ABAKIKI
1 Ndɛ nga Ɲanmiɛn nuan ijɔfuɛ Abakiki* tili i aolia nun’n yɛ:
2 ?Ee Zoova, naan flɛlɛ nga m’an flɛ wɔ lele kɛ a wa uka min’n, a su tɛman min su le?+
3 ?Ngue ti yɛ a yo maan n wun sa tɛtɛ nga be yo be’n niɔn?
?Yɛ ngue ti yɛ a yaci sran’m be lɛ mɔ be kle be wiengu’m be ɲrɛnnɛn sɔ-ɔ?
?Ngue ti yɛ be saci ninnge mun, kpɛkun be yo nzaje sa mun min ɲrun-ɔn?
?Yɛ ngue ti yɛ ndɛnnganndɛnngan nin utre’n be o lika’n nun sɔ-ɔ?
4 Sran fi nantiman mmla’n su,
yɛ sran fi yoman sa nuan su mlɔnmlɔn.
Afin sa tɛ yofuɛ’m be tin sa kpa yofuɛ’m be su.
I sɔ’n ti yɛ sran’m be diman jɔlɛ nanwlɛ su’n niɔn.+
5 “An nian nvlenvle’m be nun, amun fa amun ɲin sie be su!
Maan amun nuan bo amun wun, yɛ maan amun kpiti,
afin sa wie wá jú amun
blɛ su’n,
kannzɛ bɔbɔ be kan kle amun’n, amun su
faman su.+
Be kɔ asiɛ’n i likalika’m be nun
be ko de sran’m be tranwlɛ mun.+
7 Be wlanwlan sran mun, yɛ be yo sro kpa.
Be le be mmla yɛ be nanti su-ɔ, be sie sran mun kɛ be fa klo’n sa.+
8 Be nnɛn kpanngɔ’m be wanndi tra kangale,
be yo wlɛ tra blo alua mɔ kɔnguɛ yɛ be fite’n.+
Be nnɛn kpanngɔ nga be fa kun alɛ’n, be wanndi yɛ be ba-ɔ,
be nnɛn kpanngɔ’m be fin mmua kpa.
Be tɔ sran’m be su kpɛ kunngba kɛ anunman ɲin fa tɔ nnɛn su sa.+
9 Be kwlaa be ba nzaje sa yolɛ.+
Be kɔ likawlɛ kɛ wia afiliɛ lɔ aunmuan’n sa,+
sran nga be tra be kɔ’n, be sɔnnin kpa kɛ aunɲan sa.
10 Be yo famiɛn’m be finfin,
be sri famiɛn’n i sran dandan mun.+
Kɛ be wun lika nga b’a sisi i wun’n,+ ɔ kle be srilɛ,
be tian fa nuan be sin su, kpɛkun be fa lika sɔ’n.
11 Be kɔ be ɲrun, be sin kɛ aunmuan sa,
sanngɛ sa tɛ nga be yoli’n ti’n, bé tú be fɔ,+
12 Zoova, kɛ ɔ fɛ i laa lele’n, a o lɛ. ?Nɛ́n i-ɔ?+
Min Ɲanmiɛn, min Ɲanmiɛn m’ɔ ti Sanwun’n, a wuman.*+
13 Ɔ ɲinma’m be ti sanwun dan, ɔ maan be kwlá nianman sa ng’ɔ ti tɛ’n,
yɛ a kwlá tranman lɛ nianman klunwi ayeliɛ’n.+
?Ɔ maan ngue ti yɛ a tran lɛ nian be nga be timan seinfuɛ’n niɔn?+
?Ngue ti yɛ kɛ klunwifuɛ’n tin sran m’ɔ ti kpa trɛ i’n su’n, a kanman ndɛ-ɔ?+
14 ?Ngue ti yɛ a yo sran’m
be kɛ jenvie’n nun jue mun sa-ɔ?
?Ngue ti yɛ a yo i kɛ jenvie’n nun ninnge mɔ be leman siefuɛ’n sa-ɔ?
15 Ɔ* fa kowa tra be kwlaa.
Ɔ fɛ i lala’n tra be,
kpɛkun ɔ tian be nuan i lala’n nun.
I sɔ’n ti yɛ ɔ di aklunjɔɛ dan’n niɔn.+
16 I sɔ’n ti yɛ ɔ yi tɛ mɛn i lala’n niɔn,
yɛ ɔ yi tɛ mɛn i jue tralɛ lala’n.
