2 Be Ɲoliɛ

17 I sin’n, i wa Zozafati+ sinnin i osu kacili famiɛn. Famiɛn sɔ’n yoli maan i kwlalɛ’n yoli dan Izraɛlifuɛ’m be su. 2 Ɔ siesieli sonja wie mun sɛsɛsɛ Zida lɔ klɔ nga be sisili be wun’n be kwlaa be su. Kpɛkun ɔ fali sonja akpasua wie mun sieli i Zida nvle’n nun nin Efraimun lɔ klɔ nga i si Aza fali be’n be su sɛsɛsɛ.+ 3 Zoova jrannin Zozafati sin titi. Afin w’a fɛmɛn i wun w’a wlaman Baali i sɔlɛ’n nun, i nannan Davidi+ i ajalɛ’n su yɛ ɔ nantili-ɔ. 4 Ɔ kpɛli i si i Ɲanmiɛn’n i sin atin.+ Yɛ ɔ nantili i mmla’n su. W’a nianman Izraɛlifuɛ’m be ayeliɛ’n su.+ 5 Zoova yoli maan Zozafati i famiɛn dilɛ’n takali kpa.+ Zidafuɛ’m be kwlaa be ko cɛli i like tititi. Ɔ maan ɔ ɲɛnnin i wun dan, yɛ ɔ ɲannin ɲrun dan.+ 6 Ɔ tuli i klun fali Zoova i atin’n su. I kpa bɔbɔ’n, lika nglonglo+ nin waka nga sran’m be sɔ be’n,*+ ɔ nunnunnin be Zida akpasua’n su.

7 Kɛ ɔ yoli famiɛn’n, i afuɛ nsan su’n, ɔ sunmannin sran naan be ko flɛ i sran dandan mun. Sran dandan sɔ mun yɛ: Bɛnin-Aili, nin Abdiasi, nin Zakari, nin Netanɛli, yɛ Mikaya. Kpɛkun ɔ sunmannin be naan be ko kle sran’m be like Zida lɔ klɔ’m be su. 8 Levifuɛ wie’m be nin be ɔli. Levifuɛ sɔ mun yɛ: Semaia, nin Netania, nin Zebadia, nin Azaɛli, nin Semiramɔtu, nin Zoonatan, nin Adonia, nin Tobia, nin Tɔbu-Adonia, yɛ Elisama nin Zoramun mɔ be ti Ɲanmiɛn ɲrun jranfuɛ’n.+ 9 Zoova i Mmla fluwa’n+ wo be sa nun, yɛ be kle Zidafuɛ’m be like-ɔ. Be sinnin Zida lɔ klɔ’m be kwlaa be su be ko kleli sran’m be like.

10 Famiɛn diwlɛ nga be mantan Zida lɛ’n, be kwlaa be wa sroli Zoova dan. Ɔ maan be nin Zozafati b’a kunman alɛ. 11 Filistifuɛ’m be cɛli Zozafati i ninnge wie mun, yɛ be tuali lapo be mɛnnin i. Arabu’m be blɛli i bua ɲin akpiakpi nso ya nso (7.700), nin boli kpakpuɛ akpiakpi nso ya nso (7.700).

12 Kɛ lika’n cɛ́n m’ɔ́ sán’n, nn Zozafati i kwlalɛ’n yó dan trá laa’n.+ Ɔ kplannin klɔ wie mun ekun Zida lɔ, kpɛkun ɔ sisili be wun.+ Yɛ ɔ kplannin klɔ wie mun lɔ naan be fa be ninnge’m be sie be su.+ 13 Asa ekun’n, ɔ dili junman dandan wie mun Zida lɔ klɔ’m be su. Yɛ ɔ ɲannin sonja wie mun mɔ be ti safuɲrɛn’n Zerizalɛmun lɛ. 14 Be siesieli be sɛsɛsɛ. Awlo nga i nun yɛ be fin’n, i su yɛ be niannin naan b’a siesie be-ɔ. Zida akpasua’n nun’n, sonja akpi su kpɛn mun yɛ: Be su kpɛn’n yɛle Adna. I sa nun safuɲrɛn’m be ti akpiakpi ya nsan (300.000).+ 15 Be ng’ɔ dun be ɲrun mmua’n, kun yɛle Zoanan m’ɔ ti sonja su kpɛn’n. Zoanan sɔ’n i sa nun safuɲrɛn’m be ti akpiakpi ya nɲɔn akpiakpi ablaɔcuɛ (280.000). 16 Kun ekun yɛle Zikri i wa Amasia m’ɔ fɛli i wun mannin kɛ ɔ́ dí Zoova i junman’n. I sa nun safuɲrɛn’m be ti akpiakpi ya nɲɔn (200.000). 17 Bɛnzamɛn akpasua’n nun’n,+ Eliada yɛ ɔ o lɛ-ɔ. Ɔ ti safuɲrɛn, yɛ i sa nun sran’m be ti akpiakpi ya nɲɔn (200.000). Be le ta mun nin ɲrɛn mun.+ 18 Sran nga Eliada dun i ɲrun mmua’n yɛle Zozabadi. I sa nun sran’m be ti akpiakpi ya akpiakpi ablaɔcuɛ (180.000), yɛ be le alɛ kunlɛ ninnge mun. 19 Sonja nga be di junman man famiɛn’n, be yɛ be o lɛ-ɔ. Be uka sonja nga famiɛn’n fa be sieli i Zida akpasua wunmuan’n su klɔ nga be sisili be wun’n be su sɛsɛsɛ’n, be su.+