Fluwa nga Pɔlu klɛli Filipufuɛ mun’n

2 I sɔ’n ti’n, sɛ amun kwla wla amun wiengu’m be fanngan Klisi mɔ amun nin i be o nun’n ti’n, naan amun fɔnvɔ amun wun klolɛ su’n, naan amun wiengu’m be ndɛ lo amun’n, naan amun klo amun wun kpa’n, naan amun si amun wiengu aunnvɔɛ’n, 2 maan an yo naan min klun jɔ kpa. I sɔ’n ti’n, maan amun akunndan’n yo kun, yɛ maan amun klo amun wiengu, maan amun afiɛn sɛ kpa, yɛ maan amun akunndan’n tran like kunngba’n su.+ 3 Asa ekun’n, nán an yo like fi utre su,+ yɛ nán an yo amun wun kpakpa.+ Sanngɛ an yo wun ase kanfuɛ naan an bu amun wiengu mun kɛ be ti kpa tra amun.+ 4 Kɛ amún yó sɔ’n, nán an bu amun ninnge liɛ’m be ngunmin be akunndan,+ sanngɛ an bu amun wiengu’m be liɛ’n i akunndan wie.+

5 An bu akunndan kunngba nga Klisi Zezi buli’n wie titi.+ 6 Kannzɛ bɔbɔ ɔ ti kɛ Ɲanmiɛn sa’n,+ w’a kunndɛman bɔɔ kaan sa kɛ ɔ nin Ɲanmiɛn bé sɛ́.+ 7 Sanngɛ ɔ yacili like kwlaa ng’ɔ le i’n, kpɛkun ɔ yoli i wun kɛ kanga sa,+ yɛ ɔ kacili klɔ sran.+ 8 I kpa bɔbɔ’n, kɛ ɔ bali kɛ klɔ sran sa’n, ɔ yoli wun ase kanfuɛ, yɛ ɔ yoli aɲinyiɛfuɛ lele ɔ fa wuli,+ ɔ wuli ɲrɛnnɛn waka’n* su.+ 9 I sɔ’n ti’n, Ɲanmiɛn mɛnnin i kɔmin su trali laa’n.+ Kpɛkun ɔ fali dunman m’ɔ tra dunman kwlaa’n mɛnnin i klun ufue su,+ 10 naan Zezi dunman’n ti’n, be nga be o ɲanmiɛn su lɔ’n, nin be nga be o asiɛ’n su wa’n, ɔ nin be nga be o asiɛ’n i bo lɔ’n be kwlaa be koto,+ 11 naan ɔ fite be kwlaa be nuan kɛ Zezi Klisi ti be Min+ naan e Si Ɲanmiɛn ɲan ɲrun.

12 Min sran kpa mun, i nun nga n wo amun wun lɔ’n, an yoli aɲinyiɛfuɛ cɛn kwlaa. Yɛ siɛn mɔ n nunman lɔ’n, amun aɲinyiɛ’n w’a yo dan w’a tra laa’n bɔbɔ. I sɔ’n ti’n, maan amun tinuntinun amun mian amun ɲin kpa titi naan amun fite nun mlɔnmlɔn. Kɛ amún yó sɔ’n, maan srɛ kun amun, yɛ amun wun usu amun. 13 Afin Ɲanmiɛn yɛ i klun klo su ɔ man amun wunmiɛn-ɔn, i yɛ ɔ yo maan amun kunndɛ kɛ amún yó like ng’ɔ klo i’n niɔn. Kpɛkun i yɛ ɔ man amun wunmiɛn naan amun a kwlɛ i yo-ɔ. 14 Like kwlaa nga amún yó’n, nán an ijɔ amun konviabo,+ yɛ nán ndɛnngan tran nun,+ 15 kɛ ɔ ko yo naan fiɛn kaan sa w’a tranman amun wun, naan b’a saciman amun dunman’n ti. I liɛ’n, amun mɔ amun ti Ɲanmiɛn i mma mun’n,+ sa tɛ fi su tranman amun wun blɛ nga nun sran tɛtɛ mɔ be yoman sa kpa’n+ be afiɛn. Amun kpaja kɛ kannin sa sran sɔ’m be afiɛn mɛn’n nun.+ 16 Yɛ amun tra ndɛ ng’ɔ man nguan’n+ i kekle kpa. Sɛ amun yo sɔ’n, ń kwlá dí aklunjɔɛ Klisi i cɛn’n nun. Afin ń wún i wlɛ kɛ m’an wanndiman ngbɛn, yɛ m’an diman junman ngbɛn. 17 Ɲanmiɛn junman mɔ n ukali amun e dili’n ti’n, be su fa min be gua tɛ nga be yi be man Ɲanmiɛn’n+ su kɛ nzan sa.+ Kannzɛ ɔ ti sɔ’n, ɔ yo min fɛ, yɛ e nin amun kwlaa e di aklunjɔɛ. Afin Ɲanmiɛn i su mɔ amun lafi’n, i ti yɛ amun kwla yili tɛ mɛnnin i-ɔ, kpɛkun i ti yɛ amun kwla dili i junman’n niɔn. 18 Amun kusu, maan amun klun jɔ wie, yɛ maan amun nin min di aklunjɔɛ.