Afin be ti’n, like kpa ngunmin* yɛ ɔ di-ɔ,
yɛ aliɛ m’ɔ yo maan sran i wunnɛn’n ba nun kpa’n, yɛ ɔ di-ɔ.
17 ?Ɔ maan ɔ́ ísɛ i lala’n nun jue’m be kwlaa tititi?*
?Naan ɔ́ kún nvlenvle’m be nunfuɛ mun titi? ?Ɔ su siman be aunnvɔɛ?+
Ń trán ń mínndɛ naan ń wún ndɛ ng’ɔ́ fá wlá min nuan kɛ n kan’n,
yɛ kɛ bé tú min fɔ’n, ń ɲán ndɛ ń kán.
2 Yɛ Zoova tɛli min su kɛ:
“Klɛ like nga a wunnin i aolia nun’n, klɛ i weinwein kpa tɛbua’m
be su,+
i liɛ’n, sran ng’ɔ́ mɛ́n i nɛn’n su ɔ́ kánngan’n, i kannganlɛ’n yó pɔpɔ
mɛ́n i.+
3 Afin kɛ blɛ nga be sieli’n ɔ ko ju’n, like nga a wunnin i aolia nun’n kpɛ́n su,
ɔ su ba ndɛndɛ,* ɔ́ yó sɔ sakpa.
Kannzɛ ɔ́ cɛ́ sɛ’n,* tran minndɛ i titi!+
Afin saan i nuan yía,
ɔ su kaman siɛn!
5 Kɛ mɔ duvɛn’n laka sran’n ti’n,
wun tufuɛ’n su kwlá ɲanman like ng’ɔ sunnzun’n.
I konvi’n cɛnnin kɛ Ndia’n* sa.
Ɔ ti kɛ wie’n sa, i ku yiman le.
Ɔ yaciman nvlenvle’m be nunfuɛ’m be yiayialɛ,
ɔ fa sran mun bɛ i wun lɛ titi.+
6 ?Be kwlaa sɔ’m be su kpɛmɛn i wun flɛn, be su dimɛn i wun asanse, yɛ be su bumɛn i wun ɲanndra?+
Bé sé kɛ:
‘Sran ng’ɔ tiantian like ng’ɔ timɛn i liɛ’n i nuan’n,
m’ɔ ukɛ i su kalɛ’n su’n, i yako!
?Cɛn benin yɛ ɔ́ yáci i sɔ yolɛ-ɔ?
7 ?Be nga be kalɛ o ɔ su’n, be su baman kpɛ kunngba?
Bé jáso, kpɛkun bé kéje wɔ kekle kpa,
yɛ bé fɛ́n ɔ bo ninnge mun.+
8 Kɛ mɔ a fɛnnin nvlenvle’m be bo ninnge mun’n ti’n,
sran nga be kali lɛ’n, be kusu bé wá fɛ́n ɔ bo ninnge mun wie,+
afin a guali sran mmoja ase,
a yoli mɛn’n i like yaya,
a yoli klɔ mun nin be nga be tran be su’n, be
sɔ wie.+
9 Sran ng’ɔ di ndrunmun m’ɔ fɛ i sɔ’n tɛ i awlobo’n, i yako!
Ɔ yo sɔ naan ɔ́ fɛ́ i sua’n síe i nglo lɔ,
naan sa w’a ɲɛnmɛn i!
10 Sa tɛ nga a sunnzunnin’n ti’n, ɔ awlobo’n wún ɲannzuɛn.
A nunnunnin sran kpanngban. I lɛ’n nun’n, a yoli ɔ bɔbɔ ɔ wun tɛ.+
11 Afin talɛ’n i yɔbuɛ kun kpán,
kpɛkun sua’n i ti su lɔ waka kun sɔ́ su.
12 Sran ng’ɔ fa sran mmoja kplan klɔ kun’n,
m’ɔ fa sa tɛ yolɛ’n taka klɔ kun’n, i yako!
13 ?Kɛ sran’m be di junman kekle mɔ kasiɛn su’n sin’n di’n,
mɔ nvlenvle’m be nunfuɛ’m be kle be wun yalɛ ngbɛn’n, i sɔ’n finman Zoova m’ɔ ti sonja’m be su kpɛn’n?+
14 Afin asiɛ’n sufuɛ’m be kwlaa bé wá sí Zoova i aɲrunɲan’n
kɛ nzue’n fa kata jenvie’n i bo lɔ’n su sa.+
15 Sran ng’ɔ mɛn i wiengu’m be nzan’n,
m’ɔ fa ya nin ya ble gua nun naan be bo’n,
naan w’a kwla wun be wun kplɛn’n, i yako!
