Rɔmunfuɛ Mun
4 ?Kɛ m’ɔ ti sɔ’n niɔn, é kán e nannan Abraamun i liɛ’n, é sé sɛ? ?Ngue yɛ ɔ ɲɛnnin i-ɔ? 2 Afin sɛ ɔ ti kɛ sa kpa nga Abraamun yoli be’n be ti yɛ Ɲanmiɛn buli i sran kpa’n, nn ɔ kwla se kɛ ɔ́ fɛ́ i sɔ’n dí i nuan. Sanngɛ nán Ɲanmiɛn i ɲrun yɛ ɔ́ dí i nuan-ɔn. 3 ?Ngue ndɛ yɛ Ɲanmiɛn ndɛ’n kan-ɔn? Ɔ se kɛ: “Abraamun lafili Zoova* su, yɛ i sɔ’n ti’n, ɔ buli i sran kpa.”+ 4 Sɛ sran kun di junman naan be tuɛ i kalɛ’n, i sɔ’n timɛn i ye yolɛ. Afin i bɔbɔ i like yɛ be fa mɛnnin i-ɔ.* 5 Kusu sran ng’ɔ yoman sa kpa mɔ sanngɛ ɔ lafi Sran ng’ɔ bu sa tɛ yofuɛ’n i sran kpa’n i su’n, i su m’ɔ lafi’n ti’n, be bu i sran kpa.+ 6 I wafa kunngba’n, sran nga Ɲanmiɛn niɛnmɛn i ayeliɛ’n su naan w’a bu i sran kpa’n, Davidi kannin aklunjɔɛ nga i sɔfuɛ’n di’n i ndɛ. Ɔ seli kɛ: 7 “Be nga be yacili be fɔnlɛ mun cɛli be’n, mɔ be katali be sa tɛ’m be su’n,* be liɛ su ti ye. 8 Sran nga Zoova* fɛmɛn i wun sa siemɛn i klun’n, i liɛ su ti ye.”+
9 ?Be nga be wlali be klɛn’n, be ngunmin yɛ be liɛ su ti ye-ɔ? ?Annzɛ be nga b’a wlaman be klɛn’n be liɛ su ti ye wie?+ Afin e se kɛ: “Ɲanmiɛn su mɔ Abraamun lafili’n ti’n, be buli i sran kpa.”+ 10 ?Blɛ onin nun yɛ be buli i sran kpa-ɔ? ?I nun nga be wlɛli i klɛn’n niɔn? ?Annzɛ i nun nga be nin-a wlɛmɛn i klɛn’n niɔn? Kɛ Ɲanmiɛn bú i sran kpa’n, nn be nin-a wlɛmɛn i klɛn. 11 Yɛ i nun nga be nin-a wlɛmɛn i klɛn’n, Ɲanmiɛn mɛnnin i nzɔliɛ like kun.+ Nzɔliɛ like sɔ’n, yɛle klɛn wlalɛ m’ɔ kle kɛ Ɲanmiɛn su m’ɔ lafi’n ti’n, Ɲanmiɛn dun mmua buli i sran kpa ka naan b’a wlɛ i klɛn’n. I liɛ’n, ɔ́ yó be nga b’a wlaman be klɛn mɔ be lafi Ɲanmiɛn su’n be si,+ naan Ɲanmiɛn bu be sran kpa. 12 Kpɛkun ɔ́ yó be nga be wlali be klɛn’n be si. Sanngɛ nán be ngunmin yɛ ɔ́ yó be si-ɔ. Be nga be lafi Ɲanmiɛn su kɛ e si Abraamun+ mɔ kɛ ɔ́ láfi Ɲanmiɛn su’n nn be nin-a wlɛmɛn i klɛn’n sa’n, ɔ́ yó be si wie.
