OZE

 2 Maan amun se kɛ amun nin yoli sa tɛ, amun se kɛ ɔ yoli sa tɛ,

afin ɔ timan min yi,+ yɛ n kusu n timɛn i wun.

Ɔ fata kɛ ɔ yaci tekle bolɛ,*

yɛ ɔ fata kɛ ɔ yaci i wun bo bian kunndɛlɛ.*

 3 Sɛ w’a yoman sɔ’n, ń yíyí i wun mlɔnmlɔn, yɛ i wun ká kplɛn kɛ i awuliɛ cɛn’n nun’n sa,

ń yó maan ɔ́ káci kɛ aawlɛ flɛnnɛn sa,

ɔ́ káci kɛ asiɛ kee sa,

yɛ ń yó maan nzuewe kún i lele ɔ́ wú.

 4 Yɛ n su simɛn i mma’m be aunnvɔɛ,

afin be ti tekle bolɛ* nun ba mun.

Bla m’ɔ wunnzɛli be’n, ɔ yoli ɲannzuɛn sa,+ afin ɔ seli kɛ:

‘Ń má kɔ́ be nga b’a wu min ti kpo’n be sin,+

be mɔ be man min kpanwun nin nzue’n,

ɔ nin bua ndrɛ nin lɛn, nin ngo, ɔ nin nzan’n.’

 6 I sɔ’n ti’n, ń má fá owieowie mun ń tánnin i atin’n,

yɛ ń kplán yɔbuɛ talɛ kun i wun,

naan w’a kwlá wunmɛn i atin’n.

 7 Ɔ́ wánndi fúan be nga b’a wu i ti kpo’n, sanngɛ ɔ su toman be,+

ɔ́ kúnndɛ be, sanngɛ ɔ su wunman be.

Kpɛkun ɔ́ sé kɛ: ‘Ń má sá min sin min wun klikli’n i wun lɔ,+

afin blɛ sɔ’n nun’n, n wun min wun fɛ kpa tra dɔ nga su’n.’+

 8 W’a wunmɛn i wlɛ kɛ min yɛ n mɛnnin i ble,+ nin duvɛn lɔflɛ, ɔ nin ngo’n niɔn,

yɛ w’a wunmɛn i wlɛ kɛ min yɛ n mɛnnin i sika kpanngban

nin sika ɔkwlɛ mɔ be fa suli Baali’n niɔn.+

 9 ‘I sɔ’n ti’n, ń má sá min sin ń kó fá min ble’n ble kpɛlɛ blɛ’n nun,

yɛ ń fá min duvɛn lɔflɛ’n viɲin tilɛ blɛ’n nun,+

yɛ ń dé min bua ndrɛ’n nin min lɛn m’ɔ fata kɛ ɔ kɛtɛ i wun kplɛn’n su’n.

10 Siɛn’n, ń má yí i nvialiɛ nun lika’m be nglo be nga be klo i kpa’n be ɲrun,

yɛ sran fi su demɛn i min

sa nun.+

11 Ń má yó maan i aklunjɔɛ’n i kwlaa wíe,

i cɛn dilɛ mun,+ i anglo le kun mun, i wunmiɛn-lolɛ-cɛn mun, ɔ nin i cɛn dilɛ blɛ’m be kwlaa bé wíe.

“Be ti min akatua, be nga b’a wu min ti kpo mun yɛ be fa mannin min-ɔn.”

Ń má yó maan bé káci

bo ble,

yɛ blo nnɛn’m bé sáci be.

13 Ń má úsɛ i blɛ m’ɔ yili tɛ mannin Baali i nzɔliɛ ninnge mun’n+ i su sa,

blɛ sɔ’n nun’n, ɔ wlɛwlɛli i nga mun, ɔ nin i wun klanman yolɛ ninnge mun, yɛ ɔ wanndi fuɛnnin i sran mɔ b’a wu i ti kpo’n,

sanngɛ i wla fili min su.’+ Ndɛ nga Zoova kan’n yɛ ɔ o lɛ-ɔ.

14 ‘I sɔ’n ti’n, ń má yó naan ɔ fa min ndɛ’n su,

ń má fɛ́ i ń kɔ́ aawlɛ flɛnnɛn’n nun lɔ,

yɛ ń kán ndɛ’n naan ɔ wluwlu i wun.

15 Kɛ ɔ fɛ i blɛ sɔ’n nun’n, ń fɛ́ i viɲin fie mun ń mɛ́n i ekun,+

yɛ ń fá Akɔɔ Kongo’n+ ń mɛ́n i, ɔ́ káci kɛ anuan kun m’ɔ fite like nga be wla o su’n i su’n sa.

Ɔ́ tɛ́ min su lika sɔ’n nun lɛ kɛ i talua blɛ’n nun’n sa,

kɛ blɛ m’ɔ fin Ezipti lɔ fiteli’n sa.+

16 Cɛn sɔ’n nun’n,

á wá flɛ́ min kɛ min wun, a su flɛman min kɛ min min* kun.’ Ndɛ nga Zoova kan’n yɛ ɔ o lɛ-ɔ.

17 Ń má yó maan Baali i nzɔliɛ ninnge’m be dunman su trɛnmɛn i nuan nun kun,+

yɛ be wla su kpɛnman be dunman’n su kun.+

18 Cɛn sɔ’n nun’n, e nin blo nnɛn mun,+

ɔ nin nglo lɔ anunman mun nin nnɛn mɔ be cuɛn be wun ase’n é trá aenguɛ min nvlefuɛ’m be dunman nun.+

Ń má yó maan ta’n nin tokofi’n, ɔ nin alɛ’n bé tú mɛn’n nun,+

yɛ ń yó maan min nvlefuɛ’m bé lá* fɔuun.+

19 Ń má fá wɔ naan a kaci min yi tititi.

Ń tá ɔ nda kɛ ń yó sa ng’ɔ ti kpa’n nin sa ng’ɔ ti i nuan su sɛsɛ’n ɔ lika,

ń kló wɔ dan, yɛ ń sí wɔ aunnvɔɛ.+

20 Ń tá ɔ nda kɛ e nin wɔ é nánti klanman titi,

kpɛkun saan á sí Zoova.’+

21 ‘Cɛn sɔ’n nun’n, ń tɛ́ su,

ń tɛ́ ɲanmiɛn’n i su,

yɛ ɲanmiɛn’n kusu ɔ́ tɛ́ asiɛ’n i su.’+ Ndɛ nga Zoova kan’n yɛ ɔ lɛ-ɔ.

