Jɔlɛ Difuɛ Mun

7 I sin’n, Zeribaali, yɛle kɛ Zedeɔn,+ ɔ nin be kwlaa nga be o i wun lɛ’n, be jasoli nglɛmun ndɛ kpa kpɛkun be boli nanmue Arɔdu Nzue Ti’n i wun lɛ. Madianfuɛ’m be kusu be o be liɛ nglo lɔ lika’n nun lɔ, More kpɔlɛ’n i wun lɛ kongo’n nun. 2 Zoova seli Zedeɔn kɛ: “Sran nga a nin be o’n be sɔnnin ngboko. Sɛ n fa Madianfuɛ mun n wla Izraɛlifuɛ’m be sa nun’n,+ be kwla fa di be nuan, bé sé min kɛ: ‘E bɔbɔ e sa’n yɛ ɔ deli e-ɔ.’+ 3 Siɛn’n yaci, kan ndɛ yɛ’n kle nvlefuɛ mun. Se be kɛ: ‘Sran nga srɛ kun i m’ɔ usu’n, maan ɔ sɛ i sin i awlo.’”+ Ɔ maan Zedeɔn sa be niannin. Kɛ ɔ yoli sɔ’n, sran akpiakpi ablaɔn-nin-nɲɔn (22.000) be sali be sin ɔli be awlo, yɛ sran akpiakpi blu (10.000) be kali lɛ.

4 Sanngɛ Zoova seli Zedeɔn ekun kɛ: “Sran’m be te sɔn dan. Fa be jra nzue’n su lɔ naan n sa be n nian n man wɔ. Sɛ n se wɔ kɛ: ‘Sran nga nin wɔ bé kɔ́’n,’ ɔ nin wɔ bé kɔ́. Sanngɛ sɛ n se wɔ kɛ: ‘Sran nga nin wɔ be su kɔman’n,’ ɔ su kɔman wie.” 5 Ɔ maan ɔ fa be ɔli nzue’n su lɔ.

I sin’n, Zoova seli Zedeɔn kɛ: “Be nga be fa be taaman be tafi nzue’n kɛ alua’m be liɛ’n sa’n, sie be ngunmin, yɛ sie be nga be koto be nɔn nzue’n be ngunmin.” 6 Be nga be tafili nzue’n, mɔ be fali be sa ɔli be nuan’n, be ti sran ya nsan (300). Be onga’m be kotoli yɛ be nɔnnin nzue’n niɔn.

7 Zoova seli Zedeɔn kɛ: “Ń má fá sran ya nsan (300) nga be tafili nzue’n ń dé amun, ń má fá Madianfuɛ mun ń wlá ɔ sa nun.+ Sanngɛ maan be onga’m be kwlaa be sa be sin be wɔ be awlo.” 8 I sin’n, kɛ be fali like diwa’n nin awɛ mun sran sɔ’m be sa nun’n, ɔ seli be kɛ be sa be sin be wɔ be awlo. Sran ya nsan (300) cɛ yɛ be kali lɛ-ɔ. Madianfuɛ’m be nanmue’n wo Zedeɔn liɛ’n i ja ngua lɔ, kongo’n nun lɔ.+

9 Kɔnguɛ sɔ’n nun’n, Zoova seli i kɛ: “Jaso ko tɔ nanmue’n su, afin m’an fa wla ɔ sa nun.+ 10 Sanngɛ sɛ be su tɔlɛ’n kun wɔ srɛ’n, maan a nin ɔ sufuɛ Pira amun jra be wɔ nanmue’n nun lɔ. 11 Sie ɔ su tie ndɛ nga be kan’n, i sin’n, á wá ɲán wunmiɛn* tɔ́ nanmue’n su.” Kɛ ɔ yoli sɔ’n, ɔ nin i sufuɛ Pira be jra ɔli sonja’m be nanmue’n i wun lɔ.

12 Madianfuɛ mun, nin Amalɛkifuɛ mun, nin wia afiliɛ lɔfuɛ’m+ be gua kongo’n nun lɔ kɛ lalo mun sa, be kwlá kaman be ɲɔnngɔnmin mun,+ be sɔnnin kpa kɛ jenvie nuan aunɲan’n sa. 13 Kɛ Zedeɔn jú lɛ’n, bian kun su kan laliɛ kun m’ɔ cɛnnin’n i ndɛ kle i wiengu kun. Ɔ seli kɛ: “Laliɛ nga n cɛnnin’n yɛ: N wunnin ɔɔzu kpanwun kukluku kun, ɔ kondo bali Madianfuɛ’m be nanmue’n nun wa. Kɛ ɔ juli tannin sua kun wun lɛ’n, ɔ tu sili i kekle kpa, ɔ maan tannin sua’n tɔli.+ Ɔ lɛngɛli i ɲin aanga, kpɛkun ɔ bubuli.” 14 Yɛ i wiengu kun’n seli i kɛ: “Zoasi i wa Zedeɔn i tokofi’n cɛ+ yɛ a wunnin i lɛ-ɔ, ɔ ti Izraɛlifuɛ. Ɲanmiɛn w’a fa Madianfuɛ mun nin be nanmue’n w’a wlɛ i sa nun.”+

