AZE

1 Kɛ Dariisi boli famiɛn dilɛ bo’n i afuɛ nɲɔn su’n, i anglo nsiɛn’n i cɛn ba klikli su’n, Aze*+ m’ɔ ti Ɲanmiɛn nuan ijɔfuɛ’n kannin Zoova i nuan ndɛ’n kleli Sealtiɛli i wa Zorobabɛli+ m’ɔ ti Zida siefuɛ’n nin Zozadaki i wa Zozie m’ɔ ti Ɲanmiɛn ɲrun jranfuɛ dan’n. Ɔ seli kɛ:

2 “Ndɛ nga Zoova m’ɔ ti sonja’m be su kpɛn’n kan’n yɛ: ‘Sran nga’m be waan: “Nán dɔ nga su yɛ ɔ fata kɛ e kplan Zoova i sua’n niɔn.”’”*+

3 Aze+ m’ɔ ti Ɲanmiɛn nuan ijɔfuɛ’n kannin Zoova i nuan su ndɛ’n ekun. Ɔ seli kɛ: 4 “Dɔ nga su’n, sua nga amun la nun’n, amun a fa waka b’a yo be klanman, kusu nn sua nga w’a bubu.+ ?I sɔ’n nin i fata yɛ ɔ o lɛ-ɔ? 5 Siɛn’n, ndɛ nga Zoova m’ɔ ti sonja’m be su kpɛn’n kan’n yɛ: ‘Maan amun bu amun ayeliɛ’n i akunndan kpa.* 6 Amun luali like kpanngban, sanngɛ i su mma nga amun tili’n juman lika fi.+ Amun di like, sanngɛ amun ku yiman. Amun nɔn nzan, sanngɛ ɔ juman amun. Amun wla tralɛ, sanngɛ ɔ tuman amun wun ayrɛ’n. Sran ng’ɔ di junman man sran’n, bɔlɛ fitiwa’n i nun yɛ ɔ fɛ i akatua’n sie-ɔ.’”

7 “Ndɛ nga Zoova m’ɔ ti sonja’m be su kpɛn’n kan’n yɛ: ‘Maan amun bu amun ayeliɛ’n i akunndan kpa.’*

8 “‘Maan amun wɔ oka’n su lɔ, amun ko kunndɛ waka be bla+ naan amun kplan sua’n.+ I liɛ’n, min klun jɔ́ su, yɛ bé mánmán min,’+ Zoova yɛ ɔ kan sɔ-ɔ.”

9 “Zoova m’ɔ ti sonja’m be su kpɛn’n waan yoo: ‘Amun buli i kɛ amun wá ɲán like kpanngban, sanngɛ nga amun ɲɛnnin i’n juman lika fi. Kɛ amun fa bali sua’n nun’n, n fitali su naan i osu nunnun.+ ?Ngue ti-ɔ? Afin amun kplin amun ɲin kpa be nian amun sua liɛ’m be lika, kusu nn min sua’n w’a bubu.+ 10 I sɔ’n ti’n, bɔlɛ ng’ɔ o ɲanmiɛn su lɔ’n, ɔ guaman kun, yɛ asiɛ’n yoman like fi ye kun. 11 N yoli maan amun asiɛ’n nin amun oka’m be su w’a wu kee. Ɔ maan aliɛ, nin duvɛn, nin ngo, nin fie su ninnge nga amun ɲɛnnin i’n, be juman lika fi. Sran nin nnɛn’m be o ɲrɛnnɛn nun. Yɛ junman kwlaa nga amun dili’n, ɔ yoli ngbɛn.’”

12 Sealtiɛli+ i wa Zorobabɛli+ nin Zozadaki+ i wa Zozie m’ɔ ti Ɲanmiɛn ɲrun jranfuɛ dan’n, ɔ nin sran onga’m be kwlakwla be fali Zoova m’ɔ ti be Ɲanmiɛn’n i ndɛ’n su, yɛ be fali ndɛ nga Aze m’ɔ ti Ɲanmiɛn nuan ijɔfuɛ’n kannin’n su. Afin Zoova m’ɔ ti be Ɲanmiɛn’n yɛ ɔ sunmɛnnin i-ɔ. Kɛ ɔ fɛ i lɛ’n, sran’m be wa sroli Zoova.