22 Yɛ asiɛ’n tɛ́ ble’n nin duvɛn lɔflɛ’n, ɔ nin ngo’n be su,

yɛ be kusu bé tɛ́

Zizreɛli* su.+

23 Ń má lúa bla sɔ’n kɛ like mma sa asiɛ’n nun min bɔbɔ min liɛ,+

yɛ bla mɔ b’a simɛn i aunnvɔɛ’n, ń má sí i aunnvɔɛ.*

Ń má sé be nga be timan min nvle’n nunfuɛ’n* be kɛ: “Amun ti min nvle’n nunfuɛ,”+

yɛ be kusu bé sé kɛ: “A ti e Ɲanmiɛn.”’”+

4 Ee Izraɛlifuɛ mun, amun tie ndɛ nga Zoova kan’n,

afin ndɛ o Zoova nin nvle’n nunfuɛ’m be afiɛn,+

afin nvle’n nun’n, be diman nanwlɛ, be kloman sran, yɛ be siman Ɲanmiɛn.+

 2 Ato nda talɛ’n, nin ato bualɛ’n,+ nin sran kunlɛ’n+

ɔ nin awie wualɛ’n, nin be wiengu bo bian annzɛ bla kunndɛlɛ’n+ w’a tru,

yɛ sran kunlɛ’n yɛ be jin su sa trilili-ɔ.+

 3 I sɔ’n ti yɛ nvle’n trán sɛ nun’n niɔn,+

yɛ nvle’n nunfuɛ’m be kwlaa bé yó koklo.

Blo nnɛn mun nin nglo lɔ anunman mun,

ɔ nin jenvie’n nun jue mun bɔbɔ’n, bé wú.

 4 “Sanngɛ nán maan sran fi nin nvlefuɛ mun kan ndɛnngan annzɛ ɔ tu

be fɔ,+

afin ɔ nvlefuɛ’m be ti kɛ sran mɔ be nin Ɲanmiɛn ɲrun jranfuɛ be kan ndɛnngan’n sa.+

 5 I sɔ’n ti’n, ɔ ja wá kplá wia klengle kpa’n nun,

yɛ Ɲanmiɛn nuan ijɔfuɛ’n i ja kplá kɛ wɔ sa wie,

kɛ wienun-ɔn, lika w’a

san sa.

Yɛ ń má múan ɔ nin i

nuan’n su.*

 6 Min nvlefuɛ’m bé múan be nuan,* afin be siman like fi.

Kɛ mɔ a kpaloli sa silɛ’n ti’n,+

n kusu ń má yí ɔ blo, a su diman min ɲrun jranlɛ junman’n kun.

Kɛ mɔ ɔ wla fili ɔ Ɲanmiɛn’n i mmla’n* ti’n,+

n kusu min wla fí ɔ mma mun.

 7 Kɛ bé trɛ́’n, nn bé yó sa tɛ dan min ɲrun.+

Ń má yó maan be aɲrunɲan’n ɔ́ káci ɲannzuɛn.*

 8 Min nvlefuɛ’m be sa tɛ’n nun yɛ be di like-ɔ,

be kunndɛ kpa kɛ be yo sa tɛ.

 9 Sa ng’ɔ́ wá jú nvlefuɛ’m be su’n, i kunngba’n yɛ ɔ́ jú Ɲanmiɛn ɲrun jranfuɛ’m be su-ɔ.

Ń má úsa be sa nga be yo’n be su sa,

yɛ ń má yí sa nga be yo’n i nuan like ń mán be.+

10 Bé dí like, sanngɛ be ku su yiman.+

Bé bó tekle,* sanngɛ be su trɛman,+

afin be ɲin w’a yiman Zoova.

11 Tekle bolɛ’n* nin duvɛn’n, ɔ nin duvɛn lɔflɛ’n,

be yo maan be kwlá yoman like ng’ɔ ti kpa’n.*+

12 Min nvlefuɛ’m be usa be waka sran’m be sa,

yɛ be yo like nga be kpɔnman’n* se be kɛ

be yo’n.

Tekle bolɛ* m’ɔ o be akunndan’n nun’n ti’n, be fa atin tɛ su,

yɛ be tekle bolɛ’n* ti’n, be loman be wun be manman be Ɲanmiɛn’n.

13 Be yi tɛ oka’m be ti su

nglo lɔ,+

yɛ be yo maan tɛ nga be yi be kpɔlɛ’m be su’n i wunsrɛn’n fite,

be yi tɛ sɛnin waka, nin sitirasi waka, nin waka dandan’m be kwlaa

be bo,+

afin be fɔnvɔ’n yo fɛ.

I sɔ’n ti yɛ amun mma bla’m be bo tekle’n* niɔn,

mɔ amun sewi’m be kunndɛ bian be wun’m be bo’n niɔn.

14 N su usaman amun mma bla’m be tekle bolɛ’n* i su sa,

yɛ n su usaman amun sewi’m be wun’m be bo bian kunndɛlɛ’n i su sa.

Afin yasua’m be nin tekle bla’m be cuɛn be wun,

kpɛkun be nin bla nga be bo tekle amuin sua’m be nun’n be yi tɛ.

Nvle nga i nunfuɛ’m be siman ngwlɛlɛ’n,+ saan bé mlín.

15 Ee Izraɛli, kannzɛ bɔbɔ a bo tekle’n,*+

nán maan Zida yo sa tɛ.+

Nán amun bla Gilgali+ annzɛ Bɛti-Avɛnin,+

yɛ nán amun ta nda se kɛ: ‘N kan Zoova m’ɔ lafiman’n!’+

16 Izraɛli w’a kaci ɲin keklefuɛ kɛ nannin bla mɔ i ɲin ti kekle’n sa.+

?Zoova wá nían be lika ekun kɛ bua gbanflɛn kun m’ɔ o nnɛn didiwlɛ dan kun nun’n sa?

17 Efraimun w’a fɛ i wun w’a wlɛ i amuin sɔlɛ’n nun.+

Amun yaci i lɛ!

18 Kɛ be biɛli’n* ko wie’n,

be bo tekle.*

Yɛ nvlefuɛ’m be kpɛnngbɛn’m* be klo ɲannzuɛn’n kpa.+

19 Aunmuan’n wá fɛ́ i ndɛwa mun kɛ́tɛ i wun,*

yɛ bé wún be tɛ mɔ be yi be’n be su ɲannzuɛn.