15 Kɛ Zedeɔn tili laliɛ’n nin i bo tulɛ’n,+ ɔ kotoli manmannin Ɲanmiɛn. I sin’n, ɔ sɛli i sin Izraɛlifuɛ’m be nanmue’n nun lɔ, kpɛkun ɔ seli kɛ: “Amun jaso, afin Zoova w’a fa Madianfuɛ’m be nanmue’n w’a wla amun sa nun.” 16 Ɔ bubuli sran ya nsan (300) mun be nun akpasua nsan, ɔ wlali be sa nun awɛ sɛsɛsɛ,+ yɛ ɔ mannin be sɛ dandan wie mun. Like fi nunman sɛ’m be nun. Ɔ fali tɛ wlali sɛ sɔ’m be nun. 17 I sin’n, ɔ seli be kɛ: “Amun nian min naan like nga n yo’n, amun nian su yo i sɛsɛsɛ. Kɛ n ko ju nanmue’n i wun lɔ’n, amun nian like nga n yo’n su be yo i sɛsɛsɛ. 18 Kɛ n ko bo awɛ’n, kɛ e nin be nga be o min wun lɛ’n e ko bo awɛ’n, amun kusu mɔ amun a sin b’a yia nanmue’n, amun jran kan amun o lɛ’n naan amun bo awɛ mun, yɛ amun kpan se kɛ: ‘Zoova liɛ, yɛ Zedeɔn liɛ!’”

19 Kɛ lika’n wá bú nun* mɔ be siesieli gladi difuɛ mun cɛ’n, Zedeɔn nin sran ya (100) nga be o i wun lɛ’n, be mantannin nanmue’n lɔ. Be boli awɛ mun,+ kpɛkun be boboli nzue sɛ dandan nga be o be sa nun’n.+ 20 Ɔ maan sran akpasua nsan sɔ’m be boli awɛ mun, be boboli sɛ dandan mun. Tɛ’m be o be sa bɛ’n nun, yɛ awɛ’m be o be sa fama’n nun yɛ be bo-ɔ. Be kpan se kɛ: “Zoova i tokofi’n nin Zedeɔn i tokofi’n!” 21 Kɛ be sin yiali nanmue’n, be kwlaa be kali be osu’n nun lɛ blɛ kwlaa sɔ’n nun. Madian sonja’m be kwlaa be wanndili, kɛ bé wánndi kɔ́ nn bé kpán.+ 22 Sran ya nsan (300) sɔ’m b’a yaciman awɛ’n i bolɛ. Yɛ Zoova yoli maan nga kpɛ i ɲin wɔ i wiengu tokofi, nga kpɛ i ɲin wɔ i wiengu tokofi nanmue’n nun.+ Sonja’m be wanndi juli Bɛti-Sita, be juli Zerera, yɛ be juli Abɛli-Meola+ m’ɔ o Tabati i wun lɛ’n, i nuan lɔ.

23 Ɔ maan be flɛli Izraɛlifuɛ nga be o Nɛftali nin Azɛɛ akpasua’n su’n, ɔ nin Manasefuɛ’m be kwlaa,+ kpɛkun be suli Madianfuɛ’m be su. 24 Zedeɔn sunmannin sran Efraimun okaoka lika’n i kwlaa nun, ɔ seli be kɛ: “Amun jra ko tɔ Madianfuɛ’m be su, amun ko fa atin nga be kɔ nzue ba’m be su lɔ’n lele fa ju Bɛti-Bara nin Zurdɛn’n su lɔ naan sran fi w’a sinman.” Ɔ maan Efraimunfuɛ’m be kwlaa be ti yiali, be ko jranjrannin nzue’m be su lele fa juli Bɛti-Bara nin Zurdɛn’n su lɔ naan sran fi w’a sinman. 25 Asa ekun’n, be trali Madian kpɛnngbɛn nɲɔn mun, Orɛbu nin Zeɛbu. Be kunnin Orɛbu, Orɛbu yɔbuɛ’n su lɔ,+ yɛ be kunnin Zeɛbu, Zeɛbu i duvɛn yiwlɛ’n nun lɛ. B’a yaciman Madianfuɛ’m be su sulɛ,+ yɛ be fali Orɛbu nin Zeɛbu be ti mun ko mannin Zedeɔn, Zurdɛn asa’n su lɔ.