EZIPTI LƆ TULƐ

1 Izraɛli i mma nga be nin i* be ɔli Ezipti’n be dunman mun yɛ. Kɛ bé kɔ́’n be nin be awlobofuɛ mun yɛ be ɔli-ɔ.+ 2 Ribɛnin, Simeɔn, Levi, Zida,+ 3 Isakaa, Zabilɔn, Bɛnzamɛn, 4 Dan, Nɛftali, Gadi nin Azɛɛ.+ 5 Zakɔbu i osu’n nunfuɛ’m be kwlaa* be ti ableso (70), sanngɛ kɛ ɔ́ yó sɔ’n, nn Zozɛfu o Ezipti lɔ laa.+ 6 Kɛ ɔ́ kɔ́ i ɲrun’n, Zozɛfu wuli.+ I niaan mun nin i blɛ sufuɛ’m be kwlaa be wuli wie. 7 Izraɛlifuɛ’m* be wa wuli ba kaka kpa, yɛ be wa sɔnnin kpa, be trɛ kɔ be ɲrun titi. Ɔ maan be ɲannin wunmiɛn kpa, yɛ be truli nvle wunmuan’n nun.+

8 I sin’n, famiɛn uflɛ wa sieli Ezipti mɛn’n. Famiɛn sɔ’n siman Zozɛfu. 9 Ɔ seli i sran’m be kɛ: “Amun nian! Izraɛlifuɛ’m b’a sɔn b’a tra e, yɛ b’a ɲan wunmiɛn b’a tra e.+ 10 Maan e kunndɛ like nga é yó naan b’a yaci trɛlɛ’n. Sɛ w’a yoman sɔ’n, sɛ alɛ wie tɔ’n, bé jrán e kpɔfuɛ’m be sin, yɛ be nin e kún. Kpɛkun bé jáso e nvle’n nun bé kɔ́.”

11 I sɔ’n ti’n, be sieli junman su kpɛn wie mun naan be mian be kɛ be di junman kekle kpa.+ Be kplannin Faraɔn i ninnge siewlɛ klɔ mun. Klɔ sɔ mun yɛle Pitɔmun nin Ramunsɛsi.+ 12 Sanngɛ kɛ bé klé be yalɛ’n, nn blɛ li yɛ b’a se be kɛ be trɛ-ɔ, nn bé trú nvle’n nun. Ɔ maan Izraɛlifuɛ’m be wun yoli be tɛ, yɛ srɛ dan kpa kunnin be.+ 13 I sɔ’n ti’n, Eziptifuɛ’m be fali Izraɛlifuɛ mun yoli be kanga, yɛ be miannin be kɛ be di junman kekle kpa.+ 14 Junman kekle mɔ be mian be kɛ be di’n ti’n b’a wunman be wun fɛ. Be sili fa, be kpɛli bliki, yɛ be dili junman kwlaa nga kanga’m be di i fie’m be su’n. Nanwlɛ, kanga junman wafa kwlaa nga be dilɛ’n ti kekle’n yɛ be miannin be kplɔlɔlɔ kɛ be di-ɔ.+

15 I sin’n, Ezipti famiɛn’n kannin ndɛ kleli Ebre bla nga be uka bla mun naan b’a wu ba’n. Be flɛ kun kɛ Sifra, yɛ be flɛ kun kɛ Pia. 16 Ɔ seli be kɛ: “Kɛ amún úka Ebre bla mun ba wulɛ nun’n,+ amun nian ba nga bé wú i’n kpa.* Sɛ ba’n ti yasua’n, amun kun i. Sanngɛ sɛ ɔ ti bla’n, amun yaci i lɛ.” 17 Sanngɛ bla sɔ mɔ be uka bla mun naan be wu ba’n, be ɲin yi Ɲanmiɛn Kpli. Ɔ maan b’a yoman like nga Ezipti famiɛn’n seli be kɛ be yo’n. B’a kunman ba yasua mun.+ 18 I sin’n, Ezipti famiɛn’n flɛli ba wufuɛ mun, kpɛkun ɔ usali be kɛ: “?Ngue ti yɛ amun a kunman ba yasua mun-ɔn?” 19 Ba wufuɛ’m be seli Faraɔn kɛ: “Ebre bla’m be timan kɛ Ezipti bla’m be sa. Be ti juejue, kɛ ba wufuɛ’n jú be wun lɔ’n, nn b’a dun mmua b’a wu ba’n lalaa.”

20 Ɲanmiɛn yoli ba wufuɛ’m be ye. Izraɛlifuɛ’m be wa sɔnnin kpa, yɛ be wa ɲannin wunmiɛn kpa ekun. 21 Kɛ mɔ ba wufuɛ’m be ɲin yili Ɲanmiɛn’n ti’n, ɔ mannin be ba. 22 Kasiɛn su’n, Faraɔn seli i sran’m be kwlaa kɛ: “Amun fa Ebre ba nɔnman yasua nga bé wá wú be’n be kwlaa guɛ i Nili Nzue’n nun. Sanngɛ amun yaci ba bla’m be lɛ.”+

2 Blɛ sɔ’n nun’n, bian kun m’ɔ ti Levi osu’n nunfuɛ’n, ɔ jali Levi akpasua’n nun bla kun.+ 2 Bla’n wunnzɛli, yɛ ɔ wuli ba yasua kun. Kɛ ɔ wunnin kɛ ba’n ti klanman dan’n, ɔ fɛ i fiali lele anglo nsan.+ 3 Kɛ ɔ wunnin kɛ ɔ kwlá fɛmɛn i fiaman kun’n,+ ɔ fali gbogbo* kun mɔ papirisi* yɛ be fa wuli’n, ɔ wɛsɛli i wun gudrɔn nin waka bue nzue, kpɛkun ɔ fali ba’n lali nun. Ɔ fali gbogbo’n ko sieli i Nili Nzue’n i nuan lɔ ndɛ’m be afiɛn. 4 Ba’n i niaan bla’n+ jrannin mmua lɔ naan ɔ́ nían sa ng’ɔ́ wá jú ba’n su’n.

5 Faraɔn i wa bla’n bali Nili Nzue’n nun wunnzinlɛ. Yɛ i junman difuɛ bla’m be ɔli wlanwlanlɛ Nili Nzue’n i nuan su lɛ. Kpɛkun ɔ wunnin gbogbo’n ndɛ’m be afiɛn lɔ. Kɛ ɔ wunnin i cɛ’n, ɔ sunmɛnnin i kanga bla’n kɛ ɔ ko fa bla.+ 6 Kɛ ɔ tikeli su’n ɔ wunnin ba’n, ɔ su sun. Ba’n yoli i annvɔ, yɛ ɔ seli kɛ: “Ebre’m be mma’m be nun kun-ɔn.” 7 Kɛ ɔ yoli sɔ’n, ba’n i niaan bla’n seli Faraɔn i wa bla’n kɛ: “?A kunndɛ kɛ n ko flɛ Ebre bla kun naan ɔ nian ba’n i lika man wɔ?” 8 Faraɔn i wa bla’n seli i kɛ: “Ɛɛn-ɛn, kɔ!” Kɛ ɔ kannin sɔ cɛ’n, ba bla’n ko flɛli ba’n i nin’n.+ 9 Faraɔn i wa bla’n seli i kɛ: “Fa ba nga naan niɛn i lika man min, ń tánnin ɔ kalɛ.” Ɔ maan bla’n fali ba’n, kpɛkun ɔ niɛnnin i lika. 10 Kɛ ba’n ɲinnin kan’n, ɔ fɛ i ko mannin Faraɔn i wa bla’n, yɛ ɔ kacili i wa.+ Ɔ flɛli i kɛ Moizi.* Ɔ seli kɛ: “Kɛ mɔ n fɛli i nzue’n nun’n ti-ɔ.”+

11 Kɛ Moizi yoli kaklaka’n,* cɛn kun’n, ɔ ɔli i niaan’m be wun lɔ naan ɔ́ kó nían junman kekle nga be di’n.+ Kpɛkun ɔ wunnin kɛ Eziptifuɛ kun su bo i niaan Ebre kun. 12 Ɔ nian wa nian wa mɔ w’a wunman sran fi’n, kpɛkun ɔ kunnin Eziptifuɛ’n, kpɛkun ɔ fɛ i fiali aunɲan’n nun.+

13 Sanngɛ kɛ i aliɛ cɛnnin’n, ɔ fiteli. Ɔ́ nían-ɔn, Ebre yasua nɲɔn be su di utre. Ɔ seli nga i ndɛ yoman fɛ’n kɛ: “?Ngue ti yɛ a su bo ɔ niaan’n niɔn?”+ 14 Ɔ tɛli i su kɛ: “?Wan yɛ ɔ sieli wɔ kɛ a yo e su kpɛn nin e jɔlɛ difuɛ-ɔ? ?Annzɛ a kunndɛ kɛ á kún min kɛ nga a fa kunnin Ezipti bian’n sa?”+ Srɛ kunnin Moizi, yɛ ɔ seli kɛ: “Kannzu sran’m b’a ti ndɛ sɔ’n!”

15 I sin’n Faraɔn tili ndɛ sɔ’n, ɔ maan ɔ kunndɛli kɛ ɔ́ kún Moizi. Moizi wanndili Faraɔn ɲrun ɔli Madian mɛn’n+ nun lɔ. Kɛ ɔ juli lɔ’n, ɔ ko trannin ase gbo kun wun lɛ. 16 Madian lɔ Ɲanmiɛn ɲrun jranfuɛ’n+ le ba bla nso. I mma sɔ’m be bali nzue salɛ naan bé fá gúa be si i nnɛn’m be nzue nɔnwlɛ’m be nun naan nnɛn’m be nɔn. 17 Sanngɛ nnɛn kankanfuɛ’m be bali be wa fuannin be, kɛ nga be fa yo i titi’n sa. Kɛ Moizi wunnin i sɔ’n, ɔ jaso ukali* bla mun, yɛ ɔ mannin be nnɛn’m be nzue. 18 Kɛ be sali be sin be si Reiɛli*+ i wun lɔ’n, ɔ usali be kɛ: “?Ngue ti yɛ andɛ liɛ’n amun sali amun sin ndɛ sɔ-ɔ?” 19 Be seli i kɛ: “Eziptifuɛ kun+ deli e nnɛn kankanfuɛ’m be sa nun. I kpa bɔbɔ’n ɔ sali nzue mannin e, yɛ ɔ mannin nnɛn’m be nzue.” 20 Ɔ tɛli i mma’m be su kɛ: “?Ɔ o nin? ?Ngue ti yɛ amun yacili i lɔ-ɔ? Amun ko flɛ i naan e wa di like.” 21 I sin’n, Moizi kplinnin su kɛ ɔ nin bian’n bé trán. Kpɛkun bian’n fɛli i wa Sefora+ mannin Moizi naan ɔ kaci i yi. 22 Kɛ ɔ́ kɔ́ i ɲrun’n bla’n wuli ba. Ɔ tɔnnin i dunman kɛ Gɛɛsɔmun,*+ afin i waan: “M’an kaci aofuɛ mɛn uflɛ nun.”+

23 Kɛ i osu cuɛnnin nun kpa’n,* Ezipti famiɛn’n wa wuli.+ Sanngɛ Izraɛlifuɛ’m be te yo kanga. I sɔ’n ti’n, b’a yaciman kplinlɛ nin kpanlɛ. Be kpan flɛli Ɲanmiɛn kɛ ɔ uka be. Be kpanlɛ’n toli Ɲanmiɛn lɔ.+ 24 I agualiɛ su’n, Ɲanmiɛn tili be kplinlɛ’n,+ kpɛkun i wla kpɛnnin aenguɛ nga ɔ nin Abraamun nin Izaaki, ɔ nin Zakɔbu be trali’n su.+ 25 Ɔ maan Ɲanmiɛn fɛli i ɲin sieli i Izraɛlifuɛ’m be su, yɛ ɔ wunnin be su afɛ’n.

3 Moizi kacili i sia Zetro m’ɔ ti Madian lɔ Ɲanmiɛn ɲrun jranfuɛ’n, i nnɛn kankanfuɛ.+ Cɛn kun m’ɔ́ fɛ́ i nnɛn mun kɔ́ aawlɛ flɛnnɛn’n i wia atɔliɛ lɔ’n, ɔ juli Ɲanmiɛn Kpli i oka m’ɔ o Orɛbu+ lɔ’n i wun lɛ. 2 Zoova i anzi’n yili i wun nglo kleli i sin taaman kun nun, susrɛ kun m’ɔ ti owieowie’n i afiɛn.+ Kɛ ɔ niannin lɔ’n, ɔ wunnin kɛ susrɛ’n jue, sanngɛ ɔ yraman. 3 Moizi seli kɛ: “Ń má mántan lɔ naan ń nían abonuan sa sɔ’n kpa, naan ń wún sa nga ti yɛ susrɛ’n yraman’n.” 4 Kɛ Zoova wunnin kɛ ɔ su mantan lɔ naan ɔ́ kó nían’n, kpɛkun ɔ o susrɛ’n nun lɔ w’a flɛ i. I waan: “Moizi, Moizi!” Ɔ tɛli su kɛ: “Min yɛ n wo yɛ.” 5 Ɔ seli i kɛ: “Nán mantan wa. Yi ɔ ja ngbabua’n, afin lika nga a o nun yɛ’n, ɔ ti Ɲanmiɛn i liɛ klonglo.”

6 Ɔ seli ekun kɛ: “N ti ɔ si i Ɲanmiɛn, nin Abraamun i Ɲanmiɛn,+ ɔ nin Izaaki i Ɲanmiɛn,+ nin Zakɔbu i Ɲanmiɛn.”+ Moizi kɛtɛli i ɲrun. Srɛ m’ɔ kun i’n ti’n, ɔ kunndɛman kɛ ɔ́ nían Ɲanmiɛn Kpli. 7 Zoova kan guali su kɛ: “N wunnin afɛ ng’ɔ o min sran’m be su Ezipti lɔ’n, yɛ kɛ bé mían be kɛ be di junman’n, kpanlɛ nga be kpan’n n ti. N si afɛ ng’ɔ o be su’n i kpa.+ 8 Ń má jrá, ń kó dé be Eziptifuɛ’m be sa nun.+ Kpɛkun ń fá be ń kɔ́ mɛn kun m’ɔ ti kpa’n, m’ɔ cɛnnin’n i nun. Nɔnnɔn nin awɛma nzue be sonji mɛn sɔ’n nun.+ Ɔ ti Kanaanfuɛ mun, nin Ɛtifuɛ mun, nin Amɔɔfuɛ mun, nin Perizifuɛ mun, nin Ivifuɛ mun, ɔ nin Zebisifuɛ’m be mɛn.+ 9 Nian! Izraɛlifuɛ’m be kpanlɛ’n toli min wa. Yɛ n wunnin wafa nga Eziptifuɛ’m be yo be tɛtɛ’n.+ 10 Nian, ń má súnman wɔ Faraɔn sin, naan ko fa Izraɛlifuɛ mɔ be ti min sran mun’n Ezipti lɔ fite.”+

11 Sanngɛ Moizi seli Ɲanmiɛn Kpli kɛ: “?Wan yɛle min mɔ ń kó tó Faraɔn lɔ naan m’an fa Izraɛlifuɛ mun Ezipti lɔ m’an fite-ɔ?” 12 Ɔ tɛli su kɛ: “Ń má jrán ɔ sin.+ Nzɔliɛ ng’ɔ kle kɛ min yɛ n sunmannin wɔ’n yɛ: Kɛ a ko fa sran mun Ezipti lɔ ko fite’n, amún wá sú Ɲanmiɛn Kpli oka nga su.”+

13 Sanngɛ Moizi seli Ɲanmiɛn Kpli kɛ: “Sɛ n to Izraɛlifuɛ’m be lɔ naan n se be kɛ: ‘Amun nannan’m be Ɲanmiɛn’n sunmannin min amun sin,’ naan be usa min kɛ: ‘?Be flɛ i sɛ?’+ ?Ń tɛ́ be su sɛ?” 14 Ɔ maan Ɲanmiɛn tɛli Moizi su kɛ: “Nga n klo kɛ ń káci’n yɛ ń káci-ɔ.”*+ Ɔ kan guali su ekun kɛ: “Ndɛ ng’ɔ fata kɛ a kan kle Izraɛlifuɛ mun’n yɛ: ‘Ń Káci sunmannin min amun sin.’”+ 15 Ɲanmiɛn seli Moizi ekun kɛ:

“Ndɛ ng’ɔ fata kɛ a kan kle Izraɛlifuɛ mun’n yɛ: ‘Zoova m’ɔ ti amun nannan’m be Ɲanmiɛn’n, Abraamun i Ɲanmiɛn’n,+ nin Izaaki i Ɲanmiɛn’n,+ nin Zakɔbu i Ɲanmiɛn’n+ sunmannin min amun sin.’ Min dunman m’ɔ o lɛ tititi’n yɛ ɔ o lɛ-ɔ.+ Dunman sɔ’n yɛ n klo kɛ ɔ ka sran’m be klun tititi-ɔ. 16 Siɛn’n, kɔ ko yiayia Izraɛli kpɛnngbɛn mun naan se be kɛ: ‘Zoova m’ɔ ti amun nannan’m be Ɲanmiɛn’n, nin Abraamun i Ɲanmiɛn’n, nin Izaaki i Ɲanmiɛn’n, nin Zakɔbu i Ɲanmiɛn’n, ɔ yili i wun nglo kleli min, yɛ ɔ seli kɛ: “N fali min ɲin n sieli amun su,+ yɛ n wunnin sa nga be su fa yo amun Ezipti mɛn’n nun’n. 17 I sɔ’n ti’n, min waan ń dé amun ɲrɛnnɛn nun+ Eziptifuɛ’m be sa nun, naan ń fá amun ń kɔ́ Kanaanfuɛ mun, nin Ɛtifuɛ mun, ɔ nin Amɔɔfuɛ mun,+ nin Perizifuɛ mun, nin Ivifuɛ mun, yɛ Zebisifuɛ’m+ be mɛn’n nun lɔ. Nɔnnɔn nin awɛma nzue be sonji mɛn sɔ’n nun.”’+

18 “Saan bé síe be su ɔ nuan bo,+ kpɛkun a nin Izraɛli kpɛnngbɛn mun amún kó wún Ezipti famiɛn’n i wun. Yɛ ɔ fata kɛ amun se i kɛ: ‘Zoova m’ɔ ti Ebre’m be Ɲanmiɛn’n+ kannin ndɛ kleli e. I sɔ’n ti’n, yaci, man e atin naan e nanti cɛn ba nsan e wɔ aawlɛ flɛnnɛn’n nun lɔ naan e ko yi tɛ e man e Ɲanmiɛn Zoova.’+ 19 Sanngɛ n bɔbɔ n si kpa kɛ Ezipti famiɛn’n su manman amun atin kɛ amun wɔ, saan ń fá min tinmin’n ń míɛn i yɛ ɔ́ mán amun atin-ɔn.+ 20 Ɔ maan ń má tínngɛ min sa’n nun, yɛ ń yó abonuan sa wie mun Ezipti mɛn’n nun. I sin’n, ɔ́ mán amun atin kɛ amun wɔ.+ 21 Ń má yó maan Eziptifuɛ’m bé wá kló amun sa. Ɔ maan kɛ amún kɔ́’n, amun su faman amun sa ngbɛn kɔman.+ 22 Maan bla’m be tinuntinun be se be nga be tran be wun koko lɛ’n nin be nga be nin be tran awlo kun’n, naan be man be sika nin sika ɔkwlɛ ninnge mun, ɔ nin tralɛ. Yɛ amún fá wlá amun mma yasua nin amun mma bla mun. Amún fɛ́n Eziptifuɛ’m be bo ninnge mun.”+

4 Sanngɛ Moizi tɛli su kɛ: “?Yɛ sɛ b’a lafiman min su naan b’a faman min ndɛ’n su’n nin?+ Afin bé sé kɛ: ‘Zoova w’a yimɛn i wun nglo w’a kleman wɔ.’” 2 Yɛ Zoova seli kɛ: “?Ngue yɛ ɔ o ɔ sa nun lɛ’n niɔn?” Ɔ tɛli su kɛ: “Kpɔnman-ɔn.” 3 Ɔ seli i kɛ: “Yi i ase.” Ɔ maan ɔ yili i ase, kpɛkun kpɔnman’n kacili wuo.+ Moizi ka lɛ ɔli siɛn kan. 4 Zoova seli Moizi kɛ: “Tinngɛ ɔ sa’n naan trɛ i lua’n.” Ɔ tinngɛli i sa’n naan w’a trɛ i, kpɛkun ɔ kacili kpɔnman i sa nun ekun. 5 Ɲanmiɛn seli i kɛ: “Sɛ a yo sɔ’n, bé láfi su kɛ Zoova m’ɔ ti be nannan’m be Ɲanmiɛn’n, m’ɔ ti Abraamun i Ɲanmiɛn’n, nin Izaaki i Ɲanmiɛn’n nin Zakɔbu i Ɲanmiɛn’n,+ ɔ yili i wun nglo kleli wɔ.”+

6 Zoova seli i ekun kɛ: “Fa ɔ sa’n wlɛ i ɔ tralɛ’n i bue ng’ɔ o ɔ wue’n su’n i bo.” Ɔ fɛli i sa’n wlɛli i tralɛ’n i bo. Kɛ ɔ́ yí i sa’n, kokowe w’a guɛ i sa’n i wun, ɔ fɛn fuai kɛ laglasi ng’ɔ fin nglo lɔ gua munkɛnmunkɛn’n sa.+ 7 Ɔ seli i kɛ: “Fa ɔ sa’n wlɛ i ɔ tralɛ’n i bue ng’ɔ o ɔ wue’n su’n i bo ekun.” Ɔ maan ɔ fɛli i sa’n wlɛli i tralɛ’n i bo. Kɛ ɔ́ yí i sa’n, i sa’n w’a sin i osu’n nun, w’a yo kɛ i wunnɛn onga’n sa. 8 Ɔ seli i kɛ: “Sɛ b’a lafiman ɔ su’n, annzɛ b’a faman be ɲin b’a sieman nzɔliɛ klikli’n su’n, saan bé fá be ɲin bé síe i nzɔliɛ nɲɔn su’n su.+ 9 Sɛ kusu b’a lafiman abonuan sa nɲɔn sɔ’m be su’n naan b’a faman ɔ ndɛ’n su’n, ko sa Nili Nzue’n wie naan utu i asiɛ wun. Nzue nga a sɛli i Nili nun’n, ɔ́ káci mmoja asiɛ kee’n su.”+

10 Moizi seli Zoova kɛ: “Zoova yaci, ijɔlɛ’n ti kekle min sa nun. Kɛ ɔ fɛ i laa lele m’ɔ́ fá jú blɛ mɔ a kan ndɛ kleli ɔ sufuɛ’n, n te o min osu kunngba’n nun. N siman ijɔ,* yɛ min taaman’n bliman ndɛndɛ.”+ 11 Zoova seli i kɛ: “?Wan yɛ ɔ yili klɔ sran’n i nuan’n niɔn? ?Wan yɛ ɔ yo maan sran yo bobo annzɛ sutrefuɛ-ɔ? ?Wan yɛ ɔ yo maan sran wun ase kpa annzɛ ɔ yo aɲinsifuɛ-ɔ? ?Nán min Zoova-ɔ? 12 Siɛn’n, kɔ. Kɛ á wá kán ndɛ’n, ń jrán ɔ sin, yɛ ń klé wɔ ndɛ ng’ɔ fata kɛ a kan’n.”+ 13 Sanngɛ ɔ seli kɛ: “Zoova yaci, kunndɛ ɔ klun su sran uflɛ naan sunmɛn i.” 14 Zoova fali Moizi i wun ya. Ɔ seli i kɛ: “?Yɛ ɔ niaan bian Aarɔn+ m’ɔ ti Levifuɛ’n nin? N si kɛ ɔ si ijɔ kpa. Ɔ o atin’n su ɔ su ba ɔ atin kpalɛ. Kɛ ɔ́ wá wún wɔ’n, i klun wá jɔ́ kpa.+ 15 Kan ndɛ’n kle i, yɛ ndɛ ng’ɔ fata kɛ ɔ kan’n fa wlɛ i nuan.+ Kɛ amún kán ndɛ’n, ń jrán amun sin,+ yɛ ń klé amun like ng’ɔ fata kɛ amun yo’n. 16 Ɔ́ kán ndɛ klé nvlefuɛ mun mán wɔ. Ɔ́ káci ɔ nuan ijɔfuɛ, yɛ ɔ kusu á káci kɛ i Ɲanmiɛn sa.*+ 17 Á wá trá kpɔnman nga nun, kpɛkun á wá fá yó abonuan sa mun.”+

18 Ɔ maan Moizi sɛli i sin i sia Zetro+ i wun lɔ, kpɛkun ɔ seli i kɛ: “Yaci, n kunndɛ kɛ ń kɔ́. Min waan ń sá min sin min niaan nga be o Ezipti lɔ’n be wun lɔ naan ń kó nían, sɛ be te o nguan nun-o.” Zetro seli Moizi kɛ: “Atin o nun, a kwla kɔ.” 19 I sin’n, Zoova kannin ndɛ kleli Moizi Madian lɔ. Ɔ seli i kɛ: “Kɔ, sa ɔ sin Ezipti lɔ, afin be kwlaa nga be kunndɛ kɛ bé kún wɔ’n b’a wu.”+

20 Moizi fɛli i yi nin i mma mun fuli aflunmun kun su, kpɛkun ɔ fali Ezipti atin’n. Asa ekun’n, ɔ fali Ɲanmiɛn Kpli i kpɔnman’n trali nun. 21 I sin’n, Zoova seli Moizi kɛ: “Sɛ a sa ɔ sin Ezipti lɔ’n, abonuan sa nga n mannin wɔ tinmin kɛ a yo’n, nian nun yo be kwlaa sɔ’n Faraɔn i ɲrun.+ Sanngɛ ń má yáci i lɛ naan i awlɛn’n kete,+ yɛ ɔ su manman min sran’m be atin kɛ be wɔ.+ 22 Se Faraɔn kɛ: ‘Ndɛ nga Zoova kan’n yɛ: “Izraɛli ti min wa, min wa klikli’n niɔn.+ 23 Ń kán klé wɔ, man min wa’n i atin naan ɔ ko su min. Sanngɛ sɛ w’a mɛnmɛn i atin’n, ń kún ɔ wa’n, ɔ wa klikli’n.”’”+

24 Kɛ be juli atin nun mɔ bé ló wunmiɛn lika kun nun’n, Zoova+ toli i lɛ, yɛ ɔ kunndɛli kɛ ɔ́ kún i.+ 25 Kasiɛn su’n, Sefora+ fali yɔbuɛ kun m’ɔ la kpa’n fa kpɛli i wa’n i yasua lika’n i ti kplo’n, naan w’a fa kɛn i ja’n. Kpɛkun ɔ seli kɛ: “Mmoja ti’n, w’a kaci min wun.” 26 Ɔ maan Ɲanmiɛn yacili i lɛ ɔli. Blɛ sɔ’n nun’n, klɛn wlalɛ’n ti’n, Sefora seli kɛ: “Mmoja ti’n, w’a kaci min wun.”

27 I sin’n, Zoova seli Aarɔn kɛ: “Kɔ Moizi sin aawlɛ flɛnnɛn’n nun lɔ.”+ Ɔ maan ɔ ɔli, kpɛkun ɔ nin i be yiali Ɲanmiɛn Kpli i oka’n su lɔ.+ Ɔ yoli i like.* 28 Moizi kannin Zoova m’ɔ sunmɛnnin i’n i ndɛ ng’ɔ kannin’n i kwlaa kleli Aarɔn.+ Kpɛkun abonuan sa ng’ɔ seli i kɛ ɔ yo be’n, ɔ kannin be kwlaa be ndɛ kleli i.+ 29 Kɛ ɔ yoli sɔ’n, Moizi nin Aarɔn be ɔli be ko yiali Izraɛli kpɛnngbɛn’m be kwlaa.+ 30 Aarɔn kannin ndɛ nga Zoova kan kleli Moizi’n i kwlaa kleli be, kpɛkun ɔ yoli abonuan sa mun+ nvlefuɛ’m be ɲrun lɛ. 31 Kɛ nvlefuɛ’m be wunnin sa sɔ mun’n, be lafili Moizi su.+ Kɛ be tili i kɛ Zoova kpɛli i ɲin Izraɛlifuɛ’m be su+ naan ɔ wunnin be su afɛ’n,+ be kotoli kpɛkun be manmannin Ɲanmiɛn.

5 I sin’n, Moizi nin Aarɔn be ɔli be ko seli Faraɔn kɛ: “Ndɛ nga Zoova m’ɔ ti Izraɛli Ɲanmiɛn’n kan’n yɛ: ‘Yaci min sran’m be nun naan be wɔ be ko di cɛn be man min aawlɛ flɛnnɛn’n nun lɔ.’” 2 Sanngɛ Faraɔn seli be kɛ: “?Wan yɛle Zoova+ mɔ min ɲin ko yi i mɔ i ti’n ń yáci Izraɛlifuɛ’m be nun-ɔn?+ N siman Zoova mlɔnmlɔn. I kpa bɔbɔ’n n su manman Izraɛlifuɛ’m be atin kɛ be wɔ.”+ 3 Sanngɛ be tɛli i su kɛ: “Ebre’m be Ɲanmiɛn’n kannin ndɛ kleli e. Yaci, e waan é fá cɛn nsan é kɔ́ aawlɛ flɛnnɛn’n nun lɔ naan é kó yí tɛ é mán e Ɲanmiɛn Zoova.+ Sɛ w’a yoman sɔ’n, ɔ́ fá tukpacɛ annzɛ tokofi núnnún e.” 4 Ezipti famiɛn’n tɛli be su kɛ: “?Moizi, a nin Aarɔn, ngue ti yɛ amun su yo naan sran’m be yaci be junman’n i dilɛ-ɔ? Amun sa amun sin be ko di junman’n!”*+ 5 Faraɔn kan guali su kɛ: “Amun wun kɛ amun nvlefuɛ’m be sɔnnin mɛn nga nun. Kpɛkun amun waan amún yó naan be yaci be junman’n i dilɛ.”

6 Cɛn kunngba sɔ’n nun’n, Faraɔn seli junman sunianfuɛ mun nin be junman difuɛ’m be su kpɛn’m be kɛ: 7 “Nán amun man nvlefuɛ’m be ijre kɛ be fa kpɛ bliki kun.+ Maan be bɔbɔ be wɔ naan be ko kunndɛ ijre. 8 Sanngɛ maan amun mian be kɛ be kpɛ bliki nga be kpɛ i laa’n i nuan su. Nán amun ti su man be. Afin be sa su kan ase.* I sɔ’n ti yɛ be kpan se kɛ ‘e kunndɛ kɛ é kɔ́, e kunndɛ kɛ é yí tɛ é mán e Ɲanmiɛn’n’ niɔn! 9 Amun mian be naan be di junman kekle kpa. Nán maan be ɲan be ti kaan sa. I liɛ’n, be su sieman be su ato ndɛ’m be bo.”

10 I sɔ’n ti’n, junman sunianfuɛ mun+ nin be junman difuɛ’m be su kpɛn’m be ɔli be ko seli nvlefuɛ mun kɛ: “Ndɛ nga Faraɔn kannin’n yɛ: ‘N su manman amun ijre kun. 11 Amun bɔbɔ be wɔ be ko kunndɛ ijre lika kwlaa nga amun kwla ɲan wie lɛ’n, sanngɛ be su timan amun junman’n su kaan sa.’” 12 Ɔ maan nvlefuɛ’m be bo sanndili Ezipti mɛn’n i lika kwlaa nun kɛ bé kó kúnndɛ ijre. 13 Be junman sunianfuɛ’m be jin be su, be se be kɛ: “Maan cɛn kwlaa, amun tinuntinun amun wie amun junman’n i di, kɛ blɛ mɔ be te man amun ijre’n sa.” 14 Asa kusu’n, be boli Izraɛlifuɛ nga Faraɔn i junman sunianfuɛ’m be sieli be junman su kpɛn’n.+ Be usali be kɛ: “?Ngue ti yɛ bliki nga amun kpɛli’n, w’a juman nga be kleli amun kɛ amun kpɛ’n su-ɔ? Amun yoli sɔ anunman, kpɛkun andɛ ekun.”

15 Ɔ maan Izraɛlifuɛ’m be junman su kpɛn’m be ko wunnin Faraɔn wun. Be seli i kɛ: “?Ngue ti yɛ a yo ɔ sufuɛ’m be kɛ nga sa-ɔ? 16 Be manman ɔ sufuɛ’m be ijre, kpɛkun be se e kɛ: ‘Amun kpɛ bliki!’ Be bo ɔ sufuɛ mun, kusu nn ɔ sran’m be bɔbɔ yɛ be yoli sa’n niɔn.” 17 Sanngɛ ɔ seli be kɛ: “Amun sa su kan ase!* Amun sa su kan ase!*+ I sɔ’n ti yɛ amun se kɛ ‘e kunndɛ kɛ é kɔ́, e kunndɛ kɛ é yí tɛ é mán Zoova’n’ niɔn.+ 18 Ɔ maan an wɔ, amun sa amun sin ko di junman’n! Be su manman amun ijre fi, sanngɛ bliki nga amún kpɛ́’n, maan i nuan’n ju kɛ laa liɛ’n sa.”

19 Izraɛlifuɛ’m be junman su kpɛn’m be wunnin kɛ sa dan w’a ɲan be. Afin be seli be kɛ: “Ɔ fataman mlɔnmlɔn kɛ bliki nga amun kpɛ i cɛn ba kun nun’n i su kpɛ.” 20 Kɛ bé fín Faraɔn i wun lɔ bé fíte’n, be nin Moizi nin Aarɔn be yiali. Be o gua su lɛ be su minndɛ be. 21 Kɛ be wunnin be cɛ’n, be seli be kɛ: “Maan Zoova wun amun, yɛ ɔ di amun jɔlɛ. Afin amun a yo maan Faraɔn nin i sufuɛ’m be ɲin w’a ci e,* amun a fa tokofi b’a wla be sa nun kɛ be fa kun e.”+ 22 Moizi kpɛli i ɲin Zoova wun lɔ. Ɔ seli kɛ: “?Zoova, ngue ti yɛ a kleli nvlefuɛ nga’m be ɲrɛnnɛn-ɔn? ?Ngue ti yɛ a sunmannin min-ɔn? 23 Kɛ ɔ fin cɛn mɔ n ko ijɔli ɔ nuan Faraɔn i ɲrun’n,+ ɔ kleli nvlefuɛ nga’m be ɲrɛnnɛn trali laa’n,+ yɛ w’a deman ɔ nvlefuɛ mun.”+

6 Ɔ maan Zoova seli Moizi kɛ: “Siɛn’n, á wá wún like nga ń má fá yó Faraɔn’n.+ Ń fá min tinmin’n ń míɛn i kɛ ɔ yaci be nun naan be wɔ. Ń fá min tinmin’n ń míɛn i naan ɔ fuan be i nvle’n nun.”+

2 I sin’n, Ɲanmiɛn seli Moizi kɛ: “N ti Zoova. 3 N yili min wun nglo n kleli Abraamun, nin Izaaki, ɔ nin Zakɔbu be kɛ n ti Ɲanmiɛn m’ɔ Kwla Like Kwlaa Yo’n.+ Sanngɛ min dunman Zoova+ fuɛ’n m’an yimɛn i nglo m’an kleman be.+ 4 Asa ekun’n, e nin be e trali aenguɛ naan ń fá Kanaan mɛn’n mɔ be trannin nun laa kɛ aofuɛ sa’n ń mán be.+ 5 Siɛn’n, m’an ti Izraɛlifuɛ mɔ Eziptifuɛ’m b’a fa be b’a yo be kanga’n be kplinlɛ’n. Yɛ min wla kpɛn min aenguɛ’n su.+

6 “Ɔ maan se Izraɛlifuɛ’m be kɛ: ‘N ti Zoova. Ń má yó maan junman kekleekle nga Eziptifuɛ’m be mian amun kplɔlɔlɔ kɛ amun di’n, amun su dimɛn i kun. Ń má dé amun, yɛ amun su yoman be kanga kun.+ Ń tínngɛ min sa’n* nun, kpɛkun ń tú be fɔ kekle kpa ń fá dé amun.+ 7 Ń má fá amun ń yó min nvle, yɛ ń káci amun Ɲanmiɛn.+ Yɛ amún wá sí jrɛiin kɛ n ti amun Ɲanmiɛn Zoova, naan min yɛ n su de amun Eziptifuɛ mɔ be mian amun kplɔlɔlɔ kɛ amun di junman kekle’n, be sa nun-ɔn. 8 Ń fá amun ń kɔ́ mɛn nga n tali Abraamun, nin Izaaki, ɔ nin Zakɔbu be nda* kɛ ń fá mán be’n i nun lɔ. Yɛ ɔ́ káci amun liɛ.+ N ti Zoova.’”+

9 I sin’n, Moizi ko kannin ndɛ sɔ’n kleli Izraɛlifuɛ mun. Sanngɛ, b’a sieman be su i nuan bo. Afin be sa sin w’a bubu be, yɛ kanga junman’n tin be su dan.+

10 Kɛ ɔ yoli sɔ’n, Zoova kannin ndɛ kleli Moizi, ɔ seli i kɛ: 11 “Kɔ naan ko se Faraɔn m’ɔ ti Ezipti famiɛn’n kɛ ɔ fata kɛ ɔ man Izraɛlifuɛ’m be atin naan be jaso i mɛn’n nun.” 12 Moizi tɛli Zoova su kɛ: “Nian, Izraɛlifuɛ’m b’a tieman min ndɛ’n.+ ?Faraɔn yɛ ɔ́ wá tíe min mɔ n siman ijɔ’n min nuan ndɛ’n niɔn?”+ 13 Sanngɛ Zoova kleli Moizi nin Aarɔn ndɛ ng’ɔ fata kɛ be kan kle Izraɛlifuɛ mun nin Faraɔn m’ɔ ti Ezipti famiɛn’n, naan Izraɛlifuɛ’m b’a fin Ezipti mɛn’n nun b’a fite’n.

14 Be si’m be awlo’n i su kpɛn mun yɛ: Ribɛnin m’ɔ ti Izraɛli i wa klikli’n+ i mma mun yɛle Anɔku, Palu, Ɛzrɔn, yɛ Kaamin.+ Ribɛnin i osu’n nunfuɛ mun yɛ be o lɛ-ɔ.

15 Simeɔn i mma mun yɛle Zemuɛli, Zamɛn, Oadi, Zakɛn, Zoaa, yɛ Saulu m’ɔ ti Kanaan bla kun i wa’n.+ Simeɔn i osu’n nunfuɛ mun yɛ be o lɛ-ɔ.

16 Levi+ i mma’m be dunman mun, ɔ nin be awlobo mun yɛ: Gɛɛsɔnun, Keati, yɛ Merari.+ Levi dili afuɛ ya kun ablasan-nin-nso (137).

17 Gɛɛsɔnun i mma mun yɛle Libnin nin Simei, ɔ nin be awlobo mun.+

18 Keati i mma mun yɛle Amramun, Izeari, Ebrɔn, yɛ Uziɛli.+ Keati dili afuɛ ya kun ablasan-nin-nsan (133).

19 Merari i mma mun yɛle Mali nin Misi.

Levi i mma mun, ɔ nin be awlobofuɛ mun yɛ be o lɛ-ɔ.+

20 Amramun jɛli i si i niaan bla Zokebɛdi.+ Be wa yɛle Aarɔn nin Moizi.+ Amramun dili afuɛ ya kun afuɛ ablasan-nin-nso (137).