19 Sɛ ɔ ti e Min Zezi i klun su’n, ɔ cɛ kan’n ń súnman Timote+ amun wun lɔ. I liɛ’n, amun lɔ jasin’n ng’ɔ́ wá bó klé min’n, ɔ́ wlá min fanngan. 20 Afin n leman sran fi mɔ amun ndɛ lo i kpa kɛ i sa-ɔ. 21 Be onga’m be liɛ’n, be bɔbɔ be ninnge mun yɛ be lo be-ɔ, Zezi Klisi i liɛ’n loman be. 22 Sanngɛ amun si kɛ i liɛ’n, ɔ kleli kɛ be kwla lafi i su. Yɛ ɔ nin min trannin kɛ ba kun+ nin i si be fa tran’n sa. Kpɛkun ɔ nin min dili junman kekle kpa naan jasin fɛ’n tru lika kwlaa. 23 I sɔ’n ti’n, kɛ n ko wun wafa nga sa ng’ɔ o min su’n i bo’n gúa’n i wlɛ’n, ń súnmɛn i amun wun lɔ. 24 Sɛ ɔ ti e Min’n i klun su’n, ɔ cɛ kan’n, n bɔbɔ ń bá lɔ wie.+

25 Sanngɛ dɔ nga su’n, n bu i kɛ ɔ ti cinnjin kɛ n sunman Epafroditi, m’ɔ ti min niaan, m’ɔ ti sonja kɛ min sa’n, mɔ amun sunmɛnnin i kɛ ɔ wa nian min lika’n amun wun lɔ.+ 26 I wla lo amun kpa. Sanngɛ i wla w’a bo i wun, afin an tili i kɛ ɔ tɔli tukpacɛ. 27 Nanwlɛ, ɔ yoli kekle kpa, ɔ ka kan naan w’a wu. Sanngɛ Ɲanmiɛn sili i aunnvɔɛ. Nɛ́n i ngunmin yɛ ɔ sili i aunnvɔɛ-ɔ. Ɔ sili min aunnvɔɛ wie, kɛ ɔ ko yo naan min wla w’a boman w’a tratraman su’n ti. 28 I sɔ’n ti’n, ń súnmɛn i ndɛndɛ. I liɛ’n, kɛ amún wún i’n, amun klun jɔ́ ekun, yɛ n kusu min wla su boman dan. 29 Ɔ maan an sɔ i nun klanman kɛ be fa sɔ e Min’n i sran’m be nun’n sa. Yɛ maan an bu sran kɛ ngalɛ sa’m be sran titi.+ 30 Afin Klisi i junman’n* ti’n, ɔ ka kan naan w’a wu. Ɔ fɛli i nguan’n sieli i wie nuan naan ukalɛ nga amun a kwlá ukaman min’n, w’a jran amun ja nun w’a uka min.+