5 “Ɲanmiɛn ɲrun jranfuɛ mun, amun tie ndɛ nga,+

ee, Izraɛli i awlo’n nunfuɛ mun, amun nian amun wun su,

ee, famiɛn’n i awlo’n nunfuɛ mun, amun sie amun

su tie,

afin bé wá dí amun jɔlɛ.

Afin amun ti kɛ aya sa Mizpa bo,

yɛ amun ti kɛ tɛ* mɔ b’a trɛ nun’n sa Tabɔɔ su.+

 2 Ɲin keklefuɛ’m b’a fa be wun b’a wlɛ i sran kunlɛ’n nun dan,

yɛ n su man be kwlaa be afɔtuɛ.*

 3 N si Efraimun,

yɛ Izraɛli timan fiawa min ɲrun.

Afin siɛn’n, ee Efraimun, w’a bo tekle dan.*

Izraɛli w’a yo i wun fiɛn.+

 4 Be ayeliɛ’n ti’n, be kwlá saman be sin be Ɲanmiɛn’n i wun,

afin tekle bolɛ’n* wo be akunndan’n nun.+

Yɛ be ndɛ nunman Zoova i ndɛ nun.

 5 Izraɛli i wun tulɛ’n w’a saci i bɔbɔ i wun.+

Izraɛli nin Efraimun be sa tɛ’n ti’n, be ja kplali,

be nin Zida yɛ be ja kplali-ɔ.+

 6 Be fali be bua mun nin be nannin mun ɔli Zoova kunndɛlɛ,

sanngɛ b’a kwlá wunmɛn i.

Ɔ ɔli be wun mmua.+

 7 Be lakali Zoova,+

afin be kacili aofuɛ ba’m be si.

Siɛn’n, bé wá núnnún be anglo kunngba nun,* ɔ nin be lika mun.*

 8 An bo awɛ+ Gibea lɔ, yɛ an bo awɛ Rama lɔ!+

An kpan alɛ kpanlɛ Bɛti-Avɛnin lɔ!+ Ee, Bɛnzamɛn, e o ɔ sin!

 9 Ee, Efraimun, fɔ tulɛ cɛn’n nun’n,+ be nga bé wún wɔ’n srɛ kún be.

N kannin sa nga saan ɔ́ jú’n i ndɛ n kleli Izraɛli akpasua mun.

10 Zida lɔ sran dandan’m be ti kɛ be nga be tu like nga be fa jali awɛ’n be kɔ lika uflɛ’n sa.+

Ń má fá min ya’n ń útu be su kɛ nzue sa.

11 Be kleli Efraimun i yalɛ, i jɔlɛ dilɛ nun’n be kpɔtɔli i,

afin i waan saan ɔ́ sú i kpɔfuɛ’m be su.+

12 Ɔ maan n yoli kɛ siwlisawla* sa Efraimun i lika,

yɛ n yoli kɛ like mɔ w’a saci’n sa Zida nvle’n i lika.

13 Kɛ Efraimun wunnin i tukpacɛ’n, mɔ Zida kusu wunnin i kannin’n,

Efraimun ɔli Asiri,+ yɛ ɔ sunmannin sran famiɛn dan kun sin.

Sanngɛ w’a kwlá yoman amun juejue,

yɛ w’a kwlá yoman naan amun kannin’n w’a wie.

14 Afin ń má yó kɛ asɔmɔli gbanflɛn sa Efraimun i lika,

yɛ ń yó kɛ asɔmɔli* m’ɔ le wunmiɛn kpa’n sa Zida i lika.

N bɔbɔ ń títí be nun kpɛkun ń kɔ́.+

Ń fá be ń kɔ́, yɛ sran fi su deman be.+

15 Ń má kɔ́ yɛ ń sá min sin min osu’n nun lɔ lele saan b’a wun be sa tɛ’n i su afɛ’n,

yɛ bé kúnndɛ kɛ n yo

be ye.*+

Kɛ ɲrɛnnɛn wá tɔ́ be su’n, bé kúnndɛ min.”+

6 “An bla maan e sa e sin Zoova wun,

afin ɔ titili e nun,+ sanngɛ ɔ́ yó e juejue.

Ɔ boli e, sanngɛ ɔ́ cící e kannin’m be su.

 2 Sɛ cɛn nɲɔn sin’n, ɔ́ mán e wunmiɛn.

I cɛn nsan su’n nun’n, ɔ́ mán e su,

yɛ é trán nguan nun i ɲrun.

 3 É wá sí Zoova, é wá kúnndɛ kpa kɛ é sí i.

Saan ɔ́ bá, kɛ aliɛ njɛnniɛn mɔ i balɛ’n sɛnmɛn i wun’n sa.

Ɔ́ bá kɛ nzue dan wie m’ɔ su tɔ’n sa,

kɛ munngun nun nzue m’ɔ lua asiɛ’n pɔtɔɔ’n sa.”

 4 “?Efraimun, ngue yɛ ń yó wɔ ekun-ɔn?

?Zida, ngue yɛ ń yó wɔ ekun-ɔn?

Afin klolɛ dan nga amun yi i nglo’n ti kɛ nglɛmun nun ɲanmiɛn ble’n sa,

ɔ ti kɛ bɔlɛ ufue m’ɔ wie ndɛndɛ’n sa.

 5 I sɔ’n ti yɛ ń má sín min nuan ijɔfuɛ’m be lika ń kún amun’n niɔn.+

Ń fá min nuan ndɛ’n ń kún amun.+

Yɛ amun jɔlɛ nga ń dí amun’n, bé kpája kɛ kannin sa.+

 6 Afin klolɛ dan* mɔ be yi i nglo’n yɛ ɔ jɔ min klun-ɔn, nán tɛ yilɛ’n niɔn,

yɛ Ɲanmiɛn i silɛ’n ɔ jɔ min klun tra tɛ nga kɛ bé yí’n be yra nnɛn’n i kɔlikɔli’n.+

 7 Sanngɛ be liɛ’n, kɛ sran ngbɛn wie mun sa’n, b’a diman aenguɛ’n su.+

Lɛ’n, be kacili be sin sili min.

 8 Galaadi ti sa tɛ yofuɛ’m

be klɔ,+

sran’m be ja osu nga be o klɔ’n nun’n, be ti mmoja ngunmin.+

 9 Ɲanmiɛn ɲrun jranfuɛ’m be akpasua’n ti kɛ awiefuɛ akpasua mɔ b’a sa sran kun i bo’n sa.

Be kun sran Sisɛmun+ atin’n su,

afin be yo ɲannzuɛn

sa mun.

