NEEMIN

1 Akalia i wa Neemin*+ i ndɛ’n yɛ: Afuɛ ablaɔn (20) su’n, Kisilɛvu* anglo’n nun’n, nn n wo Sizi+ m’ɔ ti famiɛn klɔ’n* su lɔ. 2 Blɛ sɔ’n nun’n, Ananin+ m’ɔ ti min niaan’m be nun kun’n, ɔ nin sran wie’m be fin Zida bali. N usali Zifu nga be sali be sin’n+ be osu be sa nun. Yɛ n usali be Zerizalɛmun klɔ’n i su ndɛ wie. 3 Be seli min kɛ: “Be nga be sali be sin’n mɔ be o nvle’n nun lɔ’n, be o ɲrɛnnɛn nun, yɛ be ɲin w’a gua ase.+ Zerizalɛmun klɔ’n i wun talɛ mun b’a bubu,+ yɛ be wɔli i anuan’m be nun.”+

4 Kɛ n tili ndɛ sɔ’n cɛ’n, n trannin ase n sunnin, n trannin awlabɔɛ nun cɛn kpanngban. N cili nglɛmun,+ yɛ n srɛli Ɲanmiɛn m’ɔ o nglo lɔ’n. 5 N seli kɛ: “Ee Zoova, nglo lɔ Ɲanmiɛn, a ti Ɲanmiɛn kun m’ɔ ti dan-ɔn, a yo sro, yɛ a di aenguɛ nga a trali’n su. Be nga be klo wɔ mɔ be nanti ɔ mmla’m be su titi’n, a yi ɔ sran klolɛ dan’n i nglo be lika.+ 6 Yaci, tie ɔ sufuɛ’n i srɛlɛ’n, fa ɔ ɲin sie i ɔ sufuɛ’n i srɛlɛ’n m’ɔ srɛ wɔ andɛ’n su. N srɛ ɔ sufuɛ Izraɛlifuɛ’m be ti wia nun nin kɔnguɛ,+ afin be fɔnnin ɔ wun. E nin min nvlefuɛ mun* e yoli sa tɛ.+ 7 Nanwlɛ, e fɔnnin ɔ wun dan.+ Y’a nantiman ɔ mmla’n, nin ɔ nuan ndɛ’n, ɔ nin afɔtuɛ nga a fa mannin ɔ sufuɛ Moizi’n be su.+

8 “Maan ɔ wla kpɛn ndɛ nga a kan kleli ɔ sufuɛ Moizi’n su. A seli i kɛ: ‘Sɛ amun fɔn min wun’n, ń yó maan amún bó sánndi nvlenvle’m be nun.+ 9 Sanngɛ sɛ amun sa amun sin min wun naan amun fa min mmla’m be su’n, sɛ amun di be su’n, kannzɛ amun bo sanndi nvlenvle’m be nun lele ju ɲanmiɛn’n i tiwa lɔ bɔbɔ’n, ń kó fá amun+ lɔ, yɛ ń fá amun ń bá lika nga n fali naan min dunman’n tran su’n i nun.’+ 10 Be ti ɔ sufuɛ, be ti ɔ nvle’n i nunfuɛ. Wɔ yɛ a fali ɔ sa mɔ wunmiɛn o nun’n, nin ɔ tinmin dan’n fa deli be-ɔ.*+ 11 Ee Zoova, yaci, sie ɔ su tie ɔ sufuɛ’n i srɛlɛ’n, yɛ tie ɔ sufuɛ m’ɔ kunndɛ kpa kɛ ɔ́ sró ɔ dunman’n i srɛlɛ’n. Yaci, yo maan like nga ɔ sufuɛ’n sunnzun’n ɔ yo ye andɛ, yɛ maan famiɛn’n si min aunnvɔɛ.”+

Blɛ sɔ’n nun’n, nn n ti famiɛn’n i nzan sufuɛ.+

2 Kɛ Atazɛɛzɛsi+ kacili famiɛn’n, i afuɛ ablaɔn’n (20) su’n,+ Nizan* anglo’n nun’n, be fali duvɛn be bɛli i ɲrun lɛ. Kpɛkun kɛ titi sa’n, n suli duvɛn’n n fa mannin famiɛn’n.+ Min ɲrun’n nin-a yoman nvuɛnnvuɛn famiɛn’n i ɲrun le. 2 Ɔ maan famiɛn’n usali min kɛ: “?Ngue ti yɛ ɔ ɲrun’n ti nvuɛnnvuɛn sɔ-ɔ? Kusu ɔ wunnɛn yoman ɔ ya. N si kɛ ɔ klun timan jɔwa.” Kɛ ɔ seli sɔ’n, srɛ kunnin min dan kpa.

3 N seli famiɛn’n kɛ: “Maan wie’n wla fi famiɛn’n! ?Ɔ́ yó sɛ naan min klun w’a jɔ? Klɔ nga be sieli min nannan’m be su’n w’a saci mlɔnmlɔn, b’a wɔ i anuan’m be nun!”+ 4 Ɔ maan famiɛn’n usali min kɛ: “?Ngue yɛ a kunndɛ kɛ n yo man wɔ-ɔ?” N ka lɛ n srɛli Ɲanmiɛn m’ɔ o nglo lɔ’n.+ 5 Kpɛkun n seli famiɛn’n kɛ: “Sɛ ɔ ti famiɛn’n i klun su’n, yɛ sɛ ɔ klun jɔ ɔ sufuɛ’n i wun’n, man min atin naan n wɔ Zida, naan n wɔ klɔ nga be sieli min nannan’m be lɔ’n su, naan n ko kplɛn i uflɛ.”+ 6 Kɛ ɔ́ yó sɔ’n, nn famiɛn’n nin i yi’n* yɛ be titi lɛ-ɔ. Famiɛn’n usali min kɛ: “?Cɛn nɲɛ yɛ á kó dí i lɔ-ɔ? ?Yɛ cɛn benin yɛ á sá ɔ sin-ɔn?” Famiɛn’n kplinnin su kɛ n wɔ,+ ɔ maan n kleli i cɛn nga ń dí i lɔ’n.+

7 I sin’n, n seli famiɛn’n kɛ: “Sɛ ɔ ti famiɛn’n i klun su’n, maan be klɛ fluwa be man min naan n fa ko man siefuɛ nga be o Nzue’n i bue kun lɔ’n,*+ naan be man min atin naan n wɔ lele n ju Zida lɔ. 8 Yɛ maan be man min fluwa kun ekun naan n fa ko man Azafu m’ɔ nian famiɛn’n i bo’n su’n, naan ɔ man min waka. Ń má fá waka sɔ mun ń yó Sua Fleiin+ ng’ɔ mantan Ɲanmiɛn Sua’n* i anuan mun, ɔ nin klɔ’n i wun talɛ mun,+ nin sua nga ń trán nun’n.” Famiɛn’n klɛli fluwa mun mannin min,+ afin Ɲanmiɛn i sa kpa’n wo min su.+

9 Kɛ n juli siefuɛ nga be o Nzue’n i bue kun lɔ’n be wun lɔ’n, n fali famiɛn’n i fluwa mun n mannin be. Kɛ ń kɔ́’n, famiɛn’n fali sonja su kpɛn wie mun, nin nnɛn kpanngɔ su fufuɛ wie mun naan be ko sunman min. 10 Kɛ Sanbala+ m’ɔ ti Orɔnfuɛ’n, nin Tobia+ m’ɔ ti Amɔnfuɛ’m+ be junman difuɛ’n,* be tili i kɛ sran kun w’a ba naan ɔ su wa yo like kpa kun fa man Izraɛlifuɛ mun’n, w’a yoman be fɛ kaan sa.

11 Kɛ n juli Zerizalɛmun lɛ’n, n dili cɛn ba nsan. 12 I sin’n, n jasoli kɔnguɛ, e nin sran wie mun. Sanngɛ sa nga Ɲanmiɛn fa wlali min awlɛn’n nun kɛ n yo man Zerizalɛmun klɔ’n, m’an boman su m’an kleman be. Kɛ ń kɔ́’n, m’an faman nnɛn fi, saan nnɛn nga n fu su’n yɛ n fali-ɔ. 13 N sinnin Kongo Anuan’n+ nun n fiteli kɔnguɛ. N sinnin Wuo Dan Nzue Ti’n i ɲrun lɛ n ɔli Nzuɛn Kwle Anuan’n+ i wun lɔ. N ko nianniannin Zerizalɛmun klɔ’n i wun talɛ nga be bubuli i’n, ɔ nin i anuan nga be wɔli be nun’n.+ 14 N ɔli lele n juli Nzue Ti Anuan’n+ nin Famiɛn’n i Nzue Gble’n su lɔ. Sanngɛ atin’n ti kaan ti’n, nnɛn nga n fu su’n w’a kwlá sinman. 15 Ɔ maan n sinnin kongo’n+ nun lɔ kɔnguɛ, n ko nianniannin klɔ’n i wun talɛ’n. Kpɛkun n blili n ma sinnin Kongo Anuan’n nun lɛ n sali min sin.

16 Famiɛn’n i janunfuɛ’m+ be siman lika nga n ɔli’n, yɛ be siman like nga n su yo’n. Afin kɛ ɔ́ yó sɔ’n, nn n nin-a kanman ndɛ fi n nin-a kleman Zifu mun, nin Ɲanmiɛn ɲrun jranfuɛ mun, nin sran dandan mun, nin famiɛn’n i janunfuɛ mun, ɔ nin junman difuɛ onga mun. 17 I agualiɛ su’n, n seli be kɛ: “Amun nian ɲrɛnnɛn m’ɔ o e su-ɔ. Zerizalɛmun klɔ’n w’a saci, b’a wɔ i anuan’m be nun. Amun bla maan e kplan Zerizalɛmun klɔ’n i wun talɛ’m be uflɛ naan e ɲrun ɲannzuɛn’n titi.” 18 I sin’n, n kannin wafa nga min Ɲanmiɛn’n fɛli i sa kpa’n sieli min su’n,+ ɔ nin ndɛ nga famiɛn’n kan kleli min’n,+ be ndɛ n kleli be. Yɛ be seli kɛ: “Maan e jaso naan e kplan.” Ɔ maan be wlali be wiengu fanngan naan be di junman kpa sɔ’n.+

19 Sanngɛ kɛ Sanbala m’ɔ ti Orɔnfuɛ’n, nin Tobia+ m’ɔ ti Amɔnfuɛ’m+ be junman difuɛ’n,* ɔ nin Gesɛmun m’ɔ ti Arabu bian’n+ be tili ndɛ sɔ’n, be srili e,+ yɛ be yoli e finfin. Be seli kɛ: “?Ngue yɛle nga amun su yo i lɛ’n? ?Amun su yo ɲin kekle famiɛn’n i su?”+ 20 Sanngɛ n tɛli be su kɛ: “Ɲanmiɛn m’ɔ o nglo lɔ’n yɛ ɔ́ yó maan like nga e sunnzun kɛ é yó’n, ɔ́ yó ye-ɔ.+ E mɔ e ti i sufuɛ’n, é jáso é kplán. Amun liɛ nunman Zerizalɛmun nun wie. Amun leman atin yoman like fi wa. Bé kán Zerizalɛmun ndɛ’n, be boman amun dunman nun.”+

3 Eliasibu+ m’ɔ ti Ɲanmiɛn ɲrun jranfuɛ dan’n, nin i niaan mun mɔ be ti Ɲanmiɛn ɲrun jranfuɛ’n be jasoli be kplannin Bua Anuan’n.+ Be yoli i sanwun*+ yɛ be wlɛli i anuan mun. Be yoli i sanwun lele juli Mea Sua Fleiin’n+ nin Ananɛli Sua Fleiin’n+ be su lɔ. 2 Be wun koko lɛ’n, Zerikofuɛ mun+ be siesieli talɛ’n i ye wie. Be wun koko lɛ’n, Imri i wa Zakiri siesieli lika’n wie.

3 Asenaa i mma’m be yoli Jue Anuan’n.+ Be siesieli i waka mun,+ be wlɛwlɛli i anuan mun nin i nun tolɛ ninnge mun, kpɛkun be jɛjɛli i sin like. 4 Be wun koko lɛ’n, Akɔzu m’ɔ ti Iri i wa’n, i wa Meremɔti+ siesieli talɛ’n i ye wie. I wun koko lɛ’n, Berekia m’ɔ ti Mesezabɛli i wa’n, i wa Mesulamun+ siesieli talɛ’n i ye wie. Yɛ i wun koko lɛ’n, Baana i wa Zadɔku siesieli talɛ’n i ye wie. 5 Be wun koko lɛ’n, Tekoafuɛ mun+ be siesieli talɛ’n i ye wie. Sanngɛ be nun sran dandan’m b’a loman be wun b’a manman be min mun junman’n i dilɛ nun.

6 Pasea i wa Zoiada, ɔ nin Besodia i wa Mesulamun be siesieli Klɔ Laa Anuan’n+ i ye. Be siesieli i waka mun, be wlali anuan mun, be wlɛwlɛli i nun tolɛ ninnge mun, kpɛkun be jɛjɛli i sin like. 7 Be wun koko lɛ’n, Melatia m’ɔ ti Gabaɔnfuɛ’n+ nin Zadɔn m’ɔ ti Meronɔtifuɛ’n be siesieli talɛ’n i ye. Sran sɔ mɔ be fin Gabaɔnfuɛ nin Mizpa’n,+ Nzue’n+ i bue kun lɔ* lika’n i siefuɛ’n yɛ ɔ nian be su-ɔ. 8 Be wun koko lɛ’n, Araya i wa Uziɛli m’ɔ ti sika ɔkwlɛ ajuin difuɛ’m be nun kun’n, ɔ siesieli talɛ’n i ye wie. I wun koko lɛ’n, Anania m’ɔ ti palifɛn yifuɛ’n ɔ siesieli talɛ’n i ye wie. Be siesieli yɔbuɛ wie mun asiɛ wun Zerizalɛmun klɔ’n nun lele fa juli Talɛ Dan’n+ su lɔ. 9 Be wun koko lɛ’n, Ur i wa Refaya m’ɔ ti Zerizalɛmun asa’n i bue kun su kpɛn’n, ɔ siesieli talɛ’n i ye wie. 10 Be wun koko lɛ’n, Arimafu i wa Zedaia siesieli talɛ’n i ye i bɔbɔ i sua’n i ɲrun lɛ. Yɛ i wun koko lɛ’n, Asabnia i wa Atisi siesieli talɛ’n i ye wie.