16 Á wá wún ɲannzuɛn, a su ɲanman ɲrun.
Ɔ bɔbɔ nɔn nzan’n naan yiyi ɔ wun naan be wun kɛ b’a wlaman ɔ klɛn.*
Klowa ng’ɔ o Zoova i sa fama’n nun’n, ɔ́ bá ɔ wun,+
yɛ ɔ ɲin m’ɔ́ wá gúa ase’n, ɔ́ káta ɔ aɲrunɲan’n su.
17 Afin nzaje sa nga a yoli i Liban lɔ’n, ɔ́ wá tɔ́ ɔ su,
yɛ wafa nga a fa nunnunnin nnɛn mun’n, bé fá núnnún ɔ sɔ wie,
afin a guali sran mmoja ase,
a yoli mɛn’n i like yaya,
a yoli klɔ mun nin be nga be tran be su’n, be sɔ wie.+
18 ?Kɛ sran kun sɛ amuin’n,
ngue yɛ sran ng’ɔ sɛli’n ɔ ɲɛn i nun-ɔn?
?Sɛ sran kun klo like fa yo amuin m’ɔ kan ato ndɛ’n,
kannzɛ bɔbɔ ɔ fɛ i wla gua su’n, ngue ye yɛ ɔ ɲɛn i nun-ɔn?
Amuin ng’ɔ sɛ be’n be timan like fi, yɛ be kwlá ijɔman.+
19 Sran ng’ɔ se waka losin’n kɛ: “Jaso!”
Annzɛ ɔ se yɔbuɛ m’ɔ kwlá ijɔman’n kɛ: “Jaso naan kle e ngwlɛlɛ’n,” i sɔfuɛ’n i yako!
20 Zoova o i sua m’ɔ ti i liɛ klonglo’n nun.+
Asiɛ’n sufuɛ mun, amun mɔ amun o i ɲrun lɛ’n, maan amun kwlaa amun gua bliin!’”+
3 Abakiki m’ɔ ti Ɲanmiɛn nuan ijɔfuɛ’n i srɛlɛ m’ɔ ti kɛ kokolɛ* sa’n yɛ:
2 Zoova, n tili ɔ su ndɛ nga be kannin’n.
Zoova, sa nga a yoli’n kun min srɛ.
Blɛ nga a kleli’n nun’n,* yo sa sɔ’n.
Blɛ nga a kleli’n nun’n,* yo naan be si i.
Blɛ kekle nun’n, nán ɔ wla fi aunnvɔɛ silɛ’n su.+
3 Ɲanmiɛn fin Temanin.
Ɲanmiɛn m’ɔ ti Sanwun’n fin Paran Oka’n su lɔ.+ (Sela)*
I aɲrunɲan’n katali ɲanmiɛn’n su.+
Sran’m be mɛnmɛnnin i asiɛ’n su.
4 I kpajalɛ’n ti kɛ
kannin sa.+
I sa klun’n kpajali tiaantiaan nɲɔn,
i nun yɛ i wunmiɛn’n fia-ɔ.
5 Tukpacɛ m’ɔ sa ndɛndɛ’n, ɔ dun mmua i ɲrun.+
Yɛ ayrɛ m’ɔ gua sran wun dan’n, ɔ su i su.
6 Ɔ jrannin diin, kpɛkun ɔ kejeli asiɛ’n.+
Kɛ ɔ niannin nvlenvle mun’n, be kpitili.+
Oka nga be o lɛ w’a cɛ kpa’n, be kpukekpukeli.
Kpɔlɛ nga be o lɛ lalaa’n, be kotoli.+
Atin nga be o lɛ w’a cɛ’n, be ti i liɛ.
7 N wunnin kɛ ɲrɛnnɛn’n wo Kusanin lɔ tannin sua’m be nun.
Tannin nga be fa yoli Madian lɔ tannin sua mun’n, be kejeli.+
8 ?Ee Zoova, nzue dandan’m be wun yɛ ɔ ya’n su jue-ɔ?
?Nzue dandan’m be wun yɛ w’a fa ya-ɔ?
?Annzɛ jenvie’n i wun yɛ ɔ ya ble’n w’a jaso-ɔ?+
A fuli ɔ nnɛn kpanngɔ’m be su.+
Ɔ kakaklolo’m be kwlali.+
9 Ɔ ta’n i su timan katawa, a su wa to.
Be sunmannin waka* mun nda kun mɔ be tali’n ti. (Sela)
A fali nzue ba mun fa kpɛli asiɛ’n nun.
