1 Samiɛli

30 Davidi nin i sran’m be dili cɛn ba nsan naan b’a ju Ziklagi+ lɔ. Sanngɛ kwlaa naan b’a ju lɔ’n, Amalɛkifuɛ’m+ be bali alɛ kunlɛ Negɛbu* nin Ziklagi lɛ. Be fali alɛ wlali Ziklagi lɔfuɛ’m be sin kpɛkun be wɔli klɔ’n nun. 2 Be trali bla mun+ nin sran kwlaa nga be o lɔ’n, i bakan-o, i kpɛnngbɛn-o. B’a kunman sran ba kun sa. Sanngɛ kɛ be trali be’n, be fa be ɔli. 3 Kɛ Davidi nin i sran’m be juli lɛ’n, bé nían-ɔn, b’a wɔ klɔ’n nun, yɛ be yi mun nin be mma yasua mun nin be mma bla mun be nunman lɛ kun. Sran’m b’a tra be b’a wɔ. 4 Ɔ maan Davidi nin i sran’m be sunnin dan kpa. Be sunnin lele be wunman kɛ be sun wɔ kun-ɔn. 5 Be trali Davidi i yi nɲɔn’m be ɔli wie. I yi sɔ mun yɛle Asinoamun m’ɔ fin Zizreɛli’n, ɔ nin Abigaili. Bla sɔ’n ti Nabali m’ɔ fin Kaamɛli’n i angbeti.+ 6 Davidi i wla boli i wun dan. Afin sran’m be waan bé fínfín i yɔbuɛ. Yasua’m be kwlaa be fali ya dan kpa, afin be wunman be mma yasua mun nin be mma bla mun kun. Sanngɛ Davidi fɛli i wun wlali Zoova m’ɔ ti i Ɲanmiɛn’n i sa nun ti’n, ɔ ɲannin fanngan.+

7 Yɛ Davidi seli Aimelɛki i wa Abiataa+ m’ɔ ti Ɲanmiɛn ɲrun jranfuɛ’n kɛ: “Yaci, fa efɔdu’n bla.”+ Yɛ Abiataa fali efɔdu’n blɛli i-ɔ. 8 Davidi usali Zoova kɛ:+ “?N wanndi su awiefuɛ sɔ’m be su? ?Ń tó be?” Yɛ ɔ tɛli Davidi su kɛ: “Su be su. Afin á tó be. Kpɛkun á dé sran nin like kwlaa nga be fa ɔli’n.”+

9 Be ja nun lɛ’n, Davidi fɛli i sran ya nsiɛn (600) mun+ ɔli. Be ɔli lele be juli Besɔɔ nzue ba’n i nuan lɛ. Kpɛkun i sran wie’m be kali lɛ. 10 Davidi nin sran ya nnan (400) be suli be su. Sanngɛ sran ya nɲɔn (200) be kali Besɔɔ nzue ba’n i nuan lɛ. Afin b’a fɛ dan, be kwlá kpɛman nzue ba’n.+

11 Be wunnin Eziptifuɛ kun blo lɔ naan b’a fɛ i b’a blɛ Davidi. Kpɛkun be mɛnnin i aliɛ nin nzue. 12 Asa ekun’n, be mɛnnin i figie mma gato kun, ɔ nin viɲin mma gato nɲɔn. Kɛ bian’n dili’n, yɛ ɔ ɲannin wunmiɛn-ɔn. Afin ɔ dili cɛn ba klonglo nsan ɔ diman like, yɛ ɔ nɔnman nzue. 13 Yɛ Davidi usɛli i kɛ: “?Wan liɛ yɛle wɔ? ?A fin nin?” Yɛ ɔ tɛli su kɛ: “Eziptifuɛ yɛle min. N ti Amalɛki bian kun i kanga. Sanngɛ min min’n yacili min wa ɔli, afin n tɔli tukpacɛ i cɛn ba nsan yɛ. 14 E ɔli alɛ kunlɛ Kerɛtifuɛ’m+ be lika’n i ngua* lɔ, nin Zidafuɛ’m be asa’n su lɔ, nin Kalɛbufuɛ’m+ be lika’n i ngua* lɔ. Kpɛkun e wɔli Ziklagi klɔ’n nun.” 15 Yɛ Davidi usɛli i kɛ: “?A kwla ko kle min kan awiefuɛ sɔ’m be o’n?” Ɔ tɛli su kɛ: “Sɛ a ta min nda Ɲanmiɛn ɲrun kɛ a su kunman min’n, annzɛ a su faman min wlaman min min’n i sa nun’n, ń kó klé wɔ kan awiefuɛ sɔ’m be o’n.”