11 Arimun+ i wa Malkia, ɔ nin Paati-Moabu+ i wa Asibi be siesieli talɛ’n i bue uflɛ ye, yɛ be siesieli Kpanwun Tɔnwlɛ Fleiin’n+ i ye wie. 12 Be wun koko lɛ’n, Aloɛsi i wa Salɔmun m’ɔ ti Zerizalɛmun asa’n i bue kun su kpɛn’n, ɔ nin i mma bla’m be siesieli talɛ’n i ye wie.

13 Anun nin Zanoafuɛ’m+ be siesieli Kongo Anuan’n+ i ye. Be kplannin yɛ be wlɛli i anuan mun nin i nun tolɛ ninnge mun, kpɛkun be jɛjɛli i sin like. Be siesieli talɛ kude akpi kun* (1.000) ye, be siesieli i ye lele fa juli Nzuɛn Kwle Anuan’n+ su lɔ. 14 Rekabu i wa Malkia m’ɔ ti Bɛti-Akerɛmun+ asa’n i su kpɛn’n, ɔ siesieli Nzuɛn Kwle Anuan’n i ye. Be kplannin, yɛ be wlali anuan mun, be wlɛwlɛli i nun tolɛ ninnge mun, kpɛkun be jɛjɛli i sin like.

15 Koloze i wa Salunun m’ɔ ti Mizpa+ asa’n i su kpɛn’n, ɔ siesieli Nzue Ti Anuan’n+ i ye. Ɔ kplannin, yɛ ɔ tuli su, ɔ wlali anuan mun, ɔ wlɛwlɛli i nun tolɛ ninnge mun, kpɛkun be jɛjɛli i sin like. Asa ekun’n, ɔ siesieli Siloe* Nzue Gble+ m’ɔ o Famiɛn’n i Fie Klanman’n+ i wun lɔ’n, i talɛ’n i ye. Ɔ siesieli i ye lele fa juli Asikalie+ ng’ɔ fin Davidi Klɔ’n+ su lɔ jra’n su.

16 I wun koko lɛ’n, Neemin m’ɔ ti Bɛti-Zii+ asa’n i bue kun su kpɛn’n, ɔ siesieli talɛ’n i ye. Ɔ boli i bo Davidi i Asieliɛ Lika’m+ be ɲrun lɛ lele fa juli nzue gble+ nga be yoli’n su, ɔ siesieli i ye lele fa juli Safuɲrɛn Sua’n su lɔ.

17 I wun koko lɛ’n, Levifuɛ’m be siesieli talɛ’n i ye: Banin i wa Reumun, i wun koko lɛ’n, Asabia m’ɔ ti Keila+ asa’n i bue kun su kpɛn’n, ɔ siesieli talɛ’n i ye mɛnnin i akpasua liɛ’n. 18 I wun koko lɛ’n, i niaan bian’m be siesieli talɛ’n i ye: Enadadi i wa Bavai, ɔ ti Keila asa’n i bue kun su kpɛn.

19 I wun koko lɛ’n, Zesua+ i wa Ezɛɛ m’ɔ ti Mizpa klɔ’n i su kpɛn’n, ɔ siesieli talɛ’n i bue uflɛ i ye. I bue sɔ’n o Alɛ Ninnge Siewlɛ’n i ɲrun lɛ’n, kan Talɛ Ja’m+ be o lɛ’n.

20 I wun koko lɛ’n, Zabai+ i wa Bariki wlɛli i wun ase dili junman kpa, ɔ siesieli talɛ’n i bue uflɛ ye. Ɔ boli i bo kan Talɛ Ja’m be o lɛ’n lele fa juli Eliasibu+ m’ɔ ti Ɲanmiɛn ɲrun jranfuɛ dan’n i sua’n su lɔ.

21 I wun koko lɛ’n, Akɔzu i wa Iri i wa Meremɔti+ siesieli talɛ’n i bue uflɛ ye. Ɔ boli i bo Eliasibu i sua’n i anuan’n su lɛ lele fa juli Eliasibu i sua’n i tiwa lɔ.

22 I wun koko lɛ’n, Ɲanmiɛn ɲrun jranfuɛ mɔ be fin Zurdɛn asa’n*+ su lɔ’n be siesieli talɛ’n i ye. 23 Be wun koko lɛ’n, Bɛnzamɛn nin Asibi be siesieli talɛ’n i ye be bɔbɔ be sua’n i ɲrun lɛ. Be wun koko lɛ’n, Maazeya m’ɔ ti Anania i wa’n, i wa Azaria siesieli talɛ’n i ye i bɔbɔ i sua’n i ɲrun lɛ. 24 I wun koko lɛ’n, Enadadi i wa Binii siesieli talɛ’n i bue uflɛ ye. Ɔ boli i bo Azaria i sua’n su lɛ lele fa juli kan Talɛ Ja’m+ be o lɛ’n, ɔ juli cɔnjɔ’n su lɔ.

25 I wun koko lɛ’n, Uzai i wa Palali siesieli talɛ ng’ɔ o kan Talɛ Ja’m be o lɛ’n, ɔ nin Sua Fleiin ng’ɔ mantan Famiɛn Sua’n+ be ɲrun lɛ’n be ye. Sua fleiin sɔ’n ɔ o nglo lɔ Gladi Difuɛ’m be Awlo Klun’n+ nun lɔ. Yɛ Parɔsu+ i wa Pedaya ɔ o i wun koko lɛ.

26 Ɲanmiɛn sua’n nun lɔ junman difuɛ mun*+ mɔ be tran Ofɛli’n,+ be siesieli talɛ’n i ye wie. Be siesieli i ye lele juli Nzue Anuan’n+ i ɲrun lɔ, wia afiliɛ lɔ. Be juli sasafuɛ tranwlɛ fleiin’n su lɔ.

27 Be wun koko lɛ’n, Tekoafuɛ’m+ be siesieli talɛ’n i bue uflɛ ye. Be boli i bo sasafuɛ tranwlɛ fleiin’n i ɲrun lɛ lele be juli Ofɛli talɛ’n i wun lɔ.

28 Ɲanmiɛn ɲrun jranfuɛ’m be siesieli talɛ’n i ye Nnɛn Kpanngɔ Anuan’n+ i nglo lɔ lika’n nun, sran kun di i junman liɛ’n i bɔbɔ i sua’n i ɲrun lɛ.

29 Be wun koko lɛ’n, Imɛɛ i wa Zadɔku+ siesieli talɛ’n i ye i bɔbɔ i sua’n i ɲrun lɛ.

I wun koko lɛ’n, Sekania i wa Semaia m’ɔ ti Wia Afiliɛ lɔ Anuan’n+ i sunianfuɛ’n siesieli talɛ’n i ye wie.

30 I wun koko lɛ’n, Selemia i wa Anania ɔ nin Anun m’ɔ ti Zalafu i wa nsiɛn su’n, be siesieli talɛ’n i bue uflɛ ye.

I wun koko lɛ’n, Berekia i wa Mesulamun+ siesieli talɛ’n i ye i bɔbɔ i sua’n i ɲrun lɛ.

31 I wun koko lɛ’n, Malkia m’ɔ o sika ɔkwlɛ ajuin difuɛ’m be anuannzɛ’n nun’n, ɔ siesieli talɛ’n i ye wie. Ɔ siesieli i ye lele fa juli Ɲanmiɛn sua’n nun junman difuɛ mun,*+ ɔ nin aata difuɛ’m be sua’n su lɔ, Niannianlɛ Anuan’n i ɲrun lɛ. Ɔ juli nglo sua ba m’ɔ o talɛ’n i cɔnjɔ’n su’n i su lɔ.

32 Sika ɔkwlɛ ajuin difuɛ mun, ɔ nin aata difuɛ’m be siesieli talɛ ng’ɔ o nglo sua ba m’ɔ o talɛ’n i cɔnjɔ’n su’n, ɔ nin Bua Anuan’n+ be afiɛn’n i ye.

4 Kɛ Sanbala+ tili i kɛ e su kplan talɛ’n i uflɛ’n, ɔ fali ya, w’a yomɛn i fɛ kaan sa.* Ɔ yoli Zifu’m be finfin titi. 2 I niaan mun nin Samari sonja’m be ɲrun lɛ’n, ɔ seli kɛ: “?Ngue li yɛ Zifu fuɛnfuɛ nga’m be su yo-ɔ? ?Be bu i kɛ be ngunmin be kwla yo nga? ?Bé wá yí tɛ? ?Bé wíe junman’n i dí cɛn ba kun nun? ?Yɔbuɛ nga b’a yra mɔ be tian ndutre’n nun yɛ’n, be kwla fa di junman ekun?”+

3 Tobia+ m’ɔ ti Amɔnfuɛ’n,+ m’ɔ jin i wun lɛ’n seli kɛ: “Sɛ blo alua wie bɔbɔ fu talɛ nga be waan b’a fa yɔbuɛ b’a kplɛn i lɛ’n su’n, ɔ́ bú gúa.”

4 Ee, e Ɲanmiɛn, tie, afin be su yo e finfin,+ yo maan ndɛ tɛtɛ nga be kan’n ɔ sɛ i sin tɔ be bɔbɔ be ti su,+ yɛ fa be wla be kpɔfuɛ’m be sa nun naan be tra be wɔ nvle uflɛ nun. 5 Nán kata be fɔnlɛ’n su, yɛ nán nunnun be sa tɛ’n ɔ ɲrun,+ afin be kpɛli talɛ’n i kplanfuɛ’m be nzowa.

6 Ɔ maan e kplannin talɛ’n i titi, yɛ talɛ wunmuan’n yiali nun, e kplannin talɛ’n lele e juli i nglonglo su’n i afiɛn sɛsɛ. Nvlefuɛ’m be tuli be klun be dili junman’n titi.

7 Kɛ Sanbala nin Tobia+ nin Arabu mun+ nin Amɔnfuɛ mun, ɔ nin Asdɔdufuɛ’m+ be tili i kɛ Zerizalɛmun klɔ’n i wun talɛ’n i ye siesielɛ junman’n su kɔ i ɲrun’n, naan e su tannin talɛ’n i nun toklo mun’n, be fali ya dan kpa. 8 I sɔ’n ti’n, be nuan sɛli be wun kɛ bé bá naan bé wá tɔ́ Zerizalɛmun klɔ’n su, yɛ bé yó naan klɔ’n nun sanngan. 9 Sanngɛ e srɛli e Ɲanmiɛn’n, kpɛkun be dunman nun ti’n e sieli gladi difuɛ wie mun wia nun nin kɔnguɛ.

10 Sanngɛ Zidafuɛ’m be seli kɛ: “Junman difuɛ’m* b’a fɛ, yɛ kusu talɛ ng’ɔ bubu guali’n sɔnnin dan. E su kwlá wieman talɛ’n i kplan le.”

11 E kpɔfuɛ’m be se titi kɛ: “Ka naan b’a si nun annzɛ b’a wun e’n, é kó wlú be nun, kpɛkun é kún be yɛ é jrán junman’n.”

12 Kɛ Zifu nga be tran be wun koko lɛ’n be ba’n, be se e titi* kɛ: “Bé wá sín e bue kwlaa su bé tɔ́ e su.”

13 Ɔ maan n siesieli sran wie mun talɛ’n i sin lɔ lika’n i ja ngua lɔ, lika kpɛtɛkplɛɛ’n nun, n siesieli be awloboawlobo. Be tokofi mun nin be cua mun, ɔ nin be ta mun be o be sa nun. 14 Kɛ n wunnin kɛ srɛ kun be’n, n ka lɛ n jasoli kpɛkun n seli sran dandan mun,+ nin famiɛn’n i janunfuɛ mun, ɔ nin nvlefuɛ onga’m be kɛ: “Nán amun sro be.+ Maan amun wla kpɛn Zoova m’ɔ ti dan m’ɔ yo sro’n i su,+ maan amun kun amun niaan mun, nin amun mma yasua mun, nin amun mma bla mun, nin amun yi mun, nin amun awlobo’m be ti alɛ.”

15 Kɛ e kpɔfuɛ’m be tili i kɛ y’a si like nga be su yo’n nun’n, naan Ɲanmiɛn Kpli w’a yo maan like nga be sunnzunnin’n w’a kpi ase’n, e kwlaa e sali e sin talɛ’n i kplanlɛ junman’n su ekun. 16 Kɛ ɔ fɛ i blɛ sɔ’n nun’n, min sran’m be bue be di junman’n,+ yɛ be bue be tra cua nin ɲrɛn nin ta’m be nun, yɛ be wla be wue’n su katalɛ like. Famiɛn’n i sran dandan’m+ be suannin Zidafuɛ’m be kwlaa nga 17 be su kplan talɛ’n be bo. Be nga be sua trɔ’n, be fa be sa kun di junman’n, yɛ be fa be sa kun tra alɛ kunlɛ like kun nun. 18 Kɛ talɛ’n i kplanfuɛ’m bé dí junman’n, tokofi san be kwlaa be bo, yɛ sran ng’ɔ bo awɛ’n+ jin min wun lɛ.

19 I sin’n, n seli sran dandan mun nin famiɛn’n i janunfuɛ mun nin nvlefuɛ onga’m be kɛ: “Junman’n ti dan, yɛ talɛ’n ti tɛnndɛn, kɛ e o talɛ’n su é dí junman’n e nin e wiengu mun e afiɛn’n ti nun. 20 Sɛ amun ti awɛ’n i tɛlɛ’n, maan amun ti yia kan n o lɛ’n. E Ɲanmiɛn’n wá kún e ti alɛ.”+

21 Ɔ maan e dili junman’n titi. Kɛ ɔ́ yó sɔ’n, nn cua’m be o be bue be sa nun. Kɛ ɔ fɛ i aliɛ njɛnniɛn su lele kɔnguɛ mɔ nzraama’m bé fíte’n, e o su. 22 Blɛ sɔ’n nun’n, n seli nvlefuɛ’m be kɛ: “Maan yasua’m be tinuntinun be nin be junman difuɛ’m be la Zerizalɛmun klɔ’n nun. I liɛ’n, bé sásá e kɔnguɛ, kpɛkun wia nun’n bé dí junman’n.” 23 E nin min niaan mun nin min sufuɛ mun,+ ɔ nin gladi difuɛ nga be su min su’n y’a yiman e tralɛ mun le, yɛ e tinuntinun e alɛ kunlɛ like o e sa fama’n nun.

