Zɔbu
30 “Be mɔ n ti kpɛnngbɛn tra be’n
be yɛ be srisri min+ siɛn’n niɔn,
kusu nn n su kplinman su le kɛ ń fá be si mun
naan be uka alua nga be nian min nnɛn’m be su’n.
2 ?Wunmiɛn nga be le i’n, ngue yɛ n fa yoli-ɔ?
Be leman wunmiɛn kun.
3 Yalɛ’n nin awe’n ti’n, b’a yo fakafaka kpa.
Be didi asiɛ kee’n,
kusu nn like fi nunman su, ɔ nannan lɛ ngbɛn.
4 Be kɔ blo lɔ be ko isa ijre ng’ɔ ti yrayra’n.
Waka nga be flɛ i zenɛ’n i olui’n yɛ ɔ ti be aliɛ-ɔ.
5 Be kan be bo sran’m be afiɛn.+
Sran’m be kpan be su kɛ be su kpan awiefuɛ su sa.
6 Be tran kongo’m be ndroliɛ’m be nun,
nin kunman’m be nun, nin yɔbuɛ buɛ’m be nun.
7 Be o ijre’m be afiɛn lɔ yɛ be kpan-ɔn,
be tian be wiengu su ijre tɛtɛ’m be afiɛn lɔ.
8 Be kannin be bo nvle’n nun,
afin be ti sinnglinfuɛ nin finfinfuɛ’m* be mma mun.
10 Be kpɔ min, yɛ be faman be wun mantanman min.+
Be sisiman be bo naan b’a ti be nuan nzue b’a ta min ɲrun’n nun.+
11 Kɛ mɔ Ɲanmiɛn deli like nga n fa sasa min wun’n,* m’ɔ kuakuali min’n ti’n,
kɛ be wun min’n, like nga be waan bé yó min’n be sisiman be bo naan b’a yo.
12 Be fin min fama su be ba sa woo kɛ sran kpanngban wie mɔ b’a bu min wun akunndan tɛ’n sa.
Be yo maan n wanndi,
kpɛkun be fa ninnge nga be kwla yo min abɔlɛ’n siesie min atin’n su.
14 Be ba kɛ talɛ’n i toklo dan wie nun yɛ be su sin sa,
be wanndi kɔ lika ng’ɔ sacili’n i afiɛn lɔ.
15 Srɛ dan kpa kun min.
Min aɲrunɲan’n w’a ɔ kɛ like wie m’ɔ aunmuan’n fɛ i ɔli’n sa,
yɛ like nga n fa min wla n gua su’n nunman lɛ kun, kɛ ɲanmiɛn ble’n sa.
18 Be fali wunmiɛn dan kpa be wɔnsɔnwɔnsɔnnin min tralɛ’n.*
Kɛ min tralɛ’n i kɔmin nun’n sa’n, ɔ mian min fii.
19 Ɲanmiɛn to min yili nnɔtiɛ’n nun.
M’an yo kɛ ndutre nin nzuɛn sa.
20 N kpan flɛ ɔ kɛ a uka min, sanngɛ a tɛman min su.+
N jaso jran nglo, sanngɛ a nian min sa doo.
22 A man min su, yɛ a fa min kɔ aunmuan’n nun.
A fa aunmuan dan’n kpalokpalo min.*
23 Afin n si kɛ á fá min kɔ́ wie’n i sin,
sua nga i nun yɛ be kwlaa nga be ɲin o su’n be ti wá yía lɔ’n nun.
25 ?Be nga sa kekle tɔli be su’n* be ti’n m’an sunman?
?Yalɛfuɛ’n i liɛ’n ti’n, m’an tranman awlabɔɛ’n nun?+
26 N buli i kɛ lika’n yó kpa, sanngɛ ɔ yoli tɛ.
N buli i kɛ lika’n kpája, sanngɛ aosin’n yɛ ɔ bali-ɔ.
27 Akluntitiɛ’n nun yɛ n wo sa trilili-ɔ.
Afɛ’n yɛ ɔ wo min su cɛn kwlakwla-ɔ.
28 Awlabɔɛ’n nun yɛ n nanti n sin-ɔn.+ Wia’n fiteman.
Kɛ sran’m be yia lɛ’n, n jaso, kpɛkun n kpan kɛ be de min.
29 M’an kaci blo alua’m be niaan,
yɛ m’an kaci klɔnsoklo’n i wa bla’m be janvuɛ.+
30 Min wunnɛn kplo’n w’a lu sa tuun, yɛ ɔ tutu.+
Min owie’m be nun’n yra min fiaan, lika m’ɔ lo’n ti.*
31 Kɛ bé yó sɛ’n, min jru’n yɛ be bo-ɔ,
yɛ kɛ bé sún’n, min blo’n yɛ be bo-ɔ.