Rɔmunfuɛ Mun
14 Amun sɔ sran nga i Ɲanmiɛn sulafilɛ’n nin-a takaman kpa’n i nun,+ yɛ nán amun jran ndɛ ng’ɔ kan’n* su be di i jɔlɛ. 2 Sran wie o lɛ’n, i Ɲanmiɛn sulafilɛ’n ti’n ɔ di like kwlaa. Sanngɛ sran nga i Ɲanmiɛn sulafilɛ’n nin-a takaman kpa’n, nɲa ngunmin yɛ ɔ di-ɔ. 3 Sran ng’ɔ di like wie’n, nán maan ɔ yo sran ng’ɔ dimɛn i sɔ like’n i finfin. Yɛ nán maan sran ng’ɔ diman’n, ɔ bu sran ng’ɔ di’n i fɔ.+ Afin Ɲanmiɛn sɔli i nun. 4 ?A ti ɔ liɛ sɛ mɔ a di sran wie i junman difuɛ’n i jɔlɛ-ɔ?+ I min’n yɛ ɔ kwla yo maan ɔ jrɛn i ja su annzɛ ɔ fin ase-ɔ.+ Kusu ɔ́ jrɛ́n i ja su, afin Zoova* kwla yo maan ɔ jrɛn i ja su.
5 Sran wie bu cɛn wie kpa tra wie,+ sran uflɛ kusu bu i kɛ cɛn’m be kwlaa be sɛ.+ Maan sran kun lafi i akunndan liɛ ng’ɔ bu’n su kpa. 6 Sran ng’ɔ di cɛn’n, ɔ di man Zoova.* Sran ng’ɔ di like kusu’n, ɔ di man Zoova,* afin ɔ la Ɲanmiɛn ase.+ Yɛ sran ng’ɔ diman like kusu’n, Zoova* ti yɛ ɔ diman-ɔn, yɛ ɔ la Ɲanmiɛn ase wie.+ 7 Nanwlɛ, e nun wie fi nunman nguan nun i ngunmin i liɛ ti.+ Yɛ sran ng’ɔ wu’n, nɛ́n i ngunmin i liɛ ti yɛ ɔ wu-ɔ. 8 Afin sɛ e o nguan nun’n, Zoova* dunman nun yɛ e o nguan nun-ɔn.+ Yɛ sɛ e wu’n, e wu Zoova* dunman nun. Ɔ maan sɛ e o nguan nun-o, sɛ é wú-o, e ti Zoova* liɛ.+ 9 Afin Klisi wuli yɛ ɔ sɛli i sin nguan nun ekun naan ɔ́ yó be nga be wuli’n nin be nga be ɲin o su’n be Min.+
10 ?Sanngɛ ngue ti yɛ a di ɔ niaan’n i jɔlɛ-ɔ?+ ?Annzɛ ngue ti yɛ ɔ niaan’n i wun yo ɔ tɛ-ɔ? Afin e kwlaa é jrán Ɲanmiɛn i jɔlɛ diwlɛ’n i ɲrun.+ 11 Asa kusu’n, be klɛli i kɛ: “Zoova* waan: ‘N wo lɛ sakpa,+ sran’m be kwlaa bé kóto min bo, yɛ ɔ́ wá fíte sran’m be kwlaa be nuan kɛ be si Ɲanmiɛn.’”+ 12 Ɔ maan e tinuntinun é wá kán sa nga e yoli be’n be su ndɛ é klé Ɲanmiɛn.+
13 I sɔ’n ti’n, maan e yaci e wiengu i jɔlɛ dilɛ.+ I li bɔbɔ’n, maan amun fua kpa kɛ amun su faman like wie sieman amun niaan wie i ɲrun naan i ja kpla su.+ 14 Kɛ mɔ n ti e Min Zezi i sɔnnzɔnfuɛ’n ti’n, n si kɛ like fi timan fiɛn,+ yɛ n lafi su sɔ. Sanngɛ sɛ sran wie bu i kɛ like wie ti fiɛn’n, i bɔbɔ i ɲrun yɛ ɔ ti fiɛn-ɔn. 15 Afin sɛ aliɛ wie ti’n, ɔ niaan wie i akunndan’n sanngan’n, i lɛ nun’n, a su kle kɛ a kloman sran kun.+ Nán fa wɔ aliɛ’n saci* sran nga i ti yɛ Klisi wuli’n.+ 16 I sɔ’n ti’n, like nga a yo m’ɔ ti kpa’n, nán yo maan be kɛn i ndɛ tɛ. 17 Afin Ɲanmiɛn i Famiɛn Diwlɛ’n i nun wlulɛ’n, nɛ́n i yɛle aliɛ dilɛ’n nin nzan nɔnlɛ’n.+ Sanngɛ yɛle sa kpa yolɛ’n nin fɔundi dilɛ’n, ɔ nin aklunjɔɛ dilɛ’n. Ɲanmiɛn wawɛ’n yɛ maan ɔ kwla yo sɔ-ɔ. 18 Sran ng’ɔ tu i klun di junman man Klisi kɛ ngalɛ sa’n, Ɲanmiɛn i klun jɔ i wun, yɛ sran’m be kɛn i wun ndɛ kpa.
19 I sɔ’n ti’n, maan e yo naan e nin sran mun e tran fɔun+ titi, yɛ e yo sa ng’ɔ yo e wiengu ye’n titi.+ 20 Amun yaci like nga Ɲanmiɛn yoli’n i sacilɛ aliɛ ti.+ Ɔ ti su kɛ like kwlaa ti kpa, sanngɛ sɛ aliɛ wie dilɛ ti’n, sran wie lafiman Ɲanmiɛn su kpa kun’n, sɛ e di’n ɔ timan kpa mlɔnmlɔn.+ 21 Ɔ flunman kɛ nán e di nnɛn, annzɛ e nɔn nzan, annzɛ e yo like uflɛ m’ɔ kwla yo maan e niaan wie i ja kpla’n.+ 22 Maan like nga a lafi su’n ɔ ka a nin Ɲanmiɛn amun afiɛn. Sran nga like nga i klun jɔ su m’ɔ yo’n ti’n ɔ bumɛn i bɔbɔ i wun fɔ’n, i liɛ su ti ye. 23 Sanngɛ sɛ i akunndan’n ti nɲɔnnɲɔn naan ɔ di’n, nn w’a bu i wun fɔ lalaa, afin ɔ lafiman su kɛ like ng’ɔ yoli’n ti kpa. Nanwlɛ, like nga bé yó mɔ be lafiman su’n, ɔ ti sa tɛ.