5 Sanngɛ nvlefuɛ’m be nin be yi’m be plannin planlɛ kpa be niaan Zifu’m be su.+ 2 Be wie’m be waan: “E nin e mma yasua nin e mma bla mun e sɔnnin. Ɔ fata kɛ e ɲan aliɛ e di naan y’a kwla ka nguan nun.” 3 Wie’m be waan: “Awe’n ti’n, e fa e fie mun, nin e viɲin fie mun, nin e sua mun e wla aowa naan y’a kwla ɲan aliɛ.” 4 Wie’m be kusu be waan: “E wlali e fie nin e viɲin fie’m be aowa naan y’a kwla ɲan sika y’a su lapo y’a man famiɛn’n.+ 5 E nin e niaan mun e ti kun, e mmoja ti kun, e mma mun, ɔ nin be mma liɛ’m be ti kun. Ɔ nin i sɔ ngba’n, ɔ fata kɛ e fa e mma yasua mun nin e mma bla mun e yo kanga. Kɛ é sé yɛ’n bɔbɔ’n, e mma bla wie’m be ti kanga.+ Kusu e kwlá yoman like fi naan y’a jrɛn i sɔ liɛ’n. Afin e fie nin e viɲin fie’m be ti sran uflɛ liɛ.”

6 Kɛ n tili be planlɛ’n, ɔ nin ndɛ sɔ mun’n, n fali ya dan kpa. 7 N buli sa sɔ’m be akunndan. Kpɛkun n ijɔli sran dandan mun, nin famiɛn’n i janunfuɛ mun. N seli be kɛ: “Amun bɔbɔ amun niaan mɔ be usa amun bosia’n, kpɛkun amun se be kɛ be su i bo!”+

Ɔ maan be dunman nun ti’n, n seli kɛ maan e yia naan e yo aɲia dan kun. 8 N seli be kɛ: “E yoli like kwlaa nga e kwla yo naan y’a kpɔ e niaan Zifu nga be yoli be atɛ nvle kun nga’m be sa nun’n be ti. ?Sanngɛ ɔ fata kɛ amun yo amun bɔbɔ amun niaan’m be atɛ?+ ?Yɛ ɔ fata kɛ e bɔbɔ e kpɔ be ti?” Kɛ n kannin sɔ’n, be guali bliin, b’a ɲanman ndɛ fi b’a kanman. 9 I sin’n, n seli be kɛ: “Like nga amun yo i lɛ’n, ɔ timan kpa. Ɔ fata kɛ like nga amun yo’n, ɔ kle kɛ amun sro e Ɲanmiɛn’n.+ I liɛ’n, nvle nga be ti e kpɔfuɛ’n be su kwlá kanman e wun ndɛ tɛtɛ. 10 I kpa bɔbɔ’n, e nin min niaan nin min sufuɛ mun e sika nin ble kalɛ o be su. Amun yaci, nán maan e se kɛ be su like nga be fa’n i bo kun.+ 11 Amun yaci, maan andɛ bɔbɔ’n, amun fa be fie mun,+ nin be viɲin fie mun, nin be olivie fie mun, nin be sua mun man be. Yɛ sika, nin ble, nin nzan, ɔ nin ngo nga amun fa mannin be’n be su mmlusuɛ nga amun ɲɛnnin* i’n, amun yi man be.”   

12 Be tɛli su kɛ: “É wá fá ninnge sɔ mun é mán be. Yɛ e su seman be kɛ be man e like uflɛ fi. É nían nga a kannin’n su sɛsɛsɛ é yó.” Ɔ maan n flɛli Ɲanmiɛn ɲrun jranfuɛ mun, kpɛkun n yoli maan sran sɔ’m be tali nda kɛ bé dí ndɛ nga be kannin’n su. 13 N kpukpuli min tralɛ’n i bue ng’ɔ bu gua su’n i nun,* kpɛkun n seli be kɛ: “Sran kwlaa nga w’a diman nda nga su’n, maan Ɲanmiɛn Kpli kpukpu i sua’n nin i ninnge’m be nun kɛ nga sa. Maan ɔ kpukpu i nun kɛ nga sa, yɛ nán like fi kɛ i sa nun.” Nvlefuɛ’m be kwlaa be tɛli su kɛ: “Maan ɔ yo sɔ!” Kpɛkun be manmannin Zoova, yɛ be niannin ndɛ nga be kannin’n su yoli.

14 Kɛ Atazɛɛzɛsi+ kacili famiɛn’n, i afuɛ ablaɔn’n (20) su+ m’ɔ fali min sieli+ Zida nvle’n su’n, lele m’ɔ́ fá jú i afuɛ ablasan-nin-nɲɔn’n (32) su’n,+ afuɛ blu-nin-nɲɔn (12) sɔ’m be nun’n, e nin min niaan mun y’a diman aliɛ ng’ɔ fata kɛ be fa man nvle siefuɛ’n i wie le.+ 15 Sanngɛ be nga be dun mmua yoli nvle siefuɛ’n min ɲrun’n, be kleli nvlefuɛ’m be yalɛ dan. Cɛn ba kun nun’n, be fa sika sikli* ablanan (40) nvlefuɛ’m be sa nun, ɔ ti be aliɛ dilɛ nin be duvɛn nɔnlɛ liɛ. Asa ekun’n, be sufuɛ’m be kleli nvlefuɛ’m be yalɛ. Sanngɛ min liɛ’n, m’an yoman sɔ,+ afin n sro Ɲanmiɛn.+

16 Asa kusu’n, n bɔbɔ n kplannin talɛ’n wie, yɛ y’a toman fie fi.+ Min sufuɛ’m be kwlaa be ti yiali junman’n i wun. 17 Zifu nin famiɛn’n i janunfuɛ nga be di like min tabli’n su’n, be ti sran ya kun ablenun (150), ɔ nin be nga be fin nvle uflɛ nun mɔ e sɔ be nun’n. 18 Cɛn kwlakwla’n, be tɔn nannin tola kun, nin bua kpakpa nsiɛn, nin anunman mun be man min.* Yɛ cɛn ba blu kwlaa’n, e le duvɛn wafawafa kwlaa kpanngban kpa. Ɔ nin i sɔ ngba’n, m’an seman le kɛ be man min aliɛ ng’ɔ fata kɛ be fa man siefuɛ mun’n. Afin nvlefuɛ’m be junman nga be di’n, ɔ tin be su dan. 19 Ee min Ɲanmiɛn, maan ɔ wla kpɛn min su naan yo min ye, sa kwlaa nga n yo mannin nvlefuɛ nga mun’n ti.+

6 Kɛ Sanbala nin Tobia+ ɔ nin Gesɛmun m’ɔ ti Arabu bian’n,+ ɔ nin e kpɔfuɛ onga’m be tili i kɛ m’an kplan talɛ’n i uflɛ+ cɛ’n, naan toklo wie fi nunman talɛ’n nun kun’n (sanngɛ blɛ sɔ’n nun’n, nn n nin-a wlaman anuan mun),+ 2 Sanbala nin Gesɛmun be ka lɛ be toli min ngaliɛ. Be seli min kɛ: “Bla maan e kle blɛ kun naan e yia klɔ ng’ɔ o Ono+ Kongo’n nun lɔ’n su.” Kusu nn b’a sunnzun kɛ bé yó min tɛ. 3 Ɔ maan n sunmannin sran naan be ko se be kɛ: “Min sa o junman dan kun su, n su kwlá kɔman. Afin sɛ n yaci junman’n naan n kɔ amun wun wunlɛ’n, junman’n jrán.” 4 Be toli min ngaliɛ kunngba’n sɔ kpɛ nnan. Yɛ wafa kunngba’n yɛ n fa tɛli i kwlaa su-ɔ.

5 I kpɛ nnun su’n, Sanbala sunmɛnnin i sufuɛ’n min sin ndɛ kunngba’n su. Kɛ ɔ́ bá’n, fluwa kun mɔ b’a kataman su’n wo i sa nun. 6 Fluwa’n i nun ndɛ’n yɛ: “Be kɛn i nvlenvle’m be nun kɛ a nin Zifu mun amun kunndɛ kɛ amún yó ɲin kekle famiɛn’n su,+ yɛ Gesɛmun+ bɔbɔ kan sɔ wie. I sɔ’n ti yɛ amun su kplan talɛ’n niɔn. Be waan a su wa kaci be famiɛn. 7 Asa ekun’n, a sieli Ɲanmiɛn nuan ijɔfuɛ wie mun naan be kan ɔ su ndɛ be sin Zerizalɛmun klɔ’n nun kɛ: ‘Famiɛn kun wo Zida mɛn’n nun!’ Bé wá kán ndɛ sɔ’n bé klé famiɛn’n. Ɔ maan bla naan e koko ndɛ sɔ’n i su yalɛ likawlɛ.”

8 Sanngɛ n sunmannin sran be ko seli i kɛ: “Sa sɔ’m be nun wie fi w’a juman. A kpɛ be ɔ ti nun yɛ a kan-ɔn.”* 9 Afin be kwlaa be kunndɛ kɛ bé wlá e srɛ. Be se kɛ: “Be sa wá kán ase junman’n i dilɛ’n nun, yɛ junman’n wá jrán.”+ Siɛn’n, Ɲanmiɛn, ń srɛ́ wɔ, man min wunmiɛn.+

10 I sin’n, n ɔli Semaia m’ɔ ti Delaya i wa’n, mɔ i kusu ti Meetabɛli i wa’n i awlo lɔ. Blɛ sɔ’n nun’n, ɔ fiteman kɔman lika. Ɔ seli min kɛ: “Maan e kle blɛ kun naan e yia Ɲanmiɛn Kpli i sua’n nun lɔ, Ɲanmiɛn sua’n i klun lɔ, yɛ e ɲin Ɲanmiɛn sua’n i anuan mun, afin be su ba ɔ kunlɛ. Bé wá bá ɔ kunlɛ kɔnguɛ.” 11 Sanngɛ n seli kɛ: “?Ɔ fata kɛ sran kɛ min sa’n wanndi? ?Sɛ sran kɛ min sa’n ɔ wlu Ɲanmiɛn sua’n nun lɔ’n, ɔ kwla ka nguan nun?+ N su wluman lɔ!” 12 N wunnin i wlɛ kɛ nán Ɲanmiɛn yɛ ɔ sunmɛnnin i-ɔ. Sanngɛ Tobia nin Sanbala+ yɛ be mɛnnin i sika naan ɔ kan min wun ndɛ sɔ’n niɔn. 13 Be mɛnnin i sika naan ɔ wla min srɛ, naan n yo sa tɛ, naan bé jrán su bé sáci min dunman, yɛ bé kán min wun ndɛ tɛtɛ.

14 Ee, min Ɲanmiɛn, nán ɔ wla fi Tobia+ nin Sanbala, ɔ nin sa nga’m be su. Asa ekun’n, nán ɔ wla fi Noadia m’ɔ ti Ɲanmiɛn nuan ijɔfuɛ bla’n, ɔ nin Ɲanmiɛn nuan ijɔfuɛ onga mɔ be kunndɛ titi kɛ bé wlá min srɛ’n be su.

15 Talɛ’n i kplanlɛ’n wieli Elili* anglo’n i cɛn ba ablaɔn-nin-nnun’n (25) su. I kplanlɛ’n dili cɛn ba ablenun-nin-nɲɔn (52).

16 Kɛ e kpɔfuɛ’m be tili ndɛ sɔ’n cɛ’n, mɔ nvlenvle nga be o e wun lɛ’n be wunnin talɛ’n, ɲannzuɛn dan kpa kunnin be.+ Yɛ be wunnin i wlɛ kɛ e Ɲanmiɛn’n ukali e ti yɛ e kwla dili junman sɔ’n niɔn. 17 Blɛ sɔ’n nun’n, Zida lɔ sran dandan’m+ be klɛ fluwa kpanngban ko man Tobia, yɛ Tobia kusu tɛ be su. 18 Zida lɔ sran kpanngban be kleli kɛ be o i sin. Afin ɔ ti Ara+ i wa Sekania i sia, yɛ i wa Zoanan jali Berekia i wa Mesulamun+ i wa bla’n. 19 Asa ekun’n, be kɛn i wun ndɛ kpa be kle min titi, kpɛkun ndɛ nga n kan’n, be ko kan kle i. Kɛ ɔ ko yo sɔ’n, Tobia kusu klɛ fluwa mun blɛ min naan ɔ́ fá be wlá min srɛ.+

7 Kɛ talɛ’n i kplanlɛ’n+ wieli cɛ’n, n wlawlali anuan mun.+ I sin’n, n siesieli anuan sunianfuɛ mun,+ nin jue tofuɛ mun,+ nin Levifuɛ mun.+ 2 N sieli min niaan bian Ananin+ kɛ ɔ nian Zerizalɛmun klɔ’n su, ɔ nin Anania m’ɔ ti Sua Fleiin’n+ i su kpɛn’n, afin Anania ti sran mɔ be kwla lafi i su kpa-ɔ. Ɔ sro Ɲanmiɛn+ tra be nun sunman. 3 Ɔ maan n seli be kɛ: “Sɛ wia’n nin-a jranman’n, ɔ fataman kɛ be tike Zerizalɛmun klɔ’n i anuan mun. Kɛ anuan sunianfuɛ’m bé dí be junman’n, maan be ɲin anuan mun, yɛ be to be nun. An sie Zerizalɛmunfuɛ mun gladi difuɛ, maan be tinuntinun be jran be gladi diwlɛ lika’m be nun, sran kun jrɛn i bɔbɔ i awlo’n i ɲrun lɛ.” 4 Klɔ’n ti dan, ɔ ti tɛtrɛ, sanngɛ i nun sran’m b’a sɔnman,+ yɛ be nin-a kplanman sua’m be uflɛ.

5 Sanngɛ min Ɲanmiɛn’n yoli maan n yiali sran dandan mun, nin famiɛn’n i janunfuɛ mun, ɔ nin nvlefuɛ mun naan be klɛ be dunman be awlobo’m be fluwa’m be nun.+ I sin’n, n wunnin fluwa nga be klɛli be nga be dun mmua bali’n be awlobo’m be dunman nun’n. Ndɛ ng’ɔ klɛ fluwa’n nun’n yɛ:

6 Nvle’n nunfuɛ nga be sali be sin’n, be nga Nebikadnezaa+ m’ɔ ti Babilɔnin famiɛn’n trali be ɔli’n,+ mɔ i sin’n be sali be sin Zerizalɛmun nin Zida mɛn’n nun’n, mɔ be tinuntinun be ɔli be klɔ’m be su’n,+ 7 be nin Zorobabɛli,+ nin Zesua,+ nin Neemin, nin Azaria, nin Raamia, nin Naamanin, nin Maadose, nin Bilsan, nin Misperɛti, nin Bigvai nin Neimun, ɔ nin Baana yɛ be bali-ɔ.

