Fluwa klikli nga Pɔlu klɛli Tesalonikifuɛ mun’n

1 Min Pɔlu mɔ min nin Silvɛn*+ nin Timote+ e o wa’n, é fá fluwa nga é blɛ́ amun mɔ amun o Tesaloniki lɔ asɔnun’n nun’n, mɔ amun nin e Si Ɲanmiɛn nin e Min Zezi Klisi be o nun’n:

Maan amun liɛ yo ye, yɛ maan amun di fɔundi.

2 Kɛ é srɛ́ Ɲanmiɛn mɔ e wla kpɛn amun kwlaa amun su’n, e lɛ i ase titi.+ 3 Afin e Si Ɲanmiɛn ɲrun’n, amun dili junman kpa i su mɔ amun lafi’n ti. Amun dili junman kekle kpa klolɛ su, yɛ e Min Zezi Klisi mɔ amun fali amun wla guɛli i su’n ti’n,+ amun jrannin kekle. E wla te kpɛn i kwlaa sɔ’n su. 4 Aniaan mun, Ɲanmiɛn klo amun. E si kɛ ɔ fali amun yoli i liɛ, 5 afin jasin fɛ nga e bo kleli amun’n, w’a yoman ngbɛn, sanngɛ ɔ ɲannin ta dan. Ɲanmiɛn wawɛ’n yoli abonuan sa mun ukali ndɛ nga e kannin’n su, yɛ e lafi su kpa kɛ ndɛ nga e kan’n ti nanwlɛ. Kpɛkun kɛ e o amun wun lɔ’n, like nga e yoli’n, amun si kɛ amun kpa yolɛ ti yɛ e yoli-ɔ. 6 Ɔ maan amun niannin like nga e yoli’n su,+ amun yoli wie. Yɛ amun niannin e Min’n i liɛ’n su wie.+ Afin e wunnin kɛ kannzɛ kekle o amun su’n, sanngɛ Ɲanmiɛn wawɛ’n yoli maan amun dili aklunjɔɛ, kpɛkun amun sɔli ndɛ’n nun klanman.+ 7 I sɔ’n ti’n, e Min’n i sɔnnzɔnfuɛ nga be o Maseduanin nin Akai lɔ’n be yo kɛ amun sa wie.

8 Zoova* i ndɛ mɔ amun kannin’n, ɔ juli Maseduanin nin Akai lɔ. Sanngɛ nán lɔ ngunmin-ɔn. Ɲanmiɛn su mɔ amun lafi’n i su ndɛ’n w’a tru lika kwlaa.+ Ɔ maan e leman ndɛ fi e kanman. 9 Afin be kan kpɛ klikli nga e nin amun e wunnin e wun’n i ndɛ titi. Yɛ be kan wafa nga amun kacili amun sin sili amun amuin mun+ mɔ siɛn’n amun di junman kekle man Ɲanmiɛn Kpli m’ɔ lafiman’n i ndɛ wie. 10 Amun yoli sɔ naan amún mínndɛ i Wa m’ɔ fin ɲanmiɛn su lɔ+ m’ɔ cɛnnin i’n. I yɛ be flɛ i Zezi’n niɔn. Ɔ de e Ɲanmiɛn i ya ng’ɔ su ba’n i sa nun.+