10 N wunnin like kain kun Izraɛli nvle’n nun.

Efraimun bo tekle lɔ.+

Izraɛli w’a yo i wun fiɛn.+

11 Asa ekun’n, Zida, m’an bu ɔ kpɛlɛ blɛ’n i akunndan m’an sie,

blɛ mɔ ń má fá min sran nga be trali be ɔli’n ń sá min sin’n.”+

7 “Kɛ n waan ń yó Izraɛli i juejue’n,

Efraimun i sa tɛ’n tɛ nglo,+

yɛ Samari i klunwi’n tɛ

nglo wie.+

Afin be laka be wiengu mun.+

Awiefuɛ’m be wlu sua’m be nun, yɛ kodiawiefuɛ’m be kɔ sran’m be bo ninnge’m be fɛnlɛ.+

 2 Sanngɛ ɔ kpɛnman be klun kɛ min wla wá kpɛ́n be klunwi sa’m be su.+

Siɛn’n, sa nga be yo’n w’a bo w’a sin w’a yia be.

Be yɛ be o min ɲin bo yɛ.

 3 Be klunwi sa’m be ti’n, famiɛn’n i klun jɔ,

yɛ be sran lakalɛ’n ti’n, sran dandan’m be klun jɔ.

 4 Be kwlaa be kunndɛ bla annzɛ bian be wiengu bo,

be jue kɛ fuu nun sin mɔ kpanwun tɔnfuɛ kun trɔ,

m’ɔ wlawlaman sin’n nun kun lele saan sanmlɛn ng’ɔ fɔtɔli’n w’a wla’n sa.

 5 E famiɛn’n i blɛ su’n, sran dandan’m be tɔli tukpacɛ:

Duvɛn’n ti’n be fali ya dan.+

Ɔ tinngɛli i sa mannin be mɔ be yo sran’m be finfin’n.

 6 Afin kɛ bé bá’n, be awlɛn’n jue kɛ fuu nun sin sa.*

Kɔnguɛ kwlaa’n, kpanwun tɔnfuɛ’n lafi,

nglɛmun’n, fuu’n nun sin’n jue kɛ sin dan wie sa.

 7 Be kwlaa be lo kɛ fuu sa,

yɛ be kun be siefuɛ mun.*

Be famiɛn’m be kwlaa be tɔli.+

Be nun wie fi kpan flɛman min.+

 8 Efraimun w’a fɛ i wun w’a sanngan nvlenvle’m

be nun.+

Efraimun ti kɛ gato kukluku mɔ b’a kacimɛn i’n sa.

 9 Aofuɛ’m b’a fɛ i wunmiɛn’n,+ sanngɛ ɔ siman sɔ.

Yɛ i ti’n w’a bo je fuaii, sanngɛ ɔ siman sɔ.

10 Izraɛli i wun tulɛ’n w’a saci i bɔbɔ i wun,+

sanngɛ b’a saman be sin be Ɲanmiɛn Zoova wun,+

i kwlaa sɔ’n nun’n, b’a kunndɛman min.

11 Efraimun ti kɛ auble m’ɔ siman sa’n sa, ɔ siman ngwlɛlɛ.*+

Be kpan flɛli Ezipti,+ be ɔli Asiri.+

12 Kan kwlaa nga be kɔ’n, ń trɛ́ min tɛ’n* nun be su.

Ń má yó maan bé jrá kɛ nglo lɔ anunman mun sa.

Ń tú be fɔ kɛ nga n fa kan kleli be’n* sa.+

13 Maan ɲrɛnnɛn tɔ be su, afin be wanndili min!

Maan be nunnun be, afin be fɔnnin min wun!

N waan ń kpɔ́ be ti, sanngɛ be tɔnnin min suɛn.+

14 B’a tuman be klun b’a flɛman min kɛ n uka be,+

kusu nn be yaciman kplinlɛ be bɛ’m be su.

Ble nin duvɛn lɔflɛ’n ti’n, be bobo be wun kannin,

b’a kaci be sin b’a si min.

15 N mannin be afɔtuɛ, yɛ n wlali be fanngan,*

sanngɛ be jaso min wun, be cici sa tɛ yolɛ’n be sie.

16 Be kacili be sa, sanngɛ b’a yoman sa kpa fi.*

Be kwlá lafiman be su, be ti kɛ ta mɔ b’a cuɛnmɛn i ɲanman’n nun kpa’n sa.+

Be sran dandan’m be ndɛ tɛtɛ kanlɛ’n ti’n, bé fá tokofi bé kún be.

I sɔ’n ti yɛ bé yó be finfin Ezipti mɛn’n nun lɔ’n niɔn.”+

8 “Fa awɛ kun sie ɔ nuan!+

Sran kun ba kɛ anunman ɲin sa naan ɔ́ wá tɔ́ Zoova i sua’n su,+

afin b’a diman min aenguɛ’n su,+ be fɔnnin min mmla’n.+

 3 Izraɛlifuɛ’m be kpaloli like ng’ɔ ti kpa’n.+

Maan be kpɔfuɛ kun fuan be.

 4 Be sieli famiɛn wie mun, sanngɛ b’a boman su b’a kleman min.

Be sieli sran dandan wie mun, sanngɛ n siman be.

Be fali be sika nin be sika ɔkwlɛ’n be yoli amuin wie mun,+

i sɔ’n ti yɛ bé wá wíe núnnún’n niɔn.+

 5 Ee Samari, n kpaloli ɔ nannin ba’n.+

Min ya’n w’a jue be su.+

?Cɛn benin ko naan b’a yaci sa tɛ’n i yolɛ?*

 6 Afin like sɔ’n fin Izraɛlifuɛ mun.

Ajuin difuɛ kun yɛ ɔ yoli-ɔ, ɔ timan Ɲanmiɛn.

Ń má yó maan Samari i nannin ba’n i nun búbú.

 7 Afin aunmuan yɛ be lua-ɔ,

yɛ aunmuan kun m’ɔ fita kekle kpa’n yɛ bé wá tí-ɔ.+

Mma nunman ninnge nga be luali’n be su.+

Ninnge nga be fifi’n be kwlá yiman be mma’n i sanmlɛn.

Sɛ be nun kun su mma bɔbɔ’n, aofuɛ mun yɛ bé wá dí-ɔ.+

 8 Bé wá mɛ́n Izraɛli.+

Siɛn’n, bé wá káci kɛ talie wie mɔ sran fi klomɛn i’n sa

nvlenvle’m be afiɛn.+

 9 Afin be ɔli Asiri,+ kɛ blo aflunmun wie mɔ i ngunmin wo’n sa.

Efraimun mannin tekle bofuɛ wie’m be sika naan be klo i.+

10 Kannzɛ bɔbɔ be nga be mannin be sika’n be fin nvlenvle’m be nun’n,

sanngɛ siɛn’n, ń má tían be nuan.