21 Izeari i mma mun yɛle Kore,+ Nefɛgi, yɛ Zikri.

22 Uziɛli i mma mun yɛle Misaɛli, Ɛlzafan,+ yɛ Sitri.

23 Aarɔn jali Eliseba m’ɔ ti Aminadabu i wa bla’n, mɔ i kunngba’n ɔ ti Nasɔn i niaan bla’n.+ Be wa yɛle Nadabu, Abiu, Eleazaa, yɛ Itamaa.+

24 Kore i mma mun yɛle Asii, Ɛlkana, yɛ Abiasafu.+ Kore i osu’n nunfuɛ mun yɛ be o lɛ-ɔ.+

25 Eleazaa+ m’ɔ ti Aarɔn i wa’n, ɔ jali Putiɛli i wa bla kun. Be wa yɛle Fineasi.+

Levi i osu’n nunfuɛ nga be yoli awlo kpɛn’n, ɔ nin be awlobo mun yɛ be o lɛ-ɔ.+

26 Zoova seli Aarɔn nin Moizi sɔ’n be kɛ: “Amun fa Izraɛlifuɛ mun akpasuaakpasua naan amun fin Ezipti mɛn’n nun fite’n.”+ 27 Moizi nin Aarɔn sɔ’n,+ be yɛ be ko kannin ndɛ kleli Faraɔn m’ɔ ti Ezipti famiɛn’n naan ɔ yaci Izraɛlifuɛ’m be nun naan be fin Ezipti mɛn’n nun be fite’n niɔn.

28 Cɛn sɔ’n nun’n, kɛ Zoova kán ndɛ klé Moizi Ezipti mɛn’n nun lɔ’n, 29 Zoova seli Moizi kɛ: “N ti Zoova. Ndɛ kwlaa nga ń kán klé wɔ yɛ’n, kan kle Faraɔn m’ɔ ti Ezipti famiɛn’n.” 30 I sin’n, Moizi seli Zoova kɛ: “Nian, n siman ijɔ. ?Ɔ́ yó sɛ naan Faraɔn w’a tie min nuan ndɛ’n?”+

7 I sin’n, Zoova seli Moizi kɛ: “Nian, m’an yo maan w’a kaci kɛ Ɲanmiɛn sa* Faraɔn i ɲrun, yɛ ɔ niaan bian Aarɔn káci ɔ nuan ijɔfuɛ.+ 2 Ndɛ kwlaa nga n kan kle wɔ’n, kan kle ɔ niaan bian Aarɔn naan i kusu kan kle Faraɔn. Kpɛkun ɔ́ mán Izraɛlifuɛ’m be atin naan be jaso i mɛn’n nun. 3 N kusu ń má yó naan Faraɔn i awlɛn’n kete.+ Ń má yí atrɛ kpanngban, yɛ ń yó abonuan sa kpanngban Ezipti mɛn’n nun.+ 4 Sanngɛ Faraɔn su tieman amun ndɛ’n. Ɔ maan ń má yí min tinmin’n i nglo Ezipti mɛn’n nun,* ń tú i fɔ kekle kpa,+ kpɛkun ń fá Izraɛlifuɛ mɔ be ti min nvle’n, mɔ be sɔnnin kpa’n* Ezipti mɛn’n nun ń fíte. 5 Kɛ ń má tínngɛ min sa Ezipti mɛn’n su mɔ ń fá Izraɛlifuɛ mun Eziptifuɛ’m be afiɛn ń fíte’n, Eziptifuɛ’m bé wá sí jrɛiin kɛ n ti Zoova.”+ 6 Moizi nin Aarɔn be yoli like nga Zoova seli be kɛ be yo’n. Be niannin su be yoli i sɛsɛsɛ. 7 Kɛ Moizi nin Aarɔn bé kán ndɛ klé Faraɔn’n, nn Moizi le afuɛ ablaɔcuɛ (80), yɛ Aarɔn le afuɛ ablaɔcuɛ-nin-nsan (83).+

8 Zoova seli Moizi nin Aarɔn be kɛ: 9 “Sɛ Faraɔn se amun kɛ ‘amun yo abonuan sa kun’n,’ se Aarɔn kɛ: ‘Fa ɔ kpɔnman’n naan yi i ase Faraɔn i ɲrun lɛ.’ Yɛ ɔ́ káci wuo dan kpa kun.”+ 10 Ɔ maan Moizi nin Aarɔn be ko toli Faraɔn. Like nga Zoova seli be kɛ be yo’n, be yoli i sɛsɛsɛ. Aarɔn yili i kpɔnman’n i ase Faraɔn nin i sran’m be ɲrun lɛ, kpɛkun ɔ kacili wuo dan kpa kun. 11 Sanngɛ Faraɔn flɛli sa sifuɛ mun nin wunnzue yifuɛ mun. Kpɛkun Ezipti lɔ atrɛ yifuɛ mun+ be fali be tinmin’n be yoli like kunngba sɔ’n wie.+ 12 Be tinuntinun be yili be kpɔnman’m be ase, kpɛkun be kpɔnman’m be kacili wuo dandan kpa. Sanngɛ Aarɔn i kpɔnman’n mɛnnin be kpɔnman liɛ mun. 13 Sanngɛ kɛ nga Zoova fa kannin’n sa’n, Faraɔn keteli i awlɛn’n,+ w’a tieman be ndɛ’n.

14 I sin’n, Zoova seli Moizi kɛ: “Faraɔn i awlɛn’n ti ketewa.+ W’a kplinman su kɛ ɔ́ yáci min sran’m be nun naan be wɔ. 15 Ainman nglɛmun’n, to Faraɔn lɔ. Ɔ́ wá fíte kɔ́ nzue’n i nuan lɔ! Ko jran Nili Nzue’n i nuan lɛ naan wun i wun. Fa kpɔnman m’ɔ kacili wuo’n tra nun.+ 16 Se i kɛ: ‘Zoova m’ɔ ti Ebre’m be Ɲanmiɛn’n, ɔ sunmannin min ɔ sin.+ I waan: “Yaci min nvlefuɛ’m be nun naan be ko su min aawlɛ flɛnnɛn’n nun lɔ.” Sanngɛ lele nin andɛ’n, a nin-a faman min ndɛ’n su. 17 Ndɛ nga Zoova kan’n yɛ: “Sa nga ń má yó i yɛ’n ti’n, á wá sí kɛ n ti Zoova.+ Ń má fá kpɔnman ng’ɔ o min sa nun yɛ’n ń fá fín Nili Nzue’n su, kpɛkun nzue’n káci mmoja. 18 Jue nga be o Nili Nzue’n nun’n bé wú, Nili Nzue’n wá bɔ́n tɛ kpa, Eziptifuɛ’m be su kwlá nɔnman.”’”

19 I sin’n, Zoova seli Moizi kɛ: “Se Aarɔn kɛ: ‘Fa ɔ kpɔnman’n naan tinngɛ ɔ sa’n nzue nga be o Ezipti mɛn’n nun’n be su.+ Tinngɛ ɔ sa’n nzue ba mun, nin nzue sama mun,* nin nzue lika mun,+ nin nzue jranwlɛ’m be kwlaa be su, naan be kaci mmoja.’ Mmoja wá trán Ezipti mɛn’n i lika’n kwlaa nun, nzue nga be o waka sɛ nin yɔbuɛ sɛ’m be nun bɔbɔ’n bé káci mmoja wie.” 20 Be ja nun lɛ’n, Moizi nin Aarɔn be yoli like nga Zoova seli be kɛ be yo’n i sɛsɛsɛ. Ɔ mannin kpɔnman’n su, kpɛkun ɔ fa finnin Nili Nzue’n su Faraɔn nin i sran’m be ɲrun lɛ. Nzue wunmuan’n kacili mmoja.+ 21 Jue nga be o nzue’n nun’n be wuli,+ nzue’n bɔnnin tɛ kpa, kpɛkun Eziptifuɛ’m b’a kwlá nɔnman Nili Nzue’n kun.+ Mmoja trannin Ezipti mɛn’n i lika’n kwlaa nun.

22 Sanngɛ Ezipti mɛn’n nun atrɛ yifuɛ’m be fali be tinmin’n be yoli like kunngba’n wie.+ Ɔ maan kɛ nga Zoova fa kannin’n sa’n, Faraɔn keteli i awlɛn’n, w’a tieman be ndɛ’n.+ 23 I sin’n, Faraɔn sɛli i sin i awlo, w’a buman sa sɔ’n i ndɛ. 24 Eziptifuɛ’m be kwlaa be fuli kunman mun Nili Nzue’n i wun koko lɛ naan bé kúnndɛ nzue bé nɔ́n. Afin be kwlá nɔnman Nili Nzue’n kun. 25 Kɛ Zoova i sa kannin Nili Nzue’n, ɔ dili cɛn ba klonglo nso.

8 I sin’n, Zoova seli Moizi kɛ: “Ko wun Faraɔn wun naan se i kɛ: ‘Ndɛ nga Zoova kan’n yɛ: “Man min sran’m be atin naan be ko su min.+ 2 Sanngɛ sɛ a te jran su kɛ a manman be atin’n, ń má yó maan klɛ’m bé trú ɔ mɛn’n nun.+ 3 Klɛ’m bé wá sɔ́n kpa Nili Nzue’n nun, bé fíte kpɛkun bé wlú ɔ sua’n nun, bé wlú ɔ sua ba’n nun, bé fú ɔ bɛ’n su. Bé wlú ɔ sufuɛ’m be sua’m be nun, bé fú ɔ sran’m be su, bé wlú ɔ kpanwun tɔnwlɛ nin ɔ sanmlɛn fɔtɔlɛ ninnge’m*+ be nun.+ 4 Klɛ’m bé fú ɔ bɔbɔ su, nin ɔ sran mun, ɔ nin ɔ sufuɛ’m be kwlaa be su.”’”

5 I sin’n, Zoova seli Moizi kɛ: “Se Aarɔn kɛ: ‘Fa ɔ kpɔnman’n naan tinngɛ ɔ sa’n nzue ba mun, nin Nili’n i sama mun, ɔ nin nzue lika’m be su. Yo maan klɛ’m be fite Ezipti mɛn’n wunmuan’n nun.’” 6 Aarɔn tinngɛli i sa’n Ezipti lɔ nzue’m be su, kpɛkun klɛ’m be boli fitelɛ bo, be truli Ezipti mɛn wunmuan’n nun. 7 Sanngɛ atrɛ yifuɛ’m be fali be tinmin’n be yoli i kunngba’n wie, be kusu be yoli maan klɛ’m be fiteli Ezipti mɛn’n nun.+ 8 I sin’n, Faraɔn flɛli Moizi nin Aarɔn yɛ ɔ seli be kɛ: “Amun kpata Zoova naan ɔ yi klɛ mun e nin min sran mun e su.+ Afin ń má yáci amun nvlefuɛ’m be nun naan be ko yi tɛ be man Zoova.” 9 Kɛ ɔ yoli sɔ’n, Moizi seli Faraɔn kɛ: “Ń srɛ́ ɔ kpa, ɔ bɔbɔ kle min blɛ nga i nun yɛ ɔ fata kɛ n srɛ naan klɛ’m b’a jaso wɔ nin ɔ sufuɛ mun, nin ɔ sran’m be su, nin ɔ sua’m be nun’n. Nili Nzue’n i nun ngunmin yɛ bé ká-ɔ.” 10 Ɔ tɛli i su kɛ: “Ainman.” Ɔ maan ɔ seli i kɛ: “Ɔ́ yó kɛ nga a fa kannin’n sa. I liɛ’n, á wá sí kɛ sran fi timan kɛ e Ɲanmiɛn Zoova sa.+ 11 Klɛ’m bé wá jáso ɔ bɔbɔ nin ɔ sufuɛ mun nin ɔ sran’m be su. Nili Nzue’n nun ngunmin yɛ bé ká-ɔ.”+

12 Moizi nin Aarɔn be jasoli Faraɔn i ɲrun lɛ be ɔli. Moizi kpatali Zoova kɛ ɔ yi klɛ m’ɔ fali be bali Faraɔn su’n.+ 13 Zoova yoli like nga Moizi seli i kɛ ɔ yo’n. Ɔ maan klɛ’m be boli wulɛ bo sua’m be nun, nin awlo’m be nun, ɔ nin fie’m be su. 14 Be tiantiannin be nuan kwlekwle kpanngban kpa, yɛ lika’n nun bɔnnin tɛ kpa. 15 Kɛ Faraɔn wunnin kɛ lika’n w’a tɔ fɔun kan’n, ɔ keteli i awlɛn’n,+ kɛ nga Zoova fa kannin’n sa’n, w’a tieman be ndɛ’n.

16 Zoova seli Moizi kɛ: “Se Aarɔn kɛ: ‘Tinngɛ ɔ kpɔnman’n naan fa fin asiɛ wun ndutre’n. Kpɛkun ɔ́ káci wɛntɛnwɛntɛn Ezipti mɛn wunmuan’n nun.’” 17 I sɔ yɛ be yoli-ɔ. Aarɔn tinngɛli i sa’n kpɛkun ɔ fali kpɔnman’n finnin asiɛ wun ndutre’n nun. Ɔ maan wɛntɛnwɛntɛn’m be bali sran mun nin nnɛn’m be su. Asiɛ wun ndutre’n i kwlakwla kacili wɛntɛnwɛntɛn Ezipti mɛn wunmuan’n nun.+ 18 Atrɛ yifuɛ’m be kunndɛli kɛ bé yó i kunngba’n, naan bé fá be tinmin’n bé yí wɛntɛnwɛntɛn mun wie,+ sanngɛ w’a yoman ye. Wɛntɛnwɛntɛn’m be trannin klɔ sran mun, nin nnɛn’m be su. 19 Atrɛ yifuɛ’m be seli Faraɔn kɛ: “Ɲanmiɛn yɛ maan sa sɔ’n juli-ɔ!”*+ Sanngɛ kɛ nga Zoova fa kannin’n sa’n, Faraɔn keteli i awlɛn’n, w’a tieman be ndɛ’n.

20 I sin’n, Zoova seli Moizi kɛ: “Jaso nglɛmun ndɛ kpa naan ko wun Faraɔn wun. Ɔ́ wá fíte kɔ́ nzue’n i nuan lɔ. Se i kɛ: ‘Ndɛ nga Zoova kan’n yɛ: “Man min sran’m be atin naan be ko su min. 21 Sanngɛ sɛ w’a manman be atin’n, ń má yó maan tuin mun* bé bá ɔ bɔbɔ nin ɔ sufuɛ mun, ɔ nin ɔ sran’m be su. Bé wlú ɔ sua’m be nun. Tuin sɔ’m bé yí Ezipti mɛn’n nun sua mun piɛ, bé dé asiɛ nga be* o su’n. 22 Cɛn sɔ’n nun’n, ń má yó maan sa sɔ’n su juman Gosɛnin mɛn’n mɔ min sran mun be tran lɔ’n su wie. Be su wunman tuin sɔ’m be nun ba kun sa lɔ.+ I lɛ nun’n, á wá sí kɛ n bɔbɔ, min Zoova, n wo mɛn nga nun wa.+ 23 Ń má yó maan ɲrɛnnɛn ng’ɔ́ wá jú ɔ sran’m be su’n, ɔ su juman min sran liɛ’m be su wie. Ainman yɛ sa sɔ’n bó i bo-ɔ.”’”

24 I sɔ yɛ Zoova yoli-ɔ. Tuin’m be bali kpanngban kpa, be wluli Faraɔn i sua’n nin i sufuɛ’m be sua’m be nun. Be deli Ezipti mɛn wunmuan’n.+ Tuin sɔ’m be sacili Ezipti mɛn’n.+ 25 I agualiɛ su’n, Faraɔn flɛli Moizi nin Aarɔn yɛ ɔ seli be kɛ: “An wɔ, an yi tɛ be man amun Ɲanmiɛn’n nvle nga nun wa.” 26 Moizi tɛli su kɛ: “I sɔ’n timan su, afin Eziptifuɛ’m be kpɔ like nga é fá yí tɛ é mán e Ɲanmiɛn Zoova’n.+ ?Sɛ e fa like nga Eziptifuɛ’m be kpɔ i’n e yi tɛ be ɲrun lɛ’n, be su finfinman e yɔbuɛ? 27 É wá fá cɛn nsan é kɔ́ aawlɛ flɛnnɛn’n nun lɔ, naan é yí tɛ é mán e Ɲanmiɛn Zoova kɛ ng’ɔ seli e kɛ e yo’n sa.”+

28 Faraɔn seli be kɛ: “Ń má yáci amun nun naan amun ko yi tɛ be man amun Ɲanmiɛn Zoova aawlɛ flɛnnɛn’n nun lɔ. Sanngɛ nán amun wɔ mmua dan. Amun kpɛtɛ i be man min.”+ 29 Yɛ Moizi seli i kɛ: “N su kɔ, ń má kó kpáta Zoova, ɔ maan tuin’m bé jáso Faraɔn nin i sufuɛ mun, ɔ nin i sran’m be su ainman. Sanngɛ ɔ fata kɛ Faraɔn yaci e lakalɛ.* Nán maan ɔ se kɛ ɔ yaciman e nvlefuɛ’m be nun naan be ko yi tɛ be man Zoova.”+ 30 Kɛ ɔ yoli sɔ’n, Moizi jasoli Faraɔn i ɲrun lɛ, ɔ ko kpatali Zoova.+ 31 Zoova yoli like nga Moizi seli i kɛ ɔ yo’n. Ɔ maan tuin’m be jasoli Faraɔn nin i sufuɛ mun, ɔ nin i sran’m be su. Be nun ba kun sa w’a kaman lɛ. 32 Ɔ nin i sɔ ngba’n, Faraɔn keteli i awlɛn’n ekun, w’a manman Izraɛlifuɛ’m be atin kɛ be wɔ.

9 Zoova seli Moizi kɛ: “Ko wun Faraɔn wun naan se i kɛ: ‘Ndɛ nga Zoova m’ɔ ti Ebre’m be Ɲanmiɛn’n kan’n yɛ: “Yaci min sran’m be nun naan be ko su min.+ 2 Sanngɛ sɛ ɔ waan a yaciman be nun’n, naan a tra be ase ekun’n, 3 Zoova i sa+ wá kán ɔ nnɛn nga be o fie su lɔ’n. Tukpacɛ kun m’ɔ sa ndɛndɛ’n+ ɔ́ wá tɔ́ nnɛn kpanngɔ mun, nin aflunmun mun nin ɲɔnngɔnmin mun, ɔ nin nannin nin bua’m be su. 4 Zoova wá yó maan sa ng’ɔ́ wá jú Eziptifuɛ’m be nnɛn’m be su’n, ɔ su juman Izraɛlifuɛ’m be nnɛn’m be su wie. Izraɛlifuɛ’m be nnɛn wie fi su wuman.”’”+ 5 Asa ekun’n, Zoova kleli blɛ kun. Ɔ seli kɛ: “Ainman’n, Zoova wá yó sa sɔ’n nvle’n nun.”

6 Kɛ i aliɛ cɛnnin’n, Zoova yoli sa sɔ’n. Eziptifuɛ’m be nnɛn wafawafa kwlaa be boli wulɛ bo.+ Sanngɛ Izraɛlifuɛ’m be nnɛn wie fi w’a wuman. 7 Kɛ Faraɔn usausali nun’n, ɔ wunnin kɛ Izraɛlifuɛ’m be nnɛn wie fi w’a wuman. Ɔ nin i sɔ ngba’n, Faraɔn keteli i awlɛn’n ekun, w’a yaciman Izraɛlifuɛ’m be nun.+

8 Zoova seli Moizi nin Aarɔn be kɛ: “Amun fa like tɔnwlɛ nun nzuɛn amun sa nɲɔn’n nun, maan ɔ yi piɛ. Yɛ maan Moizi sanndi nun nglo Faraɔn i ɲrun lɛ. 9 Kpɛkun ɔ́ káci ndutre yɛ ɔ́ trú Ezipti mɛn wunmuan’n nun, ɔ́ káci yra dandan sran nin nnɛn’m be wun Ezipti mɛn wunmuan’n nun.”

10 Ɔ maan be fali like tɔnwlɛ nun nzuɛn’n, kpɛkun be ko jrannin Faraɔn i ɲrun lɛ. Moizi sanndili nun nglo, kpɛkun ɔ kacili yra dandan sran nin nnɛn’m be wun. 11 Yra’n ti’n, atrɛ yifuɛ’m b’a kwlá jranman Moizi ɲrun. Afin yra’n yoli atrɛ yifuɛ mun nin Eziptifuɛ’m be kwlaa.+ 12 Sanngɛ Zoova yacili Faraɔn lɛ maan i awlɛn’n keteli. Ɔ maan kɛ nga Zoova fa kan kleli Moizi’n sa’n, w’a tieman be ndɛ’n.+

13 I sin’n, Zoova seli Moizi kɛ: “Jaso nglɛmun ndɛ kpa naan ko wun Faraɔn wun, se i kɛ: ‘Ndɛ nga Zoova m’ɔ ti Ebre’m be Ɲanmiɛn’n kan’n yɛ: “Yaci min sran’m be nun naan be ko su min. 14 Siɛn’n, ń má fá ɲrɛnnɛn wafawafa kwlaa ń yí ɔ bɔbɔ nin ɔ sufuɛ mun, ɔ nin ɔ sran mun amun su. I liɛ’n, amún wá sí kɛ sran fi timan kɛ min sa asiɛ wunmuan’n su.+ 15 Sɛ min waan ń tínngɛ min sa’n, naan ń fá tukpacɛ kun m’ɔ sa ndɛndɛ’n ń yí ɔ bɔbɔ nin ɔ sran’m be su’n, nn n yoli sɔ, nn amun nunnunnin mlɔnmlɔn asiɛ’n su. 16 Sanngɛ like nga ti yɛ n yacili wɔ lɛ, mɔ a te o nguan nun’n yɛ: Ń yí min tinmin’n i nglo ń klé wɔ, naan be bo min dunman’n asiɛ wunmuan’n su.+ 17 ?A te tu ɔ wun te se kɛ a yaciman min sran’m be nun? 18 Ainman dɔ nga su’n, ń má yó maan nzraama mɔ kɛ nzue tɔ́’n ɔ gua’n, ɔ́ wá gúa dan kpa. Kɛ be boli Ezipti mɛn’n lele’n i sɔ sa’n i wunsu nin-a juman le. 19 Man ngaliɛ naan be ko fa ɔ nnɛn mun, nin ɔ sran mun, nin ɔ ninnge’m be kwlaa nga be o fie su lɔ’n, naan be fa be fia. Sran kwlaa annzɛ nnɛn kwlaa nga be ka fie su lɔ mɔ b’a faman be b’a wluman sua nun’n, kɛ nzraama’n wá gúa’n, bé wú.”’”

20 Faraɔn i sufuɛ nga be buli Zoova i ndɛ’n i cinnjin’n, be fali be sufuɛ mun nin be nnɛn’m be wluli sua’m be nun ndɛndɛ. 21 Sanngɛ be nga b’a buman Zoova i ndɛ’n i cinnjin’n, be yacili be sufuɛ mun nin be nnɛn mun fie’m be su lɔ.

22 Zoova seli Moizi kɛ: “Tinngɛ ɔ sa’n ɲanmiɛn su lɔ naan nzraama nga kɛ nzue tɔ́’n ɔ gua’n, ɔ gua Ezipti mɛn wunmuan’n su,+ naan ɔ gua sran mun, nin nnɛn mun, ɔ nin ijre kwlaa nga be o fie’m be su Ezipti mɛn’n nun’n be su.”+ 23 Ɔ maan Moizi tinngɛli i kpɔnman’n ɲanmiɛn su lɔ, kpɛkun Zoova yoli maan angblannan kpɛnnin, yɛ nzraama nin sin* be guali asiɛ’n su. Zoova yoli maan nzraama guali Ezipti mɛn’n su. 24 Nzraama guali. Kɛ nzraama’n gúa’n sin jue i afiɛn. Ɔ guali dan kpa. Kɛ be boli Ezipti mɛn’n lele’n i sɔ sa’n i wunsu nin-a juman le.+ 25 Ezipti mɛn wunmuan’n nun’n, nzraama’n guali sran’m be kwlaa nga be o fie’m be su’n, ɔ nin nnɛn’m be su. Ɔ sacili ijre nin waka’m be kwlaa.+ 26 Saan Gosɛnin mɔ lɔ yɛ Izraɛlifuɛ’m be tran’n yɛ nzraama’n w’a guaman lɔ wie-ɔ.+

27 Faraɔn sunmannin sran naan be ko flɛ Moizi nin Aarɔn, kpɛkun ɔ seli be kɛ: “Andɛ liɛ’n, m’an yo sa tɛ. Zoova yo sa nuan su sɛsɛ, e nin min sran mun e fɔnnin. 28 Amun kpata Zoova naan Ɲanmiɛn i angblannan’n nin i nzraama’n be jran. I liɛ’n, n klun klo su ń yáci amun nun amún kɔ́, amun su cɛman wa kun.” 29 Moizi tɛli i su kɛ: “Kɛ n fin klɔ’n nun n fite cɛ’n, ń mán min sa’m be su Zoova ɲrun. Kpɛkun angblannan’n jrán, yɛ nzraama’n yáci gualɛ. I liɛ’n, á wá sí kɛ asiɛ’n ti Zoova liɛ.+ 30 Sanngɛ n si kɛ kannzɛ ɔ yo sɔ bɔbɔ’n, a nin ɔ sufuɛ mun amun su sroman Ɲanmiɛn Zoova.”

31 Lɛn’n nin ɔɔzu’n be sacili. Afin blɛ sɔ nun’n nn ɔɔzu’n w’a wlɔ, yɛ lɛn’n w’a bo nɲrɛ. 32 Sanngɛ ble’n nin epotri’n* b’a saciman wie. Afin be wlɔman ndɛ. 33 Moizi jasoli Faraɔn i ɲrun lɛ, ɔ fin klɔ’n nun fiteli. Kpɛkun ɔ mɛnnin i sa’m be su Zoova ɲrun. Ɔ maan angblannan’n nin nzraama’n be jrannin, yɛ nzue’n yacili tɔlɛ.+ 34 Kɛ Faraɔn wunnin kɛ nzue’n nin nzraama’n nin angblannan’n b’a jran’n, ɔ yoli sa tɛ ekun, yɛ ɔ keteli i awlɛn’n.+ I sufuɛ’m be yoli sɔ wie. 35 Kɛ nga Zoova fa kan kleli Moizi’n sa’n, Faraɔn keteli i awlɛn’n, w’a manman Izraɛlifuɛ’m be atin kɛ be wɔ.+

10 I sin’n, Zoova seli Moizi kɛ: “Ko wun Faraɔn wun. Afin n yacili i lɛ naan i awlɛn’n nin i sufuɛ’m be awlɛn’n kete.+ I liɛ’n, ń yó min abonuan sa mun i ɲrun lɛ.+ 2 Yɛ á kán sa kekleekle nga n fa yoli Eziptifuɛ mun’n, ɔ nin abonuan sa nga n yoli be be afiɛn’n i ndɛ klé ɔ mma mun nin ɔ anunman mun.+ Yɛ amún wá sí jrɛiin kɛ n ti Zoova.”

3 Ɔ maan Moizi nin Aarɔn be ɔli Faraɔn i wun lɔ be ko seli i kɛ: “Ndɛ nga Zoova m’ɔ ti Ebre’m be Ɲanmiɛn’n kan’n yɛ: ‘?Ɲin kekle nga á yó i min su lɛ’n, cɛn benin yɛ á yáci i yolɛ-ɔ?+ Yaci min nvlefuɛ’m be nun naan be ko su min. 4 Afin sɛ a te jran su kɛ a yaciman min sran’m be nun’n, ainman’n ń má súnman lalo mun ɔ nvle’n nun. 5 Bé káta asiɛ’n su, ɔ maan be su kwlá wunman asiɛ ba’n. Bé wá dí ninnge nga nzraama’m b’a saciman be mɔ be kali lɛ’n, bé dí amun waka’m be kwlaa nga be o fie’m be su’n.+ 6 Bé yí ɔ sua’n nin ɔ sufuɛ’m be kwlaa be sua mun, ɔ nin sua kwlaa nga be o Ezipti mɛn’n nun’n. Kɛ ɔ si nin ɔ nannan’m be o lika nga nun wa lele’n, be nin-a wunman sa kɛ ngalɛ’n sa le.’”+ Kɛ ɔ yoli sɔ’n, ɔ fin Faraɔn i sua’n nun fiteli.

7 Yɛ Faraɔn i sufuɛ’m be seli i kɛ: “?Cɛn benin ko naan bian nga w’a yaci e yalɛ klelɛ? Yaci be nun maan be ko su be Ɲanmiɛn Zoova. ?A wunman kɛ Ezipti mɛn’n w’a saci?” 8 Ɔ maan be fali Moizi nin Aarɔn be sali be sin Faraɔn i wun lɔ. Kpɛkun ɔ seli be kɛ: “Amun wɔ ko su amun Ɲanmiɛn Zoova’n. ?Sanngɛ wan mun yɛ bé kɔ́-ɔ?” 9 Moizi seli kɛ: “E nin e gbanflɛn nin e talua mun nin e sran kpɛnngbɛn mun, ɔ nin e mma yasua nin e mma bla mun, nin e bua nin e nannin mun yɛ é kɔ́-ɔ.+ Afin é wá dí cɛn é mán Zoova.”+ 10 Ɔ seli be kɛ: “Sɛ n yaci amun nin amun mma’m be nun’n, nn Zoova o amun sin sakpa!+ Sanngɛ ɔ ti weiin kɛ like nga amun kunndɛ kɛ amún yó’n timan kpa. 11 Cɛcɛ! Amun nun yasua’m be ngunmin be wɔ be ko su Zoova. Afin like nga amun srɛli’n yɛ ɔ o lɛ-ɔ.” Kɛ ɔ yoli sɔ’n, be kannin be bo Faraɔn i awlo’n nun.

12 Yɛ Zoova seli Moizi kɛ: “Tinngɛ ɔ sa’n Ezipti mɛn’n su naan lalo’m be bla, naan be tru Ezipti mɛn wunmuan’n nun, naan be di ijre’m be kwlaa nga be o nvle’n nun’n, naan be di like kwlaa nga nzraama’m b’a saciman be’n.” 13 Be ja nun lɛ’n, Moizi tinngɛli i kpɔnman’n Ezipti mɛn’n su. Zoova yoli maan aunmuan kun m’ɔ fin wia afiliɛ lɔ’n, ɔ fitali nvle’n su wia nun nin kɔnguɛ. Kɛ aliɛ’n cɛ́n’n, aunmuan m’ɔ fin wia afiliɛ lɔ’n w’a fa lalo mun w’a ba. 14 Lalo’m be truli Ezipti mɛn wunmuan’n nun, be trantrannin Ezipti mɛn’n i lika kwlaa nun.+ W’a yoman blɛblɛ.+ Kɛ ɔ fɛ i laa lele’n, be nin-a wunman lalo kpanngban kɛ ngalɛ’n sa le, yɛ be su wunman lalo kpanngban sɔ kun. 15 Be katali nvle wunmuan’n su. Be dunman nun ti’n, lika’n luli tuun. Be dili nvle’n nun ijre nin waka mma kwlaa nga nzraama’m b’a saciman be’n, nɲa fi w’a kaman waka’m be su, yɛ ijre fi w’a kaman fie’m be su Ezipti mɛn’n nun.

16 Ɔ maan Faraɔn flɛli Moizi nin Aarɔn ndɛndɛ, kpɛkun ɔ seli be kɛ: “M’an fɔn amun Ɲanmiɛn Zoova wun, yɛ m’an fɔn amun wun wie. 17 Andɛ liɛ’n, amun yaci min sa tɛ’n cɛ min, amun kpata amun Ɲanmiɛn Zoova naan ɔ yi ɲrɛnnɛn nga min su.” 18 Ɔ maan ɔ* fin Faraɔn wun lɔ fiteli, ɔ ko kpatali Zoova.+ 19 Zoova yoli maan aunmuan’n i ɲin’n kacili lika uflɛ. Ɔ fin wia atɔliɛ lɔ yɛ ɔ ba siɛn’n niɔn, ɔ fita kekle kpa. Ɔ fitali lalo mun ko guali be Jenvie Ɔkwlɛ’n nun. Lalo ba kun sa w’a kaman Ezipti mɛn’n nun. 20 Sanngɛ Zoova yacili Faraɔn lɛ maan i awlɛn’n keteli.+ Ɔ maan w’a yaciman Izraɛlifuɛ’m be nun kɛ be wɔ.

21 I sin’n, Zoova seli Moizi kɛ: “Tinngɛ ɔ sa’n ɲanmiɛn su lɔ naan lika’n lu tuun kpa Ezipti mɛn’n nun, ɔ́ lú tritri kpa, ɔ́ yó kpikplikpi kɛ like mɔ be kwla kɛn i’n sa.” 22 Moizi ka lɛ tinngɛli i sa’n ɲanmiɛn su lɔ, ɔ maan lika’n luli tuun kpa Ezipti mɛn wunmuan’n nun lele cɛn ba nsan.+ 23 Be kwlá wunman be wiengu, be nun wie fi w’a kwlá tumɛn i wun bo lika nga be o lɛ’n nun lele cɛn ba nsan. Sanngɛ Izraɛlifuɛ’m be tranwlɛ’n nun lɔ’n, lika’n kpaja.+ 24 I sɔ’n ti’n, Faraɔn flɛli Moizi kpɛkun ɔ seli i kɛ: “Amun wɔ ko su Zoova.+ Amun bua nin amun nannin’m be ngunmin yɛ bé ká wa-ɔ. Amun mma’m be bɔbɔ’n, be nin amun kwla kɔ.” 25 Sanngɛ Moizi seli kɛ: “Ɔ bɔbɔ á wá mán e nnɛn,* é kún be, yɛ é yrá be é fá mán e Ɲanmiɛn Zoova.+ 26 É fá e nnɛn mun é kɔ́ wie. E su kplinman su kɛ nnɛn ba kun sa ka wa. Afin é wá fá be nun wie mun é mán e Ɲanmiɛn Zoova. Sɛ e ju lɔ’n yɛ é wún like nga é fá mán Zoova’n niɔn.” 27 Zoova yacili Faraɔn lɛ maan i awlɛn’n keteli. W’a kplinman su kɛ ɔ́ yáci be nun naan be wɔ.+ 28 Faraɔn seli i kɛ: “Jaso min ɲrun lɛ! Nian ɔ wun kpa, nán ju min ɲrun wa kun. Cɛn nga a ju min ɲrun wa’n, saan á wú.” 29 Yɛ Moizi seli kɛ: “M’an ti! Kɛ a fa kɛnnin i lɛ’n sa’n, n su baman ɔ ɲrun wa kun.”

11 I sin’n, Zoova seli Moizi kɛ: “Ń má fá ɲrɛnnɛn kun ekun ń yí i Faraɔn nin Ezipti mɛn’n su. Kɛ ɔ ko yo sɔ’n, ɔ́ yáci amun nun amún kɔ́.+ Kɛ ɔ́ wá yáci amun nun sɔ’n, ɔ́ fúan amun.+ 2 Se nvlefuɛ mun kɛ maan yasua nin bla’m be kwlaa be srɛ be mantanfuɛ’m be sika nin sika ɔkwlɛ ninnge mun.”+ 3 Zoova yoli maan i sran’m be ɲannin ɲrun kpa Eziptifuɛ’m be sa nun. Moizi bɔbɔ’n, Faraɔn i sufuɛ mun nin Eziptifuɛ’m be ɲin yili i kpa.

4 I sin’n, Moizi seli kɛ: “Ndɛ nga Zoova kannin’n yɛ: ‘Kɔnguɛ’n, kɛ lika’n wá bú nun’n, ń má sínsín Ezipti mɛn’n nun.+ 5 Kpɛkun Ezipti mɛn’n nun ba klikli’m be kwlaa bé wú.+ Ɔ́ fɛ́ i Faraɔn m’ɔ ti i famiɛn bia’n su’n i wa klikli’n su lele fá jú kanga bla m’ɔ su tin like’n i wa klikli’n su. Nnɛn’m be mma klikli’m be kwlaa bé wú.+ 6 Ezipti mɛn wunmuan’n nun’n, bé tí sran’m be kpanlɛ. I sɔ kpanlɛ liɛ’n, be nin-a timɛn i wunsu le, yɛ be su timɛn i sɔ kun.+ 7 Sanngɛ alua fi su boman Izraɛlifuɛ mun nin be nnɛn’m be su. I liɛ’n amún wá sí kɛ Zoova kwla yo maan ngbaciɛ tran Eziptifuɛ mun nin Izraɛlifuɛ’m be afiɛn.+ 8 Ɔ sufuɛ’m be kwlakwla bé bá min wun wa, bé kóto min bo, yɛ bé sé kɛ: ‘Amun nin amun sran’m be kwlaa, amun wɔ!’+ Kpɛkun n su kɔ.” Kɛ ɔ kannin sɔ’n, ɔ jasoli Faraɔn i ɲrun lɛ ya su.

9 I sin’n, Zoova seli Moizi kɛ: “Faraɔn su tieman amun ndɛ’n,+ kɛ ɔ́ yó naan m’an yo abonuan sa kpanngban Ezipti mɛn’n nun’n ti.”+ 10 Moizi nin Aarɔn be yoli abonuan sa kwlaa sɔ mun Faraɔn ɲrun,+ sanngɛ Zoova yacili Faraɔn lɛ maan i awlɛn’n keteli. Ɔ maan w’a yaciman Izraɛlifuɛ’m be nun kɛ be wɔ.+

12 Zoova seli Moizi nin Aarɔn Ezipti mɛn’n nun lɔ kɛ: 2 “Anglo nga ɔ́ wá yó amun anglo’m be bo bolɛ. Ɔ́ wá yó amun afuɛ kun nun anglo’m be nun klikli’n.+ 3 Amun se Izraɛlifuɛ’m be kwlakwla kɛ: ‘Anglo nga i cɛn ba blu su’n, maan be tinuntinun be fa bua+ kunngun be si’m be awlobo’m be liɛ, awlo kun nun bua kun. 4 Sanngɛ sɛ awlo kun nun sran’m b’a sɔnman naan be kwlá diman bua wunmuan kun’n, maan be nin be* mantanfuɛ mun be di i be awlo lɔ. Maan amun nian wafa nga amun awlo’n nun’n amun nuan fa ti’n su. Kɛ amún síesíe i sɔ liɛ’n, maan amun bu bua nnɛn nga sran kun kwla di’n i akunndan. 5 Maan amun fa bua ng’ɔ ti kpa’n,+ amun fɛ i yasua m’ɔ le afuɛ kun’n. Amun kwla fa bua gbanflɛn annzɛ boli gbanflɛn. 6 Maan amun niɛn i lika lele anglo’n i cɛn ba blu-nin-nnan (14) su.+ Kpɛkun kɛ sɛnzɛ’n ko tɔ’n,*+ Izraɛlifuɛ’m be awlo kwlaa nun’n, maan be kun nnɛn nga be fali’n. 7 Maan be fa mmoja’n wie naan be fa klikli sua nga bé dí nnɛn sɔ’n nun’n i anuan’n i kadri’n i fama su nin i bɛ su, ɔ nin anuan’n i ti su nglo.+

8 “‘Maan be di nnɛn’n kɔnguɛ sɔ’n nun.+ Ɔ fata kɛ be ɲintɔn i sin su naan be di i nin kpanwun mɔ levii nunman nun’n,+ ɔ nin nɲa wiwi mun.+ 9 Nán amun di i mɔnnɛn annzɛ nga be tɔnnin i nin nzue’n, sanngɛ maan amun wlɛ i sin su, ɔ nin i ti nin i ja nin i klun ninnge mun likawlɛ. 10 Nán amun sie wie naan aliɛ cɛn su. Sanngɛ sɛ i wie ka naan aliɛ cɛn su’n, maan amun yrɛ i sin nun.+ 11 Wafa ng’ɔ fata kɛ amun di’n yɛ: Amun fa amun bo cilɛ kplo’n be ci amun bo,* amun wla amun ngbabua mun yɛ amun fa amun kpɔnman’m be tra nun, amun di i ndɛndɛ. Zoova i Delɛ Cɛn’n yɛ ɔ o lɛ-ɔ. 12 Andɛ kɔnguɛ’n, kɛ ɔ fɛ i sran’m be su lele m’ɔ́ fá jú nnɛn’m be su’n, ń má sínsín Ezipti mɛn’n nun, ń kún ba klikli’m be kwlaa.+ Ń má tú Ezipti amuin’m be kwlaa be fɔ.+ N ti Zoova. 13 Mmoja’n yɛ ɔ́ yó sua nga amun o nun’n i nzɔliɛ’n niɔn. Kɛ ń má wún mmoja’n ń tú trá amun. Kpɛkun ɲrɛnnɛn nga ń má fá yí Ezipti mɛn’n su’n, ɔ su juman amun su wie.+

14 “‘Maan cɛn nga ka amun klun titi, yɛ maan amun di cɛn sɔ’n be man Zoova tititi. Ɔ ti mmla kun m’ɔ́ ká lɛ titi-ɔ. Ɔ fata kɛ amun di cɛn sɔ’n. 15 Ɔ fata kɛ amun di kpanwun mɔ levii nunman nun’n lele cɛn nso.+ I cɛn ba klikli’n nun’n, maan amun yi levii mun amun sua’m be nun. Afin kɛ ɔ́ fɛ́ i cɛn ba klikli’n su lele m’ɔ́ fá jú cɛn ba nso’n su’n, sran kwlaa ng’ɔ di like nga levii o nun’n, maan be yi i* Izraɛlifuɛ’m be afiɛn. 16 Cɛn ba klikli’n nun’n, maan amun yia be su min, yɛ cɛn ba nso’n su’n, amun yia be su min ekun. Nán amun di junman fi cɛn sɔ’m be nun.+ Saan like nga amun tinuntinun amún dí’n i ngunmin yɛ amun kwla tɔn-ɔn.

