Zɔbu

3 Kɛ ɔ yoli sɔ’n, Zɔbu ukeli i nuan. Ɔ boli i awuliɛ cɛn’n i sannzan.*+ 2 Zɔbu seli kɛ:

 3 “Maan min awuliɛ cɛn’n nunnun sekeseke,+

ɔ nin kɔnguɛ nga sran kun seli kɛ: ‘B’a wu ba yasua kun.’

 4 Maan cɛn sɔ’n kaci aosin,

nán maan Ɲanmiɛn m’ɔ o nglo lɔ’n fɛ i ɲin sie cɛn sɔ’n su.

Nán maan like fi kpɛjɛ i su.

 5 Maan aosin tritritri kpa’n* fɛ i.

Maan ɲanmiɛn ble tritri kun kɛtɛ i su.

Maan like kwlaa nga be yo maan lika’n lu tritritri’n, be wlɛ i ɲin nglonglo.

 6 Kɔnguɛ sɔ’n, maan aosin tritritri kpa’n fɛ i,+

nán maan ɔ di aklunjɔɛ afuɛ kun nun cɛn’m be afiɛn,

nán maan be kɛ i wla anglo’m be nun wie.

 7 Nanwlɛ, sɛ ɔ ti kɛ kɔnguɛ sɔ nun’n b’a wuman ba’n, nn ɔ flunman.

Nán maan be kpan aklunjɔɛ kpanlɛ cɛn sɔ’n nun.

 8 Maan be nga be bo cɛn’n i sannzan’n, be bo i sannzan,

be nga be kwla tinnge Leviatan’n.*+

 9 Maan kɔnguɛ sɔ’n i aliɛ njɛnniɛn su nzraama’m be lu tuun.

Maan ɔ minndɛ kɛ aliɛ cɛn lele ngbɛn.

Kɛ lika’n kpája nglɛmun’n, nán ɔ wun nun.

10 Afin wulɛ mɔ min nin wuli min cɛn sɔ’n nun’n ti’n,+

ɲrɛnnɛn’n to fuanman min.

11 ?Kɛ bé wú min’n, ngue ti yɛ m’an wuman-ɔn?

?Kɛ ń fín min nin i ku sɛ’n nun ń fíte’n, ngue ti yɛ m’an wuman-ɔn?+

12 ?Ngue ti yɛ sran wie fali min sieli i ja su

mɔ n ɲannin wunflɛn n nɔnnin-ɔn?

13 Sɛ ɔ ti kɛ n wuli blɛ sɔ’n nun’n, nn n la lika wie fɔuun,+

nn n su lafi yɛ n su lo wunmiɛn,+

14 e nin asiɛ’n su famiɛn mun nin be afɔtuɛ manfuɛ mun,

mɔ be kplannin be lika mɔ andɛ’n b’a saci’n,*

15 annzɛ e nin sran dandan nga be le sika ɔkwlɛ’n,

mɔ sika’n w’a yi be sua mun piɛ’n.

16 ?Annzɛ kusu ngue ti yɛ m’an yoman kɛ ba wie mɔ be kpɔli i mɔ be fa fiali’n sa-ɔ?

?Ngue ti yɛ m’an yoman kɛ ba nɔnman nga be ɲinma w’a guaman kannin wun’n sa-ɔ?

17 Lɔ’n, klunwifuɛ mun bɔbɔ be kejeman be wun kun,

lɔ’n, be nga b’a fɛ’n be su lo wunmiɛn.+

18 Lɔ’n, bisuafuɛ’m be kwlaa be o lɛ diin,

be timan sran wie i nɛn kɛ ɔ su kpan be su kɛ be ko di junman.

19 Lɔ’n, be nga be leman ɲrun’n nin be nga be le ɲrun’n, be ngba be sɛ,+

yɛ kanga’n w’a ɲɛn i ti i min’n i sa nun.

20 ?Ngue ti yɛ ɔ yaci sran ng’ɔ wun i ɲrun’n i nguan nun-ɔn?*

?Ngue ti yɛ ɔ man be nga ɲrɛnnɛn dan o be su’n be nguan-ɔn?+

21 ?Ngue ti yɛ be sun flɛ wie’n m’ɔ baman-ɔn?+

Be kunndɛ i tra asiɛ’n bo lɔ yɔbuɛ kpakpa mun.

22 Kɛ i sɔfuɛ’m be ko wun ndia’n, aklunjɔɛ’n kun

be kpo,

ɔ yo be fɛ lele tratra su.

23 ?Sran mɔ Ɲanmiɛn tanninnin i atin kwlakwla’n,

mɔ i atin’n w’a mlin i ɲrun’n, ngue ti yɛ Ɲanmiɛn mɛn i kannin-ɔn?+

24 Kplinlɛ’n yɛ w’a kaci min aliɛ-ɔ,+

min fɛfɛlɛ’n+ ɔ ti kɛ nzue wie m’ɔ sonji’n sa.

25 Afin like nga n sro i kpa’n, w’a ɲan min,

like nga ɔ kun min srɛ’n, w’a tɔ min su.

26 Min wun w’a jɔman min, m’an wunman min wun fɛ, m’an loman wunmiɛn,

sanngɛ ɲrɛnnɛn’n yɛ ɔ tɔ min su sa trilili-ɔ.”