Trɔ nga famiɛn’n nin sran dandan mun be fa takali be ti su’n ti’n, bé wá fɛ́.+

11 Afin sa tɛ yolɛ ti’n, Efraimun kplannin tɛ yiwlɛ kpanngban.+

Be kacili i sa tɛ yolɛ tɛ yiwlɛ.+

12 N klɛli mmla* kpanngban n mɛnnin i,

sanngɛ be yoli i ɲrun kɛ

like m’ɔ nin-a wunman

be le’n sa.+

13 Be yi tɛ be man min, yɛ be di nnɛn’n,

sanngɛ Zoova i klun

jɔman su.+

Siɛn’n, i wla wá kpɛ́n be fɔnlɛ’n su, yɛ ɔ́ wá tú be fɔ be sa tɛ’m be ti.+

Be kpɛli be ɲin* Ezipti

su lɔ.+

14 Izraɛli i wla fili i Yifuɛ’n,+ yɛ ɔ kplannin amuin sua mun,+

yɛ klɔ nga be sisili be wun’n, Zida kplannin be kpanngban.+

Sanngɛ ń má fá sin ń yí i klɔ’m be nun,

yɛ ɔ́ yrá klɔ sɔ’m be kwlaa be nun sua fleinflein mun.”+

9 “Ee Izraɛli, nán maan ɔ

klun jɔ.+

Nán yo ninnge mun aklunjɔɛ su kɛ nvlenvle mun sa.

Afin tekle bolɛ’n* ti’n a kpɔcili ɔ Ɲanmiɛn’n.+

Akatua nga a ɲɛn i tekle bolɛ’n nun ble bowlɛ’m

be kwlaa be nun’n, ɔ klun jɔli su.+

 2 A su ɲanman like fi ble bowlɛ’n nin duvɛn yiwlɛ’n be nun,

yɛ a su ɲanman duvɛn lɔflɛ.+

 3 Be su kwlá tranman Zoova i nvle’n nun kun,+

sanngɛ, Efraimun wá sɛ́ i sin Ezipti lɔ,

yɛ bé wá dí like ng’ɔ ti fiɛn’n Asiri lɔ.+

 4 Be su guaman duvɛn be manman Zoova kun.+

I klun su jɔman tɛ nga be yi’n su.+

Be ti kɛ sɛ yolɛ kpanwun sa.

Be nga be di’n, bé yó be bɔbɔ be wun fiɛn.

Afin be kpanwun’n ti be ngunmin be liɛ.

Ɔ su wluman Zoova i sua’n nun.

 5 ?Aɲia cɛn’n nun’n,* ngue yɛ á yó-ɔ?

?Zoova i cɛn dilɛ cɛn’n nun’n, ngue yɛ á yó-ɔ?

 6 Afin amun nian! Be nunnunlɛ’n ti’n bé wá wánndi.+

Ezipti wá tían be nuan,+ yɛ Mɛnfisi wá síe be.+

Be ninnge kpakpa nga be fali sika yɛ be yoli’n, bé ká ijre afiɛn.

Yɛ owieowie’m bé fífí be tannin sua’m be nun.

 7 Cɛn nga bé wá úsa be sa nga be yo’n i su sa’n ɔ

su ba.+

Cɛn nga bé wá tú be fɔ kɛ ɔ nin fata’n sa’n ɔ su ba.

Izraɛli wá sí sɔ.

Be Ɲanmiɛn nuan ijɔfuɛ’n wá dí sinnzin, yɛ sran mɔ Ɲanmiɛn kan ndɛ kle i’n, ɔ́ káci fiaunfuɛ.

Ɔ fɔnlɛ m’ɔ ti dan’n ti’n, ɔ kpɔlɛ’n ti dan.”

 8 Efraimun i sasafuɛ’n+ ɔ nin min Ɲanmiɛn’n+ be o nun.

Sanngɛ, siɛn’n i Ɲanmiɛn nuan ijɔfuɛ’m+ be ninnge kwlaa nga be yo’n be ti kɛ anunman trafuɛ’n i aya mun sa.

Kpɔlɛ o i Ɲanmiɛn’n i sua’n nun lɔ.

 9 B’a saci mlɔnmlɔn, kɛ Gibea i blɛ su’n sa.+

I wla wá kpɛ́n be fɔnlɛ’n su, yɛ ɔ́ tú be fɔ.+

10 “Kɛ ń wún Izraɛli’n, ɔ ti kɛ aawlɛ flɛnnɛn’n nun viɲin mma sa.+

Kɛ ń wún be nannan mun’n be ti kɛ figie waka i mma klikli mun sa.

Sanngɛ be ɔli Baali ng’ɔ o Peɔɔ’n i sin.+

Be fali be wun wlali ɲannzuɛn sa’m be yolɛ’n nun.*+

Ɔ maan be yoli kain kɛ like nga be klo i’n sa.

11 Efraimun i aɲrunɲan’n tu ɔli mmua kɛ anunman wie sa.

Sran fi su wuman ba, sran fi su wunnzɛman, yɛ sran fi su faman kuɛ.+

12 Kannzɛ bɔbɔ be ta ba’n,

ń má dé be sa nun ba mun lele sran fi su kaman lɛ.+

Nanwlɛ, cɛn nga n ko kaci min sin n ko si be’n, bé wún be ɲrun!+

13 Laa’n, Efraimun mɔ be tɛli i kɛ waka sa nnɛn didiwlɛ kun nun’n, ɔ ti min ɲrun kɛ Tir sa,+

siɛn’n, ɔ fata kɛ ɔ fɛ i mma yasua mun fite naan be kun be.”

14 Ee Zoova, man be like ng’ɔ fata kɛ a fa man be’n,

man be ku sɛ kun m’ɔ kpɔ ba’n, ɔ nin wunflɛn mɔ nzue nunman nun’n.*

15 “Be klunwi ayeliɛ’n i kwlaa wo Gilgali lɔ,+ afin lɔ yɛ n kpɔli be-ɔ.

Sa tɛtɛ nga be yo’n ti’n, ń má fúan be min sua’n nun,+

n su kloman be kun.+

Be sran dandan’m be kwlaa be ɲin su ti kekle.

16 Bé wá kpɛ́ Efraimun i bo kɛ waka sa.+

I olui’m bé wú kee, yɛ ɔ su suman mma.

