NGƆJUE FƐFƐ KPA’N (SALOMƆN I JUE’N)

 2 “Maan ɔ fɛ i nuan’n wɔwɔ min wun,

afin wafa nga a kle min kɛ a klo min’n, i kpa liɛ’n ɔ tra duvɛn.+

 3 Ɔ ngo’m be bɔn fannin dan.+

Ɔ dunman’n ti kɛ ngo fanninfannin mɔ be fa guɛguɛ i lika’n nun’n sa.+

I sɔ’n ti yɛ talua’m be klo wɔ’n niɔn.

 4 Fa min naan e wɔ,* maan e wanndi.

Famiɛn’n fali min wluli i sua ba’m be nun lɔ!

Maan e klun jɔ, yɛ e di aklunjɔɛ likawlɛ.

Maan e yi klolɛ nga a fa klo min’n* mɔ i kpa tra duvɛn’n i nglo.

Sɛ be* klo wɔ’n, nán ngbɛn ti-ɔ.

 5 Ee, Zerizalɛmun talua mun, min wunnɛn’n lu, sanngɛ n ti klanman

kɛ Kedaa lɔ tannin sua mun sa,+ kɛ Salomɔn i tannin sua’n i tannin mun sa.+

 6 Nán maan min wunnɛn m’ɔ lu’n ti’n, amun nian min gaan sɔ,

afin wia’n boli min dan.

Min nin’n i mma yasua’m be fali min wun ya.

Be sieli min viɲin fie sunianfuɛ,

sanngɛ n bɔbɔ min viɲin fie liɛ’n, m’an nianman su.

 7 Wɔ mɔ n klo wɔ dan’n, kle min

kan a fa ɔ nnɛn mun kɔ didilɛ’n,+

kle min kan a fa be kɔ mɔ be ko la lo wunmiɛn mindi su’n.

Nán maan n yo kɛ bla wie mɔ w’a fa luku* w’a kɛtɛ i wun’n sa,

ɔ janvuɛ’m be nnɛn’m be afiɛn.”

 8 “Ee, wɔ mɔ a ti bla’m be nun klanman kpafuɛ’n, sɛ a siman lika’n,

fa nnɛn’m be ja osu’n su,

naan fa ɔ boli ba mun kɔ nnɛn kankanfuɛ’m be tannin sua’m be wun lɔ.”

 9 “Wɔ mɔ n klo wɔ dan’n, a ti kɛ nnɛn kpanngɔ bla* nga be cuɛn Faraɔn i kakaklolo’m be nun

kun sa.+

10 Ɔ njuaba’m b’a yo ɔ fuka’m be klanman kpa,*

ɔ kɔmin afle’m be yo maan ɔ kɔmin’n i klanman’n w’a fite kpa.

11 É yó sika ɔkwlɛ njuaba mun,*

yɛ é fá sika é wláwlá nun é mán wɔ.”

12 “Kɛ famiɛn’n ti i tabli kukluku’n i sin’n,

min palifɛn’n*+ bɔn fɛɛn.

13 Min adeba’n ti kɛ miri bɔlɛ kun sa,+

kɔnguɛ’n, ɔ la min wunflɛn’m be afiɛn.

14 Min adeba’n ti min ɲrun kɛ ene*+ sɔsɔwa kun sa

An-Gedi+ lɔ viɲin’m be afiɛn.”

15 “Wɔ mɔ n klo wɔ kpa’n, a ti klanman dan-o!

Nanwlɛ, a ti klanman dan-o! Ɔ ɲinma’m be ti kɛ auble’m be liɛ’n sa.”+

16 “Min adeba, a ti klanman dan,* yɛ a yo ɲɛnmɛn.+

Waka nɲa’n yɛ ɔ ti e bɛ-ɔ.

17 E sua’n* i kuatrɛn’m be ti sɛdri waka,

Zenevrie waka yɛ be fa tuli su-ɔ.