13 Afin nán mmla mɔ Abraamun di su’n ti yɛ Ɲanmiɛn tɛli i nda kɛ ɔ́ fá mɛn kun mɛ́n i naan ɔ yo i liɛ-ɔ. Nɛ́n i sɔ’n kusu ti yɛ ɔ tali i mma’m be nda kɛ ɔ́ fá mɛn kun mán be naan ɔ yo be liɛ-ɔ.+ Sanngɛ Ɲanmiɛn su m’ɔ lafi’n, mɔ i sɔ’n ti’n ɔ buli i sran kpa’n, i ti-ɔ.+ 14 Afin sɛ be nga be di mmla’n su’n yɛ be ti aja difuɛ’n, nn Ɲanmiɛn sulafilɛ’n ti ngbɛn, yɛ nda nga Ɲanmiɛn tali’n ɔ tɛli i ngbɛn. 15 Mmla’n yɛ maan sran kun Ɲanmiɛn i ya-ɔ.+ Sanngɛ sɛ mmla nunman lɛ’n, be su kanman mmla fɔnlɛ ndɛ.+
16 I sɔ’n ti yɛ like nga Ɲanmiɛn seli kɛ ɔ́ fá mán Abraamun’n, i su m’ɔ lafi’n ti yɛ ɔ fa mɛnnin i’n niɔn. I aklunye dan’n+ ti yɛ ɔ yoli sɔ-ɔ. I liɛ’n, like nga i waan ɔ́ fá mɛ́n i’n, ɔ́ yó i mma’m be kwlaa be liɛ sakpa.+ Nɛ́n i mma nga be di Mmla’n su’n be ngunmin yɛ ɔ́ fá mán be-ɔ. Sanngɛ be nga be lafi Ɲanmiɛn su kɛ Abraamun m’ɔ ti e kwlaa e si’n fa lafili Ɲanmiɛn su’n sa’n, ɔ́ fá mán be wie.+ 17 (Ɔ ti kɛ nga be fa klɛli’n sa sɛsɛsɛ. Be klɛli i kɛ: “N fali wɔ kɛ a yo nvle kpanngban nunfuɛ’m be si.”)+ Sa sɔ’n yoli Ɲanmiɛn mɔ Abraamun lafili i su’n i ɲrun. I yɛ ɔ cɛn be nga be wuli’n niɔn. Kpɛkun i yɛ ɔ bo ninnge nga be nunman lɛ’n be dunman kɛ be o lɛ sa’n niɔn.* 18 Abraamun lafiman su kɛ ɔ kwla wu ba. Ɔ nin i sɔ ngba’n ndɛ nga be fa cicili i wla’n ti’n, ɔ lafili su kɛ ɔ́ káci nvle kpanngban be si kɛ nga Ɲanmiɛn fa kannin’n sa. Ɔ seli i kɛ: “Kɛ ɔ osu’n nunfuɛ’m bé wá sɔ́n kɛ ngalɛ’n sa.”+ 19 Kannzɛ wafa ng’ɔ lafi Ɲanmiɛn su’n w’a kanman ase’n, sanngɛ ɔ buli i bɔbɔ i wun kɛ sran mɔ w’a wu’n sa (afin kɛ ɔ́ yó sɔ’n, nn ɔ le afuɛ kɔe ya),+ yɛ ɔ buli i kɛ Sara su kwlá wuman ba.+ 20 Ɔ nin i sɔ ngba’n, ndɛ nga Ɲanmiɛn kan kleli i’n ti’n, i akunndan’n w’a yoman nɲɔnnɲɔn. Sanngɛ Ɲanmiɛn su m’ɔ lafi’n ti’n, ɔ ɲannin wunmiɛn, ɔ maan Ɲanmiɛn ɲannin ɲrun. 21 Kpɛkun ɔ lafili su kpa kɛ ndɛ nga Ɲanmiɛn kɛnnin i laa’n, saan ɔ́ yíɛ i nuan.+ 22 I sɔ’n ti’n, “Ɲanmiɛn buli i sran kpa.”+
23 “Ɲanmiɛn buli i sran kpa” nga be klɛli i lɛ’n, nɛ́n i ngunmin ti yɛ be klɛli-ɔ.+ 24 E kusu mɔ Ɲanmiɛn wá bú e sran kpa’n, e liɛ wie ti yɛ be klɛli ndɛ’n sɔ’n niɔn. Afin e lafi Sran ng’ɔ cɛnnin e Min Zezi’n i su wie.+ 25 Sa tɛ nga e yoli’n ti’n,+ Ɲanmiɛn fɛli i mannin. Yɛ kɛ ɔ ko yo naan Ɲanmiɛn w’a bu e sran kpa’n ti’n, ɔ cɛnnin i.+