Izraɛli yasua’m be nuan’n yɛ:+ 8 Parɔsu i mma mun, be ti sran akpi nɲɔn ya kun ableso-nin-nɲɔn (2.172). 9 Sefatia i mma mun, be ti sran ya nsan ableso-nin-nɲɔn (372). 10 Ara+ i mma mun, be ti sran ya nsiɛn ablenun-nin-nɲɔn (652). 11 Paati-Moabu+ i mma mun, be fin Zesua nin Zoabu+ be osu’n nun, be ti sran akpi nɲɔn ya mɔcuɛ blu-nin-mɔcuɛ (2.818). 12 Elamun+ i mma mun, be ti sran akpi kun ya nɲɔn ablenun-nin-nnan (1.254). 13 Zatu i mma mun, be ti sran ya mɔcuɛ ablanan-nin-nnun (845). 14 Zakai i mma mun, be ti sran ya nso ablesiɛn (760). 15 Binii i mma mun, be ti sran ya nsiɛn ablanan-nin-mɔcuɛ (648). 16 Bebai i mma mun, be ti sran ya nsiɛn ablaɔn-nin-mɔcuɛ (628). 17 Azgadi i mma mun, be ti sran akpi nɲɔn ya nsan ablaɔn-nin-nɲɔn (2.322). 18 Adonikamun i mma mun, be ti sran ya nsiɛn ablesiɛn-nin-nso (667). 19 Bigvai i mma mun, be ti sran akpi nɲɔn ablesiɛn-nin-nso (2.067). 20 Adɛn i mma mun, be ti sran ya nsiɛn ablenun-nin-nnun (655). 21 Atɛɛ i mma mun, be fin Ezekiasi i osu’n nun, be ti sran ablangwlan-nin-mɔcuɛ (98). 22 Asumun i mma mun, be ti sran ya nsan ablaɔn-nin-mɔcuɛ (328). 23 Bezai i mma mun, be ti sran ya nsan ablaɔn-nin-nnan (324). 24 Arifu i mma mun, be ti sran ya kun blu-nin-nɲɔn (112). 25 Gabaɔn+ i mma mun, be ti sran ablangwlan-nin-nnun (95). 26 Bɛtleɛmun nin Netofa yasua mun, be ti sran ya kun ablaɔcuɛ-nin-mɔcuɛ (188). 27 Anatɔtu+ yasua mun, be ti sran ya kun ablaɔn-nin-mɔcuɛ (128). 28 Bɛti-Azmavɛti yasua mun, be ti sran ablanan-nin-nɲɔn (42). 29 Kiriati-Zearimun+ yasua mun, nin Kefira yasua mun, nin Beerɔti+ yasua mun, be ti sran ya nso ablanan-nin-nsan (743). 30 Rama yasua mun, nin Geba+ yasua mun, be ti sran ya nsiɛn ablaɔn-nin-kun (621). 31 Mikimasi+ yasua mun, be ti sran ya kun ablaɔn-nin-nɲɔn (122). 32 Betɛli+ yasua mun, nin Ai+ yasua mun, be ti sran ya kun ablaɔn-nin-nsan (123). 33 Nebo kunfuɛ’n i su yasua mun, be ti sran ablenun-nin-nɲɔn (52). 34 Elamun kunfuɛ’n i mma mun, be ti sran akpi kun ya nɲɔn ablenun-nin-nnan (1.254). 35 Arimun i mma mun, be ti sran ya nsan ablaɔn (320). 36 Zerikofuɛ mun, be ti sran ya nsan ablanan-nin-nnun (345). 37 Lɔdu, nin Adidi, nin Ono+ be mma mun, be ti sran ya nso ablaɔn-nin-kun (721). 38 Senaa i mma mun, be ti sran akpi nsan ya ngwlan ablasan (3.930).

39 Ɲanmiɛn ɲrun jranfuɛ mun:+ Zedaia i mma mun, be fin Zesua i osu’n nun, be ti sran ya ngwlan ableso-nin-nsan (973). 40 Imɛɛ i mma mun, be ti sran akpi kun ablenun-nin-nɲɔn (1.052). 41 Pasii+ i mma mun, be ti sran akpi kun ya nɲɔn ablanan-nin-nso (1.247). 42 Arimun+ i mma mun, be ti sran akpi kun blu-nin-nso (1.017).

43 Levifuɛ mun:+ Zesua i mma mun, nin Kadimiɛli+ i mma mun, be fin Odeva i osu’n nun, be ti sran ableso-nin-nnan (74). 44 Jue tofuɛ mun:+ Azafu+ i mma mun, be ti sran ya kun ablanan-nin-mɔcuɛ (148). 45 Anuan sunianfuɛ mun:+ Salɔmun i mma mun, nin Atɛɛ i mma mun, nin Talmɔn i mma mun, nin Akibu+ i mma mun, nin Atita i mma mun, ɔ nin Sobai i mma mun, be ti sran ya kun ablasan-nin-mɔcuɛ (138).

46 Ɲanmiɛn sua’n nun lɔ junman difuɛ mun:*+ Zia i mma mun, Asifa i mma mun, Tabaɔti i mma mun, 47 Kerɔsi i mma mun, Sia i mma mun, Padɔn i mma mun, 48 Lebana i mma mun, Agaba i mma mun, Salimai i mma mun, 49 Anan i mma mun, Gidɛli i mma mun, Gaa i mma mun, 50 Reaya i mma mun, Rezɛn i mma mun, Nekoda i mma mun, 51 Gazamun i mma mun, Uza i mma mun, Pasea i mma mun, 52 Besai i mma mun, Meinimun i mma mun, Nefisesimun i mma mun, 53 Bakibuku i mma mun, Akufa i mma mun, Aruu i mma mun, 54 Baziliti i mma mun, Meida i mma mun, Aasa i mma mun, 55 Baakɔsu i mma mun, Sizera i mma mun, Tema i mma mun, 56 Nezia i mma mun, ɔ nin Atifa i mma mun.

57 Salomɔn i sufuɛ’m be mma mun:+ Sotai i mma mun, Soferɛti i mma mun, Perida i mma mun, 58 Zaala i mma mun, Daakɔn i mma mun, Gidɛli i mma mun, 59 Sefatia i mma mun, Atili i mma mun, Pokerɛti-Azebaimun i mma mun, ɔ nin Amɔn i mma mun. 60 Ɲanmiɛn sua’n nun lɔ junman difuɛ’m*+ be kwlaa nin Salomɔn i sufuɛ’m be mma’m be ti sran ya nsan sran ablangwlan-nin-nɲɔn (392).

61 Be nga be fin Tɛl-Mela, nin Tɛl-Aasa, nin Kerubu, nin Adɔn, nin Imɛɛ mɔ b’a kwlá siman be si’m be awlo’n nin be osu’n, mɔ be siman sɛ be ti Izraɛlifuɛ’n be nuan’n yɛ:+ 62 Delaya i mma mun, Tobia i mma mun, Nekoda i mma mun, be ti sran ya nsiɛn ablanan-nin-nɲɔn (642). 63 Ɲanmiɛn ɲrun jranfuɛ mun yɛ: Abaya i mma mun, Akɔzu+ i mma mun, Baazilai i mma mun. Baazilai+ sɔ’n jali Baazilai m’ɔ ti Galaadifuɛ’n i mma bla’m be nun kun, yɛ be fɛli i sia’n i dunman’n be sieli i su. 64 Sran sɔ’m be kunndɛli be fluwa nga be klɛli be awlobo’m be dunman nun’n naan bé sí osu nga be fin nun’n, sanngɛ b’a kwlá wunman be. Ɔ maan b’a manman be atin kɛ be di Ɲanmiɛn ɲrun jranlɛ junman’n wie.*+ 65 Nvle’n i siefuɛ’n*+ seli be kɛ nán be di like ng’ɔ ti Ɲanmiɛn liɛ klonglo’n wie,+ saan Ɲanmiɛn ɲrun jranfuɛ kun w’a fa Urimun’n nin Tumimun’n+ w’a usa Ɲanmiɛn i sa.

66 Nvlefuɛ’m be kwlaa be ti sran akpiakpi ablanan-nin-nɲɔn ya nsan ablesiɛn (42.360),+ 67 be kanga yasua nin be kanga bla+ nga b’a kaman be b’a wlaman nun’n be ti sran akpi nso ya nsan ablasan-nin-nso (7.337). Asa ekun’n, be jue tofuɛ yasua nin bla mun+ be ti sran ya nɲɔn ablanan-nin-nnun (245). 68 Be nnɛn kpanngɔ’m be ti ya nso ablasan-nin-nsiɛn (736), yɛ be milɛ’m be ti ya nɲɔn ablanan-nin-nnun (245), 69 be ɲɔnngɔnmin’m be ti ya nnan ablasan-nin-nnun (435), be aflunmun’m be ti akpi nsiɛn ya nso ablaɔn (6.720).

70 Be si’m be awlobo’m be su kpɛn wie mun be mannin like be fa suannin junman’n i bo.+ Nvle siefuɛ’n* mannin sika ɔkwlɛ draki* akpi kun (1.000), nin kpongbo ba ablenun (50) nin Ɲanmiɛn ɲrun jranfuɛ’m be tralɛ tɛnndɛn+ ya nnun ablasan (530) kɛ be fa di junman’n. 71 Be si’m be awlobo’m be su kpɛn wie’m be mannin sika ɔkwlɛ draki akpiakpi ablaɔn (20.000) nin sika minin* akpi nɲɔn ya nɲɔn (2.200) kɛ be fa di junman’n. 72 Nvlefuɛ onga’m be mannin sika ɔkwlɛ draki akpiakpi ablaɔn (20.000), sika minin akpi nɲɔn (2.000), nin Ɲanmiɛn ɲrun jranfuɛ’m be tralɛ tɛnndɛn ablesiɛn-nin-nso (67).

73 Ɲanmiɛn ɲrun jranfuɛ mun, nin Levifuɛ mun, nin anuan sunianfuɛ mun, nin jue tofuɛ mun,+ nin nvlefuɛ’m be nun wie mun, nin Ɲanmiɛn sua’n nun lɔ junman difuɛ mun,* yɛ Izraɛlifuɛ onga’m be kwlaa* be ko trannin be klɔ’m be su sɛsɛsɛ.+ Kɛ anglo nso su’n fá jú’n,+ nn Izraɛlifuɛ’m b’a tran be klɔ’m be su sɛsɛsɛ.+

8 I sin’n, nvlefuɛ’m be kwlaa be nuan sɛli su be yiali Nzue Anuan’n+ i ɲrun lɛ gua’n su. Kpɛkun be seli Ɛsdrasi+ m’ɔ ti fluwa klɛfuɛ’n* kɛ ɔ fa Moizi i Mmla fluwa’n,+ mɔ Zoova fa mannin Izraɛlifuɛ mun’n+ bla. 2 Ɔ maan anglo nso’n+ i cɛn ba klikli’n su’n, Ɛsdrasi m’ɔ ti Ɲanmiɛn ɲrun jranfuɛ’n, ɔ fali Mmla’n bali yasua nin bla nin be kwlaa nga be kwla tie ndɛ mɔ be wun i wlɛ’n, mɔ b’a yia’n+ be ɲrun lɛ. 3 Kpɛkun ɔ mɛnnin i nɛn’n su kanngannin fluwa’n nun+ Nzue Anuan’n i ɲrun lɛ gua’n, i ɲrun lɛ. Ɔ kanngannin nun kleli yasua nin bla nin be kwlaa nga be kwla wun sa wlɛ’n. Ɔ boli i bo aliɛ njɛnniɛn su lele fa juli mindi su. Nvlefuɛ’m be sieli be su kpa be tieli+ Mmla fluwa’n i nun ndɛ’n. 4 Blɛ sɔ’n nun’n, be fali waka be yoli cenje kun kpɛkun Ɛsdrasi m’ɔ ti fluwa klɛfuɛ’n* ɔ jrannin su. Matitia, nin Sema, nin Anaya, nin Iri, nin Ilkia, ɔ nin Maazeya be jinjin i sa fama su. Yɛ Pedaya nin Misaɛli nin Malkia,+ nin Asumun, nin Asi-Badana, nin Zakari, ɔ nin Mesulamun be jinjin i sa bɛ su.

5 Ɛsdrasi tikeli fluwa’n su, nvlefuɛ’m be kwlaa be ɲin tɛ i, afin ɔ o nglo tra nvlefuɛ’m be kwlaa. Kɛ ɔ tikeli fluwa’n su’n, nvlefuɛ’m be kwlaa be jasoli. 6 I sin’n, Ɛsdrasi manmannin Ɲanmiɛn Kpli Zoova, m’ɔ ti dan’n, yɛ nvlefuɛ’m be kwlaa be tɛli su kɛ: “Maan ɔ yo sɔ! Maan ɔ yo sɔ!”+ Kpɛkun be mannin be sa’m be su nglo. I sin’n, be kotoli yɛ be utuli be ɲin ase Zoova ɲrun, be ti’n kannin asiɛ’n. 7 Kpɛkun Zesua, nin Banin, nin Serebia,+ nin Zamɛn, nin Akibu, nin Sabetai, nin Ɔdia, nin Maazeya, nin Kelita, nin Azaria, nin Zozabadi,+ nin Anan, nin Pelaia mɔ be ti Levifuɛ’n, be yiyili Mmla’n nun be kleli nvlefuɛ mun.+ Nvlefuɛ’m be jin nglo yɛ be tie-ɔ. 8 Be mannin be nɛn’n su kanngannin fluwa’n nun, be kanngannin Ɲanmiɛn Kpli i Mmla’n nun. Be yiyili nun weinwein, yɛ be tuli ndɛ’m be bo. Ɔ maan be ukali nvlefuɛ mun naan be wun ndɛ nga be kanngan’n i wlɛ.+

9 Neemin m’ɔ ti nvle siefuɛ’n,* nin Ɛsdrasi+ m’ɔ ti Ɲanmiɛn ɲrun jranfuɛ nin fluwa klɛfuɛ’n,* ɔ nin Levifuɛ mɔ be su kle nvlefuɛ’m be like’n, be seli nvlefuɛ’m be kwlaa be kɛ: “Andɛ cɛn’n ti amun Ɲanmiɛn Zoova liɛ klonglo.+ Nán amun yo kɛ b’a bo amun sɛ sa, yɛ nán amun sun.” Afin nvlefuɛ’m be kwlaa be su sun, Mmla’n i nun ndɛ nga be tili’n ti. 10 Neemin seli be kɛ: “Amun wɔ, amun ko di aliɛ kpakpa mun* yɛ amun nɔn ninnge nga be yo fɛ’n, yɛ amun ko man be nga b’a tɔnman like’n be aliɛ.+ Afin andɛ cɛn’n ti e Min’n i liɛ klonglo. Nán amun wla bo amun wun, afin aklunjɔɛ ng’ɔ fin Zoova’n ɔ wla amun fanngan.” 11 Levifuɛ’m be kusu’n, be fɔnvɔli nvlefuɛ mun. Be seli be kɛ: “Amun muan amun nuan! Afin andɛ cɛn’n ti Ɲanmiɛn liɛ klonglo. Nán amun wla bo amun wun.” 12 Ɔ maan nvlefuɛ’m be kwlaa be ɔli be ko dili like, be nɔnnin nzan, yɛ be ko mannin be wiengu mun be aliɛ. Be dili aklunjɔɛ dan,+ afin be wunnin ndɛ nga be kan kleli be’n i wlɛ.+

13 Kpɛkun cɛn nɲɔn’n su’n, nvlefuɛ’m be kwlaa be si’m be awlobo’m be su kpɛn mun, nin Ɲanmiɛn ɲrun jranfuɛ mun, nin Levifuɛ mun, be yiali Ɛsdrasi m’ɔ ti fluwa klɛfuɛ’n* i wun lɛ naan bé wún Mmla’n i nun ndɛ’m be wlɛ kpa ekun. 14 Kpɛkun be wunnin kɛ be klɛli i Mmla nga Zoova fa mannin Moizi’n i nun kɛ blɛ mɔ Izraɛlifuɛ’m bé dí cɛn anglo nso su’n nun’n, ɔ fata kɛ be tran kpata’m be bo.+ 15 Yɛ ɔ fata kɛ be bo i jɔ+ sin be klɔ’m be kwlaa be su, ɔ nin Zerizalɛmun klɔ’n nun kɛ: “Amun wɔ okaoka lika’m be nun naan amun ko bubu olivie nɲa, nin pɛn waka nɲa, nin mirti nɲa, nin nglesia nɲa, ɔ nin waka uflɛ wie’m be nɲa naan amun fa kplan kpata mun, kɛ nga be fa klɛli’n sa.”