17 “‘Maan amun di Kpanwun mɔ Levii Nunman nun’n i ti Cɛn’n+ titi. Afin cɛn sɔ’n nun’n, ń má fá amun mɔ amun sɔnnin kpa’n* Ezipti mɛn’n nun ń fíte. Yɛ maan amun di cɛn sɔ’n tititi. Ɔ ti mmla kun m’ɔ́ ká lɛ titi-ɔ. 18 Anglo klikli’n i cɛn ba blu-nin-nnan (14) su’n i nnɔsua nun’n, maan amun di kpanwun mɔ levii nunman nun’n lele ɔ fa ju anglo’n i cɛn ba ablaɔn-nin-kun (21) su’n i nnɔsua nun.+ 19 Nán maan levii tran amun sua’m be nun lele cɛn ba nso. Afin sran kwlaa ng’ɔ di like nga levii o nun’n, sɛ ɔ ti aofuɛ-o, annzɛ Izraɛlifuɛ-o,+ ɔ fata kɛ be yi i* Izraɛlifuɛ’m be afiɛn.+ 20 Nán amun di like nga levii o nun’n. Maan amun awlo’m be kwlaa nun’n, amun di kpanwun mɔ levii nunman nun’n.’”

21 Moizi ka lɛ flɛli Izraɛli kpɛnngbɛn’m be kwlaa,+ kpɛkun ɔ seli be kɛ: “Amun wɔ naan amun ko fa nnɛn* nga b’a kpɛ cro’n amun awlobo’m be liɛ naan amun kun be fa yi Delɛ Cɛn’n i tɛ’n. 22 I sin’n, amun bu izɔpu nɲa naan amun fa wlɛ i mmoja ng’ɔ o kpongbo kun nun’n i nun, naan amun fa klikli anuan’n i ti su nglo nin i kadri’n i fama su nin i bɛ su. Nán sran fi fin sua’n nun fite lele nglɛmun. 23 I liɛ’n, kɛ Zoova wá sínsín m’ɔ́ fá ɲrɛnnɛn yí i Eziptifuɛ’m be su’n, kɛ ɔ́ wún mmoja’n amun anuan’n i ti su nglo nin i kadri’n i fama su nin i bɛ su’n, saan Zoova tú trá amun anuan’n su, yɛ ɔ su kplinman su kɛ ɲrɛnnɛn m’ɔ fa wie’n ba’n, ɔ wlu amun sua’m be nun.+

24 “Amun di cɛn sɔ’n. Ɔ ti mmla kun m’ɔ fata kɛ amun nin amun mma’m be di su tititi-ɔ.+ 25 Sɛ amun ju mɛn nga Zoova seli kɛ ɔ́ fá mán amun’n nun lɔ’n, maan amun di cɛn sɔ’n titi.+ 26 Sɛ amun mma’m be usa amun kɛ: ‘?Like nga amun yo i lɛ’n, i bo’n yɛle benin?’+ 27 Amun tɛ be su kɛ: ‘Ɔ ti tɛ kun mɔ be yi be man Zoova Delɛ Cɛn’n nun-ɔn. Kɛ ɔ́ fá ɲrɛnnɛn yí i Eziptifuɛ’m be su Ezipti mɛn’n nun lɔ’n, ɔ tu trali Izraɛlifuɛ’m be sua’m be su. Ɔ yacili e sua’m be lɛ.’”

Kɛ ɔ yoli sɔ’n, nvlefuɛ’m be kotoli kpɛkun be utuli be ɲin ase. 28 I sin’n, Izraɛlifuɛ’m be ɔli be ko yoli sa nga Zoova kan kleli Moizi nin Aarɔn’n.+ Be niannin su be yoli i sɛsɛsɛ.

29 Kɔnguɛ’n, kɛ lika’n buli nun’n, Zoova kunnin Ezipti mɛn’n nun ba klikli’m be kwlaa.+ Kɛ ɔ fɛ i Faraɔn m’ɔ ti i famiɛn bia’n su’n i wa klikli’n su’n lele m’ɔ́ fá jú sran mɔ be trɛli i m’ɔ o bisua’n i wa klikli’n su’n, be kwlaa be wuli. Nnɛn’m be mma klikli’m be wuli wie.+ 30 Faraɔn nin i sufuɛ mun, ɔ nin Eziptifuɛ onga’m be kwlaa be jasoli kɔnguɛ sɔ’n nun. Eziptifuɛ’m be boli awuyomo. Afin ɔ leman sua kun mɔ i nun sran kun w’a wuman-ɔn.+ 31 Kɔnguɛ sɔ’n nun’n, ɔ ka lɛ flɛli Moizi nin Aarɔn,+ kpɛkun ɔ seli be kɛ: “Amun jaso, amun nin Izraɛlifuɛ onga’m be jaso min nvlefuɛ’m be afiɛn. Amun wɔ be ko su Zoova kɛ nga amun fa kannin’n sa.+ 32 Amun fa amun bua nin amun nannin mun naan amun wɔ, kɛ nga amun fa kannin’n sa.+ Sanngɛ amun srɛ Ɲanmiɛn naan ɔ yra min su.”

33 Eziptifuɛ’m be jrannin Izraɛlifuɛ’m be wun kɛ be jaso be nvle’n nun ndɛndɛ.+ Be seli kɛ: “Afin ɔ ti kɛ e kwlaa y’a wu w’a wie sa.”+ 34 Ɔ maan Izraɛlifuɛ’m be fali be sanmlɛn nga be fɔtɔli mɔ b’a kwlá guaman nun levii’n, ɔ nin be sanmlɛn fɔtɔlɛ ninnge mun,* kpɛkun be cicili be be tralɛ’m be nun, yɛ be fa boli be wati. 35 Izraɛlifuɛ’m be yoli like nga Moizi seli be kɛ be yo’n. Be srɛli Eziptifuɛ’m be sika nin sika ɔkwlɛ ninnge mun, ɔ nin tralɛ.+ 36 Zoova yoli maan Eziptifuɛ’m be kloli Izraɛlifuɛ’m be sa. Ɔ maan like nga be srɛli’n, be fa mannin be. Be fɛnnin Eziptifuɛ’m be bo ninnge mun.+

37 Izraɛlifuɛ’m be jasoli Ramunsɛsi+ lɛ be ɔli Sukɔtu.+ Be nun yasua’m be ti sran kɔe akpiakpi ya nsiɛn (600.000), b’a kaman ba kanngan’m be wie.+ 38 Sran wafawafa kpanngban kpa*+ be suli be su. Be fali bua nin nannin mun, nnɛn sɔ’m be sɔnnin kpa. 39 Sanmlɛn nga be fɔtɔli mɔ be nin i fin Ezipti lɔ’n, be fa tɔnnin kpanwun kukluuklu mɔ be guaman nun levii’n. Levii nunman nun, afin kɛ mɔ be kannin be bo Ezipti lɔ’n ti’n, b’a kwlá siesieman be wun naan b’a kunndɛ like diwa.+

40 Blɛ nga Izraɛlifuɛ nga be trannin Ezipti lɔ’n be dili’n,+ ɔ ti afuɛ ya nnan ablasan (430).+ 41 Kɛ afuɛ ya nnan afuɛ ablasan’n (430) wieli’n, cɛn kasiɛn’n su sɛsɛsɛ yɛ Zoova i sran mɔ be sɔnnin kpa’n* be fin Ezipti mɛn’n nun fiteli-ɔ. 42 Kɔnguɛ sɔ’n nun’n, ɔ fata kɛ be di cɛn be man Zoova m’ɔ fali be Ezipti mɛn’n nun fiteli’n. Ɔ fata kɛ Izraɛlifuɛ’m be kwlaa be di cɛn kɔnguɛ sɔ’n nun be man Zoova tititi.+

43 I sin’n, Zoova seli Moizi nin Aarɔn be kɛ: “Delɛ Cɛn’n i su mmla’n yɛ: Nán maan aofuɛ’m be di wie.+ 44 Sɛ sran kun le kanga yasua kun m’ɔ toli i’n, ɔ fata kɛ ɔ wlɛ i klɛn.+ I liɛ’n, ɔ kwla di aliɛ’n wie. 45 Ɔ fataman kɛ aofuɛ nin junman difuɛ nga be tuɛ i kalɛ’n, ɔ di wie. 46 Maan be di nnɛn’n sua kun nun. Nán amun fa wie fite gua su, yɛ nán amun bobo i owie’n.+ 47 Ɔ fata kɛ Izraɛlifuɛ’m be kwlaa be di cɛn sɔ’n. 48 Sɛ aofuɛ kun tran amun afiɛn naan ɔ kunndɛ kɛ ɔ́ dí Delɛ Cɛn mɔ amun di man Zoova’n wie’n, ɔ fata kɛ be wlɛ i awlo’n nun yasua’m be kwlaa be klɛn. I liɛ’n, ɔ kwla di cɛn’n wie. Kpɛkun ɔ́ káci kɛ nvle’n i nunfuɛ sa. Sanngɛ nán maan yasua nga b’a wlɛmɛn i klɛn’n ɔ di wie.+ 49 Mmla kunngba’n su yɛ ɔ fata kɛ nvle’n i nunfuɛ mun nin aofuɛ nga be tran amun afiɛn’n be nanti-ɔ.”+

50 Izraɛlifuɛ’m be kwlaa be yoli sa nga Zoova kan kleli Moizi nin Aarɔn’n. Be niannin su be yoli i sɛsɛsɛ. 51 Cɛn sɔ’n nun’n, Zoova fali Izraɛlifuɛ mɔ be sɔnnin kpa’n* Ezipti mɛn’n nun fiteli.

13 Zoova seli Moizi ekun kɛ: 2 “Yo ba yasua klikli kwlaa* nga Izraɛlifuɛ’m be wu be’n be sanwun* man min. Ba yasua klikli nga sran annzɛ nnɛn wu i’n, ɔ ti min liɛ.”+

3 Moizi seli Izraɛlifuɛ’m be kɛ: “Maan amun wla kpɛn cɛn mɔ amun fin Ezipti mɛn’n nun fiteli’n su,+ maan amun wla kpɛn cɛn mɔ amun fin kanga sua’n nun fiteli’n su. Afin Zoova fɛli i sa mɔ wunmiɛn o nun kpa’n, ɔ fa fali amun fiteli.+ I sɔ’n ti’n, nán amun di like nga levii o nun’n. 4 Amún fíte andɛ, Abibu* anglo’n nun.+ 5 Kɛ Zoova ko fa wɔ ko kɔ Kanaanfuɛ mun, nin Ɛtifuɛ mun, nin Amɔɔfuɛ mun, nin Ivifuɛ mun, ɔ nin Zebisifuɛ’m be mɛn+ m’ɔ tali ɔ nannan’m be nda kɛ ɔ́ fá mán wɔ’n nun lɔ’n,+ di cɛn nga titi anglo nga nun. Nɔnnɔn nin awɛma nzue be sonji mɛn sɔ’n nun.+ 6 Amun di kpanwun mɔ levii nunman nun’n cɛn nso.+ Cɛn nso’n su’n, amun di cɛn be man Zoova. 7 Amun di kpanwun mɔ levii nunman nun’n cɛn nso.+ Nán maan like nga levii o nun’n, ɔ tran amun sa nun.+ Nán levii tran amun mɛn wunmuan’n nun. 8 Yɛ se ɔ wa’n kɛ: ‘I nun mɔ ń fín Ezipti lɔ’n ń fíte’n, like nga Zoova yo mannin min’n i ti yɛ n yo sa sɔ’n niɔn.’+ 9 I sɔ’n yó kɛ nzɔliɛ sa amun sa’n su, yɛ ɔ́ yó kɛ amun wla kpɛnlɛ like sa amun ngban’n su.*+ I liɛ’n, amún kán Zoova i mmla’n i ndɛ. Afin Zoova fɛli i sa mɔ wunmiɛn o nun kpa’n, ɔ fa fali amun Ezipti mɛn’n nun fiteli. 10 Afuɛ kwlaa nun’n, kɛ blɛ sɔ’n ko ju’n, maan amun di mmla sɔ’n su.+

11 “Kɛ Zoova wá fá ɔ kɔ́ Kanaanfuɛ’m be mɛn m’ɔ tali wɔ nin ɔ nannan’m be nda kɛ ɔ́ fá mán amun’n i nun lɔ’n,+ 12 ɔ fata kɛ ɔ wa yasua klikli kwlaa* nin nnɛn nga á ɲán be’n be mma yasua klikli’m be kwlaa be yo Zoova liɛ mlɔnmlɔn. Ba yasua’m be ti Zoova liɛ.+ 13 Ɔ fata kɛ a fa bua kun fa kpɔ aflunmun kwlaa i wa klikli’n i ti. Sɛ w’a kwlá kpɔmɛn i ti’n, ɔ fata kɛ a bu i kɔmin. Kpɔ ɔ mma yasua klikli’m be kwlaa be ti.+

14 “Sɛ cɛn wie lele ɔ wa’n usa ɔ kɛ: ‘?Like nga i bo’n yɛle benin?’ Se i kɛ: ‘Zoova fɛli i sa mɔ wunmiɛn o nun kpa’n fa fali e Ezipti mɛn’n nun fiteli, ɔ fali e kanga sua’n nun fiteli.+ 15 Kɛ Faraɔn yoli ɲin kekle mɔ w’a kplinman su kɛ ɔ́ yáci e nun’n,+ Zoova kunnin ba klikli’m be kwlaa Ezipti mɛn’n nun. Ɔ kunnin sran nin nnɛn’m be mma klikli’m be kwlaa.+ I sɔ’n ti yɛ n fa ba yasua klikli’m be kwlaa* n man Zoova mɔ n kpɔ min mma yasua klikli’m be kwlaa be ti’n niɔn.’ 16 Maan i sɔ’n yo kɛ nzɔliɛ sa amun sa’n nin amun ngban’n su.*+ Afin Zoova fɛli i sa mɔ wunmiɛn o nun kpa’n fa fali amun Ezipti mɛn’n nun fiteli.”

17 Kɛ Faraɔn yacili Izraɛlifuɛ’m be nun’n, Ɲanmiɛn w’a faman be w’a sinman Filistifuɛ’m be mɛn’n nun, kusu nn atin sɔ’n yɛ ɔ ti kpe-ɔ. Afin Ɲanmiɛn seli kɛ: “Sɛ nvlefuɛ’m be ko tɔ alɛ nun’n, ɔ cɛman naan b’a kaci be akunndan’n, kpɛkun bé sá be sin Ezipti lɔ.” 18 Ɲanmiɛn fali nvlefuɛ mun sinnin aawlɛ flɛnnɛn m’ɔ mantan Jenvie Ɔkwlɛ’n i atin’n su.+ Kɛ Izraɛlifuɛ’m bé fín Ezipti mɛn’n nun bé fíte’n, be kɔ kɛ sonja mɔ be su kɔ alɛ kunlɛ’n sa. 19 Kɛ bé kɔ́’n, Moizi fali Zozɛfu i owie mun ɔli. Afin Zozɛfu yoli maan Izraɛlifuɛ’m be tali nda. Ɔ seli kɛ: “Ɲanmiɛn wá úka amun sakpa. Yɛ kɛ amún kɔ́’n, amun fa min owie mun wɔ.”+ 20 Be jasoli Sukɔtu lɛ, kpɛkun be ko boli nanmue Etamun lɔ, aawlɛ flɛnnɛn’n i nuan su lɔ.

21 Kɛ bé kɔ́’n, Zoova dun mmua be ɲrun. Wia nun’n, ɔ o ɲanmiɛn ble tiaan kun nun ɔ kle be atin.+ Kɔnguɛ’n ɔ o sin taaman tiaan kun nun ɔ kpaja be ɲrun. Ɔ maan be kwla tu ajalɛ wia nun nin kɔnguɛ.+ 22 Ɲanmiɛn ble tiaan’n m’ɔ dun mmua be ɲrun wia nun’n, ɔ nin sin taaman m’ɔ dun mmua be ɲrun kɔnguɛ’n, b’a jasoman be ɲrun le.+

14 I sin’n, Zoova seli Moizi kɛ: 2 “Se Izraɛlifuɛ mun kɛ be sa be sin naan be ko bo nanmue Piairɔtu m’ɔ o Migidɔlu nin jenvie’n be afiɛn’n i ɲrun lɛ, Baali-Zefɔn i ɲrun ndɛnman su.+ Amun trɛn i ɲrun lɛ jenvie’n i wun lɛ. 3 Faraɔn wá kán Izraɛlifuɛ’m be ndɛ sé kɛ: ‘Be su wlanwlan daan sa ngbɛn. B’a mlin aawlɛ flɛnnɛn’n nun lɔ.’ 4 Ń má yáci Faraɔn lɛ naan i awlɛn’n kete,+ yɛ ɔ́ sú be su. Kpɛkun Faraɔn nin i sonja’m be ti’n, ń má yó naan min dunman’n fu.+ Yɛ Eziptifuɛ’m bé wá sí jrɛiin kɛ n ti Zoova.”+ Ɔ maan i sɔ yɛ Izraɛlifuɛ’m be yoli-ɔ.

5 I sin’n, be ko seli Ezipti famiɛn’n kɛ Izraɛlifuɛ’m b’a wanndi. Be ja nun lɛ’n, Faraɔn nin i sufuɛ mun be kacili akunndan nga be buli i Izraɛlifuɛ’m be wun’n.+ Be seli kɛ: “?Ngue ti yɛ e yoli sa nga-ɔ? ?Ngue ti yɛ e yacili Izraɛlifuɛ mɔ be ti e kanga’n be nun-ɔn?” 6 Ɔ maan Faraɔn yiɛyiɛli i kakaklolo nin i sran mun.+ 7 Ɔ fali kakaklolo kpakpa ya nsiɛn (600), ɔ nin Ezipti kakaklolo onga’m be kwlaa. Sonja’m be o kakaklolo sɔ’m be kwlaa be nun. 8 Ɔ maan Zoova yacili Faraɔn m’ɔ ti Ezipti famiɛn’n i lɛ maan i awlɛn’n keteli. Ɔ wanndi suli Izraɛlifuɛ’m be su. Blɛ sɔ’n nun’n, kɛ Izraɛlifuɛ’m bé fíte’n, srɛ w’a kunman be.*+ 9 Eziptifuɛ’m be suli be su.+ Faraɔn i nnɛn kpanngɔ nga kakaklolo o be sin’n, nin i nnɛn kpanngɔ su fufuɛ mun, ɔ nin i sonja mun be ko toli be Piairɔtu lɔ, jenvie’n i nuan lɛ kan be boli nanmue lɛ’n, Baali-Zefɔn i ɲrun ndɛnman su lɛ.

10 Kɛ Faraɔn mantannin koko’n, Izraɛlifuɛ’m be mannin be ɲin su be niannin, kpɛkun be wunnin kɛ Eziptifuɛ mun be su be su. Srɛ kunnin Izraɛlifuɛ mun dan yɛ be kpan flɛli Zoova.+ 11 Be seli Moizi kɛ: “?Asieliɛ nunman Ezipti lɔ ti yɛ a fali e bali naan e wu aawlɛ flɛnnɛn’n nun wa-ɔ?+ ?Ngue ti yɛ a fali e Ezipti lɔ bali-ɔ? ?Ngue ti yɛ a yoli e sɔ-ɔ ? 12 ?Nán ndɛ mɔ kɛ e o Ezipti lɔ’n e kan kleli wɔ’n yɛ ɔ o lɛ-ɔ? ?Y’a seman wɔ kɛ a yaci e diin naan e su Eziptifuɛ mun? Afin sɛ e su Eziptifuɛ mun’n, ɔ ti kpa tra kɛ e wu aawlɛ flɛnnɛn’n nun.”+ 13 Moizi seli nvlefuɛ’m be kɛ: “Nán srɛ kun amun.+ An jran kekle, amún wá wún wafa nga Zoova wá dé amun’n.+ Afin Eziptifuɛ nga amun wun be andɛ yɛ’n amun su wunman be kun.+ 14 Zoova bɔbɔ wá kún amun ti alɛ,+ ɔ maan amún gúa bliin.”

15 Zoova seli Moizi kɛ: “?Ngue ti yɛ a kpan flɛ min-ɔn? Se Izraɛlifuɛ mun kɛ be fa atin’n. 16 Ɔ liɛ’n, man ɔ kpɔnman’n su, tinngɛ ɔ sa’n jenvie’n su naan i nun kpaci. I liɛ’n, Izraɛlifuɛ’m bé sín jenvie’n i afiɛn asiɛ kee’n su. 17 N kusu’n, ń má yó maan Eziptifuɛ’m be awlɛn’n kéte. Ɔ maan bé sú be su. Kpɛkun Faraɔn nin i sonja mun, ɔ nin i alɛ kunlɛ kakaklolo mun, ɔ nin i nnɛn kpanngɔ su fufuɛ’m be ti’n, ń má yó naan min dunman’n fu.+ 18 Kɛ Faraɔn nin i alɛ kunlɛ kakaklolo mun, ɔ nin i nnɛn kpanngɔ su fufuɛ’m be ti’n ń má yó naan min dunman’n fu’n, Eziptifuɛ mun bé wá si jrɛiin kɛ n ti Zoova.”+

19 I sin’n, Ɲanmiɛn Kpli i anzi+ m’ɔ dun mmua Izraɛlifuɛ’m be ɲrun’n, ɔ jasoli lɛ ɔli be sin lɔ. Kpɛkun Ɲanmiɛn ble tiaan m’ɔ o be ɲrun’n, ɔ ɔli siɛn lɔ, ɔ ko jrannin be sin lɔ.+ 20 Ɔ wa jrannin Izraɛlifuɛ mun nin Eziptifuɛ’m be afiɛn.+ I bue kun ti ɲanmiɛn ble tritritri yɛ i bue kun kpaja kɔnguɛ.+ Ɔ maan Eziptifuɛ’m b’a kwlá mantanman Izraɛlifuɛ mun kɔnguɛ wunmuan’n nun.

21 I sin’n, Moizi tinngɛli i sa’n jenvie’n su.+ Kpɛkun Zoova yoli maan aunmuan dan kpa kun m’ɔ fin wia afiliɛ lɔ’n, ɔ fitali kɔnguɛ wunmuan’n nun. Ɔ suli jenvie’n ɔli siɛn, yɛ i osu’n yoli wisiwisi.+ Kpɛkun nzue’n i nun kpacili.+ 22 Izraɛlifuɛ’m be sinnin jenvie’n i afiɛn asiɛ kee’n su.+ Kɛ ɔ́ yó sɔ nn nzue’n w’a jran be sa fama su nin be sa bɛ su kɛ talɛ wie sa.+ 23 Eziptifuɛ’m be suli be su. Faraɔn i nnɛn kpanngɔ mun nin i alɛ kunlɛ kakaklolo mun, ɔ nin i nnɛn kpanngɔ su fufuɛ’m be kwlaa be wluli be sin jenvie’n i afiɛn.+ 24 Kɛ lika wá cɛ́n’n,* Zoova m’ɔ o sin taaman tiaan’n nin ɲanmiɛn ble’n nun’n,+ ɔ kpɛli i ɲin Eziptifuɛ’m be su. Kpɛkun ɔ sanngannin be nun. 25 Ɔ yoli maan be kakaklolo’m be ja’m be tutuli. Ɔ maan be kɔ be ɲrun-ɔn, ɔ yoman ye. Yɛ Eziptifuɛ’m be seli kɛ: “Maan e wanndi Izraɛlifuɛ’m be ɲrun. Afin Zoova m’ɔ o be sin’n ɔ nin Eziptifuɛ mun su kun.”+

26 I sin’n, Zoova seli Moizi kɛ: “Tinngɛ ɔ sa’n jenvie’n su naan nzue’n kata Eziptifuɛ mun, nin be alɛ kunlɛ kakaklolo mun, ɔ nin be nnɛn kpanngɔ su fufuɛ’m be su.” 27 Be ja nun lɛ’n, Moizi tinngɛli i sa’n jenvie’n su. Yɛ kɛ aliɛ wá cɛ́n’n, jenvie’n sɛli i sin i osu’n nun. Kɛ Eziptifuɛ’m bé wánndi’n, Zoova kannin be guɛli i jenvie’n i afiɛn lɔ.+ 28 Nzue’n katali alɛ kunlɛ kakaklolo mun, nin nnɛn kpanngɔ su fufuɛ mun, ɔ nin Faraɔn i sonja’m be kwlaa nga be wluli be sin jenvie’n nun’n be su.+ Be nun ba kun sa w’a fiteman nun.+

29 Sanngɛ Izraɛlifuɛ’m be liɛ’n, be nantili jenvie’n i afiɛn asiɛ kee’n su.+ Nzue’n jrannin be sa fama su nin be sa bɛ su kɛ talɛ wie sa.+ 30 Cɛn sɔ’n nun’n, Zoova deli Izraɛlifuɛ mun Eziptifuɛ’m be sa nun.+ Kpɛkun Izraɛlifuɛ’m be wunnin Eziptifuɛ’m be fuɛn mun jenvie’n i nuan lɛ. 31 Izraɛlifuɛ’m be wunnin Zoova i tinmin dan* m’ɔ fa kwlali Eziptifuɛ mun’n, ɔ maan be ɲin yili Zoova, kpɛkun be lafili Zoova nin i sufuɛ Moizi be su.+

15 Blɛ sɔ’n nun’n, Moizi nin Izraɛlifuɛ’m be toli jue ng’ɔ o yɛ’n be manmannin Zoova:+

“Maan n to jue n manman Zoova, afin w’a ɲan ɲrun dan.+

Ɔ toli nnɛn kpanngɔ’n nin i su fufuɛ’n yili be jenvie’n nun.+

 2 Min wunmiɛn’n nin min tinmin’n yɛle Ya,* afin ɔ ti min defuɛ.+

Min Ɲanmiɛn’n yɛ ɔ o lɛ-ɔ, yɛ ń mɛ́nmɛ́n i.+ Min si i Ɲanmiɛn-ɔn,+ ń yí i ayɛ.+

 3 Zoova ti alɛ kunfuɛ dan kun.+ I dunman’n yɛle Zoova.+

 5 Nzue m’ɔ bo’n, ɔ katali be su kplu. Yɛ be mlɔnnin jenvie’n i bo lɔ kɛ yɔbuɛ sa.+

 9 E kpɔfuɛ’n seli kɛ: ‘Ń sú be su! Ń trá be!

Ń cɛ́cɛ́ be bo ninnge’m be nun lele min klun jɔ́!

Ń cúɛn min tokofi’n! Min sa’n tín be su!’+

11 ?Zoova, ɲanmiɛn’m be nun onin yɛ ɔ ti kɛ wɔ sa-ɔ?+

?Wan yɛ ɔ ti kɛ wɔ mɔ a ti sanwun lele’n sa-ɔ?+

Wɔ yɛ ɔ fata kɛ be sro wɔ naan be to jue manman wɔ-ɔ. Wɔ yɛ a yo sa dandan mun-ɔn.+

12 A tinngɛli ɔ sa fama’n nun, kpɛkun asiɛ’n mɛnnin be.+

wá úsu.+

Ɔ sa mɔ wunmiɛn o nun dan’n ti’n, bé kéte kɛ yɔbuɛ sa,

lele ɔ sran’m bé wíe sín, Zoova,

lele sran mɔ a fali be’n+ bé wíe sín.+

18 Zoova dí famiɛn tititi.+

20 Kɛ ɔ yoli sɔ’n, Miriamun m’ɔ ti Ɲanmiɛn nuan ijɔfuɛ bla’n, m’ɔ ti Aarɔn i niaan bla’n, ɔ fali klɛn kun, kpɛkun bla’m be kwlaa be fali klɛn be suli i su. Kɛ bé bó’n nn bé sí. 21 Kɛ yasua’m bé tó jue’n, nn Miriamun sɔ́ su kɛ:

Ɔ toli nnɛn kpanngɔ nin i su fufuɛ’n yili be jenvie’n nun.”+

22 I sin’n, Moizi fali Izraɛlifuɛ mun Jenvie Ɔkwlɛ’n i wun lɛ ɔli Suu aawlɛ flɛnnɛn’n nun lɔ. Be nantili aawlɛ flɛnnɛn’n nun cɛn nsan, sanngɛ b’a ɲanman nzue. 23 Be juli Mara,*+ sanngɛ b’a kwlá nɔnman Mara nzue’n, afin ɔ yo wi. I sɔ’n ti yɛ be flɛli i Mara’n niɔn. 24 Ɔ maan sran’m be kannin Moizi i wun ndɛ.+ Be seli kɛ: “?Ngue yɛ é nɔ́n-ɔn?” 25 Ɔ kpan flɛli Zoova,+ kpɛkun Zoova kleli i waka kun. Kɛ ɔ fali waka’n yili i nzue’n nun’n, nzue’n yoli fɛ.

Lika sɔ’n nun lɛ’n, Ɲanmiɛn mannin be mmla kun naan ɔ́ jrán su dí be jɔlɛ. Yɛ lika sɔ’n nun lɛ’n, ɔ sali be niannin.+ 26 Ɔ seli kɛ: “Sɛ a tie ɔ Ɲanmiɛn Zoova i aniɛn’n naan a yo like ng’ɔ ti kpa i ɲrun’n, yɛ sɛ a nanti i ndɛ’m be su naan a fɛ i mmla’m be kwlaa be su’n,+ ɲrɛnnɛn nga n fa yili Eziptifuɛ’m be su’n, n su fa yiman ɔ su wie.+ Afin min bɔbɔ Zoova, min yɛ n yo wɔ juejue-ɔ.”+

27 Kɛ ɔ yoli sɔ’n, be juli Elimun lɛ. Nzue ti blu-nin-nɲɔn (12) nin nglesia ableso (70) be o lika sɔ’n nun. Ɔ maan be boli be nanmue nzue’n i wun lɛ.

16 Kɛ Izraɛlifuɛ’m be tuli be bo Elimun lɛ’n, be kwlaa be ɔli Sinin aawlɛ flɛnnɛn’n nun+ lɔ. Lika sɔ’n o Elimun nin Sinai be afiɛn’n nun. Kɛ be tuli be bo Ezipti mɛn’n nun lɔ’n, i anglo nɲɔn’n i cɛn ba blu-nin-nnun (15) su’n yɛ be juli lɔ-ɔ.

2 Izraɛlifuɛ’m be kwlaa be plannin Moizi nin Aarɔn be su aawlɛ flɛnnɛn’n nun lɔ.+ 3 Izraɛlifuɛ’m be seli be kɛ: “I nun mɔ e titi nnɛn sɛ’m be sin Ezipti lɔ’n,+ mɔ e di kpanwun lele e ku yi’n, sɛ ɔ ti kɛ Zoova kunnin e mɛn sɔ’n nun lɔ’n, nn ɔ yoli kpa. Kpɛkun amun fali e bali aawlɛ flɛnnɛn’n nga nun wa kɛ awe’n nunnun e kwlaa.”+

4 I sin’n, Zoova seli Moizi kɛ: “Ń má yó maan aliɛ* wá fín nglo lɔ ɔ́ gúa mán amun.+ Maan sran kun fite naan ɔ ko isa ng’ɔ kwla ju i cɛn ba kun nun’n.+ Ń yó sɔ naan ń sá be ń nían, sɛ bé nánti min mmla’m be su-o.+ 5 Sanngɛ cɛn nsiɛn’n su liɛ’n,+ kɛ bé wá tɔ́n nga be isali’n, maan ɔ yo nga be isɛ i cɛn onga’m be nun’n i sɔ kpɛ nɲɔn.”+

6 Moizi nin Aarɔn be seli Izraɛlifuɛ’m be kwlaa kɛ: “Andɛ nnɔsua’n amún wá sí jrɛiin kɛ Zoova yɛ ɔ fali amun Ezipti mɛn’n nun fiteli-ɔ.+ 7 Ainman nglɛmun’n, amún wá wún Zoova i aɲrunɲan’n. Afin Zoova tili i wun ndɛ nga amun kannin’n. ?Wan yɛle e mɔ amun kan e wun ndɛ-ɔ?” 8 Moizi kan guali su kɛ: “Kɛ Zoova wá mán amun nnɛn nnɔsua mɔ amún dí’n, mɔ nglɛmun’n, amún dí kpanwun lele amun ku yí’n, amún wá wún kɛ Zoova tili i wun ndɛ nga amun kannin’n. ?Wan yɛle e? Nán e bɔbɔ e wun ndɛ tɛ yɛ amun kan-ɔn, sanngɛ Zoova yɛ amun kɛn i wun ndɛ tɛ-ɔ.”+

9 I sin’n, Moizi seli Aarɔn kɛ: “Se Izraɛlifuɛ’m be kwlaa kɛ: ‘Amun bla Zoova i ɲrun wa, afin ɔ tili i wun ndɛ nga amun kannin’n.’”+ 10 Kɛ Aarɔn kannin ndɛ’n kleli Izraɛlifuɛ’m be kwlaa wieli’n, be kpɛli be ɲin aawlɛ flɛnnɛn’n su lɔ. Kpɛkun bé nían-ɔn, Zoova i aɲrunɲan’n w’a fite ɲanmiɛn ble’n nun lɔ.+

11 Zoova kannin ndɛ kleli Moizi ekun. Ɔ seli i kɛ: 12 “N tili Izraɛlifuɛ’m be ndɛ nga be kannin’n.+ Se be kɛ: ‘Kɛ sɛnzɛ’n ko tɔ’n,* amún wá dí nnɛn, kpɛkun nglɛmun’n amún dí kpanwun lele amun ku yí.+ Yɛ amún wá si jrɛiin kɛ n ti amun Ɲanmiɛn Zoova.’”+

13 Ɔ maan nnɔsua sɔ’n nun’n, aoko’m be wa fali nanmue’n mlɔnmlɔn.+ Kpɛkun nglɛmun’n, bɔlɛ ufue guali. Ɔ sin yiali be nanmue’n. 14 Kɛ bɔlɛ ufue’n nɔnnɔnnin’n, like wie m’ɔ ti kɛ sukwla ufue sa’n,+ ɔ fiteli asiɛ’n su aawlɛ flɛnnɛn’n nun. 15 Kɛ Izraɛlifuɛ’m be wunnin i’n, be usali be wiengu kɛ: “?Ngue like yɛle nga?” Afin be siman like sɔ’n. Moizi seli be kɛ: “Aliɛ* nga Zoova fa man amun kɛ amun di’n yɛ ɔ o lɛ-ɔ.+ 16 Ndɛ nga Zoova kannin’n yɛ: ‘Maan sran kun isa ng’ɔ kwla di’n. Maan sran kun fa omɛɛ kun.*+ Yɛ amun nian sran nga be o amun tannin sua’m be nun’n be nuan su naan amun a isa.’” 17 Izraɛlifuɛ’m be niannin su be isali. Sran wie’m be isɛli i kaka, wie’m be isɛli i kaan. 18 Kɛ be fali omɛɛ’n be sunnzunnin’n, be nga be isɛli i kaka’n b’a ɲanman wie b’a traman su, yɛ be nga be isɛli i kaan’n b’a mianman wie wun.+ Nga be kwla di’n yɛ be isali-ɔ.

19 Moizi seli be kɛ: “Nán sran fi yaci wie lɛ lele naan aliɛ cɛn su.”+ 20 Sanngɛ b’a faman Moizi i ndɛ’n su. Kɛ sran wie’m be yacili wie lɛ mɔ aliɛ cɛnnin su’n, sɔnniɛn’m be loli nun kpɛkun ɔ bɔnnin sa fiaan. Ɔ maan Moizi fali be wun ya. 21 Be isɛ i nglɛmun kwlaa. Sran kun isa ng’ɔ kwla di’n. Kɛ wia’n bo’n ɔ klo.

22 Cɛn nsiɛn’n su’n, be isa nga be isɛ i titi’n i sɔ kpɛ nɲɔn,+ sran kun isa omɛɛ nɲɔn. Ɔ maan Izraɛlifuɛ’m be su kpɛn’m be kwlaa be ko kan kleli Moizi. 23 Moizi seli be kɛ: “Ndɛ nga Zoova kannin’n yɛ: Ainman ti wunmiɛn lolɛ cɛn ngunmin kun,* ɔ ti Zoova i wunmiɛn-lolɛ-cɛn klonglo kun.+ Nga amun kunndɛ kɛ amún ɲíntɔn’n amun ɲintɔn, yɛ nga amun kunndɛ kɛ amún tɔ́n’n amun tɔn.+ Yɛ i ng’ɔ ka’n, amun sie i lɛ lele nglɛmun.” 24 Ɔ maan kɛ nga Moizi fa kannin’n sa’n, be yacili i lɛ lele lika’n cɛnnin, sanngɛ w’a bɔnman yɛ sɔnniɛn’m b’a loman nun. 25 Moizi seli be kɛ: “Amun di i andɛ, afin andɛ ti Zoova i wunmiɛn-lolɛ-cɛn. Andɛ’n, amun su wunman wie asiɛ wun. 26 Amún ísɛ i cɛn nsiɛn, sanngɛ cɛn nso’n su’n, m’ɔ ti Wunmiɛn-lolɛ-cɛn’n+ amun su wunman wie.” 27 Cɛn nso’n su’n, sran wie’m be fiteli be ɔli wie isalɛ, sanngɛ b’a wunman wie.

28 Ɔ maan Zoova seli Moizi kɛ: “?Ngue ti yɛ amun nantiman ndɛ nga n kan’n nin min mmla’m be su-ɔ? ?Amún yó i sɔ lele cɛn onin?+ 29 Maan ɔ tran amun klun titi kɛ Zoova fali Wunmiɛn-lolɛ-cɛn’n mannin amun.+ I sɔ’n ti yɛ cɛn nsiɛn’n su’n ɔ man amun aliɛ* cɛn ba nɲɔn liɛ’n niɔn. Maan sran kun ka kan ɔ o lɛ’n. Cɛn nso’n su’n, nán sran kun tu i bo kan ɔ tran lɛ’n.” 30 Ɔ maan cɛn nso’n su’n, nvlefuɛ’m be dili Wunmiɛn-lolɛ-cɛn’n.*+

31 Izraɛlifuɛ’m be flɛli aliɛ* sɔ’n kɛ “manin.”* Ɔ ti ufue kɛ koriandri mma sa. I fɛ’n ti kɛ gato paplapa mɔ be gua nun awɛma nzue’n sa.+ 32 Moizi seli kɛ: “Ndɛ nga Zoova kannin’n yɛ: ‘Maan amun fa manin omɛɛ kun be sie naan ɔ ka lɛ tititi.+ I liɛ’n, amun mma’m bé kwlá wún aliɛ* nga kɛ n fali amun Ezipti mɛn’n nun n fiteli’n, n fa mannin amun aawlɛ flɛnnɛn’n nun lɔ kɛ amun di’n.’” 33 Ɔ maan Moizi seli Aarɔn kɛ: “Fa sɛ kun, kpɛkun gua nun manin omɛɛ kun naan fa ko jin i Zoova i ɲrun. Maan ɔ yo like kun m’ɔ́ ká lɛ tititi-ɔ.”+ 34 Kɛ nga Zoova kan kleli Moizi’n sa’n, Aarɔn sieli i alaka m’ɔ ti Lalofuɛ’n*+ i ɲrun lɛ naan ɔ ka lɛ tititi. 35 Izraɛlifuɛ’m be dili manin’n afuɛ ablanan (40)+ ka naan b’a ju mɛn kun mɔ sran tran nun’n i nun.+ Be dili manin’n lele be juli Kanaan mɛn’n i aɲialiɛ’n su lɔ.+ 36 Omɛɛ kun ti efa* mɔ be bubuli nun blu’n i bue kun.

