Sa nga Akoto’m be yoli’n

19 Kɛ sa sɔ’m bé jú’n, nn Apolɔsu+ te o Korɛnti lɔ. Yɛ nn Pɔlu kusu su wlanwlan lika nga be o jenvie’n i wun mmua’n be nun. I sin’n, ɔ ɔli Efɛzi.+ Kɛ ɔ juli lɔ’n, ɔ wunnin Zezi i sɔnnzɔnfuɛ wie mun. 2 Kpɛkun ɔ seli be kɛ: “?Kɛ amun kacili Zezi i sɔnnzɔnfuɛ’n, amun ɲannin Ɲanmiɛn wawɛ’n?”+ Be tɛli i su kɛ: “?Ngue? E nin-a timɛn i le kɛ be flɛ like kun kɛ Ɲanmiɛn wawɛ.” 3 Ɔ maan ɔ seli kɛ: “?Batɛmun onin yɛ be yoli amun-ɔn?” Be seli kɛ: “Zan i batɛmun’n yɛ be yoli e-ɔ.”+ 4 Pɔlu seli kɛ: “Batɛmun nga Zan yoli sran mun’n, ɔ kle kɛ b’a kaci be akunndan’n.+ Ɔ seli sran’m be ekun kɛ be lafi sran ng’ɔ su bɛ i sin’n i su.+ Sran sɔ’n yɛle Zezi.” 5 Kɛ be tili ndɛ sɔ’n, be yoli be batɛmun e Min Zezi i dunman nun. 6 Yɛ kɛ Pɔlu fɛli i sa fuali be su’n, Ɲanmiɛn wawɛ’n jrali be su.+ Kpɛkun be boli aniɛn uflɛ wie’m be kanlɛ bo yɛ be ijɔli Ɲanmiɛn nuan.+ 7 Be nga be o lɛ’n, be kwlaa be ti yasua kɔe blu-nin-nɲɔn (12).

8 Ɔ wluli Ɲanmiɛn sulɛ sua’n nun lɔ,+ kpɛkun ɔ ijɔli yakpa su. Ɔ yoli sɔ lele anglo nsan. Ɔ ijɔ nzra nun, ɔ kan Ɲanmiɛn Sielɛ’n i ndɛ kle be weinwein kpa naan be lafi su.+ 9 Sanngɛ wie’m be yoli ɲin kekle, yɛ be waan be lafiman su. Be kannin Atin’n i wun ndɛ tɛtɛ+ sran’m be ɲrun. Ɔ maan ɔ jasoli be wun lɛ,+ kpɛkun ɔ fali Zezi i sɔnnzɔnfuɛ mun ɔli. Cɛn kwlaa ɔ jran nzra nun kan ndɛ kle be Tiranisi i suklu’n i aɲia sua’n nun. 10 Ɔ yoli sɔ afuɛ nɲɔn. I sɔ’n ti’n, be nga be o Azi mɛn’n nun’n, i Zifu-o, i Glɛki-o, be kwlaa be tili e Min’n i ndɛ’n.