2 “Jenvie’n i nuan lɔ lika kpɛtɛkplɛɛ’n nun safran* ngbɛn yɛle min,

kongo nun lisi yɛle min.”*+

 2 “Min sran mɔ n klo i kpa’n, kɛ ɔ o talua’m be afiɛn’n,

ɔ ti kɛ lisi m’ɔ o owieowie’m be

afiɛn’n sa.”

 3 “Kɛ min adeba’n wo gbanflɛn’m be afiɛn’n,

ɔ ti kɛ pɔmun waka wie m’ɔ o bo’n nun waka’m be afiɛn’n sa.

N klo kpa kɛ ń trɛ́n i fɔnvɔ’n i bo,

yɛ i su mma’n yo fɛ kpa min nuan nun.

 4 Ɔ fali min ɔli cɛn dilɛ sua’n* nun lɔ,

yɛ i nzɔliɛ ng’ɔ o min su’n yɛle klolɛ’n.

 5 Amun man min viɲin mma gato+ naan n ɲan wunmiɛn.

Amun man min pɔmun naan n ɲan fanngan,

afin klolɛ’n w’a kaci min wun tukpacɛ.

 6 Ɔ fɛ i sa bɛ’n suan min ti,

yɛ ɔ fɛ i sa fama’n to bla min.+

 7 Ee, Zerizalɛmun talua mun, amun ta min nda

blo lɔ wannzannin+ mun nin flete’m be dunman nun:

Nán amun tinnge klolɛ ng’ɔ o min nun’n, annzɛ nán amun yo naan ɔ jaso ka naan i blɛ’n w’a ju.+

 8 N ti min adeba’n i nɛn’n!

Amun nian! I yɛ ɔ́ bá yɛ,

ɔ fu oka’m be su, ɔ tu kpɛn kpɔlɛ’m be su.

 9 Min adeba’n ti kɛ wannzannin sa, ɔ ti kɛ flete ba sa.+

I yɛ ɔ o yɛ, ɔ jin e talɛ’n i sin,

ɔ niannian fenɛtri’m be nun,

ɔ niannian fenɛtri’m be gliazi’m be nun.

10 Min adeba’n su kan ndɛ, ɔ se min kɛ:

‘Talua mɔ n klo i kpa’n, jaso,

talua klanman, bla maan e wɔ.

11 Nian! Munngun’n* w’a sin.

Nzue’n w’a kpɛ yɛ w’a wɔ.

12 Waka’m be nɲrɛ mun b’a kpuke mɛn’n nun,+

waka’m be su kpɛkpɛlɛ blɛ’n w’a ju,+

yɛ be ti auble’m be kpanlɛ e mɛn’n nun.+

13 Figie waka’m be mma klikli’m b’a blo.+

Viɲin’m b’a bo nɲrɛ, yɛ be bɔn fannin.

Wɔ mɔ n klo ɔ dan’n, jaso naan bla.

Talua klanman, bla maan e wɔ.

14 Ee, min auble, kɛ a o yɔbuɛ buɛ’m be nun’n,+

lika nglonglo’n i kunman’m be nun’n,

maan n wun wɔ naan n ti ɔ nɛn’n,+

afin ɔ nɛn’n yo fɛ, yɛ ɔ sran waka’n ti klanman.’”+

15 “Amun tra blo alua mun man e,

amun tra blo alua ba nga be saci viɲin mun’n,

afin e viɲin’m b’a bo nɲrɛ.”

16 “Min adeba’n ti min liɛ, yɛ n kusu n ti i liɛ.+

Ɔ su kɛnkɛn i nnɛn mun+ lisi’m be afiɛn lɔ.+

17 Ee, min adeba, ka naan aunmuan fɛfɛ’n w’a fita’n, ka naan fɔnvɔ’n w’a wɔ’n,

sa ɔ sin ndɛndɛ

kɛ wannzannin sa+ annzɛ kɛ flete ba sa+ oka mɔ be o e afiɛn’n be su lɔ.*

3 “Kɔnguɛ’n, kɛ n la min bɛ’n su lɔ’n,

n kunndɛli min adeba’n,+

n kunndɛli i, sanngɛ m’an wunmɛn i.+

 2 Ń má jáso ń wlánwlán klɔ’n nun,

ń kúnndɛ min adeba’n

akpɔ mun nin klɔ’n i gua’m be su.

