.

5 Ɔ maan sɛ sran wie yo sa kun m’ɔ bo sran wla’n,+ nán min yɛ ɔ boli min wla-ɔ. Sanngɛ n kwla se kɛ amun kwlaa yɛ ɔ boli amun wla-ɔ. Nán amun ijɔlɛ ti yɛ n kan sɔ-ɔ. 6 Fɔ nga amun nun sunman be tuli sran sɔ’n, ɔ ju i. 7 Siɛn’n, ɔ fata kɛ an yaci i wun sa’n cɛ i klun ufue su, yɛ an yo maan i wla gua ase,+ kɛ ɔ ko yo naan i wla w’a bomɛn i wun w’a tratraman su’n ti.+ 8 Ɔ maan ń wlá amun fanngan kɛ an kle kɛ an klo i.+ 9 Afin like nga ti yɛ n klɛli fluwa n ko mannin amun’n yɛ: Min waan ń nían sɛ amún nánti ndɛ nga n kan kleli amun’n su sa’n kwlaa nun-o. 10 Sɛ amun yaci sran kun i wun sa cɛ i’n, n kusu ń yáci ń cɛ́ i wie. Min liɛ’n, sa kwlaa nga n yaci n cɛli’n, (sɛ n yacili sa wie n cɛli’n) amun ti yɛ n yoli sɔ-ɔ. N yoli sɔ Klisi ɲrun, 11 kɛ ɔ ko yo naan Satan w’a ɲanman e’n* ti,+ afin e si akunndan ng’ɔ bu’n.*+

12 Kɛ n ɔli Troasi+ kɛ ń kó bó Klisi i jasin fɛ’n, mɔ kusu n ɲannin e Min’n i junman dilɛ’n i wun atin’n,* 13 min wla w’a guaman ase, afin m’an wunman min niaan bian Titi.+ I sɔ’n ti’n, n kaleli be, kpɛkun n ɔli Maseduanin.+

14 Sanngɛ é lá Ɲanmiɛn ase! Afin ɔ fa e sin kɛ sonja wie mɔ be fin alɛ kunlɛ mɔ be kwlali’n sa. Kɛ ɔ́ yó sɔ’n, e nin Klisi yɛ e o nun-ɔn. Ɔ maan Ɲanmiɛn sin e lika yo maan i silɛ’n m’ɔ ti kɛ like m’ɔ bɔn fannin’n sa’n, ɔ tru lika kwlaa nun. 15 Afin Ɲanmiɛn ɲrun’n, e ti kɛ Klisi i su ndɛ m’ɔ bɔn fannin be nga be su fite nun’n, ɔ nin be nga be su mlin’n be afiɛn’n sa. 16 Be nga be su mlin’n be liɛ’n, ɔ bɔn be bue nun kɛ like m’ɔ kun sran’n sa.+ Be nga be su fite nun’n be liɛ’n, ɔ bɔn be bue nun kɛ like m’ɔ man nguan’n sa. ?Yɛ wan yɛ ɔ kwla di i sɔ junman’n niɔn? 17 E bɔbɔ-ɔ. Afin e timan kɛ sran kpanngban nga be fa Ɲanmiɛn i ndɛ’n be kunndɛ sika’n sa.+ Sanngɛ e kan Ɲanmiɛn ndɛ’n i nanwlɛ su kɛ sran mɔ Ɲanmiɛn sunmannin be’n sa. E yo i sɔ’n Ɲanmiɛn ɲrun, yɛ e nin Klisi e o nun.