16 Ɔ maan nvlefuɛ’m be ɔli be ko bubuli nɲa mun be bali, be fa kplannin be kpata mun. Be tinuntinun be o be sua’m be ti su nglo, be kplannin wie be awlo klun’m be nun, nin Ɲanmiɛn Kpli i sua’n i awlo klun’m be nun,+ ɔ nin Nzue Anuan’n+ i gua’n su lɛ, nin Efraimun Anuan’n+ i gua’n su. 17 Ɔ maan be kwlaa nga be trali be ɔli mɔ be sali be sin’n, be kplannin kpata mun kpɛkun be trannin be bo. Kɛ ɔ fɛ i Nɛn i wa Zozie+ i blɛ su lele m’ɔ́ fá jú cɛn sɔ’n nun’n, Izraɛlifuɛ’m be nin-a dimɛn i wunsu cɛn sɔ le. I sɔ’n ti’n, be dili aklunjɔɛ dan kpa.+ 18 Kɛ ɔ fɛ i cɛn klikli’n su lele m’ɔ́ fá jú cɛn kasiɛn’n su’n, cɛn kwlakwla be kanngan Ɲanmiɛn Kpli i Mmla fluwa’n nun.+ Be fali cɛn ba nso be dili cɛn’n, kpɛkun i cɛn ba mɔcuɛ’n su’n, be yoli aɲia dan kpa kun, kɛ nga be seli kɛ be yo’n sa.+

9 Anglo sɔ’n i cɛn ba ablaɔn-nin-nnan’n (24) su’n, Izraɛlifuɛ’m be ti yiali. Be cili nglɛmun, be wlali bajɛ tralɛ, yɛ be fali ndutre guali be wun.+ 2 Be nga be ti Izraɛlifuɛ’n be yili be wun aofuɛ’m be kwlaa be nun.+ Be jasoli, kpɛkun be dili be bɔbɔ be sa tɛ mun, ɔ nin be si’m be fɔnlɛ mun be nanwlɛ.+ 3 I sin’n, be jaso jrannin be osu’n nun lɛ, kpɛkun be mannin be nɛn’n su be kanngannin Zoova m’ɔ ti be Ɲanmiɛn’n i Mmla fluwa’n+ nun dɔ nsan. Be fali dɔ nsan ekun be dili be sa tɛ’m be nanwlɛ, be kotoli Zoova m’ɔ ti be Ɲanmiɛn’n i bo.

4 Zesua, nin Banin, nin Kadimiɛli, nin Sebania, nin Bunin, nin Serebia,+ nin Banin, ɔ nin Kenanin be jrannin Levifuɛ’m be cenje+ nga be yoli’n su, kpɛkun be mannin be nɛn’n su be kpan flɛli Zoova m’ɔ ti be Ɲanmiɛn’n. 5 Kpɛkun Zesua, nin Kadimiɛli, nin Banin, nin Asabnia, nin Serebia, nin Ɔdia, nin Sebania, ɔ nin Petaya be seli kɛ: “Amun jaso be manman Zoova m’ɔ ti amun Ɲanmiɛn’n tititi.+ Maan be manman ɔ dunman m’ɔ yo ɲɛnmɛn’n, mɔ i dan tra suyralɛ nin manmanlɛ kwlaa’n.

6 “Ɔ kunngba cɛ yɛ a ti Zoova’n niɔn.+ A yili ɲanmiɛn’n, a yili ɲanmiɛn m’ɔ la nglo lɔ plaii’n, ɔ nin i su lɔ sonja’m be kwlaa, ɔ nin asiɛ’n nin like kwlaa ng’ɔ o su’n, ɔ nin jenvie mun nin like kwlaa ng’ɔ o be nun’n. Ɔ ti yɛ maan be kwlaa be o nguan nun-ɔn. Yɛ ɲanmiɛn su lɔ sonja’m be koto ɔ bo. 7 A ti Ɲanmiɛn Kpli Zoova, a fali Abramun,+ kpɛkun a fɛli i Iri+ m’ɔ ti Kaldefuɛ’m be klɔ’n su lɛ ɔli, yɛ a tɔnnin i dunman kɛ Abraamun.+ 8 A wunnin kɛ i awlɛn’n ti kpa.+ I sɔ’n ti’n, a nin i trali aenguɛ naan á fá Kanaanfuɛ mun, nin Ɛtifuɛ mun, nin Amɔɔfuɛ mun, nin Perizifuɛ mun, nin Zebisifuɛ mun, ɔ nin Giigasifuɛ’m be mɛn’n á fá mɛ́n i naan ɔ fa mɛn i mma mun.+ Yɛ a dili nda nga a tali be’n be su, afin a yo sa i nuan su.

9 “A wunnin ɲrɛnnɛn ng’ɔ tɔli e nannan’m be su Ezipti lɔ’n,+ yɛ a tili be kpanlɛ mɔ be kpan flɛli wɔ Jenvie Ɔkwlɛ’n i nuan lɔ’n. 10 I sin’n, a yoli sa dandan nin abonuan sa mun fa tuli Faraɔn nin i sufuɛ mun,+ ɔ nin i mɛn’n nunfuɛ’m be kwlaa be fɔ, afin a wunnin kɛ be tuli be wun+ e nannan’m be su. A yoli maan ɔ dunman’n fuli, lele nin andɛ’n, ɔ te fu.+ 11 A kpacili jenvie’n nun be ɲrun lɛ. Ɔ maan be sinnin asiɛ kee’n su be kpɛli jenvie’n,+ yɛ be nga be su be su’n a toli be yili i jenvie’n i bo mmua kpa lɔ, kɛ yɔbuɛ mɔ be to yi i nzue m’ɔ bo’n i nun’n sa.+ 12 Wia nun’n, a fali ɲanmiɛn ble tiaan kun kleli be atin, yɛ kɔnguɛ’n, a fali sin taaman tiaan kun kleli be atin, naan ɔ kpaja atin ng’ɔ fata kɛ be fa’n su.+ 13 A jrali Sinai Oka’n su,+ yɛ a o ɲanmiɛn su lɔ a kannin ndɛ kleli be.+ A dili be jɔlɛ mun klanman, a fali mmla mɔ be ti nanwlɛ’n* mannin be, a mannin be afɔtuɛ kpakpa mun, yɛ a fali ɔ ndɛ kpakpa mun sieli be ɲrun.+ 14 A kannin ɔ Wunmiɛn-lolɛ-cɛn+ m’ɔ ti ɔ liɛ klonglo’n i ndɛ kleli be, a sinnin ɔ sufuɛ Moizi i lika kannin ndɛ kleli be, yɛ a sinnin i lika mannin be afɔtuɛ mun nin mmla kun. 15 Kɛ awe kunnin be’n, a mannin be ɲanmiɛn su lɔ kpanwun.+ Kɛ nzuewe kunnin be’n, a yoli maan nzue fin yɔbuɛ’n nun fiteli,+ yɛ mɛn nga a tali nda* kɛ á fá mán be’n, a seli be kɛ be wlu nun naan be fa yo be liɛ.

16 “Sanngɛ e nannan’m be tuli be wun,+ be yoli ɲin kekle,*+ b’a tieman ɔ nuan ndɛ mun. 17 B’a kplinman su kɛ bé tíe ɔ nuan ndɛ’n,+ be wla w’a kpɛnman sa dandan nga a yoli be be afiɛn’n be su, be yoli ɲin kekle,* be sieli kpɛn kun naan bé sá be sin kanga nun Ezipti lɔ.+ Sanngɛ a ti Ɲanmiɛn kun m’ɔ yaci sa cɛ-ɔ, ɔ klun ti ufue,* yɛ a si aunnvɔɛ, a faman ya ndɛndɛ, a klo sran dan,+ ɔ maan w’a yiman be ase.+ 18 Be yoli nannin ba kun, yɛ be seli kɛ: ‘Ɔ Ɲanmiɛn m’ɔ fali wɔ Ezipti lɔ fiteli’n yɛ ɔ o yɛ,’+ kpɛkun be yoli ɲin kekle dan. 19 Ɔ nin i sɔ ngba’n, ɔ aunnvɔɛ silɛ dan’n ti’n, w’a yiman be ase aawlɛ flɛnnɛn’n nun lɔ.+ Ɲanmiɛn ble tiaan m’ɔ kle be atin’n w’a jasoman be ti su wia nun. Yɛ sin taaman tiaan m’ɔ kle be atin kɔnguɛ’n, m’ɔ kpaja atin ng’ɔ fata kɛ be fa’n su’n, w’a jasoman be ɲrun.+ 20 A fali ɔ wawɛ’n mannin be naan be yo ngwlɛlɛfuɛ,+ a fali ɔ manin’n mannin be titi,+ yɛ kɛ nzuewe kunnin be’n, a mannin be nzue.+ 21 A mannin be aliɛ aawlɛ flɛnnɛn’n nun lɔ afuɛ ablanan (40).+ Like fi w’a mianman be sa. Be tralɛ’m b’a titiman,+ yɛ be ja’m b’a wunwunman.

22 “A fali Famiɛn diwlɛ mun nin nvlenvle mun mannin be, a cɛcɛli be nun mannin be.+ Ɔ maan be fali Siɔn+ i mɛn’n, yɛle kɛ Ɛsbɔn+ famiɛn’n i mɛn’n. Be fali Ɔgu+ m’ɔ ti Basan famiɛn’n i mɛn’n wie. 23 A yoli maan be mma’m be wa sɔnnin kpanngban kpa kɛ ɲanmiɛn su lɔ nzraama mun sa.+ Yɛ a fali be ɔli mɛn nga a tali be nannan’m be nda kɛ á fá mán be naan be wlu nun be fa yo be liɛ’n, i nun lɔ.+ 24 Ɔ maan be mma’m be wluli mɛn’n nun, kpɛkun be fa yoli be liɛ.+ A yoli maan be sa tinnin Kanaanfuɛ mɔ be tran mɛn’n nun’n be su,+ a fali be wlali be sa nun, be famiɛn mun-o, be nvle’n nunfuɛ mun-o, a fali be wlali be sa nun naan be yo be like nga be klo’n. 25 Be fali klɔ mɔ be wun ti sisiwa’n,+ ɔ nin mɛn kun mɔ lɔ asiɛ’n yo like ye’n,+ be fali sua mɔ ninnge kpakpa’m b’a yi be’n, ɔ nin nzue gbo mɔ b’a dun mmua b’a fu’n, ɔ nin viɲin fie, nin olivie fie,+ ɔ nin waka nga be di be mma’n i sɔ kpanngban kpa. Ɔ maan be dili, be ku yili, be yoli lɔklɔlɔklɔɔ, yɛ be dili fɛ ɔ klun ufue dan’n ti.

