Fluwa nɲɔn su nga Pɔlu klɛli Korɛntifuɛ mun’n

12 Ɔ fata kɛ n di min nuan. Kannzɛ ɔ su yoman sa fi ye’n, sanngɛ ń má kán ninnge nga e Min’n maan n wunnin be aolia nun’n,+ ɔ nin ng’ɔ yili be nglo kleli min’n be ndɛ.+ 2 N si bian kun, ɔ nin Klisi be o nun. I afuɛ blu-nin-nnan (14) yɛ, be fɛ i ɔli ɲanmiɛn’n i nsan su’n i su lɔ. Sɛ i wunnɛn’n yɛ ɔ fa ɔli-o, sɛ nɛ́n i wunnɛn’n yɛ ɔ fa ɔli-o, n siman nun. Ɲanmiɛn yɛ ɔ si nun-ɔn. 3 N si bian sɔ’n. Sanngɛ sɛ i wunnɛn’n yɛ ɔ fa ɔli-o, sɛ nɛ́n i wunnɛn’n yɛ ɔ fa ɔli-o, n siman nun. Ɲanmiɛn yɛ ɔ si nun-ɔn. 4 Be fɛ i ɔli mɛn klanman’n nun lɔ. Ɔ tili ndɛ nga be kwlá kanman be’n mɔ kusu ɔ fataman kɛ sran kan’n. 5 Sran kɛ ngalɛ’n sa’n yɛ ń fá dí min nuan-ɔn. Sanngɛ n su faman wafa nga n ti’n n diman min nuan, saan min fakafaka mɔ n ti’n, yɛ ń fá dí min nuan-ɔn. 6 Sɛ min waan ń dí min nuan bɔbɔ’n, n su yoman sinnglinfuɛ, afin ń dí nanwlɛ. Sanngɛ n su yoman sɔ. Afin n kunndɛman kɛ sran wie blɔ like nga n yo’n, annzɛ ndɛ nga n kan’n 7 abonuan ninnge mɔ Ɲanmiɛn yili be nglo kleli min’n be ti.

Kɛ ɔ ko yo naan m’an tuman min wun dan’n ti’n, be fali owie kun wlali min kplo’n nun.+ Ɔ ti i liɛ kɛ Satan i anzi kun yɛ ɔ bo min titi sa. Ɔ yo sɔ naan m’an tuman min wun. 8 N srɛli e Min’n kpɛ nsan kɛ ɔ yo naan like sɔ’n jaso min su. 9 Sanngɛ ɔ seli min kɛ: “Ye dan nga n yo wɔ’n, ɔ ju wɔ. Afin kɛ sran kun leman wunmiɛn’n i nun yɛ n kle kɛ min tinmin’n cɛnnin-ɔn.”+ I sɔ’n ti’n, ń fá min wunmiɛn mɔ n lemɛn i’n, ń dí min nuan kpa. Ń yó sɔ naan Klisi i wunmiɛn’n kata min su kɛ tannin sua sa titi. 10 Ɔ maan sɛ Klisi ti’n wunmiɛn wie min nun’n, annzɛ be kpɛ min nzowa’n, annzɛ min sa mian’n, annzɛ sran’m be kle min ɲrɛnnɛn’n, annzɛ sa kekle tɔ min su’n, n klun ti jɔwa. Afin kɛ n ti fakafaka’n, i sɔ’n nun yɛ n le wunmiɛn kpa-ɔ.+

11 Amun dunman nun ti’n, m’an kaci sinnglinfuɛ. Afin ɔ fata kɛ amun kan min wun ndɛ kpa. Yɛle kɛ kannzɛ bɔbɔ n timan like fi’n, m’an yoman sa fi m’ɔ kle kɛ amun akoto ngblingbli’m be kpa tra min-ɔn.+ 12 Nanwlɛ, n trali min awlɛn tankaan kpa+ n yoli ninnge wie mɔ be kle kɛ n ti akoto’n amun ɲrun lɛ. Afin an wunnin abonuan sa mun, ɔ nin sa kekleekle nga n yoli’n.+ 13 ?Ngue yɛ n yo mannin asɔnun nga mun mɔ m’an yoman wie m’an manman amun-ɔn? Saan trɔ mɔ m’an kaciman amun ti su’n i cɛ.+ Maan amun yaci sa sɔ’n be cɛ min klun ufue su.

