Ezekiɛli
12 Zoova kannin ndɛ kleli min ekun. Ɔ seli min kɛ: 2 “Sran wa, a tran nvle kun mɔ i nunfuɛ’m be ɲin su ti kekle’n nun. Be le ɲinma sanngɛ be wunman ase, be le su sanngɛ be timan sa.+ Afin be ti nvle kun mɔ i nunfuɛ’m be ɲin su ti kekle-ɔ.+ 3 Sanngɛ sran wa, ɔ liɛ’n, wla ɔ trɔ naan kɔ nvle uflɛ nun kɛ sran mɔ be trɛ i kɔ nvle uflɛ nun’n sa. Wia nun’n, kɔ nvle uflɛ nun be ɲin bo lɛ. Jaso ɔ awlo’n nun naan kɔ nvle uflɛ nun be ɲin bo lɛ. Kannzɛ bɔbɔ be ti nvle kun mɔ i nunfuɛ’m be ɲin su ti kekle’n, sanngɛ atrɛkpa’n, bé wá fá be ɲin bé síe su. 4 Wia nun’n, fa ɔ trɔ nga a wlɛli i kɛ á fá kɔ́ nvle uflɛ nun’n fa fite be ɲin bo lɛ. Kpɛkun nnɔsua’n, ɔ fata kɛ a wɔ kɛ sran kun mɔ be su fɛ i kɔ nvle uflɛ nun’n+ sa be ɲin bo lɛ.
5 “Kpɛ toklo kun talɛ’n nun be ɲin bo lɛ. Kpɛkun fa ɔ ninnge mun sin nun fite.+ 6 Fa ɔ ninnge mun bo ɔ wati be ɲin bo lɛ, naan sua be aosin’n nun fite. Kata ɔ ɲrun’n naan w’a wunman asiɛ’n. Afin n su yo naan a kaci Izraɛli nvle’n nunfuɛ’m be nzɔliɛ like.”+
7 N niannin nga ɔ seli min kɛ n yo’n su sɛsɛsɛ n yoli. Wia nun’n, n fali min trɔ’n n fiteli kɛ sran mɔ be su trɛ i kɔ nvle uflɛ nun’n i trɔ’n sa. Kpɛkun nnɔsua nun’n, n fali min sa n kpɛli toklo kun talɛ’n nun. Kɛ lika’n sannin’n, n fali min ninnge mun n fiteli, n fali be boli min wati be ɲin bo lɛ.
8 Nglɛmun nun’n, Zoova kannin ndɛ kleli min ekun. Ɔ seli min kɛ: 9 “Sran wa, Izraɛli nvle’n, nvle mɔ i nunfuɛ’m be ɲin su ti kekle’n, b’a usaman wɔ kɛ: ‘?Ngue yɛ a su yo-ɔ?’ 10 Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ndɛ nga ti siefuɛ+ ng’ɔ o Zerizalɛmun klɔ’n nun’n, ɔ nin Izraɛli nvle’n nunfuɛ nga be o klɔ’n nun’n be kwlaa be liɛ.”’
11 “Se be kɛ a ti be nzɔliɛ like kun,+ naan like nga a yoli i lɛ’n, i kunngba’n yɛ bé wá fá yó be-ɔ. Bé wá trá be kɔ́ nvle uflɛ nun, bé fá be kɔ́.+ 12 Siefuɛ ng’ɔ o be afiɛn’n, ɔ́ wá fɛ́ i ninnge mun kpɛkun ɔ́ jáso lɛ kɔ́ aosin’n nun. Ɔ́ wá kpɛ́ buɛ kun talɛ’n nun’n, yɛ ɔ́ súɛ i ninnge mun sín nun fíte.+ Ɔ́ wá kɛ́tɛ i ɲrun’n, kɛ ɔ ko yo naan w’a wunman asiɛ’n ti. 13 Ń má tó min lala’n ń gúɛ i su, kpɛkun min koniɛn dilɛ lala’n ɔ́ trɛ́ i.+ I sin’n, ń fɛ́ i ń kɔ́ Babilɔnin, ń fɛ́ i ń kɔ́ Kaldefuɛ’m be mɛn’n nun lɔ, sanngɛ ɔ su wunmɛn i. Kpɛkun ɔ́ wú lɔ.+ 14 Ń má yó maan be nga be sin yiɛ i’n be kwlaa, ɔ nin i ukafuɛ mun, nin i sonja’m bé bó sánndi lika’n i bue kwlaa su.+ Kpɛkun ń yí min tokofi’n ń fá sú be su.+ 15 Kɛ ń má yó mɔ bé bó sánndi nvlenvle’m be nun, ɔ nin mɛnmɛn’m be nun’n, bé wá sí jrɛiin kɛ n ti Zoova. 16 Sanngɛ ń má yó maan be nun wie’m bé ká lɛ. Tokofi nin awe’n, nin tukpacɛ m’ɔ sa ndɛndɛ’n be su kunman be. I liɛ’n, bé kán tete sa kwlaa nga be yoli be’n, be ndɛ klé nvlenvle nga bé kɔ́ be nun’n be nunfuɛ mun. Kpɛkun bé wá sí jrɛiin kɛ n ti Zoova.”
