Ɲanndra Mun
27 Nán fa like nga á yó i ainman’n di ɔ nuan,
afin sa ng’ɔ́ jú cɛn ba kun nun’n, a simɛn i.+
2 Nán yi ɔ bɔbɔ ɔ wun ayɛ, yaci ɔ wiengu* i lɛ maan ɔ yi wɔ ayɛ.
Maan ɔ fin sran uflɛ* nuan fite, nán maan ɔ fin ɔ bɔbɔ ɔ nuan.+
3 Yɔbuɛ’n yo nɔnnin, aunɲan’n kusu yo nɔnnin,
sanngɛ ya nga sinnglinfuɛ’n yo maan sran fa’n, i nɔnnin’n tra be nɲɔn’n.+
4 Ya ble’n ti tɛ dan, ɔ saci like kɛ nzue m’ɔ di lika’n sa.
?Sanngɛ be ɲin m’ɔ ci sran’n, wan yɛ ɔ kwla jrɛn i ɲrun-ɔn?+
5 Kɛ be ijɔ sran’n i weinwein’n, ɔ ti kpa tra klolɛ nga be klo sran mɔ be yimɛn i nglo’n.+
6 Fɔ nga ɔ janvuɛ’n tu wɔ’n, kannzɛ ɔ yo ɔ ya’n, i sɔ’n kle kɛ a kwla lafi i su,+
7 Sran nga i ku w’a yi’n, ɔ nianman awɛma nzue ng’ɔ su sonji’n i lɔ,*
sanngɛ sran nga awe kun i’n, like ng’ɔ yo wi bɔbɔ’n ɔ yo i nuan nun fɛ.
8 Sran ng’ɔ jaso i awlo’n nun m’ɔ ko mlin lika wie’n,
ɔ ti kɛ anunman kun m’ɔ jasoli i sua’n nun mɔ w’a mlin’n* sa.
9 Ngo’n nin ansan’n be yo maan sran klun jɔ.
I wafa kunngba’n yɛle afɔtuɛ kpa kun mɔ be janvuɛ kpa kun man’n.+
10 Nán kpɔci ɔ janvuɛ’n annzɛ ɔ si i janvuɛ’n,
sɛ ɲrɛnnɛn tɔ ɔ su’n, nán wlu ɔ niaan bian’n i
sua’n nun.
Ɔ mantanfuɛ ng’ɔ o ɔ wun koko’n i kpa tra ɔ niaan kun m’ɔ o ɔ wun mmua’n.+
11 Min wa, fa ngwlɛlɛ nanti, yɛ yo naan min klun jɔ,+
i liɛ’n, ń kwlá tɛ́ sran ng’ɔ klɔklɔ min’n i su.+
12 Sran ng’ɔ sɛsɛ i wun’n, kɛ ɔ wun kɛ sa wie su ba’n, kpɛkun w’a fia,+
sanngɛ be nga be siman sa’n, be kuku be wun ko yi nun kpɛkun be wun be ɲrun.*
13 Sɛ sran kun jrannin i wiengu kun mɔ be simɛn i’n i nuan’n, fɛ i tralɛ’n.
Sɛ ɔ jrannin aofuɛ bla* kun i nuan’n, fɛ i sa nun like kɛ aowa sa.+
14 Sɛ sran kun mɛn i nɛn’n su nglɛmun tutu kpa’n bo muae mɛn i wiengu kun’n,
bé sé kɛ sannzan yɛ
ɔ boli i-ɔ.
15 Bla ng’ɔ klo ndɛnngan’n,* ɔ ti kɛ sua kun mɔ kɛ nzue’n tɔ́’n ɔ gua titi’n sa.+
16 Sran ng’ɔ kwla yo naan i sɔ bla’n ɔ lo’n, ɔ kwla jran aunmuan ng’ɔ tu’n,
yɛ ɔ kwla fɛ i sa fama’n
tra ngo.
17 Blalɛ yɛ be fa si blalɛ-ɔ,
i wafa kunngba’n, sran kun yɛ ɔ ukɛ i janvuɛ’n naan w’a wɔ i ɲrun-ɔn.*+
18 Sran ng’ɔ nian figie waka’n i lika’n, ɔ́ dí i su mma,+
yɛ sran ng’ɔ niɛn i min’n i lika’n ɔ́ ɲán ɲrun.+
19 Kɛ a nian nzue’n nun’n, a wun ɔ bɔbɔ ɔ ɲrun’n,
i wafa kunngba’n, like ng’ɔ o ɔ wiengu kun i awlɛn’n nun’n, ɔ nin ɔ liɛ’n be kpaciman.
20 Ndia’n nin lika nga be saci like lɔ’n,* be ku yiman le,+
sran’n i ɲinma’n kusu nian like-ɔ, ɔ flɛnmɛn i le.
21 Sɛ’n nun yɛ be yi sika’n i nun fiɛn’n niɔn, yɛ fuu’n nun yɛ be yi sika ɔkwlɛ’n i liɛ’n niɔn,+
kɛ be yi sran kun i ayɛ’n, yɛ be wun sran wafa ng’ɔ ti’n niɔn.
22 Sɛ bɔbɔ a fa kpokpo ba si sinnglinfuɛ’n
kɛ like wie yɛ a su si i kpokpo nun’n sa’n,
i sinnzin’n su tumɛn i wun le.
23 Ɔ fata kɛ a si wafa nga ɔ nnɛn’m be fa ti’n i kpa.
24 afin aɲanbeun’n kaman lɛ sa trilili,+
famiɛn kle’n kusu kaman be osu’n nun sa trilili.
25 Ijre mɔnnɛn’n tu lɛ, yɛ ijre uflɛ fifi,
yɛ be isa oka’m be su ijre mun.
26 Bua ba yasua’m be ti yɛ á ɲán tralɛ wlá-ɔ,
yɛ boli kpakpuɛ’m be ti yɛ a kwla to fie-ɔ.
27 Yɛ á ɲán boli wunflɛn nzue kaka nɔ́n,
á ɲán wie mán ɔ awlofuɛ mun, yɛ á fá nían ɔ junman difuɛ bla’m be lika.