14 Amun nian! I kpɛ nsan su nga n su wa kɔ amun wun lɔ’n yɛ ɔ o yɛ. Sanngɛ n su kaciman amun ti su trɔ. Afin nán amun ninnge’m be ti yɛ n kɔ-ɔ.+ Sanngɛ amun bɔbɔ amun ti yɛ n kɔ-ɔ. Afin nán ba kanngan mun+ yɛ ɔ fata kɛ be kunndɛ ninnge be sie be si nin be nin mun-ɔn. Sanngɛ siɛ nin niɛn mun yɛ ɔ fata kɛ be kunndɛ ninnge be sie be mma mun-ɔn. 15 Min liɛ’n, n klo kpa kɛ ń fá min sa nun ninnge mun ń úka amun naan ń fá min wun nánnán su ń mán amun.+ ?Yɛ sɛ n klo amun dan sɔ’n niɔn, ngue ti yɛ amun liɛ’n amun kloman min kpa-ɔ? 16 I kwlaa yoli-o, m’an kaciman trɔ amun ti su.+ Ɔ nin i sɔ ngba’n, amun se kɛ n yoli “gblɛfuɛ” naan n “suali amun wun aya” n trali amun. 17 M’an seman sran nga n sunmannin be amun sin lɔ’n be nun wie fi kɛ ɔ se amun kɛ amun fa amun sa nun ninnge’m be man min. ?Ɔ timan sɔ? 18 N seli Titi kɛ ɔ ko wun amun wun. Yɛ n seli aniaan kun kɛ ɔ ko sunmɛn i. ?Kɛ Titi juli lɔ’n, ɔ fali amun sa nun like?+ ?Nán akunndan kunngba’n yɛ e buli-ɔ? ?Nán ajalɛ kunngba’n yɛ e fali-ɔ?

19 ?Amun bu i kɛ ndɛ kwlaa nga e kɛnnin i lele w’a fa ju yɛ’n, e su fa kpli e ti amun ɲrun? Nɛ́n i sɔ-ɔ. Afin Ɲanmiɛn ɲrun yɛ e kan e ndɛ’n niɔn, kpɛkun e nin Klisi e o nun. Sanngɛ e niaan kpa mun, like kwlaa nga é yó i lɛ’n, amun bɔbɔ amun kpa yolɛ ti yɛ e yo-ɔ. 20 Sanngɛ srɛ kun min. Yɛle kɛ atrɛkpa’n, sɛ n ju lɔ’n amún wún kɛ n timan kɛ nga amun fa sunnzunnin’n sa, yɛ n kusu ń wún kɛ amun timan kɛ nga n fa sunnzunnin’n sa. Afin atrɛkpa’n, amun di utre, amun ɲin ci amun wiengu, amun fa amun wiengu wun ya, amun afiɛn sɛman, amun saci amun wiengu wun, amun kan amun wiengu wun ndɛ,* amun tu amun wun, kpɛkun lika’n ti woyowoyo. 21 Atrɛkpa’n, kɛ ń má jú amun wun lɔ’n, Ɲanmiɛn wá gúa min ɲin ase amun ɲrun. Kpɛkun be nga be yoli sa tɛ laa’n, ń sún gúa be nun sunman mɔ b’a kaciman be akunndan’n be wun. Afin b’a yaciman ninnge kainkain mun nin bla nin bian kunndɛlɛ sukusuku nin i wunsu ɲannzuɛn sa’m* be yolɛ, yɛ kusu b’a yaciman ɲin kekle ayeliɛ mun.*