N kunndɛli i, sanngɛ m’an wunmɛn i.

 3 Gladi difuɛ mɔ be sin yia klɔ’n be nin min yiali.+

N usali be kɛ: ‘?Amun wunnin min adeba’n?’

 4 Kɛ n sannin be wun cɛ’n,

n wunnin min adeba’n.

N trɛli i nun, m’an kunndɛman kɛ ń yáci i nun,

lele n fɛ i ɔli min nin’n i sua’n nun lɔ,+

min nin m’ɔ wunnzɛli min’n i sua ba’n nun lɔ.

 5 Ee, Zerizalɛmun talua mun, amun ta min nda

blo lɔ wannzannin mun nin flete’m be dunman nun:

Nán amun tinnge klolɛ ng’ɔ o min nun’n, annzɛ nán amun yo naan ɔ jaso ka naan i blɛ’n w’a ju.”+

 6 “?Ngue yɛ ɔ fin aawlɛ flɛnnɛn’n nun lɔ ba kɛ sin wunsrɛn sa,

mɔ miri nin ansan ufue be bɔn i su,

mɔ aata difuɛ’m be sanmlɛn’n kwlaa bɔn i su’n niɔn?”+

 7 “Nian! Salomɔn i bia tɛnndɛn’n niɔn.

Safuɲrɛn ablesiɛn (60) be sin yiɛ i,

be kpali be Izraɛli yasua nga be le wunmiɛn kpa’n be nun,+

 8 Tokofi o be kwlaa be sa nun,

be kwlaa be si alɛ kun kpa,

be tinuntinun be tokofi’n san be bo,

naan bé fá sásá be wun kɔnguɛ.”

 9 Famiɛn Salomɔn i bia nga be fa suɛ i’n niɔn,

ɔ fali Liban lɔ waka+ yɛ ɔ fa yoli-ɔ.

10 Sika yɛ ɔ fa yoli i ja mun-ɔn,

sika ɔkwlɛ yɛ ɔ fa yoli i lika ng’ɔ cisa lɛ’n niɔn.

Jese ɔkwlɛ kankan yɛ be fa yoli i tranwlɛ’n niɔn.

Zerizalɛmun talua mun

be yoli i klun lɔ’n i klanman kpa klolɛ su.”

11 “Ee, Siɔn talua mun, amun fite,

amun ko nian Famiɛn Salomɔn,

w’a wlɛ i famiɛn kle nga i nin+ yoli fa mɛnnin i’n.

Cɛn ng’ɔ fali atɔnvlɛ’n nun’n,

cɛn nga i klun jɔli dan’n nun’n yɛ ɔ yoli-ɔ.”

4 “Wɔ mɔ n klo ɔ kpa’n, a ti klanman dan-o!

A ti klanman dan-o!

Ɔ ɲinma’m be ti kɛ auble’m be liɛ’n sa ɔ luku’n i bo.

Ɔ timuɛn’n ti kɛ boli fa kun

mɔ be fin Galaadi oka’m be su be su wanndi

jra’n sa.+

 2 Ɔ je’m be ti kɛ bua fa kun mɔ b’a kpɛkpɛ be ndrɛ’n uflɛuflɛ

mɔ b’a wunnzin be mɔ be su fin nzue’n nun be fite’n sa.

Be kwlaa be le ba nda,

be nun wie fi i wa w’a wuman.

 3 Ɔ nuan bui’m be ti kɛ tannin tanmue ɔkwlɛ bioun wie sa,

yɛ ɔ nuan nun ndɛ’n yo fɛ.

Ɔ fuka mɔ be o ɔ luku’n i bo’n,

be ti kɛ grenadie mma bue kun sa.

 4 Ɔ kɔmin’n+ ti kɛ Davidi i sua fleiin+

mɔ be fali yɔbuɛ siesieli i wiengu su be kplannin’n sa.