Sɛ bɔbɔ ɔ wu ba’n ń kún i mma m’ɔ klo be kpa’n.”

17 Min Ɲanmiɛn’n wá yí be blo,

afin b’a sieman be su i

nuan bo,+

yɛ bé wá káci wlanwlanfuɛ nvlenvle’m be afiɛn.+

10 “Izraɛli ti kɛ viɲin tɛ wie* mɔ w’a su mma’n sa.+

Kɛ i su mma’m bé sɔ́n’n, nn i tɛ yiwlɛ’m be kusu bé sɔ́n.+

Kɛ i asiɛ’n yó ninnge’m be ye’n, nn i yɔbuɛ ng’ɔ sɔ be’n bé yó klanman dan.+

 2 Be awlɛn’n ti nɲɔnnɲɔn.*

Siɛn’n, bé wá tú be fɔ.

Sran kun wá búbú be tɛ yiwlɛ mun, kpɛkun ɔ́ sáci be yɔbuɛ nga be sɔ be’n.

 3 Siɛn’n, bé wá sé kɛ: ‘E leman famiɛn,+ afin y’a sroman Zoova.

?Ngue yɛ famiɛn kun kwla yo man e-ɔ?’

 4 Be kan ndɛ ngbɛnngbɛn mun, be ta ato nda mun,+ yɛ be tra aenguɛ mun.

I sɔ’n ti yɛ fɔ nga be tu be’n, ɔ ti kɛ ijre tɛ wie m’ɔ fifi kofie’m be afiɛn’n sa’n niɔn.+

 5 Srɛ kún Samarifuɛ mun, nannin ba nga be yoli i Bɛti-Avɛnin lɔ’n ti.+

I dunman nun’n, i sran’m bé sún.

Yɛ amuin ɲrun jranfuɛ mɔ be di aklunjɔɛ i dunman nun’n, mɔ i aɲrunɲan’n ti’n be di aklunjɔɛ’n, bé sún wie.

Afin bé wá fɛ́ i bé kɔ́ be wun mmua nvle uflɛ nun.

 6 Bé wá fɛ́ i bé kɔ́ Asiri bé kó cɛ́ famiɛn dan kun.+

Efraimun i ɲin wá gúa ase,

Yɛ ɲannzuɛn kún Izraɛli, afɔtuɛ ng’ɔ fali su’n ti.+

 7 Samari nin i famiɛn’n be su tranman lɛ kun,*+

kɛ waka sama kan wie m’ɔ bu tɔ nzue ɲin su’n sa.

 8 Bé wá núnnún Bɛti-Avɛnin+ lika nglonglo mɔ be ti’n Izraɛli yo sa tɛ’n.+

Owieowie’m bé fífí be tɛ yiwlɛ’m be su.+

Sran’m bé sé oka’m be kɛ: ‘Amun kata e su!’

Yɛ bé sé kpɔlɛ’m be kɛ: ‘Amun tɔ e su!’+

 9 Ee Izraɛli, kɛ ɔ fɛ i Gibea blɛ su’n, a yo sa tɛ.+

Lɔ’n, be yoli ɲin kekle.

Alɛ w’a diman klunwifuɛ mun* Gibea lɔ.

10 Ń má tú be fɔ blɛ nga n klo’n su.

Yɛ blɛ mɔ bé wá fá be sa tɛ nɲɔn’n bé cící be’n,*

sran’m be bo wá yó kun

be wun.

11 Efraimun ti kɛ nannin talua mɔ be kleli i like silɛ’n sa, yɛ ɔ klo like silɛ.

I sɔ’n ti yɛ n yacili i kɔmin klanman’n i lɛ’n niɔn.

Siɛn’n, ń má yó maan sran kun fú Efraimun su kɛ nnɛn kpanngɔ sa.+

Zida wá tú kacɛ, yɛ Zakɔbu síesíe i ye mɛ́n i.

12 Maan amun lua sa kpa yolɛ’n, yɛ amun ti sran klolɛ dan’n.

Blɛ mɔ be kwla kunndɛ Zoova’n,+

lele naan w’a ba naan w’a kle amun sa kpa yolɛ’n,+

amun tu asiɛ m’ɔ yo like ye’n i kacɛ.+

13 Sanngɛ amun tuli klunwi’n i kacɛ,

amun tili sa tɛ yolɛ’n,+

yɛ amun dili sran lakalɛ’n i mma’n.

Afin amun fali amun wla guali amun bɔbɔ amun atin liɛ’n su,

ɔ nin amun sonja kpanngban’m be su.

14 Be nga bé jáso ɔ nvlefuɛ’m be wun’n, bé kéje yekee,

yɛ bé sáci ɔ klɔ nga be sisili be wun’n be kwlaa,+

kɛ nga Saliman fa sacili Aabɛli i awlo’n

alɛ kunlɛ cɛn’n nun’n sa. Blɛ sɔ’n nun’n, be kpɔtɔli niɛn mun be mma’m be wun lɛ.

15 Ee Betɛli, like nga bé wá fá yó wɔ’n yɛ ɔ o lɛ-ɔ,+ ɔ klunwi dan’n ti.

Aliɛ njɛnniɛn su’n, Izraɛli famiɛn’n su tranman

lɛ kun.”*+

11 “I nun mɔ Izraɛli te yo yasua kan’n, n kloli i.+

Yɛ n flɛli min wa yasua’n naan ɔ jaso Ezipti lɔ.+

 2 Kɛ bé* flɛ́ be’n,

nn bé wánndi be bé kɔ́ mmua.+

Be yili tɛ mannin Baali i nzɔliɛ ninnge mun+ titi,

yɛ be yili tɛ mannin amuin nga be sɛli be’n.+

 3 Kusu nn min yɛ n kleli Efraimun i nantilɛ-ɔ,+ yɛ n fali be min sa su.+

Sanngɛ b’a wunmɛn i wlɛ kɛ n yoli be juejue.

 4 N fali klɔ sran’m be ɲanman mun* n cuɛnnin be titi, n fali klolɛ ɲanman mun n cuɛnnin be.+

Yɛ n yoli kɛ sran kun m’ɔ yi kɔmin su waka’n sa, naan be aoje’m be lo wunmiɛn,

kpɛkun n mannin be tinuntinun be aliɛ

klolɛ su.