17 Izraɛlifuɛ’m be kwlaa be tuli be bo Sinin aawlɛ flɛnnɛn’n nun lɛ.+ Be jaso lika kun nun, be kɔ uflɛ nun, be jaso lika kun nun, be kɔ uflɛ nun, kɛ nga Zoova bɔbɔ se be kɛ be yo’n sa.+ I sin’n, be boli nanmue Refidimun lɛ.+ Sanngɛ nvlefuɛ’m be ɲanman nzue be nɔnman.

2 Ɔ maan nvlefuɛ’m be kunndɛli Moizi i utre.+ Be seli i kɛ: “Man e nzue naan e nɔn.” Sanngɛ Moizi usali be kɛ: “?Ngue ti yɛ amun kunndɛ min utre-ɔ? ?Ngue ti yɛ amun te sa Zoova te nian-ɔn?”+ 3 Nzuewe kunnin nvlefuɛ’m be kpa lika sɔ’n nun lɔ. Ɔ maan be plannin Moizi su.+ Be seli kɛ: “?Ngue ti yɛ a fali e Ezipti lɔ bali naan nzuewe kun e nin e mma mun, nin e nnɛn mun lele naan e wu-ɔ?” 4 I agualiɛ su’n, Moizi kpan flɛli Zoova. Ɔ seli i kɛ: “?Ń yó nvlefuɛ nga’m be sɛ? Afin ɔ cɛ kan bé fínfín min yɔbuɛ.”

5 Zoova seli Moizi kɛ: “Dun mmua nvlefuɛ’m be ɲrun. Fa Izraɛli kpɛnngbɛn wie mun naan a nin be wɔ. Fa ɔ kpɔnman nga a fa finnin Nili Nzue’n su’n.+ Tra nun naan nanti kɔ. 6 Nian! Ń má jrán ɔ ɲrun Orɛbu yɔbuɛ’n su lɔ. Ɔ fata kɛ a fa kpɔnman’n fin yɔbuɛ’n, kpɛkun nzue fín nun fíte, yɛ nvlefuɛ’m bé nɔ́n.”+ Moizi yoli i sɔ Izraɛli kpɛnngbɛn’m be ɲrun. 7 Ɔ maan ɔ flɛli lika sɔ’n kɛ Masa*+ nin Meriba,*+ afin Izraɛlifuɛ’m be kunndɛli utre yɛ be sali Zoova niannin,+ be seli kɛ: “?Zoova o e afiɛn annzɛ ɔ nunman e afiɛn?”

8 I sin’n, Amalɛkifuɛ’m+ be bali, kpɛkun be nin Izraɛlifuɛ’m be kunnin alɛ Refidimun lɛ.+ 9 Kɛ ɔ yoli sɔ’n, Moizi seli Zozie+ kɛ: “Fa yasua wie mun naan amun nin Amalɛkifuɛ mun be ko kun. Ainman’n, ń má fá Ɲanmiɛn Kpli i kpɔnman’n kpɛkun ń jrán kpɔlɛ’n i ti su nglo. 10 Zozie yoli like nga Moizi seli i kɛ ɔ yo’n i sɛsɛsɛ, + kpɛkun ɔ nin Amalɛkifuɛ mun be ko kunnin. Moizi nin Aarɔn ɔ nin Ur+ be ɔli kpɔlɛ’n i ti su nglo lɔ.

11 Kɛ Moizi i sa’m be o nglo’n, Izraɛlifuɛ mun yɛ be kwla-ɔ. Sanngɛ kɛ ɔ kɛn i sa’m be ase’n, Amalɛkifuɛ mun yɛ be kwla-ɔ. 12 Kɛ Moizi i sa’m be kpɔli’n, Aarɔn nin Ur be fali yɔbuɛ be sieli i bo lɛ naan ɔ tran su. Yɛ be suɛnnin i sa’m be bo, kun jin i bue kun wa, kun jin i bue kun wa. I sɔ’n ti’n, i sa’m be kwla kali nglo lele wia’n tɔli. 13 Ɔ maan Zozie fali tokofi kwlali Amalɛkifuɛ mun nin be nga be o be sin’n.+

14 Zoova seli Moizi kɛ: “Klɛ ndɛ nga fluwa kun su naan sran’m be wla w’a fiman su,* kpɛkun se Zozie kɛ: ‘Ń má núnnún Amalɛkifuɛ’m be osu’n i mlɔnmlɔn ɲanmiɛn’n bo wa. Sran fi i wla su kpɛnman be su.’”+ 15 I sin’n, Moizi kplannin tɛ yiwlɛ kun. Ɔ flɛli i kɛ Zoova-Nisi.* 16 Ɔ seli kɛ: “Kɛ mɔ Amalɛkifuɛ’m be fali be ɲin cili Ya i famiɛn bia’n ti’n,+ Zoova nin be wá kún alɛ blɛ kwlaa nun.”+

18 Zetro m’ɔ ti Ɲanmiɛn ɲrun jranfuɛ Madian lɔ’n, m’ɔ ti Moizi i sia’n,+ ɔ tili like kwlaa nga Ɲanmiɛn yo mannin Moizi nin Izraɛlifuɛ mɔ be ti i sran mun’n, ɔ nin wafa nga Zoova fali Izraɛlifuɛ mun Ezipti mɛn’n nun fiteli’n.+ 2 Kɛ Moizi fɛli i yi Sefora ko sieli i i sia Zetro i wun lɔ’n, ɔ sɔli i nun. 3 Ɔ sɔli i wa yasua nɲɔn’m+ be nun wie. Be flɛ i wa’n kun kɛ Gɛɛsɔmun*+ afin Moizi seli kɛ: “M’an kaci aofuɛ mɛn uflɛ nun.” 4 Yɛ be flɛ kun kɛ Eliezɛɛ* afin ɔ seli kɛ: “Min si i Ɲanmiɛn’n ti min ukafuɛ, ɔ deli min Faraɔn i tokofi’n i sa nun.”+

5 Ɔ maan Moizi i sia Zetro nin Moizi i mma mun nin i yi be toli Moizi aawlɛ flɛnnɛn’n nun lɔ, kan ɔ boli nanmue lɛ’n, Ɲanmiɛn Kpli i oka’n i wun lɛ.+ 6 Ɔ maan ɔ sunmannin sran naan be se Moizi kɛ: “N bɔbɔ Zetro mɔ n ti ɔ sia’n,+ e nin ɔ yi nin i mma nɲɔn mun e su kɔ ɔ wun lɔ.” 7 Kɛ Moizi tili i sɔ cɛ’n, ɔ fiteli ko kpɛli i sia’n i atin. Ɔ kotoli i bo, kpɛkun ɔ yoli i like.* Moizi tili be jasin, yɛ i kusu kɛnnin i liɛ’n kleli be. I sin’n, be wluli tannin sua’n nun lɔ.

8 Sa kwlaa nga Zoova fa yoli Faraɔn nin Eziptifuɛ mun Izraɛlifuɛ’m be ti’n,+ ɔ nin sa kekle nga be tɔli be su atin’n su’n,+ ɔ nin wafa nga Zoova deli be’n, Moizi kɛnnin i kwlaa kleli i sia’n. 9 Zetro i klun jɔli, sa kpakpa nga Zoova yo mannin Izraɛlifuɛ mun, ɔ nin delɛ ng’ɔ deli be Ezipti* lɔ’n ti. 10 I sin’n, Zetro seli kɛ: “Maan manmanlɛ’n yo Zoova m’ɔ deli amun Ezipti mɛn’n nun nin Faraɔn sa nun’n, i liɛ. Ɔ deli nvlefuɛ mun Eziptifuɛ’m be sa nun. 11 Siɛn’n, m’an wun kɛ Zoova ti dan tra ɲanmiɛn onga’m be kwlakwla,+ sa ng’ɔ fa yoli be nga be tu be wun i sran’m be su’n ti.” 12 I sin’n, Moizi i sia Zetro yili tɛ mɔ be yrɛ i nnɛn’n kɔlikɔli’n, ɔ nin tɛ wie mun ekun mannin Ɲanmiɛn. Kpɛkun Aarɔn nin Izraɛli kpɛnngbɛn’m be kwlakwla be bali, be nin Moizi i sia’n be wa dili like Ɲanmiɛn Kpli i ɲrun lɛ.

13 Kɛ i aliɛ cɛnnin’n, Moizi wa trannin ase naan ɔ́ dí nvlefuɛ’m be jɔlɛ kɛ ng’ɔ fa yo i titi’n sa. Nvlefuɛ’m be jrɛn i ɲrun nglɛmun lele nnɔsua. 14 Kɛ Moizi i sia Zetro wunnin like kwlaa nga Moizi yo man nvlefuɛ mun’n, ɔ usɛli i kɛ: “?Ngue yɛle nga á yó i yɛ’n? ?Ngue ti yɛ ɔ kunngba a tran wa mɔ nvlefuɛ’m be kwlaa be wa jran ɔ ɲrun nglɛmun lele nnɔsua’n niɔn?” 15 Moizi tɛli i sia’n su kɛ: “Sa nga ti yɛ n yo i sɔ’n yɛle kɛ, nvlefuɛ’m be ba min wun titi naan bé sí Ɲanmiɛn i klun sa’n. 16 Kɛ ndɛ tɔ sran nɲɔn be afiɛn’n, be fa ba min ja su, n di be jɔlɛ, kpɛkun n kle be Ɲanmiɛn Kpli i klun sa’n nin i mmla mun.”+

17 Moizi i sia’n seli i kɛ: “Nga a yo i lɛ’n timan kpa. 18 Á wá fɛ́, a nin nvlefuɛ mɔ be o yɛ’n amún wá fɛ́. Afin ɔ ti trɔ dan kpa ɔ ti su, ɔ ngunmin a kwlá suaman. 19 Tie min ndɛ’n. Ń má mán wɔ afɔtuɛ kun, kpɛkun Ɲanmiɛn jrán ɔ sin.+ Ɔ liɛ’n, kan nvlefuɛ’m be nuan ndɛ Ɲanmiɛn Kpli ɲrun,+ kpɛkun fa be ndɛ mun wlɛ i Ɲanmiɛn Kpli sa nun.+ 20 Ɔ fata kɛ a kle be Ɲanmiɛn i nuan ndɛ’n nin i mmla mun.+ Kle be atin ng’ɔ fata kɛ be fa’n, ɔ nin like ng’ɔ fata kɛ be yo’n. 21 Sanngɛ kpa yasua wie mun nvlefuɛ’m be nun. Maan be yo sran mɔ be si like yo+ mɔ be sro Ɲanmiɛn’n, mɔ be kwla lafi be su’n, mɔ be kpɔ lufle bulɛ’n.+ Sie wie mun sran akpi su kpɛn, sie wie mun sran ya su kpɛn, sie wie mun sran ablenun su kpɛn, yɛ sie wie mun sran blu su kpɛn.+ 22 Sɛ ndɛ tɔ’n,* bé dí nvlefuɛ’m be jɔlɛ. Bé fá ndɛ kekle’m bé bá ɔ ja su,+ sanngɛ bé síesíe ndɛ kanngan mun. Yo naan be uka wɔ junman’n i dilɛ nun naan w’a tinman ɔ su.+ 23 Sɛ a yo sɔ’n, mɔ i sɔ’n ti Ɲanmiɛn klun su’n, afɛ’n su tinman ɔ su, kpɛkun amun kwlakwla amun klun jɔ́.”

24 Moizi ka lɛ fali ndɛ nga i sia kannin’n su, kpɛkun ɔ yoli like kwlaa ng’ɔ seli i kɛ ɔ yo’n. 25 Ɔ kpali Izraɛlifuɛ’m be kwlaa be nun yasua wie mun mɔ be si like yo’n, kpɛkun ɔ sieli be nvlefuɛ’m be su kpɛn. Ɔ sieli wie mun sran akpi su kpɛn, ɔ sieli wie mun sran ya su kpɛn, ɔ sieli wie mun sran ablenun su kpɛn, kpɛkun ɔ sieli wie mun sran blu su kpɛn. 26 Ɔ maan kɛ sa tɔ’n, be di nvlefuɛ’m be jɔlɛ. Be fa sa kekle mun be kɔ Moizi ja su,+ sanngɛ be siesie ndɛ kanngan mun. 27 I sin’n, Moizi mɛnnin i sia’n i atin,+ kpɛkun ɔ sɛli i sin i nvle’n nun lɔ.

19 Kɛ Izraɛlifuɛ’m be fin Ezipti mɛn’n nun fiteli’n, i anglo nsan su’n i cɛn klikli’n su’n, be juli Sinai aawlɛ flɛnnɛn’n nun lɛ. 2 Be jasoli Refidimun lɔ+ be bali Sinai aawlɛ flɛnnɛn’n nun, be boli nanmue aawlɛ flɛnnɛn’n nun. Izraɛlifuɛ’m be boli nanmue lɛ, oka’n i ɲrun lɛ.+

3 Moizi fuli Ɲanmiɛn Kpli i wun lɔ. Zoova o oka’n su lɔ,+ ɔ flɛli i seli i kɛ: “Ndɛ ng’ɔ fata kɛ a kan kle Zakɔbu i osu’n nunfuɛ mɔ be yɛle Izraɛlifuɛ mun’n yɛ: 4 ‘Amun bɔbɔ amun wunnin like nga n fa yoli Eziptifuɛ mun’n.+ N yoli sɔ naan m’an kwla fa amun anunman ɲin’m be ndɛwa’m be su m’an ba min wun wa.+ 5 Sɛ amun fa ndɛ nga n kan’n i kwlaa su naan amun di aenguɛ nga e nin amun e trali’n su’n, amún yó min liɛ klonglo* nvle’m be kwlaa be afiɛn,+ afin asiɛ wunmuan’n ti min liɛ.+ 6 Amún wá káci famiɛn diwlɛ kun mɔ i nun’n Ɲanmiɛn ɲrun jranfuɛ mun yɛ bé dí famiɛn-ɔn, yɛ amún wá káci nvle kun m’ɔ ti Ɲanmiɛn liɛ klonglo’n.’+ Ndɛ ng’ɔ fata kɛ a kan kle Izraɛlifuɛ mun’n yɛ ɔ o lɛ-ɔ.”

7 Ɔ maan Moizi ɔli ko flɛli nvle’n nun kpɛnngbɛn mun, kpɛkun ndɛ kwlaa nga Zoova kan kleli i’n, ɔ kan kleli be.+ 8 I sin’n, nvlefuɛ’m be kwlaa be tɛli su kɛ: “Ndɛ kwlaa nga Zoova kannin’n, é nánti su e klun klo su.”+ Be ja nun lɛ’n, Moizi ko kannin ndɛ nga nvlefuɛ’m be kannin’n kleli Zoova. 9 Yɛ Zoova seli Moizi kɛ: “Nian! N wo ɲanmiɛn ble kun nun n su ba ɔ wun lɔ. I liɛ’n, kɛ e nin wɔ é íjɔ’n nvlefuɛ’m bé tí, kpɛkun bé láfi ɔ su titi wie.” Kɛ ɔ yoli sɔ’n, Moizi kannin ndɛ nga nvlefuɛ’m be kannin’n kleli Zoova.

10 I sin’n, Zoova seli Moizi kɛ: “Kɔ nvlefuɛ’m be sin naan yo be sanwun andɛ nin ainman, yɛ maan be kpu be tralɛ mun. 11 Maan be siesie be wun be minndɛ cɛn nsan su’n. Afin cɛn nsan su’n nun’n, Zoova wá jrá Sinai Oka’n su nvlefuɛ’m be kwlaa be ɲin bo lɛ. 12 Ɔ fata kɛ a ja awɛ man nvlefuɛ mun. Maan ɔ bo sin yia oka’n, kpɛkun se be kɛ: ‘Amun nian amun wun, nán amun mantan oka’n, yɛ nán amun kɛn i. Sran kwlaa ng’ɔ kan oka’n, saan bé kún i. 13 Nán sran fi i sa kan sran sɔ’n, sanngɛ maan be finfin i yɔbuɛ, annzɛ be fa ta be wɔ i. Sɛ ɔ wie nnɛn-o, annzɛ sran-o, ɔ su kaman nguan nun.’+ Sanngɛ kɛ be ko ti bua wɛ’n i tɛlɛ’n,+ be kwla fu oka’n su.”

14 I sin’n, Moizi fin oka’n su jrali, ɔ ɔli nvlefuɛ’m be wun lɔ. Kpɛkun ɔ yoli nvlefuɛ’m be sanwun, yɛ be kpuli be tralɛ mun.+ 15 Ɔ seli nvlefuɛ’m be kɛ: “Amun siesie amun wun be minndɛ cɛn nsan su’n. Nán amun nin amun yi mun be si sua.”*

16 Cɛn nsan su’n i nglɛmun nun’n, angblannan’n tɛli, ɲanmiɛn’n kpali sin, ɲanmiɛn ble kpikplikpi kpa kun+ katali oka’n su, yɛ awɛ kun tɛli kekle kpa. Nvlefuɛ nga be o nanmue’n nun’n be kwlaa be usuli.+ 17 Moizi fali nvlefuɛ mun nanmue’n nun fiteli naan be wɔ Ɲanmiɛn Kpli i wun lɔ. Be ko jranjrannin oka’n i bo lɛ. 18 Sin wunsrɛn fali Sinai Oka wunmuan’n, afin Zoova wo sin nun yɛ ɔ jrali oka’n su-ɔ.+ Sin wunsrɛn’n fu kɔ nglo kɛ fuu nun sin wunsrɛn sa, kpɛkun oka wunmuan’n kejeli dan kpa.+ 19 Kɛ awɛ’n tɛ́ kekle kpa’n, Moizi ijɔli kpɛkun Ɲanmiɛn Kpli tɛli i su.*

20 Ɔ maan Zoova jrali Sinai Oka’n su, ɔ jrali oka’n i ti su nglo lɔ. I sin’n, Zoova flɛli Moizi oka’n i ti su nglo lɔ, naan Moizi w’a fu lɔ.+ 21 Zoova seli Moizi kɛ: “Jra naan ko se nvlefuɛ’m be kɛ nán be se kɛ bé mántan wa kekle nun naan bé nían Zoova. Sɛ be yo sɔ’n, be nun kpanngban bé wú. 22 Maan Ɲanmiɛn ɲrun jranfuɛ mɔ be mantan Zoova titi’n, be yo be wun sanwun. I liɛ’n, Zoova su kunman be.”+ 23 Yɛ Moizi seli Zoova kɛ: “Nvlefuɛ’m be su kwlá fuman Sinai Oka’n su, afin a dun mmua seli kɛ: ‘Kpɛ awɛ naan ɔ bo sin yia oka’n, yɛ yo maan ɔ yo min liɛ klonglo.’”+ 24 Sanngɛ Zoova seli i kɛ: “Kɔ, jra, i sin’n a nin Aarɔn be fu wa. Sanngɛ nán man Ɲanmiɛn ɲrun jranfuɛ mun nin nvlefuɛ’m be atin naan be fu Zoova i wun wa kekle nun, kɛ ɔ ko yo naan w’a kunman be’n ti.”+ 25 Ɔ maan Moizi jra ɔli nvlefuɛ’m be wun lɔ, kpɛkun ɔ kannin ndɛ’n kleli be.

20 I sin’n, Ɲanmiɛn kannin ndɛ nga mun:+

2 “Zoova m’ɔ ti ɔ Ɲanmiɛn’n yɛle min. Min yɛ n fali wɔ Ezipti mɛn’n nun lɔ, i nun mɔ a o kanga sua’n nun lɔ’n, n fiteli-ɔ.+ 3 Nán su ɲanmiɛn uflɛ fi, saan min kunngba cɛ.+

4 Nán sɛ like wie, annzɛ yo like wie m’ɔ fa ɲanmiɛn su lɔ like, annzɛ asiɛ’n su like, annzɛ nzue nga be o asiɛ’n su’n* be nun like.+ 5 Nán koto be bo, nán sran fi laka wɔ naan sɔ be.+ Afin min Zoova mɔ n ti ɔ Ɲanmiɛn’n, n kunndɛ kɛ be su min kunngba cɛ.+ Be nga be kpɔ min’n, n fa be sa tɛ’n i su afɛ’n n yi i be mma mun nin be anunman mun, ɔ nin be anunman’m be mma liɛ’m be su. 6 Sanngɛ be nga be klo min mɔ be nanti min mmla’m be su’n, n klo be lele n fa wlu be osu’n nunfuɛ’m be akpasua akpi su’n nun.+

7 Nán yo Zoova m’ɔ ti ɔ Ɲanmiɛn’n i dunman’n i finfin.+ Afin sran ng’ɔ yo Zoova i dunman’n i finfin’n, ɔ su yacimɛn i lɛ, saan ɔ́ tú i fɔ.+

8 Maan ɔ wla kpɛn Wunmiɛn-lolɛ-cɛn’n su, maan ɔ yo Ɲanmiɛn liɛ klonglo titi.+ 9 Fa cɛn nsiɛn di junman. Di ɔ junman’m be kwlakwla cɛn sɔ’m be nun.+ 10 Sanngɛ cɛn nso su’n ti wunmiɛn-lolɛ-cɛn, ɔ ti ɔ Ɲanmiɛn Zoova i liɛ. Nán di junman wie fi, maan ɔ wie ɔ bɔbɔ-o, annzɛ ɔ wa yasua-o, annzɛ ɔ wa bla-o, annzɛ ɔ kanga yasua-o, annzɛ ɔ kanga bla-o, annzɛ ɔ nnɛn mun-o, annzɛ ɔ aofuɛ m’ɔ tran ɔ awlo lɔ-o, nán maan amun nun wie fi di junman.+ 11 Afin Zoova fali cɛn nsiɛn yili nglo’n nin asiɛ’n, ɔ nin jenvie’n nin be nun ninnge’m be kwlaa. Kpɛkun i cɛn nso su’n, ɔ boli wunmiɛn lolɛ bo.+ I sɔ’n ti yɛ Zoova yrali Wunmiɛn-lolɛ-cɛn’n su m’ɔ sieli i ngunmin’n niɔn.

12 “Bu ɔ si nin ɔ nin be sran.+ I liɛ’n, á cɛ́ kpa mɛn nga Zoova m’ɔ ti ɔ Ɲanmiɛn’n ɔ́ mán wɔ’n nun.+

13 “Nán kun sran.+

14 “Nán kunndɛ bla ɔ yi bo, annzɛ bian ɔ wun bo.+

15 “Nán wua.+

16 “Sɛ be fa ɔ lalofuɛ’n, nán tɔn ɔ wiengu suɛn.+

17 “Nán ɔ ɲin blo ɔ wiengu i sua su. Nán ɔ ɲin blo i yi,+ annzɛ i kanga yasua, annzɛ i kanga bla annzɛ i nannin tola annzɛ i aflunmun su. Nán ɔ ɲin blo ɔ wiengu i like fi su.”+

18 Sran’m be kwlaa be tili ɲanmiɛn’n i kplalɛ’n, be wunnin kɛ ɲanmiɛn su lɔ’n kpa sin. Be tili awɛ’n i tɛlɛ, yɛ be wunnin kɛ oka’n ti sin wunsrɛn ngunmin. Kɛ be wunnin i sɔ’n be usuli, kpɛkun be jrannin mmua lɔ.+ 19 Ɔ maan be seli Moizi kɛ: “Maan ɔ bɔbɔ a nin e ijɔ. É síe e su é tíe. Sanngɛ nán maan Ɲanmiɛn nin e ijɔ, kɛ ɔ́ yó naan y’a wuman’n ti.”+ 20 Moizi seli nvlefuɛ’m be kɛ: “Nán srɛ kun amun, afin Ɲanmiɛn Kpli yoli sɔ naan ɔ́ sá amun nían,+ kɛ ɔ ko yo naan amun a sro i titi, naan amun a yoman sa tɛ’n ti.”+ 21 Ɔ maan nvlefuɛ’m be jrannin mmua lɔ, sanngɛ Moizi mantannin ɲanmiɛn ble mɔ i nun yɛ Ɲanmiɛn Kpli o’n i wun koko lɔ.+

22 Zoova seli Moizi kɛ: “Ndɛ ng’ɔ fata kɛ a kan kle Izraɛlifuɛ mun’n yɛ: ‘Amun bɔbɔ amun wunnin kɛ ɲanmiɛn su lɔ yɛ n wo yɛ n kannin ndɛ n kleli amun-ɔn.’+ 23 Nán amun yo sika amuin be uka min su, yɛ nán amun yo sika ɔkwlɛ amuin.+ 24 Fa fa yo tɛ yiwlɛ kun man min. I su yɛ á yí tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ’n* mán min-ɔn. I su yɛ á fá ɔ nannin nin ɔ bua mun yí tɛ-ɔ. Lika kwlaa nga ń yí min wun nglo lɛ naan be wla kpɛn min dunman’n su’n,+ ń bá ɔ wun lɔ, kpɛkun ń yrá ɔ su. 25 Sɛ ɔ waan á fá yɔbuɛ kplán tɛ yiwlɛ kun mán min’n, nán fa yɔbuɛ mɔ be sɛli’n.+ Afin sɛ a fa blalɛ wie sɛ yɔbuɛ’n ɔ su yoman sanwun min ɲrun. 26 Nán fu asikalie su kɔ min tɛ yiwlɛ’n su, kɛ ɔ ko yo naan b’a wunman ɔ nvialiɛ nun lika mun’n* ti.

21 “Mmla ng’ɔ fata kɛ a fa man be’n yɛ:+

2 “Sɛ a to Ebre kanga kun’n,+ ɔ́ dí kanga junman afuɛ nsiɛn, sanngɛ afuɛ nso su’n, ɔ fata kɛ a yaci i nun, nán maan ɔ tannin like fi.+ 3 Sɛ i kunngba yɛ ɔ bali’n, maan i kunngba sɛ i sin. Sɛ ɔ nin i yi yɛ be bali’n, maan ɔ nin i be sa be sin. 4 Sɛ i min’n mɛn i bla naan ɔ nin i be wu ba yasua annzɛ ba bla mun’n, bla’n nin ba mun bé yó i min’n i liɛ, yɛ maan i kunngba sɛ i sin.+ 5 Sanngɛ sɛ kanga’n jran su kpa se kɛ: ‘N klo min min’n nin min yi’n nin min mma mun, n kunndɛman kɛ ń kɔ́’n,’+ 6 maan i min’n fɛ i wɔ Ɲanmiɛn Kpli i ɲrun lɔ. I sin’n, maan ɔ fɛ i mantan anuan’n annzɛ anuan’n i kadri’n naan ɔ fa tulie kun fiti i su’n, yɛ ɔ́ káci i kanga titi.

7 “Sɛ sran kun yo i wa bla’n i atɛ kɛ kanga sa’n, be su yacimɛn i nun kɛ nga be fa yaci kanga yasua’n i nun’n sa. 8 Sɛ i wun yomɛn i min’n i fɛ’n naan w’a fɛmɛn i w’a yomɛn i yi’n,* sɛ ɔ kunndɛ kɛ ɔ́ yó i atɛ sran uflɛ sa nun’n,* ɔ leman atin yomɛn i atɛ aofuɛ’m be sa nun, afin ɔ lɛkɛli i. 9 Sɛ ɔ fɛ i mɛn i wa yasua’n, like nga be yo be man ba bla mun’n, maan ɔ yo mɛn i. 10 Sɛ ɔ fa bla uflɛ’n, nán ɔ kpɛ bla klikli’n i aliɛ nin i tralɛ’n nin i sin lalɛ’n+ su. 11 Sɛ w’a yoman like nsan sɔ mun w’a mɛnmɛn i’n, maan bla’n wɔ, nán ɔ tannin sika fi.

12 “Sran kwlaa ng’ɔ bo i wiengu kun lele naan ɔ kun i’n, maan be kun i.+ 13 Sanngɛ sɛ nɛ́n i ɲinfu yɛ ɔ yoli sɔ naan Ɲanmiɛn Kpli mannin atin kɛ sa sɔ’n ju’n, ń má klé wɔ lika kun mɔ sran sɔ’n kwla wanndi kɔ lɔ’n.+ 14 Sɛ sran kun fa ya ble i wiengu kun wun naan i ɲinfu ɔ kun i’n,+ kannzɛ bɔbɔ ɔ ko fia min tɛ yiwlɛ’n i wun lɔ’n, maan be kun i.+ 15 Sran ng’ɔ bo i si annzɛ i nin’n, maan be kun i.+

16 “Sɛ sran kun tra sran kun kekle nun+ naan ɔ yo i atɛ’n, annzɛ kusu be wun kɛ i sɔ sran’n wo i sa nun’n,+ maan be kun i.+

17 “Sran kwlaa ng’ɔ bo i si annzɛ i nin i sannzan’n, maan be kun i.+

18 “Sɛ yasua wie’m be kan ndɛnngan, naan be nun kun fa yɔbuɛ fin i wiengu kun’n, annzɛ sɛ ɔ bo i acɔliɛ* naan w’a wuman sanngɛ ɔ lɛ i bɛ’n su naan ɔ kwlá jasoman’n, like ng’ɔ fata kɛ be yo’n yɛ: 19 Sɛ ɔ kwla jaso naan ɔ kwla fa kpɔnman nanti fite gua su’n, nán maan be tu sran ng’ɔ yoli i like’n i fɔ. Blɛ mɔ sran ng’ɔ yoli i like’n ɔ kwlaman junman di’n, ɔ́ níɛn i lika lele ɔ́ fá yó juejue.

20 “Sɛ sran kun fa waka bo i kanga yasua annzɛ i kanga bla naan ɔ wu i sa nun’n, maan be tu kanga’n i klunngbɔ.+ 21 Sanngɛ sɛ ɔ di cɛn kun annzɛ cɛn nɲɔn naan w’a wu’n, nán maan be tu i klunngbɔ. Afin i min’n bɔbɔ i sika yɛ ɔ fa toli i-ɔ.

22 “Sɛ yasua wie’m be su di utre naan be tu si bla kun m’ɔ ti wunnzɛfuɛ’n, sɛ i ba wulɛ cɛn nin-a juman naan ɔ wu ba’n,*+ kannzɛ wie ndɛ* w’a baman nun’n, ɔ fata kɛ sran ng’ɔ yoli sa’n ɔ yi like nga bla’n i wun’n ɔ se i kɛ ɔ yi’n. Maan ɔ yi like sɔ’n jɔlɛ difuɛ’m be ɲrun.+ 23 Sanngɛ sɛ wie ndɛ ba nun’n, ɔ fata kɛ be kun sran kunfuɛ’n wie.+ 24 Sɛ sran kun bo sran kun i ɲinma’n, maan be bo i liɛ’n wie, sɛ ɔ bu i je’n maan be bu i liɛ’n wie, sɛ ɔ bu i sa’n maan be bu i liɛ’n wie, sɛ ɔ bu i ja’n, maan be bu i liɛ’n wie,+ 25 sɛ ɔ fa sin yrɛ i’n, maan be fa sin yrɛ i wie, sɛ ɔ bo i kannin’n, maan be bo i kannin wie, sɛ ɔ yo i like yaya’n, maan be yo i like yaya wie.

26 “Sɛ sran kun fin i kanga yasua annzɛ i kanga bla i ɲinma’n su naan ɔ bo’n, maan ɔ yaci kanga’n i nun naan ɔ wɔ, i ɲinma m’ɔ boli i’n ti.+ 27 Sɛ ɔ tu i kanga yasua annzɛ i kanga bla i je’n, maan ɔ yaci i nun naan ɔ wɔ, i je m’ɔ tuli i’n ti.

28 “Sɛ nannin tola kun si yasua kun annzɛ bla kun naan ɔ wu’n, maan be finfin nannin tola’n i yɔbuɛ naan ɔ wu,+ nán be di i nnɛn’n, sanngɛ be su tuman nannin’n i fuɛ’n i fɔ. 29 Sanngɛ sɛ nannin tola kun si sran titi naan be kan kle i fuɛ’n naan ɔ niɛnmɛn i su’n, sɛ ɔ kun yasua kun annzɛ bla kun’n, maan be finfin nannin tola’n i yɔbuɛ, yɛ maan be kun i fuɛ’n wie. 30 Sɛ be se i kɛ ɔ yi like wie naan ɔ fa kpɔ i ti’n,* maan ɔ yi like kwlaa nga be se i kɛ ɔ yi naan w’a ka nguan nun’n. 31 Kannzɛ ɔ si ba yasua kun annzɛ ba bla kun’n, maan be nian mmla nga su be di nnɛn’n i fuɛ’n i jɔlɛ. 32 Sɛ nannin tola’n si kanga yasua kun annzɛ kanga bla kun’n, maan nannin’n i fuɛ’n yi sika sikli* ablasan (30) man kanga’n i min’n, yɛ maan be finfin nannin tola’n i yɔbuɛ lele naan ɔ wu.

33 “Sɛ sran kun yaci kunman kun lɛ, annzɛ ɔ fu kunman kun naan w’a kataman su’n, sɛ nannin tola kun annzɛ aflunmun kun tɔ nun’n, 34 maan sran nga i liɛ yɛle kunman’n ɔ yi like.+ Maan ɔ yi nnɛn’n i ti sika’n mɛn i fuɛ’n, yɛ nnɛn’n i fuɛn’n yó i liɛ. 35 Sɛ sran kun i nannin tola’n yo sran uflɛ liɛ’n i like yaya naan ɔ wu’n, maan be yo nannin tola nga w’a wuman’n i atɛ naan be cɛ i sika’n nun, yɛ maan be cɛ nnɛn ng’ɔ wuli’n nun wie. 36 Annzɛ sɛ sran’m be si kɛ nannin tola sɔ’n si sran titi naan i fuɛ’n w’a niɛnmɛn i su’n, maan ɔ fa nannin tola uflɛ sie nannin tola ng’ɔ wuli’n i osu, yɛ ng’ɔ wuli’n yó i liɛ.

22 “Sɛ sran kun wua nannin tola kun, annzɛ bua kun, naan ɔ kun i annzɛ ɔ yo i atɛ’n, sɛ nannin tola yɛ ɔ wuali’n ɔ fata kɛ ɔ fa nannin tola nnun sie i osu, sɛ bua yɛ ɔ wuali’n, ɔ fata kɛ ɔ fa bua nnan sie i osu.+

2 (“Sɛ awiefuɛ kun+ su bu anuan naan ɔ́ wúa’n, sɛ be fin i like naan ɔ wu’n, be su tuman sran ng’ɔ kunnin i’n i fɔ. 3 Sanngɛ sɛ wia nun yɛ sa sɔ’n juli’n bé tú sran ng’ɔ kunnin i’n i fɔ.)

“Ɔ fata kɛ ɔ yi like sie i osu. Sɛ ɔ leman like fi kusu’n, ɔ fata kɛ be yo i bɔbɔ i atɛ ninnge ng’ɔ wuali be’n ti. 4 Sɛ like ng’ɔ wuali’n o i sa nun naan i ɲin te o su’n, kannzɛ ɔ ti nannin tola annzɛ aflunmun annzɛ bua’n, ɔ fata kɛ ɔ yi i wunsu kpɛ nɲɔn.

5 “Sɛ sran kun fɛ i nnɛn mun kɛ be ko didi i fie’n nun, annzɛ i viɲin fie’n nun naan ɔ yaci be lɛ be ko didi sran uflɛ i fie liɛ’n nun’n, ɔ fata kɛ ɔ fɛ i bɔbɔ i fie liɛ’n annzɛ i viɲin fie liɛ’n i nun ninnge kpakpa mun fa sie i osu.

6 “Sɛ lika wie su yra naan sin’n yra susrɛ mɔ be ti owieowie’n, kpɛkun ɔ ko yra fie nun ninnge nga b’a kpɛ’n, annzɛ nga be nin-a kpɛman’n, annzɛ ɔ yra fie kun’n, ɔ fata kɛ sran ng’ɔ sɔli sin’n ɔ yi ninnge nga sin’n yrali be’n fa sie i osu.

7 “Sɛ sran kun mɛn i wiengu sika annzɛ ninnge wie mun kɛ ɔ fa sie naan be wua ninnge sɔ mun sran’n i awlo lɔ’n, sɛ be tra awiefuɛ’n ɔ fata kɛ ɔ yi like ng’ɔ wuali’n i wunsu kpɛ nɲɔn sie i osu.+ 8 Sɛ b’a traman awiefuɛ’n, maan be fa sran ng’ɔ le awlo’n be wɔ Ɲanmiɛn Kpli i ɲrun+ naan be nian, sɛ i yɛ ɔ fɛli i niaan’n i ninnge mun-o.* 9 Sran kwlaa ng’ɔ fa like m’ɔ timɛn i liɛ’n, sɛ nannin tola annzɛ aflunmun, annzɛ bua, annzɛ tralɛ’n, annzɛ kusu sɛ like wie yɛ ɔ mlinnin naan sran kun se kɛ: ‘Ɔ ti min liɛ’n,’ maan sran nga be si like sɔ’n su akplowa’n be fa be ndɛ’n wɔ Ɲanmiɛn Kpli i ɲrun.+ Sran kwlaa nga Ɲanmiɛn se kɛ i yɛ ɔ yoli sa tɛ’n, maan ɔ yi like ng’ɔ fali’n i wunsu kpɛ nɲɔn mɛn i wiengu’n.+

10 “Sɛ sran kun mɛn i wiengu aflunmun kun, annzɛ nannin tola kun, annzɛ bua kun, annzɛ klɔ nnɛn kwlaa wie kɛ ɔ niɛn i lika’n, sɛ nnɛn’n wu annzɛ i lika wie bu’n, annzɛ kusu sɛ sran fi nunman lɛ naan sran wie fa’n, 11 ɔ fata kɛ sran nga be fali like’n wlɛli i sa nun’n ɔ ta nda Zoova ɲrun, naan ɔ se kɛ nɛ́n i yɛ ɔ fɛli i niaan’n i ninnge mun-ɔn. Yɛ maan sran ng’ɔ le like’n ɔ fɛ i sɔ. Ɔ nunman nun kɛ i wiengu kun’n yi like fa sie i osu.+ 12 Sanngɛ sɛ be wuali nnɛn’n i sa nun’n, ɔ fata kɛ ɔ yi like fa sie i osu man nnɛn’n i fuɛ’n. 13 Sɛ blo nnɛn wie yɛ ɔ titili nnɛn sɔ’n i nun’n, ɔ fata kɛ ɔ fa bla naan be wun kɛ sa sɔ’n juli sakpa. Sɛ blo nnɛn yɛ ɔ titili nnɛn’n i nun’n, ɔ nunman nun kɛ ɔ yi like sie i osu.

14 “Sanngɛ sɛ sran wie ko srɛ nnɛn i wiengu kun sa nun’n, sɛ i fuɛ’n nunman lɛ naan nnɛn’n i lika wie bu annzɛ ɔ wu’n, maan sran ng’ɔ ko srɛli nnɛn’n ɔ yi like sie i osu. 15 Sɛ nnɛn’n i fuɛ’n i bɔbɔ o lɛ’n, ɔ fataman kɛ sran’n yi like sie i osu. Sɛ ɔ lueli nnɛn’n, sika ng’ɔ mannin’n yɛ ɔ ti i osu sielɛ’n niɔn.

16 “Sɛ yasua kun lakalaka bla kun m’ɔ nin-a siman bian’n, sɛ be nin-a trɛmɛn i ase’n naan ɔ nin i be la’n, maan ɔ man aja like’n naan bla’n kaci i yi.+ 17 Sɛ bɔbɔ bla’n i si’n waan ɔ kplinman su mlɔnmlɔn kɛ ɔ́ fɛ́ i wa’n mɛ́n i’n, sanngɛ maan ɔ yi aja like’n sika nun.