Ɲrɛn akpi kun (1.000) be sendesende sua sɔ’n i wun,

safuɲrɛn’m be ɲrɛn kukluuklu’m+ be kwlaa-ɔ.

 5 Ɔ wunflɛn nɲɔn’m be ti kɛ flete ba nɲɔn sa,

be ti kɛ wannzannin

ba nda+

mɔ be su didi lisi’m be afiɛn’n sa.”

 6 “Ka naan aunmuan fɛfɛ’n w’a fita naan fɔnvɔ’n w’a wɔ’n,

ń má kɔ́ miri oka’n su lɔ,

yɛ ń kɔ́ ansan ufue kpɔlɛ’n su lɔ.”+

 7 “Wɔ mɔ n klo wɔ’n, a ti klanman dan,+

fiɛn kaan sa nunman ɔ wun.

 8 Min yi, maan e jaso Liban wa e wɔ,

maan e jaso Liban+ wa e wɔ.

Jaso Amana* oka’n i ti su lɔ naan jra,

jaso Sɛnii oka’n nin Ɛrmɔn+ oka’n be ti su lɔ,

jaso asɔmɔli’m be lika’n nun lɔ, kangale’m be oka’m be su lɔ.

 9 Min niaan bla, min yi, a fali min awlɛn’n,+

kɛ n niannin ɔ ɲinma mun kpɛ kunngba sa’n,

kɛ n niannin ɔ kɔmin afle’n i mma kun kpɛ kunngba bɔbɔ sa’n, n jran-ɔn, ɔ jranman.

10 Min niaan bla, min yi, wafa nga a yi ɔ klolɛ’n i nglo’n, ɔ yo ɲɛnmɛn dan-o!+

Wafa nga a yi ɔ klolɛ’n i nglo’n, i kpa liɛ’n ɔ tra duvɛn lele,+

yɛ ɔ palifɛn’n bɔn fannin tra ninnge nga be bɔn fannin’n be kwlaa!+

11 Min yi, awɛma nzue m’ɔ ti kpa’n, ɔ sonji ɔ nuan bui’m be su.+

Awɛma nzue nin nɔnnɔn be o ɔ taaman’n i bo,+

yɛ ɔ tralɛ’m be bɔn fannin kɛ Liban bo’n sa.

12 Min niaan bla’n, min yi’n, ɔ ti kɛ fie klanman kun mɔ i anuan’n i nun ti towa’n sa,

Nanwlɛ, ɔ ti kɛ fie klanman kun mɔ i anuan’n i nun ti towa’n sa, ɔ ti kɛ nzue ti kun mɔ i anuan’n i nun ti towa’n sa.

13 Ɔ sama’m be ti kɛ* fie klanman kun nun grenadie waka

mɔ i su mma’m be ti kpakpa’n sa, ɔ nin i nun ene waka nin naa waka mun,

14 ɔ nin naa,+ nin safran, nin ndɛma m’ɔ bɔn fannin’n,+ nin sinamɔmun,+

ɔ nin ansan ufue waka wafa kwlaa, nin miri, nin aloɛsi,+

ɔ nin waka kwlaa nga be bɔn fannin kpa’n.+

15 A ti kɛ fie klanman kun nun nzue ti sa, a ti kɛ gbo kun mɔ i nun nzue’n yo fɛ’n sa,

a ti kɛ nzue ba nga be fin Liban+ lɔ’n sa.

16 Ee, nglo lɔ aunmuan, tinnge.

Ee, ngua lɔ aunmuan, bla.

Amun fita min fie klanman’n su blɛblɛblɛ.

Maan fie’n i fannin m’ɔ bɔn’n ɔ tru lika’n nun.”

“Maan min adeba’n, ɔ wlu i fie klanman’n nun

naan ɔ di i nun waka mma kpakpa mun.”

5 “Ee, min niaan bla, min yi,

n wluli min fie klanman’n nun lɔ.+

N kpɛkpɛli min miri’n nin min ijre fannin’n.+

N dili min awɛma nzue m’ɔ o awɛma sua’n nun’n.