11 Ɲanmiɛn sinnin Pɔlu i lika yoli abonuan sa mɔ be ti be liɛ ngunmin’n titi.+ 12 I kpa bɔbɔ’n, tannin nin luku nga be fa kɛn i wunnɛn’n, kɛ be fa ko kan tukpacifuɛ mun’n,+ be yo juejue, yɛ mmusu’m be jaso sran’m be su.+ 13 Sanngɛ Zifu wie mɔ be wlanwlan sin be fuan mmusu mun’n, be kusu be boli e Min Zezi i dunman’n naan bé fá fúan mmusu nga be o sran’m be su’n. Be se kɛ: “Zezi mɔ Pɔlu kɛn i ndɛ’n i dunman nun’n, fin i nun fite.”+ 14 Zifu bian kun mɔ be flɛ i kɛ Seva’n, m’ɔ ti Ɲanmiɛn ɲrun jranfuɛ’m be su kpɛn’m be nun kun’n, i wa yasua nso be yo sɔ wie. 15 Sanngɛ mmusu’n seli be kɛ: “N si Zezi,+ yɛ n si Pɔlu.+ ?Sanngɛ amun liɛ’n, wan yɛle amun?” 16 Yɛ bian nga mmusu’n o i su’n, ɔ tu tɔli be su-ɔ. I wunmiɛn’n trali be liɛ’n, yɛ ɔ kwlali be kunngunngun. Ɔ maan be wanndili. Kɛ bé fín sua sɔ’n nun bé fíte’n, be wun ti kplɛn, kpɛkun be wun ti kplokplowa. 17 Zifu nin Glɛki nga be o Efɛzi lɔ’n be kwlaa be tili ndɛ sɔ’n. Ɔ maan srɛ kunnin be kwlaa. Kpɛkun be manmannin e Min Zezi i dunman’n titi. 18 Be nga be kacili Zezi i sɔnnzɔnfuɛ’n be nun sunman be bali be wa dili be sa tɛ’m be nanwlɛ weinwein sran’m be ɲrun. 19 Asa ekun’n, atrɛ yifuɛ kpanngban be fali be fluwa mun bali. Be tiannin be nuan, kpɛkun be wɔli be nun sran’m be kwlaa be ɲrun lɛ.+ Kɛ be boli i kwlaa i gua’n, ɔ ti sika mma akpiakpi ablenun (50.000). 20 Ɔ maan Zoova* i ndɛ’n truli kpa, kpɛkun ɔ ɲannin ta kpa.+

21 Kɛ sa sɔ’m be sinnin’n, Pɔlu sunnzunnin kɛ ɔ́ sín Maseduanin+ nin Akai naan ɔ́ kɔ́ Zerizalɛmun.+ Ɔ seli kɛ: “Sɛ n kɔ lɔ’n, i sin’n ɔ fata kɛ n wɔ Rɔmun wie.”+ 22 Ɔ maan ɔ sunmannin i ukafuɛ nɲɔn Maseduanin lɔ. Be yɛle Timote+ nin Erasti.+ Sanngɛ i bɔbɔ kali Azi mɛn’n nun lɛ, ɔ dili le nɲɔn kun lɛ.

23 Blɛ sɔ’n nun’n, Atin’n ti’n, lika’n sanngannin kpa.+ 24 Bian kun mɔ be flɛ i Demetriisi’n, m’ɔ ti sika tɔnfuɛ’n, ɔ fa sika yo Atemisi i sua kanngan wie mun. Yɛ junman sɔ’n ti’n, ajuin difuɛ’m be ɲan sika kpanngban kpa.+ 25 Ɔ yiali be, kpɛkun ɔ yiali sran uflɛ mɔ be di junman sɔ’n wie’n, ɔ seli be kɛ: “Nja mun, amun si kpa kɛ e sika’n fin junman nga. 26 Sanngɛ Pɔlu sɔ’n yoli maan sran kpanngban kpa be su fa atin uflɛ su. Ɔ se kɛ ninnge nga be ti sran sa nuan like’n, be timan ɲanmiɛn mlɔnmlɔn.+ Amun tili, yɛ amun wunnin sa sɔ’n nun. Nán Efɛzi+ wa ngunmin yɛ ɔ kannin sɔ-ɔ, ɔ kɛnnin i Azi mɛn’n i lika sunman nun. 27 Ɔ maan nán e junman’n i ngunmin yɛ ɔ su wa saci-ɔ. Sanngɛ amuin bla Atemisi m’ɔ ti dan’n, i sua’n yɛ be su bumɛn i like fi kun-ɔn. Asa ekun’n, Atemisi mɔ Azi mɛn’n wunmuan’n i nunfuɛ mun nin asiɛ’n sufuɛ’m be kwlaa be su i’n, ɔ su ɲanman ɲrun kun mlɔnmlɔn.” 28 Kɛ be tili ndɛ sɔ’n, be fali ya dan kpa. Kpɛkun be kpan seli kɛ: “Efɛzifuɛ’m be Atemisi’n ti dan!”

