2 Famiɛn Mun

20 Blɛ sɔ’n nun’n, Ezekiasi tɔli tukpacɛ kekle kpa, ɔ timan nguan liɛ.+ Amɔzu i wa Ezai m’ɔ ti Ɲanmiɛn nuan ijɔfuɛ’n bali wa seli i kɛ: “Ndɛ nga Zoova kan’n yɛ: ‘Siesie ɔ aja’n afin á wú, a su yoman juejue.’”+ 2 Kɛ ɔ yoli sɔ’n ɔ kpɛli i ɲin talɛ’n su lɔ, yɛ ɔ boli Zoova srɛlɛ bo-ɔ. Ɔ seli kɛ: 3 “Ee Zoova, ń srɛ́ wɔ kpa, yaci, maan ɔ wla kpɛn su kɛ e nin wɔ e nantili klanman, n fali min awlɛn’n kwlaa n suli wɔ, yɛ n yoli sa ng’ɔ ti kpa ɔ ɲrun’n.”+ Kpɛkun Ezekiasi sunnin sunlɛ kpa.

4 Kɛ Ezai fiteli’n, w’a juman awlo’n i afiɛn bɔbɔ, kpɛkun Zoova seli i kɛ:+ 5 “Sa ɔ sin naan ko se Ezekiasi m’ɔ ti min nvle’n i ɲrun dinfuɛ’n kɛ: ‘Ndɛ nga Zoova m’ɔ ti ɔ nannan Davidi i Ɲanmiɛn’n kan’n yɛ: “N tili ɔ srɛlɛ’n, n wunnin ɔ ɲinmuɛn’n,+ ɔ maan ń má yó ɔ juejue.+ Kɛ cɛn nsan ko sin’n, á wá sá ɔ sin Zoova i sua’n nun lɔ.+ 6 Ń má úka ɔ nguan’n su afuɛ blu-nin-nnun (15). Ń má dé wɔ nin klɔ nga, Asiri famiɛn’n i sa nun.+ Ń má kplí nvle nga i ti, min bɔbɔ min dunman nun nin min sufuɛ Davidi i dunman nun.”’”+

7 I sin’n Ezai seli kɛ: “Amun fa figie mma kee gato kun be bla.” Ɔ maan be fa blɛli i, yɛ ɔ fa tali yra’n su. Kɛ ɔ yoli sɔ’n, famiɛn’n yoli juejue blɛblɛblɛ.+

8 Ezekiasi dun mmua usali Ezai kɛ: “?Nzɔliɛ benin+ yɛ ɔ́ klé kɛ Zoova wá yó min juejue, naan kɛ cɛn nsan ko sin’n, ń má sá min sin Zoova i sua’n nun lɔ-ɔ?” 9 Ezai tɛli i su kɛ: “Nzɔliɛ ng’ɔ fin Zoova m’ɔ́ klé wɔ kɛ Zoova wá yía ndɛ ng’ɔ kannin’n i nuan’n yɛ: ?A kunndɛ kɛ fɔnvɔ’n fu asikalie’n su lele naan ɔ ju kan be tiatia lɛ’n i blu su’n su lɔ? ?Annzɛ a kunndɛ kɛ ɔ jra lele ju kan be tiatia lɛ’n i blu su’n su?”+ 10 Ezekiasi seli kɛ: “Kɛ fɔnvɔ’n fu asikalie’n su lele naan ɔ ju kan be tiatia lɛ’n i blu su’n su lɔ’n, ɔ ti pɔpɔ. Sanngɛ kɛ ɔ sɛ i sin lele ju kan be tiatia lɛ’n i blu su’n su’n, ɔ ti kekle.” 11 Ɔ maan Ɲanmiɛn nuan ijɔfuɛ Ezai srɛli Zoova. Yɛ Ɲanmiɛn yoli maan Akazi i asikalie’n su fɔnvɔ mɔ w’a dun mmua w’a jra’n, ɔ sɛli i sin lele juli asikalie’n i lika nga be tiatia lɛ’n i blu su’n su.+

12 Blɛ sɔ’n nun’n, Baladan i wa Berodaki-Baladan m’ɔ ti Babilɔnin famiɛn’n, ɔ klɛli fluwa ko mannin Ezekiasi, yɛ ɔ cɛli i like, afin ɔ tili i kɛ i wunnɛn yoli i ya.+ 13 Ezekiasi sɔli be nun,* yɛ ɔ fali ninnge kwlaa nga be o i ninnge kpakpa’m be siewlɛ’n nun’n kleli be.+ Ɔ fali sika, nin sika ɔkwlɛ, nin bomie ngo, nin ngo kpakpa uflɛ wie mun, nin i alɛ kunlɛ ninnge mun, nin ninnge kwlaa nga be o i ninnge kpakpa’m be siewlɛ’m be nun’n kleli be. Ezekiasi i sua’n* nin i famiɛn diwlɛ’n be nun ninnge wie fi nunman lɛ mɔ w’a fa kleman be-ɔ.

14 I sin’n, Ɲanmiɛn nuan ijɔfuɛ Ezai wa wunnin Famiɛn Ezekiasi wun. Ɔ usɛli i kɛ: “?Sran sɔ’m be waan nzɛ? ?Yɛ nin yɛ be fin-ɔn?” Ezekiasi tɛli su kɛ: “Be fin mɛn kun m’ɔ o mmua kpa’n nun, be fin Babilɔnin.”+ 15 I sin’n ɔ usɛli i kɛ: “?Ngue yɛ be wunnin i ɔ sua’n* nun-ɔn?” Ezekiasi tɛli su kɛ: “Be wunnin min sua’n* nun ninnge’m be kwlaa. Min ninnge kpakpa’m be siewlɛ’m be nun like fi nunman lɛ mɔ m’an fa kleman be-ɔ.”

16 Yɛ Ezai seli Ezekiasi kɛ: “Ndɛ nga Zoova kan’n yɛ:+ 17 ‘Nian! Blɛ wie wá jú’n, ninnge kwlaa nga be o ɔ sua’n* nun’n, ɔ nin ninnge kwlaa nga ɔ nannan’m be tiantiannin be nuan lele mɔ w’a fa ju andɛ’n, bé fá be kɔ́ Babilɔnin.+ Like fi su kaman lɛ.’ Zoova yɛ ɔ kan sɔ-ɔ. 18 ‘Kpɛkun bé trá ɔ bɔbɔ ɔ mma mun be nun wie mun kɔ́,+ yɛ bé káci Babilɔnin famiɛn’n i awlo’n nun junman difuɛ.’”+

19 Kɛ ɔ yoli sɔ’n, Ezekiasi tɛli su kɛ: “Zoova i nuan ndɛ nga a kɛnnin i lɛ’n ɔ ti kpa.”+ Yɛ ɔ kan guali su kɛ: “Sɛ min ɲin su’n,* fɔundi’n* nin alaje’n be tran lɛ’n, ɔ ti kpa.”+

20 Ezekiasi i su ndɛ’n i onga’n, i kwlalɛ’n, ɔ nin wafa ng’ɔ kpɛli nzue guawlɛ’n+ nin nzue mmuɛ m’ɔ yoli naan w’a fa nzue w’a ba klɔ’n nun’n,+ be klɛli be fluwa ng’ɔ kan Zida famiɛn’m be ndɛ’n i nun. 21 I sin’n, Ezekiasi wuli.*+ Kpɛkun i wa Manase+ sinnin i osu kacili famiɛn.+