26 “Sanngɛ be ɲin w’a yiman wɔ, be yoli ɲin kekle ɔ su,+ yɛ be kacili be sin sili ɔ Mmla’n.* Be kunnin ɔ nuan ijɔfuɛ mɔ be se be kɛ be sa be sin ɔ wun’n, be yoli ɲin kekle dan ɔ su.+ 27 I sɔ’n ti’n, a fali be wlali be kpɔfuɛ’m be sa nun.+ Be kusu be kleli be ɲrɛnnɛn.+ Sanngɛ kɛ be kpan flɛli wɔ ɲrɛnnɛn blɛ sɔ’n nun’n, a o ɲanmiɛn su lɔ a tili. Ɔ aunnvɔɛ silɛ dan’n ti’n, a mannin be defuɛ mun, yɛ be deli be be kpɔfuɛ’m be sa nun.+

28 “Sanngɛ kɛ be ko ɲan be ti cɛ’n, be yo like ng’ɔ ti tɛ ɔ ɲrun’n ekun.+ Kɛ ɔ ko yo sɔ’n, a yaci be be kpɔfuɛ’m be sa nun, yɛ be kusu be tin be su.*+ I sin’n, be sa be sin be kpan flɛ wɔ.+ Kpɛkun a o ɲanmiɛn su lɔ a ti. A deli be kpɛ sunman, ɔ aunnvɔɛ silɛ dan’n ti.+ 29 Kannzɛ bɔbɔ a kan kleli be kɛ be sa be sin be fa ɔ Mmla’n su’n, sanngɛ be tuli be wun, b’a kplinman su kɛ bé tíe ɔ nuan ndɛ’n.+ Be yoli sa tɛ, afin ɔ afɔtuɛ mɔ sran ng’ɔ nanti be su’n ɔ ɲan nguan’n,+ b’a nantiman be su. Sanngɛ ɲin kekle yolɛ’n ti’n, be kacili be sin be sili wɔ, be keteli be kɔmin’n, yɛ b’a kplinman su kɛ bé tíe ɔ nuan ndɛ’n. 30 A trali ɔ awlɛn be wun+ afuɛ kpanngban. A fali ɔ wawɛ’n sinnin ɔ nuan ijɔfuɛ’m be lika kannin ndɛ kleli be titi, sanngɛ b’a kplinman su kɛ bé tíe. I agualiɛ su’n, a fali be wlali nvle’n nunfuɛ’m be sa nun.+ 31 Ɔ aunnvɔɛ silɛ dan’n ti’n, w’a nunnunman be,+ w’a yiman be ase, afin ɔ klun ti ufue,* a ti Ɲanmiɛn kun m’ɔ si aunnvɔɛ-ɔ.+

32 “Siɛn’n, e Ɲanmiɛn, Ɲanmiɛn m’ɔ ti dan’n, m’ɔ le tinmin’n, m’ɔ yo sro’n, m’ɔ di nda ng’ɔ ta’n su’n, m’ɔ kle kɛ ɔ klo sran dan’n,+ kɛ ɔ fɛ i Asiri famiɛn’m+ be blɛ su lele m’ɔ́ fá jú andɛ’n, ɲrɛnnɛn ng’ɔ tɔli e su’n, e nin e famiɛn mun, nin e famiɛn’m be awlo lɔ sran dandan mun,+ nin e Ɲanmiɛn ɲrun jranfuɛ mun,+ nin e Ɲanmiɛn nuan ijɔfuɛ mun,+ nin e nannan mun, nin ɔ nvlefuɛ’m be kwlaa be su’n, nán ɔ ɲin kpa be su. 33 Sa kwlaa nga be juli e su be nun’n, a kleli kɛ a yo sa i nuan su, afin a nin e nantili nanwlɛ su. E bɔbɔ yɛ e yoli sa tɛ-ɔ.+ 34 E famiɛn mun, nin e famiɛn’m be awlo lɔ sran dandan mun, nin e nannan’m b’a nantiman ɔ Mmla’n su, b’a buman ɔ nuan ndɛ’n, ɔ nin ndɛ nga a kan fa kpɛn be wla’n be like fi. 35 I kpa bɔbɔ’n, i nun mɔ be le be bɔbɔ be famiɛn mun’n, mɔ bé dí ninnge kpakpa nga a fa mannin be’n be su aklunjɔɛ’n, mɔ be o mɛn dan nga a fa mannin be mɔ i asiɛ’n yo like ye’n nun lɔ’n, b’a suman wɔ,+ yɛ b’a yaciman be sa tɛtɛ mun. 36 Ɔ maan andɛ’n e yɛ e o yɛ, y’a kaci kanga.+ Y’a kaci kanga mɛn nga a fa mannin e nannan mun kɛ be di i nun waka mma mun, ɔ nin i nun ninnge kpakpa mun’n i nun. 37 I nun ninnge kpanngban’m b’a kaci famiɛn nga e sa tɛ’m be ti’n,+ a fali be sieli e su’n be liɛ. Be sie e nin e nnɛn mun kɛ be fa klo’n sa. Ɔ maan e o ɲrɛnnɛn nun dan.

38 “I kwlaa sɔ’n ti’n, e nuan w’a sɛ ndɛ kun su,+ yɛ y’a klɛ i fluwa su. Famiɛn’n i awlo lɔ sran dandan mun, nin e Levifuɛ mun, nin e Ɲanmiɛn ɲrun jranfuɛ’m b’a fa be sa ti nzɔliɛ b’a sie su.”+

10 Be nga be fali be sa ti nzɔliɛ sieli su’n+ be yɛ:

Akalia i wa Neemin m’ɔ ti nvle siefuɛ’n,*

ɔ nin Sedesiasi, 2 Seraya, Azaria, Zeremin, 3 Pasii, Amaria, Malkia, 4 Atisi, Sebania, Maluku, 5 Arimun,+ Meremɔti, Abdiasi, 6 Daniɛli,+ Ginetɔn, Bariki, 7 Mesulamun, Abia, Abi, Mizamɛn, 8 Maazia, Bilgai, ɔ nin Semaia. Ɲanmiɛn ɲrun jranfuɛ mun yɛ be o lɛ-ɔ.

9 Levifuɛ’m be kusu be yɛ: Azania i wa Zesua, Binii m’ɔ fin Enadadi i osu’n nun’n, Kadimiɛli,+ 10 ɔ nin be niaan yasua mun: Sebania, Ɔdia, Kelita, Pelaia nin Anan, 11 Mise, Reɔbu, Asabia, 12 Zakiri, Serebia,+ Sebania, 13 Ɔdia, Banin, yɛ Beninun.

14 Nvlefuɛ’m be su kpɛn mun: Parɔsu, Paati-Moabu,+ Elamun, Zatu, Banin, 15 Bunin, Azgadi, Bebai, 16 Adonia, Bigvai, Adɛn, 17 Atɛɛ, Ezekiasi, Azuu, 18 Ɔdia, Asumun, Bezai, 19 Arifu, Anatɔtu, Nebai, 20 Magpiasi, Mesulamun, Ezii, 21 Mesezabɛli, Zadɔku, Zadua, 22 Pelatia, Anan, Anaya, 23 Oze, Anania, Asibi, 24 Aloɛsi, Pila, Sobɛki, 25 Reumun, Asabna, Maazeya, 26 Aia, Anan, Ananin, 27 Maluku, Arimun, ɔ nin Baana.

28 Nvlefuɛ onga mun, yɛle kɛ Ɲanmiɛn ɲrun jranfuɛ, nin Levifuɛ mun, nin anuan sunianfuɛ mun, nin jue tofuɛ mun, nin Ɲanmiɛn sua’n nun junman difuɛ mun,* ɔ nin be kwlaa nga be yili be wun nvle’n nunfuɛ’m be nun naan bé nánti Ɲanmiɛn Kpli i Mmla’n su’n,+ be nin be yi mun, nin be mma yasua mun nin be mma bla mun, nin be kwlaa nga be si sa mɔ be wun sa wlɛ’n,* 29 be wa ukali be niaan mun, nin be nga be le ɲrun’n be su. Be tali nda kɛ bé nían Ɲanmiɛn Kpli i Mmla’n su bé nánti, naan sɛ b’a nantiman su’n maan Ɲanmiɛn tu be fɔ. Be nuan sɛli su kɛ bé nánti mmla nga Ɲanmiɛn Kpli sinnin i sufuɛ Moizi i lika fa mannin be’n su, naan bé nían nun bé fá e Min Zoova i mmla mun, nin i afɔtuɛ mun, nin i ndɛ’m be su: 30 “E su faman e mma bla mun e manman nvle’n nunfuɛ mun, yɛ e su faman be mma bla mun e manman e mma yasua mun.+

31 “Sɛ nvle’n nunfuɛ’m be fa be aata dilɛ ninnge mun, nin aliɛ wafawafa’m* be ba kɛ bé yó be atɛ e sa nun Wunmiɛn-lolɛ-cɛn’n nun’n, e su toman like fi be sa nun Wunmiɛn-lolɛ-cɛn’n nun,+ annzɛ cɛn mɔ be ti Ɲanmiɛn liɛ klonglo’n+ nun. Afuɛ nso’n su’n,+ e su kpɛman fie’m be su ninnge mun, yɛ sɛ e kalɛ o sran su’n, é yáci i kwlaa é cɛ́.+

32 “Asa ekun’n, e fali ajalɛ kɛ afuɛ kwlaa nun’n é yí sika sikli kun* mɔ be bubuli nun nsan’n i bue kun é mán naan be fa di Ɲanmiɛn sua’n nun lɔ junman’n,+ 33 ɔ ti kpanwun nga be tian be wiengu su’n,*+ nin ble annzɛ i wunsu like nga be fa man Ɲanmiɛn titi’n,+ nin tɛ nga kɛ bé yí’n be yra nnɛn’n i kɔlikɔli’n mɔ be yi i titi Wunmiɛn-lolɛ-cɛn’n+ nun’n, nin anglo le kun mun,+ ɔ nin cɛn nga be di be blɛ trele wie’m be nun’n,+ nin ninnge mɔ be ti Ɲanmiɛn liɛ klonglo’n, nin sa tɛ’n i ti tɛ+ nga be yi be fa kpata Izraɛlifuɛ’m be ti’n, ɔ nin Ɲanmiɛn sua’n nun lɔ junman kwlaa be dilɛ liɛ.

34 “Asa ekun’n, e tuli fɔtɔ naan é sí blɛ trele ng’ɔ fata kɛ Ɲanmiɛn ɲrun jranfuɛ’m be si’m be awlobo mun, nin Levifuɛ mun be si’m be awlobo mun, nin nvlefuɛ’m be si’m be awlobo mun be fa yie be bla Ɲanmiɛn sua’n nun afuɛ kwlakwla’n, naan be yrɛ i e Ɲanmiɛn Zoova i tɛ yiwlɛ’n su, kɛ nga be fa klɛli i Moizi i mmla’n nun’n sa.+ 35 Asa kusu’n, afuɛ kwlakwla’n, é fá e fie’m be su ninnge klikli mun, nin waka wafawafa kwlaa be su mma klikli mun é kɔ́ Zoova i sua’n nun lɔ,+ 36 ɔ nin e mma yasua klikli mun, nin e nnɛn’m be mma klikli mun,+ kɛ nga be fa klɛli i Mmla’n nun’n sa, ɔ nin e nannin nin e bua nin e boli’m be mma klikli mun. É fá be kɔ́ e Ɲanmiɛn’n i sua’n nun lɔ, é fá be é mán Ɲanmiɛn ɲrun jranfuɛ nga be di junman e Ɲanmiɛn’n i sua’n nun lɔ’n.+ 37 Asa ekun’n, é fá e ninnge’m be mma klikli’n be sanmlɛn klikli ng’ɔ timan mlɛnnɛnnɛn’n,+ nin like ng’ɔ fata kɛ e fa man’n, ɔ nin waka wafawafa mun+ be su mma klikli mun, ɔ nin duvɛn lɔflɛ’n, nin ngo’n+ é fá mán Ɲanmiɛn ɲrun jranfuɛ mun naan be fa sie i e Ɲanmiɛn’n i sua nun lɔ,+ ninnge siewlɛ’m* be nun. Yɛ é fá e fie’m be su ninnge’m be blusu’n é mán Levifuɛ mun,+ afin be yɛ be fa e klɔ’m be su fie’m be su ninnge’m be blusu’n niɔn.

38 “Kɛ bé fá fie’m be su ninnge’m be blusu’n bé mán Ɲanmiɛn ɲrun jranfuɛ mun’n, maan Ɲanmiɛn ɲrun jranfuɛ kun m’ɔ ti Aarɔn i osu nunfuɛ’n ɔ tran be nun. Yɛ maan Levifuɛ mun be fa fie’m be su ninnge’m be blusu’n i blusu’n be fa wɔ e Ɲanmiɛn’n i sua’n nun lɔ,+ sua ba’m* be nun, kan be sie ninnge’m be lɔ’n. 39 Afin ninnge siewlɛ’m* be nun yɛ ɔ fata kɛ Izraɛlifuɛ mun, nin Levifuɛ’m be mma mun be fa be aliɛ* nga be fa man’n,+ nin be duvɛn lɔflɛ’n, nin be ngo’n+ be man-ɔn. Lɔ yɛ be sie Ɲanmiɛn sua’n nun ninnge mun-ɔn, yɛ lɔ yɛ Ɲanmiɛn ɲrun jranfuɛ mɔ be di Ɲanmiɛn junman’n, nin anuan sunianfuɛ mun, nin jue tofuɛ mun be o-ɔ. E ɲin su kpaman e Ɲanmiɛn’n i sua’n su.”+

11 Nvlefuɛ’m be nun sran dandan’m be trannin Zerizalɛmun.+ Sanngɛ nvlefuɛ onga’m be liɛ’n, be tuli be wun fɔtɔ.+ Kɛ be tu awlobo blu i wun fɔtɔ’n, be nun kun tran Zerizalɛmun klɔ m’ɔ ti Ɲanmiɛn liɛ klonglo’n su lɛ. Kpɛkun awlobo ngwlan onga’m be tran klɔ uflɛ’m be su. 2 Asa ekun’n, nvlefuɛ’m be boli muae mannin be kwlaa nga be klun klo su be trannin Zerizalɛmun lɛ’n.

3 Nvle su kpɛn nga be trannin Zerizalɛmun’n be yɛ. (Izraɛlifuɛ onga mun, Ɲanmiɛn ɲrun jranfuɛ mun, Levifuɛ mun, Ɲanmiɛn sua’n nun lɔ junman difuɛ mun,*+ ɔ nin Salomɔn i sufuɛ’m be mma’m+ be trannin Zida klɔ onga’m be su, sran kun trɛn i bɔbɔ i lika ng’ɔ o i klɔ’n su’n i nun.+

4 Asa ekun’n, Zida nin Bɛnzamɛn akpasua’n sufuɛ wie’m be trannin Zerizalɛmun lɛ.) Zida akpasua’n sufuɛ wie mun yɛle Ataia, ɔ ti Oziasi i wa, Oziasi kusu ti Zakari i wa, Zakari ti Amaria i wa, Amaria ti Sefatia i wa, Sefatia ti Maalalɛli i wa. Be fin Perɛzi i osu’n nun,+ 5 ɔ nin Maazeya, ɔ ti Bariki i wa, Bariki kusu ti Koloze i wa, Koloze ti Azaya i wa, Azaya ti Adaya i wa, Adaya ti Zoiaribu i wa, Zoiaribu ti Zakari i wa, yɛ Zakari ti Sela i wa. 6 Perɛzi i mma nga be trannin Zerizalɛmun lɛ’n, be kwlaa be ti ya nnan ablesiɛn-nin-mɔcuɛ (468), be ti yasua kpakpa ngunmin.

7 Bɛnzamɛn akpasua’n sufuɛ mun: Salu+ m’ɔ ti Mesulamun i wa’n, i kusu ti Zoɛdi i wa, Zoɛdi ti Pedaya i wa, Pedaya ti Kolaia i wa, Kolaia ti Maazeya i wa, Maazeya ti Itiɛli i wa, Itiɛli ti Zesaya i wa. 8 I sin liɛ’n yɛle Gabai nin Salai, be kwlaa be ti sran ya ngwlan ablaɔn-nin-mɔcuɛ (928). 9 Klɔ’n su’n, Zikri i wa Zoɛli ti be sunianfuɛ, yɛ Asenia i wa Zida yɛ ɔ mɛntɛn i-ɔ.