13 Aze mɔ Zoova sunmɛnnin i’n, ɔ niannin ndɛ nga Zoova waan ɔ kan kle nvle’n nunfuɛ mun’n su sɛsɛsɛ kannin. Ɔ seli kɛ: “Zoova waan: ‘N jin amun sin.’”+

14 Kpɛkun Zoova suli Sealtiɛli i wa Zorobabɛli m’ɔ ti Zida+ siefuɛ’n, nin Zozadaki i wa Zozie+ m’ɔ ti Ɲanmiɛn ɲrun jranfuɛ dan’n, nin sran’m be kwlakwla be bo.+ Ɔ maan be bali be wa dili junman be Ɲanmiɛn Zoova m’ɔ ti sonja’m be su kpɛn’n, i sua’n nun.+ 15 Kɛ Dariisi+ boli famiɛn dilɛ bo’n i afuɛ nɲɔn su’n, i anglo nsiɛn’n i le ablaɔn-nin-nnan (24) su’n yɛ be yoli sɔ-ɔ.

2 Anglo nso su’n, i le ablaɔn-nin-kun’n (21), Ɲanmiɛn nuan ijɔfuɛ Aze+ kannin Zoova i nuan ndɛ’n. Ɔ seli kɛ: 2 “Yaci, usa Sealtiɛli i wa Zorobabɛli+ m’ɔ ti Zida siefuɛ’n,+ nin Zozadaki+ i wa Zozie+ m’ɔ ti Ɲanmiɛn ɲrun jranfuɛ dan’n, nin nvle nunfuɛ’m be kwlakwla kɛ: 3 ‘?I nun nga sua* nga te yo klanman’n, amun nun onin yɛ ɔ wunnin nun-ɔn?+ ?Yɛ andɛ’n w’a yo sɛ? ?Be kwla fa sunnzun laa liɛ’n?’+

4 “Zoova waan yoo: ‘Zorobabɛli, jran kekle. Zozadaki i wa Zozie, wɔ mɔ a ti min ɲrun jranfuɛ dan’n, jran kekle.’

“‘Nvle’n nunfuɛ mun, amun kwlaa amun jran kekle,+ yɛ amun di junman’n,’ Zoova yɛ ɔ kan sɔ-ɔ.

“‘Afin n jin amun sin,’+ Zoova m’ɔ ti sonja’m be su kpɛn’n yɛ ɔ kan sɔ-ɔ. 5 I nun nga amun fin Ezipti lɔ fiteli’n,+ nda nga n tali amun’n, maan amun wla kpɛn su. Asa ekun’n, min wawɛ’n te o amun su.*+ Nán srɛ kun amun.’”+

6 “Afin Zoova m’ɔ ti sonja’m be su kpɛn’n waan yoo: ‘Ɔ ka kaan sa’n, ń má kéje ɲanmiɛn’n, nin asiɛ’n, nin jenvie’n, nin asiɛ ba’n ekun.’+

7 “‘Ń má kéje nvlenvle’m be kwlaa, kpɛkun ninnge kpakpa* nga be o nvlenvle’m be kwlaa be nun’n, bé bá.+ Yɛ ń yó maan sua nga ɲán ɲrun kpa,’+ Zoova m’ɔ ti sonja’m be su kpɛn’n yɛ ɔ kan sɔ-ɔ.

8 “‘Sika’n ti min liɛ, yɛ sika ɔkwlɛ’n ti min liɛ,’ Zoova m’ɔ ti sonja’m be su kpɛn’n yɛ ɔ kan sɔ-ɔ.

9 “‘Sua nga i ɲrun ng’ɔ́ wá ɲɛ́n i kasiɛn su’n, ɔ́ yó dan trá laa liɛ’n lele,’+ Zoova m’ɔ ti sonja’m be su kpɛn’n yɛ ɔ kan sɔ-ɔ.

“‘Yɛ ń yó maan lika nga nun tɔ́ fɔuun,’+ Zoova m’ɔ ti sonja’m be su kpɛn’n yɛ ɔ kan sɔ-ɔ.”

10 Kɛ Dariisi boli famiɛn dilɛ bo’n i afuɛ nɲɔn su’n, i anglo ngwlan’n i le ablaɔn-nin-nnan (24) su’n, Zoova kannin ndɛ kleli i nuan ijɔfuɛ Aze.+ Ɔ seli kɛ: 11 “Zoova m’ɔ ti sonja’m be su kpɛn’n waan yoo: ‘Yaci, usa Ɲanmiɛn ɲrun jranfuɛ mun naan like nga mmla’n kle’n be kan:+ 12 “?Sɛ sran kun bu i tralɛ’n nuan naan ɔ fa nnɛn ng’ɔ ti sanwun’n sie nun’n naan i tralɛ’n kan kpanwun, annzɛ like wie mɔ be tɔnnin’n, annzɛ duvɛn, annzɛ ngo, annzɛ aliɛ uflɛ’n, aliɛ sɔ’n yó sanwun?”’”

