Zeremin
23 Zoova waan yoo: “Bua sunianfuɛ nga be yo bua nga n nian be lika’n be abɔlɛ’n, mɔ be sanngan be nun mɔ be bo sanndi’n, be yako!”+
2 Kpɛnngbɛn nga be nian min nvlefuɛ’m be su’n be wun ndɛ nga Zoova m’ɔ ti Izraɛli Ɲanmiɛn’n ɔ kan’n yɛ. I waan: “Amun yoli maan min bua’m b’a bo b’a sanndi. Amun yoli maan b’a mlin. Amun a faman amun ɲin b’a sieman be su.”+
“I sɔ’n ti’n, amun sa tɛtɛ’m be ti’n e nin amun y’a ɲɛn i.” Zoova yɛ ɔ kan sɔ-ɔ.
3 “Min bua nga n yoli maan be bo sanndili nvlenvle’m be nun’n be onga nga be kali lɛ’n, ń yíayía be lika kwlaa sɔ’m be nun ń fá be ń bá.+ Ń fá be ń sá be sin be didiwlɛ’n nun.+ Bé wú ba kpanngban, kpɛkun bé sɔ́n kpa.+ 4 Ń má fá bua sunianfuɛ nga be ko nian be lika kpa’n ń síe be su.+ Srɛ su kunman be kun, be wun su usuman be kun, yɛ be wie fi su mlinman.” Zoova yɛ ɔ kan sɔ-ɔ.
5 Zoova waan yoo: “Amun nian! Cɛn wie lele’n, ń mán Davidi i aja difuɛ kun* m’ɔ́ yó sa i nuan su sɛsɛ-ɔ.+ Yɛ famiɛn kun wá síe sran mun.+ Ɔ́ yó ninnge mun ngwlɛlɛ su. Ɔ́ yó sa i nuan su. Ɔ́ klé kɛ ɔ ti akunndanfuɛ. Ɔ́ yó maan bé nánti mmla’n su, yɛ bé yó sa ng’ɔ ti su’n nvle’n nun.+ 6 I blɛ su’n Zida ɲɛ́n i ti,+ yɛ Izraɛli wá dí alaje.+ Yɛ dunman nga bé fá flɛ́ i’n yɛle E Sa Nuan Su Sɛsɛ Yolɛ’n Fin Zoova.”+
7 Zoova waan yoo: “Sanngɛ blɛ kun wá jú’n, ndɛ nga be kɛn i titi se kɛ: ‘N kan Zoova m’ɔ lafiman’n, m’ɔ fali Izraɛlifuɛ mun Ezipti lɔ fiteli’n,’ be su kɛnmɛn i kun.+ 8 Sanngɛ bé sé kɛ: ‘N kan Zoova m’ɔ lafiman’n, m’ɔ fali Izraɛlifuɛ’m be osu’n nunfuɛ mun nvle ng’ɔ o nglo lɔ lika’n nun nin nvle kwlaa ng’ɔ fali be ɔli nun’n be nun bali’n.’ Yɛ bé trán be bɔbɔ be nvle’n nun.”+
9 Ɲanmiɛn nuan ijɔfuɛ’m be wun ndɛ’n yɛ:
Zoova nin i nuan ndɛ mɔ be ti sanwun’n be ti’n,
min awlɛn’n w’a kpɔtɔ min klun.
Yɛ min owie’m be kwlaa be usu.
N ti kɛ sran kun mɔ w’a nɔn nzan w’a bo’n sa,
kɛ sran kun mɔ duvɛn’n w’a ti i kpa’n sa.
10 Be nga be nantiman seiin Ɲanmiɛn ɲrun’n* b’a yi nvle’n i piɛ.+
Sannzan nga be boli nvle’n ti’n ɔ su sun.+
Nnɛn’m be didiwlɛ nga be o aawlɛ’n nun lɔ’n b’a
wu kee.+
Klunwi’n yɛ be yo-ɔ. Yɛ be fa kwlalɛ nga be le i’n be mianmian sran mun.
11 Zoova waan yoo: “I Ɲanmiɛn nuan ijɔfuɛ-o, i Ɲanmiɛn ɲrun jranfuɛ-o, be ti fiɛn min ɲrun.*+
B’a fa be klunwi’n b’a wlu min sua’n nun bɔbɔ.”+
12 “I sɔ’n ti’n, atin nga be sin su’n, ɔ́ yó ndrɔn, i su’n lú tritritri.+
Bé sú be bo, yɛ bé tɔ́.
Afin afuɛ nga i nun yɛ bé kán sa nga be yoli’n i su ndɛ klé min’n,
ń má fá ɲrɛnnɛn ń yí be su.” Zoova yɛ ɔ kan sɔ-ɔ.
13 “N wunnin like kain kun Samari+ lɔ Ɲanmiɛn nuan ijɔfuɛ’m be wun lɔ.
