Fluwa klikli nga Pɔlu klɛli Korɛntifuɛ mun’n

11 Maan amun nian min liɛ’n su yo kɛ nga n kusu n nian Klisi liɛ’n su n yo’n sa.+

2 Ń yó amun mo. Afin sa’n kwlaa nun’n, amun wla kpɛn min su. Kpɛkun ninnge nga n kleli amun kɛ an yo be’n, amun nian su yo. 3 Sanngɛ n kunndɛ kɛ amun si kɛ Klisi’n yɛ ɔ sie yasua-ɔ.+ Yasua kusu yɛ ɔ sie bla-ɔ.+ Yɛ Ɲanmiɛn kusu yɛ ɔ sie Klisi’n niɔn.+ 4 Yasua kwlaa ng’ɔ́ srɛ́ Ɲanmiɛn annzɛ ɔ́ íjɔ Ɲanmiɛn nuan mɔ like kɛtɛ i ti’n, ɔ guɛ i siefuɛ’n i ɲin ase. 5 Sanngɛ bla ng’ɔ́ srɛ́ Ɲanmiɛn annzɛ ɔ́ íjɔ Ɲanmiɛn nuan+ m’ɔ kɛtɛmɛn i ti’n, ɔ guɛ i siefuɛ’n i ɲin ase. I kunngba’n yɛle bla ng’ɔ kpu i ti’n su’n i liɛ’n. 6 Bla ng’ɔ kɛtɛmɛn i ti’n, maan ɔ yi i ti’n. Sanngɛ sɛ bla kun wun kɛ sɛ ɔ yi i ti’n annzɛ ɔ kpu i ti’n su’n, nn w’a guɛ i bɔbɔ i ɲin ase’n, maan ɔ kɛtɛ i ti.

7 Ɔ fataman kɛ yasua kɛtɛ i ti. Afin Ɲanmiɛn yili i kɛ i bɔbɔ sa,+ yɛ yasua’n yi Ɲanmiɛn i aɲrunɲan’n i nglo. Sanngɛ bla yi yasua i aɲrunɲan’n i nglo. 8 Afin nán bla yɛ Ɲanmiɛn fa yili yasua-ɔ, sanngɛ yasua yɛ ɔ fa yili bla-ɔ.+ 9 Ng’ɔ o su ekun’n yɛle kɛ nán bla ti yɛ be yili yasua-ɔ. Sanngɛ yasua ti yɛ be yili bla-ɔ.+ 10 I sɔ’n ti’n, ɔ fata kɛ bla’n fa like kun m’ɔ kle kɛ ɔ lo i wun mɛn i wun’n ɔ kɛtɛ i ti, anzi’m be ti.+

11 Asa ekun’n, e Min’n i liɛ’n, sɛ bla nunman lɛ’n, yasua kwlá tranman lɛ. Yɛ sɛ yasua nunman lɛ’n, bla kwlá tranman lɛ. 12 Afin i wafa kunngba nga bla fin yasua’n,+ yasua kusu fin bla. Sanngɛ like kwlaa fin Ɲanmiɛn.+ 13 Amun bɔbɔ amun bu i akunndan nian. ?Sɛ bla kun srɛ́ Ɲanmiɛn naan w’a kɛtɛmɛn i ti’n, i sɔ’n nin i fata? 14 ?Wafa nga be fa yili yasua nin bla’n, ɔ kleman kɛ sɛ yasua’n i timuɛn’n ti tɛnndɛn’n, ɔ ti ɲannzuɛn? 15 ?Asa kusu’n, i sɔ’n kleman kɛ sɛ bla’n i timuɛn’n ti tɛnndɛn’n, ɔ ti i aɲrunɲan? Afin be fɛ i timuɛn’n be mɛnnin i kɛ ɔ fa kɛtɛ i wun. 16 Sanngɛ nja, sɛ sran kun waan ɔ́ jrán mmla uflɛ su naan ɔ́ sí akplowa’n, ɔ ti kɛ i bɔbɔ sa. Sanngɛ e liɛ’n, e leman mmla uflɛ. Yɛ Ɲanmiɛn i asɔnun’n i nunfuɛ’m be leman mmla uflɛ kusu.

17 Sanngɛ ndɛ nga ń kɛ́n i yɛ’n nun’n, n su yoman amun mo. Afin yialɛ nga amun yia’n, ɔ yoman amun ye, sanngɛ tɛ yɛ ɔ yo amun-ɔn. 18 Afin n tili i kɛ, kɛ amun yia’n, an bubu amun wun nun. Yɛ n bu i kɛ ndɛ sɔ’n kwla yo nanwlɛ. 19 Afin ɔ fata kɛ amun bubu amun wun nun+ naan be wun amun nun sran nga Ɲanmiɛn i klun jɔ be wun’n be wlɛ weiin.

