Rɔmunfuɛ Mun

13 Maan sran’m be kwlaa be ɲin yi mɛn siefuɛ mun.+ Afin Ɲanmiɛn ti yɛ mɛn siefuɛ’m be o lɛ-ɔ.+ Mɛn siefuɛ nga be o lɛ bɔbɔ’n, Ɲanmiɛn yɛ maan be le kwlalɛ kan nga be le i’n niɔn.+ 2 I sɔ’n ti’n, sran ng’ɔ jaso be wun’n, nn w’a tanndan like nga Ɲanmiɛn bɔbɔ siesieli’n i ɲrun. Kusu be nga be tanndan like nga Ɲanmiɛn siesieli’n i ɲrun’n, bé tú be fɔ. 3 Afin mɛn siefuɛ sɔ’m be ti’n, sran’m be klun titi be. Sanngɛ nán be nga be yo sa kpa’n be yɛ be klun titi be-ɔ, be nga be yo sa tɛ mun-ɔn.+ ?A kunndɛman kɛ ɔ klun titi wɔ mɛn siefuɛ’m be ti? Sɛ ɔ ti sɔ’n, yo sa ng’ɔ ti kpa’n titi,+ i liɛ’n, bé yí wɔ ayɛ. 4 Afin be ti Ɲanmiɛn i junman difuɛ, yɛ be yo amun ye. Sanngɛ sɛ amun yo like ng’ɔ ti tɛ’n, maan amun klun titi amun. Afin nán ngbɛn ti yɛ tokofi o be sa nun-ɔn. Be ti Ɲanmiɛn i junman difuɛ, be ti klunngbɔ tufuɛ, yɛle kɛ be tu be nga be yo sa tɛ’n be fɔ.

5 Ɔ maan ɔ ti cinnjin kpa kɛ amun ɲin yi be. Nán fɔ nga be kwla tu sran’n i ngunmin ti-ɔ, sanngɛ kusu amun klun akunndan’n ti-ɔ.+ 6 I sɔ’n kusu ti yɛ amun su lapo’n niɔn. Afin be ti Ɲanmiɛn i junman difuɛ, yɛ be di junman sɔ’n titi be man sran kwlakwla. 7 Be kwlaa nga be kunndɛ kɛ amun yo like man be’n, amun yo man be. Sran nga i waan amun su lapo’n, amun su.+ Sran nga i waan amun yi sika kekle nun’n, amun yi. Sran nga i waan amun sro i’n, amun sro i.+ Sran nga i waan amun yi i ayɛ’n, amun yi i ayɛ.+

8 Sɛ w’a yoman kɛ amun wiengu klolɛ sa’n,+ nán maan sran fi i kalɛ tran amun su. Afin sran ng’ɔ klo i wiengu’n, nn w’a wie mmla’n su fa.+ 9 Afin mmla’n se kɛ “Nán kunndɛ bla ɔ yi bo annzɛ bian ɔ wun bo,+ nán kun sran,+ nán wua,+ nán ɔ ɲin blo sran like su.”+ Be kwla bo mmla sɔ mun nin mmla onga mun be kwlaa be kpɔlɛ se kɛ: “Klo ɔ wiengu kɛ a fa klo ɔ bɔbɔ wun’n sa.”+ 10 Sran ng’ɔ klo sran’n, ɔ yomɛn i wiengu tɛ.+ I sɔ’n ti’n, sran ng’ɔ klo sran’n, w’a wie mmla’n su fa.+

11 Maan amun yo sɔ, afin amun si blɛ nga e o nun’n. Yɛle kɛ amun si kɛ blɛ ng’ɔ fata kɛ amun tinnge’n w’a ju.+ Afin e delɛ blɛ’n w’a mantan koko w’a tra i nun nga e boli Ɲanmiɛn i su lafilɛ bo’n. 12 Lika’n w’a ɔ mmua, yɛ aliɛ su wa cɛn. I sɔ’n ti’n, maan e wla sa nga be yo be aosin nun’n be ase,+ yɛ e wla alɛ ninnge nga be fa kun alɛ wia nun’n.+ 13 Maan e nanti klanman+ kɛ e o wia nun sa. Nán maan e fa e wun e wla cɛn mɔ be di be sinnzin su’n be nun, nán maan e yo nzanbɔɛfuɛ, nán maan e yo bla nin bian kunndɛfuɛ, nán maan e fa e wun e wla ɲin kekle ayeliɛ’m* be nun,+ nán maan e di utre, nán maan e ɲin ci sran.+ 14 Sanngɛ maan amun nzuɛn’n fa e Min Zezi Klisi i liɛ’n,*+ yɛ nán amun bu ninnge nga klɔ sran konvi sɔ be’n be yolɛ’n i akunndan be sie.+