Fluwa nga Pɔlu klɛli Galasifuɛ mun’n

2 Kɛ ɔ dili afuɛ blu-nin-nnan’n (14), e nin Baanabasi+ e ɔli Zerizalɛmun ekun. Kɛ ń kɔ́’n, n fali Titi.+ 2 Ndɛ kun fin ɲanmiɛn su lɔ toli min. I ti yɛ n ɔli-ɔ. Kɛ n juli lɔ’n, n kannin jasin fɛ nga n bo kle be nga be timan Zifu’n i ndɛ. M’an kɛnmɛn i sran kpanngban be ɲrun. Sanngɛ be nga be le ɲrun kpa’n be ngunmin yɛ n kan n kleli be-ɔ. I liɛ’n, sɛ like nga n boli i yolɛ bo mɔ n te yo’n timan kpa’n, ń wún i wlɛ. 3 Kannzɛ bɔbɔ Titi+ mɔ e nin i e ɔli’n ɔ ti Glɛki’n, sanngɛ sran fi w’a miɛnmɛn i kɛ ɔ wla klɛn.+ 4 Like nga ti yɛ ndɛ sɔ’n wa mɛnnin i wun su’n yɛle kɛ be nga be tɔn be wun suɛn kɛ be ti e niaan’n, be wa wluli asɔnun’n nun blɛlɛlɛ.+ Be waan bé sásá e naan bé sáci alaje+ nga e nin Klisi Zezi e di’n, naan e kaci be kanga mlɔnmlɔn.+ 5 Sanngɛ kɛ ɔ ko yo naan amun a tra ndɛ nanwlɛ mɔ yɛle jasin fɛ’n i kpa’n ti’n, y’a loman e wun y’a manman be kaan* sa bɔbɔ.+

6 Be nga be bu be kɛ be ti sran dan’n be liɛ’n,+ kannzɛ be ti sɛ ti sɛ laa’n, nán min ndɛ-ɔ. Afin nán sran i ɲrun waka’n yɛ Ɲanmiɛn nian-ɔn. Sran sɔ mɔ sran’m be bu be sran dan’n, b’a kanman ndɛ uflɛ b’a kleman min. 7 I kpa bɔbɔ’n, be wunnin kɛ wafa nga be sunmannin Piɛli kɛ ɔ ko bo jasin fɛ’n kle be nga be wlali be klɛn’n, i wafa kunngba’n yɛ be sunmannin min kusu kɛ n ko bo jasin fɛ’n n kle be nga b’a wlaman be klɛn’n niɔn.+ 8 Afin sran ng’ɔ tinnin Piɛli kɛ ɔ wɔ be nga be wlali be klɛn’n be sin’n, i kunngba’n yɛ ɔ tinnin min kɛ n wɔ be nga b’a wlaman be klɛn’n be sin-ɔn.+ 9 Kɛ Zaki+ nin Sefasi* nin Zan mɔ be ti kɛ asɔnun’n i su kpɛn mun sa’n* be wunnin kɛ Ɲanmiɛn yoli min ye dan’n,+ be sunmannin min nin Baanabasi+ e nun be kleli kɛ be nin e o nun. Ɔ maan e liɛ’n, é kɔ́ be nga be timan Zifu’n be sin. Kpɛkun be liɛ’n, bé kɔ́ be nga be wlali be klɛn’n be sin. 10 Ndɛ kunngba nga be kan kleli e’n yɛle kɛ nán maan e wla fi yalɛfuɛ’m be su. Kɛ ɔ fɛ i lɛ lele andɛ’n, i sɔ kusu yɛ n mian min ɲin n yo-ɔ.+

11 Kɛ Sefasi*+ bali Antiɔsu’n,+ n ijɔli i. Afin atin ng’ɔ fali’n timan kpa mlɔnmlɔn. 12 Yɛle kɛ i nun nga be nga Zaki+ sunmannin be’n be nin-a baman’n, Piɛli nin be nga be timan Zifu’n be di like.+ Sanngɛ kɛ be bali’n, ɔ nin be w’a diman like kun, kpɛkun be nga be wlali be klɛn’n be wun srɛ ti’n, ɔ cuɛnnin i wun.+ 13 Zifu onga’m be kusu be dili be fuka nɲɔn nun kɛ Piɛli sa. Be yoli sɔ lele maan Baanabasi bɔbɔ dili i fuka nɲɔn nun wie. 14 Ɔ maan n wunnin kɛ nán ndɛ nanwlɛ ng’ɔ o jasin fɛ’n nun’n i su yɛ be nanti-ɔ.+ I sɔ’n ti’n, be kwlaa be ɲrun lɛ’n n seli Sefasi* kɛ: “Wɔ mɔ a ti Zifu’n, ninnge nga be nga be timan Zifu’m be yo’n yɛ a yo-ɔ. A yoman ninnge nga Zifu’m be yo’n. ?Ɔ maan ngue ti yɛ a mian be nga be timan Zifu’m be kɛ be yo ninnge nga Zifu’m be yo’n niɔn?”+

15 E nga Zifu yɛ ɔ wuli e’n, mɔ e timan sa tɛ yofuɛ kɛ be nga be timan Zifu’n be sa’n, 16 e wun i wlɛ kɛ nán sran ng’ɔ fa mmla’n su’n yɛ Ɲanmiɛn bu i sran kpa-ɔ. Sanngɛ sran ng’ɔ lafi+ Zezi Klisi+ su’n, yɛ Ɲanmiɛn bu i sran kpa-ɔ. I sɔ’n ti yɛ e lafi Klisi Zezi su’n niɔn. I liɛ’n, nán mmla’n su yɛ Ɲanmiɛn jrán bú e sran kpa-ɔ. Sanngɛ Klisi su mɔ e lafi’n, i su yɛ Ɲanmiɛn jrán bú e sran kpa-ɔ. Afin nán mmla mɔ sran kun nanti su’n, i ti yɛ Ɲanmiɛn bú i sran kpa-ɔ.+ 17 ?Sɛ kusu be bu e sa tɛ yofuɛ sanngɛ nn e su kunndɛ kɛ Ɲanmiɛn bu e sran kpa Klisi dunman nun’n, i sɔ’n kle kɛ Klisi su e bo kɛ e yo sa tɛ? Ɔ timan sɔ mlɔnmlɔn! 18 Ninnge nga n bubuli be laa’n, sɛ n kplan be ekun’n, nn n su kle kɛ n ti sa tɛ yofuɛ. 19 Afin mmla’n i dunman nun ti’n, n wuli+ naan Ɲanmiɛn i dunman nun’n, n ɲan nguan. 20 Be boboli min nin Klisi waka’n su.+ Ɔ maan olɛ nga n wo yɛ’n, nán min bɔbɔ min olɛ yɛ n wo-ɔ.+ Sanngɛ Klisi yɛ ɔ nin min o nun-ɔn. I kpa bɔbɔ’n, kɛ mɔ n lafi Ɲanmiɛn i Wa’n su’n, i ti yɛ n wo nguan nun mɔ n kwla yo ninnge mun-ɔn.+ Afin ɔ kloli min, yɛ min ti’n ɔ fɛli i wun mannin.+ 21 I sɔ’n ti’n, n kwlá kpaloman Ɲanmiɛn i aklunye’n.+ Afin sɛ ɔ ti kɛ mmla’n su yɛ be jran be bu sran kun i sran kpa’n, nn Klisi i wulɛ ng’ɔ wuli’n ti ngbɛn.+