18 “Nán yaci baefuɛ bla kun nguan nun.+

19 “Sran kwlaa ng’ɔ nin nnɛn be la’n, maan be kun i.+

20 “Sran kwlaa ng’ɔ yi tɛ man ɲanmiɛn uflɛ’n, m’ɔ yiman tɛ manman Zoova i ngunmin’n, maan be kun i.+

21 “Ɔ fataman kɛ a yo aofuɛ’m be tɛtɛ annzɛ a kle be ɲrɛnnɛn,+ afin ɔ bɔbɔ a yoli aofuɛ Ezipti mɛn’n nun lɔ.+

22 “Ɔ fataman kɛ amun yo angbeti bla mun nin ba nga be leman si’n* be tɛtɛ.+ 23 Sɛ a kle be yalɛ naan be kpan flɛ min’n, saan ń tí be kpanlɛ’n.+ 24 Ń fá ya dan kpa, kpɛkun ń fá tokofi ń kún amun. Ɔ maan amun yi’m bé káci angbeti yɛ amun mma’m bé ká aika.

25 “Sɛ a man min nvle nunfuɛ kun m’ɔ ti yalɛfuɛ’n,* m’ɔ nin wɔ be tran’n i sika kɛ i sin’n ɔ yi man wɔ’n, ɔ fataman kɛ a fɛ i sɔ’n kunndɛ sika. Nán se kɛ ɔ su i bo.+

26 “Sɛ a fa sran kun tralɛ kɛ aowa sa’n,+ ɔ fata kɛ a fa ko mɛn i ka naan wia’n w’a tɔ. 27 Afin like kunngba ng’ɔ le i m’ɔ fa kɛtɛ i wun’n* yɛ ɔ o lɛ-ɔ, i tralɛ m’ɔ fa kɛtɛ i wunnɛn’n su’n yɛ ɔ o lɛ-ɔ. ?Ngue yɛ ɔ́ fá kɛ́tɛ i wun naan w’a la-ɔ?+ Kɛ ɔ́ kpán flɛ́ min’n, saan ń tíe, afin n si aunnvɔɛ.+

28 “Nán bo Ɲanmiɛn i sannzan,*+ nán bo amun nvle’n nun kpɛn kun* i sannzan.+

29 “Ɔ fie su ninnge kpanngban mun, ɔ nin ɔ duvɛn yiwlɛ nun duvɛn m’ɔ yi bu gua’n, ɔ nin ɔ ngo yiwlɛ nun ngo m’ɔ yi bu gua’n, nán sisi ɔ bo naan w’a fa wie w’a man Ɲanmiɛn.+ Ɔ fata kɛ a fa ɔ mma yasua klikli mun man min.+ 30 Like ng’ɔ fata kɛ a fa ɔ nannin tola’n nin ɔ bua’n+ yo’n yɛ: Maan ɔ di cɛn nso i nin’n i bo wun. I cɛn mɔcuɛ su’n, ɔ fata kɛ a fɛ i man min.+

31 “Ɔ fata kɛ amun yo amun wun sanwun man min.+ Nán amun di nnɛn wie mɔ blo nnɛn wie titili i nun fie su lɔ’n.+ Ɔ fata kɛ amun fa man alua mun.

23 “Ndɛ ng’ɔ timan nanwlɛ’n, nán kan tru.+ Nán jran sa tɛ yofuɛ’n i sin naan kaci lalofuɛ m’ɔ bua ato’n.+ 2 Nán nian kɛ sran kpanngban be yo sa tɛ’n ti’n, á sú be su yó wie, yɛ sɛ bé dí jɔlɛ naan ɔ fata kɛ a di lalo’n, nán kpɛ ndɛ’n i wun naan kan ndɛ ng’ɔ́ yó sran’m be fɛ’n.* 3 Sɛ yalɛfuɛ kun ɲan ndɛ’n, di ndɛ’n i nanwlɛ su.+

4 “Sɛ ɔ kpɔfuɛ i nannin tola annzɛ i aflunmun mlin naan a wun i’n, ɔ fata kɛ a fa ko mɛn i.+ 5 Sɛ a wun kɛ trɔ w’a tin sran kun m’ɔ kpɔ wɔ’n i aflunmun’n su naan w’a tɔ’n, nán yo kɛ w’a wunmɛn i sa naan sin kɔ. Ɔ fata kɛ a ukɛ i naan amun yi trɔ’n nnɛn’n i su.+

6 “Sɛ á dí yalɛfuɛ ng’ɔ o amun afiɛn’n i jɔlɛ’n, nán kpɛ ndɛ’n i wun naan ɔ tɔ i su.+

7 “Nán fa ato ndɛ su, yɛ nán kun sran nga w’a yoman sa tɛ’n, annzɛ sran kpa’n, afin sran ng’ɔ yo sa tɛ’n, n su seman kɛ ɔ ti sran kpa.*+

8 “Nán sɔ adi like nun, afin adi like’n si sran ng’ɔ wun ase kpa’n i ɲin, yɛ ɔ kwla saci sran kpa’m be ndɛ kanlɛ’n.+

9 “Nán kle aofuɛ’n i ɲrɛnnɛn. Afin amun si aofuɛ yolɛ’n i nun ndɛ, yɛle kɛ amun bɔbɔ amun yoli aofuɛ Ezipti mɛn’n nun lɔ.+

10 “Lua ɔ asiɛ’n su like, yɛ ti i su mma mun afuɛ nsiɛn.+ 11 Sanngɛ afuɛ nso’n su’n, nán lua su like, yaci i lɛ maan ɔ lo wunmiɛn. I liɛ’n, yalɛfuɛ nga be o ɔ nvle’n nun’n bé ɲán wie bé dí, yɛ nga be yaci i lɛ’n, blo nnɛn nga be o fie’n su’n bé dí. Ɔ fata kɛ a yo ɔ viɲin fie nin ɔ olivie fie’m be sɔ wie.

12 “Fa cɛn ba nsiɛn di ɔ junman’n. Sanngɛ cɛn nso’n su’n, nán di junman. I liɛ’n, ɔ nannin tola’n nin ɔ aflunmun’n bé ló wunmiɛn, yɛ ɔ kanga bla’n i wa yasua’n ɔ nin aofuɛ nga be o amun afiɛn’n bé ló wunmiɛn.+

13 “Maan amun nian nun nanti ndɛ kwlaa nga n kan kleli amun’n su.+ Nán amun bo ɲanmiɛn uflɛ wie fi i dunman. Nán be ti be dunman ɔ nuan nun.+

14 “Afuɛ kwlaa nun’n, di cɛn kpɛ nsan man min.+ 15 Á wá dí Kpanwun mɔ Levii Nunman nun’n i ti Cɛn’n.+ Abibu* anglo’n+ nun’n, kɛ i blɛ ko ju’n, fa cɛn nso di kpanwun mɔ levii nunman nun’n, kɛ nga n kan kleli wɔ’n sa. Afin blɛ sɔ’n nun yɛ amun fin Ezipti lɔ fiteli-ɔ. Nán maan sran fi fɛ i sa ngbɛn bla min ɲrun.+ 16 Asa ekun’n, di Ninnge’m be Kpɛlɛ i ti Cɛn’n.* Kɛ á kpɛ́ ninnge nga a luali be ɔ fie’n su’n be mma klikli’n, blɛ sɔ’n nun yɛ ɔ fata kɛ a di cɛn sɔ’n niɔn.+ Kɛ afuɛ nuan ko yia mɔ a ko yiayia ɔ fie’n su ninnge’m be su’n, di Ninnge’m be su Yiayialɛ’n i ti Cɛn’n.*+ 17 Afuɛ kwlakwla’n, maan yasua’m be kwlaa be bla Zoova m’ɔ ti be Min kpafuɛ’n i ɲrun kpɛ nsan.+

18 “Kɛ á fá tɛ nga be yi man min’n i mmoja’n mán min’n, nán fa like nga levii o nun’n sie su. Cɛn nga amun di man min’n be nun’n, nán maan nnɛn lui nga a fa yili tɛ’n ɔ ka lɛ kɔnguɛ lele naan lika cɛn su.

19 “Ɔ fata kɛ a fa ɔ asiɛ’n i su ninnge’m be mma klikli’m be nun kpakpa mun wɔ ɔ Ɲanmiɛn Zoova i sua’n nun lɔ.+

“Nán tɔn boli ba’n i nin i wunflɛn nzue’n nun.+

20 “N su sunman anzi kun ɔ ɲrun+ naan ɔ sasa wɔ atin’n nun, naan ɔ fa ɔ wɔ lika nga n siesieli’n nun lɔ.+ 21 Fa ɔ su sie i ndɛ ng’ɔ kan’n i bo, yɛ maan ɔ ɲin yi i. Nán yo ɲin kekle i su, afin ɔ su yaciman ɔ sa tɛ mun cɛman wɔ, afin min dunman’n wo i su.+ 22 Sanngɛ sɛ ɔ ɲin yi i kpa naan a yo like kwlaa nga n se wɔ kɛ a yo’n, be nga be kpɔ amun’n, ń káci be kpɔfuɛ, yɛ be nga be tanndan ɔ ɲrun’n, ń tánndan be ɲrun wie. 23 Afin min anzi’n wá dún mmua ɔ ɲrun, yɛ ɔ́ fá wɔ kɔ́ Amɔɔfuɛ mun, nin Ɛtifuɛ mun, nin Perizifuɛ mun, nin Kanaanfuɛ mun, nin Ivifuɛ mun, nin Zebisifuɛ’m be mɛn’n nun lɔ, kpɛkun ń núnnún be.+ 24 Ɔ fataman kɛ a koto be amuin’m be bo, nán sran fi laka wɔ naan a sɔ be, yɛ nán nian like nga be yo’n su yo wie.+ Sanngɛ bubu be amuin mun, yɛ fufu yɔbuɛ nga be sɔ be’n be nun.+ 25 Ɔ fata kɛ amun su amun Ɲanmiɛn Zoova,+ yɛ ɔ́ yrá ɔ aliɛ’n* nin ɔ nzue’n su.+ Ń má yí tukpacɛ’n amun afiɛn.+ 26 Bla nga be o ɔ nvle’n nun’n be su kpɔman ba, yɛ be klun su yoman kpan.+ Ń má yó maan á cɛ́ asiɛ’n su.

27 “Ń má yó maan min wun srɛ tɔ́ be nga bé tí i kɛ a su ba’n be su,+ ń má sánngan be kwlaa nga a nin be yía nun’n be nun, yɛ ń má yó maan ɔ kpɔfuɛ’m bé wánndi ɔ bo.+ 28 Ń má fá awlabɔɛ* ń yí be nga be o amun ɲrun’n be su,+ yɛ ń má fúan Ivifuɛ mun nin Kanaanfuɛ mun nin Ɛtifuɛ mun ɔ ɲrun.+ 29 N su fuanman be afuɛ kunngba nun, kɛ ɔ ko yo naan lika’n w’a tɔman srolo naan blo nnɛn’m b’a sɔnman naan b’a yoman ɔ like’n ti.+ 30 Ń kán be bo ɔ ɲrun blɛblɛblɛ, lele á trɛ́, kpɛkun á fá mɛn’n.+

31 “Ń má yó maan ɔ mɛn’n bó i bo Jenvie Ɔkwlɛ’n su lele fá jú Filisti jenvie’n su lɔ, yɛ ɔ́ fɛ́ i aawlɛ flɛnnɛn’n nun lele fá jú Nzue Ba’n*+ su lɔ. Afin ń má fá be nga be o mɛn sɔ’n nun’n ń wlá ɔ sa nun, yɛ á wá fúan be.+ 32 Nán a nin be annzɛ be ɲanmiɛn liɛ’m be tra aenguɛ.+ 33 Ɔ fataman kɛ be tran ɔ mɛn’n nun naan be yo naan a fɔn min wun. Sɛ a su be ɲanmiɛn liɛ mun’n, i sɔ’n káci kɛ aya sa ɔ bo.”+

24 I sin’n, ɔ seli Moizi kɛ: “Maan ɔ bɔbɔ nin Aarɔn nin Nadabu nin Abiu,+ ɔ nin Izraɛli kpɛnngbɛn ableso (70) be fu Zoova i wun lɔ. Kpɛkun amun ka mmua lɔ naan amun koto. 2 Maan Moizi i kunngba mantan Zoova lɔ. Sanngɛ nán be onga mun be mantan lɔ, yɛ nán nvlefuɛ’m be nin i be fu oka’n su lɔ.”+

3 Ɔ maan Moizi ko kannin Zoova i ndɛ’n i kwlaa kleli nvlefuɛ mun, ɔ boli mmla’m+ be kwlaa be su kleli be. Yɛ nvlefuɛ’m be kwlaa be tɛli su kɛ: “Ndɛ kwlaa nga Zoova kannin’n, é nánti su e klun klo su.”+ 4 Moizi klɛli ndɛ kwlaa nga Zoova kannin’n.+ I sin’n, ɔ jasoli nglɛmun ndɛ kpa, ɔ kplannin tɛ yiwlɛ kun yɛ ɔ siesieli yɔbuɛ blu-nin-nɲɔn (12) oka’n i bo lɛ. Be ti Izraɛli akpasua blu-nin-nɲɔn (12) mun be nzɔliɛ. 5 Kɛ ɔ yoli sɔ’n, ɔ sunmannin Izraɛli gbanflɛn wie mun kɛ be ko yi tɛ nga kɛ bé yí’n be yra nnɛn’n i kɔlikɔli’n, naan be fa nannin tola wie mun be yi bo kun yolɛ tɛ+ be man Zoova. 6 Moizi fali mmoja’n i bue guɛli i kpongbo ba wie’m be nun, yɛ ɔ fɛli i bue kpɛntɛnkpɛntɛnnin i tɛ yiwlɛ’n su. 7 I sin’n, ɔ fali aenguɛ fluwa’n, kpɛkun ɔ mɛnnin i nɛn’n su kanngannin nun kleli nvlefuɛ mun.+ Be tɛli su kɛ: “Ndɛ kwlaa nga Zoova kannin’n, é nánti su e klun klo su yɛ e ɲin yí i.”+ 8 Moizi fali mmoja’n kpɛntɛnkpɛntɛnnin i nvlefuɛ’m be su,+ kpɛkun ɔ seli kɛ: “Mmoja mɔ maan Zoova nin amun trali aenguɛ’n yɛ ɔ o yɛ, yɛ i su mmla mun yɛle nga amun tieli be lɛ’n.”+

9 Moizi nin Aarɔn nin Nadabu nin Abiu ɔ nin Izraɛli kpɛnngbɛn ableso (70) be fuli oka’n su, 10 be wunnin Izraɛli Ɲanmiɛn’n.+ Like wie m’ɔ ti kɛ yɔbuɛ nga be flɛ i kɛ safii’n sa’n ɔ o i ja’n i bo. Ɔ ti sanwun kpa kɛ ɲanmiɛn su lɔ’n sa.+ 11 Ɲanmiɛn w’a yoman Izraɛli kpɛnngbɛn’m+ be sa fi. Be wunnin Ɲanmiɛn Kpli aolia nun, kpɛkun be dili like yɛ be nɔnnin nzan.

12 I sin’n, Zoova seli Moizi kɛ: “Fu min wun wa oka’n su wa naan ka lɛ. Ń má mán wɔ yɔbuɛ paplaapla wie mun. Kpɛkun ń klɛ́ min mmla m’ɔ fata kɛ a fa kle be’n be su.”+ 13 Moizi nin Zozie m’ɔ ti i ukafuɛ’n+ be ɔli, kpɛkun Moizi fuli Ɲanmiɛn Kpli i oka’n su lɔ.+ 14 Sanngɛ ɔ seli Izraɛli kpɛnngbɛn’m be kɛ: “An minndɛ e wa, maan e to amun wa.+ Aarɔn nin Ur+ be nin amun o wa. Sran kwlaa ng’ɔ le i ndɛ’n maan ɔ fa wɔ be ja su.”+ 15 Moizi fuli oka’n su lɔ, kɛ ɔ́ yó sɔ’n nn ɲanmiɛn ble’n w’a kata oka’n su.+

16 Zoova i aɲrunɲan’n+ kali Sinai Oka’n su,+ ɲanmiɛn ble’n katali oka’n su cɛn nsiɛn. I cɛn nso su’n, ɔ o ɲanmiɛn ble’n nun lɔ ɔ flɛli Moizi. 17 Izraɛlifuɛ nga be su nian lɔ’n be ɲrun’n, Zoova i aɲrunɲan’n yoli kɛ sin dan wie yɛ ɔ su jue oka’n i ti su lɔ sa. 18 Ɔ maan Moizi wluli ɲanmiɛn ble’n nun, kpɛkun ɔ fuli oka’n su.+ Ɔ kali oka’n su lɔ cɛn ba ablanan (40), wia nun nin kɔnguɛ.+

25 I sin’n, Zoova seli Moizi kɛ: 2 “Se Izraɛlifuɛ’m be kɛ be blɛ min like. Sran kwlaa nga i klun klo su ɔ man min like’n,+ maan amun sɔ nun. 3 Ninnge ng’ɔ fata kɛ amun sɔ be nun’n yɛ: Sika ɔkwlɛ,+ sika,+ aaba,+ 4 jese ble, jese ɔkwlɛ kankan,* jese ɔkwlɛ bioun, lɛn kplɔkɔɔ, boli ndrɛ, 5 bua ɲin kplo mɔ be kɛnnin i ayre ɔkwlɛ’n, nzue nun nnɛn nga be flɛ i fɔku’n i kplo, akasia waka,+ 6 kannin nuan sɔlɛ ngo,+ bomie ngo mɔ be fa sanngan be ti su gualɛ ngo’n+ nin ansan fanninfannin’n+ nun’n, 7 ɔ nin yɔbuɛ nga be flɛ i oniksi’n, nin yɔbuɛ uflɛ wie mɔ bé fá tátá efɔdu’n+ nin be wue nun pɔsu’n+ be su’n. 8 Maan be yo sua kun be man min, yɛ ń trán be afiɛn.+ 9 Amun yo tannin sua’n nin i klun lɔ ninnge mun, amun niɛn i nzɔliɛ* nga n su fa kle wɔ yɛ’n su sɛsɛsɛ naan amun yo.+

10 “Maan be fa akasia waka be yo alaka kun. Maan i tɛnndɛn nun’n yo kude nɲɔn nin sin,* i tɛtrɛ nun’n yo kude kun nin sin, yɛ i nglonglo su’n yo kude kun nin sin.+ 11 I sin’n, fa sika ɔkwlɛ jrɛiin kɛtɛ i wun.+ Fa kɛtɛ i klun nin i sin, kpɛkun fa sika ɔkwlɛ yo i nuan su tɛɛn naan ɔ sin yia nun.+ 12 Klo sika ɔkwlɛ yo nga nnan, fa be tɛtɛ i i ja nnan’m be ti su nglo, sie nɲɔn i bue kun su, yɛ sie nɲɔn i bue kun’n su lɔ. 13 Sɛsɛ akasia waka floloflolo wie mun naan fa sika ɔkwlɛ kata be wun.+ 14 Fa waka sɔ mun wlɛ i Alaka’n i wun nga’m be nun naan be fa sua Alaka’n. 15 Maan waka’m be ka Alaka’n i wun nga’m be nun, nán maan be yi be.+ 16 Kpɛkun fa yɔbuɛ paplaapla nga min mmla’n wo su* mɔ ń má fá mán wɔ’n fa sie i Alaka’n nun.+

17 “Fa sika ɔkwlɛ jrɛiin yo i su tre, maan i tɛnndɛn nun’n yo kude nɲɔn nin sin, i tɛtrɛ nun’n yo kude kun nin sin.+ 18 Fa sika ɔkwlɛ yo seribɛn nɲɔn. Fa maato bo sika ɔkwlɛ’n naan fa yo seribɛn mun. Yo be Alaka’n i tre’n i tiwa nɲɔn’m be su.+ 19 Yo seribɛn mun i tiwa nɲɔn’m be su, sie kun i tre’n i tiwa kun su, yɛ sie kun i tiwa kun’n su lɔ. 20 Maan seribɛn’m be ndɛwa’m be nun trɛ wɔ nglo, maan be ndɛwa’n kata Alaka’n i tre’n su,+ yɛ maan be ɲrun’n wɔ su. Maan seribɛn’m be ɲin kpɛ i tre’n su. 21 Fa Alaka’n i tre’n+ kata Alaka’n su, yɛ fa yɔbuɛ paplaapla nga min mmla’n wo su mɔ ń má fá mán wɔ’n sie nun. 22 Alaka’n i tre’n i su nglo lɛ yɛ ń yí min wun nglo ń klé wɔ yɛ e nin wɔ é íjɔ-ɔ.+ Mmla’n* i alaka’n i ti su seribɛn nɲɔn’m be afiɛn yɛ ń yí min wun nglo yɛ ń kán ndɛ kwlaa ng’ɔ fata kɛ a kan kle Izraɛlifuɛ mun’n ń klé wɔ-ɔ.

23 “Fa akasia waka yo tabli kun,+ maan i tɛnndɛn nun’n yo kude nɲɔn, i tɛtrɛ nun’n yo kude kun, yɛ i nglonglo su’n yo kude kun nin sin.+ 24 fa sika ɔkwlɛ jrɛiin kɛtɛ i wun, yɛ fa sika ɔkwlɛ yo i nuan su tɛɛn naan ɔ sin yia nun. 25 Yo i nuan su’n i nglonglo naan ɔ sin yiɛ i, maan ɔ ju palmun kun,* kpɛkun fa sika ɔkwlɛ yo i nuan su tɛɛn naan ɔ sin yia nun. 26 Fa sika ɔkwlɛ yo nga nnan, kpɛkun fa be sie i tabli’n i cɔnjɔ nnan’m be su, kɛ nga i ja nnan’m be o lɛ’n. 27 Maan nga’m be mantan tabli’n i nuan su nglonglo’n. Be nun yɛ bé fá waka floloflolo mun bé wlá naan b’a fa sua tabli’n niɔn. 28 Sɛsɛ akasia waka floloflolo wie mun, yɛ fa sika ɔkwlɛ kata be wun naan be fa sua tabli’n.

29 “Yo tabli’n i asiɛti mun, nin i klowa mun, ɔ nin i ondoman mun, ɔ nin kpongbo mun, naan be fa gua nzan tɛ yiwlɛ’n su be man min. Sika ɔkwlɛ jrɛiin yɛ ɔ fata kɛ a fa yo be-ɔ.+ 30 Kpɛkun fa kpanwun nga be fa man min’n sie i tabli’n su min ɲrun tititi.+

31 “Fa sika ɔkwlɛ jrɛiin yo kannin siewlɛ kun.+ Fa maato bo sika ɔkwlɛ’n naan fa yo kannin siewlɛ’n. Maan i bo’n nin i afiɛn’n, nin i sama mun, nin i nɲrɛ mun, nin i nɲrɛ’m be kpɔlɛ mun, ɔ nin i nɲrɛ’m be bo’m be kwlaa be sa su kunngba.+ 32 Yo kannin siewlɛ’n i sama nsiɛn, yo i sama nsan i bue kun su, yɛ yo nsan i bue kun’n su. 33 I sama nga be o i bue kun su’n be kwlaa be su’n, yo i nɲrɛ nsan, yo be kɛ amandie nɲrɛ sa. Maan i nɲrɛ’m be kpɔlɛ mun, nin i nɲrɛ’m be bo’m be toto nun. Yo i kunngba’n i sama akpasua nga be o i bue kun lɔ’n be kwlaa be su wie. I sɔ yɛ ɔ fata kɛ kannin siewlɛ’n i sama nsiɛn’m be yo-ɔ. 34 Kannin siewlɛ’n i afiɛn’n su’n, yo i nɲrɛ nnan kɛ amandie nɲrɛ sa, maan i nɲrɛ’m be kpɔlɛ mun, nin i nɲrɛ’m be bo’m be toto nun. 35 Yo i nɲrɛ’n i kpɔlɛ kun i sama klikli nɲɔn nga be o i afiɛn’n su’n be bo lɛ, kpɛkun yo i nɲrɛ’n i kpɔlɛ kun ekun i sama nɲɔn nga be su klikli liɛ’m be su’n be bo lɛ, yɛ yo i nɲrɛ’n i kpɔlɛ kun ekun i sama nɲɔn nga be su kun’m be su’n be bo lɛ, afin kannin siewlɛ’n i sama nsiɛn’m be tɛtɛ i afiɛn’n su. 36 Maan kannin siewlɛ’n i nɲrɛ’m be kpɔlɛ mun, nin i sama mun, nin kannin siewlɛ’n i wunmuan’n sa su kunngba, yɛ maan be fa maato be bo sika ɔkwlɛ jrɛiin be fa yo.+ 37 Yo i su kannin nso. Kɛ bé wá sɔ́ kannin’m be nuan’n, bé kpája kannin siewlɛ’n i ɲrun lɛ lika’n nun.+ 38 Fa sika ɔkwlɛ jrɛiin yo i pɛnsi mun,* ɔ nin i sin guawlɛ mun.+ 39 Maan be fa sika ɔkwlɛ jrɛiin talan kun* be yo kannin siewlɛ’n nin i wun ninnge mun. 40 Nian nun yo be sɛsɛsɛ kɛ be nzɔliɛ* nga n fa kleli wɔ oka’n su lɔ’n sa.+

26 “Fa tannin tanmue blu fa yo tannin sua’n.+ Fa lɛn kplɔkɔɔ mɔ be cisannin’n, nin jese ble, nin jese ɔkwlɛ kankan ɔ nin jese ɔkwlɛ bioun naan fa yo. Yi seribɛn’m+ be desɛn tannin tanmue’m be nun.+ 2 Maan tannin tanmue kun i tɛnndɛn nun’n yo kude ablaɔn-nin-mɔcuɛ (28),* yɛ i tɛtrɛ nun’n yo kude nnan. Maan tannin tanmue blu’m be kwlaa be sɛ.+ 3 Fa tannin tanmue nnun sasa su naan ɔ yo tannin kun. Yɛ fa tannin tanmue nnun onga mun sasa su naan ɔ yo tannin kun ekun. 4 Fa jese ble fa yo tannin tanmue kasiɛn’n i nuan su kaakaa. Yo tannin nɲɔn su’n i nuan su’n i sɔ wie, naan be kwla fa be nɲɔn’n be sa su. 5 Yo tannin tanmue kun i nuan su kaa ablenun (50). Yɛ yo tannin tanmue kunfuɛ’n i nuan su kaa ablenun (50). I liɛ’n, be nuan su kaakaa’m bé wɔ́ su, kan bé wá sá be su lɛ’n. 6 Fa sika ɔkwlɛ fa yo aglafu ablenun (50) naan fa sa tannin’m be su. I liɛ’n, tannin sua’n yó wunmuan kun.+

7 Fa boli ndrɛ+ yo tannin tanmue wie mun naan fa sie i tannin sua’n su. Yo tannin tanmue blu-nin-kun (11).+ 8 Maan tannin tanmue kun i tɛnndɛn nun’n yo kude ablasan (30), yɛ i tɛtrɛ nun’n yo kude nnan. Maan tannin tanmue blu-nin-kun (11) mun be kwlaa be sɛ. 9 Fa tannin tanmue’n i nun nnun sasa su, yɛ fa tannin tanmue nsiɛn onga mun sasa su. Bu tannin tanmue nsiɛn su’n m’ɔ o tannin sua’n i ɲrun’n gua su. 10 Yo tannin tanmue nga a sasali su’n i kasiɛn’n i nuan su kaa ablenun (50). Yo tannin tanmue kunfuɛ’n i nuan su kaa ablenun (50) ekun, naan be kwla fa be nɲɔn’n be sa su. 11 Fa aaba yo aglafu ablenun (50) naan be fa wlɛwlɛ i kaakaa’m be nun, naan tannin nɲɔn’m be sa su. I liɛ’n, tannin sua’n yó wunmuan kun. 12 Tannin’n i bue ng’ɔ́ trá tannin sua’n su’n, ɔ́ gúɛgúɛ i wun. Tannin’n i bue ng’ɔ ka’n, ɔ́ bú gúa tannin sua’n i sin lɔ. 13 Maan tannin sua’n i bue kwlaa su tannin tanmue ng’ɔ tra su’n ɔ ju kude kun, naan ɔ kɛtɛ i wun.

14 “Asa ekun’n, fa bua ɲin kplo mɔ be kɛnnin i ayre ɔkwlɛ’n fa yo tannin kun naan fa kata tannin sua’n su, yɛ fa nzue nun nnɛn nga be flɛ i fɔku’n i kplo kata su.+

15 “Fa akasia waka yo tannin sua’n i kadri mun,+ yɛ jranjran be nglo.+ 16 Maan kadri kun i nglonglo su’n yo kude blu, yɛ i tɛtrɛ nun’n yo kude kun nin sin. 17 Maan kadri kun ɲan ja nɲɔn, yɛ maan be sa su. I sɔ yɛ ɔ fata kɛ a yo tannin sua’n i kadri’m be kwlaa-ɔ. 18 Maan tannin sua’n i bue nga i ɲin kpɛ ngua lɔ lika’n su’n, i kadri liɛ’n be yo ablaɔn (20).

19 “Klo sika fa yo kadri ablaɔn (20) mun be ja’m be takatakawlɛ+ ablanan (40). Yo kadri kun i ja takatakawlɛ nɲɔn afin i ja’m be ti nɲɔn. Yɛ yo kadri nga be su i su’n be kwlaa be ja takatakawlɛ nɲɔnnɲɔn wie, afin be ja’m be ti nɲɔnnɲɔn.+ 20 Tannin sua’n i bue uflɛ su’n, i bue nga i ɲin kpɛ nglo lɔ lika’n su’n, yo i kadri ablaɔn (20). 21 Fa sika yo be ja takatakawlɛ ablanan (40). Yo kadri kun i ja takawlɛ nɲɔn, yɛ yo kadri nga be su i su’n be kwlaa be ja takatakawlɛ nɲɔnnɲɔn wie. 22 Tannin sua’n i sin m’ɔ kpɛ wia atɔliɛ lɔ’n su’n, yo i kadri nsiɛn.+ 23 Yo kadri nɲɔn naan be yo tannin sua’n i sin lɔ cɔnjɔ nɲɔn’m be kadri. 24 Kɛ ɔ́ fɛ́ i ngua lele m’ɔ́ fá jú i nglo lɔ like kukluku kɛ be sa nga sa’n i klikli’n su’n, maan waka’m be yo nɲɔn. I sɔ yɛ ɔ fata kɛ be yo kadri nɲɔn nga bé fá síe i tannin sua’n i sin lɔ cɔnjɔ nɲɔn’m be su’n niɔn. 25 Maan kadri’m be yo mɔcuɛ yɛ maan be ja takatakawlɛ’m be yo blu-nin-nsiɛn (16). Yo kadri kun i ja takawlɛ nɲɔn, yɛ yo kadri nga be su i su’n be ja takatakawlɛ nɲɔnnɲɔn wie.

26 “Tannin sua’n i bue kun su’n, sɛsɛ akasia waka nnun naan fa be jɛjɛ i kadri’m be su.+ 27 Tannin sua’n i bue uflɛ su’n, yo kadri’m be su jajalɛ waka nnun. I bue nga i ɲin kpɛ wia atɔliɛ lɔ’n m’ɔ ti sua’n i sin’n su’n, yo i kadri’m be su jajalɛ waka nnun wie. 28 Waka ng’ɔ o afiɛn m’ɔ ja kadri’m be afiɛn’n i liɛ’n, maan ɔ fɛ i tiwa kun su lele fa ju i tiwa kun’n su lɔ.

29 “Fa sika ɔkwlɛ kata kadri’m be wun.+ Yɛ fa sika ɔkwlɛ yo nga wie mun naan fa tra waka nga be jaja kadri’m be su’n be ase. Fa sika ɔkwlɛ kata waka nga be jaja kadri’m be su’n be wun wie. 30 Nian tannin sua’n i jajalɛ nga n fa kleli wɔ oka’n su’n i su sɛsɛsɛ yo.+

31 “Fa jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n naan fa yo rido kun.+ Yi seribɛn’m be desɛn rido’n nun. 32 Fa rido’n sende i akasia waka mlomlo nnan mɔ be fali sika ɔkwlɛ katali be wun’n be su. Maan like nga bé fá trɛ́trɛ́ i ase’n yo sika ɔkwlɛ. Maan be fa sika fa yo i ja mlomlo’m be takatakawlɛ nnan. 33 Fa rido’n sende i aglafu’m be su. Fa Mmla’n* i alaka’n+ fa sie i rido’n i sin lɔ. Rido’n kpɛ́ Sua Ba m’ɔ ti Ɲanmiɛn liɛ Klonglo’n,+ nin Sua Ba Ngunmin Kun m’ɔ ti Ɲanmiɛn liɛ Klonglo’n+ be nun. 34 Fa Mmla’n* i alaka’n i tre’n kata su, kpɛkun fa sie i Sua Ba Ngunmin Kun m’ɔ ti Ɲanmiɛn liɛ Klonglo’n nun lɔ.

35 “Fa tabli’n sie i rido’n i ɲrun wa. Yɛ fa kannin siewlɛ’n+ tɛkɛ i tabli’n i ɲrun ndɛnman su, tannin sua’n i bue nga i ɲin kpɛ ngua lɔ lika’n su’n i nun. Taka tabli’n tannin sua’n i bue nga i ɲin kpɛ nglo lɔ lika’n su’n i nun. 36 Fa jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n fa wu rido kun naan fa sie i tannin sua’n i anuan’n nun.+ 37 Sɛsɛ akasia waka mlomlo nnun naan fa sika ɔkwlɛ kata be wun. Be ti rido’n i liɛ. Maan like nga bé fá trɛ́trɛ́ i ase’n yo sika ɔkwlɛ. Kpɛkun klo aaba fa yo be takatakawlɛ nnun.

27 “Fa akasia waka yo tɛ yiwlɛ kun.+ Maan i tɛnndɛn nun’n yo kude nnun,* yɛ i tɛtrɛ nun’n yo kude nnun. Maan tɛ yiwlɛ’n i bue nnan’m be sɛ, yɛ maan i nglonglo su’n yo kude nsan.+ 2 Yo nnɛn wɛ+ i cɔnjɔ nnan’n be su. Maan nnɛn wɛ sɔ’m be nin tɛ yiwlɛ’n be sa su kunngba, yɛ fa aaba kata tɛ yiwlɛ’n i wun.+ 3 Yo nzuɛn* tulɛ so mun, nin peli mun, nin kpongbo mun, nin atiɛ je mun, nin sin guawlɛ mun. Fa aaba yo tɛ yiwlɛ’n i ninnge’m be kwlaa.+ 4 Fa aaba yo tɛ yiwlɛ’n i gliazi kun, yɛ yo nga nnan naan fa be tɛtɛ i tɛ yiwlɛ’n i cɔnjɔ nnan’m be su. 5 Fa sie i tɛ yiwlɛ’n i nuan su nglonglo’n i bo lɛ, tɛ yiwlɛ’n i afiɛn. 6 Sɛsɛ akasia waka floloflolo wie mun. Be ti tɛ yiwlɛ’n i liɛ, yɛ fa aaba kata be wun. 7 Fa waka mun wlɛ i nga’m be nun. I liɛ’n, kɛ bé wá súa tɛ yiwlɛ’n, waka’m bé trɛ́n i bue nɲɔn’n su.+ 8 Fa waka paplaapla yo tɛ yiwlɛ’n, maan kunman trɛn i klun. Ɔ fata kɛ a yo i kɛ nga Ɲanmiɛn fa kleli wɔ oka’n su lɔ’n sa sɛsɛsɛ.+

9 “Maan tannin sua’n ɲan awlo klun.+ Fa lɛn kplɔkɔɔ mɔ be cisannin’n fa yo awlo klun’n i bue nga i ɲin kpɛ ngua lɔ’n i rido mun. Maan i bue sɔ’n i tɛnndɛn nun’n yo kude ya kun (100).+ 10 Yo be ja ablaɔn (20), yɛ fa aaba yo be takatakawlɛ ablaɔn (20). Fa sika fa yo be ja’m be ase tralɛ ninnge mun nin ninnge nga bé fá sɔ́tɔsɔ́tɔ be nun’n.* 11 Maan awlo klun’n i rido nga be ɲin kpɛ nglo lɔ lika’n su’n be tɛnndɛn nun’n yo kude ya kun (100), yo be ja ablaɔn (20) nin be takatakawlɛ ablaɔn (20). Klo sika fa yo be ja’m be ase tralɛ ninnge mun nin ninnge nga bé fá sɔ́tɔsɔ́tɔ be nun’n.* 12 Maan awlo klun’n i tɛtrɛ nun’n i rido nga be ɲin kpɛ wia atɔliɛ lɔ’n be tɛnndɛn nun’n yo kude ablenun (50). Yo be ja blu nin be takatakawlɛ blu. 13 Maan awlo klun’n i bue nga i ɲin kpɛ wia afiliɛ lɔ’n i tɛtrɛ nun’n yo kude ablenun (50). 14 I bue kun su’n, maan rido’m be yo kude blu-nin-nnun (15), yɛ yo be ja nsan nin be takatakawlɛ nsan.+ 15 I bue uflɛ su’n, maan rido’m be yo kude blu-nin-nnun (15), yɛ yo be ja nsan nin be takatakawlɛ nsan.

16 “Maan awlo klun’n i anuan’n nun rido’n i tɛnndɛn nun’n yo kude ablaɔn (20). Fa jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n fa wu rido’n.+ Yo i ja nnan nin be takatakawlɛ nnan.+ 17 Waka ja nga be bo sin yia awlo klun’n, klo sika fa yo be kwlaa be ase tralɛ ninnge mun nin ninnge nga bé fá sɔ́tɔsɔ́tɔ be nun’n. Kpɛkun klo aaba fa yo be takatakawlɛ.+ 18 Maan awlo klun’n i tɛnndɛn nun’n yo kude ya kun (100),+ yɛ i tɛtrɛ nun’n yo kude ablenun (50), yɛ i nglonglo su’n yo kude nnun. Maan be fa lɛn kplɔkɔɔ mɔ be cisannin’n be fa yo. Kpɛkun maan be fa aaba be yo i ja takatakawlɛ mun. 19 Tannin sua’n i nun ninnge’m be kwlaa, nin ninnge nga be fa di junman lɔ’n, nin i nun kpɛngbɛ mun, nin awlo klun’n i wun rido’n i ase tralɛ kpɛngbɛ mun, maan be fa aaba yɛ be fa yo be kwlaa-ɔ.+

20 “Se Izraɛlifuɛ mun naan be fa olivie mma nga be sili’n i ngo jrɛiin be blɛ wɔ, ɔ ti kannin’m be liɛ. I liɛ’n, kannin’m bé júe titi.+ 21 Maan Aarɔn nin i mma mun be yo naan kannin’m be jue Zoova ɲrun nnɔsua lele nglɛmun+ tannin sua mɔ Ɲanmiɛn yi i wun nglo nun’n i nun, rido’n i ɲrun lɛ, kan alaka m’ɔ ti Lalofuɛ’n+ wo lɛ’n. Ɔ ti mmla kun m’ɔ́ ká lɛ tititi-ɔ, yɛ ɔ fata kɛ Izraɛlifuɛ’m be di su tititi.+

28 “Ɔ fata kɛ a fa ɔ niaan bian Aarɔn nin i mma mun Izraɛlifuɛ’m be afiɛn naan be kaci min ɲrun jranfuɛ.+ Fa Aarɔn,+ nin Nadabu nin Abiu,+ ɔ nin Eleazaa nin Itamaa+ mɔ be ti Aarɔn i mma mun’n.+ 2 Yo tralɛ wie mɔ be ti be liɛ ngunmin’n fa man ɔ niaan bian Aarɔn. Maan tralɛ’m be yo klanman kpa, yɛ maan be yo naan ɔ ɲan ɲrun.+ 3 Ɔ fata kɛ a kan ndɛ kle be nga be si like yo kpa’n* mɔ n mannin be ngwlɛlɛ’n,+ naan be yo Aarɔn i tralɛ mun naan ɔ yo sanwun. I liɛ’n, ɔ́ kwlá dí Ɲanmiɛn ɲrun jranlɛ junman’n.

