Nga Pɔlu klɛli Efɛzifuɛ mun’n

1 Min Pɔlu mɔ Ɲanmiɛn dunman nun’n n ti Klisi Zezi i akoto’n, ń klɛ́ ndɛ nga ń blɛ́ amun mɔ amun ti Ɲanmiɛn i sran mɔ amun o Efɛzi lɔ’n,+ mɔ amun nin Klisi Zezi be o nun titi’n.

2 Maan e Si Ɲanmiɛn nin e Min Zezi Klisi be yo amun ye, yɛ maan be yo naan amun di fɔundi.

3 Maan manmanlɛ’n yo e Min Zezi Klisi i Si Ɲanmiɛn liɛ. Afin i wawɛ’n dunman nun’n, e mɔ e ti Klisi i sɔnnzɔnfuɛ’n, ɔ fali ninnge kpakpa wafawafa kwlaa mannin e ɲanmiɛn su lɔ.+ 4 Yɛ ka naan mɛn’n w’a bo i bo’n,* ɔ kpali e naan e nin i* e bo yo kun. I liɛ’n, klolɛ mɔ e klo Ɲanmiɛn’n ti’n, é yó Ɲanmiɛn liɛ, yɛ i ɲrun’n, sa tɛ kaan sa su tranman e wun.+ 5 Afin Zezi Klisi i dunman nun’n, ɔ sieli e kɛ ɔ́ fá e+ káci i bɔbɔ i klun ba,+ kɛ nga i klun fa jɔ su m’ɔ klo kɛ ɔ́ yó’n sa.+ 6 Ɔ yoli sɔ naan sran’m be mɛnmɛn i. Afin ɔ fɛli i Wa m’ɔ klo i kpa’n+ fa yili i aklunye dan’n+ i nglo e lika. 7 I wa sɔ’n ti’n b’a kpɔ e ti, yɛ y’a ɲan e ti. I mmoja’n ti’n,+ b’a yaci e sa tɛ mun b’a cɛ e.+ Nanwlɛ, Ɲanmiɛn i aklunye’n ti dan sakpa.

8 Ɔ yoli e ye dan. Yɛle kɛ ɔ yoli maan e si ngwlɛlɛ, yɛ e ti akunndanfuɛ. 9 Afin ɔ yoli maan e sili i klun sa m’ɔ ti fiawa’n.+ Sa sɔ’n ti i klun su, yɛ ɔ dun mmua sunnzunnin kɛ ɔ́ yó sa sɔ’n. 10 Ɔ maan kɛ blɛ ng’ɔ sieli’n ko ju’n, ɔ́ wá síesíe ninnge mun. Kpɛkun ɔ́ fá like kwlaa mán Klisi kɛ ɔ nian be su. Yɛle kɛ ɔ́ fá nglo lɔ ninnge mun nin asiɛ’n su wa ninnge mun fá mɛ́n i kɛ ɔ nian be su.+ 11 E nin sran sɔ’n e o nun, yɛ e nin i e ti aja difuɛ.+ Ɔ dun mmua kpali e naan like kwlaa ng’ɔ sunnzun kɛ ɔ́ yó’n, ɔ kpɛn su kɛ nga i bɔbɔ fa klo’n sa, 12 naan e mɔ e dun mmua fali e wla guali Klisi su’n e ti’n, sran’m be manman Ɲanmiɛn, yɛ be yi i ayɛ. 13 Kɛ amun tili ndɛ nanwlɛ’n mɔ yɛle amun delɛ’n i su jasin fɛ’n, amun fali amun wla guɛli i su wie. Kɛ amun lafili i su’n, Ɲanmiɛn sinnin i lika fɛli i wawɛ m’ɔ seli kɛ ɔ́ fá mán amun’n ɔ fa sieli amun nzɔliɛ.+ 14 Aja like nga é ɲɛ́n i e ɲrun lɔ’n,* i bue kan yɛle Ɲanmiɛn wawɛ’n.+ Ɲanmiɛn yoli sɔ naan ɔ́ kpɔ́ i nvle’n nunfuɛ’m be ti+ naan be ɲan be ti.+ Sa sɔ’n yó maan Ɲanmiɛn ɲán ɲrun.

15 I sɔ’n ti’n, kɛ n tili i kɛ amun lafi e Min Zezi su’n, naan amun kle kɛ amun klo Ɲanmiɛn i sran mun’n, 16 amun ti’n, m’an yaciman Ɲanmiɛn i ase lalɛ le. Yɛ kɛ ń srɛ́ Ɲanmiɛn’n, n bo amun dunman titi. 17 N srɛ titi kɛ e Min Zezi Klisi i Ɲanmiɛn m’ɔ ti Siɛ m’ɔ le ɲrun’n, ɔ fɛ i wawɛ’n man amun naan amun si ngwlɛlɛ. Yɛ ɔ yo naan amun wun ninnge ng’ɔ yi be nglo’n be wlɛ, naan amun si i kpa.+ 18 Ɲanmiɛn tikeli amun akunndan’n naan amun wun like nga amun wla o su’n naan amun si i. Asa ekun’n, ɔ yoli sɔ naan amun wun kɛ ninnge kpakpa ng’ɔ sunnzunnin kɛ ɔ́ fá mɛ́n i sran mun’n be leman wunsu.+ 19 Ɔ yoli sɔ ekun naan e mɔ e lafi i su’n, e wun kɛ ɔ yili i tinmin dan’n i nglo e lika.+ I tinmin dan’n i ɲin fite like ng’ɔ yo’n nun. 20 Ɔ yili i tinmin’n i nglo Klisi i lika. Yɛle kɛ ɔ cɛnnin i, kpɛkun ɔ fɛ i trɛnnin i sa fama su+ ɲanmiɛn su lɔ. 21 Ɔ maan mɛn* nga nun-o, mɛn ng’ɔ́ bá lɔ’n nun-o, ɔ o awa kwlaa nin kpɛnngbɛn nin be nga be le kwlalɛ’n nin siefuɛ mun, ɔ nin dunman kwlaa nga be kwla fa tɔn sran’n be ti su.+ 22 Asa ekun’n, Ɲanmiɛn fali like kwlaa sieli i ja bo.+ Yɛ ɔ fɛ i sieli like kwlaa su asɔnun’n nun.+ 23 Asɔnun’n ti i wunnɛn.+ I wunnɛn wunmuan’n yia ninnge’m be kwlaa be nuan sa kwlaa nun.