1 Famiɛn Mun

16 Zoova seli Ananin+ i wa Zei+ kɛ ɔ ko kan ndɛ kun kle Baasa. I waan ɔ se i kɛ: 2 “N fali wɔ ndutre’n nun yɛ n fali wɔ n sieli Izraɛli m’ɔ ti min nvle’n i su kpɛn-ɔn.+ Sanngɛ w’a yaciman Zeroboamun i atin’n i su falɛ. A yoli maan Izraɛli m’ɔ ti min nvle’n yoli sa tɛ. Ɔ maan be fɔkɔli min awlɛn be sa tɛ’m be ti.+ 3 I sɔ’n ti’n, ń má núnnún Baasa nin i awlo’n sekeseke, yɛ ń yó maan i awlo’n yó kɛ Nebati i wa Zeroboamun i awlo’n sa.+ 4 Baasa i awlo’n nun sran kwlaa ng’ɔ wu klɔ’n nun’n, alua’m bé dí i fuɛn’n, i awlo’n nun sran kwlaa ng’ɔ wu blo lɔ’n, anunman mɔ be tu sin nglo lɔ’n bé dí i fuɛn’n.”

5 Baasa i su ndɛ’n i onga’n, like ng’ɔ yoli’n, ɔ nin i kwlalɛ’n, be klɛli be fluwa ng’ɔ kan Izraɛli famiɛn’m be ndɛ’n i nun. 6 I sin’n, Baasa wuli.* Be sieli i Tiiza+ lɔ. Yɛ i wa Ela sinnin i osu kacili famiɛn. 7 Sa nga ti yɛ Zoova sinnin i nuan ijɔfuɛ Zei m’ɔ ti Ananin i wa’n i lika buli Baasa nin i awlo’n be fɔ’n yɛle kɛ ɔ yoli sa tɛ kpanngban Zoova ɲrun, sa tɛ ng’ɔ yoli be’n be fɔkɔli i awlɛn. Ɔ yoli like nga Zeroboamun i awlo’n nunfuɛ’m be yoli’n wie. Asa ekun’n, ɔ kunnin Nadabu.+

8 Kɛ Famiɛn Aza kacili Zida famiɛn’n i afuɛ ablaɔn-nin-nsiɛn (26) su’n, Baasa i wa Ela kacili famiɛn Tiiza lɔ. Ɔ dili famiɛn afuɛ nɲɔn. 9 I sufuɛ Zimiri m’ɔ ti i alɛ kunlɛ kakaklolo’m be bue kun su kpɛn’n, ɔ jasoli i wun. Kɛ ɔ́ yó sɔ’n, nn Ela o Tiiza lɔ, ɔ o Aaza m’ɔ nian famiɛn’n i awlo’n su Tiiza lɔ’n i awlo lɔ. Ɔ o lɔ nɔ́n nzan, nzan’n w’a ti i kpa. 10 Zimiri wluli i sin lɔ, kpɛkun ɔ kunnin i.+ Yɛ ɔ sinnin i osu kacili famiɛn-ɔn. Kɛ Famiɛn Aza kacili Zida famiɛn’n, i afuɛ ablaɔn-nin-nso (27) su’n yɛ sa sɔ’n juli-ɔ. 11 Kɛ ɔ kacili famiɛn m’ɔ trannin famiɛn bia’n su cɛ’n, ɔ kunnin Baasa i awlo’n nunfuɛ’m be kwlaa. W’a yacimɛn i awlo’n nun yasua* wie fi nguan nun, i osufuɛ* mun-o, i janvuɛ mun-o, ɔ kunnin be kwlaa. 12 Ɔ maan Zimiri nunnunnin Baasa i awlo’n nunfuɛ’m be kwlaa, kɛ nga Zoova sinnin i nuan ijɔfuɛ Zei i lika kan kleli Baasa’n sa.+ 13 Ɔ yoli sɔ afin Baasa nin i wa Ela be yoli sa tɛ, yɛ be yoli maan Izraɛlifuɛ’m be yoli sa tɛ, yɛle kɛ be fali amuin mɔ be kwlá yoman sa fi ye’n be fɔkɔli Zoova m’ɔ ti Izraɛli Ɲanmiɛn’n i awlɛn.+ 14 Ela i su ndɛ’n i onga’n, like kwlaa ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n i nun.