 5 Be su saman be sin Ezipti mɛn’n nun lɔ, sanngɛ Asiri yó be famiɛn,+

afin b’a kplinman su kɛ bé sá be sin min wun.+

 6 Yɛ tokofi kun kpɛ́ i wun tɔ́ i klɔ’m be su,+

yɛ ɔ́ sáci ninnge nga be jaja i klɔ’m be anuan’m be sin’n, kpɛkun ɔ́ kún be, sa nga be sunnzunnin’n ti.+

 7 Min sran’m b’a fua kpa kɛ be nin min su nantiman klanman.+

Be flɛli be nglo lɔ,* sanngɛ be nun wie fi jasoman.

 8 ?Ee Efraimun, ngue ti yɛ ń yí wɔ ase-ɔ?+

?Ee Izraɛli, ngue ti yɛ ń yí wɔ ń mán-ɔn?

?Ngue ti yɛ ń yó wɔ kɛ Adma sa-ɔ?

?Ngue ti yɛ ń yó wɔ kɛ Zeboimun sa-ɔ?+

N kacili akunndan.

Blɛ kunngba sɔ’n nun’n, min sran aunnvɔɛ silɛ’n tinngeli.*+

 9 N su yiman min ya m’ɔ jue kɛ sin sa’n i nglo.

N su nunnunman Efraimun kun,+

afin n ti Ɲanmiɛn, n timan klɔ sran,

n ti Ɲanmiɛn m’ɔ ti Sanwun’n ɔ afiɛn,

yɛ n su yoman ɔ like ya su.

10 Bé nánti sú Zoova su, yɛ ɔ́ kpán kɛ asɔmɔli sa.+

Kɛ ɔ́ kpán’n, i mma’m bé fín wia atɔliɛ lɔ bé úsu bé bá.+

11 Kɛ bé fín Ezipti lɔ bé fíte’n, bé úsu kɛ anunman sa,

kɛ bé fín Asiri mɛn’n nun bé fíte’n, bé úsu kɛ auble sa.+

Yɛ ń má yó maan bé wá trán be sua’m be nun,” ndɛ nga Zoova kan’n yɛ ɔ o lɛ-ɔ.+

12 “Efraimun w’a fa ato’n w’a sin w’a yia min,

yɛ Izraɛli nvle’n nunfuɛ’m b’a fa gblɛ’n+ b’a sin b’a yia min.

Sanngɛ Zida nin Ɲanmiɛn be te nanti,*

ɔ nin Sran M’ɔ Ti i liɛ Ngunmin’n be nanti klanman.”+

12 “Aunmuan yɛ Efraimun di-ɔ.

Aliɛ ba kwlaa nun’n, ɔ fuan wia afiliɛ lɔ aunmuan’n.

Ɔ kan ato ndɛ kpanngban, yɛ ɔ yo nzaje sa dan.

Be nin Asiri be tra aenguɛ,+ yɛ be fa ngo be kɔ Ezipti.+

 2 Ndɛ o Zoova nin Zida be afiɛn,+

ɔ́ wá úsa Zakɔbu i ninnge ng’ɔ yo be’n be su sa,

yɛ ɔ́ yí sa ng’ɔ yo’n i nuan like mɛ́n i.+

 3 Kɛ ɔ o i nin i ku sɛ’n nun lɔ’n, ɔ trɛli i niaan bian’n i ja sin nanndi’n,+

yɛ ɔ fɛli i wunmiɛn’n kwlaa ɔ nin Ɲanmiɛn be tuli ngondin.+

 4 Ɔ nin anzi’n be tuli ngondin lele ɔ kwlali.

Ɔ sunnin, yɛ ɔ srɛli i kɛ

ɔ yo i ye,+

Ɲanmiɛn toli i Betɛli lɛ, yɛ ɔ nin e ijɔli lɛ,+

 5 Ɲanmiɛn Zoova m’ɔ ti sonja’m be su kpɛn’n,+

i dunman Zoova’n yɛ be

fa si i-ɔ.+

 6 “Ɔ maan sa ɔ sin ɔ Ɲanmiɛn’n i wun,+

klo i kpa titi, yɛ yo sa i nuan su sɛsɛ,+

yɛ fa ɔ wla guɛ i su blɛ kwlaa nun.

 7 Sanngɛ toe nga be o aata difuɛ’n i sa nun’n be diman nanwlɛ,

ɔ klo ndrunmun dilɛ.+

 8 Efraimun se titi kɛ: ‘Nanwlɛ, m’an kaci aɲanbeunfuɛ.+

M’an ɲan min wun.+

Yɛ be su wunman fɔnlɛ nin sa tɛ fi ninnge kwlaa nga n yo be’n be nun.’

 9 Sanngɛ kɛ ɔ fɛ i Ezipti mɛn’n nun lɔ’n, n ti ɔ Ɲanmiɛn Zoova.+

Ń má yó maan á trán tannin sua’m be bo ekun,

kɛ blɛ kun mɔ be kleli’n* i nun cɛn mun sa.

10 N kannin ndɛ n kleli min nuan ijɔfuɛ mun,+

n yoli maan be wunnin aolia nun sa kpanngban,

n sinnin min nuan ijɔfuɛ’m be lika n buli ɲanndra mun.

11 Galaadi lɔ’n be kpɛli gblɛ,+ yɛ be lakali sran,

Gilgali lɔ’n be fali nannin tola mun yili tɛ,+

yɛ be tɛ yiwlɛ’m be ti kɛ yɔbuɛ mɔ be tian be nuan kofie’m be afiɛn’n sa.+

12 Zakɔbu wanndi ɔli Aramun* mɛn’n* nun lɔ.+

Bla kun dunman nun ti’n, Izraɛli+ dili junman lɔ,+

yɛ bla kun dunman nun ti’n, ɔ niannin bua’m be su.+

13 Zoova sinnin i nuan ijɔfuɛ kun lika ɔ fali Izraɛli Ezipti lɔ fiteli,+

yɛ ɔ sinnin i nuan ijɔfuɛ kun lika ɔ niɛnnin i su.+

14 Efraimun loli Ɲanmiɛn i ngasi dan,+

mmoja ng’ɔ guɛli i ase’n, ɔ o i ti su,

i Min’n wá yí finfin ng’ɔ yoli i’n i nuan like mɛ́n i.”+

13 “Laa’n, kɛ Efraimun ijɔ’n, be usu.

Ɔ le ɲrun dan Izraɛli lɔ.+

Sanngɛ Baali+ dunman nun ti’n, ɔ yoli sa tɛ yɛ ɔ wuli.

 2 Dɔ nga su bɔbɔ’n, be te yo sa tɛ’n be te kɔ be ɲrun,

yɛ be fa be sika be yo amuin mun.+

Be yo amuin mun klanman kpa, be kwlaa be ti ajuin difuɛ’m be sa nuan like.