4 Tralɛ ng’ɔ fata kɛ be yo be’n yɛ: Be wue nun pɔsu kun+ nin efɔdu kun,+ nin tralɛ tɛnndɛn kun m’ɔ leman sa’n,+ nin tralɛ tɛnndɛn kun mɔ be yili nun desɛn karokaro’n, nin tannin tanmue nga be fa cici be ti’n kun,+ yɛ cisu kun.+ Bé wá yó tralɛ sɔ mɔ be ti be liɛ ngunmin’n bé mán Aarɔn nin i mma mun naan be di Ɲanmiɛn ɲrun jranlɛ junman’n. 5 Maan be nga be si junman sɔ’n i di kpa’n be fa sika ɔkwlɛ, nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ be yo.

6 “Maan be fa sika ɔkwlɛ nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ mɔ be cisannin’n be fa yo efɔdu’n. Ɔ fata kɛ be yi nun desɛn.+ 7 Maan be yo i bue nɲɔn naan be sin be wati’n su, naan be sa su be tiwa nɲɔn’m be su nglo lɔ. 8 Cisu*+ nga be wu mɔ be fa ci efɔdu’n su naan b’a trɛ i ase’n, maan be fa ninnge kunngba mun be yo: Sika ɔkwlɛ nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ mɔ be cisannin’n.

9 “Fa yɔbuɛ nga be flɛ i oniksi’n+ i sɔ nɲɔn naan klɛ Izraɛli i mma mun be dunman su.+ 10 Klɛ dunman nsiɛn yɔbuɛ kun su, yɛ klɛ dunman nsiɛn onga mun yɔbuɛ kun ng’ɔ ka’n su. Bo i bo kpɛnngbɛn’n su lele fa ju be nun kaanfuɛ’n su. 11 Maan yɔbuɛ sɛfuɛ kun klɛ Izraɛli i mma’m be dunman’n yɔbuɛ nɲɔn’m be su, kɛ nga be fa nzɔliɛ be sie i like kekleke kun su’n sa.+ Yɛ maan be fa sika ɔkwlɛ be fa ci i wun. 12 Ɔ fata kɛ a fa yɔbuɛ nɲɔn mun sie i efɔdu’n i bue nga be sin be wati’n su’n be su, naan be yo Izraɛli i mma’m be wla kpɛnlɛ yɔbuɛ.+ Maan Aarɔn sua be dunman mun i wati nɲɔn’n be su tralɛ’m be su Zoova i ɲrun, naan ɔ yo be wla kpɛnlɛ like. 13 Fa sika ɔkwlɛ yo like nga bé fá cí yɔbuɛ’m be wun’n. 14 Fa sika ɔkwlɛ jrɛiin yo jrɔkɔ nɲɔn. Maan be wɔ jrɔkɔ sɔ mun kɛ ɲanman sa,+ kpɛkun fa be wlɛ i yɔbuɛ’m be wun cilɛ ninnge’m be nun.+

15 “Se sran kun m’ɔ yi ninnge’m be nun desɛn’n naan ɔ yo be wue nun jɔlɛ dilɛ pɔsu’n.+ Maan be fa ninnge kunngba nga be fa yoli efɔdu’n be yo. Maan be fa sika ɔkwlɛ, nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ mɔ be cisannin’n be fa yo.+ 16 Kɛ be bu nun nɲɔn’n, maan i bue nnan’m be sɛ. Maan i tɛnndɛn nun’n yo anpan kun* yɛ i tɛtrɛ nun’n yo anpan kun. 17 Ɔ fata kɛ a fa yɔbuɛ kpakpa wie mun tata nun. Yo i sɔ ɲanman nnan. Fa yɔbuɛ nga be flɛ i ribi’n, nin topazi, nin emerodu fa yo i ɲanman klikli’n. 18 Fa tikuazi, nin safii, nin zaspu fa yo i ɲanman nɲɔn su’n. 19 Fa lesɛmun,* nin agati, nin ametisi fa yo i ɲanman nsan su’n. 20 Fa klizoliti, nin oniksi, nin zadi fa yo i ɲanman nnan su’n. Maan be fa sika ɔkwlɛ be yo be wun cilɛ like. 21 Maan Izraɛli i mma blu-nin-nɲɔn (12) mun be dunman tran yɔbuɛ’m be su. Yo i kɛ nga be fa nzɔliɛ be sie i like kekleke kun su’n sa. Dunman kun ti Izraɛli akpasua blu-nin-nɲɔn (12) mun be nun kun i nzɔliɛ, dunman kun ti Izraɛli akpasua blu-nin-nɲɔn (12) mun be nun kun i nzɔliɛ.

22 “Fa sika ɔkwlɛ jrɛiin yo jrɔkɔ. Ɔ ti be wue nun pɔsu’n i liɛ. Maan be wɔ jrɔkɔ sɔ mun kɛ ɲanman sa.+ 23 Fa sika ɔkwlɛ yo nga nɲɔn. Be ti be wue nun pɔsu’n i liɛ. Fa nga nɲɔn sɔ mun sie i be wue nun pɔsu’n i tiwa nɲɔn’m be su. 24 Fa sika ɔkwlɛ ɲanman nɲɔn mun wlɛ i nga nɲɔn mɔ be o be wue nun pɔsu’n i tiwa’m be su’n be nun. 25 Fa ɲanman nɲɔn’m be ti nɲɔn mun wlɛ i yɔbuɛ’m be wun cilɛ ninnge nɲɔn’m be nun. Kpɛkun fa be cici efɔdu’n i bue ng’ɔ sin be wati’n su’n i ɲrun wa. 26 Fa sika ɔkwlɛ yo nga nɲɔn, yɛ fa be sie i be wue nun pɔsu’n i bue ng’ɔ o i bo m’ɔ kpɛ efɔdu’n su lɔ’n i tiwa nɲɔn’m be su.+ 27 Ɔ fata kɛ a fa sika ɔkwlɛ yo nga nɲɔn ekun. Fa be sie efɔdu’n i ɲrun, i bue nɲɔn nga be sin be wati’n su’n be ja ngua, efɔdu’n i su cisu* nga be wuli’n i ti su nglo lɛ.+ 28 Maan be fa ɲanman ble kun be tra be wue nun pɔsu’n i ase. Maan be fa ɲanman’n be wla be wue nun pɔsu’n i nga mun nin efɔdu’n i nga liɛ’m be nun. I liɛ’n, be wue nun pɔsu’n ɔ́ kɛ́ i osu’n nun efɔdu’n su, cisu* nga be wuli’n i ti su nglo.

29 “Kɛ Aarɔn wlú Ɲanmiɛn i tannin sua’n nun’n, ɔ́ súa Izraɛli i mma’m be dunman mun i wue nun jɔlɛ dilɛ pɔsu’n su, i awlɛn’n su. I liɛ’n, Zoova i wla kpɛ́n be su titi. 30 Fa Urimun nin Tumimun’n*+ wlɛ i be wue nun jɔlɛ dilɛ pɔsu’n nun. Kɛ Aarɔn bá Zoova i ɲrun’n, ɔ fata kɛ be trɛn i awlɛn’n su. Maan Aarɔn fa like nga be fa di Izraɛlifuɛ’m be jɔlɛ’n sie i i awlɛn’n su Zoova ɲrun tititi.

31 “Fa jese ble ngunmin yo tralɛ tɛnndɛn m’ɔ leman sa’n mɔ be fa wlɛ i efɔdu’n i bo’n.+ 32 Maan be ti wlawlɛ’n trɛn i afiɛn sɛsɛ. Maan tannin wufuɛ kun bu be ti wlawlɛ sɔ’n i nuan tɛɛn sin yia nun. Maan ɔ yo i kɔmin nun’n kɛ sonja’m be tralɛ’n i kɔmin nun’n sa, kɛ ɔ ko yo naan w’a timan’n ti. 33 Fa jese ble, nin jese ɔkwlɛ kankan, nin jese ɔkwlɛ bioun naan yo grenadie mma wie mun tralɛ’n i nuan su tɛɛn sin yia nun. Fa sika ɔkwlɛ yo gleinglein mun naan fa be wlawla grenadie mma’m be afiɛn. 34 Maan sika ɔkwlɛ gleinglein mun nin grenadie mma’m be toto nun. Kɛ a sie sika ɔkwlɛ gleinglein kun’n, sie grenadie mma kun. Yo i sɔ tralɛ tɛnndɛn m’ɔ leman sa’n i nuan su naan ɔ sin yia nun. 35 Ɔ fata kɛ Aarɔn wla tralɛ sɔ’n naan w’a kwla di Ɲanmiɛn junman’n. Kɛ ɔ́ wlú Ɲanmiɛn i sua’n nun m’ɔ́ jrán Zoova ɲrun’n, yɛ kɛ ɔ́ fíte’n maan be ti gleinglein’m be tɛlɛ’n, kɛ ɔ ko yo naan w’a wuman’n ti.+

36 “Fa sika ɔkwlɛ jrɛiin yo like paplapa kun m’ɔ bo mianmian’n, kpɛkun klɛ su kɛ nga be fa nzɔliɛ be sie i like kekleke kun su’n sa. Klɛ su kɛ: ‘Sanwun yolɛ’n ti Zoova liɛ.’+ 37 Fa ɲanman ble kun fa trɛ i ase tannin tanmue nga be fa cici be ti’n su.+ Maan ɔ ka tannin tanmue’n i ɲrun lika’n su. 38 Maan ɔ tran Aarɔn i ngban’n su. I liɛ’n, sɛ sran kun fɔn ninnge nga Izraɛlifuɛ’m be fa man Ɲanmiɛn mɔ be ti i liɛ klonglo’n be wun’n,+ sa tɛ sɔ’n ɔ́ yó Aarɔn i ti su trɔ. Maan ɔ kɛ i ngban’n su titi, kɛ ɔ ko yo naan Zoova i klun w’a jɔ be wun’n ti.

39 “Fa lɛn kplɔkɔɔ yo tralɛ tɛnndɛn’n mɔ be yi nun desɛn karokaro’n, nin tannin tanmue kun, yɛ fa wie wu cisu kun.+

40 “Yo tralɛ tɛnndɛn nin cisu nin kle mun man Aarɔn i mma mun.+ Maan be yo klanman kpa, yɛ maan be yo naan be ɲan ɲrun.+ 41 Fa be wla ɔ niaan bian Aarɔn nin i mma mun be wun, kpɛkun gua be ti su ngo.+ Sie be Ɲanmiɛn ɲrun jranfuɛ,+ yɛ yo be sanwun naan be di Ɲanmiɛn ɲrun jranlɛ junman’n be man min. 42 Yo lɛn cɛkoto man be naan be fa kata be nvialiɛ nun lika’m be su.+ Maan ɔ fɛ i be bo lenge nun lele fa ju be sɔwa’n su. 43 Kɛ Aarɔn nin i mma’m bé wlú tannin sua mɔ Ɲanmiɛn yi i wun nglo nun’n, i nun’n, annzɛ kɛ bé mántan tɛ yiwlɛ’n naan b’a di be junman’n Ɲanmiɛn i lika’n nun lɔ’n, ɔ fata kɛ be wla tralɛ sɔ mun, kɛ ɔ ko yo naan b’a yoman sa tɛ naan b’a wuman’n ti. Ɔ ti mmla kun m’ɔ ti Aarɔn nin i osu’n nunfuɛ’m be liɛ m’ɔ́ ká lɛ tititi-ɔ.

29 “Like ng’ɔ fata kɛ a fa yo be sanwun naan b’a kwla di Ɲanmiɛn ɲrun jranlɛ junman’n b’a man min’n yɛ: Fa nannin gbanflɛn kun nin bua ɲin nɲɔn mɔ like fi nunman be wun’n,+ 2 nin kpanwun mɔ levii nunman nun’n, ɔ nin kpanwun kukluuklu* mɔ levii nunman nun mɔ be sɛnngɛnnin i nin ngo’n, nin gato mɔ levii nunman nun mɔ be guaguali su ngo’n.+ Fa ble sanmlɛn mlɛnnɛnnɛn kpa fa yo be. 3 Kpɛkun fa be guɛ i gbogbo kun nun naan fa gbogbo’n nin i nun ninnge mun,+ ɔ nin nannin tola’n nin bua ɲin nɲɔn mun, naan fa be sie min ɲrun.

4 “Fa Aarɔn nin i mma mun kɔ tannin sua mɔ Ɲanmiɛn yi i wun nglo nun’n i anuan’n nun lɔ,+ naan fa nzue wunnzin be.+ 5 I sin’n, fa tralɛ mun+ wla Aarɔn. Fa tralɛ tɛnndɛn’n, nin tralɛ tɛnndɛn m’ɔ leman sa’n mɔ be fa wlɛ i efɔdu’n i bo’n, ɔ nin efɔdu’n, nin be wue nun pɔsu’n wlɛ i wun. Kpɛkun fa efɔdu’n i su cisu* mɔ be wuli’n ci i afiɛn.+ 6 Fa tannin tanmue’n cici i ti, kpɛkun fa nzɔliɛ ng’ɔ kle kɛ ɔ ti Ɲanmiɛn liɛ klonglo’n* sie i tannin tanmue’n su.+ 7 Fa be ti su gualɛ ngo’n+ guɛ i ti’n su naan ɔ yo min liɛ klonglo.+

8 “I sin’n, fɛ i mma mun bla wa naan fa tralɛ tɛnndɛn mun wla be wun.+ 9 Fa cisu mun ci be afiɛn, fa Aarɔn i cisu liɛ’n ci i afiɛn wie, yɛ fa be kle mun wla be ti. Kpɛkun Ɲanmiɛn ɲrun jranlɛ junman’n ɔ́ yó be liɛ tititi.+ Wafa ng’ɔ fata kɛ a sie Aarɔn nin i mma mun Ɲanmiɛn ɲrun jranfuɛ’n yɛ ɔ o lɛ-ɔ.+

10 “I sin’n, fa nannin tola’n kɔ tannin sua mɔ Ɲanmiɛn yi i wun nglo nun’n i ɲrun lɔ naan Aarɔn nin i mma’m be fa be sa be fua nannin tola’n i ti’n su.+ 11 Kpɛ nannin tola’n i kɔmin Zoova ɲrun, tannin sua mɔ Ɲanmiɛn yi i wun nglo nun’n i anuan’n nun lɛ.+ 12 Fa ɔ sa mma bo nannin tola’n i mmoja’n nun, kpɛkun fa klikli nnɛn wɛ nga be o tɛ yiwlɛ’n su’n be wun.+ Fa mmoja’n i onga’n i wunmuan’n guɛ i tɛ yiwlɛ’n i bo lɛ.+ 13 Fɛ i lui+ ng’ɔ kɛtɛ i aya’m be su’n i kwlaa nin i buɛ’n i wun lui’n, ɔ nin i aklɛnzia nɲɔn’n nin be wun lui’n, kpɛkun yra be naan be wunsrɛn’n fite tɛ yiwlɛ’n su.+ 14 Sanngɛ nannin tola’n i nnɛn’n nin i kplo’n nin i aya’n i nun ninnge’m be liɛ’n, yra be nanmue’n i sin lɔ. Ɔ ti sa tɛ’n i ti tɛ yilɛ.

15 “I sin’n, fa bua ɲin’m be nun kun, kpɛkun maan Aarɔn nin i mma’m be fa be sa fua bua ɲin’n i ti’n su.+ 16 Kpɛ bua ɲin’n i kɔmin naan fɛ i mmoja’n kpɛntɛnkpɛntɛn tɛ yiwlɛ’n i bue kwlaa su.+ 17 Kpɛkpɛ bua ɲin’n i likalika mun, wunnzin i aya mun+ nin i ja mun, kpɛkun fɛ i likalika sɔ mun sasa su naan fɛ i ti’n sie su. 18 Yra bua ɲin’n i wunmuan’n naan i wunsrɛn’n fite tɛ yiwlɛ’n su. Ɔ ti tɛ kun mɔ kɛ bé yí’n be yra nnɛn’n i kɔlikɔli be man Zoova-ɔ, ɔ bɔn fannin.*+ Ɔ ti tɛ kun mɔ be yrɛ i sin su be man Zoova-ɔ.

19 “I sin’n, fa bua ɲin kun ng’ɔ kali lɛ’n naan Aarɔn nin i mma’m be fa be sa be fuɛ i ti’n su.+ 20 Kpɛ bua ɲin’n i kɔmin, fɛ i mmoja’n wie klikli Aarɔn i su fama’n i pɛkɛpɛkɛ’n su nin i mma’m be su fama’n i pɛkɛpɛkɛ’n su. Fa wie klikli be sa mma kokotre fama’n su, ɔ nin be ja mma kokotre fama’n su. Fa mmoja’n kpɛntɛnkpɛntɛn tɛ yiwlɛ’n i bue kwlaa su. 21 Fa mmoja ng’ɔ o tɛ yiwlɛ’n su’n i wie, ɔ nin be ti su gualɛ ngo’n+ i wie naan fa kpɛntɛnkpɛntɛn Aarɔn i wun, yɛ fa wie kpɛntɛnkpɛntɛn i tralɛ’m be su. Fa wie kpɛntɛnkpɛntɛn i mma’m be wun, yɛ fa wie kpɛntɛnkpɛntɛn be tralɛ’m be su. I liɛ’n, i bɔbɔ nin i tralɛ mun nin i mma mun nin be tralɛ mun bé yó Ɲanmiɛn liɛ klonglo.+

22 “I sin’n, fa bua ɲin’n i lui’n. Fɛ i lua’n, nin i aya’m be wun lui’n nin i buɛ’n i wun lui’n, ɔ nin i aklɛnzia nɲɔn’n nin be wun lui’n,+ nin i sɔwa fama’n, afin ɔ ti junman nun wlulɛ bua ɲin.+ 23 Fa kpanwun kukluku kun, ɔ nin kpanwun kukluuklu* mɔ be sɛnngɛnnin i nin ngo’n kun, ɔ nin gato kun gbogbo nga be fa kpanwun mɔ levii nunman nun’n be gua nun’n, m’ɔ jin Zoova ɲrun lɔ’n, i nun. 24 Fa be wla Aarɔn nin i mma’m be sa nun, kpɛkun toto be kɔ ɔ ɲrun nin ɔ sin, kɛ like mɔ be toto i be man Zoova’n sa. 25 I sin’n, fa ninnge sɔ’m be sa nun naan yra be tɛ yiwlɛ’n su, fa be sie i tɛ nga kɛ bé yí’n be yra nnɛn’n i kɔlikɔli’n i nnɛn’n su naan ɔ bɔn Zoova i bue nun fannin.* Ɔ ti tɛ kun mɔ be yrɛ i sin su be man Zoova-ɔ.

26 “I sin’n, fa bua ɲin nga be fa wlali Aarɔn i junman nun’n+ i wue’n, naan toto i kɔ ɔ ɲrun nin ɔ sin, kɛ like mɔ be toto i be man Zoova’n sa. I lika sɔ’n yɛ ɔ ti ɔ liɛ-ɔ. 27 Nnɛn’n i wue nga a totoli’n nin i sɔwa m’ɔ ti i liɛ ngunmin’n, mɔ a fɛli i Aarɔn nin i mma’m be junman nun wlalɛ bua ɲin’n su’n,+ yo be sanwun. 28 Maan i lika sɔ’n yo Aarɔn nin i mma’m be liɛ. Ɔ ti mmla kun m’ɔ fata kɛ Izraɛlifuɛ’m be di su tititi-ɔ. Afin nnɛn’n i lika sɔ’n ti i liɛ ngunmin. Ɔ fata kɛ Izraɛlifuɛ’m be fɛ i lika sɔ m’ɔ ti i liɛ ngunmin’n be man.+ Kɛ be ko yi bo kun yolɛ tɛ’n, i lika nga be fa man Zoova’n yɛ ɔ o lɛ-ɔ.+

29 “Kɛ bé wá gúa Aarɔn i mma’m be ti su ngo mɔ bé síe be Ɲanmiɛn ɲrun jranfuɛ’n naan be kaci Aarɔn’n, Aarɔn i tralɛ mɔ be ti be liɛ ngunmin’n+ bé káci i mma’m be liɛ.+ 30 I mma’m be nun Ɲanmiɛn ɲrun jranfuɛ ng’ɔ́ káci i’n, kɛ ɔ́ wlú tannin sua mɔ Ɲanmiɛn yi i wun nglo nun’n i nun, m’ɔ́ kó dí junman lika m’ɔ ti Ɲanmiɛn liɛ klonglo’n nun’n, ɔ́ wlá tralɛ sɔ mun cɛn nso.+

31 “Fa junman nun wlalɛ bua ɲin’n naan tɔn i nnɛn’n lika kun m’ɔ ti Ɲanmiɛn liɛ klonglo’n nun.+ 32 Maan Aarɔn nin i mma’m be di+ bua ɲin’n i nnɛn’n nin kpanwun ng’ɔ o gbogbo’n nun’n, tannin sua mɔ Ɲanmiɛn yi i wun nglo nun’n i anuan’n nun lɛ. 33 Ninnge nga be fa yili tɛ mɔ be ti’n, be katali be sa tɛ’m be su naan b’a kwla sie be Ɲanmiɛn ɲrun jranfuɛ’n, naan b’a yo be sanwun’n, maan be di be. Sanngɛ nán maan sran ng’ɔ leman atin diman’n* ɔ di wie. Afin ninnge sɔ’m be ti Ɲanmiɛn liɛ klonglo.+ 34 Sɛ junman nun wlalɛ tɛ nnɛn’n nin kpanwun’n i wie ka lɛ naan aliɛ cɛn su’n, yra be sin nun.+ Nán maan be di, afin be ti Ɲanmiɛn liɛ klonglo.

35 “Like nga n fa kleli wɔ’n, niɛn i kwlaa su fa yo Aarɔn nin i mma mun. Fa cɛn nso fa sie be Ɲanmiɛn ɲrun jranfuɛ.+ 36 Cɛn kwlakwla’n, fa nannin tola kun fa yi sa tɛ’n i ti tɛ naan ɔ kata sa tɛ’n su. Ɔ fata kɛ a yi tɛ fa kata sa tɛ’n su naan tɛ yiwlɛ’n yo sanwun. Kpɛkun fa ngo gua su naan ɔ yo Ɲanmiɛn liɛ klonglo.+ 37 Fa cɛn nso fa yi tɛ fa kata sa tɛ’n su naan tɛ yiwlɛ’n yo sanwun. Ɔ fata kɛ a yo i sanwun naan ɔ yo tɛ yiwlɛ ngunmin kun m’ɔ ti Ɲanmiɛn liɛ klonglo’n.+ Sran kwlaa ng’ɔ́ kán tɛ yiwlɛ’n, ɔ fata kɛ ɔ yo sanwun.

38 “Like nga á fá yí tɛ tɛ yiwlɛ’n su’n yɛ: Cɛn kwlakwla’n, fa bua gbanflɛn nɲɔn mɔ b’a di afuɛ kun’n, yo i sɔ titi.+ 39 Fa bua gbanflɛn’n kun yi tɛ nglɛmun, kpɛkun kɛ sɛnzɛ’n ko tɔ’n* fa bua gbanflɛn kun’n yi tɛ nnɔsua.+ 40 Fa sanmlɛn mlɛnnɛnnɛn kpa efa kun,* bu nun blu naan fɛ i bue kun, kpɛkun fa olivie mma nga be sili’n i ngo inin kun,* bu nun nnan naan fɛ i bue kun, yɛ fa duvɛn inin kun, bu nun nnan naan fɛ i bue kun. Fa ninnge sɔ mun sie i bua gbanflɛn’n i klikli’n su. 41 Kɛ sɛnzɛ’n ko tɔ’n,* fa bua gbanflɛn’n i nɲɔn su’n yi tɛ. Fa sanmlɛn nin ngo nin nzan mɔ be fa yi tɛ’n sie su kɛ nga a fa yoli i nglɛmun nun’n sa. Yo maan ɔ bɔn fannin,* ɔ ti tɛ kun mɔ be yrɛ i sin su be man Zoova-ɔ. 42 Maan amun yi tɛ sɔ mɔ kɛ bé yí’n be yra nnɛn’n i kɔlikɔli’n tititi tannin sua mɔ Ɲanmiɛn yi i wun nglo nun’n i anuan’n nun lɛ, Zoova ɲrun, kan ń má yí min wun nglo ń klé amun lɛ mɔ e nin wɔ é íjɔ’n.+

43 “Ń yí min wun nglo ń klé Izraɛlifuɛ mun lɛ, yɛ min aɲrunɲan’n yó lika sɔ’n i sanwun.+ 44 Ń má yó tannin sua mɔ Ɲanmiɛn yi i wun nglo nun’n, nin tɛ yiwlɛ’n be sanwun. Yɛ ń má yó Aarɔn nin i mma’m be sanwun+ naan be kwla di Ɲanmiɛn ɲrun jranlɛ junman’n be man min. 45 Ń trán Izraɛlifuɛ’m be afiɛn, yɛ ń yó be Ɲanmiɛn.+ 46 Ɔ maan bé wá sí jrɛiin kɛ min Zoova, n ti be Ɲanmiɛn, min yɛ n fali be Ezipti mɛn’n nun fiteli-ɔ, kɛ ɔ ko yo naan m’an kwla tran be afiɛn’n ti.+ N ti Zoova, min yɛ n ti be Ɲanmiɛn’n niɔn.

30 “Yo tɛ yiwlɛ kun naan be yra ansan su.+ Fa akasia waka yo.+ 2 Maan i bue nnan’n be sɛ. Maan i tɛnndɛn nun’n yo kude kun,* i tɛtrɛ nun’n yo kude kun, yɛ i nglonglo su’n yo kude nɲɔn. Maan ɔ nin i su nnɛn wɛ’m be sa su kunngba.+ 3 Fa sika ɔkwlɛ jrɛiin kɛtɛ i wun: Fa wie kɛtɛ i ti su nglo, fa wie kɛtɛ i wun naan ɔ sin yia nun, fa wie kata nnɛn wɛ’m be wun. Kpɛkun fa sika ɔkwlɛ yo i nuan su’n naan ɔ sin yia nun. 4 Fa sika ɔkwlɛ yo nga nɲɔn naan fa be tɛtɛ i i nuan su’n i bo lɛ, yo be i bue nɲɔn’m be su, yɛ maan be fa waka floloflolo mun be wla be nun naan be fa sua. 5 Sɛsɛ akasia waka floloflolo wie mun, kpɛkun fa sika ɔkwlɛ kata be wun. 6 Fa sie i rido ng’ɔ o Mmla’n* i alaka’n+ i wun lɛ’n i ɲrun. Sie i alaka m’ɔ ti Lalofuɛ’n i tre m’ɔ o su’n i ɲrun lɛ, kan n yi min wun nglo n kle wɔ lɛ’n.+

7 “Maan Aarɔn+ yra ansan m’ɔ bɔn fanninfannin’n+ i su.+ Kɛ ɔ́ nían kannin’m be lika+ nglɛmun kwlaa’n, maan ɔ yo naan ansan’n i wunsrɛn’n fin tɛ yiwlɛ’n su fite. 8 Kɛ sɛnzɛ’n ko tɔ’n,* kɛ Aarɔn sɔ́ kannin’m be nuan’n, maan ɔ yra ansan’n. Ɔ ti ansan kun mɔ bé yrɛ́ i Zoova i ɲrun tititi-ɔ. 9 Ansan nga amun leman atin yrɛmɛn i su’n, nán amun yrɛ i su,+ nán amun yi tɛ nga kɛ bé yí’n be yra nnɛn’n i kɔlikɔli’n su, nán amun fa ble annzɛ i wunsu like be sie su man min, yɛ nán amun fa nzan gua su fa man min. 10 Afuɛ nuan kwlaa’n, maan Aarɔn fa nnɛn nga be fa yi sa tɛ’n i ti tɛ’n i mmoja’n wie guɛ i nnɛn wɛ’m be su, naan ɔ fa yo tɛ yiwlɛ’n i sanwun. Maan ɔ yo i sɔ kpɛ kunngba afuɛ kwlaa nun+ naan ɔ fa yo i sanwun,+ maan be yo i sɔ tititi. Tɛ yiwlɛ sɔ’n ti i liɛ ngunmin, ɔ ti Zoova liɛ klonglo.”

11 I sin’n, Zoova seli Moizi kɛ: 12 “Kɛ á klɛ́ Izraɛlifuɛ’m be dunman mɔ á ká be’n,+ maan be tinuntinun be man Zoova i like naan be fa kpɔ be ti. Kɛ á klɛ́ be dunman’n, maan be man like naan ɲrɛnnɛn fi w’a tɔman be su. 13 Like nga be kwlaa nga bé klɛ́ be dunman’n bé mán’n yɛ: Maan sran kun yi sika sikli sin kun.* Maan be nian Ɲanmiɛn i sua’n nun lɔ sikli liɛ’n* su be sunnzun.+ Gera ablaɔn* ti sikli kun. Sika sikli sin kun yɛ ɔ fata kɛ be fa man Zoova-ɔ.+ 14 Sran kwlaa nga kɛ bé klɛ́ i dunman’n ɔ le afuɛ ablaɔn (20) annzɛ afuɛ ablaɔn (20) tra su’n, maan ɔ man Zoova i like.+ 15 Ɔ fataman kɛ aɲanbeunfuɛ’n i liɛ’n tra ng’ɔ fata kɛ ɔ man’n, yɛ ɔ fataman kɛ yalɛfuɛ’n i liɛ’n yo kaan tra sikli sin kun* m’ɔ fata kɛ ɔ yi man Zoova’n, kɛ ɔ ko yo naan b’a yaci amun sa tɛ mun b’a cɛ amun naan amun a ka nguan nun’n ti. 16 Maan Izraɛlifuɛ’m be fa be ti kpatalɛ sika’n be man wɔ naan fa di tannin sua mɔ Ɲanmiɛn yi i wun nglo nun’n i nun junman’n. I sɔ’n yó Izraɛlifuɛ’m be wla kpɛnlɛ like Zoova i ɲrun, yɛ ɔ́ kpɔ́ amun ti.

17 Zoova kannin ndɛ kleli Moizi ekun. Ɔ seli i kɛ: 18 “Fa aaba yo kpongbo dan kun ɔ nin i takawlɛ.+ Ɔ ti wunnzinlɛ liɛ. I sin’n, tɛkɛ i tannin sua mɔ Ɲanmiɛn yi i wun nglo nun’n nin tɛ yiwlɛ’n be afiɛn’n nun lɛ, yɛ gua nun nzue.+ 19 Maan Aarɔn nin i mma’m be wunnzin be sa nin be ja’m be wun lɛ.+ 20 Kɛ bé kɔ́ tannin sua mɔ Ɲanmiɛn yi i wun nglo nun’n i nun lɔ’n, annzɛ kɛ bé wúnnge tɛ yiwlɛ’n i wun lɔ mɔ bé kó dí junman’n, yɛ kɛ bé yí tɛ nga be yrɛ i nnɛn’n bé mán Zoova naan wunsrɛn fite’n, maan be fa nzue be wunnzin naan b’a wuman. 21 Maan be wunnzin be sa nin be ja’m be wun naan b’a wuman. Maan be di mmla sɔ’n su tititi, ɔ ti be nin be osu’n nunfuɛ’m be liɛ, maan be yo sɔ blɛ kwlaa nun.”+

22 Zoova seli Moizi ekun kɛ: 23 “I sin’n, fa palifɛn nga be ti kpakpa’n: Fa miri nga w’a kete’n sikli ya nnun (500), kpɛkun fa sinamɔmun m’ɔ bɔn fannin’n sikli ya nɲɔn ablenun (250), ɔ nin kalamisi m’ɔ bɔn fannin kpa’n sikli ya nɲɔn ablenun (250). 24 Fa kasi sikli ya nnun (500). Maan be nian Ɲanmiɛn i sua’n nun lɔ sikli liɛ’n* su be sunnzun.+ Yɛ fa olivie ngo inin kun.* 25 I sin’n, fa be yo be ti su gualɛ ngo kun m’ɔ ti Ɲanmiɛn liɛ klonglo’n. Maan be sanngan be nun kpa.*+ Ɔ ti be ti su gualɛ ngo kun m’ɔ ti Ɲanmiɛn liɛ klonglo-ɔ.

26 Fa ngo’n guɛ i tannin sua mɔ Ɲanmiɛn yi i wun nglo nun’n,+ ɔ nin Mmla’n* i alaka’n be su. 27 Fa guɛ i tabli’n nin i wun ninnge mun, nin kannin siewlɛ’n nin i wun ninnge mun, nin tɛ yiwlɛ nga be yra ansan su’n be su wie. 28 Fa guɛ i tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n nin i wun ninnge mun, nin kpongbo dan’n nin i takawlɛ’n be su. 29 Yo be sanwun maan be yo be liɛ ngunmin, naan be yo Ɲanmiɛn liɛ klonglo.+ Sran kwlaa ng’ɔ́ kán be’n, ɔ fata kɛ ɔ yo sanwun.+ 30 Gua Aarɔn+ nin i mma’m+ be ti su ngo, yo be sanwun naan be di Ɲanmiɛn ɲrun jranlɛ junman’n be man min.+

31 “Se Izraɛlifuɛ’m be kɛ: ‘Maan be ti su gualɛ ngo nga ɔ yo min liɛ klonglo tititi.+ 32 Nán be fa gua klɔ sran wunnɛn su, yɛ nán amun nian ninnge nga be fa yoli’n su be yo i wunsu. Ɔ ti like kun m’ɔ ti Ɲanmiɛn liɛ klonglo-ɔ. Maan ɔ ka Ɲanmiɛn liɛ klonglo tititi. 33 Sran ng’ɔ yo be ti su gualɛ ngo kɛ ngalɛ’n sa’n, m’ɔ fa guɛ i sran kun m’ɔ nin i fataman’n* i ti su’n, maan be yi i* i nvlefuɛ’m be afiɛn.”+

34 I sin’n, Zoova seli Moizi kɛ: “Fa palifɛn nga be o yɛ mun, maan be kwlaa be sɛ sɛsɛsɛ:+ Storaki, oninka, galbanɔmun, ɔ nin ansan ufue jrɛiin. 35 Fa be yo ansan kun.+ Maan be sanngan be nun kpa,* gua nun njin,+ maan ɔ yo sanwun, yɛ ɔ yo Ɲanmiɛn liɛ klonglo. 36 Tin wie naan ɔ yo sanmlɛn mlɛnnɛnnɛn kpa, kpɛkun fa wie guɛ i alaka m’ɔ ti Lalofuɛ’n m’ɔ o tannin sua mɔ Ɲanmiɛn yi i wun nglo nun’n i ɲrun lɛ, kan ń yí min wun nglo ń klé wɔ lɛ’n. Maan ɔ yo amun ɲrun like m’ɔ ti Ɲanmiɛn liɛ klonglo-ɔ. 37 Nán amun fa ninnge nga a fa yoli ansan ng’ɔ o yɛ’n be yo amun bɔbɔ amun ansan liɛ.+ Amun bu i like kun m’ɔ ti Zoova liɛ klonglo-ɔ. 38 Sran ng’ɔ nian su yo i wunsu naan ɔ bɔn i bue nun fanninfannin’n, maan be yi i* i nvlefuɛ’m be afiɛn.”

31 Zoova seli Moizi ekun kɛ: 2 “Nian, n fali Bezalɛli+ m’ɔ ti Uri i wa’n. Uri sɔ’n, ɔ ti Ur m’ɔ fin Zida akpasua’n su’n i wa.+ 3 Ń má fá Ɲanmiɛn i wawɛ’n ń mɛ́n i, ɔ maan ɔ́ yó ngwlɛlɛfuɛ, ɔ́ yó akunndanfuɛ, yɛ ɔ́ sí ajuin dilɛ junman’n i wafawafa kwlaa di, 4 ɔ́ sí ninnge’m be yí, ɔ́ sí sika ɔkwlɛ nin sika nin aaba be nun junman dí, 5 ɔ́ sí yɔbuɛ sɛ́, yɛ ɔ́ sí yɔbuɛ wun cilɛ ninnge’m be yó,+ ɔ́ sí waka nun junman kwlaa dí.+ 6 Sanngɛ ń má fá Ooliabu+ m’ɔ ti Aisamaki m’ɔ fin Dan akpasua’n su’n i wa’n, naan ɔ ukɛ i. Ń má fá ngwlɛlɛ ń wlá be kwlaa nga be si like yo’n be awlɛn’n nun. I liɛ’n, bé kwlá yó ninnge kwlaa nga n seli wɔ kɛ a yo’n:+ 7 Tannin sua mɔ Ɲanmiɛn yi i wun nglo nun’n,+ Mmla’n* i alaka’n+ nin i tre+ ng’ɔ o su’n, ɔ nin tannin sua’n i nun ninnge’m be kwlaa, 8 tabli’n+ nin i wun ninnge mun, kannin siewlɛ mɔ be fali sika ɔkwlɛ jrɛiin be yoli’n nin i wun ninnge’m be kwlaa,+ ɔ nin tɛ yiwlɛ nga be yra ansan su’n,+ 9 tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ nin i wun ninnge’m be kwlaa, ɔ nin kpongbo dan’n nin i takawlɛ’n,+ 10 tralɛ wie mɔ be wu be klanman kpa’n, Ɲanmiɛn ɲrun jranfuɛ Aarɔn i tralɛ mɔ be ti Ɲanmiɛn liɛ klonglo’n nin i mma’m be tralɛ mɔ be fa di Ɲanmiɛn ɲrun jranlɛ junman’n,+ 11 be ti su gualɛ ngo’n, ɔ nin Ɲanmiɛn sua’n nun lɔ ansan fanninfannin’n.+ Maan be yo ninnge kwlaa nga n seli wɔ kɛ a yo’n.”

12 Zoova seli Moizi ekun kɛ: 13 “Kan ndɛ kle Izraɛlifuɛ mun, se be kɛ: ‘Maan amun nian nun di min wunmiɛn-lolɛ-cɛn’m be su.+ Afin ɔ ti e nin amun e afiɛn nzɔliɛ kun m’ɔ o lɛ tititi-ɔ, kɛ ɔ ko yo naan amun a si kɛ min Zoova’n, min yɛ n yo amun sanwun’n ti. 14 Ɔ fata kɛ amun di Wunmiɛn-lolɛ-cɛn’n su, afin ɔ ti amun ɲrun like m’ɔ ti Ɲanmiɛn liɛ klonglo-ɔ.+ Sran kwlaa nga w’a diman su’n, maan be kun i. Sran kwlaa ng’ɔ di junman cɛn sɔ’n nun’n, maan be yi i* i nvlefuɛ’m be afiɛn.+ 15 Amun kwla fa cɛn nsiɛn be di junman, sanngɛ cɛn nso su’n ti wunmiɛn-lolɛ-cɛn ngunmin.+ Cɛn sɔ’n ti Zoova liɛ klonglo. Sran kwlaa ng’ɔ di junman Wunmiɛn-lolɛ-cɛn’n nun’n, maan be kun i. 16 Ɔ fata kɛ Izraɛlifuɛ’m be di Wunmiɛn-lolɛ-cɛn’n su. Maan be di Wunmiɛn-lolɛ-cɛn’n tititi. Ɔ ti aenguɛ kun m’ɔ́ ká lɛ tititi-ɔ. 17 Ɔ ti nzɔliɛ kun m’ɔ́ ká e nin Izraɛlifuɛ mun e afiɛn tititi-ɔ.+ Afin Zoova fali cɛn nsiɛn fa yili nglo’n nin asiɛ’n, kpɛkun cɛn nso su’n, ɔ jrannin yɛ ɔ loli wunmiɛn.’”+

18 Kɛ ɔ nin Moizi be wieli ijɔ Sinai Oka’n su lɔ cɛ’n, ɔ fali yɔbuɛ paplaapla nɲɔn mɔ Mmla’n* wo su’n mɛnnin i.+ Yɔbuɛ sɔ mun’n, Ɲanmiɛn fɛli i sa mma+ klɛli be su.