15 Kɛ Famiɛn Aza kacili Zida famiɛn’n, i afuɛ ablaɔn-nin-nso (27) su’n, Zimiri kacili famiɛn. Ɔ dili famiɛn cɛn ba nso Tiiza lɔ. Kɛ ɔ́ yó sɔ’n, nn sonja’m b’a bo nanmue Gibetɔn+ klɔ m’ɔ ti Filistifuɛ’m be liɛ’n i wun lɛ. 16 Kɛ ɔ́ kɔ́ i ɲrun’n, sonja nga be boli nanmue’n be tili i kɛ Zimiri w’a jaso famiɛn’n i wun naan w’a kun famiɛn’n, kpɛkun Izraɛlifuɛ’m be fali Ɔmri+ m’ɔ ti sonja’m be su kpɛn’n, be sieli i famiɛn Izraɛli nvle’n su, nanmue’n nun lɔ. 17 Ɔmri nin Izraɛlifuɛ’m be kwlaa be ɔli Gibetɔn, kpɛkun be boli nanmue Tiiza klɔ’n i wun lɛ. 18 Kɛ Zimiri wunnin kɛ b’a fa klɔ’n, ɔ ɔli famiɛn’n i awlo lɔ sua fleiin’n nun lɔ, yɛ ɔ wɔli sua’n nun, ɔ kali sin’n nun wuli.+ 19 Sa sɔ’n juli afin i bɔbɔ yoli sa tɛ, ɔ yoli like ng’ɔ timan kpa Zoova ɲrun’n, yɛle kɛ ɔ niannin Zeroboamun i ayeliɛ’n su, yɛ ɔ yoli maan Izraɛlifuɛ’m be yoli sa tɛ.+ 20 Zimiri i su ndɛ’n i onga’n, ɔ nin famiɛn’n i wun m’ɔ jasoli’n, be klɛli be fluwa ng’ɔ kan Izraɛli famiɛn’m be ndɛ’n i nun.

21 Blɛ sɔ’n nun’n, Izraɛlifuɛ’m be buli be wun nun nɲɔn. Bue kun suli Ginati i wa Tibnin su, be waan ɔ kaci famiɛn. Yɛ be onga’m be suli Ɔmri su. 22 Sanngɛ be nga be o Ɔmri sin’n be kwlali be nga be o Ginati i wa Tibnin sin’n. Ɔ maan Tibnin wuli, yɛ Ɔmri kacili famiɛn.

23 Kɛ Aza kacili Zida famiɛn’n, i afuɛ ablasan-nin-kun (31) su’n, Ɔmri kacili Izraɛli famiɛn, ɔ dili famiɛn afuɛ blu-nin-nɲɔn (12). Ɔ dili famiɛn Tiiza lɔ afuɛ nsiɛn. 24 Ɔ toli Samari oka’n bian kun mɔ be flɛ i Semɛɛ’n i sa nun. Ɔ toli i sika talan nɲɔn.* Ɔ kplannin klɔ kun su. Yɛ ɔ flɛli klɔ ng’ɔ kplannin’n kɛ Samari.*+ Afin sran nga oka’n ti i liɛ laa’n be flɛ i kɛ Semɛɛ. 25 Ɔmri w’a yaciman like ng’ɔ ti tɛ Zoova ɲrun’n i yolɛ. Ɔ yoli sa tɛ trali be kwlaa nga be dunnin mmua i ɲrun’n.+ 26 Ɔ fali Nebati i wa Zeroboamun i ayeliɛ tɛ’n su. Sa tɛ nga Zeroboamun ti’n Izraɛlifuɛ’m be yoli’n, ɔ yoli sa kunngba’n wie, yɛle kɛ ɔ fali amuin mɔ be kwlá yoman sa fi ye’n fa fɔkɔli Zoova i awlɛn.+ 27 Ɔmri i su ndɛ’n i onga’n, like ng’ɔ yoli’n nin i kwlalɛ’n, be klɛli be fluwa ng’ɔ kan Izraɛli famiɛn’m be ndɛ’n i nun. 28 Ɔmri wuli,* be sieli i Samari lɔ. I wa Akabu+ sinnin i osu kacili famiɛn.

29 Kɛ Famiɛn Aza kacili Zida famiɛn’n, i afuɛ ablasan-nin-mɔcuɛ (38) su’n, Ɔmri i wa Akabu kacili famiɛn Izraɛli nvle’n su. Ɔ dili famiɛn afuɛ ablaɔn-nin-nɲɔn (22) Samari+ lɔ. 30 Ɔmri i wa Akabu yoli sa tɛ Zoova i ɲrun trali be kwlaa nga be dunnin mmua i ɲrun’n.+ 31 Ɔ yoli sa tɛ kunngba nga Nebati i wa Zeroboamun yoli’n wie.+ W’a kaman ngalɛ’n su, ɔ jali Ɛtbaali m’ɔ ti Sidɔn+ famiɛn’n i wa bla Zezabɛli,+ kpɛkun ɔ kotoli Baali i bo yɛ ɔ sɔli i.+ 32 Asa ekun’n, ɔ kplannin tɛ yiwlɛ kun mannin Baali, Baali i sua+ m’ɔ kplɛnnin i Samari lɔ’n nun. 33 Akabu takali waka mɔ be sɔ be’n.*+ Ɔ yoli sa kpanngban fa fɔkɔli Zoova m’ɔ ti Izraɛli Ɲanmiɛn’n i awlɛn. Ɔ yoli sɔ trali Izraɛli famiɛn’m be kwlaa nga be dunnin mmua i ɲrun’n.

34 Blɛ sɔ’n nun’n, Iyɛli m’ɔ ti Betɛlifuɛ’n ɔ kplannin Zeriko klɔ’n i uflɛ. Kɛ ɔ́ wlá klɔ’n i bo ase’n, Abiramun m’ɔ ti i wa klikli’n wuli, yɛ kɛ ɔ́ wlá klɔ’n i anuan mun’n, Segubu m’ɔ ti i wa kasiɛn’n wuli, kɛ nga Zoova sinnin Nɛn i wa Zozie i lika kannin’n sa.+