Ɲanmiɛn ɲrun jranfuɛ’m be tɛli su kɛ: “Cɛcɛ.”

13 Yɛ Aze usali ekun kɛ: “?Sɛ sran kun kannin saka annzɛ nnɛn fuɛn, naan i sɔ’n ti ɔ yo fiɛn’n, naan ɔ ko kan ninnge sɔ’m be nun kun’n, like sɔ’n yó fiɛn?”+

Ɲanmiɛn ɲrun jranfuɛ’m be tɛli su kɛ: “Ɔ́ yó fiɛn.”

14 Yɛ Aze seli kɛ: “Zoova waan yoo: ‘Kɛ nvle nga nunfuɛ’m be ti sɔ-ɔ, yɛ min ɲrun’n, kɛ ngalɛ’n sa yɛ nvle nga ti-ɔ. Yɛ kɛ ngalɛ’n sa yɛ n bu junman nga be di’n i kwlaa-ɔ. Like kwlaa nga be fa man min’n ɔ ti fiɛn.’

15 “‘Sanngɛ siɛn’n, amun yaci, kɛ ɔ fɛ i andɛ’n, amun bu sa nga i akunndan kpa:* ?Kwlaa naan b’a fa yɔbuɛ kun b’a sie i yɔbuɛ uflɛ su Zoova i sua’n nun lɔ’n,+ 16 sa benin yɛ ɔ ju-ɔ? Kɛ sran kun kɔ i ble* guawlɛ lɔ’n, ɔ bu i kɛ ɔ kwla ɲan suliɛ ablaɔn (20). Sanngɛ suliɛ blu cɛ yɛ ɔ ɲɛn i-ɔ. Yɛ sran ng’ɔ kɔ duvɛn yiwlɛ lɔ’n, ɔ bu i kɛ ɔ kwla ɲan suliɛ ablenun (50). Sanngɛ ablaɔn (20) cɛ yɛ ɔ ɲɛn i-ɔ.+ 17 Min sa kannin amun nin amun sa nun ninnge’m be kwlaa. N yoli maan amun ninnge’m be wuli kee, tukpacɛ wie sacili amun fie su ninnge mun,*+ kpɛkun nzraama mɔ kɛ nzue tɔ́-ɔ ɔ gua’n, ɔ sacili amun fie su ninnge mun. Ɔ nin i sɔ ngba’n, amun nun wie fi w’a kpɛmɛn i ɲin min wun wa,’ Zoova yɛ ɔ kan sɔ-ɔ.

18 “‘Andɛ m’ɔ ti anglo ngwlan su i le ablaɔn-nin-nnan (24) su’n, yɛ be wlali Zoova i sua’n i bo ase-ɔ. Amun yaci, kɛ ɔ fɛ i andɛ’n, amun bu sa nga i akunndan kpa.*+ Amun bu i akunndan kpa: 19 ?Like nga amun lua be’n, i wie te o tanngannin’m* be nun?+ Viɲin nin figie nin grenadie nin olivie’n be nin-a suman. ?Nɛ́n i-ɔ? Kɛ ɔ fɛ i andɛ’n, ń yrá amun su.’”+

20 Anglo’n i le ablaɔn-nin-nnan (24) su’n, Zoova kannin ndɛ ekun kleli i nuan ijɔfuɛ Aze.+ Ɔ seli kɛ: 21 “Se Zorobabɛli m’ɔ sie Zida’n kɛ: ‘Ń má kéje ɲanmiɛn m’ɔ la nglo lɔ plaii’n nin asiɛ’n.+ 22 Ń yí famiɛn diwlɛ’m be famiɛn bia’n i ase yɛ ń núnnún like ng’ɔ man mɛn’n nun famiɛn diwlɛ’m be wunmiɛn’n.+ Ń útu kakaklolo mun nin be su fufuɛ’m be ɲin ase, kpɛkun nnɛn kpanngɔ mun nin be su fufuɛ’m bé tɔ́, sran kun i bɔbɔ i niaan’n yɛ ɔ́ fá tokofi kún i-ɔ.’”+

23 “‘Zoova m’ɔ ti sonja’m be su kpɛn’n waan yoo: ‘Cɛn sɔ’n nun’n, Sealtiɛli+ i wa Zorobabɛli,+ wɔ mɔ a ti min sufuɛ’n, ń fá wɔ.’ Zoova waan: ‘Ń fá wɔ káci kɛ be sa mma ti nga mɔ be fa sie like nzɔliɛ’n sa. Afin wɔ yɛ n kpali wɔ-ɔ,’ Zoova m’ɔ ti sonja’m be su kpɛn’n yɛ ɔ kan sɔ-ɔ.”