N nɔnnin min duvɛn’n nin min nɔnnɔn’n.”+

“E janvuɛ kpa mun, an di!

Amun nɔn yɛ amun yi i nglo kɛ amun klo amun wiengu!”+

 2 “M’an lafi, sanngɛ min awlɛn’n lafiman.+

N ti min sran mɔ n klo i kpa’n, m’ɔ su bobo anuan’n i ngan!

‘Ee, min niaan bla, min yi,

min auble, wɔ mɔ fiɛn kaan sa nunman ɔ wun’n, tike min anuan!

Afin bɔlɛ’n w’a lua min ti’n,

kɔnguɛ bɔlɛ’n w’a lua min timuɛn’n.’+

 3 M’an yi min tralɛ tɛnndɛn’n.

?Ɔ fata kɛ n wlɛ i ekun?

M’an wunnzin min ja’m be wun.

?Ɔ fata kɛ n yo be fiɛn ekun?

 4 Min adeba’n w’a yi i sa’n anuan’n i toklo’n nun,

yɛ min awlɛn’n sili min klun lɔ sa kpukpukpu.

 5 N jasoli naan ń kó tíke min adeba’n i anuan,

min sa nun’n ti miri ngunmin,

yɛ min sa mma’m be wun ti miri ngo ngunmin,

be o anuan’n i tikelɛ ninnge’m be su.

 6 N tikeli min adeba’n i anuan,

sanngɛ min adeba’n sɛli i sin, ɔ ɔli.

Kɛ ɔ ɔli’n, min wla boli min wun.

N kunndɛli i, sanngɛ m’an wunmɛn i.+

N flɛli i, sanngɛ w’a tɛman min su.

 7 Gladi difuɛ mɔ be sin yia klɔ’n be wunnin min.

Be boli min, be yoli min like yaya.

Talɛ’m be su nianfuɛ’m be fali min luku’n.

 8 Ee, Zerizalɛmun talua mun, amun ta min nda:

Sɛ amun wun min adeba’n,

amun se i kɛ klolɛ’n w’a kaci min wun tukpacɛ.”

 9 “?Wɔ mɔ a ti bla’m be nun klanman kpafuɛ’n,

ngue yɛ ɔ kle kɛ ɔ adeba’n i kpa tra be onga mun-ɔn?

?Ngue yɛ ɔ kle kɛ ɔ adeba’n i kpa tra be onga mun,

mɔ i ti yɛ a se e kɛ e ta nda nga-ɔ?”

10 “Min adeba’n ti klanman kpa, yɛ ɔ ti ɔkwlɛ biaii.

Sɛ ɔ o sran akpiakpi blu (10.000) be afiɛn’n, ɔ fiaman.

11 I ti’n ti sika ɔkwlɛ, ɔ ti sika ɔkwlɛ jrɛiin.

I timuɛn’n ti kɛ nglesia nɲa mɔ be su toto’n sa,*

ɔ lu tuun kɛ kɔkɔkuankuan sa.

12 I ɲinma’m be ti kɛ auble mɔ be o nzue nuan,

mɔ be su wunnzin nɔnnɔn’n nun’n sa,

be titi nzue gble mɔ w’a yi kpa’n* i nuan lɛ.

13 I fuka’m be ti kɛ ijre fannin fie sa,+

be ti kɛ kpɔlɛ su ijre fannin sa.

I nuan bui’n ti kɛ lisi sa, miri+ ngo sonji su.

14 I sa’m be ti kɛ sika ɔkwlɛ mlomlo mɔ be wlawlali nun klizoliti’n sa.

I ku’n ti kɛ sui je mɔ b’a kpu i wun treketreke mɔ b’a fa safii b’a kɛtɛ i wun’n sa.

15 I ja’m be ti kɛ sua ja mlomlo mɔ be fali mablu be yoli m’ɔ taka sika ɔkwlɛ jrɛiin su’n sa.

Ɔ ti klanman kɛ Liban sa, i klanman’n ti kɛ sɛdri waka+ mɔ be leman wunsu’n sa.

