2 Famiɛn Mun

1 Kɛ Akabu wuli’n, Moabufuɛ’m+ be jasoli Izraɛlifuɛ’m be wun.

2 Cɛn kun’n, Akazia fin i sua ng’ɔ o Samari lɔ’n i ti su nglo lɔ sua ba’n i toklo mɔ be fali waka mma trolotrolo wie mun jajali su’n i nun tɔli, like yaya yoli i. Ɔ maan ɔ sunmannin sran wie mun, ɔ seli be kɛ: “Amun wɔ ko usa Ekrɔnfuɛ’m+ be amuin Baali-Zebubu naan e nian sɛ ń yó juejue-o.”+ 3 Sanngɛ Zoova i anzi’n seli Eli*+ m’ɔ ti Tisibefuɛ’n kɛ: “Jaso kɔ ko to be nga Samari famiɛn’n sunmannin be’n naan usa be kɛ: ‘?Ɲanmiɛn nunman Izraɛli wa ti yɛ amun su ko usa Ekrɔnfuɛ’m be amuin Baali-Zebubu i sa-ɔ?’+ 4 Ndɛ nga Zoova kan’n yɛ: “Bɛ nga a la su lɛ’n, a su finman su jasoman, saan á wú.”’” Kɛ ɔ yoli sɔ’n, Eli ɔli.

5 Kɛ be nga famiɛn’n sunmannin be’n be sali be sin i wun lɔ m’ɔ wunnin be cɛ’n, ɔ usali be kɛ: “?Ngue ti yɛ amun sa amun sin-ɔn?” 6 Be tɛli i su kɛ: “Bian kun toli e atin nun kpɛkun ɔ seli e kɛ: ‘Amun sa amun sin famiɛn m’ɔ sunmannin amun’n i wun lɔ naan amun se i kɛ: “Ndɛ nga Zoova kan’n yɛ: ‘?Ɲanmiɛn nunman Izraɛli wa ti yɛ w’a sunman sran kɛ be ko usa Ekrɔnfuɛ’m be amuin Baali-Zebubu i sa-ɔ? I sɔ’n ti’n, a su finman bɛ nga a la su’n su jasoman, saan á wú.’”’”+ 7 Famiɛn’n usali be kɛ: “?Sran ng’ɔ nin amun yiali m’ɔ kannin ndɛ sɔ’n kleli amun’n, ɔ ti sɛ?” 8 Be tɛli i su kɛ: “Nnɛn ndrɛ tralɛ wlɛ i wun+ kpɛkun nnɛn kplo kun ci i afiɛn.”+ Famiɛn’n ka lɛ seli kɛ: “Eli m’ɔ ti Tisibefuɛ’n niɔn.”

9 Ɔ maan famiɛn’n sunmannin sonja ablenun su kpɛn kun nin i sran ablenun (50) mun Eli sin. Sonja ablenun su kpɛn’n toli Eli lɔ, kɛ ɔ́ yó sɔ’n nn Eli ti oka’n i ti su nglo lɔ. Ɔ seli i kɛ: “Ɲanmiɛn Kpli i sran,+ famiɛn’n waan a jra.” 10 Sanngɛ Eli tɛli sonja ablenun su kpɛn’n i su kɛ: “Sɛ n ti Ɲanmiɛn i sran’n, maan sin fin ɲanmiɛn su lɔ jra+ naan ɔ yra wɔ nin ɔ sran ablenun (50) mun.” Ɔ maan sin fin ɲanmiɛn su lɔ jrali naan w’a yrɛ i nin i sran ablenun (50) mun.

11 Ɔ maan famiɛn’n sunmannin sonja ablenun su kpɛn kun ekun nin i sran ablenun (50) mun i sin lɔ. Sonja ablenun su kpɛn’n ɔli ko seli i kɛ: “Ɲanmiɛn Kpli i sran, famiɛn’n waan a jra icra’n.” 12 Sanngɛ Eli tɛli be su kɛ: “Sɛ n ti Ɲanmiɛn Kpli i sran’n, maan sin fin ɲanmiɛn su lɔ jra naan ɔ yra wɔ nin ɔ sran ablenun (50) mun.” Ɔ maan Ɲanmiɛn i sin’n fin ɲanmiɛn su lɔ jrali naan w’a yrɛ i nin i sran ablenun (50) mun.

13 I sin’n, famiɛn’n sunmannin sonja ablenun su kpɛn kun ekun nin i sran ablenun (50) mun. Sanngɛ kɛ sonja ablenun su kpɛn nsan su’n ɔli’n, ɔ ko kotoli Eli i ɲrun lɛ, kpɛkun ɔ seli i aunnvɔɛ su kɛ: “Ɲanmiɛn Kpli i sran, yaci, maan min nguan’n ɔ nin sran ablenun (50) nga’m be nguan’n yo ɔ cinnjin. 14 Sin w’a dun mmua w’a fin ɲanmiɛn su lɔ w’a jra, w’a yra sonja ablenun su kpɛn nɲɔn nga be dun mmua bali’n, ɔ nin be sran ablenun (50) mun. Sanngɛ yaci, maan min nguan’n yo cinnjin ɔ ɲrun.”

15 Kɛ ɔ yoli sɔ’n, Zoova i anzi’n seli Eli kɛ: “Jra naan a nin i be wɔ. Nán sro i.” Ɔ maan ɔ jasoli, ɔ jrali kpɛkun ɔ nin i be ɔli famiɛn’n i wun lɔ. 16 Eli seli famiɛn’n kɛ: “Ndɛ nga Zoova kan’n yɛ: ‘A sunmannin sran kɛ be ko usa Ekrɔnfuɛ’m+ be amuin Baali-Zebubu i sa. ?Ɲanmiɛn nunman Izraɛli wa ti-ɔ?+ ?Ngue ti yɛ w’a usɛmɛn i-ɔ? I sɔ’n ti’n, bɛ nga a la su lɛ’n, a su finman su jasoman, saan á wú.’” 17 Ɔ maan Akazia wuli, kɛ nga Zoova fa wlali Eli nuan m’ɔ kannin’n sa. Kɛ m’ɔ leman ba yasua’n ti’n, Zoramun*+ sinnin i osu kacili famiɛn, kɛ ɔ́ yó sɔ’n nn Zozafati i wa Zoramun+ kacili Zida famiɛn w’a di afuɛ nɲɔn.

18 Akazia+ i su ndɛ’n i onga’n, ninnge ng’ɔ yoli be’n, be klɛli be fluwa ng’ɔ kan Izraɛli famiɛn’m be ndɛ’n nun.