32 Kɛ ɔ́ yó sɔ’n, nvlefuɛ’m be wunnin kɛ Moizi su cɛ oka’n su lɔ naan ɔ jraman.+ Ɔ maan nvlefuɛ’m be ko yiali Aarɔn i wun lɛ, kpɛkun be seli i kɛ: “Jaso, yo ɲanmiɛn kun man e naan ɔ dun mmua e ɲrun,+ afin Moizi sɔ’n, bian m’ɔ fali e Ezipti mɛn’n nun lɔ bali’n, e siman sa nga w’a ju i su’n.” 2 Kɛ ɔ yoli sɔ’n, Aarɔn seli be kɛ: “Amun yiyi sika ɔkwlɛ asunmanndi+ mɔ be o amun yi mun, nin amun mma yasua mun, nin amun mma bla’m be su’m be nun’n, naan amun fa blɛ min.” 3 Ɔ maan nvlefuɛ’m be kwlaa be yiyili be su’m be nun sika ɔkwlɛ asunmanndi mun, kpɛkun be fa blɛli Aarɔn. 4 Ɔ fali sika ɔkwlɛ’n be sa nun, kpɛkun ɔ fali blalɛ kun fa boli naan w’a fa yo nannin ba kun.+ Yɛ be seli kɛ: “Izraɛli, ɔ Ɲanmiɛn’n yɛ, i yɛ ɔ fali wɔ Ezipti mɛn’n nun fiteli-ɔ.”+

5 Kɛ Aarɔn wunnin i sɔ’n, ɔ kplannin tɛ yiwlɛ kun nannin ba’n i ɲrun lɛ. I sin’n, Aarɔn kpan seli kɛ: “Ainman’n, é dí cɛn é mán Zoova.” 6 Kɛ aliɛ cɛnnin’n, be jasoli nglɛmun ndɛ kpa be yili tɛ nga kɛ bé yí’n be yra nnɛn’n i kɔlikɔli’n, ɔ nin bo kun yolɛ tɛ mun. Kɛ ɔ yoli sɔ’n, nvlefuɛ’m be trannin ase be dili like yɛ be nɔnnin nzan. I sin’n, be jasoli be kannin ngowa.+

7 Kpɛkun Zoova seli Moizi kɛ: “Kɔ, jra, afin ɔ sran nga a fali be Ezipti mɛn’n nun bali’n b’a yo sa tɛ dan.+ 8 B’a yaci atin nga n kleli be kɛ be fa su’n lalaa.+ B’a yo nannin ba kun, be koto i bo kpɛkun be yi tɛ be mɛn i. Be se kɛ: ‘Izraɛli, ɔ Ɲanmiɛn’n yɛ, i yɛ ɔ fali wɔ Ezipti mɛn’n nun fiteli-ɔ.’” 9 Zoova seli Moizi ekun kɛ: “M’an wun kɛ nvle nga nunfuɛ’m be ɲin su ti kekle.*+ 10 Siɛn’n, yaci min nun maan n yo sa kun. Min ya’n wá júe kɛ sin sa, kpɛkun ń núnnún be mlɔnmlɔn. Yɛ ń má yó maan á káci nvle dan kun, yɛ á sín be osu.”+

11 Moizi kpɛtɛli i Ɲanmiɛn Zoova.+ Ɔ seli kɛ: “?Ee, Zoova, ɔ sran mɔ a fali ɔ tinmin dan’n, nin ɔ sa mɔ wunmiɛn o nun’n fali be Ezipti mɛn’n nun fiteli’n, ngue ti yɛ ɔ ya’n ɔ́ júe be su-ɔ?+ 12 Nán maan Eziptifuɛ’m be se kɛ: ‘W’a buman be wun akunndan kpa yɛ ɔ fa be fiteli-ɔ. Ɔ kunndɛ kɛ ɔ́ kún be oka’m be su lɔ naan ɔ́ núnnún be asiɛ’n su mlɔnmlɔn.’+ Gua ɔ ya dan’n i ase, nán yo nga a sunnzunnin kɛ á yó’n,* nán fa ɲrɛnnɛn yi ɔ nvlefuɛ’m be su. 13 Maan ɔ wla kpɛn ɔ sufuɛ Abraamun, nin Izaaki, nin Izraɛli be su. A tali ɔ wun nda, a seli be kɛ: ‘Ń má yó maan amun osu’n nunfuɛ’m bé trɛ́ kɛ nzraama nga be o ɲanmiɛn su lɔ’n sa.+ Mɛn ng’ɔ o yɛ mɔ n kɛnnin i ndɛ’n, ń má fɛ́ i kwlaa ń mán amun osu’n nunfuɛ mun, naan be fa yo be liɛ tititi.’”+

14 Zoova kacili akunndan.* Ɔ maan ɲrɛnnɛn ng’ɔ seli kɛ ɔ́ fá yí i nvlefuɛ’m be su’n w’a fa yiman be su kun.+

15 I sin’n, Moizi sɛli i sin, ɔ fin oka’n su jrali, yɔbuɛ paplaapla nɲɔn mɔ Mmla’n* wo su’n+ be o i sa nun.+ Be klɛli yɔbuɛ paplaapla’m be bue nɲɔn’n su. Be klɛli be ɲrun nin be sin. 16 Yɔbuɛ paplaapla’m be ti Ɲanmiɛn i sa nuan like. Ɲanmiɛn yɛ ɔ klɛli yɔbuɛ paplaapla’m be su-ɔ.+ 17 Kɛ Zozie tili nvlefuɛ’m be nɛn’n, kpanlɛ mɔ be kpan’n ti’n, ɔ seli Moizi kɛ: “Alɛ nganniɛn tɛ nanmue’n nun lɔ.” 18 Sanngɛ Moizi seli kɛ:

25 Moizi wunnin kɛ nvlefuɛ’m be su yo be klunklo like. Afin Aarɔn yacili be lɛ maan be yoli like nga be klo’n. Ɔ maan be ɲin guali ase be kpɔfuɛ’m be ɲrun. 26 I sin’n, Moizi ko jrannin nanmue’n i anuan’n nun lɛ, kpɛkun ɔ seli kɛ: “?Wan yɛ ɔ o Zoova sin-ɔn? Maan ɔ bla min wun wa!”+ Kpɛkun Levifuɛ’m be kwlaa be ko yiɛli i wun lɛ. 27 Ɔ seli be kɛ: “Ndɛ nga Zoova m’ɔ ti Izraɛlifuɛ’m be Ɲanmiɛn’n kan’n yɛ: ‘Maan amun tinuntinun amun fa amun tokofi mun naan amun sinsin nanmue’n i lika kwlaa nun, naan sran kun kun i niaan, nin i mantanfuɛ, nin i janvuɛ kpa’n.’”+ 28 Levifuɛ’m be yoli like nga Moizi seli kɛ be yo’n. Ɔ maan cɛn sɔ’n nun’n yasua akpi nsan (3.000) be wuli. 29 I sin’n, Moizi seli kɛ: “Andɛ’n, amun fa amun wun man Zoova naan amun di i junman’n. Afin amun tinuntinun amun kunnin amun bɔbɔ amun wa nin amun niaan.+ Andɛ’n, ɔ́ wá yrá amun su.”+

30 Kɛ aliɛ cɛnnin cɛ’n, Moizi seli nvlefuɛ’m be kɛ: “Amun yoli sa tɛ dan. Ɔ maan ń má fú Zoova wun lɔ naan ń nían, sɛ n kwla yo naan ɔ blu amun sa tɛ’n su-o.”+ 31 Moizi sɛli i sin Zoova i wun lɔ, kpɛkun ɔ seli i kɛ: “Nvlefuɛ’m be yoli sa tɛ dan! Be fali sika ɔkwlɛ be yoli ɲanmiɛn kun!+ 32 Sanngɛ sɛ ɔ ti ɔ klun su’n, yaci be sa tɛ’n cɛ be.+ Sɛ w’a yoman sɔ’n, yaci, nunnun min dunman’n ɔ fluwa nga a klɛli’n nun.”+ 33 Sanngɛ Zoova seli Moizi kɛ: “Sran ng’ɔ fɔnnin min wun’n yɛ ń núnnún i dunman’n min fluwa’n nun-ɔn. 34 Siɛn’n kɔ, fa nvlefuɛ mun kɔ lika nga n kɛnnin i ndɛ kleli wɔ’n nun lɔ. Nian, min anzi’n wá dún mmua ɔ ɲrun.+ Kpɛkun cɛn nga ń má úsa be sa’n, ń tú be fɔ be sa tɛ nga be yoli’n ti.” 35 Nannin ba nga nvlefuɛ’m be yoli’n ti’n, Zoova fali ɲrɛnnɛn yili be su. Aarɔn yɛ ɔ yoli nannin ba sɔ’n niɔn.

33 Zoova seli Moizi ekun kɛ: “Fa sran nga a fali be Ezipti mɛn’n nun lɔ fiteli’n naan amun jaso wa be wɔ. Amun wɔ mɛn nga n tali Abraamun nin Izaaki nin Zakɔbu be nda kɛ ń fá mán be’n nun lɔ. N seli be kɛ: ‘Ń fá mán ɔ osu’n nunfuɛ mun.’+ 2 Ń má súnman anzi kun naan ɔ dun mmua ɔ ɲrun,+ yɛ ń fúan Kanaanfuɛ mun nin Amɔɔfuɛ mun nin Ɛtifuɛ mun nin Perizifuɛ mun nin Ivifuɛ mun nin Zebisifuɛ mun.+ 3 Kɔ mɛn kun mɔ nɔnnɔn nin awɛma nzue be sonji lɔ’n nun.+ Sanngɛ e nin amun e su kɔman, afin amun ti nvle kun mɔ i ɲin su ti kekle-ɔ.*+ Sɛ e nin amun e kɔ’n, ń núnnún amun atin nun.”+

4 Kɛ be tili ndɛ yaya sɔ’n, be yoli kɛ b’a bo be sɛ sa, be nun wie fi w’a wlɛmɛn i ninnge nglanmannglanman mun. 5 Zoova seli Moizi kɛ: “Se Izraɛlifuɛ’m be kɛ: ‘Amun ti nvle kun mɔ i ɲin su ti kekle-ɔ.*+ N kwla wlu amun nun n nunnun amun kpɛ kunngba.+ Ɔ maan nán amun wlawla amun ninnge nglanmannglanman mun lele naan m’an wun sa nga ń fá yó amun’n.’” 6 Kɛ ɔ fɛ i Orɛbu Oka’n su lɛ’n, Izraɛlifuɛ’m b’a wlaman* be ninnge nglanmannglanman mun kun.

7 Moizi fɛli i tannin sua’n, kpɛkun ɔ ko kplɛnnin i nanmue’n i sin lɔ. Ɔ nin nanmue’n be afiɛn’n ti nun. Ɔ flɛli i kɛ tannin sua mɔ Ɲanmiɛn yi i wun nglo nun’n. Sran kwlaa ng’ɔ kunndɛ kɛ ɔ́ úsa Zoova i sa’n,+ ɔ kɔ tannin sua mɔ Ɲanmiɛn yi i wun nglo nun m’ɔ o nanmue’n i sin lɔ’n nun. 8 Kɛ Moizi kɔ́ tannin sua’n nun lɔ’n, nvlefuɛ’m be kwlaa be jaso be jranjran be tannin sua’m be anuan’m be nun, be nian Moizi lele ɔ fa wlu tannin sua’n nun lɔ. 9 Kɛ Moizi ko wlu tannin sua’n nun lɔ cɛ’n, ɲanmiɛn ble tiaan’n+ ɔ jra, kpɛkun ɔ jran tannin sua’n i anuan’n nun lɛ, kɛ ɔ́ yó sɔ’n nn Moizi nin Ɲanmiɛn be su ijɔ.+ 10 Kɛ nvlefuɛ’m be kwlaa be wun ɲanmiɛn ble tiaan’n m’ɔ o tannin sua’n i anuan’n nun’n, be tinuntinun be koto be tannin sua’m be anuan’m be nun lɛ. 11 Zoova nin Moizi be koko yalɛ+ kɛ sran kun nin i wiengu be fa koko yalɛ’n sa. Kɛ ɔ sɛ i sin nanmue’n nun lɔ’n, Nɛn i wa Zozie+ m’ɔ ti i sufuɛ nin i ukafuɛ’n+ ɔ ka tannin sua’n nun lɛ.

12 Moizi seli Zoova kɛ: “Nian, a se min kɛ: ‘Dun mmua sran nga’m be ɲrun,’ sanngɛ w’a kleman min sran ng’ɔ́ kó súnman min’n. A seli min ekun kɛ: ‘N si ɔ dunman’n,* yɛ min klun jɔ ɔ wun.’ 13 Yaci, sɛ ɔ klun jɔ min wun’n, yo maan n si ɔ atin mun.+ I liɛ’n, ń kwlá sí wɔ, yɛ ɔ klun jɔ́ min wun titi. Kusu nán ɔ wla fi su kɛ nvle nga nunfuɛ’m be ti ɔ sran.”+ 14 Ɔ maan ɔ seli i kɛ: “Min bɔbɔ e nin wɔ é kɔ́,+ yɛ ń má yó maan á wá ló wunmiɛn.”+ 15 Moizi seli i kɛ: “Sɛ ɔ bɔbɔ a nin e su kɔman’n, nán se e kɛ e tu e bo wa. 16 ?Ɔ́ yó sɛ naan sran’m b’a si kɛ ɔ klun jɔ e nin ɔ nvlefuɛ mun e wun? ?Nán sɛ a nin e kɔ’n+ yɛ bé sí kɛ ɔ klun jɔ e wun-ɔn, yɛ bé wún kɛ ngbaciɛ o e nin ɔ nvlefuɛ mun, ɔ nin asiɛ’n su nvle onga mun e afiɛn-ɔn?”+

17 Zoova seli Moizi kɛ: “Ń má yó like nga a srɛli’n wie, afin min klun jɔ ɔ wun, yɛ n si ɔ dunman’n.” 18 I sin’n, Moizi seli kɛ: “Yaci, yo maan n wun ɔ aɲrunɲan’n.” 19 Sanngɛ ɔ seli kɛ: “Ń má sín ɔ ɲrun, kpɛkun á wá wún min kpa mɔ n ti’n, yɛ ń bó Zoova i dunman’n ɔ ɲrun.+ Sran nga n klo kɛ ń yó i ye’n, ń yó i ye, yɛ sran nga n klo kɛ ń sí i aunnvɔɛ’n, ń sí i aunnvɔɛ.”+ 20 Yɛ ɔ kan guali su kɛ: “A kwlá wunman min ɲrun’n, afin sɛ klɔ sran kun wun min’n, ɔ su kwlá kaman nguan nun.”

21 Zoova seli ekun kɛ: “Lika kun yɛ ɔ o min wun koko yɛ. Jran yɔbuɛ’n su lɛ. 22 Kɛ min aɲrunɲan’n wá sín’n, ń fá wɔ ń síe i yɔbuɛ’n i buɛ kun nun, kpɛkun ń fá min sa’n ń káta ɔ su lele ń wíe sín. 23 I sin’n, ń yí min sa’n, yɛ á wún min kɔmin sin. Sanngɛ min ɲrun fuɛ’n, be kwlá wunmɛn i.”+

34 I sin’n, Zoova seli Moizi kɛ: “Sɛ yɔbuɛ paplaapla nɲɔn kɛ klikli liɛ mun’n sa.+ Ndɛ ng’ɔ o yɔbuɛ paplaapla klikli nga a bubuli be nun’n+ be su’n, ń má klɛ́ be yɔbuɛ paplaapla sɔ’m be su.+ 2 Buabua ɔ wun sie, ainman nglɛmun liɛ ti. Afin á wá fú Sinai Oka’n su nglɛmun, kpɛkun á jrán min ɲrun lɛ, oka’n i ti su nglo.+ 3 Sanngɛ nán maan sran fi nin wɔ be fu, nán maan be wun sran fi oka’n su. Nán maan bua nin nannin mun bɔbɔ’n be didi oka’n i ɲrun lɛ.+

4 Ɔ maan Moizi yoli yɔbuɛ paplaapla nɲɔn kɛ klikli liɛ mun’n sa. Kpɛkun nglɛmun ndɛ kpa’n, ɔ fuli Sinai Oka’n su lɔ, kɛ nga Zoova seli i kɛ ɔ yo’n sa. Kɛ ɔ́ kɔ́’n, yɔbuɛ paplaapla nɲɔn’n be o i sa nun. 5 I sin’n, Zoova jrali+ ɲanmiɛn ble kun nun, ɔ jrɛnnin i wun lɛ, kpɛkun ɔ boli Zoova i dunman.+ 6 Zoova sinnin i ɲrun, kpɛkun ɔ seli kɛ: “Zoova, Zoova, Ɲanmiɛn m’ɔ yaci sa cɛ’n,+ ɔ si aunnvɔɛ,*+ ɔ faman ya ndɛndɛ,+ ɔ klo sran dan,+ ɔ ti nanwlɛfuɛ,+ 7 ɔ yi i sran klolɛ dan’n i nglo sran akpi kpanngban be lika,+ ɔ yaci fɔnlɛ’n nin ɲin kekle yolɛ’n nin sa tɛ’n cɛ.+ Sanngɛ sran ng’ɔ yo sa tɛ’n, ɔ yacimɛn i lɛ sa ngbɛn.+ Fɔnlɛ nga siɛ’m be fɔn’n, ɔ nian su tu be mma mun nin be anunman mun, nin be anunman’m be mma liɛ’m be fɔ lele fa ju be akpasua nnan su.”+

8 Moizi kotoli asiɛ wun ndɛndɛ, kpɛkun ɔ utuli i ɲin ase. 9 I sin’n, ɔ seli kɛ: “Zoova, sɛ ɔ klun jɔ min wun’n, kannzɛ e ti nvle kun mɔ e ɲin su ti kekle’n,*+ sanngɛ Zoova yaci, maan a nin e wɔ.+ Yaci e fɔnlɛ nin e sa tɛ mun cɛ e,+ yɛ fa e kaci ɔ liɛ mlɔnmlɔn.” 10 Ɔ tɛli i su kɛ: “Nian, e nin amun e su tra aenguɛ. Ɔ nvlefuɛ’m be kwlaa be ɲrun’n, ń má yó abonuan sa wie mɔ n nin-a yoman be* asiɛ’n wunmuan’n su le annzɛ nvlenvle’m be nun le’n.+ Ɔ maan nvlefuɛ nga a tran be afiɛn’n, bé wá wún like nga Zoova wá yó’n, afin n su yo sa sroesroe kun n man amun.+

11 “Ndɛ nga n su kan kle wɔ andɛ yɛ’n, fa ɔ ɲin sie su kpa.+ Nian, n su fuan Amɔɔfuɛ mun, nin Kanaanfuɛ mun, nin Ɛtifuɛ mun, nin Perizifuɛ mun, nin Ivifuɛ mun, nin Zebisifuɛ mun ɔ ɲrun.+ 12 Nian ɔ wun su, nán a nin mɛn nga a su ko tran nun’n i nunfuɛ mun be tra aenguɛ.+ Afin i sɔ’n kwla kaci ɔ bo aya.+ 13 Sanngɛ ɔ fata kɛ a bubu be tɛ yiwlɛ mun, ɔ nin yɔbuɛ nga be sɔ be’n, yɛ kpɛ waka nga be sɔ be’n* be bo.+ 14 Nán koto ɲanmiɛn uflɛ bo,+ afin sran kwlaa si kɛ Zoova ti* Ɲanmiɛn kun m’ɔ kunndɛ kɛ be su i kunngba cɛ-ɔ.* Nanwlɛ, ɔ ti Ɲanmiɛn kun m’ɔ kunndɛ kɛ be su i kunngba cɛ-ɔ.+ 15 Nian ɔ wun su, nán a nin mɛn’n i nunfuɛ mun be tra aenguɛ,+ afin be nin be amuin mun be bo tekle, yɛ be yi tɛ man be amuin mun. Ɔ maan sran wie wá yía wɔ, yɛ á dí i ninnge ng’ɔ fa yi tɛ’n wie.+ 16 Kpɛkun á fá be mma bla’m be nun wie mun mán ɔ mma yasua mun,+ yɛ be mma bla’m bé sɔ́ be amuin mun,* kpɛkun bé yó maan ɔ mma yasua mun bé sɔ́ be amuin mun.*+

17 “Nán klo blalɛ yo amuin.+

18 “Ɔ fata kɛ a di Kpanwun mɔ Levii Nunman nun’n i ti Cɛn’n.+ Di kpanwun mɔ levii nunman’n kɛ nga n kan kleli wɔ’n sa. Abibu* anglo’n nun’n, kɛ i blɛ ko ju’n, fa cɛn nso di cɛn sɔ’n,+ afin Abibu anglo’n nun yɛ amun fin Ezipti lɔ fiteli-ɔ.

19 “Ba yasua klikli mun* be kwlaa be ti min liɛ.+ Nnɛn’m be mma klikli’m be o nun wie. Maan ɔ yo nannin’m be mma yasua klikli mun-o, annzɛ bua’m be mma yasua klikli mun-o, be ti min liɛ.+ 20 Ɔ fata kɛ a fa bua kun fa kpɔ aflunmun kwlaa i wa klikli’n i ti. Sɛ w’a kpɔmɛn i ti’n ɔ fata kɛ a bu i kɔmin. Ɔ fata kɛ a kpɔ ɔ mma klikli’m be kwlaa be ti.+ Nán maan sran fi fɛ i sa ngbɛn bla min ɲrun.

21 “Fa cɛn nsiɛn di junman, sanngɛ cɛn nso’n su’n, ɔ fata kɛ a lo wunmiɛn.*+ Junman dilɛ blɛ nun bɔbɔ’n annzɛ ninnge’m be kpɛlɛ blɛ nun bɔbɔ’n, ɔ fata kɛ a lo wunmiɛn.

22 “Fa ble mma klikli nga a kpɛ’n fa di Lemɔcuɛ’m be ti Cɛn’n, kpɛkun afuɛ nuan’n i awieliɛ’n, di Ninnge’m be su Yiayialɛ i ti Cɛn’n.*+

23 “Afuɛ kwlakwla’n, maan yasua mun be bla Zoova m’ɔ ti be Min kpafuɛ’n, m’ɔ ti Izraɛli Ɲanmiɛn’n i ɲrun kpɛ nsan.+ 24 Afin ń má fúan nvlenvle mun amun ɲrun,+ ń yó maan amun mɛn’n yó dan kpa, yɛ kɛ amún wá kɔ́ amun Ɲanmiɛn Zoova i ɲrun nianlɛ kpɛ nsan afuɛ kun nun’n, sran fi i ɲin su bloman amun mɛn’n su.

25 “Kɛ á fá tɛ nga be yi man min’n i mmoja’n mán min’n, nán fa like nga levii o nun’n sie su.+ Delɛ Cɛn’n i dilɛ nun’n like nga amun fa yi tɛ’n, nán maan ɔ ka lɛ kɔnguɛ lele naan lika cɛn su.+

26 “Ɔ fata kɛ a fa ɔ asiɛ’n i su ninnge’m be mma klikli’m be nun kpakpa mun a wɔ ɔ Ɲanmiɛn Zoova i sua’n nun lɔ.+

“Nán tɔn boli ba’n i nin i wunflɛn nzue’n nun.”+

27 Zoova seli Moizi ekun kɛ: “Klɛ ndɛ nga mun,+ afin aenguɛ nga e nin wɔ nin Izraɛli e su tra’n, ɔ taka ndɛ nga’m be su.”+ 28 Ɔ nin Zoova be kali lɔ cɛn ba ablanan (40), wia nun nin kɔnguɛ. W’a diman like* yɛ w’a nɔnman nzue.+ Kpɛkun Ɲanmiɛn klɛli aenguɛ’n i su ndɛ mun yɔbuɛ paplaapla’m be su, ɔ klɛli Mmla Blu mun.*+

29 I sin’n Moizi fin oka’n su lɔ jrali. Yɔbuɛ paplaapla nɲɔn mɔ Mmla’n* wo su’n be o i sa nun.+ Kɛ ɔ́ fín oka’n su lɔ jrá’n, ɔ siman kɛ Ɲanmiɛn m’ɔ nin i be kokoli yalɛ’n ti’n i ɲrun’n bo mianmian. 30 Kɛ Aarɔn nin Izraɛlifuɛ’m be kwlaa be wunnin Moizi’n, be wunnin kɛ i ɲrun’n kpaja mianmian. Ɔ maan srɛ m’ɔ kun be’n ti’n be kunndɛman kɛ bé mɛ́ntɛn i.+

31 Sanngɛ Moizi flɛli be. Ɔ maan Aarɔn nin Izraɛlifuɛ’m be su kpɛn’m be bɛli i wun lɛ, kpɛkun Moizi nin be ijɔli. 32 I sin’n, Izraɛlifuɛ’m be kwlaa be bɛli i wun lɛ, kpɛkun mmla kwlaa nga Zoova fa mɛnnin i Sinai Oka’n su lɔ’n, ɔ fa mannin be.+ 33 Blɛ kwlaa nga Moizi nin be wie ijɔ’n, ɔ fa tannin kɛtɛ i ɲrun.+ 34 Sanngɛ kɛ Moizi kɔ Zoova i ɲrun m’ɔ nin i bé íjɔ’n, ɔ yi tannin’n.+ Ɔ ka sɔ lele ɔ fa fite. Kɛ ɔ ko fite’n, ɔ kan mmla ng’ɔ fa mɛnnin i’n kle be.+ 35 Izraɛlifuɛ’m be wunnin kɛ Moizi i ɲrun kplo’n bo mianmian. Ɔ maan Moizi fa tannin’n kɛtɛ i ɲrun lele saan kɛ ɔ wlu Ɲanmiɛn i sin lɔ kɛ ɔ nin i bé kókó yalɛ’n yɛ ɔ yi-ɔ.+

35 I sin’n, Moizi yiali Izraɛlifuɛ’m be kwlaa, kpɛkun ɔ seli be kɛ: “Ninnge nga Zoova seli kɛ be yo be’n yɛ:+ 2 Amun kwla di junman cɛn nsiɛn, sanngɛ maan cɛn nso su’n yo Ɲanmiɛn liɛ klonglo amun ɲrun. Ɔ ti Zoova i wunmiɛn-lolɛ-cɛn ngunmin.+ Sran kwlaa ng’ɔ di junman cɛn sɔ’n nun’n, maan be kun i.+ 3 Nán amun trɔ sin amun awlo wie fi nun Wunmiɛn-lolɛ-cɛn’n nun.”

4 I sin’n, Moizi seli Izraɛlifuɛ’m be kwlaa kɛ: “Ndɛ nga Zoova kannin’n yɛ: 5 ‘Amun yi like be man Zoova.+ Maan sran’m be kwlaa be man Zoova i like klun ufue su: Sika ɔkwlɛ, sika, aaba,+ 6 jese ble, jese ɔkwlɛ kankan, jese ɔkwlɛ bioun, lɛn kplɔkɔɔ, boli ndrɛ,+ 7 bua ɲin kplo mɔ be kɛnnin i ayre ɔkwlɛ’n, nzue nun nnɛn nga be flɛ i fɔku’n i kplo, akasia waka, 8 kannin nuan sɔlɛ ngo, bomie ngo mɔ be fa sanngan be ti su gualɛ ngo’n nin ansan fanninfannin nun’n,+ 9 yɔbuɛ nga be flɛ i kɛ oniksi’n nin yɔbuɛ uflɛ wie mɔ bé fá tátá efɔdu’n+ nin be wue nun pɔsu’n+ be su’n.

10 “‘Maan be kwlaa nga be si like yo kpa*+ amun nun’n, be bla naan be wa yo ninnge kwlaa nga Zoova seli kɛ be yo’n. 11 Ninnge sɔ mun yɛ: Tannin sua’n nin i tannin’n nin i su katalɛ like’n, nin i aglafu mun nin i kadri mun nin i su jajalɛ waka mun, nin i ja mlomlo mun nin i ja’m be takatakawlɛ mun, 12 nin alaka’n+ nin i waka floloflolo mun,+ nin i ti su tre’n,+ nin rido+ ng’ɔ kpɛ tannin sua’n nun’n, 13 nin tabli’n+ nin i waka floloflolo mun nin i wun ninnge’m be kwlaa, nin kpanwun nga be fa man Ɲanmiɛn’n,+ 14 nin kannin siewlɛ+ mɔ bé fá kpája lika’n nun’n nin i wun ninnge mun nin i kannin mun, ɔ nin ngo nga bé fá sɔ́ kannin’m be nuan’n,+ 15 nin tɛ yiwlɛ nga be yra ansan su’n,+ nin i waka floloflolo mun, nin be ti su gualɛ ngo’n nin ansan fanninfannin’n,+ nin tannin sua’n i anuan’n nun rido’n, 16 nin tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n,+ ɔ nin i aaba griazi’n, nin i waka floloflolo mun, ɔ nin i wun ninnge’m be kwlaa, nin kpongbo dan’n nin i takawlɛ’n,+ 17 nin awlo klun’n i wun rido mun,+ nin i ja mun nin i ja’m be takatakawlɛ mun, nin awlo klun’n i anuan’n nun rido’n, 18 nin tannin sua’n i kpɛngbɛ mun, nin awlo klun’n i kpɛngbɛ mun nin be ɲanman mun,+ 19 nin Ɲanmiɛn i sua’n nun lɔ junman dilɛ tralɛ wie mɔ be wu be klanman kpa’n,+ nin Ɲanmiɛn ɲrun jranfuɛ Aarɔn i tralɛ mɔ be ti Ɲanmiɛn liɛ klonglo’n,+ nin i mma’m be tralɛ mɔ bé fá dí Ɲanmiɛn ɲrun jranlɛ junman’n.’”

20 Ɔ maan Izraɛlifuɛ’m be kwlaa be jasoli Moizi i ɲrun lɛ be ɔli. 21 Be kwlaa nga be klun ti ufue’n,*+ be fali be like nga bé fá mán Zoova’n be bali naan be fa yo tannin sua mɔ Ɲanmiɛn yi i wun nglo nun’n, nin i nun junman dilɛ ninnge’m be kwlaa nin tralɛ mɔ be ti Ɲanmiɛn liɛ klonglo’n. 22 Yasua nin bla nga be klun ti ufue’n be bali, kɛ bé bá’n, be tinuntinun be fa like klanman yolɛ ninnge mun, nin asunmanndi mun, nin nga mun, nin kɔmin ɲanman wie mun, nin sika ɔkwlɛ ninnge wafawafa kwlaa be fa ba. Be kwlaa be fali be sika ɔkwlɛ ninnge mun* mannin Zoova.+ 23 Be kwlaa nga be le jese ble, nin jese ɔkwlɛ kankan nin jese ɔkwlɛ bioun nin lɛn kplɔkɔɔ, nin boli ndrɛ, nin bua ɲin kplo mɔ be kɛnnin i ayre ɔkwlɛ’n, nin nzue nun nnɛn nga be flɛ i fɔku’n i kplo’n, be fa be bali. 24 Be kwlaa nga be kunndɛ kɛ bé mán sika nin aaba’n, be fa blɛli Zoova. Kpɛkun be kwlaa nga be le akasia waka’n mɔ be kwla fa di junman’n wie’n be fa bali.

25 Bla’m be kwlaa nga be si like yo kpa’n,+ be toli jese be sa nun, kpɛkun be fali jese nga be toli’n be bali: Jese ble, nin jese ɔkwlɛ kankan nin jese ɔkwlɛ bioun, nin lɛn kplɔkɔɔ. 26 Bla’m be kwlaa nga be si like yo kpa mɔ be klun ti ufue’n be fali boli ndrɛ be fa yoli jese.

27 Kpɛnngbɛn’m be fali yɔbuɛ nga be flɛ i kɛ oniksi’n, nin yɔbuɛ uflɛ wie’m be bali naan be fa tata efɔdu’n nin be wue nun pɔsu’n be su,+ 28 nin bomie ngo, nin kannin nuan sɔlɛ ngo, nin be ti su gualɛ ngo,+ nin ansan fanninfannin’n+ i nun gualɛ ngo. 29 Yasua nin bla’m be kwlaa nga be klun ti ufue’n be fali like bali naan be fa di junman nga Zoova seli Moizi kɛ be di’n. Izraɛlifuɛ’m be klun klo su yɛ be fali ninnge sɔ’m be mannin Zoova-ɔ.+

30 I sin’n, Moizi seli Izraɛlifuɛ’m be kɛ: “Amun nian, Zoova fali Bezalɛli m’ɔ ti Uri i wa’n. Uri sɔ’n, ɔ ti Ur m’ɔ fin Zida akpasua’n su’n i wa.+ 31 Ɔ fali Ɲanmiɛn i wawɛ’n mɛnnin i, naan ɔ yo ngwlɛlɛfuɛ, ɔ yo akunndanfuɛ, yɛ ɔ si ajuin dilɛ junman’n i wafawafa kwlaa di, 32 naan ɔ si ninnge’m be yi, ɔ si sika ɔkwlɛ nin sika nin aaba nun junman di, 33 naan ɔ si yɔbuɛ sɛ, ɔ si be wun cilɛ ninnge’m be yo, yɛ ɔ si waka nun junman kwlaa di. 34 Ɲanmiɛn yoli maan ɔ nin Ooliabu+ m’ɔ ti Aisamaki m’ɔ fin Dan akpasua’n su’n i wa’n be si be wiengu’m be like kle. 35 Ɔ mannin be junman dilɛ’n i wun ngwlɛlɛ*+ naan be kwla di ajuin dilɛ junman’n i kwlaa, be yi ninnge’m be nun desɛn, be to jese ble, nin jese ɔkwlɛ kankan nin jese ɔkwlɛ bioun nin lɛn kplɔkɔɔ, yɛ be wu tannin. Sran sɔ’m bé dí junman wafawafa kwlaa yɛ bé jájá desɛn kwlaa ng’ɔ fata kɛ be yo’n.

36 “Bezalɛli wá dí junman sɔ’n, ɔ nin Ooliabu nin sran kwlaa nga be si like yo kpa’n,* mɔ Zoova mannin be ngwlɛlɛ nin akunndan’n naan be si Ɲanmiɛn i junman’n i kwlaa di, kɛ nga Zoova seli kɛ be yo’n sa’n.”+

2 Moizi flɛli Bezalɛli nin Ooliabu nin be kwlaa nga be si like yo kpa mɔ Zoova mannin be ngwlɛlɛ’n,+ ɔ nin be kwlaa nga be klun klo su be kunndɛ kɛ bé dí junman’n wie’n.+ 3 Ninnge nga Izraɛlifuɛ’m be fa bali+ kɛ be fa di Ɲanmiɛn i junman’n, be fɛli i kwlaa Moizi sa nun. Sanngɛ nglɛmun kwlakwla’n, sran’m be te tu be klun be te fa be ninnge mun te blɛ i.

4 Kɛ be boli Ɲanmiɛn i junman’n i bo’n, be kwlaa nga be si junman di kpa’n be bali kunngunngun. 5 Be seli Moizi kɛ: “Like nga nvlefuɛ’m be fa ba’n, w’a sɔn w’a tra ng’ɔ fata kɛ e fa di junman nga Zoova seli kɛ e di’n.” 6 Ɔ maan Moizi seli kɛ be kan ndɛ yɛ’n be sin nanmue’n nun: “I yasua-o, i bla-o, nán sran fi fa like bla kɛ ɔ́ fá mán Ɲanmiɛn kun.” Kɛ ɔ yoli sɔ’n, b’a manman nvlefuɛ’m be atin kɛ be fa like bla kun. 7 Ninnge’m be juli junman’n i kwlaa dilɛ, ɔ trali su bɔbɔ.

8 Ɔ maan be kwlaa nga be si junman di kpa’n+ be fali tannin tanmue blu be fa yoli tannin sua’n.+ Be fali lɛn kplɔkɔɔ mɔ be cisannin’n, nin jese ble, nin jese ɔkwlɛ kankan, nin jese ɔkwlɛ bioun yɛ be fa yoli-ɔ. Ɔ* yili seribɛn desɛn tannin’m be nun.+ 9 Tannin tanmue kun i tɛnndɛn nun’n ti kude ablaɔn-nin-mɔcuɛ (28),* i tɛtrɛ nun’n ti kude nnan. Tannin tanmue’m be kwlaa be sɛ. 10 Ɔ fali tannin tanmue nnun sasali su. Yɛ ɔ fali tannin tanmue nnun onga mun sasali su. 11 I sin’n, ɔ fali jese ble fa yoli tannin kun i tanmue kasiɛn’n i nuan su kaakaa, kan bé wá sá be su lɛ’n. Ɔ yoli tannin kunfuɛ’n i tanmue kasiɛn’n i nuan su’n i sɔ wie, kan bé wá sá be su lɛ’n. 12 Ɔ yoli tannin tanmue kun i nuan su kaa ablenun (50). Yɛ ɔ yoli tannin tanmue kunfuɛ m’ɔ o kan bé wá sá tannin’m be su lɛ’n, i nuan su kaa ablenun (50). I liɛ’n, be nuan su kaakaa’m bé wɔ́ su. 13 I agualiɛ su’n, ɔ fali sika ɔkwlɛ fa yoli aglafu ablenun (50), kpɛkun ɔ fa sali tannin’m be su naan tannin sua’n yo wunmuan kun.

14 I sin’n, ɔ fali boli ndrɛ yoli tannin tanmue wie mun naan be fa be sie tannin sua’n su. Ɔ yoli tannin tanmue blu-nin-kun (11).+ 15 Tannin tanmue kun i tɛnndɛn nun’n ti kude ablasan (30), yɛ i tɛtrɛ nun’n ti kude nnan. Tannin tanmue blu-nin-kun’n (11) be kwlaa be sɛ. 16 Kɛ ɔ yoli sɔ’n, ɔ fali tannin tanmue’m be nun nnun sasali su, yɛ ɔ fali tannin tanmue nsiɛn onga mun sasali su. 17 I sin’n, ɔ yoli tannin kun i tanmue kasiɛn’n i nuan su kaa ablenun (50), kan bé wá sá su lɛ’n. Kpɛkun ɔ yoli tannin tanmue kunfuɛ’n i nuan su kaa ablenun (50), kan bé wá sá be su lɛ’n. 18 Ɔ fali aaba yoli aglafu ablenun (50) naan be fa sasa tannin’n su naan ɔ yo wunmuan kun.

19 Ɔ fali bua ɲin kplo mɔ be kɛnnin i ayre ɔkwlɛ’n fa yoli tannin sua’n i su katalɛ like, kpɛkun ɔ fali nzue nun nnɛn nga be flɛ i fɔku’n i kplo fa yoli tannin kun, kpɛkun ɔ fa katali su.+

20 Ɔ fali akasia waka+ yoli tannin sua’n i kadri mun, yɛ ɔ jranjrannin be nglo.+ 21 Kadri kun i nglonglo su’n ti kude blu, yɛ i tɛtrɛ nun’n ti kude kun nin sin. 22 Kadri kun le ja nɲɔn, yɛ be sa su. I sɔ yɛ ɔ yoli tannin sua’n i kadri’m be kwlaa-ɔ. 23 Ɔ yoli tannin sua’n i bue nga i ɲin kpɛ ngua lɔ’n i kadri mun. Be ti kadri ablaɔn (20). 24 Ɔ fali sika fa yoli kadri ablaɔn (20) mun be ja’m be takatakawlɛ ablanan (40). Kadri kun i ja takatakawlɛ’m be ti nɲɔn, afin i ja’m be ti nɲɔn. Kadri nga be su i su’n be kwlaa be ja takatakawlɛ’m be ti nɲɔnnɲɔn wie, afin be ja’m be ti nɲɔnnɲɔn.+ 25 Tannin sua’n i bue uflɛ su’n, i bue nga i ɲin kpɛ nglo lɔ lika’n su’n, ɔ yoli kadri ablaɔn (20), 26 yɛ ɔ fali sika yoli be ja takatakawlɛ ablanan (40) lɔ. Kadri kun i ja takawlɛ nɲɔn, yɛ kadri nga be su i su’n be kwlaa be le ja takatakawlɛ nɲɔnnɲɔn.

27 Tannin sua’n i sin m’ɔ kpɛ wia atɔliɛ lɔ’n, ɔ yoli kadri nsiɛn lɔ.+ 28 Ɔ yoli kadri nɲɔn naan be yo tannin sua’n i sin lɔ cɔnjɔ nɲɔn’m be kadri. 29 Kɛ ɔ fɛ i kadri’n i ngua lele m’ɔ́ fá jú i nglo lɔ like kukluku kɛ be sa nga sa’n i klikli’n su’n, waka’m be ti nɲɔn. Kɛ ɔ yoli kadri nɲɔn nga be o tannin sua’n i sin lɔ cɔnjɔ nɲɔn’m be su’n be sɔ-ɔ. 30 Kadri’m be yoli mɔcuɛ yɛ be ja takatakawlɛ’m be yoli blu-nin-nsiɛn (16). Kadri’m be kwlaa be ja takatakawlɛ’m be ti nɲɔnnɲɔn.