10 Ɲanmiɛn ɲrun jranfuɛ mun: Zoiaribu i wa Zedaia, nin Zakɛn,+ 11 ɔ nin Seraya m’ɔ ti Ilkia i wa’n, i kusu ti Mesulamun i wa, Mesulamun ti Zadɔku i wa, Zadɔku ti Merayɔti i wa, Merayɔti ti Aitubu+ i wa, ɔ ti Ɲanmiɛn Kpli i sua’n nun lɔ kpɛn’n kun, 12 ɔ nin be niaan nga be di sua’n nun lɔ junman’n. Be kwlaa be ti sran ya mɔcuɛ ablaɔn-nin-nɲɔn (822). Yɛ Adaya, ɔ ti Zeroamun i wa, Zeroamun kusu ti Pelalia i wa, Pelalia ti Amzi i wa, Amzi ti Zakari i wa, Zakari ti Pasii i wa, Pasii+ ti Malkia i wa, 13 ɔ nin be niaan yasua mun. Be ti be si’m be awlobo’m be su kpɛn, be kwlaa be ti sran ya nɲɔn ablanan-nin-nɲɔn (242). Yɛ Amasisai, ɔ ti Azarɛli i wa, Azarɛli kusu ti Azai i wa, Azai ti Mesilemɔti i wa, Mesilemɔti ti Imɛɛ i wa, 14 ɔ nin be niaan yasua mun, be kwlaa be ti sran ya kun ablaɔn-nin-mɔcuɛ (128), be ti alɛ kunfuɛ kpakpa mun, yɛ be ti yakpafuɛ. Be sunianfuɛ’n yɛle Zabdiɛli, ɔ fin awlo kun m’ɔ le ɲrun kpa’n nun.

15 Levifuɛ mun: Semaia,+ ɔ ti Asibi i wa, Asibi kusu ti Azrikamun i wa, Azrikamun ti Asabia i wa, Asabia ti Bunin i wa, 16 ɔ nin Sabetai,+ nin Zozabadi,+ be ti Levifuɛ’m be su kpɛn. Be yɛ be nian Ɲanmiɛn Kpli i sua’n i sin lɔ junman’n su-ɔ, 17 ɔ nin Matania,+ ɔ ti Mise i wa, Mise kusu ti Zabdi i wa, Zabdi ti Azafu i wa,+ ɔ ti jue tofuɛ’m be su kpɛn. Kɛ bé srɛ́ Ɲanmiɛn’n, i yɛ ɔ man Ɲanmiɛn i manmanlɛ jue’m be su-ɔ.+ Ɔ nin Bakibukia m’ɔ ti i niaan nɲɔn su’n, nin Abda, ɔ ti Samia i wa, Samia kusu ti Galali i wa, Galali ti Zeditɛn+ i wa. 18 Levifuɛ nga be tran klɔ m’ɔ ti Ɲanmiɛn liɛ klonglo’n su’n, be kwlaa be ti sran ya nɲɔn ablaɔcuɛ-nin-nnan (284).

19 Anuan sunianfuɛ mun: Akibu, Talmɔn,+ ɔ nin be niaan yasua nga be nian anuan’m be su’n. Be kwlaa be ti sran ya kun ableso-nin-nɲɔn (172).

20 Izraɛlifuɛ onga mun, Ɲanmiɛn ɲrun jranfuɛ mun, nin Levifuɛ’m be trannin Zida klɔ onga’m be su, sran kun trɛn i bɔbɔ i lika liɛ’n nun. 21 Ɲanmiɛn sua’n nun lɔ junman difuɛ’m*+ be trannin Ofɛli.+ Be sunianfuɛ mun yɛle Zia, nin Gispa.

22 Levifuɛ nga be trannin Zerizalɛmun’n be sunianfuɛ’n yɛle Uzi, ɔ ti Banin i wa, Banin kusu ti Asabia i wa, Asabia ti Matania i wa, Matania+ ti Mise i wa. Be fin Azafu i osu’n nun, be ti jue tofuɛ. I yɛ ɔ nian Ɲanmiɛn Kpli i sua’n nun lɔ junman’n su-ɔ. 23 Famiɛn’n kpɛli be wun mmla,+ yɛ cɛn kwlakwla’n be man be sika nuan trele nga be sa miɛn i wun’n. 24 Yɛ Petaya, ɔ ti Mesezabɛli i wa, Mesezabɛli kusu ti Zera i wa, Zera ti Zida i wa, ɔ ti famiɛn’n i afɔtuɛ manfuɛ.* Ɔ man famiɛn’n i afɔtuɛ ndɛ kwlaa nga nvlefuɛ’m be fa ba’n su.

25 Klɔ kanngan nin be fie’m be liɛ’n, Zida akpasua’n sufuɛ wie’m be trannin Kiriati-Aaba+ nin i wun lɛ klɔ’m* be su, ɔ nin Dibɔn nin i wun lɛ klɔ’m be su, yɛ Zekabzeɛli+ nin i wun lɛ klɔ’m be su, 26 nin Zesua, nin Molada,+ nin Bɛti-Pelɛti,+ 27 nin Azaa-Siali,+ nin Beɛ-Seba nin i wun lɛ klɔ’m* be su, 28 ɔ nin Ziklagi,+ nin Mekona nin i wun lɛ klɔ’m* be su, 29 nin An-Rimɔn,+ nin Zora,+ nin Zaamiti, 30 nin Zanoa,+ nin Adulamun nin klɔ kanngan nga be mantan be’n, nin Lakisi+ nin i fie mun, ɔ nin Azeka+ nin i wun lɛ klɔ’m* be su. Be trannin* Beɛ-Seba lele fa juli Inɔmun Kongo’n+ nun lɔ.

31 Bɛnzamɛn akpasua’n sufuɛ’m be trannin Geba,+ nin Mikimasi, nin Aiya, nin Betɛli+ nin i wun lɛ klɔ’m* be su, 32 nin Anatɔtu,+ nin Nɔbu,+ nin Anania, 33 nin Azɔɔ, nin Rama,+ nin Gitaimun, 34 nin Adidi, nin Zɛbɔimun, nin Nebalati, 35 nin Lɔdu, nin Ono,+ nin ajuin difuɛ’m be kongo’n nun. 36 Levifuɛ’m be akpasua’n sufuɛ wie mɔ be fin Zida’n, be trannin Bɛnzamɛn i lika liɛ’n nun.

12 Ɲanmiɛn ɲrun jranfuɛ mun, nin Levifuɛ nga be nin Sealtiɛli+ i wa Zorobabɛli,+ nin Zesua+ be ɔli’n be yɛ: Seraya, Zeremin, Ɛsdrasi, 2 Amaria, Maluku, Atisi, 3 Sekania, Reumun, Meremɔti, 4 Ido, Ginetoi, Abia, 5 Mizamɛn, Maadia, Bilga, 6 Semaia, Zoiaribu, Zedaia, 7 Salu, Amɔku, Ilkia, nin Zedaia. Zesua blɛ su’n, Ɲanmiɛn ɲrun jranfuɛ’m be su kpɛn mun nin be niaan mun yɛ be o lɛ-ɔ.

8 Levifuɛ mun: Zesua, Binii, Kadimiɛli,+ Serebia, Zida, ɔ nin Matania.+ Be nin be niaan mun yɛ be man Ɲanmiɛn i ase lalɛ jue’m be su-ɔ. 9 Bakibukia, nin Unin, nin be niaan’m be jinjin be ɲrun ndɛnman su lɛ yɛ be di gladi’n niɔn.* 10 Zesua wuli Zoiakimun, Zoiakimun wuli Eliasibu,+ Eliasibu wuli Zoiada.+ 11 Zoiada wuli Zonatan, Zonatan wuli Zadua.

12 Zoiakimun i blɛ su’n, Ɲanmiɛn ɲrun jranfuɛ nga be ti be si’m be awlobo’m be su kpɛn’n be yɛ: Seraya+ i awlobo’n su kpɛn’n yɛle Meraya, Zeremin liɛ’n yɛle Anania. 13 Ɛsdrasi+ liɛ’n yɛle Mesulamun. Amaria liɛ’n yɛle Zoanan. 14 Maliki liɛ’n yɛle Zonatan. Sebania liɛ’n yɛle Zozɛfu. 15 Arimun+ liɛ’n yɛle Adna. Merayɔti liɛ’n yɛle Ɛlkai. 16 Ido liɛ’n yɛle Zakari. Ginetɔn liɛ’n yɛle Mesulamun. 17 Abia+ liɛ’n yɛle Zikri. Miniamin liɛ’n yɛle. . . .* Moadia liɛ’n yɛle Pilitai. 18 Bilga+ liɛ’n yɛle Samia. Semaia liɛ’n yɛle Zoonatan. 19 Zoiaribu liɛ’n yɛle Matenai. Zedaia+ liɛ’n yɛle Uzi. 20 Salai liɛ’n yɛle Kalai. Amɔku liɛ’n yɛle Ebɛɛ. 21 Ilkia liɛ’n yɛle Asabia. Zedaia liɛ’n yɛle Netanɛli.

22 Eliasibu, nin Zoiada, nin Zoanan, ɔ nin Zadua+ be blɛ su’n, be klɛli Levifuɛ’m be si’m be awlobo’m be su kpɛn mun, nin Ɲanmiɛn ɲrun jranfuɛ’m be dunman. Be klɛli be dunman lele fa juli Dariisi m’ɔ ti Pɛɛsifuɛ’n i famiɛn dilɛ blɛ’n su.

23 Levifuɛ nga be ti be si’m be awlobo’m be su kpɛn’n, be klɛli be dunman fluwa nga be klɛ sa nga be ju’n nun’n i nun. Be klɛli be dunman lele fa juli Eliasibu i wa Zoanan i blɛ su. 24 Levifuɛ’m be su kpɛn mun yɛle Asabia, nin Serebia, nin Zesua+ m’ɔ ti Kadimiɛli+ i wa’n. Be niaan yasua’m be jinjin be ɲrun ndɛnman su lɛ, be manman Ɲanmiɛn yɛ be lɛ i ase, kɛ nga Davidi m’ɔ ti Ɲanmiɛn Kpli i sran’n seli kɛ be yo’n sa.+ Gladi difuɛ’m be ti akpasuaakpasua, akpasua kun o i wiengu akpasua uflɛ wun lɛ. 25 Matania,+ nin Bakibukia, nin Abdiasi, nin Mesulamun, nin Talmɔn, ɔ nin Akibu+ mɔ be di gladi’n, be ti anuan sunianfuɛ.+ Be nian ninnge siewlɛ nga be o anuan’m be wun lɛ’n be su. 26 Be dili be junman’n Zoiakimun m’ɔ ti Zesua+ i wa’n, mɔ i kusu ti Zozadaki i wa’n i blɛ su, ɔ nin Neemin m’ɔ ti nvle siefuɛ’n, nin Ɛsdrasi+ m’ɔ ti Ɲanmiɛn ɲrun jranfuɛ nin fluwa klɛfuɛ’n* be blɛ su.

27 Kɛ bé yí Zerizalɛmun klɔ’n i wun talɛ’n i nglo’n, be kunndɛli Levifuɛ mun lika nga be tran nun’n i kwlaa nun, kpɛkun be fa be bali Zerizalɛmun lɛ, naan be to Ɲanmiɛn i ase lalɛ jue mun,+ naan be bo sɛnbali nin miziki bolɛ ninnge nga be le ɲanman’n nin jru. Be fa yi talɛ’n i nglo aklunjɔɛ su. 28 Jue tofuɛ’m be mma’m* be ti yiali, be fin Zurdɛn’n i lika kpɛtɛkplɛɛ’n nun lɔ, nin Zerizalɛmun i wun lɛ klɔ’m be kwlaa be su, ɔ nin Netofafuɛ’m+ be klɔ kanngan’m be su, 29 ɔ nin Bɛti-Gilgali,+ nin fie nga be o Geba+ nin Azmavɛti+ lɔ’n be su. Afin jue tofuɛ’m be kplannin be klɔ kanngan mun Zerizalɛmun klɔ’n i wun lɛ. 30 Ɲanmiɛn ɲrun jranfuɛ mun, nin Levifuɛ mun be yoli be wun sanwun,+ be yoli nvlefuɛ’m be sanwun, yɛ be yoli anuan mun,+ nin talɛ’n+ be sanwun.

31 I sin’n, n yoli maan Zida lɔ sran dandan’m be fuli talɛ’n su. Kpɛkun n sieli jue tofuɛ akpasua dandan nɲɔn naan be to jue be la Ɲanmiɛn ase, yɛ n fali sran wie mun naan be su be su. Akpasua kun sinnin talɛ’n i fama su ɔli Nzuɛn Kwle Anuan’n+ su lɔ. 32 Osaya nin Zida lɔ sran dandan’m be bue kun suli be su, 33 be nin Azaria, nin Ɛsdrasi, nin Mesulamun, 34 nin Zida, nin Bɛnzamɛn, nin Semaia, nin Zeremin. 35 Ɲanmiɛn ɲrun jranfuɛ’m be mma’m be nun wie mɔ awɛ+ o be sa nun’n be suli be su: Zakari, ɔ ti Zonatan i wa, Zonatan kusu ti Semaia i wa, Semaia ti Matania i wa, Matania ti Mikaya i wa, Mikaya ti Zakiri i wa, Zakiri ti Azafu+ i wa, 36 ɔ nin i niaan bian Semaia, nin Azarɛli, nin Milalai, nin Gilalai, nin Maai, nin Netanɛli, nin Zida, ɔ nin Ananin. Be fali Davidi m’ɔ ti Ɲanmiɛn Kpli i sran’n i miziki bolɛ ninnge mun.+ Yɛ Ɛsdrasi+ m’ɔ ti fluwa klɛfuɛ’n* ɔ dun mmua be ɲrun. 37 Kɛ be juli Nzue Ti Anuan’n+ su lɛ’n, be sinnin talɛ’n i su fuwlɛ m’ɔ o Davidi Sua’n i ti su nglo’n su be ɔli Davidi Klɔ’n+ i Asikalie’n+ su lɔ trelele, kpɛkun be juli Nzue Anuan’n+ su lɔ, wia afiliɛ lɔ.