10 Kɛ oka’m be wunnin wɔ’n, ɲrɛnnɛn dan m’ɔ tɔli
be su’n ti’n, be wun bliblili be.+
Nzue’n tɔli dan kpa,
ɔ sin ɔli.
Nzue m’ɔ o kunman dan’n nun’n, ɔ kpannin
kekle kpa.+
Ɔ mɛnnin i sa’m be
su nglo.
11 Wia’n nin anglo’n be jrannin be tranwlɛ’n nun nglo lɔ diin.+
Ɔ ta mma mɔ be bo mianmian’n, be fiteli.+
Ɔ cua m’ɔ bo mianmian’n, ɔ kpaja kpa.
12 A nantili asiɛ’n su ya su.
A tiatiali* nvlenvle’m be su ya su.
13 A fite ɔli ɔ nvle’n nunfuɛ’m be delɛ, a ɔli ɔ sran mɔ a kpɛli i’n i delɛ.
A nunkunnin klunwifuɛ’n i awlo’n i su kpɛn’n.
Kɛ ɔ fɛ i i ti* su lɔ m’ɔ́ fá jú i bo lɔ’n, a nunnunnin i sekeseke kpan. (Sela)
14 Kɛ i alɛ kunfuɛ’m be tuli kpuu be bali min nun sannganlɛ’n,
a fɛli i bɔbɔ i alɛ kunlɛ ninnge mun fitifitili
be ti’n.
Kɛ be fiali be kunnin afɛfuɛ’n, be dili aklunjɔɛ.
15 A fali ɔ nnɛn kpanngɔ mun sinnin jenvie’n nun,
a fa be sinnin nzue dandan mɔ be sonji kpuu’n nun.
16 Kɛ n tili ndɛ’n, min klun titili min.
Kɛ n tili’n, min nuan bui’n usuli.
Min ja’m be usuusuli min bo.
Sanngɛ ń trán diin ń mínndɛ awlabɔɛ cɛn’n.+
Afin ɔ́ jú be nga be kle e yalɛʼn be su.
17 Kannzɛ figie waka’n boman nɲrɛ’n,
naan viɲin’n suman’n,
kannzɛ olivie’n suman’n,
naan fie’m be su ninnge’m be suman’n,
kannzɛ bua nunman bua tuin’n nun’n,
naan nannin nunman nannin tuin’n nun’n,
18 sanngɛ min liɛ’n, Zoova ti’n, ń bó sró.
Ɲanmiɛn m’ɔ ti min defuɛ’n ti’n, ń dí aklunjɔɛ.+
19 Min Min Zoova m’ɔ Sie Like Kwlakwla’n yɛ ɔ ti min wunmiɛn’n niɔn.+
Ɔ́ wá yó maan min ja’m bé yó kɛ flete’n i liɛ’n sa.
Ɔ́ wá yó maan ń nánti lika mɔ be o nglonglo kpa’n be su.+
Ɔ ti jue tofuɛ’m be su kpɛn’n i liɛ. Maan be bo min miziki bolɛ ninnge nga be le ɲanman’n.
Atrɛkpa i bo’n yɛ: “Sran Nun Tɔlɛ Juejue Su.”
Annzɛ “a su deman e.”
Be kwla se ekun kɛ “be tinmin’n yɛle be amuin’n.”
Be kwla se ekun kɛ “e su wuman.”
Yɛle kɛ, Kaldefuɛ mɔ be ti be kpɔfuɛ’n.
Ebr., “like nga ngo o nun dan’n.”
Be kwla se ekun kɛ “ɔ́ cúɛn i tokofi’n tititi.”
Annzɛ “kpɛn su.”
Annzɛ “Kannzɛ ɔ yo kɛ ɔ su cɛ ngboko’n.”
Be kwla se ekun kɛ “i Ɲanmiɛn sulafilɛ’n.”
Annzɛ “Seɔlu’n.” Nian Ndɛ’m be bo tulɛ lika’n nun lɔ.
Be kwla se ekun kɛ “naan bo nvaka.”
Annzɛ “ngwlɛ yilɛ.”
Be kwla se ekun kɛ “E blɛ su’n.” Ebr., “Afuɛ’m be afiɛn’n.”
Be kwla se ekun kɛ “E blɛ su’n.” Ebr., “Afuɛ’m be afiɛn’n.”
Nian Ndɛ’m be bo tulɛ lika’n nun lɔ.
Be kwla se ekun kɛ “ta mma.”
Ebr., “boli.”
Ebr., “kɔmin.”
Ebr., “Like mɔ w’a saci’n wluli min owie’m be nun.”