31 Ɔ fali akasia waka fa yoli tannin sua’n i bue kun su kadri’m be su jajalɛ waka nnun.+ 32 Yɛ tannin sua’n i bue uflɛ su’n, ɔ yoli kadri’m be su jajalɛ waka nnun. Tannin sua’n i bue nga i ɲin kpɛ wia atɔliɛ lɔ m’ɔ ti sua’n i sin’n su’n, ɔ yoli kadri’m be su jajalɛ waka nnun lɔ. 33 Ɔ yoli waka ng’ɔ o afiɛn m’ɔ ja kadri’m be afiɛn’n. Ɔ fɛ i tiwa kun su lele fa ju i tiwa uflɛ su. 34 Ɔ fali sika ɔkwlɛ katali kadri’m be wun, yɛ ɔ fali sika ɔkwlɛ yoli nga wie mun naan be fa tra waka nga be jaja kadri’m be su’n be ase, ɔ fali sika ɔkwlɛ katali waka’m be wun.+

35 Ɔ fali jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n fa yoli rido kun.+ Ɔ yili seribɛn’m+ be desɛn rido’n nun.+ 36 Ɔ fali akasia waka yoli i ja mlomlo nnan, kpɛkun ɔ fali sika ɔkwlɛ katali be wun, yɛ ɔ fali sika ɔkwlɛ yoli i ase tralɛ like, ɔ fali sika fa yoli be takatakawlɛ nnan. 37 I sin’n, ɔ fali jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n, ɔ fa wuli tannin sua’n i anuan’n nun rido kun,+ 38 ɔ yoli i ja mlomlo nnun, ɔ nin be ase tralɛ ninnge mun. Ɔ fali sika ɔkwlɛ katali waka’m be ti su nglo, yɛ ɔ fali wie katali be nun sɔtɔsɔtɔlɛ* ninnge’m be wun. Sanngɛ aaba yɛ ɔ fa yoli be ja takatakawlɛ nnun mun-ɔn.

37 Bezalɛli+ fali akasia waka yoli Alaka’n.+ I tɛnndɛn nun’n ti kude nɲɔn nin sin,* i tɛtrɛ nun’n ti kude kun nin sin, yɛ i nglonglo su’n ti kude kun nin sin.+ 2 Ɔ fali sika ɔkwlɛ jrɛiin kɛtɛli i klun nin i sin. Kpɛkun ɔ fali sika ɔkwlɛ fa yoli i nuan su tɛɛn sin yiali nun.+ 3 I sin’n, ɔ kloli sika ɔkwlɛ yoli i nga nnan, naan ɔ́ fá be tɛ́tɛ́ i i ja nnan’m be ti su nglo, ɔ sieli nɲɔn i bue kun su, yɛ ɔ sieli nɲɔn i bue kun’n su lɔ. 4 I sin’n, ɔ sɛli akasia waka floloflolo wie mun, kpɛkun ɔ fali sika ɔkwlɛ katali be wun.+ 5 Ɔ fali waka sɔ mun wlɛwlɛli i Alaka’n i wun nga’m be nun naan be fa sua Alaka’n.+

6 Ɔ fali sika ɔkwlɛ jrɛiin yoli i su tre’n.+ I tɛnndɛn nun’n ti kude nɲɔn nin sin, yɛ i tɛtrɛ nun’n ti kude kun nin sin.+ 7 Ɔ fali maato boli sika ɔkwlɛ fa yoli seribɛn nɲɔn+ i tre’n i tiwa nɲɔn’m be su.+ 8 Seribɛn kun o i tiwa kun su, yɛ kun o i tiwa kun’n su lɔ. Ɔ yoli seribɛn mun i tre’n i tiwa nɲɔn’m be su. 9 Seribɛn nɲɔn’m be ndɛwa’m be nun trɛ kɔ nglo, yɛ be ndɛwa’n kata Alaka’n i tre’n su.+ Be nɲɔn’n be ɲin’n wɔ su, yɛ be ɲin kpɛ alaka’n i tre’n su.+

10 I sin’n, ɔ fali akasia waka yoli tabli kun.+ I tɛnndɛn nun’n ti kude nɲɔn, i tɛtrɛ nun’n ti kude kun, yɛ i nglonglo su’n ti kude kun nin sin.+ 11 Ɔ fali sika ɔkwlɛ jrɛiin kɛtɛli i wun, yɛ ɔ fali sika ɔkwlɛ yoli i nuan su tɛɛn sin yiali nun. 12 I sin’n, ɔ yoli i nuan su’n i nglonglo sin yiali nun, ɔ ti palmun kun,* kpɛkun ɔ fali sika ɔkwlɛ yoli i nuan su tɛɛn sin yiali nun. 13 I sin ekun’n, ɔ kloli sika ɔkwlɛ yoli tabli’n i nga nnan, kpɛkun ɔ fa be sieli i tabli’n i cɔnjɔ nnan’m be su, kɛ nga i ja nnan’m be tata lɛ’n. 14 Nga mun be mantan tabli’n i nuan su nglonglo’n. Be nun yɛ bé fá waka floloflolo mun bé wlá naan b’a fa sua tabli’n niɔn. 15 I sin’n, ɔ sɛli akasia waka floloflolo wie mun, yɛ ɔ fali sika ɔkwlɛ katali be wun naan be fa sua tabli’n. 16 Ɔ fali sika ɔkwlɛ jrɛiin yoli tabli’n i wun ninnge mun: I asiɛti mun, nin i klowa mun, ɔ nin i kpongbo mun nin ondoman mɔ bé fá nzan nun bé gúɛ i tɛ yiwlɛ’n su bé mán Ɲanmiɛn’n.+

17 I sin’n, ɔ fali sika ɔkwlɛ jrɛiin yoli kannin siewlɛ kun.+ Ɔ fali maato boli sika ɔkwlɛ’n naan w’a yo. I bo’n nin i afiɛn’n, nin i sama mun, nin i nɲrɛ mun, nin i nɲrɛ’m be kpɔlɛ mun, nin i nɲrɛ’m be bo’m be kwlaa be sa su kunngba.+ 18 Kannin siewlɛ’n i sama nsiɛn’m be tɛtɛ i afiɛn’n su, i sama nsan o i bue kun su, yɛ nsan o i bue kun’n su lɔ. 19 I nɲrɛ nsan mɔ be ti kɛ amandie nɲrɛ sa’n be o i sama nga be o i bue kun su’n be kwlaa be su. I nɲrɛ’m be kpɔlɛ mun nin i nɲrɛ’m be bo’m be toto nun. Ɔ yoli i kunngba’n i sama akpasua nga be o i bue kun lɔ’n be kwlaa be su wie. I sɔ yɛ ɔ yoli kannin siewlɛ’n i sama nsiɛn mun-ɔn. 20 Kannin siewlɛ’n i afiɛn’n su’n, i nɲrɛ nnan mɔ be ti kɛ amandie nɲrɛ sa’n be o lɛ. I nɲrɛ’m be kpɔlɛ mun nin i nɲrɛ’m be bo mun be toto nun. 21 I nɲrɛ’n i kpɔlɛ kun o i sama klikli nɲɔn nga be o i afiɛn’n su’n be bo lɛ. Kpɛkun i nɲrɛ’n i kpɔlɛ kun ekun o i sama nɲɔn nga be su klikli liɛ’m be su’n be bo lɛ, yɛ i nɲrɛ’n i kpɔlɛ kun ekun o i sama nɲɔn nga be su kun’m be su’n be bo lɛ, afin kannin siewlɛ’n i sama nsiɛn mun be tɛtɛ i afiɛn’n su. 22 Kannin siewlɛ’n i nɲrɛ’m be kpɔlɛ mun nin i sama mun nin kannin siewlɛ’n i wunmuan’n be sa su kunngba. Be fali maato boli sika ɔkwlɛ jrɛiin yɛ be fa yoli-ɔ. 23 I sin’n, ɔ fali sika ɔkwlɛ jrɛiin yoli i su kannin nso mun,+ nin i pɛnsi mun,* nin i sin guawlɛ mun. 24 Ɔ fali sika ɔkwlɛ jrɛiin talan kun* yɛ ɔ fa yoli kannin siewlɛ’n nin i wun ninnge’m be kwlaa-ɔ.

25 Ɔ fali akasia waka yoli tɛ yiwlɛ nga be yra ansan su’n.+ I bue nnan’m be sɛ. I tɛnndɛn nun’n ti kude kun, i tɛtrɛ nun’n ti kude kun, yɛ i nglonglo su’n ti kude nɲɔn. Ɔ nin i su nnɛn wɛ’m be sa su kunngba.+ 26 Ɔ fali sika ɔkwlɛ jrɛiin kɛtɛli i wun. Ɔ fa kɛtɛli i ti su nglo, ɔ fa kɛtɛli i wun sin yiali nun, ɔ fa katali nnɛn wɛ’m be wun. Kpɛkun ɔ fali sika ɔkwlɛ yoli i nuan su tɛɛn sin yiali nun. 27 Ɔ fali sika ɔkwlɛ yoli tɛ yiwlɛ’n i nga nɲɔn. Ɔ fa be tɛtɛli i i nuan su’n i bo lɛ, ɔ yoli be i bue nɲɔn’m be su, naan be fa waka floloflolo mun be wla be nun be fa sua tɛ yiwlɛ’n. 28 I sin’n, ɔ sɛli akasia waka floloflolo wie mun, kpɛkun ɔ fali sika ɔkwlɛ katali be wun. 29 Asa ekun’n, ɔ yoli be ti su gualɛ ngo m’ɔ ti Ɲanmiɛn liɛ klonglo’n+ ɔ nin ansan fanninfannin+ m’ɔ ti sanwun’n, ɔ sanngannin be nun kpa.

38 Ɔ fali akasia waka yoli tɛ yiwlɛ nga i su yɛ bé yí tɛ nga kɛ bé yí’n be yra nnɛn’n i kɔlikɔli’n. I bue nnan’m be sɛ, i tɛnndɛn nun’n ti kude nnun,* i tɛtrɛ nun’n ti kude nnun, yɛ i nglonglo su’n ti kude nsan.+ 2 I sin’n, ɔ yoli i nnɛn wɛ mun i cɔnjɔ nnan’m be su. Nnɛn wɛ’m be nin tɛ yiwlɛ’n be sa su kunngba. Kpɛkun ɔ fali aaba kɛtɛli i wun.+ 3 I sin’n, ɔ yoli tɛ yiwlɛ’n i wun ninnge’m be kwlaa: So mun, nin peli mun, nin kpongbo mun, nin atiɛ je mun, nin sin guawlɛ mun. Ɔ fali aaba yoli tɛ yiwlɛ’n i wun ninnge’m be kwlaa. 4 Ɔ fali aaba yoli tɛ yiwlɛ’n i gliazi kun, kpɛkun ɔ fa sieli i tɛ yiwlɛ’n i nuan su nglonglo’n i bo lɛ, i afiɛn sɛsɛ. 5 Ɔ yoli nga nnan fa tɛtɛli i tɛ yiwlɛ’n i cɔnjɔ nnan’m be su, ɔ fa tɛtɛli i aaba gliazi’n i wun koko lɛ naan be fa waka floloflolo mun be wlawla be nun. 6 I sin’n, ɔ sɛli akasia waka floloflolo wie mun, kpɛkun ɔ fali aaba katali be wun. 7 Ɔ fali waka floloflolo mun wlɛwlɛli i nga mɔ be o tɛ yiwlɛ’n i wun’n be nun naan be fa sua. Ɔ fali waka paplaapla yoli tɛ yiwlɛ’n. Kunman o tɛ yiwlɛ sɔ’n i klun.

8 I sin’n, ɔ fali aaba yoli kpongbo dan’n+ nin i takawlɛ’n. Bla nga be siesieli be naan be di junman tannin sua mɔ Ɲanmiɛn yi i wun nglo nun’n i anuan’n nun lɛ’n, ɔ fali be niannun mun yɛ ɔ fa yoli-ɔ.

9 I sin’n, ɔ yoli awlo klun’n.+ Ɔ fali lɛn kplɔkɔɔ mɔ be cisannin’n yoli awlo klun’n i bue nga i ɲin kpɛ ngua lɔ’n i rido mun. I bue sɔ’n i tɛnndɛn nun’n ti kude ya kun (100).+ 10 Be ja’m be ti ablaɔn (20), yɛ be takatakawlɛ’m be ti ablaɔn (20), aaba yɛ ɔ fa yoli be-ɔ. Be ja’m be ase tralɛ ninnge mun nin be nun sɔtɔsɔtɔlɛ ninnge’m* be ti sika. 11 Rido nga be kpɛ nglo lɔ lika’n nun’n be tɛnndɛn nun’n ti kude ya kun (100) wie. Be ja’m be ti ablaɔn (20) yɛ be takatakawlɛ’m be ti ablaɔn (20), aaba yɛ ɔ fa yoli be-ɔ. Be ja’m be ase tralɛ ninnge mun, ɔ nin be nun sɔtɔsɔtɔlɛ ninnge’m* be ti sika. 12 Sanngɛ rido nga be ɲin kpɛ wia atɔliɛ lɔ’n, be tɛnndɛn nun’n ti kude ablenun (50). Be ja’m be ti blu, yɛ be takatakawlɛ’m be ti blu. Be ja’m be ase tralɛ ninnge mun nin be nun sɔtɔsɔtɔlɛ ninnge’m* be ti sika. 13 I bue nga i ɲin kpɛ wia afiliɛ lɔ’n i tɛtrɛ nun’n ti kude ablenun (50). 14 I bue kun su’n, rido’m be ti kude blu-nin-nnun (15), be ja’m be ti nsan yɛ be takatakawlɛ’m be ti nsan. 15 Awlo klun’n i bue uflɛ su’n, lika nga i anuan’n o lɛ’n, rido’m be ti kude blu-nin-nnun (15), be ja’m be ti nsan yɛ be takatakawlɛ’m be ti nsan. 16 Ɔ fali lɛn kplɔkɔɔ mɔ be cisannin’n yɛ ɔ fa yoli awlo klun’n i rido’m be kwlaa-ɔ. 17 Aaba yɛ ɔ fa yoli be ja’m be takatakawlɛ mun-ɔn. Be ja’m be ase tralɛ ninnge mun, ɔ nin be nun sɔtɔsɔtɔlɛ ninnge’m* be ti sika. Awlo klun’n i ja’m be kwlaa be ase tralɛ ninnge’m be ti sika.+

18 Ɔ fali jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n, ɔ wɔli be, kpɛkun ɔ fa yoli awlo klun’n i anuan’n nun rido’n. I tɛnndɛn nun’n ti kude ablaɔn (20), i nglonglo su’n ti kude nnun. I nglonglo su’n nin awlo klun’n i rido mun be sɛ.+ 19 Aaba yɛ ɔ fa yoli i ja nnan mun nin be takatakawlɛ nnan mun-ɔn. I ja’m be ase tralɛ ninnge mun, ɔ nin be nun sɔtɔsɔtɔlɛ ninnge mun* be ti sika. Ɔ fali sika kɛtɛli i ja’m be ti su nglo lɔ’n be wun. 20 Tannin sua’n nin awlo klun’n be nun kpɛngbɛ’m be kwlaa be ti aaba.+

21 Tannin sua’n, yɛle kɛ Aenguɛ’n* i tannin sua’n+ i nun ninnge’m be kwlaa be nuan’n yɛ. Moizi yɛ ɔ seli Levifuɛ’m be kɛ be ka ninnge sɔ mun-ɔn,+ kpɛkun Itamaa+ m’ɔ ti Ɲanmiɛn ɲrun jranfuɛ Aarɔn i wa’n yɛ ɔ niannin junman sɔ’n su-ɔ. 22 Bezalɛli+ m’ɔ ti Uri i wa’n, ɔ yoli like kwlaa nga Zoova seli Moizi kɛ be yo’n. Uri sɔ’n, ɔ ti Ur m’ɔ fin Zida akpasua’n su’n i wa. 23 Sran ng’ɔ ukɛli i su’n yɛle Ooliabu+ m’ɔ ti Aisamaki m’ɔ fin Dan akpasua’n su’n i wa’n. Ɔ ti ajuin difuɛ yɛ ɔ yi ninnge’m be nun desɛn, ɔ to jese ble, nin jese ɔkwlɛ kankan, nin jese ɔkwlɛ bioun, nin lɛn kplɔkɔɔ mɔ be cisannin’n.

24 Sika ɔkwlɛ’n i kwlaa nga be fa dili Ɲanmiɛn sua’n i nun junman’n, ɔ nin sika ɔkwlɛ nga be toto be mannin Ɲanmiɛn’n be sɛ,+ ɔ ti talan ablaɔn-nin-ngwlan (29),* ɔ nin sikli ya nso ablasan (730),* Ɲanmiɛn sua nun lɔ sikli liɛ’n* yɛ be niannin su be sunnzunnin-ɔn. 25 Sika nga be nga be klɛli be dunman’n be yili’n, ɔ ti talan ya kun (100), ɔ nin sikli akpi kun ya nso ableso-nin-nnun (1.775). Ɲanmiɛn sua nun lɔ sikli liɛ’n* yɛ be niannin su be sunnzunnin-ɔn. 26 Sikli sin kun nga be nga be klɛli be dunman’n be tinuntinun be yili’n, be niannin Ɲanmiɛn sua nun lɔ sikli sin kun’n* i su yɛ be sunnzunnin-ɔn. Be nga be le afuɛ ablaɔn (20) annzɛ afuɛ ablaɔn (20) tra su mɔ be klɛli be dunman’n,+ be ti sran akpiakpi ya nsiɛn akpi nsan ya nnun ablenun (603.550).+

27 Ɔ kloli sika talan ya kun (100) yɛ ɔ fa yoli rido’n i ja’m be takatakawlɛ mun-ɔn. Ɔ fali sika talan ya kun (100) fa yoli rido’n i ja takatakawlɛ ya kun (100). Ɔ fali talan kun yoli rido’n i ja takawlɛ kun.+ 28 Ɔ fali sika sikli akpi kun ya nso ableso-nin-nnun (1.775) ng’ɔ kali’n fa yoli rido’n i ja’m be ase tralɛ ninnge mun, ɔ fali sika katali be ti su nglo, kpɛkun ɔ fa be sasali su.

29 Aaba nga be fa mannin Ɲanmiɛn’n,* ɔ ti talan ableso (70), ɔ nin sikli akpi nɲɔn ya nnan (2.400). 30 Ɔ fa yoli tannin sua mɔ Ɲanmiɛn yi i wun nglo nun’n i anuan’n i ja’m be takatakawlɛ mun, nin aaba tɛ yiwlɛ’n, nin i aaba gliazi’n, ɔ nin tɛ yiwlɛ’n i wun ninnge’m be kwlaa. 31 Ɔ fa wie yoli awlo klun’n i ja’m be takatakawlɛ, nin awlo klun’n i anuan’n i ja’m be takatakawlɛ, ɔ nin tannin sua’n i kpɛngbɛ’m be kwlaa, nin awlo klun’n i wun kpɛngbɛ’m be kwlaa.+

39 Be fali jese ble, nin jese ɔkwlɛ kankan, nin jese ɔkwlɛ bioun+ be fa wuli tralɛ nglanman wie mun mɔ bé fá dí junman Ɲanmiɛn sua’n nun lɔ’n. Be yoli Aarɔn i tralɛ mɔ be ti Ɲanmiɛn liɛ klonglo’n,+ kɛ nga Zoova kan kleli Moizi’n sa.

2 Ɔ fali sika ɔkwlɛ nin jese ble nin jese ɔkwlɛ kankan, ɔ nin jese ɔkwlɛ bioun ɔ nin lɛn kplɔkɔɔ mɔ be cisannin’n fa yoli efɔdu’n.+ 3 Be fali maato boli sika ɔkwlɛ, ɔ yoli fɛtɛfɛtɛ kpa. Ɔ kpɛkpɛli nun tiaantiaan, ɔ fa flɛnflɛnnin i jese ble’n nin jese ɔkwlɛ kankan’n, ɔ nin jese ɔkwlɛ bioun’n, ɔ nin lɛn kplɔkɔɔ’n be nun, kpɛkun ɔ fa yili efɔdu’n nun desɛn. 4 Be yoli tralɛ’n i bue nga be sin be wati’n su’n, kpɛkun be sali be su, be sali be su i tiwa nɲɔn’m be su nglo lɔ. 5 Cisu* nga be wuli’n mɔ be fa ci efɔdu’n su naan b’a trɛ i ase’n,+ be fali ninnge kunngba mun yɛ be yoli-ɔ. Be fali sika ɔkwlɛ, nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ mɔ be cisannin’n yɛ be fa yoli-ɔ, kɛ nga Zoova kan kleli Moizi’n sa.

6 Be fali sika ɔkwlɛ be cili oniksi yɔbuɛ’m be wun, kpɛkun be klɛli Izraɛli i mma’m be dunman su, kɛ nga be fa nzɔliɛ be sie i like kekleke kun su’n sa.+ 7 Ɔ fali be sieli i efɔdu’n i bue nga be sin be wati’n su’n be su, naan be yo Izraɛli i mma’m be wla kpɛnlɛ yɔbuɛ,+ kɛ nga Zoova kan kleli Moizi’n sa. 8 I sin’n, ɔ fali sika ɔkwlɛ nin jese ble, nin jese ɔkwlɛ kankan, nin jese ɔkwlɛ bioun, ɔ nin lɛn kplɔkɔɔ mɔ be cisannin’n,+ ɔ fa yili be wue nun pɔsu’n+ i nun desɛn kɛ ng’ɔ fa yoli efɔdu’n i liɛ’n sa. 9 Kɛ be bu nun nɲɔn’n, i bue nnan’m be sɛ. Be wue nun pɔsu nga be yoli’n, kɛ be bu nun nɲɔn’n i tɛnndɛn nun’n nin i tɛtrɛ nun’n ti anpan kun.* 10 Be tatali nun yɔbuɛ kpakpa ɲanman nnan. Be fali yɔbuɛ nga be flɛ i kɛ ribi’n nin topazi’n nin emerodu’n be yoli i ɲanman klikli’n. 11 Be fali tikuazi, nin safii nin zaspu be yoli i ɲanman nɲɔn su’n. 12 Be fali lesɛmun,* nin agati nin ametisi be yoli i ɲanman nsan su’n. 13 Kpɛkun be fali klizoliti nin oniksi nin zadi be yoli i ɲanman nnan su’n. Be fali sika ɔkwlɛ be cili be wun. 14 Izraɛli i mma blu-nin-nɲɔn (12) mun be dunman o yɔbuɛ’m be su. Be klɛli be dunman’n kɛ nga be fa nzɔliɛ be sie i like kekleke kun su’n sa. Dunman kun ti Izraɛli akpasua blu-nin-nɲɔn (12) mun be nun kun i nzɔliɛ, dunman kun ti Izraɛli akpasua blu-nin-nɲɔn (12) mun be nun kun i nzɔliɛ.

15 Be fali sika ɔkwlɛ jrɛiin yoli be wue nun pɔsu’n su jrɔkɔ wie mun. Be wɔli be kɛ ɲanman sa.+ 16 Be fali sika ɔkwlɛ be yoli yɔbuɛ wun cilɛ like nɲɔn nin nga nɲɔn. Kpɛkun be fali nga nɲɔn mun tɛtɛli i be wue nun pɔsu’n i cɔnjɔ nɲɔn’m be su. 17 I sin’n, be fali sika ɔkwlɛ ɲanman nɲɔn’n wlɛli i nga nɲɔn mɔ be o be wue nun pɔsu’n i cɔnjɔ’m be su’n be nun. 18 I sin’n, be fali ɲanman nɲɔn’m be ti nɲɔn mun wlɛli i yɔbuɛ’m be wun cilɛ ninnge nɲɔn’m be nun. Kpɛkun be fa be cicili i efɔdu’n i bue ng’ɔ sin be wati’n su’n i ɲrun wa. 19 I sin’n, be fali sika ɔkwlɛ yoli nga nɲɔn, yɛ be fa be sieli i be wue nun pɔsu’n i bue ng’ɔ o i bo m’ɔ kpɛ efɔdu’n su lɔ’n i tiwa nɲɔn’n be su.+ 20 I sin’n, be fali sika ɔkwlɛ yoli nga nɲɔn ekun, be fa be sieli efɔdu’n i ɲrun, i bue ng’ɔ sin be wati nɲɔn’m be su’n i ja ngua, i ngbaliɛ’n i wun lɛ, efɔdu’n i su cisu* nga be wuli’n i ti su nglo. 21 I agualiɛ su’n, be fali ɲanman ble kun be trali be wue nun pɔsu’n i ase. Be fali ɲanman’n be wlɛli i be wue nun pɔsu’n i nga mun nin efɔdu’n i nga liɛ’m be nun. I liɛ’n, be wue nun pɔsu’n ɔ́ kɛ́ i osu’n nun efɔdu’n su, cisu* nga be wuli’n i ti su nglo, kɛ nga Zoova kan kleli Moizi’n sa.

22 Ɔ fali jese ble ngunmin yoli tralɛ tɛnndɛn m’ɔ leman sa’n mɔ be fa wlɛ i efɔdu’n i bo’n. Tannin wufuɛ kun yɛ ɔ yoli-ɔ.+ 23 Tralɛ tɛnndɛn m’ɔ leman sa’n i lika nga be wla be ti’n, ɔ o i afiɛn sɛsɛ. I kɔmin nun’n ti kɛ sonja’m be tralɛ’n i kɔmin nun’n sa. Be buli be ti wlawlɛ’n i nuan sin yiali nun, kɛ ɔ ko yo naan w’a timan’n ti. 24 I sin’n, be fali jese ble nin jese ɔkwlɛ kankan nin jese ɔkwlɛ bioun, kpɛkun be cisannin be fa yoli grenadie mma wie mun tralɛ tɛnndɛn m’ɔ leman sa’n i nuan su sin yiali nun. 25 Be fali sika ɔkwlɛ jrɛiin yoli gleinglein mun, kpɛkun be fali gleinglein mun be wlawlali grenadie mma nga be o tralɛ tɛnndɛn m’ɔ leman sa’n i nuan su’n be afiɛn. 26 Kɛ be sie gleinglein kun’n be sie grenadie mma kun i wun lɛ, kɛ be sie gleinglein kun’n be sie grenadie mma kun i wun lɛ. Be yoli i sɔ tralɛ tɛnndɛn m’ɔ leman sa’n, mɔ be fa di Ɲanmiɛn junman’n i nuan su sin yiali nun, kɛ nga Zoova kan kleli Moizi’n sa.

27 Be fali lɛn kplɔkɔɔ be yoli Aarɔn nin i mma’m be tralɛ tɛnndɛn mun. Tannin wufuɛ kun yɛ ɔ yoli be-ɔ.+ 28 Be fali lɛn kplɔkɔɔ be yoli tannin tanmue nga be fa cici be ti’n,+ be fali lɛn kplɔkɔɔ be yoli be ti kle’n,+ be fali lɛn kplɔkɔɔ mɔ be cisannin’n be yoli lɛn cɛkoto mun.+ 29 Be fali lɛn kplɔkɔɔ mɔ be cisannin’n, ɔ nin jese ble, nin jese ɔkwlɛ kankan ɔ nin jese ɔkwlɛ bioun be fa wuli cisu’n, kɛ nga Zoova kan kleli Moizi’n sa.

30 I agualiɛ su’n, be fali sika ɔkwlɛ jrɛiin be yoli like paplapa m’ɔ bo mianmian’n. Ɔ ti nzɔliɛ kun m’ɔ kle kɛ b’a fa be wun b’a man Ɲanmiɛn-ɔn. Be klɛli su kɛ nga be fa nzɔliɛ be sie i like kekleke kun su’n sa, be klɛli su kɛ: “Sanwun yolɛ’n ti Zoova liɛ.”+ 31 Be fali jese ble be yoli ɲanman kun fa trɛli i ase tannin tanmue’n su, kɛ nga Zoova kan kleli Moizi’n sa.

32 Ɔ maan Ɲanmiɛn i tannin sua’n, mɔ yɛle tannin sua mɔ Ɲanmiɛn yi i wun nglo nun’n i wun junman’n i kwlaa wieli. Izraɛlifuɛ’m be yoli like kwlaa nga Zoova seli Moizi kɛ be yo’n.+ Be niannin su be yoli i sɛsɛsɛ.

33 I sin’n, be fali tannin sua’n+ be ko mannin Moizi, tannin tanmue mun+ nin tannin sua’n i wun ninnge’m be kwlaa: I aglafu mun,+ i kadri mun,+ i kadri’m be su jajalɛ waka mun,+ i ja mun nin i ja’m be takatakawlɛ mun,+ 34 i su katalɛ like mɔ be fali bua ɲin kplo nga be kɛnnin i ayre ɔkwlɛ be yoli’n,+ i su katalɛ like mɔ be fali nzue nun nnɛn nga be flɛ i fɔku’n i kplo be yoli’n, rido ng’ɔ kpɛ tannin sua’n nun’n,+ 35 Mmla’n* i alaka’n, ɔ nin i waka floloflolo mun+ nin i tre’n,+ 36 nin tabli’n, ɔ nin i wun ninnge’m be kwlaa,+ ɔ nin kpanwun nga be fa man Ɲanmiɛn’n, 37 kannin siewlɛ mɔ be fali sika ɔkwlɛ jrɛiin yoli’n, i kannin+ mɔ be lɔngɔ su’n, ɔ nin i wun ninnge’m be kwlaa+ nin kannin nuan sɔlɛ ngo’n,+ 38 nin tɛ yiwlɛ+ mɔ be fali sika ɔkwlɛ be yoli’n, nin be ti su gualɛ ngo’n,+ nin ansan fanninfannin’n,+ nin tannin sua’n i anuan’n nun rido’n,+ 39 nin tɛ yiwlɛ mɔ be fali aaba be yoli’n+ nin aaba gliazi’n, nin i waka floloflolo mun,+ nin i wun ninnge’m be kwlaa,+ ɔ nin kpongbo dan’n nin i takawlɛ’n,+ 40 nin awlo klun’n i rido mun, nin i ja mun, nin i ja’m be takatakawlɛ mun,+ nin awlo klun’n i anuan’n nun rido’n,+ nin i ɲanman mun, nin i kpɛngbɛ mun,+ ɔ nin ninnge kwlaa nga bé fá dí junman Ɲanmiɛn i tannin sua mɔ yɛle tannin sua mɔ Ɲanmiɛn yi i wun nglo nun’n i nun lɔ’n, 41 nin Ɲanmiɛn i sua’n nun lɔ junman dilɛ tralɛ mɔ be wuli be klanman kpa’n, nin Ɲanmiɛn ɲrun jranfuɛ Aarɔn i tralɛ mɔ be ti Ɲanmiɛn liɛ klonglo’n,+ nin i mma’m be tralɛ mɔ bé fá dí Ɲanmiɛn ɲrun jranlɛ junman’n.

42 Junman kwlaa nga Zoova seli Moizi kɛ be di’n, Izraɛlifuɛ’m be niɛnnin i kwlaa su be dili.+ 43 Kɛ Moizi niannin be junman’n, ɔ wunnin kɛ be yoli i sɛsɛsɛ kɛ nga Zoova kannin’n sa, ɔ maan Moizi boli muae mannin be.

40 I sin’n, Zoova seli Moizi kɛ: 2 “Anglo klikli’n i cɛn ba klikli’n su’n, ɔ fata kɛ a kplan Ɲanmiɛn i tannin sua’n, mɔ yɛle tannin sua mɔ Ɲanmiɛn yi i wun nglo nun’n.+ 3 Fa Mmla’n* i alaka’n sie nun,+ kpɛkun fa rido’n kata Alaka’n i ɲrun.+ 4 Fa tabli’n+ fa sie nun lɔ, kpɛkun siesie i wun ninnge mun. Fa kannin siewlɛ’n sie nun lɔ,+ yɛ sɔ i kannin’m be nuan.+ 5 Fa tɛ yiwlɛ nga be fali sika ɔkwlɛ yoli mɔ be yra ansan su’n+ sie i Mmla’n* i alaka’n i ɲrun. Kpɛkun sie tannin sua’n i anuan’n i nun rido’n.+

6 “Fa tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ sie i Ɲanmiɛn i tannin sua’n, mɔ yɛle tannin sua mɔ Ɲanmiɛn yi i wun nglo nun’n i anuan’n i ɲrun. 7 Fa kpongbo dan’n sie i tannin sua mɔ Ɲanmiɛn yi i wun nglo nun’n, ɔ nin tɛ yiwlɛ’n be afiɛn’n nun, kpɛkun gua nun nzue.+ 8 I sin’n, yo i awlo klun’n,+ yɛ sie awlo klun’n i anuan’n i nun rido’n.+ 9 I sin’n, fa be ti su gualɛ ngo’n+ naan fa gua Ɲanmiɛn i tannin sua’n nin i nun ninnge’m be kwlaa be su,+ kpɛkun yo tannin sua’n nin i ninnge’m be kwlaa be sanwun. I liɛ’n, ɔ́ káci Ɲanmiɛn liɛ klonglo. 10 Ɔ fata kɛ a fa ngo gua tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n, ɔ nin i ninnge’m be kwlaa be su, yo tɛ yiwlɛ’n i sanwun. I liɛ’n, ɔ́ káci tɛ yiwlɛ ngunmin kun m’ɔ ti Ɲanmiɛn liɛ klonglo’n.+ 11 Gua kpongbo dan’n nin i takawlɛ’n be su ngo, yɛ yo i sanwun.

12 “I sin’n, fa Aarɔn nin i mma mun wunnge tannin sua mɔ Ɲanmiɛn yi i wun nglo nun’n i anuan’n i wun lɔ, kpɛkun fa nzue wunnzin be.+ 13 Fa tralɛ mɔ be ti Ɲanmiɛn liɛ klonglo’n wla Aarɔn i wun,+ guɛ i ti su ngo+ yɛ yo i sanwun naan ɔ di Ɲanmiɛn ɲrun jranlɛ junman’n man min. 14 I sin’n, fɛ i mma mun bla naan fa tralɛ tɛnndɛn mun wla be wun.+ 15 Gua be ti su ngo kɛ nga a fa guali be si i ti su ngo’n sa,+ naan be di Ɲanmiɛn ɲrun jranlɛ junman’n be man min. Ngo sɔ mɔ á fá gúa be ti su’n ti’n, be nin be osu’n nunfuɛ mun bé káci Ɲanmiɛn ɲrun jranfuɛ tititi.”+

16 Moizi yoli like kwlaa nga Zoova seli i kɛ ɔ yo’n.+ Ɔ niannin su yoli i sɛsɛsɛ.

17 Afuɛ nɲɔn’n su’n, i anglo klikli’n i cɛn ba klikli’n su’n, be kplannin tannin sua’n.+ 18 Kɛ Moizi kplannin tannin sua’n, ɔ siesieli i ja takatakawlɛ mun,+ ɔ jrɛnjrɛnnin i kadri’m be nglo,+ ɔ siesieli i kadri’m be su jajalɛ waka mun,+ ɔ nin i ja mun. 19 Ɔ fali tannin sua’n i tannin’n+ sieli su, kpɛkun ɔ fali tannin’n i su katalɛ like’n+ katali su, kɛ nga Zoova kan kleli i’n sa.

20 Kɛ ɔ yoli sɔ’n, ɔ fali yɔbuɛ paplaapla mɔ Mmla’n* wo su’n,+ kpɛkun ɔ fa sieli i Alaka’n+ nun. Ɔ fali waka floloflolo mun+ wlɛwlɛli i Alaka’n i wun, kpɛkun ɔ fali Alaka’n+ i tre’n+ katali su. 21 Ɔ fali Alaka’n ɔli tannin sua’n nun lɔ, kpɛkun ɔ sieli rido+ ng’ɔ kpɛ Alaka’n i ɲrun’n, ɔ fa katali Mmla’n* i alaka’n+ i ɲrun, kɛ nga Zoova kan kleli i’n sa.

22 I sin’n, ɔ fali tabli’n+ sieli i tannin sua mɔ Ɲanmiɛn yi i wun nglo nun’n i nun, tannin sua’n i bue ng’ɔ o nglo lɔ lika’n nun’n i nun, rido’n i ɲrun wa. 23 Ɔ fali kpanwun mun+ siesieli i tabli’n su Zoova ɲrun, kɛ nga Zoova kan kleli i’n sa.

24 Ɔ fali kannin siewlɛ’n+ sieli i tannin sua mɔ Ɲanmiɛn yi i wun nglo nun’n i nun, tannin sua’n i bue nga i ɲin kpɛ ngua lɔ lika’n su’n i nun, tabli’n i ɲrun lɛ. 25 Ɔ sɔli kannin mun+ Zoova i ɲrun, kɛ nga Zoova kan kleli i’n sa.

26 I sin’n, ɔ fali tɛ yiwlɛ nga be fali sika ɔkwlɛ yoli’n+ fa sieli i tannin sua mɔ Ɲanmiɛn yi i wun nglo nun’n i nun, rido’n i ɲrun lɛ, 27 naan be yra su+ ansan fanninfannin,+ kɛ nga Zoova kan kleli i’n sa.

28 I sin’n ɔ sieli tannin sua’n i anuan’n nun rido’n.+

29 Ɔ fali tɛ yiwlɛ nga i su yɛ be yi tɛ nga kɛ bé yí’n be yra nnɛn’n i kɔlikɔli’n+ fa sieli i Ɲanmiɛn i tannin sua mɔ yɛle tannin sua mɔ Ɲanmiɛn yi i wun nglo nun’n i anuan’n nun lɛ, naan be yi su tɛ nga kɛ bé yí’n be yra nnɛn’n i kɔlikɔli’n,+ naan be fa ble annzɛ i wunsu like nga be fa man Ɲanmiɛn’n be sie su, kɛ nga Zoova kan kleli Moizi’n sa.

30 I sin’n, ɔ fali kpongbo dan’n fa sieli i tannin sua mɔ Ɲanmiɛn yi i wun nglo nun’n, ɔ nin tɛ yiwlɛ’n be afiɛn’n nun, kpɛkun ɔ guali nun nzue. Ɔ ti wunnzinlɛ liɛ.+ 31 Moizi, ɔ nin Aarɔn nin i mma’m be wunnzinnin be sa nin be ja’m be wun lɛ. 32 Blɛ kwlaa nga bé wlú tannin sua mɔ Ɲanmiɛn yi i wun nglo nun’n i nun’n, annzɛ bé mántan tɛ yiwlɛ’n, be wunnzin,+ kɛ nga Zoova kan kleli Moizi’n sa.

33 I agualiɛ su’n, ɔ sisili tannin sua’n nin tɛ yiwlɛ’n be wun fa yoli awlo klun’n,+ kpɛkun ɔ sieli rido’n awlo klun’n i anuan’n nun.+

Ɔ maan Moizi wieli junman’n i di. 34 Kpɛkun ɲanmiɛn ble’n katali tannin sua mɔ Ɲanmiɛn yi i wun nglo nun’n su, Zoova i aɲrunɲan’n deli tannin sua’n.+ 35 Moizi w’a kwlá wluman tannin sua mɔ Ɲanmiɛn yi i wun nglo nun’n i nun, afin ɲanmiɛn ble’n te kata su, yɛ Zoova i aɲrunɲan’n fali tannin sua’n.+

36 Kan kwlaa nga be ju lɛ’n, kɛ ɲanmiɛn ble’n jaso tannin sua’n su’n, Izraɛlifuɛ’m be tu be bo.+ 37 Sanngɛ sɛ ɲanmiɛn ble’n tumɛn i bo’n, be ka lɛ lele saan w’a tu i bo.+ 38 Afin kan kwlaa nga be ju lɛ’n, Zoova i ɲanmiɛn ble’n tran tannin sua’n su nglɛmun. Kpɛkun nnɔsua’n, sin kun tran tannin sua’n i ti su nglo Izraɛlifuɛ’m be kwlaa be ɲrun lɛ.