Baali i nuan yɛ be ijɔ-ɔ.
Yɛ be laka Izraɛli m’ɔ ti min nvle’n.
14 N wunnin sa tɛtɛ wie mun Zerizalɛmun lɔ Ɲanmiɛn nuan ijɔfuɛ’m be wun lɔ.
Be kunndɛ bla be yi’m be bo,+ yɛ be yo ninnge mun gblɛ nun.+
Be suan sa tɛ yofuɛ’m be bo.
Yɛ be yaciman be klunwi’n i yolɛ.
Be kwlaa be ti kɛ Sodɔmun sa min ɲrun.+
Lɔfuɛ’m be ti kɛ Gomɔru sa.”+
15 I sɔ’n ti’n, Ɲanmiɛn nuan ijɔfuɛ’m be wun ndɛ nga Zoova m’ɔ ti sonja’m be su kpɛn’n ɔ kan’n yɛ:
“Ń má fá ijre wiwi’n ń fá mán be naan be di,
yɛ ń má fá nzue mɔ ayre tɛ o nun’n ń fá mán be naan be nɔn.+
Afin Zerizalɛmun lɔ Ɲanmiɛn nuan ijɔfuɛ’m b’a wlawla sran mun nvle wunmuan’n nun naan be nin min be bu.”
16 Zoova m’ɔ ti sonja’m be su kpɛn’n waan yoo:
“Ɲanmiɛn nuan ijɔfuɛ nga be kan sa nga bé wá jú’n be ndɛ’n, nán amun sie amun su be nuan bo.+
Be laka amun.*
Aolia nun like nga be kɛn i ndɛ’n, be bɔbɔ yɛ be kpɛ i be ti nun-ɔn.+
Nán Zoova i nuan ndɛ mun-ɔn.+
17 Be se be nga be buman min sran’n be titi kɛ:
‘Zoova waan: “Amún trán fɔundi nun.”’+
Yɛ be se be kwlaa nga like nga be awlɛn’n su be bo kɛ be yo’n yɛ be yo’n be kɛ:
‘Ɲrɛnnɛn ba kun sa su tɔman amun su.’+
18 ?Afin wan yɛ ɔ ko jrannin Zoova i janvuɛ nga be mɛntɛn i kpa’n be nun
naan ɔ́ nían, naan ɔ́ síe i su tíe i nuan ndɛ’n niɔn?
?Wan yɛ ɔ fɛ i ɲin sie i i nuan ndɛ’n su naan ɔ́ síe i su tíe-ɔ?
19 Amun nian! Aunmuan dan kun m’ɔ fin Zoova’n, ɔ́ wá fíta kekle kpa.
Ɔ́ yó kɛ seke dan kun sa. Kpɛkun ɔ́ kpɛ́ kekle kpa klunwifuɛ’m be ti’n su.+
20 Sɛ Zoova nin-a yiaman like nga i awlɛn o su kɛ ɔ́ yó’n i nuan’n,
i ya’n nin-a kanman ase.
Mɛn’n i awieliɛ blɛ’n nun’n amún wún i sɔ liɛ’n i wlɛ weiin.
21 M’an sunmanman Ɲanmiɛn nuan ijɔfuɛ mun, kpɛkun be wanndi ɔli.
M’an kanman ndɛ m’an kleman be, kpɛkun-ɔn be ko ijɔli min nuan.+
22 Sanngɛ sɛ ɔ ti kɛ be ko jrannin min janvuɛ nga be mantan min kpa’n be nun’n,
nn be kannin min nuan ndɛ’n be kleli min nvlefuɛ mun,
nn be yoli maan be wlali be nzuɛn tɛtɛ’n nin be klunwi ayeliɛ’m be ase.”+
23 Zoova usa kɛ yoo: “?Kɛ n wo amun wun koko’n, i lɛ nun ngunmin yɛ n ti Ɲanmiɛn-ɔn? ?Kɛ n wo mmua’n n timan Ɲanmiɛn wie?”
24 “?Sran kun kwla ko fia lika kun naan m’an kwlá wunmɛn i?”+ Zoova yɛ ɔ usa sɔ-ɔ.
“?N yiman ɲanmiɛn m’ɔ la nglo lɔ plaii’n nin asiɛ’n sa piɛ?”+ Zoova yɛ ɔ usa sɔ-ɔ.
