1 Famiɛn Mun
19 I sin’n, Akabu+ kannin like kwlaa nga Eli yoli’n, ɔ nin wafa ng’ɔ fali tokofi kunnin amuin nuan ijɔfuɛ’m be kwlaa’n+ be ndɛ kleli Zezabɛli.+ 2 Kɛ ɔ yoli sɔ’n, Zezabɛli sunmannin sran Eli sin naan be ko se i kɛ: “Sɛ ainman dɔ kɛ nga sa su’n m’an yoman wɔ kɛ be sa’n, maan ɲanmiɛn’m be tu min fɔ kekle kpa!” 3 I sɔ’n ti’n, srɛ kunnin Eli, ɔ maan ɔ wanndili naan b’a kunmɛn i.+ Ɔ ɔli Beɛ-Seba+ m’ɔ o Zida+ lɔ’n su, ɔ yacili i sufuɛ’n lɔ. 4 Ɔ nantili cɛn klonglo kun ɔli aawlɛ flɛnnɛn’n nun lɔ, ɔ ko trannin waka kun mɔ be flɛ i zenɛ’n i bo. Ɔ kpan flɛli wie’n. Ɔ seli kɛ: “W’a yo kpa sɔ! Zoova, fa min nguan’n siɛn’n.+ Afin min kpa traman min nannan mun.”
5 I sin’n ɔ lali, kpɛkun ɔ lafili zenɛ waka’n i bo. Anzi kun kɛnnin i,+ yɛ ɔ seli i kɛ: “Jaso naan di like.”+ 6 Ɔ́ nían-ɔn, kpanwun kukluku kun yɛ. Ɔ o i ti bo lɛ yɔbuɛ nglɛnglɛ wie’m be su, ɔ nin nzue towa kun. Ɔ dili like, ɔ nɔnnin nzue yɛ ɔ lali ekun. 7 I sin’n, Zoova i anzi’n bali ekun, ɔ kɛnnin i, yɛ ɔ seli i kɛ: “Jaso di like, afin ɔ ɲrun atin’n ti tɛnndɛn.” 8 Yɛ ɔ jasoli-ɔ, ɔ dili like yɛ ɔ nɔnnin nzue. Ɔ maan ɔ ɲannin wunmiɛn. I sɔ’n ti’n, ɔ kwla nantili cɛn ba ablanan (40), wia nun nin kɔnguɛ. Ɔ nantili lele juli Orɛbu, Ɲanmiɛn Kpli i oka’n+ su lɔ.
9 Kɛ ɔ juli lɔ’n, ɔ wluli yɔbuɛ buɛ kun nun,+ yɛ ɔ lali lɔ kɔnguɛ. Kpɛkun Zoova kannin ndɛ kleli i, ɔ seli i kɛ: “?Eli, ngue yɛ a su yo i wa-ɔ?” 10 Ɔ tɛli i su kɛ: “Ɲanmiɛn Zoova m’ɔ ti sonja’m be su kpɛn’n,+ n tuli min klun kpa n yoli ɔ klun sa. Afin Izraɛlifuɛ’m be yacili ɔ aenguɛ’n,+ be bubuli ɔ tɛ yiwlɛ’n, yɛ be fali tokofi kunnin ɔ nuan ijɔfuɛ mun,+ min ngunmin yɛ m’an ka-ɔ. Siɛn’n be kunndɛ kɛ bé kún min.”+ 11 Sanngɛ ɔ seli i kɛ: “Fite naan jran oka’n su Zoova i ɲrun.” Kpɛkun Zoova sinnin Eli i ɲrun.+ Aunmuan dan kpa kun kpacili oka’m be nun, ɔ kpukeli yɔbuɛ’m be nun Zoova ɲrun lɛ.+ Sanngɛ Zoova nunman aunmuan’n nun. Kɛ aunmuan’n sinnin’n, asiɛ’n kejeli.+ Sanngɛ Zoova nunman asiɛ’n i kejelɛ sɔ’n nun. 12 Kɛ asiɛ’n i kejelɛ’n sinnin’n, sin kun jueli.+ Sanngɛ Zoova nunman sin’n nun. Kɛ sin’n wieli’n, sran kun ijɔli. I nɛn’n ti wɛtɛɛ kpɛkun ɔ ijɔ blɛblɛ.+ 13 Kɛ Eli tili sran sɔ’n i nɛn’n cɛ’n, ɔ fɛli i tralɛ’n kɛtɛli i ɲrun,+ kpɛkun ɔ fiteli wa jrannin yɔbuɛ buɛ’n i nuan su lɛ. I sin’n, sran kun usɛli i kɛ: “?Eli, ngue yɛ a su yo i wa-ɔ?” 14 Ɔ tɛli i su kɛ: “Ɲanmiɛn Zoova m’ɔ ti sonja’m be su kpɛn’n, n tuli min klun kpa n yoli ɔ klun sa. Afin Izraɛlifuɛ’m be yacili ɔ aenguɛ’n,+ be bubuli ɔ tɛ yiwlɛ’n, yɛ be fali tokofi kunnin ɔ nuan ijɔfuɛ mun, min ngunmin yɛ m’an ka-ɔ. Siɛn’n be kunndɛ kɛ bé kún min.”+
15 Zoova seli i kɛ: “Sa ɔ sin, kɔ Damasi aawlɛ flɛnnɛn’n nun lɔ. Sɛ a ju lɔ’n, gua Azaɛli+ i ti su ngo naan ɔ yo Siri famiɛn. 16 Gua Nimisi i anunman Zei+ i ti su ngo naan ɔ yo Izraɛli famiɛn, yɛ gua Safati m’ɔ fin Abɛli-Meola’n i wa Elize* i ti su ngo naan ɔ sin ɔ osu kaci Ɲanmiɛn nuan ijɔfuɛ.+ 17 Sran kwlaa nga Azaɛli i tokofi’n w’a kunmɛn i’n,+ Zei kún i.+ Yɛ sran kwlaa nga Zei i tokofi’n w’a kunmɛn i’n, Elize kún i.+ 18 Asa ekun’n, sran akpi nso (7.000) ekun be te o Izraɛli mɛn’n nun.+ Sran sɔ’m b’a kotoman Baali bo,+ yɛ b’a faman be nuan b’a wɔmɛn i wun.”+
19 Ɔ maan ɔ fɛli i lɛ ɔli Safati i wa Elize i wun lɔ. Kɛ ɔ́ kó tó i’n nn nannin tola nɲɔnnɲɔn fa blu-nin-nɲɔn (12) be o i ɲrun, ɔ su fa be tutu lika. Elize o nannin fa blu-nin-nɲɔn (12) su’n be wun lɛ. Eli mɛntɛnnin i lɔ, kpɛkun ɔ toli i tralɛ’n+ yili i su. 20 Kɛ ɔ yoli sɔ’n, ɔ yacili nannin tola’m be lɛ, kpɛkun ɔ wanndi suli Eli su. Ɔ seli i kɛ: “Yaci, maan n ko kale min si nin min nin* ka naan m’an su ɔ su.” Ɔ tɛli i su kɛ: “Kɔ, sa ɔ sin ɔ awlo, n su tanndanman ɔ ɲrun.” 21 Ɔ maan ɔ sɛli i sin, ɔ fali nannin tola nɲɔn yili tɛ. Ɔ fali nannin’m be kɔmin su waka’n nin saru waka’n fa tɔnnin nannin tola mun, ɔ fa mannin nvlefuɛ mun naan b’a di. I sin’n, ɔ jasoli suli Eli su, yɛ ɔ kacili i sufuɛ.+