29 Ɔ maan klɔ wunmuan’n nun sanngannin. Be kwlaa be bo yoli kun be ɔli anɔ yiwlɛ lɔ. Kɛ bé kɔ́’n be fali Gaisi nin Aristaki.+ Be ti Maseduaninfuɛ, yɛ be nin Pɔlu be tu ajalɛ likawlɛ. 30 Pɔlu liɛ’n, i waan ɔ́ kɔ́ sran’m be afiɛn lɔ. Sanngɛ Zezi i sɔnnzɔnfuɛ’m b’a mɛnmɛn i atin. 31 Asa ekun’n, Azi mɛn’n nun lɔ sran dandan mun bɔbɔ* mɔ be ti Pɔlu i janvuɛ’n, be sunmannin sran i sin. Be srɛli i kpa kɛ nán maan ɔ se kɛ ɔ́ kɔ́ anɔ yiwlɛ lɔ kaan sa. 32 Afin wie’m be kpan be kan be ndɛ liɛ kɔ wa, wie’m be kpan be kan be liɛ kɔ wa. Lika wunmuan’n sanngannin. Sran’m be dan lika be siman sa nga ti yɛ be yiali lɔ’n. 33 Ɔ maan sran’m be fali Alɛzandri fiteli, yɛ Zifu’m be suli i bo naan ɔ jran be ɲrun lɛ. Kpɛkun Alɛzandri mɛnnin i sa’n su seli be kɛ be muan be nuan naan ɔ́ yíyí ndɛ’n nun klé be. 34 Sanngɛ kɛ be wunnin kɛ ɔ ti Zifu’n, be kwlaa be kpannin likawlɛ lele dɔ kɔe nɲɔn. Be seli kɛ: “Efɛzifuɛ’m be Atemisi’n ti dan!”

35 Kɛ sran ng’ɔ klɛ klɔ’n nun ndɛ mun sie’n yoli maan sran’m be guali bliin’n, ɔ seli kɛ: “?Efɛzifuɛ mun, wan yɛ ɔ siman kɛ Efɛzi klɔ’n yɛ ɔ nian Atemisi i sua’n su-ɔ? ?Wan yɛ ɔ siman kɛ Efɛzi klɔ’n yɛ ɔ nian i nzɔliɛ like m’ɔ fin ɲanmiɛn su tɔli’n i su-ɔ? 36 Kɛ mɔ sran fi kwlá siman sa sɔ’m be su akplowa’n ti’n, ɔ fata kɛ amun tran kouun, yɛ nán amun kpli yo like fi. 37 Afin be nga amun fali be bali wa yɛ’n, be wuaman amuin sua’m be nun. Asa kusu’n b’a kanman e amuin bla’n i wun ndɛ tɛtɛ. 38 Ɔ maan sɛ Demetriisi+ nin i wiengu ajuin difuɛ’m be nin sran kun le ndɛ’n, jɔlɛ dilɛ cɛn’m be o lɛ, yɛ klɔ dan su kpɛn’m* be o lɛ, maan be sanman be wiengu. 39 Sanngɛ sɛ like uflɛ yɛ amun kunndɛ’n, aɲia nga mmla’n man atin kɛ be yo’n, i bo yɛ ɔ fata kɛ be kan ndɛ sɔ’n niɔn. 40 Afin nanwlɛ, ndɛ nga ti’n, be kwla bu i kɛ e su jaso kpɛnngbɛn’m be wun, kpɛkun be kwla sanman e. Afin sɛ be usa e sa nga ti yɛ lika’n w’a sanngan’n, e su ɲanman ndɛ e kanman.” 41 Kɛ ɔ wieli ndɛ sɔ’n i kan’n, ɔ yoli maan sran nga be yiali lɛ’n be sanndili.