16 Kɛ bian’n fá Davidi kɔ́ kan awiefuɛ sɔ’m be o’n, nn be tru lika’n nun sa. Be o lɛ bé dí like yɛ bé nɔ́n nzan. Ɔ ti kɛ cɛn wie yɛ be su di sa, ninnge kpanngban nga be fɛli i Filistifuɛ mun nin Zidafuɛ’m be lika’n nun lɔ’n ti. 17 Davidi kunnin be aliɛ njɛnniɛn su lele lika’n fa sannin. Sran fi w’a fiteman nun,+ saan yasua ya nnan (400) yɛ be fuli ɲɔnngɔnmin’m be su be wanndili-ɔ. 18 Davidi ko deli ninnge kwlaa nga Amalɛkifuɛ’m be fa ɔli’n,+ ɔ nin i yi nɲɔn mun. 19 Davidi nin i sran’m be ninnge mun, i kaan-o i dan-o, be nun ba kun sa w’a tuman nun. Be wunnin be mma yasua mun nin be mma bla mun ɔ nin be ninnge nga awiefuɛ’m be ko fali’n.+ Davidi deli ninnge kwlaa nga be fa ɔli’n. 20 Davidi fali awiefuɛ sɔ’m be bua mun nin be boli mun nin be nannin’m be kwlaa. Kpɛkun be fa be dunnin be bɔbɔ be nnɛn liɛ’m be ɲrun mmua naan b’a wɔ. Kɛ bé kɔ́’n, be se kɛ: “Like nga Davidi ɲɛnnin i alɛ’n nun’n yɛ ɔ o yɛ.”

21 I sin’n, Davidi wa toli sran yasua ya nɲɔn (200) nga be fɛli mɔ b’a sumɛn i su kun’n. Be liɛ’n be kali Besɔɔ nzue ba’n i nuan lɛ.+ Kɛ be wunnin Davidi nin sran mun’n, be bali be atin kpalɛ. Kɛ ɔ juli be wun lɛ’n, ɔ usali be sɛ be wun ti kpa-o. 22 Sanngɛ be nga be nin Davidi be ɔli’n be nun sran tɛtɛ mun nin finfinfuɛ’m be seli i kɛ: “Be nin e b’a ɔman. I sɔ’n ti’n, ninnge nga e ko deli be’n e su manman be wie. Maan be fa be yi mun nin be mma mun naan be wɔ.” 23 Sanngɛ Davidi seli kɛ: “Min niaan mun, nán amun yo ninnge nga Zoova fa mannin e’n i sɔ. Ɔ sasali e, kpɛkun ɔ fali awiefuɛ nga be wa isali e bo ninnge mun’n wlali e sa nun.+ 24 ?Wan yɛ ɔ́ fá amun ndɛ’n su-ɔ? Like nga sran ng’ɔ ɔli alɛ kunlɛ’n ɲɛ́n i’n, ɔ nin sran ng’ɔ trannin trɔ’m be wun lɛ’n+ i liɛ’n sɛ́. E ngba é cɛ́ ninnge nga e ɲɛnnin i’n nun sɛsɛsɛ.”+ 25 Kɛ ɔ fɛ i cɛn sɔ’n nun’n, Davidi fɛli i sɔ liɛ’n kacili mmla. Andɛ nin andɛ’n be te di mmla sɔ’n su Izraɛli lɔ.

26 Kɛ Davidi sɛli i sin Ziklagi lɔ’n, ɔ fali ninnge nga be ɲɛnnin i’n wie ko mannin Zida lɔ kpɛnngbɛn nga be ti i janvuɛ’n. Ɔ seli be kɛ: “Zoova i kpɔfuɛ’m be bo ninnge nga e fali’n, amun liɛ yɛ.” 27 Ɔ fa ko mannin be nga be o Betɛli+ lɔ’n, nin Ramɔtu i ngua* lɔ’n, nin Zatii lɔ’n,+ 28 nin Aroɛɛ lɔ’n, nin Sifmo lɔ’n, nin Ɛstemoa+ lɔ’n, 29 nin Rakali lɔ’n, nin Zerameɛlifuɛ’m+ be klɔ dandan’m be su’n, nin Keninfuɛ’m+ be klɔ dandan’m be su’n, 30 nin Ɔɔma+ lɔ’n, nin Bɔɔ-Asan lɔ’n, nin Ataki lɔ’n, 31 nin Ebrɔn+ lɔ’n, ɔ nin lika kwlaa nga Davidi nin i sran’m be sinnin lɛ’n.