16 I nuan’n yɛle fɛ’n,

yɛ i lika’n kwlaa ti klanman.+

Ee, Zerizalɛmun talua mun, min sran mɔ n klo i’n, min adeba’n yɛ ɔ o lɛ-ɔ.”

6 “?Ee, wɔ mɔ a ti bla’m be nun klanman kpafuɛ’n,

nin yɛ ɔ adeba’n ɔli-ɔ?

?Atin benin yɛ ɔ adeba’n fali-ɔ?

Maan e nin wɔ e kunndɛ i.”

 2 “Min adeba’n w’a wɔ i fie klanman’n nun lɔ,

ɔ ɔli ijre fannin fie’n nun lɔ,

ɔ fɛli i nnɛn mun ɔli didilɛ fie klanman’m be nun,

ɔ ɔli lisi+ kpɛkpɛlɛ.

 3 N ti min adeba’n i liɛ,

yɛ min adeba’n i kusu ti min liɛ.+

Ɔ su kɛnkɛn i nnɛn mun lisi’m be afiɛn lɔ.”+

 4 “Wɔ mɔ n klo wɔ’n,+ a ti klanman kɛ Tiiza*+ sa,

a ti klanman kɛ Zerizalɛmun sa,+

a yo ɲɛnmɛn kɛ sonja akpasua mɔ be o be flanga’m be wun’n sa.+

 5 Yi ɔ ɲinma’n+ min su, kpɛ ɔ ɲin lika uflɛ,

afin kɛ a nian min’n, n jran-ɔn, ɔ jranman.

Ɔ timuɛn’n ti kɛ boli fa kun

mɔ be fin Galaadi oka’m be su be su wanndi

jra’n sa.+

 6 Ɔ je’m be ti kɛ bua fa kun

mɔ b’a wunnzin be mɔ be su fin nzue’n nun be fite’n sa.

Be kwlaa be le ba nda,

be nun wie fi i wa w’a wuman.

 7 Ɔ fuka mɔ be o ɔ luku’n i bo’n,

be ti kɛ grenadie mma bue kun sa.

 8 Atrɛkpa’n, famiɛn’n i yi’m be ti ablesiɛn (60),

yɛ i soman’m be ti ablaɔcuɛ (80),

yɛ i talua’m be liɛ’n be siman be nuan.+

 9 Sanngɛ be nun kunngba cɛ yɛ ɔ ti min auble’n nin-ɔn,+ fiɛn kaan sa nunmɛn i wun.

Ɔ ti i liɛ ngunmin i nin’n i ɲrun.

Ɔ ti bla ng’ɔ wuli i’n i wa ng’ɔ klo i kpa’n.

Kɛ talua’m be wun i’n, be se i kɛ i liɛ su ti ye.

Kɛ famiɛn’n i yi mun nin i soman’m be wun i’n, be yi i ayɛ.

10 ‘?Bla benin yɛ ɔ kpaja kɛ lika m’ɔ su titi’n sa,

m’ɔ ti klanman kɛ anglo ba m’ɔ ta kpa’n sa,

m’ɔ ti sanwun kɛ wia’n i kpajalɛ’n sa,

m’ɔ yo ɲɛnmɛn kɛ sonja akpasua mɔ be o be flanga’m be wun’n sa’n niɔn?’”+

11 “N ɔli waka mma fie klanman’n+ nun lɔ,

naan ń kó nían kongo’n nun lɔ waka mɔ b’a fifi uflɛuflɛ’n,

naan ń nían sɛ viɲin’m b’a fɛfɛ-o,

sɛ kusu grenadie waka’m b’a bo nɲrɛ-o.

12 Min ɲin mɔ ń bó i bla-ɔ,

min awlɛn’n w’a fa min w’a wɔ

min nvle’n nunfuɛ mɔ be le ɲrun’n be kakaklolo’m be wun lɔ.”

13 “Ee, Silamun talua, sa ɔ sin bla, sa ɔ sin bla!

