Zeremin
39 Kɛ Sedesiasi kacili Zida famiɛn’n i afuɛ ngwlan su’n, i anglo blu su’n, Nebikadnezaa* m’ɔ ti Babilɔnin famiɛn’n nin i sonja’m be kwlaa be bali Zerizalɛmun lɛ. Kpɛkun be bo sin yiali klɔ’n.+
2 Kɛ Sedesiasi yoli famiɛn’n i afuɛ blu-nin-kun (11) su’n, i anglo nnan su’n, i cɛn ba ngwlan su’n, be fitili klɔ’n i wun talɛ’n.+ 3 Yɛ Babilɔnin famiɛn’n i sran dandan’m be kwlaa be wluli klɔ’n nun, kpɛkun be ko trantrannin Afiɛn Anuan’n nun lɛ.+ Sran dandan sɔ mun yɛle Nɛɛgali-Sarezɛɛ m’ɔ ti Samgaa’n, nin Nebo-Saasekimun m’ɔ ti Rabusarisi’n,* nin Nɛɛgali-Sarezɛɛ m’ɔ ti Rabumagi’n,* ɔ nin Babilɔnin famiɛn’n i sran dandan onga’m be kwlaa.
4 Kɛ Sedesiasi m’ɔ ti Zida famiɛn’n nin sonja’m be kwlaa be wunnin be’n, be wanndili+ kɔnguɛ. Kɛ bé fín klɔ’n nun bé fíte’n, be sinnin anuan ng’ɔ o talɛ nɲɔn’m be afiɛn’n nun. Kpɛkun be sinnin famiɛn’n i fie klanman’n nun naan b’a to be ti Araba bue liɛ’n su lɔ.+ 5 Sanngɛ Kaldefuɛ’m be sonja’m be suli be su. Be toli Sedesiasi Zeriko lika kpɛtɛkplɛɛ’n nun lɔ,+ be trɛli i. Kpɛkun be fɛ i ko mannin Nebikadnezaa* m’ɔ ti Babilɔnin famiɛn’n Ribla lɔ,+ Amati+ asa’n su lɔ. Lɔ yɛ famiɛn’n kleli like ng’ɔ́ fá yó i’n niɔn. 6 Babilɔnin famiɛn’n yoli maan be kunnin Sedesiasi i mma yasua mun i bɔbɔ i ɲin bo lɛ Ribla lɔ. Yɛ Babilɔnin famiɛn’n yoli maan be kunnin Zida lɔ sran dandan’m be kwlaa.+ 7 Kpɛkun ɔ boboli Sedesiasi i ɲinma mun. I sin’n ɔ fali jrɔkɔ mɔ aaba yɛ be fa yoli’n cili i naan be fɛ i wɔ Babilɔnin.+
8 Kaldefuɛ’m be wɔli famiɛn’n i sua’n nin nvlefuɛ’m be sua’m be nun.+ Kpɛkun be bubuli Zerizalɛmun klɔ’n i wun talɛ mun.+ 9 Nebizaradan+ m’ɔ ti gladi difuɛ’m be su kpɛn’n fali nvlefuɛ nga be kali klɔ’n su lɛ’n, ɔ nin be nga be fali be wun be mɛnnin i’n, ɔ nin sran onga mun ɔli Babilɔnin.
10 Sanngɛ Nebizaradan m’ɔ ti gladi difuɛ’m be su kpɛn’n yacili yalɛfuɛ wie mɔ be leman like fi mlɔnmlɔn’n Zida nvle’n nun lɛ. Asa ekun’n, cɛn sɔ’n nun’n, ɔ mannin be viɲin fie mun nin fie wie mun ekun naan be di nun junman.*+
11 Sanngɛ Nebikadnezaa* m’ɔ ti Babilɔnin famiɛn’n kannin Zeremin i ndɛ kleli Nebizaradan m’ɔ ti gladi difuɛ’m be su kpɛn’n. Ɔ seli i kɛ: 12 “Fɛ i naan niɛn i lika. Nán yo i tɛ. Like kwlaa ng’ɔ srɛ wɔ’n, fa mɛn i.”+
13 Yɛ Nebizaradan m’ɔ ti gladi difuɛ’m be su kpɛn’n nin Nebisaziban m’ɔ ti Rabusarisi’n,* nin Nɛɛgali-Sarezɛɛ m’ɔ ti Rabumagi’n,* nin Babilɔnin famiɛn’n i sran dandan’m be kwlaa be sunmannin sran 14 naan be ko fa Zeremin Gladi Difuɛ’m be Awlo Klun’n+ nun lɔ. Yɛ be fɛ i wlali Safan+ i wa Aikamun+ i klun ba ng’ɔ suan Gedalia’n+ i sa nun. I kusu fɛ i ɔli i awlo lɔ. Ɔ maan Zeremin trannin nvlefuɛ’m be afiɛn lɛ.
15 I nun mɔ Zeremin o Gladi Difuɛ’m be Awlo Klun’n+ nun lɔ’n, Zoova kannin ndɛ kleli i. Ɔ seli i kɛ: 16 “Kɔ ko se Ebɛdi-Melɛki+ m’ɔ ti Etiopifuɛ’n kɛ: ‘Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “N seli kɛ ń fá ɲrɛnnɛn ń yí i klɔ nga su naan n su yoman sran’m be ye. Ń má yía ndɛ sɔ’n i nuan. Cɛn nga ń má yó i sɔ liɛ’n ɔ́ yó ɔ ɲrun.”’
17 “‘Sanngɛ cɛn sɔ’n nun’n, ń dé wɔ. Be su faman ɔ wlaman sran nga a sro be’n be sa nun.’ Zoova yɛ ɔ kan sɔ-ɔ.
18 “‘Afin saan ń yó maan á fín nun fíte. Be su faman tokofi kunman wɔ. Ɔ like liɛ nga á ɲɛ́n i’n yɛle ɔ nguan’n.*+ Afin a lafili min su.’+ Zoova yɛ ɔ kan sɔ-ɔ.”