Ezekiɛli
13 I sin’n, Zoova kannin ndɛ kleli min ekun. Ɔ seli min kɛ: 2 “Sran wa, kan sa ng’ɔ́ wá jú Izraɛli nvle’n nun Ɲanmiɛn nuan ijɔfuɛ’m+ be su’n i ndɛ. Se be nga be kpɛ be ti nun be kan sa nga bé wá jú’n be ndɛ’n+ be kɛ: ‘An tie ndɛ nga Zoova kan’n. 3 Ndɛ nga Miɛn Zoova m’ɔ Sie Like Kwlakwla’n kan’n yɛ: “Ɲanmiɛn nuan ijɔfuɛ sinnglinfuɛ mɔ b’a wunman like fi mɔ sanngɛ be kan be bɔbɔ be klun ndɛ’n be yako.+ 4 Ee Izraɛli, ɔ Ɲanmiɛn nuan ijɔfuɛ’m b’a kaci kɛ blo alua mɔ be o klɔ nvuɛn kun su’n sa. 5 Amun su kɔman yɔbuɛ talɛ’m be lika nga be bubuli’n be wun lɔ naan amun a kplan be b’a man Izraɛli nvle’n nunfuɛ mun,+ naan Izraɛli w’a kwla jran kekle w’a kun alɛ Zoova i cɛn’n nun.”+ 6 “Be wunnin ato ninnge mun aolia nun, yɛ sa nga be seli kɛ bé wá jú’n be timan nanwlɛ. Sran sɔ’m be se kɛ: ‘Ndɛ nga Zoova kan’n yɛ,’ kusu nn Zoova w’a sunmanman be, kpɛkun be minndɛli kɛ ndɛ nga be kannin’n ɔ kpɛn su.+ 7 ?Kɛ amun se kɛ: ‘Ndɛ nga Zoova kan’n yɛ,’ kusu nn m’an kanman ndɛ fi’n, like nga amun wunnin i aolia nun’n nin sa nga amun seli kɛ ɔ́ wá jú’n, be timan ato yɛ ɔ o lɛ-ɔ?”’
8 “‘I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “‘Kɛ mɔ amun kannin ato ndɛ, mɔ kusu aolia nun ninnge nga amun wunnin be’n be timan nanwlɛ’n ti’n, e nin amun e le i. Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”+ 9 Ɲanmiɛn nuan ijɔfuɛ mɔ be aolia nun like nga be wun be’n be timan nanwlɛ’n, mɔ sa nga be se kɛ bé wá jú’n be ti ato ndɛ’n,+ m’an tinngɛ min sa’n nun be wun. Be su tranman be nga n kan min klun ndɛ n kle be’n be nun. Be su klɛman be dunman Izraɛli nvle’n nunfuɛ’m be fluwa’m be nun. Be su saman be sin Izraɛli mɛn’n nun. Yɛ amún wá sí jrɛiin kɛ min yɛ n ti Miɛn Zoova m’ɔ Sie Like Kwlakwla’n niɔn.+ 10 Sa kwlaa sɔ’m bé wá jú, afin be yoli maan min nvlefuɛ’m be fali atin tɛ su. Be se be kɛ fɔundi o lɛ,+ kusu nn fɔundi nunman lɛ. Kɛ sran kun kplan talɛ kun mɔ w’a jranman cinnjinnjin’n, be fa ayre ufue be kɛn i ayre.’*+
11 “Se be nga be kan talɛ’n i ayre ufue’n be kɛ talɛ’n wá tɔ́. Nzue dan kun wá tɔ́, nzraama mɔ kɛ nzue tɔ́’n ɔ gua’n* ɔ́ gúa, yɛ aunmuan dan kun wá fíta, ɔ maan ɔ́ búbú gúa.+ 12 Yɛ kɛ talɛ’n wá tɔ́’n, bé wá úsa amun kɛ: ‘?Ayre nga amun fa kɛnnin i’n, ɔ o nin?’+
13 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má fá ya dan ń yó maan aunmuan’n wá fíta kekle kpa, yɛ nzue’n wá tɔ́ dan kpa. Ń má yó maan nzraama mɔ kɛ nzue tɔ́’n ɔ gua’n ɔ́ gúa, yɛ ɔ́ sáci talɛ’n, ya dan mɔ n fali’n ti. 14 Ń má búbú talɛ mɔ amun kɛnnin i ayre ufue’n, ń má yó maan ɔ́ tɔ́ asiɛ wun, yɛ i bo mɔ be wlɛli i ase’n ɔ́ fíte su. Kɛ bé wá fá klɔ’n amún wá wú klɔ’n nun, yɛ amún wá sí jrɛiin kɛ n ti Zoova.’