Sa ɔ sin bla, sa ɔ sin bla,

naan e nian wɔ!”

“?Ngue ti yɛ amun nian Silamun talua’n niɔn?”+

“Ɔ ti kɛ sran akpasua nɲɔn mɔ be su si able’n sa!”*

7 “Ee, talua m’ɔ le ɲrun’n,

kɛ ɔ ja’m be o ɔ ngbabua’m be nun’n, be ti nglanman-o!

Ɔ sɔwa’m be ti nglanman kɛ be wun klanman yolɛ ninnge mun sa,

be ti ajuin difuɛ kun i sa nuan like.

 2 Ɔ kotua’n ti kɛ kpongbo ba kukluku wie sa.

Nán maan duvɛn nga be sɛnngɛnnin i’n ɔ tu nun le.

Ɔ ku’n ti kɛ ble mɔ b’a tiɛn i nuan

mɔ lisi’m be sin yiɛ i’n sa.

 3 Ɔ wunflɛn nɲɔn’m be ti kɛ flete ba nɲɔn sa,

be ti kɛ wannzannin ba nda sa.+

 4 Ɔ kɔmin’n+ ti kɛ sua fleiin+ kun mɔ be fali sui je be yoli’n sa.

Ɔ ɲinma’m+ be ti kɛ Ɛsbɔn+ lɔ nzue gble

mɔ be o Bati-Rabimun anuan’n i wun lɛ’n sa.

Ɔ bue’n ti kɛ Liban lɔ sua fleiin

mɔ i ɲin’n kpɛ Damasi lɔ’n sa.

 5 Ɔ ti’n ti klanman kɛ Kaamɛli Oka’n+ sa,

yɛ ɔ timuɛn’n+ ti kɛ jese ɔkwlɛ kankan sa.+

Kɛ famiɛn’n wun ɔ timuɛn m’ɔ guagua ɔ wun’n, ɔ jran-ɔn, ɔ jranman.

 6 Talua mɔ n klo i kpa’n, a ti klanman-o, a ti klanman dan,

a ti klanman tra like klanman kwlakwla!

 7 A ti tiaan kɛ nglesia waka wie sa,

yɛ ɔ wunflɛn’m be ti kɛ nglesia sɔsɔwa sa.+

 8 N seli kɛ: ‘Ń má fú nglesia waka’n su

naan ń kó trɛ́ i otre mun.’

Maan ɔ wunflɛn’m be yo kɛ viɲin mma sɔsɔwa sa,

maan wunmiɛn nga a lo’n ɔ bɔn fannin kɛ pɔmun sa,

 9 Yɛ maan ɔ nuan’n yo kɛ duvɛn’m be nun kpafuɛ’n sa.”

“Maan ɔ seli min adeba’n i alowa’n nun,

kɛ duvɛn m’ɔ sonji blɛblɛblɛ sran nga be su lafi’n be nuan bui’n su’n sa.

10 N ti min adeba’n i liɛ,+

yɛ min su yɛ i awlɛn’n wo-ɔ.

11 Min adeba, bla,

bla naan e wɔ blo lɔ,

naan e ko tran ene waka’m be afiɛn lɔ.+

12 Maan e jaso ndɛ naan e wɔ viɲin’m be nun lɔ,

naan e ko nian sɛ viɲin’m b’a fɛfɛ-o,

sɛ be nɲrɛ’m b’a kpuke-o,+

sɛ grenadie waka’m b’a bo nɲrɛ-o.+

Lɔ’n, ń yí i nglo ń klé wɔ kɛ n klo wɔ.+

13 Mandragɔɔ’m+ be su bɔn fannin.

Waka mma kpakpa wafa kwlaa o e anuan’m be nun.+

I uflɛuflɛ o nun, laa liɛ o nun,

min adeba, wɔ yɛ n fa sieli wɔ-ɔ.

8 “Sɛ a ti kɛ min niaan bian

m’ɔ nɔnnin min nin i wunflɛn’n sa’n, nn ɔ́ yó min fɛ-o!