Be se be kɛ: ‘Maan be nga be yi tɛ’n be fa be nuan bo nannin ba’n i wun.’+

 3 I sɔ’n ti’n, bé yó kɛ nglɛmun nun ɲanmiɛn ble’n sa,

bé yó kɛ bɔlɛ ufue m’ɔ wie ndɛndɛ’n sa,

bé yó kɛ ble wla mɔ aunmuan m’ɔ fita kekle kpa’n fɛ i kɔ’n sa,

yɛ bé yó kɛ sin wunsrɛn m’ɔ fin sua ti nun fite’n sa.

 4 Sanngɛ kɛ ɔ fɛ i Ezipti mɛn’n nun lɔ’n, min yɛ n ti ɔ Ɲanmiɛn Zoova’n niɔn.+

A siman Ɲanmiɛn uflɛ fi saan min,

yɛ sɛ w’a yoman kɛ min sa’n, defuɛ uflɛ fi

nunman lɛ.+

 6 Be klun jɔli be didiwlɛ’m

be su,+

be klun jɔli yɛ be tuli

be wun.

Ɔ maan be wla fili min.+

 7 Ń má káci kɛ asɔmɔli gbanflɛn sa be lika,+

ń yó kɛ kangale wie mɔ w’a sa atin nuan’n sa.

 8 Ń má tɔ́ be su kɛ ursu wie mɔ i mma’m b’a mlin’n sa.

Yɛ ń kpáci be wue’n nun.

Ń dí be lɛ kɛ asɔmɔli wie sa.

Blo nnɛn kun wá títí be nun.

 9 Ee Izraɛli, ɔ́ wá núnnún wɔ,

afin a jasoli min wun, a jasoli ɔ ukafuɛ’n i wun.

10 ?Ɔ famiɛn m’ɔ fata kɛ ɔ de wɔ ɔ klɔ’m be kwlaa be su’n, ɔ o nin?+

?Yɛ ɔ siefuɛ* mɔ be dunman nun ti’n a seli kɛ:

‘Man min famiɛn kun nin sran dandan mun’n,’ be o nin?+

11 N fali ya n mannin wɔ famiɛn kun,+

yɛ ya dan mɔ ń fá’n ti’n, ń tú i lɛ.+

12 B’a cici Efraimun i sa tɛ’n i wun b’a sie.

B’a fɛ i sa tɛ’n b’a sie i lika kun.

13 Ba wulɛ aklunya wá tɔ́ i su.

Sanngɛ ba’n siman ngwlɛlɛ,

kɛ i wulɛ blɛ’n ju’n, ɔ baman.

14 Ń má dé be Ndia’n* i tinmin’n i sa nun,

ń dé be wie’n i sa nun.+

?Ee Wie, ɔ bɔyre’n wo nin?+

?Ee Ndia, ɔ like sacilɛ dan’n wo nin?+

Aunnvɔɛ silɛ’n ɔ́ fía min ɲrun.

15 Kannzɛ bɔbɔ ɔ yo kpa ndɛ mma’m be afiɛn’n,

wia afiliɛ lɔ aunmuan kun bá, Zoova i aunmuan’n niɔn,

ɔ fin aawlɛ flɛnnɛn’n nun lɔ yɛ ɔ ba-ɔ, naan i gbo’n nin i nzue ti’n be wie nun.

Sran sɔ’n, ɔ́ wá fɛ́n i ninnge kpakpa kwlaa nga be o i nun ninnge siewlɛ’n nun’n.+

16 Bé wá bú Samari i fɔ,+ afin ɔ yoli ɲin kekle i Ɲanmiɛn’n i su.+

Bé wá fá tokofi bé kún be,+

bé títí be mma’m be nun,

yɛ bé kpáci be bla nga b’a wunnzɛ’n be klun.”

14 “Ee Izraɛli, sa ɔ sin ɔ Ɲanmiɛn Zoova i wun,+

afin ɔ fɔnlɛ’n ti’n, ɔ ja kplali.

 2 Sa ɔ sin Zoova i wun, yɛ kan ndɛ yɛ mun,

se i kɛ: ‘Yaci, yaci e fɔnlɛ’n cɛ e,+ yɛ sɔ like ng’ɔ ti kpa’n nun,

kpɛkun é fá e nuan’n* é mánmán wɔ,+ kɛ nannin gbanflɛn mun yɛ e su fa man wɔ sa.

 3 Asiri su deman e.+

E su fuman nnɛn kpanngɔ’m be su,+

yɛ e su seman e sa nuan ninnge’m be kun kɛ: “Ee, e Ɲanmiɛn!”

Afin wɔ yɛ a si ba ng’ɔ leman si’n i aunnvɔɛ-ɔ.’+

 4 Ń má yó be juejue, yɛ be su yaciman min kun.+

Ń kló be min klun klo su,+

afin be wun ya nga n fali’n w’a kan ase.+

 5 Ń má káci kɛ bɔlɛ ufue sa Izraɛli i lika.

Ɔ́ wá bó nɲrɛ kɛ lisi sa,

yɛ ɔ́ wlɛ́ i olui’m be ase kɛ Liban lɔ waka mun sa.

 6 I ja kanngan nga be fifi i wun’n bé trɛ́,

ɔ́ yó klanman kɛ olivie waka sa,

yɛ ɔ́ bɔ́n fannin kɛ Liban bo’n sa.

 7 Bé wá trɛ́n i fɔnvɔ’n i

bo ekun.

Bé yó maan be ninnge mma’m bé fífí, yɛ bé fɛ́fɛ́ kɛ viɲin sa.+

I dunman’n fú kɛ Liban duvɛn’n sa.

 8 Efraimun wá sé kɛ: ‘?Ngue yɛ ń fá amuin mun ń yó i ekun-ɔn?’+

Ń má tɛ́ su, yɛ ń níɛn i su.+

Ń má yó kɛ zenevrie waka dan wie sa.

Min yɛ ń sú mma ń

mán wɔ-ɔ.”

 9 ?Wan yɛ ɔ si ngwlɛlɛ-ɔ? Maan ɔ wun ninnge sɔ’m be wlɛ.

?Wan yɛ ɔ ti akunndanfuɛ-ɔ? Maan ɔ si be.

Afin Zoova i atin’m be ti seiin,+

yɛ sran kpa’m bé nánti be su.

Sanngɛ sa tɛ yofuɛ’m be ja kplá be su.