17 Kpɛkun Zoova kannin ndɛ kleli min ekun. Ɔ seli min kɛ: 18 “Sran wa, kɛ á dí ɔ kpanwun’n, ɔ fata kɛ a usu. Yɛ kɛ á nɔ́n ɔ nzue’n, ɔ fata kɛ srɛ kun wɔ yɛ ɔ klun titi wɔ.+ 19 Se nvle’n nunfuɛ’m be kɛ: ‘Ndɛ nga Miɛn Zoova m’ɔ Sie Like Kwlakwla’n kan kle be nga be tran Zerizalɛmun lɔ Izraɛli mɛn’n nun’n yɛ: “Kɛ bé dí be kpanwun’n be klun wá títí be, yɛ kɛ bé wá nɔ́n be nzue’n srɛ dan kpa wá kún be. Afin bé wá sáci be mɛn’n mlɔnmlɔnmlɔn,+ nzaje sa nga be kwlaa nga be tran lɔ’n be yo’n ti.+ 20 Bé sáci klɔ nga be tran be su mun mlɔnmlɔnmlɔn, mɛn’n káci aawlɛ flɛnnɛn.+ Kpɛkun bé wá sí jrɛiin kɛ n ti Zoova.”’”+
21 Zoova kannin ndɛ kleli min ekun. Ɔ seli min kɛ: 22 “?Sran wa, a si Izraɛli mɛn’n nun ɲanndra nga be bu be se kɛ: ‘Cɛn’m be sin, sanngɛ aolia nun ninnge nga be wun be’n be nun wie fi kpɛnman su’n’?+ 23 I sɔ’n ti’n, se be kɛ ndɛ nga Miɛn Zoova m’ɔ Sie Like Kwlakwla’n ɔ kan’n yɛ: “Ń má yó maan be su kanman ndɛ sɔ’n kun, yɛ be su buman ɲanndra sɔ’n Izraɛli mɛn’n nun kun.”’ Sanngɛ se be kɛ: ‘Cɛn’m b’a mantan koko,+ yɛ aolia nun ninnge nga be wun be’n be kwlaa bé kpɛ́n su.’ 24 Afin be su wunman ato ninnge mun aolia nun kun, ɔ nin wunnzue yifuɛ gblɛfuɛ mun Izraɛli i awlo’n nun kun.+ 25 ‘“Afin n bɔbɔ min Zoova ń má kán ndɛ. Ndɛ kwlaa nga n kan’n saan i nuan yía, ɔ su kaman siɛn kaan sa.+ Ee, nvle mɔ i nunfuɛ’m be ɲin su ti kekle’n, amun ɲin su’n,+ ń má kán ndɛ yɛ ń yó i nuan su sa.” Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.’”
26 Zoova kannin ndɛ kleli min ekun. Ɔ seli min kɛ: 27 “Sran wa, ndɛ nga Izraɛlifuɛ’m* be kan’n yɛ: ‘Aolia nun like ng’ɔ wun be’n be su kpɛnman su icra’n, sa nga bé wá jú e ɲrun mmuammua lɔ’n be ndɛ yɛ ɔ kan-ɔn.’+ 28 Ɔ maan se be kɛ: ‘Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: “‘Min ndɛ’m be nun wie fi i su kpɛnlɛ’n su kaman siɛn. Ndɛ kwlaa nga n kan’n, saan ɔ́ kpɛ́n su.’ Ndɛ nga Miɛn Zoova m’ɔ Sie Like Kwlakwla’n ɔ kan’n yɛ ɔ o lɛ-ɔ.”’”