I liɛ’n, sɛ n wun wɔ gua su lɔ’n, ń fá min nuan’n ń bó ɔ fuka’n su,+

yɛ sran fi su yoman min finfin.

 2 Ń fá wɔ ń kɔ́,

ń fá wɔ ń kɔ́ min nin

m’ɔ kleli min like’n i sua’n nun lɔ.+

Ń mán wɔ duvɛn m’ɔ bɔn fannin’n naan a nɔn,

ń mán wɔ grenadie mma nzue lɔflɛ.

 3 Ɔ́ fɛ́ i sa bɛ’n súan min ti,

yɛ ɔ́ fɛ́ i sa fama’n tó blá min.+

 4 Ee, Zerizalɛmun talua mun, amun ta min nda:

Nán amun tinnge klolɛ ng’ɔ o min nun’n, annzɛ nán amun yo naan ɔ jaso ka naan i blɛ’n w’a ju.”+

 5 “?Bla benin yɛ ɔ fin aawlɛ flɛnnɛn’n nun lɔ su ba

m’ɔ kisɛ i adeba’n i su’n niɔn?”

“N tinngeli wɔ pɔmun waka’n i bo lɔ.

Lɔ yɛ ɔ nin wuli wɔ-ɔ.

Lɔ yɛ bla ng’ɔ wuli wɔ’n ɔ wuli ba-ɔ.

 6 Fa min sie ɔ awlɛn’n su kɛ nzɔliɛ like sa,

fa min sie ɔ sa’n su kɛ nzɔliɛ like sa,

afin klolɛ’n le kwlalɛ kɛ wie’n sa,+

yɛ klolɛ dan’n ti kɛ Ndia’n* sa, ɔ leman ayre.

Ɔ jue kɛ sin taaman wie sa, Ya* i sin taaman’n.+

 7 Nzue nga be sonji kpuu kpa bɔbɔ’n be kwlá nuanman klolɛ’n,+

yɛ nzue ba’m be kwlá fɛmɛn i kɔman.+

Sɛ sran kun waan ɔ́ fɛ́ i awlo’n nun aɲanbeun ninnge’m be kwlaa fá tó klolɛ’n,

be su buman be like fi.”*

 8 “E le e sinma bla kun,+

yɛ ɔ leman wunflɛn.

?Cɛn nga bé wá kɛ́n i jalɛ ndɛ’n,

ngue yɛ é yó mɛ́n i-ɔ?”

 9 “Sɛ ɔ ti talɛ’n,

nn é fá sika é fá yó talɛ kanngan i ti su nglo lɔ tɛɛn,

sanngɛ sɛ ɔ ti anuan’n,

é fá sɛdri waka paplapa kun é jɛ́ i sin.”

10 “N ti talɛ,

yɛ min wunflɛn’m be ti kɛ sua fleiin wie mun sa.

Ɔ maan i ɲrun’n, n ti

sran m’ɔ di alaje-ɔ.

11 Salomɔn le viɲin fie kun+ Baali-Amɔn lɔ.

Ɔ fali viɲin fie’n wlali sran wie’m be sa nun naan be niɛn i lika.

Kɛ be tinuntinun be titi viɲin’n i mma’n, be fa sika mma akpi kun (1.000) be ba.

12 N bɔbɔ n le min viɲin fie liɛ, ɔ ti min ngunmin

min liɛ.

Ee Salomɔn, sika mma akpi kun’n (1.000)*

ti ɔ liɛ,

yɛ ya nɲɔn (200) ti be nga be nian viɲin mma’m be lika’n be liɛ.”

13 “Ee, wɔ mɔ a tran fie klanman’m be nun’n,+

janvuɛ wie’m be kunndɛ kɛ bé tí ɔ nɛn’n.

N kusu n kunndɛ kɛ ń tí ɔ nɛn’n wie.”+

14 “Min adeba, kan ɔ wun,

yɛ wanndi ndɛndɛ kɛ wannzannin sa,+

annzɛ kɛ flete ba sa,