15 “‘Kɛ ń má yí min ya dan’n i nglo talɛ’n nin be nga be kɛnnin i ayre ufue’n be su’n, ń má sé amun kɛ: “Talɛ’n nunman lɛ kun, yɛ be nga be kɛnnin i ayre’n be kusu be nunman lɛ kun.+ 16 Izraɛli nvle’n nun Ɲanmiɛn nuan ijɔfuɛ mɔ be kan sa nga bé wá jú Zerizalɛmun su’n i ndɛ’n, mɔ be wun aolia nun like m’ɔ kle kɛ fɔundi o lɛ, kusu nn fɔundi nunman lɛ’n be nunman lɛ kun.”’+ Ndɛ nga e Min Zoova m’ɔ Sie Like Kwlakwla’n kan’n yɛ ɔ o lɛ-ɔ.
17 “Sran wa, ɔ liɛ’n, kpɛ ɔ ɲin ɔ nvle’n nunfuɛ’m be mma bla mɔ be kpɛ be ti nun be kan sa nga bé wá jú’n be ndɛ’n be su lɔ, naan kan sa ng’ɔ́ wá jú be su’n i ndɛ. 18 Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Bla nga be wu tannin tanmue naan sran’m be kwlaa be fa wla be sa’n,* mɔ be yo luku naan sran wafawafa kwlaa be fa bo be ti’n, naan bé fá súa be wun aya naan bé fá be nguan’n, be yako! ?Amun kunndɛ kɛ amún súa min nvle’n nunfuɛ’m be bo aya naan amún fá be nguan’n, kpɛkun amun bu i kɛ amun kwla sasa amun bɔbɔ amun nguan’n? 19 ?Ɔɔzu sa buɛ nɲɔn kun ti’n, ɔ nin kpanwun sin kanngan wie’m be ti’n, amún yó min finfin min nvle’n nunfuɛ’m be afiɛn?+ Amun laka min nvle’n nunfuɛ mun yɛ be fa su. Ɔ maan amun kun be ng’ɔ fataman kɛ be wu’n, yɛ be ng’ɔ fataman kɛ be ka nguan nun’n, amun yaci be nguan nun.”’+
20 “I sɔ’n ti’n, ndɛ nga e Min Zoova m’ɔ Sie Like Kwlakwla’n kan’n yɛ: ‘Ee, bla mun, e nin amun tannin tanmue mun e le i. Amun fa sua sran’m be wun aya kɛ anunman yɛle be sa. Ń má yí be amun sa’m be wun, yɛ be nga amun suali be wun aya mɔ amun trali be kɛ anunman sa’n, ń má yáci be nun bé kɔ́. 21 Ń má yí amun luku mun, yɛ ń dé min sran mun amun sa nun, kpɛkun ń yó maan kɛ amún wá kɔ́ koniɛn’n, amun su kwlá traman be kun, yɛ amún wá sí jrɛiin kɛ n ti Zoova.+ 22 Afin amun ato ndɛ’m be ti’n, sran kpa’n i sa sin w’a bubu i,+ kusu nn m’an faman ɲrɛnnɛn m’an yimɛn i su. Yɛ amun wla klunwifuɛ’n i fanngan,+ ɔ maan ɔ kacimɛn i sin simɛn i sa tɛ’n naan w’a kwla ka nguan nun.+ 23 I sɔ’n ti’n, bla mun, amun su wunman ato ninnge mun aolia nun kun, yɛ amun su yiman wunnzue kun.+ Ń má dé min sran mun amun sa nun, yɛ amún wá sí jrɛiin kɛ n ti Zoova.’”