38 Be nga be to jue be la Ɲanmiɛn ase’n be akpasua kun’n sinnin bue uflɛ su.* E nin nvlefuɛ’m be bue kun e suli be su. E nantili talɛ’n su, e sinnin Kpanwun Tɔnwlɛ Fleiin’n+ su e ɔli Talɛ Dan’n+ su lɔ. 39 E sinnin Efraimun Anuan’n+ su e ɔli Klɔ Laa Anuan’n+ su lɔ. E ɔli lele e juli Jue Anuan’n,+ ɔ nin Ananɛli Sua Fleiin’n,+ ɔ nin Mea Sua Fleiin’n, ɔ nin Bua Anuan’n+ su lɔ, yɛ e jrannin Gladi Dilɛ Anuan’n su lɛ.

40 I sin’n, jue tofuɛ akpasua nɲɔn nga be to jue be la Ɲanmiɛn i ase’n be jrannin Ɲanmiɛn Kpli i sua’n i ɲrun lɛ. Ɔ maan e nin famiɛn’n i janunfuɛ’m be bue kun ng’ɔ o min wun lɛ’n e jrannin wie, 41 e nin Ɲanmiɛn ɲrun jranfuɛ Eliakimun, nin Maazeya, nin Miniamin, nin Mikaya, nin Elionai, nin Zakari, ɔ nin Anania be nin be sa nun awɛ, 42 nin Maazeya, nin Semaia, nin Eleazaa, nin Uzi, nin Zoanan, nin Malkia, nin Elamun, ɔ nin Ezɛɛ. Jue tofuɛ’m be mannin be nɛn’n su kekle kpa be toli jue. Izraya yɛ ɔ nian be su-ɔ.

43 Cɛn sɔ’n nun’n be yili tɛ kpanngban, yɛ be dili aklunjɔɛ.+ Afin Ɲanmiɛn Kpli yoli maan be klun jɔli dan. Bla mun nin ba kanngan mun be dili aklunjɔɛ wie.+ Ɔ maan Zerizalɛmunfuɛ’m be aklunjɔɛ sɔ’n ti’n, be tili be ngan mmua lɔ.+

44 Cɛn sɔ’n nun’n, be sieli sran wie mun naan be nian sua nga be fa ninnge nga be fa man’n,+ nin ninnge’m be mma klikli’n,+ nin ninnge’m be blusu+ be gua nun’n+ be su. Ɔ fata kɛ sran sɔ’m be fa fie nga be o klɔ’m be wun’n be su ninnge nga mmla’n se kɛ be fa man+ Ɲanmiɛn ɲrun jranfuɛ mun, nin Levifuɛ mun’n,+ be sie i sua sɔ’m be nun. Nanwlɛ, Zida lɔ’n sran’m be dili aklunjɔɛ, afin Ɲanmiɛn ɲrun jranfuɛ mun nin Levifuɛ’m be dili be junman’n. 45 Be boli be Ɲanmiɛn’n i junman’m be dilɛ bo, be yoli be wun sanwun. Jue tofuɛ mun nin anuan sunianfuɛ’m be yoli be wun sanwun wie, kɛ nga Davidi nin i wa Salomɔn be seli kɛ be yo’n sa. 46 Laa’n, Davidi nin Azafu be blɛ su’n, ɔ le jue tofuɛ’m be su kpɛn mun. Be yɛ be tinngɛ Ɲanmiɛn manmanlɛ jue mun nin i ase lalɛ jue mun-ɔn.+ 47 Zorobabɛli+ blɛ su’n, ɔ nin Neemin i blɛ su’n, Izraɛlifuɛ’m be kwlaa be man jue tofuɛ mun,+ nin anuan sunianfuɛ mun+ be like nga be sa miɛn i wun cɛn ba kun nun’n. Asa ekun’n, be man Levifuɛ’m be like liɛ, yɛ Levifuɛ’m+ be kusu be fa ng’ɔ ti Aarɔn i mma’m be liɛ’n be man be.

13 Cɛn sɔ’n nun’n, be kanngannin Moizi i fluwa’n nun naan nvlefuɛ’m be tie,+ yɛ be wunnin kɛ ɔ fataman kɛ Amɔnfuɛ mun nin Moabufuɛ’m+ be wlu Ɲanmiɛn Kpli i nvlefuɛ’m be nun mlɔnmlɔn.+ 2 Afin b’a faman kpanwun nin nzue b’a kpaman Izraɛlifuɛ’m be atin. I kpa bɔbɔ’n, be mannin Balaamun i sika kɛ ɔ bo be sannzan.+ Sanngɛ e Ɲanmiɛn’n yoli maan sannzan sɔ’n kacili suyralɛ.+ 3 Kɛ be tili Mmla’n cɛ’n, be yili aofuɛ mun* Izraɛlifuɛ’m be nun.+

4 Sanngɛ kwlaa naan sa sɔ’n w’a ju’n, Ɲanmiɛn ɲrun jranfuɛ ng’ɔ nian e Ɲanmiɛn’n i sua’n nun lɔ ninnge siewlɛ’m*+ be su’n yɛle Eliasibu,+ ɔ ti Tobia+ i osufuɛ. 5 Ɔ fali ninnge siewlɛ* dan kun mɛnnin i. Laa’n, lɔ yɛ be sie ble annzɛ i wunsu like mɔ be fa man Ɲanmiɛn’n, nin ansan ufue, nin Ɲanmiɛn sua’n nun lɔ junman dilɛ ninnge mun, nin aliɛ’n,* nin duvɛn lɔflɛ’n, nin ngo’n+ be blusu’n, mɔ be ti Levifuɛ mun,+ nin jue tofuɛ mun, nin anuan sunianfuɛ’m be liɛ’n, ɔ nin ninnge nga be fa man Ɲanmiɛn ɲrun jranfuɛ mun-ɔn.+

6 Blɛ kwlaa sɔ’n nun’n, nn n nunman Zerizalɛmun lɔ. Afin kɛ Babilɔnin famiɛn Atazɛɛzɛsi+ kacili famiɛn’n i afuɛ ablasan-nin-nɲɔn’n (32) su’n,+ n ɔli i wun lɔ. Yɛ kɛ ɔ cɛli kan’n n srɛli i atin. 7 I sin’n, n sali min sin Zerizalɛmun, yɛ n wunnin sa tɛ dan nga Eliasibu+ yoli’n. Ɔ fali Ɲanmiɛn Kpli i awlo’n nun ninnge siewlɛ kun mannin Tobia.+ 8 I sɔ’n w’a yoman min fɛ kaan sa, naan m’an fa Tobia i ninnge mun ninnge siewlɛ’n* nun m’an guɛ i gua su lɔ. 9 I sin’n, n seli kɛ maan be yo ninnge siewlɛ’m* be sanwun. Kpɛkun n fali Ɲanmiɛn Kpli i sua’n nun ninnge mun n sieli be be osu’n nun,+ ɔ nin ble nin i wunsu like mɔ be fa man Ɲanmiɛn’n, nin ansan ufue’n.+

10 Asa ekun’n, n wunnin kɛ ninnge ng’ɔ fata kɛ be fa man Levifuɛ mun’n,+ b’a fa manman be.+ Ɔ maan Levifuɛ mun nin jue tofuɛ’m be yacili be junman’n i dilɛ, be tinuntinun be ɔli be fie’m be su.+ 11 Ɔ maan n ijɔli famiɛn’n i janunfuɛ mun,+ n seli be kɛ: “?Ngue ti yɛ amun ɲin kpali Ɲanmiɛn Kpli i sua’n su-ɔ?”+ I sin’n, n yiali be naan m’an fa be m’an sie be junman’n su ekun. 12 Zidafuɛ’m be kwlaa be fali be aliɛ’m* be blusu’n,+ nin be duvɛn lɔflɛ’n, nin be ngo’n be bali ninnge siewlɛ’m be nun.+ 13 I sin’n, n sieli Selemia m’ɔ ti Ɲanmiɛn ɲrun jranfuɛ’n, nin Zadɔku m’ɔ ti fluwa klɛfuɛ’n,* nin Pedaya m’ɔ ti Levifuɛ’n be kɛ be nian ninnge siewlɛ’m be su. Yɛ n fali Anan m’ɔ ti Zakiri i wa’n, mɔ i kusu ti Mataniya i wa’n kɛ ɔ uka be. Be kwlaa sɔ’n be ti sran mɔ be kwla lafi be su-ɔ. Be yɛ be fa ninnge mun be cɛcɛ be niaan mun-ɔn.

14 Ee min Ɲanmiɛn, maan ɔ wla kpɛn min su,+ sa sɔ’n ti. Nán ɔ wla fi klolɛ dan mɔ n kleli kɛ n klo ɔ sua’n, ɔ nin junman nga be di i lɔ’n be su.+

15 Blɛ sɔ’n nun’n, n wunnin kɛ Zida nvle’n nun sran wie mun be yi duvɛn* Wunmiɛn-lolɛ-cɛn’n nun.+ Be tian aliɛ* kpanngban nuan be fa sie be aflunmun’m be su, be fa duvɛn nin viɲin mma, nin figie, nin trɔ wafawafa kwlaa be ba Zerizalɛmun Wunmiɛn-lolɛ-cɛn’n nun.+ Ɔ maan n seli be kɛ nán maan be yo like atɛ cɛn sɔ’n nun.* 16 Yɛ Tirfuɛ wie mɔ be tran klɔ’n su’n, be fa jue, nin aata dilɛ ninnge wafawafa wie mun be ba, be yo be atɛ Zidafuɛ’m be sa nun Zerizalɛmun lɔ Wunmiɛn-lolɛ-cɛn’n nun.+ 17 Ɔ maan n ijɔli Zida lɔ sran dandan mun, n seli be kɛ: “?Ngue yɛle sa tɛ dan nga amun su yo i yɛ’n? Amun diman Wunmiɛn-lolɛ-cɛn’n su bɔbɔ! 18 ?Nɛ́n i sɔ yɛ amun nannan’m be yoli mɔ ɲrɛnnɛn kwlaa nga mun be tɔli e su mɔ be tɔli klɔ’n su wie’n niɔn? Siɛn’n, amun su yo maan Ɲanmiɛn i ya ng’ɔ fɛli i Izraɛlifuɛ’m be wun’n, ɔ́ yó dan ekun trá laa’n, afin amun diman Wunmiɛn-lolɛ-cɛn’n su.”+

19 I sɔ’n ti’n, kɛ lika’n wá yó kɛ ɔ́ lú’n, kwlaa naan Wunmiɛn-lolɛ-cɛn’n w’a ju’n, n seli kɛ maan be ɲin Zerizalɛmun klɔ’n i anuan mun. Asa ekun’n, n seli kɛ sɛ Wunmiɛn-lolɛ-cɛn’n nin-a sinman’n nán maan be tike be. N sieli min bɔbɔ min sufuɛ mun anuan’m be nun lɛ naan sran fi w’a faman trɔ w’a wluman klɔ’n nun Wunmiɛn-lolɛ-cɛn’n nun. 20 Ɔ maan aata difuɛ mun, nin be nga be yo aata dilɛ ninnge wafawafa wie’m be atɛ’n be lali Zerizalɛmun klɔ’n i sin kɔnguɛ kun annzɛ nɲɔn. 21 I sin’n, n ijɔli be yɛ n seli be kɛ: “?Ngue ti yɛ amun la talɛ’n i sin-ɔn? Sɛ amun yo sɔ ekun’n, ń má kán amun bo kekle nun.” Kɛ ɔ fɛ i lɛ’n, b’a baman Wunmiɛn-lolɛ-cɛn’n nun kun.

22 N seli Levifuɛ’m be kɛ be yo be wun sanwun titi naan be bla be wa nian anuan’m be su naan sran fi w’a yoman Wunmiɛn-lolɛ-cɛn’n i finfin.+ Ee min Ɲanmiɛn, nga n yoli i ekun lɛ’n ti’n, maan ɔ wla kpɛn min su naan yra min su, si min aunnvɔɛ ɔ sran klolɛ dan’n ti.+

23 Blɛ sɔ’n nun kusu’n, n wunnin kɛ Zifu wie’m be jali Asdɔdu,+ nin Amɔn nin Moabu+ bla mun.*+ 24 Be mma’m be bue be kan Asdɔdu aniɛn’n, yɛ be bue be kan nvle uflɛ’m be aniɛn’n. Sanngɛ be nun wie fi siman Zifu’m be aniɛn’n i kan. 25 Ɔ maan n ijɔli be, n boli be sannzan, yɛ n boli be nun yasua wie mun,+ n tutuli be timuɛn mun, yɛ n yoli maan be tali nda Ɲanmiɛn ɲrun. N seli be kɛ: “Ɔ fataman kɛ amun fa amun mma bla mun be man be mma yasua mun, yɛ ɔ fataman kɛ amun ja be mma bla mun be man amun mma yasua mun yɛ ɔ fataman kɛ amun bɔbɔ amun ja be mma bla mun.+ 26 ?Nán sa sɔ’n ti yɛ Famiɛn Salomɔn m’ɔ ti Izraɛli famiɛn’n yoli sa tɛ’n niɔn? Nvle kpanngban nga be o mɛn’n nun’n, be nun famiɛn fi nin i sɛman,+ yɛ i Ɲanmiɛn’n kloli i dan,+ ɔ maan ɔ sieli i famiɛn Izraɛli mɛn’n i kwlaa su. Sanngɛ ɔ nin i sɔ ngba’n, aofuɛ bla’m be yoli maan ɔ yoli sa tɛ.+ 27 ?Yɛ nn ngue ti yɛ amun kwla yo tete sa kɛ nga sa-ɔ? ?Ngue ti yɛ amun ko jali aofuɛ bla mun mɔ amun yoli sa tɛ dan kɛ nga sa amun Ɲanmiɛn’n i ɲrun-ɔn?”+

28 Eliasibu+ m’ɔ ti Ɲanmiɛn ɲrun jranfuɛ’n i wa Zoiada+ i mma’m be nun kun ti Sanbala+ m’ɔ ti Orɔnfuɛ’n i sia. Ɔ maan n kɛnnin i bo min wun lɛ.

29 Ee min Ɲanmiɛn, nán ɔ wla fi be su, afin be yoli Ɲanmiɛn ɲrun jranlɛ junman’n, nin Ɲanmiɛn ɲrun jranlɛ aenguɛ’n+ ɔ nin Levifuɛ’m+ be finfin.

30 N yoli be sanwun afin aofuɛ’m be ti’n be yoli fiɛn. N mannin Ɲanmiɛn ɲrun jranfuɛ mun, nin Levifuɛ’m be junman naan be tinuntinun be di be junman mun.+ 31 N fali ajalɛ wie mun naan be fa yie be bla+ blɛ ng’ɔ ti i nuan su’n i su, naan be fa be fie’m be su ninnge klikli nga be kpɛ’n be bla.

Ee min Ɲanmiɛn, maan ɔ wla kpɛn min su, naan yo min ye.+