20 Kɛ amun yia lika kun nun’n, nán e Min’n i Nnɔsua nun Aliɛ’n+ i dilɛ’n i ti yɛ amun yia sakpa-ɔ. 21 Afin kɛ amún dí’n, nn sran wie’m b’a dun mmua b’a di be bɔbɔ be nnɔsua nun aliɛ liɛ. I sɔ’n ti’n, kɛ awe kún wie mun’n nn wie’m be kusu b’a nɔn nzan b’a bo. 22 ?Amun leman awlo naan amun a di like naan amun a nɔn nzan lɔ? ?Annzɛ amun kunndɛ kɛ amún gúa Ɲanmiɛn i asɔnun’n i nunfuɛ mun ɔ nin be nga be leman wie’n be ɲin ase? ?Ń sé amun sɛ? ?Ń sé kɛ amun nin mo yolɛ fata? Cɛcɛ. Sa sɔ’n nun’n, n su yoman amun mo.

23 Ndɛ nga e Min’n kan kleli min’n, yɛ n kusu n kan kleli amun-ɔn. Yɛle kɛ nnɔsua nga bé wá yí e Min Zezi bé mán’n,+ ɔ fali kpanwun kun, 24 kɛ ɔ lali Ɲanmiɛn ase wieli’n, ɔ bubuli nun naan w’a se kɛ: “Nga ti min wunnɛn’n i nzɔliɛ.+ Amun ti yɛ n su wa fa man-ɔn. An yo i kɛ nga sa titi naan amun wla kpɛn min su.”+ 25 Yɛ kɛ be dili aliɛ wieli’n, ɔ fali klowa’n,+ kpɛkun ɔ yoli like kunngba’n. Ɔ seli kɛ: “Klowa nga ti aenguɛ uflɛ’n+ i nzɔliɛ. Min mmoja’n ti yɛ bé dí aenguɛ sɔ’n su-ɔ.+ Blɛ kwlaa nga amún nɔ́n duvɛn nga’n, maan amun yo i kɛ nga sa titi. Maan amun wla kpɛn min su.”+ 26 Cɛn kwlaa nga amún dí kpanwun nga, mɔ amún nɔ́n duvɛn ng’ɔ o klowa nga nun’n, nn amun su bo e Min’n i wie ndɛ’n su, amún yó sɔ lele ɔ́ fá ba.

27 I sɔ’n ti’n, sran kwlaa ng’ɔ di kpanwun’n, yɛ ɔ nɔn duvɛn ng’ɔ o e Min’n i klowa’n nun’n kusu nn ɔ nin i sɔ yolɛ fataman’n, nn ɔ buman e Min’n i wunnɛn’n nin i mmoja’n be like fi. 28 Maan sran kun dun mmua bu i klun lɔ nian ka.+ Sɛ ɔ nin i sɔ yolɛ fata’n, maan ɔ di kpanwun’n naan ɔ nɔn like ng’ɔ o klowa’n nun’n. 29 Afin sran kwlaa nga w’a wunman like nga e Min’n i wunnɛn sɔ’n ti i nzɔliɛ’n i wlɛ’n, m’ɔ di m’ɔ nɔn’n, nn w’a bu i bɔbɔ i wun fɔ. 30 I ti yɛ amun nun kpanngban be leman fanngan mɔ be ti tukpacifuɛ’n niɔn, yɛ amun nun kpanngban b’a wu.*+ 31 Sanngɛ sɛ ɔ ti kɛ e buli e klun lɔ e niannin’n, nn b’a buman e fɔ. 32 Sanngɛ kɛ be bu e fɔ’n, Zoova* yɛ ɔ su kle e ngwlɛlɛ lɛ-ɔ.+ Ɔ maan kɛ bé wá bú mɛn’n nunfuɛ’m be fɔ’n, be su buman e fɔ wie.+ 33 I sɔ’n ti’n, aniaan mun, kɛ amun ba aliɛ sɔ’n i dilɛ’n, an minndɛ amun wiengu. 34 Sɛ awe kun amun nun kun’n, maan ɔ di like i awlo lɔ. I liɛ’n, yialɛ nga amún yía’n, ɔ su yoman amun fɔ bulɛ blɛ.+ Ndɛ onga’m be liɛ’n, sɛ n ju lɔ’n, n ko siesie.