25 “Ato ndɛ nga Ɲanmiɛn nuan ijɔfuɛ’m be fa min dunman be kan’n n tili. Be jaso ko se kɛ: ‘N cɛnnin laliɛ kun! N cɛnnin laliɛ kun!’+ 26 ?Cɛn onin ko naan Ɲanmiɛn nuan ijɔfuɛ’m b’a yaci gblɛ kpɛlɛ’n? Sa nga be kan kɛ bé wá jú’n, be bɔbɔ be ti nun yɛ be kpɛ i-ɔ.+ 27 Laliɛ nga be waan be cɛn be’n, be kan kle be wiengu naan min nvle nunfuɛ’m be wla fi min dunman’n su, kɛ nga Baali ti’n be nannan’m be wla fili min dunman’n su’n sa.+ 28 Maan Ɲanmiɛn nuan ijɔfuɛ ng’ɔ cɛnnin laliɛ’n ɔ kɛn i laliɛ ng’ɔ cɛnnin’n. Sanngɛ sran nga min nuan ndɛ liɛ’n yɛ ɔ o i nuan’n maan ɔ nian su sɛsɛsɛ kan.”
“?Ble ja’n nin ble mma’n be ti kun?” Zoova yɛ ɔ usa sɔ-ɔ.
29 Zoova waan yoo: “Min nuan ndɛ’n ti kɛ sin sa.+ Yɛ ɔ ti kɛ maato kun m’ɔ kpuke yɔbuɛ nun’n sa. ?Nɛ́n i-ɔ?”+
30 Zoova waan yoo: “I sɔ’n ti’n, Ɲanmiɛn nuan ijɔfuɛ nga be wua min nuan ndɛ’n be wiengu sa nun’n, e nin be é wá kán.”+
31 Zoova waan yoo: “E nin Ɲanmiɛn nuan ijɔfuɛ mun é wá kán. Be uke be nuan be se kɛ: ‘Ndɛ ng’ɔ kan’n yɛ!’”+
32 Zoova waan yoo: “Ɲanmiɛn nuan ijɔfuɛ nga be bua ato be se kɛ be cɛnnin laliɛ, mɔ be kan be sin’n, mɔ be fa be gblɛ’n nin be nuan dilɛ’n be laka min nvle’n nunfuɛ mun’n, e nin be é wá kán.”+
“Kusu nn m’an sunmanman be, yɛ m’an kanman ndɛ fi m’an kleman be. Ɔ maan be su kwlá yoman like kpa kun sa manman nvle nga.”+ Zoova yɛ ɔ kan sɔ-ɔ.
33 “Sɛ nvle nga nunfuɛ, annzɛ Ɲanmiɛn nuan ijɔfuɛ kun, annzɛ Ɲanmiɛn ɲrun jranfuɛ kun usa ɔ kɛ: ‘?Zoova i trɔ’n* yɛle benin?’ tɛ be su kɛ: ‘“Trɔ sɔ’n yɛle amun.” Ń yí amun blo sakpasakpa.+ Zoova yɛ ɔ kan sɔ-ɔ.’ 34 Yɛ sɛ Ɲanmiɛn nuan ijɔfuɛ kun, annzɛ Ɲanmiɛn ɲrun jranfuɛ kun annzɛ sran uflɛ se kɛ: ‘Zoova i trɔ’n* yɛ ɔ o yɛ’n,’ ń má klé sran sɔ’n nin i awlofuɛ’m be nun. 35 Amun tinuntinun amun usa amun janvuɛ nin amun niaan’m be kɛ: ‘?Zoova tɛli su seli sɛ? ?Yɛ ngue ndɛ yɛ Zoova kannin-ɔn?’ 36 Sanngɛ Zoova i trɔ’n* i ndɛ liɛ’n nán amun kɛn i kun. Afin amun bɔbɔ amun nuan ndɛ’n yɛ ɔ ti trɔ’n* niɔn. Amun kpɛli Ɲanmiɛn m’ɔ lafiman’n, Zoova m’ɔ ti sonja’m be su kpɛn’n, m’ɔ ti e Ɲanmiɛn’n i nuan ndɛ’n i wun.
37 “Se Ɲanmiɛn nuan ijɔfuɛ’n kɛ: ‘?Zoova tɛli ɔ su sɛ? ?Yɛ ngue ndɛ yɛ Zoova kannin-ɔn? 38 Nán kɛn i kun kɛ: “Zoova i trɔ’n* yɛ ɔ o yɛ.” Zoova waan yoo: ‘Kɛ mɔ a se kɛ Zoova i trɔ’n* yɛle nga’n,’ kusu nn n seli wɔ kɛ nán a se kɛ: “Zoova i trɔ’n* yɛ ɔ o yɛ’n,”’ 39 i sɔ’n ti’n, ń mán ɔ su yɛ ń tó wɔ ń yí i min wun mmua kpa lɔ. Ɔ bɔbɔ nin klɔ nga n fa mannin wɔ nin ɔ nannan mun’n, yɛ ń yó amun sɔ-ɔ. 40 Ń má yó maan ɲannzuɛn kún wɔ sa trilili. Yɛ ɔ ɲin gúa ase tititi, be wla su fiman su le.”’”+